Yohana 17
17
Mahemo ma Yesu
1Yesu abere amemala ineena abinwa ibyo, nianalalamira mu mbingu neneena mbu: «Tata, akashangi kameeraho. Bwerekya angulu ya Muala wawe, kwebula mbu Muala wawe naye abwerekye angulu yawe. 2Kubwishi wamuhaa amaala kwa bandu boshe, kwebula mbu aboshe bowamuhaa, ahebo buingo bwa biro byoshe. 3Na buingo bwa biro byoshe ubo, ni bula mbu abandu bakumenye, iwe, we Ongo wa kuli, bamenye ne Yesu Kirisitu yowalikaa. 4Ingye namebwerekya angulu yawe kwa kihuo, Kubwishi namemala amulimo wowanihaa mbu nikole. 5Tsene, Tata, unihe ngulu mwa mbere sawe, angulu yonabaa nayo mwa mbere sawe lubere lwa rebumbwa ra kihuo.
6«Namebwerekya aretsina rawe kwa bandu bowanihaa, bowalondolaa kwa kihuo. Ibo babaa bandu bawe, unihabo ingye, nabo bametsimba kwa kinwa kyawe. 7Tsene, bamemenya kwa byoshe byowanihaa bitengire ira uli. 8Kubwishi namehabo abinwa byowanihaa, nabo bameangirirabyo. Bamemenya mwa kuli ku nitengire ira mwawe, bameba neimirira kwiwe wowanilikaa.
9«Anihemerabo, nitanihemera abandu ba kwa kihuo, wetuwe bowanihaa, kubwishi ibo bo bandu bawe. 10Abyoshe byoniri nabyo byawe, na byoshe byouli nabyo byani, nani namehabwa angulu mubyo. 11Ingye nitikyendeba kandi kwa kihuo, wetuwe ibo bakinali mukyo, nani aniwicha youli. Kubatyo, Tata woukomire, ulangebo mwa maala ma retsina rawe, aretsina rowanihaa, kwebula mbu babe na buuma ngakuno ingye nawe kotuli muuma. 12Mwa mango nabaa kuuma nabo, nalangaabo mwa maala ma retsina rawe, iro retsina rowanihaa. Namelangabo hate kiro na muuma mubo yaherire, ali ate yalirene ihera, kwebula mbu aMaandiko Makomire mabererere. 13Tsene naya youli. Anineena abinwa ibi nikinali kwa kihuo, kwebula mbu alumoo lwani lungi lube mwa myete yabo. 14Ingye napfuliraabo aKinwa kyawe, na kihuo kyamebaabo kubwishi ibo bate ba kihuo, ngakuno ingye konitali wa kwa kihuo. 15Nitanikuhema mbu utengyebo mwa kihuo. wetuwe anikuhema uhebo maala mehima amulenda Shitani. 16Ibo bate bandu ba kwa kihuo, ngakuno ingye konitali wa kihuo. 17Uirebo bandu bawe kushekushe, mwa kuli yawe. Akinwa kyawe yo kuli. 18Nga kowanilikaa kwa kihuo, nani konamelikabo kwa kihuo. 19Nameitula kwiwe kubwishi bwabo, kwebula mbu nabo baitule kwiwe kushekushe.
Yesu ahemera aboshe bobamwimirire
20«Nitanihemera abaho, wetuwe anihemera kandi na bobakendeiimirira kubwishi bwa meyiso mabo. 21Anihema kwebula mbu aboshe babe muuma, ngakuno kouli mwingye, nani niri mwiwe. Anikuhema kandi mbu babe mu buuma netwe, kwebula mbu akihuo kiimirire ku wowanilikaa. 22Nahaabo angulu yowanihaa, kwebula mbu babe mu buuma nga kotuli mu buuma ingye nawe. 23Anihema mbu nibe mu buuma nabo, nawe ube mu buuma nani. Kwebula mbu abandu ba kihuo kino bamenye kwiwe wowanilikaa, nge watsiyirabo nga kounitsiyire.
24«Tata, anixonda mbu abandu bowanihaa babe kuuma nani honikendeba, nabo baxunge kwa ngulu yani, rebula mbu angulu yowanihaa, kubwishi wanitsiyiraa buxondotsi bwa rebumba akihuo. 25Tata woutunganene, nakiro mbu akihuo kitakwichi, ingye nikwichi na bobameniimirira aba, bechi kwiwe wowanilikaa. 26Namekubwerekya kubo, nikalengeretsa ikubwerekya kubo kwebula mbu antsiyi youli nayo kwingye ibe mubo, na ngyewene nibe mwa myete yabo.»
Currently Selected:
Yohana 17: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
