Yohana 15
15
Yesu ye musabibu wa kuli
1«Ingye, niri musabibu wa kuli, ne Tata ye muhingi. 2Iye anacha kintsi ndabi yoiri mwingye yoitahetako bipfuma. Wetuwe yoinerehetako bipfuma, anerekomyayo, kwebula mbu iheteko bipfuma bingi kutsibu. 3Imwe, mwameotola ikomibwa kubwishi mwametsimba kwa meyiso monabaiyisaa. 4Muikale mwingye, nani mwimwe. Andabi itangahetako bipfuma iri itali mwa musabibu. Nemwe kwonoko, mutangakocha ihetako bipfuma mutaikere mwingye.»
5«Ingye niri musabibu, nemwe muli ndabi. Yaikere mwingye, nani mwiye, anahetako bipfuma bingi, kubwishi butsira ingye, mutangakocha ikolaki. 6Amundu ataikere mwingye, ni ali ngakuno ndabi yoirekerwe neuma. Asandabi sosiumire sinakongyibwa nelekerwa mu muchanwa, nato ni sashita. 7Mukeikala mwingye na binwa byani bikeikala mwimwe, ni mwahema kyomushashire nemwe ni mukahabwakyo. 8Mukehetako bipfuma bingi, Tata ni akahabwa ngulu, kubatyo nimukaba bemitsa bani ba kuli. 9Nga ko Tata anitsiyire ingye, nani kwonoko konibatsiyire imwe. Muikale mwa ntsiyi yani. 10Muketsimba kwa mateeko mani, ni mukaikala mwa ntsiyi yani, ngakuno konatsimbaa kwa mateeko ma Tata neikala mwa ntsiyi yiwe.»
11«Nababwiraa abinwa ibi kwebula mbu mumoe ngakuno ingye, na lumoo lwenyu lube lungi. 12Areteeko ronabaha ni rolino: mutsiyirane mwenabene ku mwenabene nga konabatsiyiraa. 13Hatali yawete ku ntsiyi nyingi ilengyitse amundu yatula abuingo buwe kubwishi bwa bera bewe. 14Imwe muli bera bani, muli mungakola nga konibateeka. 15Nitanibaluka kandi mbu bapfubulwa, kubwishi amupfubulwa atamenya byo ninakuwabo anerekola. Wetuwe anibaluka bera bani, kubwishi namebabwerekya abyoshe byonaumpfaa itenga ira mwa Tata. 16Mute mwemwanilondolaa ingye, wetuwe ingye, ngyenabalondolaa. Ingye namebalika mbu muende shamuheteko bipfuma byobitawete ntsindiro. Kubatyo Tata akabaha abyoshe byomuhema mwe tsina rani. 17Areteeko ronibaha ni bula mbu mutsiyirane mwenabene ku mwenabene.»
Abandu ba kwa kihuo babaa Yesu na bemitsa bewe
18«Abandu ba kwa kihuo kino bakebabaa imwe, ni mwamenya kwingye, ngye mubere nabawaa nabo. 19Muli mwabaa bandu ba kwa kihuo, akihuo nge kyabantsiyiraa, kubwishi nge muli bandu bakyo. Wetuwe nabalondolaa itenga mwa kihuo kino, nemwe mutakiri bandu ba kwa kihuo kiro na hake. Kubwishi bwekyo, abandu ba kwa kihuo bababaire. 20Muubuke abinwa byonababwiraa mbu amupfuku atalengitse ninakuwabo. Abandu bali baninubyaa ingye, nemwe ni kobakanabanubya batyo. Na bali batsimbaa kwa meyiso mani, ni kobanakatsimba na kwa meyiso menyu. 21Wetuwe bakabakolera abyoshebyo kuluenda aretsina rani, kubwishi batechi yanilikaa. 22Niri nitawichaa na niri nitaneenaa nabo, nge batachirirwe lubancha lwa ntsambi, wetuwe tsene batangakocha iiyana asantsambi sabo. 23Yanibaa ingye, ni abaa Tata naye. 24Niri nitakolaa mwa kati kabo mo mikolere yoitatsayakolwa na undi mundu woshewoshe, nge batachirirwe lubancha lwa ntsambi. Wetuwe tsene bamelola kwa mikolere, na batyo bakinanibaire ingye kuuma ne Tata. 25Bamekola batyo kwebula mbu abinwa byobyaandikwaa mwa Muomba wabo, bibererere mbu: ‹Banibaaa butsira kinwa.›»
26«Mwa mango aMuasikya endewicha, yonikendebalikako itenga ira mwa Tata, aMutima wa kuli, yatenga ira mwa Tata, iye, endepfula amwatsi wani. 27Nemwe mwendepfula amwatsi wani, kubwishi mwameba kuuma nani ihuluka mwa ndangiro.»
Currently Selected:
Yohana 15: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
