Yohana 11
11
Alupfu lwa Lasaro
(Luk 10:38-42; Yoh 5:21,26-29; Mar 5:35-43; Luk 7:11-16)
1Habaa mundu muuma mukoni mbu ye Lasaro, mwicha i Betaniya kuuma na bali babo, Mariya ne Marita. 2Mariya uyo yahakaa Ninakuwetu alungo nekababya abishando biwe mwa mpfiri siwe, ne Lasaro muala wabo yabaa mukoni. 3Bali babo babiri niabanalaira amwatsi ku Yesu mbu: «Ninakuwetu, mwira wawe mutsiyirwa, mukoni.» 4Mwa mango Yesu aumpfaa amwatsi uyo, niananeena mbu: «Abukoni ubo butali bwemwita, wetuwe bwebwerekya angulu ya Ongo nebula mbu Muala wa Ongo asingyibwe.» 5Yesu abaa atsiyire Lasaro kuuma nabalibabo Marita ne Mariya. 6Yesu abere aumpfao ku Lasaro mukoni, nianabanda kandi biro bibiri habaa. 7Niyo abwira abemitsa bewe mbu: «Tufuluke i Yuteya.» 8Abemitsa niabanamubwira mbu: «Mwiyisa, hatatsahatsuka biro bingi ihuluka ha Bayahuti babaa abaxonda ikukabula mabale, tsene auxonda iyayo kandi!» 9Yesu nianaxubya mbu: «Mwa mubitsi muli saa ikumi na ibiri. Amundu ni angaba akeenda mu mwishi atangatsitala, kubwishi niaxunga kwa kyaka kya kwa kihuo kino. 10Wetuwe amundu ni angaba akeenda mu kiro, ni akatsitala, kubwishi ni atawete ku kyaka mwiye.» 11Yesu abere ameneena abinwa ibyo, nianabwirabo kandi mbu: «Mwira wetu Lasaro ameya tulo, wetuwe naya imusisimula.» 12Abemitsa niabanamuxubyitsa mbu: «Ninakuwetu, ali ameya tulo, ni akalama.» 13Yesu abaa ni aneena ku Lasaro amepfa, wetuwe abemitsa bewe baanikira mbu aneena kuluenda tulo, twa tulo. 14Niyo Yesu abwirabo kyenene mbu: «Lasaro amepfa. 15Nani anibamoera, kubwishi nitabaayo, kwebula mbu muimirire. Tuende ira yali.» 16Tomasi, yalukwa mbu: «Ihasha», nianabwira abemitsa balikyabo mbu: «Netwe tuende, tupfe kuuma naye.»
Yesu ye pfuka na buingo
17Mwa mango Yesu ahikaa, nianashingana Lazaro ni amepanda biro bine mwesinda. 18Hakati ka mutsi we Betaniya na mulungu we Yerusalemu, habaa buende bwa bilometere bishatu. 19Bayahuti bangi babaa bamehika mwa Marita ne Mariya kwechirabo mikocho kubwishi bwa lupfu lwa muala wabo. 20Marita abere aumpfao ku Yesu awicha, nianaya imukokera mwa nchira, wetuwe Mariya nianashiba mwa nyumba. 21Marita nianabwira Yesu mbu: «Ninakuwetu, uli wabaa hano, nge muala wetu atapfire. 22Tsene, nichi ku kindu kyoshekyoshe kyoukahema Ongo, akakuhakyo.» 23Yesu nianabwirabo mbu: «Muala wenyu akapfuka.» 24Marita nianaxubya mbu: «Nichi kwakendepfuka mwa mango abandu bendepfuka mwa lwire lwa ntsindiro.» 25Yesu nianamubwira mbu: «Ingye, ngye ipfuka na buingo, ula yaniimirire, endebaho nakiro apfa. 26Na yaliho neniimirira ingye, atendepfa kiro na hake. Mbeni uimirire ikyo?» 27Nianaxubya mbu: «Naki, Ninakuwetu, niimirire kwiwe we Kirisitu, Muala wa Ongo, yawicha mwa kihuo.»
Yesu apfukya Lasaro
28Marita abere ameneena abinwa ibyo, nianaya ibirangira Mariya mwali wabo nemubuherera mbu: «Mwiyisa amewicha, naye akubirangira.» 29Mwa mango Mariya aumpfaatyo, nianabatuka chuba kweya imushingana. 30Yesu abaa ni atatsaingira neki mwa mutsi, abaa ni akinali ho Marita amushinganaa. 31Mwa mango aBayahuti bobabaa mwa nyumba kuuma ne Mariya, kwemuchira mikocho babere baxunga kwamebatuka chuba nehuluka, niabanamukulikira. Baanikira mbu aya ilirira kwe sinda. 32Mariya abere ahika ho Yesu abaa ali nemuxungako, nianapfukama mwa mbere siwe neneena mbu: «Ninakuwetu, uli wabaa hano, nge muala wetu atapfire.» 33Mwa mango Yesu amuxungaa ali alira, na Bayahuti bobawichaa kuuma naye nabo ni abalira, nianaumpfa bwaale bungi mwa mwete, aba neyongwa. 34Nianabutsabo mbu: «Mwamutaa hai?» Niabanamuxubyitsa mbu: «Ninakuwetu, wiche, ulole.» 35Yesu nianalira. 36Kubatyo Bayahuti bauma niabananeena mbu: «Lola kwabaa amutsiyire ngaki!» 37Wetuwe na bandi mubo niabananeena mbu: «Iye yalamyaa akihumahumi, atanganahangire Lasaro mbu atapfaa?» 38Niyo Yesu aumpfa kandi bwaale bungi, neya kwa isinda. Aresinda iro rabaa ni lukunda lukingirwe mwi bale linene. 39Yesu nianabwira abandu bobabaa aho mbu: «Mutengye arebale iri!» Wetuwe Marita, mwali wabo amundu yapfire, nianamuxubyitsa mbu: «Ninakuwetu, aharabeha tsene, kubwishi byahara biro bine ibi aterwe!» 40Yesu nianamubwira mbu: «Nitasanikubwira ku ukeniimirira ni ukalola kwa ngulu ya Ongo?» 41Niabanatengya arebale iro. Yesu nianalalamira mu mbingu, neneena mbu: «Tata, anikusima kubwishi wameniumpfira. 42Ninechi ku unaniumpfira abiro byoshe, wetuwe anineena nityo kubwishi bwa abandu aba bobali hano kwebula mbu baimirire kwiwe wounilikire.» 43Abere ameneena abinwa ibyo, nianabirangira mu mulenge mule, mbu: «Lasaro, huluka hambuwa.» 44Amupfu nianahuluka mwesinda, ni aminirwe asaminwe na milundi mu biremba, na busu buwe ni bufukirwe mu lukimba. Yesu nianabwirabo mbu: «Mumubohole, mumulike aiendere.»
aBayahuti bakola nama yeita Yesu
(Mat 26:1-5; Mar 14:1-2; Luk 22:1-2)
45Bayahuti bangi mu bobawichaa mwa Mariya, nelola ku byo Yesu akolaa, niabanamwimirira. 46Wetuwe na bandi mubo niabanaendera aBafarisayo nebwirabo byo Yesu abaa amekola. 47Kubatyo, aBoshebakungu na Bafarisayo niabanakoranya aBushenge Bukulu mbu: «Tuire tute kwexunga kwa mundu uyu abwerekya tulolero tungi? 48Tukemusiulira, abandu boshe ni bakamwimirira. Niyo aBaroma bendewicha ibihya ahekalu na kihuo kyetu.» 49Muuma mubo, aretsina liwe ni ye Kayafa, yabaa Shebakungu kwa mwaka uko, niananeena mbu: «Mutechiki, imwe! 50Mutechi ku likwirire mundu muuma akepfa kubwishi bwa abandu, ilengya aluanda loshe kwehwerekerera?» 51Kayafa ataneenaa abinwa ibyo mbu abitenga mwa muanikire uwe yewene. Wetuwe aneenabyo kubwishi iye yabaa Shebakungu kwa mwaka uyo. Abaa ni akola butahwa kandi ku Yesu akapfa kubwishi bwa luanda lwa Bayahuti. 52Atipfe kubwishi bwa luanda lwa Bayahuti ho. Wetuwe akapfa kubwishi bwa bana ba Ongo bobashanchene mwa kihuo kyoshe, kwebula mbu ahirebo mu buuma. 53Ihuluka alwire ulo niabanaba na mutima weita Yesu. 54Ikyo kituma Yesu ateretamba kyenene kandi mwa Bayahuti. Nianaya mwa kyango kyo kiri hofi na bweru, mwa mulungu walukwa mbu: «Efuraimu.» Nianaba iyo kuuma na bemitsa bewe. 55Alwire lukulu lwa Pasaka ya Bayahuti lwabaa lwahara hofi. Kubatyo bandu bangi niabanauruka i Yerusalemu buxondotsi bwa Pasaka kweihotsa. 56Abandu niabanaxonderetsa Yesu, naho ni bali mwa hekalu, niabanabutsabutsanya mbu: «Imwe amuxunga mute? Amundu uyu atiwiche mwa lwire lukulu luno?» 57aBoshebakungu na Bafarisayo babaa ni bamehana rubu kwa bandu mbu mundu woshewoshe yakamenya ho Yesu ali ni abwirabo nge bamutsimba.
Currently Selected:
Yohana 11: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
