Matayo 24
24
Yesu watura emwasi mbu eNumba ya Ongo iseshamburwa
(Mar 13.1-2; Ruk 21.5-6)
1Yesu wakianga usaange mu Numba ya Ongo, ebanafunsi bae bamweyere kamushea ebwimbe bw'eNumba ya Ongo.
2Ina Yesu wasako bo mbu: «Nibwirengi muriira mbu ebiti mbi bisungange banu hano, hatasii ikoi hiyo na rimpe. Ebiti bisekakurwa!»
Ebisesaayo kubusondori na hende echuo
(Mar 13.3-13; Ruk 21.7-19)
3Yesu wakianga wamarika mu rou rw'eMiseituni, ebanafunsi bae bamweyere mpo habesenga we iwe kisine. Bamushisha mbu: «Twiri kuba ebinwa mbyo byameba ongo bisetayo mu ani matu, na kini kiteerere kisesheayo erikuruka rabe na ch'ematu a hende.»
4Yesu wasako bo mbu: «Mukohyanga! Kiro mwea wabuhusayo. 5Bushwa mbu bea bingi baseyayo mu rina rani. Ebea mbo basenda bebange mbu: ‹Ani nge Kirisitu!› Basenda bahusange bea bingi. 6Mukwenda banu murukirange ebea bebange emyasi n'etumensimensi tw'ebita. Ina kiro musubahiyo, bushwa mbu ebinwa mbyo bisekomenwayo ibese. Ina imbyo bitashei nensi engendero y'echuo. 7Chuo kima kisekwanayo na kimpe chuo. Na bwami buma busekwanayo na bumpe bwami. Kusebeseyo rwaka hima na karingiri nki kasetenjayo byuo bingi. 8Ebinwa biti mbyo bisebeseyo buri eribucha r'ebwae reritangirwa.
9«Ebea basenda babusiburange mbu munubiwe nguru na mushurwe. N'ebea b'ebyuo biti basebuyongwayo bushwa nani. 10Mu matu ngo, bea bingi baserekeyo erisimira rabo. Ebea benda basiburanange bima mu bampe, n'ibaana. 11Batahwa bingi ba manko basesaayo, na basehusayo bea bingi. 12Na bushwa n'eririra r'ebibi, enchimi y'ebea bingi isebeseyo nkeke. 13Ina ewasesumyayo emutima ieya na hende, nge waseshukarayo. 14N'eMwasi Wakonda uno w'eBwami bwa mu mbingu useturwayo mu byuo biti n'ibese kariho kuri ebea bati. Nampo ke nge ngendero.»
Minubo yasuma
(Mar 13.14-23; Ruk 21.20-24)
15«Mukusungayo ingu wabikirwa mbu: ‹wakuhaba tuna mubishabisha›, ingu washembwanga n'emutahwa Ndanyere mbu#24.15 Ndan 9.27; 11.31; 12.11. wasimana mpi hashurukara. Emubishabisha ngo, emutahwa Ndanyere wabesenga wameba bushwa nae. Ebinwa mbyo, eusomange byo wateerere buni bweba byo. 16Kai, ebea mbi basebeseyo mu chuo cha ku Yundea babekeri mu sangu. 17Ingu wasebeseyo hiyo n'enumba angi wahitire tu kumunda karinga bikai. 18Na kinsi mwea ngu wasebeseyo ekwishwa, angi wakuruke tu kukwae karinga enchangi yae.
19«Mu matu ngo, rasebeseyo buhanya kuri ebomina bakure nambi barishange mabere! 20Muheme Ongo kongo eribeka rinu ndo kiro rabeseyo mu matu a keme abe otu rwa Sabato! 21Bushwa mbu, mu matu ngo, kusebeseyo minubo mingi nguru nji itangasungwanga itukire echuo chabumbwa ieya na runotu. N'eminubo buri njo itasungwiyo tu rumpe otu.#24.21 Soma Ndan 12.1. 22Ematu ngo, amubesengi mbu Ongo ntiwakehyanga o kongo kusira mwea ngu waseshukarayo. Ina wakehyayo o bushwa n'ebea bae mbi ebirondorenga we.
23«Mu matu ngo, kuba mwea wabwire mbu: ‹Mukai Kirisitu nge uno uri hano!› Abe mbu: ‹Nge uo uri kuko!› Emwea ngo kiro mumusimirayo. 24Bushwa mbu kusesaayo bea mbi basenda bebange manko mbu ibo nge Kirisitu, hima na batahwa ba manko. Ebati mbo basenda baronjange biteerere bikiri na bishisharo kongo kuba rakochekana bahuse n'ebea mbi ebirondorenga Ongo. 25Mukohyanga! Namabwire ebinwa biti mbyo kubusondori n'erieya rabyo.
26«Kuba mwea wamubwere mbu: ‹Mukai, Kirisitu nge uo mu bweru!› Kiro mwenda ko. Abe mbu: ‹Nge uno uri ekundani.› Kiro mumusimira. 27Bushwa mbu erieya rani ani eMwana w'eMwea risebeseyo buri ebusungwanga ekimpenya ekusairenga emwishi n'ieya ekusamenga o.
28«Kinsi mpi hari kinda nge hakumananengǎ esanju.
Erikuruka r'eMwana w'eMwea
(Mar 13.24-27; Ruk 21.25-28)
29«Kuruma n'eminubo y'ematu ngo,
Emwishi usebundukayo mwirimya,
N'emweri utasakiyo tu,
N'esankekeni sisekireyo ituka mu mbingu,
N'ebiti mbi biri n'ebukwakare mu mbingu, bisetengayo.#24.29 Soma Isa 13.10; 34.4.
30«Kuruma nampo, ekiteerere ch'erikuruka rani ani eMwana w'eMwea kisesungwayo mu mbingu. Ebea b'ebyuo biti baserireyo. Basenisungayo ani eMwana w'eMwea imbu butukange ani mu mbingu niri mu mwanya na bunkangwe, na busime bukiri.#24.30 Soma Ndan 7.14. 31Ekahanda kakiri kasombwayo, nampo naatumayo ebamaraika bani mu sankaro sinye s'echuo, kasonja ebea bani bati mbi barondoranga ani ituka mu byuo biti.#24.31 Soma Neh 1.9.
Mushinga w'emuti w'etini
(Mar 13.28-31; Ruk 21.29-33)
32«Mwendi mwihana ietere emushinga w'emuti w'etini. Emuti ngo, kuba esantabi sae satanga, ebisu byae nabyo nti byatanga. Nampo banu mwebanga mbu emange ngie arikeya. 33Ngebumbo hotu, mukukiayo musunga ebinwa biti mbyo, musibirirayo mbu ani eMwana w'emwea ngie niri kwihi, na ngie niri mu sandubi sinu. 34Nibwirengi muriira mbu: Ebea b'ematu ano batakwiyo bati na nti basunga imbu bwabererera ebinwa bino. 35Embingu n'echuo bisetayo, ina ebinwa byani ibyo bitetiyo karankuso.
Ongo wisine wosi erotu rwa hende
(Mar 13.32-37; Ruk 17.26-30,34-36)
36«Ina kusira mwea uti-uti ngu wosi erotu ndo, abe entambi nji yamusaa mo ebinwa mbyo. Abe ebamaraika ba mu mbingu nani eMwana w'eMwea nti tosi, ina Tita wisine ho nge wosi. 37Imbu bwabesenga ebinwa mu kiranga cha Noa nge busebeseyo hotu byo mu rikuruka rani ani eMwana w'eMwea. 38Bushwa mbu mu kiranga ncho, kubusondori n'erike r'embura ningi, ebea babesenga barisange n'iomo, ibinga n'ibingisha, ieya n'erotu ndu rwakianga Noa wakime mu bwato.#24.38 Soma Ntan 6.9; 7.6. 39Ebea mbo ntibasibanga nchi kisesaa ieya n'erotu ndu rwakianga embura ningi yeya n'ishiria ebati#24.39 Soma Ntan 7.7-24..
«Ngebumbo busebese byo, ani eMwana w'eMwea nasekia nakurukǎ. 40Mu matu ngo, bea babi basebeseyo ekwishwa, uma waserierwayo na umpe ntwasia. 41Bomina babi basebeseyo boorange hima, uma waserierwayo na umpe ntwasia.
42«Bushwa nancho, mukereshe, bushwa mbu nti banu mosi erotu ndu ruseyayo ani Nyere kurinu. 43Musibiriranga shu! Kuba mine numba wamusibange entambi nji iseya emwibi, wamukereshange kongo waranga enumba yae itakakurwi. 44Ngyasingwa, na banu hotu mukohyanga, bushwa mbu ani eMwana w'eMwea naseyayo mu kashangi nki nti kosi rero banu.
Emushinga w'emukori ngu winyihirwa
(Ruk 12.41-48)
45«Inye nge mukori winyihirwa na uri na bwenge? Nge ingu nyere kurwabo wamusimikanga kasimanire ebampe bakori babine, kongo wendi uninkange bo ebio mu ntambi nji yakomenwa. 46Emukori ngo wakasanirwa kuba nyere kurwabo wasekɨa wakuruka, wasemukumana nt'ukorange emurimo ngo. 47Nibwirengi muriira mbu nyere kurwabo wasemuninka isimanire ebutumba bwae buti. 48Ina, kuba emukori ngo wamubese wema na kwiebesha mbu: ‹Nyere Kuritu wamasia›, 49n'ibucha ihumbaka babine, n'irisa n'iomo hima n'ebatamiri. 50Emukori ngo, nyere kurwae wǎkuruka erotu n'entambi nji entiyosi rero we. 51Nampo, nyere kurwae wasemukama nguru n'imunubya ebunubyanga bo ebea b'enkuse, n'imutáa nku ekuserire we n'inuba nguru.»
Currently Selected:
Matayo 24: nyj
Highlight
Copy
Compare
Share
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
