Yohana 12
12
Maria wasingo Yesu marashi
(Mat 26.6-13; Mar 14.3-9; Ruk 7.36-50)
1Matu mutuba kubusondori n'ePasaka, Yesu weya ku Betania kurwabo Rasaro, ingu wakianga Yesu wafura. 2Nanko bamuronjee bio. Nampo Marita waninka bo byo. Rasaro wabesenga uma mu'mbi babesenga barisange na Yesu. 3Nampo Maria waringa chunda cha murangi wa marashi abusi bwasuma, eatunganyiwa n'esantondo s'enarito sashongokara. Wasingo o mu mindi ya Yesu n'ikono yo n'ebuteo bwae. Enumba iti yanunka marashi. 4Ina Yuta Isikarioti uma mu banafunsi ba Yesu ingu wasemusibura weba mbu: 5«Bushwa nki emarashi ano abusi bwasuma ntí akuchuka Ndinari mana ashatu abehe n'ebehe mbyo byamuninkwange ebasene?»#12.5 Ndinari: Babesenga babikiranga ebikoroto by'ebehe mbyo mbu «Ndinari». Endinari mana ashatu nso byabesenga behe mbi bininkwanga emwea ngu wamakora mwaka uma. 6Ntwebanga ebinwa mbyo bushwa n'erirukire ebasene bonso, ina bushwa mbu wabesenga mwibi, nae ngwabesenga uranganga enku, ntwikuturenga mu behe imbu bwashima we.
7Ina Yesu weba mbu: «Mumureki mu buhoro, bushwa mbu wabesenga wamabika emarashi ano bushwa n'erotu ndu rusetawayo ani. 8Banu murikanga n'ebasene ho kirotu, ina mutubesiyo nani kirotu.»
Nama y'erishura Rasaro
9Kikembe kikiri ch'eBayuta charukira emwasi mbu Yesu uri ku Betania. Bushwa nancho, benda ko ntíbushwa ra Yesu ho, ina bushwa hotu r'erisunga Rasaro ngu ewakukia Yesu wafura. 10Nampo, ebakwakare b'ebakuhani baronja nama hotu y'erishura Rasaro, 11itukana n'erifuka ra Rasaro, Bayuta bingi básimira Yesu, n'isiana n'ebakwakare babo.
Yesu wakime ku Yerusaremu
12Ebutu bwakianga bwamacha, kikembe kikiri cha bea mbi bianga mu kibimbi ch'ePasaka barukira mbu Yesu uri mu munse mwiya ku Yerusaremu. 13Nampo, batinge mangarara n'ienda kamukoke nti bakuange mu murenge mukiri mbu: «Ongo watatwe! Wakasanirwa ingu weyange murina ra Nyere Kuritu!» Wakasanirwe emwami w'eBaisiraeri.
14Nampo Yesu wakumana chana cha mpunda, n'itaya hiyo nacho imbu bweba eMitiro Yashurukara mbu:
15«Angi musubaha banu bisa ku Sayuni!
Mukai, eMwami winu weya,
wamataya mu chana ch'embunda.»#12.15 Soma Sak 9.9.
16Etambi njo, ebanafunsi bae ntíbateereranga ebinwa mbyo, ina Yesu wakianga wamafuka basubukia mbu ebinwa mbyo byaandikwa bushwa nae, nambu bwamukorenga bo.
17Ebea bati mbi babesenga hima na Yesu mu ntambi wafuranga Rasaro ituka murisinda, babesenga ba kariho b'emwasi ngo kuri ebea. 18Bushwa nancho, bea bingi benda kamukoke bushwa babesenga bamarukira mbu wamaronja kiteerere ncho. 19Nampo eBafarisayo bashishana mbu: «Mbeni ntímusunga mbu tutamukocha ikora kikai? Mukai, echuo kiti nge kino chamumisa!»
Yesu webange bushwa n'erikwa rae
20Kwabesenga bea bima entí Bayuta munkati n'ebea mbi biyanga ku Yerusaremu kasimanike Ongo mu kibimbi ch'erotu rukiri rw'ePasaka. 21Nampo, bendere Firipo wa murubungu rwa ku Betesaita ku Ngariraya n'imwire mbu: «Emukwakare, tusondange isunga Yesu.»
22Firipo wenda kere Nderea ebinwa mbyo. Kuruma nampo, ebabi mbo, benda kature Yesu. 23Yesu wasako bo mbu: «Entambi y'eritatwa r'eMwana w'eMwea rameya. 24Nibwirengi muriira mbu: ekuma k'engano kasia ho kisine, abe ntíkariburi nki katawa muroto. Ina kuba kamakwa, ntikabuta byuma bingi. 25Ewashima ebuingo bwae, waseriminya bo. Ina ingu entíwarae mu buingo bwae mu chuo kino, iwe waranga bo ematu ati. 26Kuba emwea usondange inikore, wahwa inimisa, n'emukori wani wabese nani kuti nku kusebese ani. Emwea wamanikore, Tita wani wamunika itunda.»
Yesu webange bushwa n'erikwa rae
27Kuruma nampo, Yesu weba mbu: «Enompena emutima wani usira buhoro. N'ebe buni? Mbeni nebe mbu: ‹eTita nikuhemange mbu nishukae mu ntambi ino y'eminubo?› Anga, ntamukocha ihema mbo, bushwa mbu nakweya mu chuo kino kongo nasunga eminubo njo. 28eTita, tata erina rabe!»
Nampo, murenge mukiri warukirwa ituka mu mbingu webange mbu: «Namatata ro, na nǎtata tu ro.»
29Ekikembe ch'ebea mbi babesenga bari mpo, imbi barukiranga emurenge ngo, beba mbu: «Akese murabyo wa nkuba ngo.» Nabampe beba mbu: «Maraika ngwakosi webange nae!»
30Ina Yesu were bo mbu: «Emurenge uno ntíwakurukirwa bushwa nani, ina bushwa ninu. 31Ino nge tambi y'echuo kino ihukumiwa. Emukwakare w'echuo kino wenda ka henswa. 32Ina ani nasekia namakukumwa ituka mu chuo nǎshoresha bea bingi iya kuri ani.» 33Wakweba mbo mwishea mbu ebusekwa we.
34Nampo ekikembe ch'ebea mbo bamusako mbu: «Twamasoma mu Mitiro Yashurukara mbu: ‹Kirisitu wǎbeseyo ho ematu ati. Mbeni buni ke ngebwamukia weba mbu rakomenwa eMwana w'eMwea watarishiwe kokwiyo? N'eMwana w'eMwea ngo ng'inye?›» 35Yesu were bo mbu: «Echaka kikiri ninu mu ntambi sikeke. Mutambe bukiri banu n'echaka, kongo emwerimya utabubumbi, bushwa mbu ewendange mu mwerimya ntosi ekwendange we.» 36Ngebumbo musimire echaka ebukiri banu nancho.
Erirukwa erisimira r'eBayuta
Yesu warekia wamakinda ieba ebinwa mbyo, wiire rae n'ekwebisa kore n'ekikembe ncho. 37Nakiro ebiteerere biti mbi byamashea we bo, ntíbakumusimira, 38kongo ebinwa mbi byebanga emutahwa Isaya byabererera:
«eNyere Kuritu, mbeni inye ngwakusimira ebinwa byakweba bate?
Mbeni inye ngwakusheiwa mikorere y'ebukwakare bwa Nyere Kuritu.»#12.38 Soma Isa 63.1.
39Batamukochange hotu isimira itukana n'ebinwa bya Ongo mbi ebyerenga we emutahwa Isaya mbu:
40«Ongo wamamina emeso abo,
kongo atakai.
Wamasumya emitima yabo,
kongo batakuruki kuri ani,
nani namuramyange bo.»#12.40 Soma Isa 6.9-10.
41Isaya webanga ebinwa mbyo bushwa mbu wasungirenga kore ebusime bwa Yesu, nae weba emyasi yae.
42Nakiro mbo, bingi munkati n'ebakwakare b'eBayuta básimira Yesu. Ina bushwa n'eBafarisayo, ntíbebanga mbu bamasimira, babesenga basubahange mbu bamuhenswa mbu batakimi mu sinangoki. 43Ibo bashimanga itatwa n'ebea kukia eritatwa ndi ritukange kuri Ongo.
Yesu nge chaka
44Ngebumbo, Yesu wakua mu murenge mukiri mbu: «Ingu wanisimira ntwánisimira ho ani, ina wasimira hotu ngu ewarenituma. 45Ewanisunga, wasunga hotu ingu ewakunituma. 46Ani nameya mu chuo buri chaka, kongo kinsi mwea ngu wanisimira watariki mu mwirimya. 47Emwea wamarukira ebinwa byani na ntwatinge byo, ntíani nge namuhukumu. Bushwa mbu ntínakwiya kahukumu echuo, ina nakwiya kashukaya cho. 48Emwea ngu wanitina, nitina ebinwa byani wasehukumiwa itukana nando. N'ekinwa nchi echakweba ani nge kisemuhukumu erotu rwahende. 49Bushwa mbu ntínakweba mu bukwakare bwani ani kisine, ina Tita ngu ewakunituma nge wakuniere ebinwa mbi biseba ani n'ihana byo. 50Nani nosi mbu emomba wae urishange karamo k'ematu ati. Bushwa n'ebinwa mbi byebange ani, nebange ho byo imbu bwakianga Tita wániire byo.»
Currently Selected:
Yohana 12: nyj
Highlight
Copy
Compare
Share
Want to have your highlights saved across all your devices? Sign up or sign in
2025 GAPLCDI, Group of Associations for the Promotion of Languages, Cultures for Integral Development
