Markə 6
6
Azü gala Nazaratə zâ lɔsu əndje zâ kə Jezu ne
(Matiɔ 13.53-58; Luki 4.16-30)
1Jezu âfɔ kôto ə gû mâ lə gala ə̂në tshə gêrə lə nə kɔ. Atrawaya nə̂ ye zâ äwä ye. 2Tə̂ əlo saaba, tshə vɔ̂tə̂ kə yisə̂ ərə kə azü lə anda aangbɔ. Ə̂kpû azü nə ə̂në əndje ngbâ tə bandanə ə sə̂ kə dji əpʉ nə̂ ye nə kɔ, kumu əndje kpê pâ əndu əndje â əndje yû tə̂ əndje ə pa: «Tshə sɔ̂tə̂ aərə səke nɔ̂ kotâ a? Əde kə zâ marä tə̂ kə wusə̂ ərə səke kə ətshə kɔ? Tshə mbrə̂ marä tə̂ aərə ə̈lü səkɔ atâ a? 3Ə də̂ awosuru tshelə aayɔ, əgblə nə̂ Marə̂, də̂ kə səye ne a? Ə də̂ aye Zake də Jɔsə də Zudə gâ ndə Shemɔ də kə sə̂ ne a? Alakobɔ nə sə sə kotəye lə takpa tə̂ əzə̂ ne a?» Lə kumu nə, əndje wə̂ra tə̂ əndje ndə kə za lɔsu əndje kə ətshə gâ ye. 4Bale, Jezu pâ kə əndje ə pa: «Əndje yində awopandəma Ndjapä yi lə əgɔ nə̂ ye, lə bəngʉ nə̂ ye wala lə anda nə̂ ye də ə̂tə̂ ye ne.» 5Jezu lî lî ndə kə mbrə ə̈bə̈ ərə ə̈lü bale kôto səkɔ ne. Bale, tshə zâ kʉtə̂ kəna ye gâ pâ alabə̈ alayïrəka â arəka nə̂ əndje nə nglɔ̂. 6Kumu ye kpê pâ əndu ye mbrə ə̂në azü nə wə̂ra tə̂ əndje ndə kə za lɔsu əndje kə ətshə kɔ.
Jezu wlâ azü-awla nə morofo amanə bishi nə
(Matiɔ 10.1,5-14; Luki 9.1-6)
Mandânə, Jezu nâ na ye lə aaya aəgɔ ə̂në ə sə̂ trö kɔ ndə kə yisə̂ əpʉ kə azü. 7Tshə ê azü-awla nə morofo amanə bishi nə ə wlâ əndje bishi bishi. Tshə zâ awlra kə əndje ndə kə pa əndje grɔ aafrɔ ayirə̂. 8Tshə zâ ama kə əndje ə pa: «E zä zä ə̈bə̈ ərə mbrə ana nə ne, e zä kʉtə̂ tshɔngblɔ. E kö kö rəgo wala ngbede ana wala ngendja gâ lə ngbede ne. 9Bale, e yï tama gâ tə̂ ə̈nü e, ə kö kö ləba bishi ne.» 10Tshə pâ kə əndje ə pa: «Anda ə̂në e li gâ lə nə, e sə̈ kôto ʉrrr ka ə afɔ ə ro. 11Tə̂ ətshe ə̂në azü nə wəra tə̂ əndje tə̂ e ə wəra tə̂ əndje ndə kə dji əpʉ nə̂ e, e wütu lə əgɔ nə, ə grɔ̈ ashɔ ə̈nü e gbo əndje ndə kə yisə̂ nə pa Ndjapä ə wa ngbanga gâ lə kumu əndje je.» 12Atrawaya nə nâ na ye ə mʉ̂ Ə̂rɔ̂ Əpʉ kə azü nə ə pâ kə əndje ə pa əndje tshi äwä angbrɔ kə mbrə tə̂ əndje tʉ. 13Əndje grɔ̂ aafrɔ ayirə̂ tə̂ azü ngbatshe ə mbrə̂ kâdâ gâ tə̂ alayïrəka ə̂në əndje ngbâ ə ngbâ kɔ â arəka nə̂ əndje nə nglɔ̂.
Erɔdə gâ ndə Jezu
(Matiɔ 14.1-2; Luki 9.7-9)
14Kandää, əyïngerə Erɔdə djî ndə əpʉ Jezu nə, mbrə ə̂në əɨrɨ ye zâ ətshe nɔ̂. Alabə̈ azü pâ: «Zââ Batistə kə shê lə takpa tə̂ akuzu gâ ye kɔ! Âdârə ə̂në tshə sə də awlra ndə kə mbrə aərə ə̈lü kɔ kə sə̂.» 15Bale, alabə̈ əndje pâ: «Eli kə sə̂!» Alabə̈ aata əndje pâ: «Ə̈bə̈ awopandəma Ndjapä mata ə̈bə̈ angbrɔ awopandəma Ndjapä leme-e kɔ kə sə̂.» 16Ə̂në Erɔdə nə djî əpʉ səkɔ, tshə pâ: «Zââ kə sə̂! Mə dê əgʉ ye leme-e gâ ye, bale, tshə shê gâ ye!»
Kuzu Zââ Batistə
(Matiɔ 14.3-12; Luki 3.19-20)
17Mbrə ə̂në, leme-e, Erɔdə nə də ə̂tə̂ ye zâ ama â əndje têgbɔ Zââ nə â kânga ə̈nü ye də ə̂wû kowɔ â wlî ətshə gâ lə anda kânga, mbrə ə̂në Erɔdə nə zâ Erɔdiadə, əwɔ aye nə də Flipə. 18Mbrə ə̂në Zââ nə pâ kə Erɔdə nə ə pa: «Ə sə sə də äwänə ndə kə pa bə za əwɔ aye zə ne!» 19Erɔdiadə nə wə̂ra tə̂ ye tə̂ Zââ nə də tshelə ye bale â yîndə ndə kə pa əndje wo ətshə, bale, tshə sɔ̂tə̂ äwä nə sɔ̂ ne. 20Erɔdə nə kpê rawa Zââ nə ə kpê mbrə ə̂në tshə wûsə̂ nə ə pa Zââ nə sə̂ tə ə̂rɔ̂ əzü ə sə̂ ndje tə əzü ə̂në Ndjapä zâ ətshə kpî mbrə ətshə. Erɔdə nə bâta ətshə ndə kə pa azü ma ərə ma tə̂ ye ne. Tshə sə̂ də əgo ndə kə dji əpʉ nə̂ Zââ Batistə nə, bale, alɔ ə̂në tshə â djî əpʉ nə̂ ye nə, tshə wûsə̂ ərə ə̂në tshə mbrə kɔ wu ne.
21Bale, Erɔdiadə nə sɔ̂tə̂ ə̈bə̈ ə̂rɔ̂ äwä tə̂ əlo sandaga kə zu Erɔdə nə. Tə̂ alɔ nə səkɔ, Erɔdə nə mâ âgbɔ̂ sandaga mbrə əgbro azü kosəra tshe ngotə̂ ye, də aâgbɔ̂ azü nə̂ atrugu də əgbro azü əgɔ Galile. 22Əgblə yashe nə̂ Erɔdiadə nə lî gâ lə anda nə â vɔ̂tə̂ kə vi tə̂ ye. Kə vi tə̂ ye nə fʉ̂ tə̂ Erɔdə nə də azü nə ə̂në tshə ê əndje ndə sandaga nə kɔ. Bale, əyïngerə nə pâ kə əgblə yashe nə ə pa: «Yü tshuku ərə ə̂në tshelə zə yində nə kɔ kə əmə, mə sə kə za kə əbə.» 23Tshə drâ ama ye kə ətshə ə pa: «Ərə ə̂në bə yu tshuku nə kə əmə, ngâ, mə sə kə za kə əbə; â sə kəmə tə kə wa tshelə əgɔngerə nə̂ əmə kpə ə̂grû nə, mə sə kə za ə̈bə̈ nə kə əbə.» 24Əgblə yashe nə wûtu ə yû əyï nə ə pa: «Ərə yekɔ də̂ bə yində nə ə pa mə yu tshuku nə?» Əyï nə kîrə əpʉ kə ətshə ə pa: «Yü tshuku kumu Zââ Batistə.»
25Əgblə yashe nə dô tə̂ ye katshä ə gû gâ ngotə̂ əyïngerə nə ə pâ kə ətshə ə pa: «Mə yində nə ə pa bə za kumu Zââ Batistə katshä katshä səye gâ lə kpângblâ sambe kə əmə.» 26Əyïngerə nə sə̂ də əyo tə̂ lɔsu ye tə bandanə. Bale, mbrə ə̂në tshə drâ tə̂ ye gâ ye lə ala azü nə nɔ̂ ə̂në tshə ê əndje ndə sandaga nə kɔ, tshə yî yîndə kə wəra tə̂ ye tə̂ ərə nə ə̂në əgblə yashe nə yû tshuku nə kɔ ne. 27Trale, tshə wlâ ə̈bə̈ trugu ə zâ ama kə ətshə ndə kə pa tshə gu də kumu Zââ Batistə nə. Trugu nə nâ mâ lə anda kânga nə je ə dê kumu Zââ Batistə nə. 28Tshə gû də kumu Zââ nə lə kpângblâ sambe ə zâ kə əgblə yashe nə â əgblə yashe nə zâ kə əyï nə. 29Ə̂në atrawaya nə̂ Zââ nə djî əpʉ səkɔ, əndje nâ ə zâ əko Zââ nə ə shî gâ lə ə̈bə̈ ə̂dû.
Jezu kô rəgo kə ə̈bə̈ əgerə ə̂kpû azü
(Matiɔ 14.13-21; Luki 9.10-17; Zââ 6.1-14)
30 Azü-awla nə ngbô tə̂ əndje gâ ngotə̂ Jezu ə pâ əpʉ aərə ə̂në əndje mâ gâ ye kɔ, də aərə ə̂në əndje yîsə̂ nə gâ ye kɔ kə ətshə. 31Jezu pâ kə əndje ə pa: «E nä gâ əmə, a nä gâ tə̂ ə̈bə̈ ətshe ə̂në azü guta gu tə̂ nə ne kɔ, e wü tə̂ e teashe kane.» Mbrə ə̂në ə̂kpû azü sə̂ kə na nə ə sə̂ kə gu na ye â sə̂ kə gaga tə̂ əndje gâ je gâ əmə â äwä ndə kə pa əndje zɨ rəgo gûta gû ne.
32Əndje ô gâ lə əgerə âgbâ ə nâ ngrʉ̂ lə ə̈bə̈ ngbûndû. 33Bale, ə̂kpû azü nə wû əndje ə̂në əndje sə̂ kə ro na ye kɔ ə yêrɔ əndje. Azü âfɔ lə aəgɔ bale bale ə nâ də ə̈nü əndje ə wûtu angbʉlînə gâ tə̂ ətshe ə̂në Jezu də azü-awla nə̂ ye sə̂ kə na tə̂ nə kɔ.
34Alɔ ə̂në Jezu jêrə lə əgerə âgbâ nə, tshə wû ə̈bə̈ əgerə ə̂kpû azü, əyo əndje mbrə̂ ətshə mbrə ə̂në əndje sə̂ mata andalimi ə̂në awobata əndje gûta gû ne kɔ. Tshə vɔ̂tə̂ kə yisə̂ əpʉ ngbatshe kə əndje. 35Ə̂në ətshe ndô trö ndə kə bu nə gâ ye kɔ, atrawaya nə̂ Jezu nə nâ trö də ətshə ə pâ kə ətshə ə pa: «A sə gâ lə ngbûndû a səye, ətshe nə vɔ̂tə̂ kə bu nə gâ ye. 36Grɔ̈ azü nə, əndje gü na ye gâ lagɔ də tshelə aaya aəgɔ ə̂në ə sə trö kɔ ndə kə pa əndje yɔ rəgo ə zɨ.» 37Bale, Jezu kîrə əpʉ kə əndje ə pa: «E kö rəgo də ə̂tə̂ e kə əndje, əndje zɨ!» Bale, əndje yû ətshə ə pa: «Bə yində nə ə pa ä na ə yɔ mapa ə lï də ə̂lê ngendja ngbangbo bishi#6.37 Tə̂ tshekɨ nə səkɔ, ə̂lê ngendja bale sə̂ tə ngendja kosəra nə̂ əzü lə əlo bale. Ə̂lê ngendja ngbangbo bishi sə̂ tə ngendja kosəra nə̂ əzü lə yipʉ mindû amanə vəta. (200) ka ä ko kə əndje, əndje zɨ a?» 38Jezu yû əndje ə pa: «E sə də mapa vəkɔ? E nä ə wü kane.» Əndje prâ ətshe nə ə wû ə pâ kə ətshə ə pa: «Ä sə də mapa mindû də agiangû bishi.»
39Bale, tshə zâ ama kə əndje ə pa əndje pa ndə nə kə azü nə, əndje sə gâ tʉ gâ pâ təyu güsü nə ə ngbo tə̂ əndje gâ tə̂ nə ndjɔ̂ ndjɔ̂ ndjɔ̂. 40Azü nə sə̂ gâ tʉ, alabə̈ nə ngbô tə̂ əndje gâ tə̂ nə ngbangbo bale ngbangbo bale (100) â alabə̈ əndje ngbô tə̂ əndje gâ tə̂ nə zazü bishi də morofo zazü bishi də morofo. 41Jezu kô amapa nə mindû də agiangû nə bishi ə lîshi gâ lafɔ ə ê ə̂rɔ̂ əpʉ gâ pâ nə. Mandânə, tshə ngɔ̂ tshelə amapa nə ə kô kə atrawaya nə ndə kə pa əndje kru tshelə nə tə̂ ə̂kpû azü nə. Tshə krû ndje tshelə agiangû nə bishi nə kɔ tə̂ ə̂kpû azü nə nɔ̂. 42Azü nə nɔ̂ zɨ̂ rəgo nə â tshelə əndje sû. 43Atrawaya nə rɔ̂ ə̂dû aə̈ndö amapa nə də agiangû nə, ə sû kakli morofo amanə bishi. 44Azü nə ə̂në əndje zɨ̂ amapa nə kɔ, akoshe sə̂ sake mindû (5 000).
Jezu nâ ana pâ ala ə̂ngû
(Matiɔ 14.22-33; Zââ 6.16-21)
45Trale mandânə, Jezu zâ ama kə atrawaya nə̂ ye nə ndə kə pa əndje o gâ lə əgerə âgbâ nə ə gbo ə̂ngû nə djoko ətshî je angbʉlînə, djoko Betəsayida ndə kə pa ətshə də ə̂tə̂ ye, tshə grɔ ə̂kpû azü nə gâ ye kane. 46Mandânə ə̂në tshə grɔ̂ əndje, əndje gû na ye gâ ye kɔ, tshə nâ mâ pâ kaga ndə kə yu Ndjapä. 47Ə̂në alɔ dɨ̂ gâ ye kɔ, əgerə âgbâ nə sə̂ mâ ə̂grû ə̂ngû nə â Jezu sə̂ pə kʉtə̂ ye mâ tə̂ ashɔ. 48Tshə wû ə pa atrawaya nə̂ əne nə wû əyo tə bandanə ə̂në əndje sə̂ kə djerə əgerə âgbâ nə kɔ, mbrə ə̂në əyi nə yî gbo əndje. Gu ndə tshe kratshe, Jezu sə̂ kə na ana pâ ala ə̂ngû nə gu nə gâ tə̂ əndje. Tshə yîndə kə ro əndje ə ro. 49Ə̂në əndje wû ətshə ə̂në tshə sə̂ kə na pâ ala ə̂ngû nə kɔ, əndje wû ənə̂ əndje ə pa də ə̈bə̈ ngandrə kə sə̂ â vɔ̂tə̂ kə ta râwâ. 50Mbrə ə̂në, əndje wû ətshə nɔ̂ â awa zâ əndje. Trale, Jezu pâ əpʉ kə əndje ə pa: «Lɔsu e zɨ̈tɨ, əmə kə sə̂! Awa mbrə̈ e mbrə̈ ne!»
51Mandânə, tshə ô gâ lə əgerə âgbâ nə gâ ngotə̂ əndje â əyi nə kâtə̂ nə. Kumu atrawaya nə nɔ̂ kpê pâ əndu əndje. 52Mbrə ə̂në əndje wûsə̂ tshelə âdâ ərə ə̈lü amapa səkɔ wû ne. Kə wusə̂ ərə nə̂ əndje lî lî ndə kə pa əndje dji tshelə nə ne.
Jezu grɔ̂ arəka tə̂ azü lə ashɔ əgɔ Jenezaratə
(Matiɔ 14.34-36)
53Mandânə ə̂në əndje gbô ə̂ngû nə gâ ye kɔ, əndje yî kumu əndje mâ lə ashɔ əgɔ Jenezaratə. 54Ə̂në əndje jêrə lə əgerə âgbâ nə gâ tʉ gâ ye kɔ, trale, azü nə yêrɔ Jezu. 55Azü nə kpê ärɔ̈ ə nâ na ye sɔ lə əgɔ nə nɔ̂ ə kô alayïrəka gâ pâ aklekpa ə gû də əndje kə Jezu nə tə̂ ətshe nɔ̂ ə̂në əndje djî ə pa tshə sə̂ tə̂ nə kɔ. 56Tə̂ ətshe nɔ̂ ə̂në Jezu nə rô tə̂ nə kɔ, lə agala wala lə aaya aəgɔ wala lə akəndɨ, azü nə kô alayïrəka ə ngbô əndje gâ tə̂ nə gâ tə̂ äwä ə kɨ̂ ə̂sə̂ əyo tə̂ əndje kə ətshə ə pa tshə katə̂ alayïrəka nə, əndje goro kʉtə̂ ama ləba nə̂ ye. Azü nə nɔ̂ ə̂në əndje gôro ətshə kɔ, arəka nə̂ əndje nə nglɔ̂.
Currently Selected:
Markə 6: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
