Markə 10
10
Koshe lï lï ndə kə katə̂ əwɔ nə ne
(Matiɔ 19.1-9)
1Jezu zâ äwä ndə kə na mâ lə ashɔ əgɔ Jude, mâ ətshî Jurda. Ə̂kpû azü kwâtə̂ndje ə ngbô tə̂ əndje gâ ngotə̂ ye â tshə vɔ̂tə̂ kə yisə̂ əpʉ kə əndje mata ə̂në tshə mbrə alɔnɔ̂ kɔ.
2Alabə̈ Afariza nâ gâ tə̂ ye, əndje yîndə kə le ətshə ə le ndə kə pa alane sɔtə̂ ə̈bə̈ əpʉ lə ama ye. Əndje yû ətshə ə pa: «Âgbɔ̂ əpʉ nə̂ əzə̂ zâ äwä kə əzü ndə kə pa tshə grɔ əwɔ nə a?» 3Tshə kîrə əpʉ kə əndje ə pa: «Ərə yekɔ də̂ Mayïzə zâ ama kə e ndə kə pa e ma nə kɔ?» 4Əndje pâ: «Mayïzə zâ äwä kə əzü ndə kə pa tshə ta fraka kə katə̂ əwɔ nə ka ə grɔ ətshə.»#10.4 Wu Əpʉ 24.1. 5Bale, Jezu pâ kə əndje ə pa: «Mayïzə nə tâ əpʉ səkɔ gâ lə âgbɔ̂ əpʉ mbrə ə̂në kumu e gbɔ ə gbɔ. 6Əlînə ə̂në Ndjapä mâ aərə kɔ, tshə mâ koshe də yashe. 7“Âdârə ə̂në koshe sə kə katə̂ abä nə də əyï nə â sə kə tɔ popo əwɔ nə kɔ kə sə̂ 8â əndje bishi nɔ̂ sə kə sə tə əzü kpiabale.”#10.8 Wu Vɔtə̂ 2.24. Rəkɔ, əndje sə sə pə kwatəndje tə azü bishi ne, bale, əndje sə kə sə tə əzü kpiabale. 9Rəkɔ, ərə ə̂në Ndjapä ngbô gâ tə̂ nə gâ ye kɔ, əzü sɔ̈ sɔ̈ tshelə nə ne.»
10Alɔ ə̂në əndje gû ə sə̂ mâ lə anda gâ ye kɔ, atrawaya nə̂ ye nə yû ətshə kwatəndje gâ pâ əpʉ səkɔ. 11Tshə pâ kə əndje ə pa: «Əzü ə̂në tshə grɔ əwɔ nə â za ə̈bə̈ ata nə, tshə mâ əmbrʉ ərə gâ tə̂ angbʉlî yashe səkɔ gâ ye. 12Kədə ə̈bə̈ yashe kə grɔ äkɔ̈ nə â za ata koshe, tshə mâ əmbrʉ ərə gâ ye.»
Jezu ê ə̂rɔ̂ əpʉ gâ pâ aneshe
(Matiɔ 19.13-15; Luki 18.15-17)
13Azü kô aaya aneshe ə nâ də əndje kə Jezu ndə kə pa tshə za kəna ye gâ pâ əndje. Bale, atrawaya nə ngâ kə azü nə. 14Ə̂në Jezu wû ərə səkɔ, tshelə ye kô ətshə â tshə pâ kə atrawaya nə ə pa: «E kätə̂ aaya aneshe əndje na gâ tə̂ əmə! E känga äwä känga tə̂ əndje ne, mbrə ə̂në Əgɔngerə nə̂ Ndjapä sə mbrə azü ə̂në əndje sə mata əndje kɔ. 15Djatra əpʉ, mə pa kə e, əzü ə̂në tshə yində Əgɔngerə nə̂ Ndjapä nə yi mata aya əgblə ne, tshə sə sə kə li gâ lə nə bale ne.» 16Mandânə, tshə kô aneshe nə gâ lə kəna ye ə zâ kəna ye gâ pâ əndje ə tô ngwarə gâ pâ əndje.
Əyïrishi gâ ndə Jezu
(Matiɔ 19.16-30; Luki 18.18-30)
17Alɔ ə̂në Jezu zâ äwä ndə kə ro nə, ə̈bə̈ koshe kpê ärɔ̈ na nə ə gbə̂te gâ ətshi ye ə yû ətshə ə pa: «Ə̂rɔ̂ awoyisə̂ ərə, ərə yekɔ də̂ mə lï ndə kə ma ndə kə sɔtə̂ sorô nə̂ alɔnɔ̂?» 18Jezu pâ kə ətshə ə pa: «Bə ê əmə tə ə̂rɔ̂ əzü mbrə yekɔ? Ə̈bə̈ əzü bale sə sə tə ə̂rɔ̂ əzü ne, kʉtə̂ Ndjapä tshî. 19Bə wusə̂ aəpʉ ə̂në ə sə lə âgbɔ̂ əpʉ nə̂ Mayïzə kɔ gâ ye ə̂në ə pa: “Wö əzü wö ne; pä prä əwɔ əzü wala äkɔ̈ əzü ne; zɨ̈ angba zɨ̈ ne; pä pä əterə gâ lə kumu ngâ zə ne; zä zä ərə nə̂ əzü tə̂ äwä afrɔ ne; lʉ̈ abä zə də əyï zə.”»
20Koshe nə pâ kə ətshə ə pa: «Awoyisə̂ ərə, mə mbrə̂ tə̂ əmə ə lï də aəpʉ səkɔ pə lə mɔdɔ tə̂ əmə ʉrrr wutu nə kpəsəye.» 21Jezu shêkɔ ətshə mbrə ə̂në tshə yîndə ye ə pâ kə ətshə ə pa: «Ərə bale kə sə pə ndə kə pa bə ma nə: gü ə kä aərə nə̂ zə nɔ̂ ə krü tshelə ngendja nə tə̂ alayïəyo ka ə sə də aərə mâ lafɔ-e. Mandânə, nä gâ əmə ə zä äwä əmə.» 22Bale, ə̂në koshe nə djî əpʉ səkɔ, əzɨ zâ ətshə, tshə kô əyo tə̂ ye â gû na ye mbrə ə̂në tshə sə̂ də aərə ngbatshe.
23Jezu shêkɔ atrawaya nə̂ ye nə ə̂në əndje sə̂ dji ətshə kɔ ʉrrr ə pâ kə əndje ə pa: «Kə li gâ lə Əgɔngerə nə̂ Ndjapä gbɔ ə gbɔ tə̂ aawosə də aərə ngbatshe!» 24Kumu atrawaya nə kpê pâ əndu əndje ə̂në əndje djî əpʉ səkɔ. Bale, Jezu pâ kwatə̂ye kə əndje ə pa: «Aneshe nə̂ əmə, kə li gâ lə Əgɔngerə nə̂ Ndjapä gbɔ ə gbɔ. 25Kə li əyïrishi gâ lə Əgɔngerə nə̂ Ndjapä gbɔ ə rô kə ro agia ə̂në əndje djî əɨrɨ ye ə pa shamo kɔ lə əgro swa.» 26Kumu atrawaya nə kpê pâ əndu əndje kwatəndje ə rô pâ nə â əndje yû tə̂ əndje lə takpa tə̂ əndje ə pa: «Bale, əde kə lï ndə kə she lə kuzu?» 27Jezu shêkɔ əndje ʉrrr ə pâ: «Ə sə tə ərə ə̂në azü lï lï ndə kə ma nə ne, bale ə də̂ Ndjapä də̂ ne, mbrə ə̂në Ndjapä lï ndə kə ma aərə nɔ̂.»
28Bale, Piarə pâ kə ətshə ə pa: «Wü-a! Ä tshî aərə nɔ̂ tʉ gâ ye â za äwä zə kɔ.» 29Jezu kîrə əpʉ ə pa: «Djatra əpʉ, mə pa kə e: mbrə əmə də Ə̂rɔ̂ Əpʉ, kədə əzü kə tshi anda nə̂ ye wala alaye nə, alakobɔ nə, əyï nə, abä nə, aləvu nə wala akəndɨ nə̂ ye tʉ, 30tshə sə kə sɔtə̂ aanda, alaye, alakobɔ də alayï azü, aləvu də akəndɨ äwä ngbangbo də aərə əyo gâ pâ nə kpəsəye; tshə sə kə sɔtə̂ sorô nə̂ alɔnɔ̂ tə̂ alɔ ə̂në ə sə kə na gu nə kɔ. 31Azü tshitshinə ngbatshe sə kə sə tə azü tshe mandânə â azü tshe mandânə sə kə sə tə azü tshitshinə.»
Tə̂ äwä vəta nə, Jezu pâ əne sə kə tshu â she
(Matiɔ 20.17-19; Luki 18.31-34)
32Jezu də atrawaya nə̂ ye sə̂ tə̂ äwä ndə kə na mâ Jeruzalamə, tshə sə̂ mâ ətshinə. Atrawaya nə sə̂ kə li tshelə əndje â azü nə ə̂në əndje sə̂ kə na mandâ əndje kɔ, əndje sə̂ də awa. Jezu kô kwatə̂ye atrawaya nə morofo amanə bishi gâ ngotə̂ ye ə vɔ̂tə̂ kə pa əpʉ ərə ə̂në ə sə kə wutu gâ tə̂ ye kɔ kə əndje. 33Tshə pâ kə əndje ə pa: «E wü-a! A sə kə na mâ Jeruzalamə, azü sə kə za Əgblə nə̂ Əzü gâ lə kəna aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə. Əndje sə kə wa ngbanga kuzu gâ lə kumu ye ə za ətshə gâ lə kəna azü ə̂në əndje wusə̂ Ndjapä wu ne kɔ. 34Əndje sə kə mɔ ətshə ə ku ngrusu gâ tə̂ ye ə da ətshə də djakwa ə wo ətshə. Əlo vəta mandânə, tshə sə kə she nə.»
Ərə ə̂në Zake də Zââ yû tshuku nə
(Matiɔ 20.20-28)
35Bale, aləvu Zebede, Zake gâ ndə Zââ, nâ trö də Jezu ə pâ kə ətshə ə pa: «Awoyisə̂ ərə, ä yində nə ə pa bə mbrə ərə ə̂në ä sə kə yu əbə tə̂ nə kɔ kə ä.» 36Tshə yû əndje ə pa: «E yində nə ə pa mə ma ərə yekɔ kə e?» 37Əndje pâ kə ətshə ə pa: «Alɔ ə̂në bə sə gâ lə ngerə ə̂yî nə̂ zə, zä äwä kə ä ndə kə pa ä sə gâ ngotə̂ zə, bale gâ ndə ndəkɔ zə, bale nə gâ ndə gəle zə.» 38Jezu pâ kə əndje ə pa: «E wusə̂ ərə ə̂në e yu tshuku nə kɔ wu ne. E lï ndə kə pa e ndju kopo əyo ə̂në mə sə kə ndju nə kɔ wala e za batamo ə̂në mə sə kə za nə kɔ a?» 39Əndje kîrə əpʉ kə ətshə ə pa: «Ä lï də nə.» Bale, Jezu kîrə əpʉ kə əndje ə pa: «E sə kə ndju kopo əyo ə̂në mə sə kə ndju nə kɔ ə sə kə za batamo ə̂në mə sə kə za nə kɔ tə djatra əpʉ. 40Bale, ə də̂ əmə də̂ kə za ama ndə kə pa əzü sə gâ tʉ gâ ndə ndəkɔ əmə wala gâ ndə gəle əmə nə ne. Ətshe səkɔ sə mbrə azü ə̂në Ndjapä gâmba mbrə əndje gâ ye kɔ.»
41Alɔ ə̂në ə̂dû atrawaya nə morofo nə djî əpʉ səkɔ, əndje vɔ̂tə̂ kə ma əkɔ gâ tə̂ Zake nə də Zââ nə. 42Bale, Jezu ê əndje nɔ̂ ə pâ kə əndje ə pa: «E wusə̂ nə ə pa azü ə̂në əndje wu əndje mata alayïngerə kɔ ə̂në əndje sə gâ pâ amarä kɔ, əndje sə kə ma ngerə gâ pâ azü aəgɔ nə. Əgbro azü aəgɔ sə də awlra gâ pâ azü aəgɔ nə̂ əndje nə. 43Marä tə̂ ərə rəke lï lï ndə kə sə lə takpa tə̂ e ne. Bale, əzü nɔ̂ ə̂në tshə yində kə sə tə âgbɔ̂ əzü lə takpa tə̂ e, tshə sə̈ tə əyïkosəra nə̂ angâ nə. 44Əzü nɔ̂ ə̂në tshə yində kə sə tə əzü tshitshinə lə takpa tə̂ e, tshə sə̈ tə kanga nə̂ e nɔ̂. 45Mbrə ə̂në Əgblə nə̂ Əzü nâ nâ ndə kə pa azü mbrə kosəra kə ətshə ne, bale tshə nâ ndə kə pa tshə mbrə kosəra kə azü ə za tə̂ ye tə ndogɔ ndə kə pa tshə yɔ ə̂kpû azü lə kuzu.»
Jezu mbrə̂ â ala Barətime sɔ̂
(Matiɔ 20.29-34; Luki 18.35-43)
46Əndje yî kumu əndje mâ Jerikɔ. Alɔ ə̂në Jezu sə̂ kə wutu lə gala nə də atrawaya nə̂ ye gâ ndə ə̂kpû azü mandâ ye kɔ, ə̈bə̈ əyïbula ə̂në əɨrɨ kə də̂ Barətime kɔ, ɨrɨ Time, sə̂ gâ tʉ gâ ndʉ äwä ə sə̂ kə e ətshe ndə aərə. 47Alɔ ə̂në tshə djî ə pa Jezu, əzü əgɔ Nazaratə kə sə̂ kɔ, tshə vɔ̂tə̂ kə ta râwâ ə pa: «Jezu, Ɨrɨ Davidə, wü əyo əmə!» 48Alabə̈ azü ngâ kə ətshə ndə kə pa tshə ngbo ama ye gâ tə̂ nə, bale, tshə tâ râwâ nə kwatə̂ye rô pâ nə ə pa: «Ɨrɨ Davidə, wü əyo əmə!» 49Jezu kâ ə pâ: «E ë ətshə.» Əndje ê əyïbula nə ə pâ kə ətshə ə pa: «Gbɔ̈ ə gbɔ̈! Äfɔ, tshə sə kə e əbə.»
50Əyïbula nə zâ əgerə ləba nə̂ ye wlî gâ tʉ ə âfɔ gbrâ ə nâ gâ tə̂ Jezu nə. 51Jezu zâ əpʉ ə pâ kə ətshə ə pa: «Bə yində nə ə pa mə ma yekɔ kə əbə?» Əyïbula nə pâ kə ətshə ə pa: «Awoyisə̂ ərə, mə yində kə lishi.» 52Bale, Jezu pâ kə ətshə ə pa: «Gü na ye, lɔsu zə shê əbə lə kuzu gâ ye.» Trale tshə vɔ̂tə̂ kə lishi ə zâ äwä Jezu nə na na ye.
Currently Selected:
Markə 10: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
