Matiɔ 9
9
Jezu grɔ̂ rəka tə̂ ə̈bə̈ wurtʉ
(Markə 2.1-12; Luki 5.17-25)
1Jezu ô gâ lə ə̈bə̈ əgerə âgbâ ə gbô ə̂ngû ə gû mâ lə gala nə̂ ye. 2Alabə̈ azü zâ ə̈bə̈ wurtʉ ə̂në tshə shô gâ tʉ gâ pâ klekpa kɔ ə nâ də ətshə kə ətshə. Alɔ ə̂në Jezu wû lɔsu əndje kɔ, tshə pâ kə wurtʉ nə ə pa: «Gbɔ̈gbɔ tə̂ zə, əgblə nə̂ əmə! Tshelə anyaka nə̂ zə gbâ gâ ye.»
3Bale, alabə̈ aawoyisə̂ âgbɔ̂ əpʉ nə̂ Mayïzə pâ mâ lə əndje ə pa: «Koshe səye sə kə gu Ndjapä!» 4Bale, Jezu wûsə̂ əpʉ ə̂në ə sə̂ mâ tə̂ lɔsu əndje kɔ ə pâ kə əndje ə pa: «Mbrə yekɔ də̂ e sə də aəmbrʉ aəpʉ rə tə̂ lɔsu e kɔ? 5Ndə kə pa kə əzü ə pa: “Tshelə anyaka nə̂ zə gbâ gâ ye”, wala: “Äfɔ ə nä ana”, ənə̂ta kə gbɔ gbɔ ne? 6Bale, mə yində kə yisə̂ nə kə e ə pa Əgblə nə̂ Əzü sə də awlra pâ ashɔ səye ndə kə gba tshelə anyaka.» Tshə pâ kə wurtʉ nə ə pa: «Äfɔ ə zä klekpa nə̂ zə ə gü na ye gâ ndə zə!»
7Koshe nə âfɔ ə gû na ye gâ lə anda nə̂ ye. 8Alɔ ə̂në ə̂kpû azü nə wû ərə sə̂ rəkɔ, awa zâ əndje â əndje mbê Ndjapä, mbrə ə̂në tshə zâ marä tə̂ awlra rəke kə azü kɔ.
Jezu ê Matiɔ
(Markə 2.13-17; Luki 5.27-32)
9Ə̂në Jezu rô ngrʉ̂ teashe kɔ, tshə wû ə̈bə̈ koshe ə̂në əɨrɨ ye kə də̂ Matiɔ kɔ. Tshə sə̂ gâ tʉ gâ ə̂sə̂ kosəra kə rɔ ngendja lapɔ. Jezu pâ kə ətshə ə pa: «Zä äwä əmə!» Matiɔ nə âfɔ ə zâ äwä ye.
10Alɔ ə̂në Jezu də atrawaya nə̂ ye sə̂ kə zɨ ərə mâ lə anda nə̂ Matiɔ nə kɔ, ə̂kpû aaworɔ ngendja lapɔ də alayïnyaka nâ ndje â əndje də aəndje sə̂ kə zɨ rəgo nə. 11Ə̂në Afariza wû ərə sə̂ rəkɔ, əndje pâ kə atrawaya nə̂ ye ə pa: «Awoyisə̂ ərə kə e sə kə zɨ ərə də aaworɔ ngendja lapɔ də alayïnyaka mbrə yekɔ?»
12Alɔ ə̂në Jezu djî əpʉ ə̂në əndje pâ kɔ, tshə pâ kə əndje ə pa: «Azü ə̂në tshelə akwa əndje sə yera ambanə kɔ, əndje sə sə də əgo kə na gâ ndə awombrə ayɔ rəka ne. Bale, kʉtə̂ alayïrəka kə sə də əgo ye. 13E nä ə prä tshelə âdâ əpʉ sə̂ ə̂në Ndjapä pâ: “Mə yində nə ə pa əzü ma ə̂rɔ̂tə̂ ye kə angâ nə. Bale, mə yində kə to əkrɔ yi ne.”#9.13 Wu Ɔze 6.6. Mbrə ə̂në, mə nâ nâ ndə kə e aə̂rɔ̂ azü ne, bale, mə nâ ndə kə e alayïnyaka.»
Jezu pâ əpʉ gâ pâ kə ru tshelə tə̂ rəgo
(Markə 2.18-22; Luki 5.33-39)
14Bale, atrawaya nə̂ Zââ Batistə nâ gâ ngotə̂ Jezu ə yû ətshə ə pa: «Mbrə yekɔ də̂ ä-ä də Afariza ä sə kə ru tshelə ä alɔnɔ̂ tə̂ rəgo â atrawaya nə̂ zə ru tshelə əndje ru tə̂ rəgo ne kɔ?» 15Jezu kîrə əpʉ kə əndje ə pa: «Azü ə̂në əndje ê əndje ndə sandaga kə ko tə̂ koshe də yashe, ə̂në koshe nə daka pə lə takpa tə̂ əndje kɔ, lï ndə kə sə də mbadja a? Bale ne! Ə̈bə̈ alɔ sə je ə̂në əndje sə kə za äkɔ̈ yashe nə ndə kə ro də ətshə tə̂ əndje, kôto də̂ əndje sə kə ru tshelə əndje tə̂ rəgo nə.
16«Ə̈bə̈ əzü wa ama tafa ləba wa ndə kə su gâ tə̂ əku angbrɔ ləba ne. Mbrə ə̂në ama tafa ləba nə sə kə suru tshelə angbrɔ ləba nə â ala əku ləba nə sə kə gerə nə kwatə̂ye rô pâ nə. 17Ə̈bə̈ əzü sɨ ndje tafa duva sɨ gâ lə angbrɔ anga akwa ne. Kədə əzü kə ma marä tə̂ ərə rə, tshelə anga akwa nə sə kə sɔ nə, duva nə sə kə tu gâ tə̂ ashɔ â anga akwa nə sə kə ndɨ nə. Bale, əndje sɨ tafa duva gâ lə tafa anga akwa. Rəkɔ, duva nə də anga akwa nə sə sə kə ndɨ nə ne.»
Jezu grɔ̂ rəka tə̂ ə̈bə̈ yashe ə shê ə̈bə̈ əgblə yashe
(Markə 5.21-43; Luki 8.40-56)
18Alɔ ə̂në Jezu sə̂ kə pa əpʉ sə̂ kə əndje kɔ, ə̈bə̈ makɔndji nə̂ Ajuwufu nâ ə tê gâ tshekudu ye ə pâ: «Əgblə yashe nə̂ əmə tshû katshä katshä səye. Bale, nä ə zä kəna zə gâ pâ ye ka tshə sə tə sorô.» 19Bale, Jezu də atrawaya nə̂ ye âfɔ ə zâ äwä ye.
20Ə̈bə̈ yashe sə̂ je ə̂në rəka ə̈ndjï sə̂ tə̂ ye ə mâ ə̂ngû morofo amanə bishi gâ ye. Tshə nâ trö mandâ Jezu nə ə gôro ama ləba nə̂ ye. 21Mbrə ə̂në, tshə pâ mâ lə ye ə pa: «Kədə mə goro kʉtə̂ ləba nə̂ ye, rəka nə̂ əmə sə kə nglɔ nə.» 22Bale, Jezu dô tə̂ ye ə wû yashe səkɔ ə pâ kə ətshə ə pa: «Awa mbrə̈ əbə mbrə̈ ne, əgblə yashe nə̂ əmə! Lɔsu zə tshɔ̂ əbə gâ ye.» Kʉ pə kôto səkɔ, rəka nə̂ yashe nə nglɔ̂ gâ ye.
23Alɔ ə̂në Jezu yî kumu ye mâ lə anda nə̂ makɔndji nə kɔ, tshə wû azü ə̂në əndje sə̂ kə uru aədɨ də ə̂kpû azü ə̂në əndje sə̂ kə kɨ nə kɔ, 24tshə pâ kə əndje ə pa: «E wütu gashu, mbrə ə̂në əgblə yashe nə tshû tshû ne, bale, tshə lô na ye ə lô.» Azü nə mɔ̂ ətshə də amɔ. 25Alɔ ə̂në əndje grɔ̂ ə̂kpû azü nə gashu gâ ye kɔ, tshə lî gâ lə anda nə ə têgbɔ kəna əgblə yashe nə â əgblə yashe nə âfɔ. 26Əpʉ səkɔ zâ tshelə əgɔ nə nɔ̂.
Jezu grɔ̂ rəka tə̂ alayïbula bishi
27Alɔ ə̂në Jezu âfɔ kôto ndə kə ro nə kɔ, alabə̈ alayïbula bishi zâ äwä ye ə tâ râwâ ə pa: «Ɨrɨ Davidə, wü əyo ä!»
28Alɔ ə̂në tshə lî gâ lə anda gâ ye kɔ, alayïbula nə nâ trö də ətshə. Tshə pâ kə əndje ə pa: «E wusə̂ nə mâ tə̂ lɔsu e ngâ ə pa mə lï ndə kə ma ərə səye a?» Əndje kîrə əpʉ ə pa: «Ayî, Âgbɔ̂ Əyïngerə.» 29Bale, tshə gôro ala əndje ə pâ kə əndje ə pa: «Ərə nə ma kə e ə lï də lɔsu e.» 30Â ala əndje sɔ̂. Jezu ngâ kə əndje tə bandanə ə pa: «E pä ndə nə pä kə ə̈bə̈ əzü bale ne!» 31Bale, pa nə ə̂në əndje wûtu gashu kɔ, əndje vɔ̂tə̂ kə mʉ əpʉ Jezu nə lə aəgɔ nə nɔ̂ ro na ye.
Jezu grɔ̂ rəka tə̂ ə̈bə̈ əyïtuməlo
(Luki 11.14-15)
32Ə̂në əndje sə̂ kə ro nə kɔ, azü nâ də ə̈bə̈ koshe ə̂në afrɔ yîrə̂ sə̂ lə ye â tshema ye ndɨ̂ gâ ye kɔ kə ətshə. 33Alɔ ə̂në Jezu grɔ̂ afrɔ yîrə̂ nə gâ ye kɔ, əndɨ nə vɔ̂tə̂ kə pa tshema ye. Kumu ə̂kpû azü nə nɔ̂ kpê pâ əndu əndje â əndje pâ: «A wû ə̈bə̈ marä tə̂ ərə rəke wû lə əgɔ Isərayalə alɔ bale ne.» 34Bale, Afariza pâ: «Tə̂ äwä awlra nə̂ makɔndji nə̂ aafrɔ ayirə̂ də̂ tshə grɔ aafrɔ ayirə̂ nə kɔ!»
Jezu wû əyo azü
35Jezu nâ na ye lə agala də aaya aəgɔ nɔ̂, ə yîsə̂ əpʉ lə aanda aangbɔ ə mʉ̂ Ə̂rɔ̂ Əpʉ gâ pâ Əgɔngerə nə̂ Ndjapä. Tshə grɔ̂ arəka nɔ̂ tə̂ azü, tshə mâ â aərə tshekotə̂ azü nɔ̂ ə̂në ə ndɨ̂ gâ ye kɔ, ə gâmba tə̂ əndje gâ mandânə. 36Ə̂në Jezu wû ə̂kpû azü nə kɔ, əyo əndje mâ ətshə, mbrə ə̂në, əndje mɔ̂ nɔ̂ gâ ye â əndje wûsə̂ ərə ə̂në əndje ma kɔ wû ne. Əndje sə̂ mata andalimi ə̂në awobata əndje gûta gû ne kɔ. 37Bale, tshə pâ kə atrawaya nə̂ ye ə pa: «Rəgo lê lə kəndɨ nə tə bandanə, bale, alayïkosəra nə ngba ngba ne. 38E yü əyïnga kəndɨ nə ndə kə pa tshə wla alayïkosəra ndə kə pa əndje rɔ ə̂lê rəgo nə lə kəndɨ nə̂ ye nə.»
Currently Selected:
Matiɔ 9: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation
