Matiɔ 10

Azü-awla morofo amanə bishi

(Markə 3.16-19; Luki 6.14-16; Azü-awla 1.13)

1Jezu ê atrawaya nə̂ ye morofo amanə bishi ə zâ awlra kə əndje ndə kə grɔ aafrɔ ayirə̂ də arəka nɔ̂, ndə kə ma ndə kə pa azü ə̂në aərə tshekotə̂ əndje ndɨ̂ gâ ye kɔ, ə gamba tə̂ əndje nɔ̂ gâ mandânə. 2Əɨrɨ azü-awla nə morofo amanə bishi kə səye: angbʉlî əzü nə kə də̂ Shemɔ, ə̂në əndje e ətshə ə pa Piarə kɔ, gâ ndə aye nə də Andre; də Zake, ɨrɨ Zebede, gâ ndə aye nə də Zââ; 3Flipə gâ ndə Bartalami; Toma gâ ndə Matiɔ ə̂në tshə sə tə aworɔ ngendja lapɔ kɔ; Zake, ɨrɨ Alfe, gâ ndə Tade; 4Shemɔ ə̂në tshə sə̂ kə mbrə awlra ndə kə pa əgɔ nə̂ ye wutu lə kanga kɔ, gâ ndə Judasə Isəkariɔtə ə̂në tshə ka Jezu je kɔ.

Azü-awla morofo amanə bishi mʉ̂ Ə̂rɔ̂ Əpʉ

(Markə 6.7-11; Luki 9.2-5; 10.3-12)

5Əndje morofo amanə bishi nə ə̂në Jezu wlâ əndje kɔ kə sə̂. Tshə zâ ama kə əndje ə pa: «E nä nä lə aəgɔ nə̂ azü ə̂në əndje sə sə tə Ajuwufu ne kɔ ne. E lï lï gâ lə ə̈bə̈ gala ashɔ Samari ne. 6Bale, e nä na ye gâ ndə azü əgɔ Isərayalə ə̂në əndje sə mata andalimi ə̂në əndje yû gâ ye kɔ. 7E nä na ye ə mʉ̈ əpʉ ə pa: “Əgɔngerə nə̂ tshelafɔ sə trö!” 8E grɔ̈ rəka tə̂ azü, e shë akuzu, e mä ndə kə pa akwa alayïbroma sə mvo, e grɔ̈ aafrɔ ayirə̂ tə̂ azü. E sɔ̂tə̂ nə yera ambanə, e kö kə azü yera ambanə. 9E kö kö lɔrə wala ngendja wala ngbengewle ngendja gâ lə ngbede nə̂ e ne. 10E kö kö ngbede mbrə ana nə ne, e kö kö ləba bishi ne, e kö kö tama wala tshɔngblɔ ne. Mbrə ə̂në əyïkosəra lï ndə kə pa tshə sɔtə̂ rəgo ama ye.

11«Alɔ ə̂në e li gâ lə ə̈bə̈ gala wala aya əgɔ, e yü ətshe kədə ə̈bə̈ əzü ə̂në tshə lï ndə kə wəra e tə ə̂rɔ̂nə sə je, e sə̈ kpə ndə ye kôto ʉrrr ka ə ro. 12Alɔ ə̂në e sə kə li gâ lə ə̈bə̈ anda, e pä: “Blatshe sə̈ də e.” 13Kədə azü tshelə anda nə kə wəra e tə ə̂rɔ̂nə, blatshe nə̂ e nə sə̈ gâ pâ əndje. Bale, kədə azü nə kə wəra e wəra tə ə̂rɔ̂nə ne, blatshe nə̂ e nə dö tə̂ ye kə e. 14Alɔ ə̂në azü nə wəra e wəra tə ə̂rɔ̂nə ne, ə dji əpʉ nə̂ e dji ne, e wütu lə anda nə wala lə gala nə ə grɔ̈ ashɔ ə̈nü e gâ tʉ. 15Djatra əpʉ, mə pa kə e: tə̂ alɔ kə wa ngbanga nə̂ Ndjapä, ngbanga nə̂ azü gala səkɔ sə kə ro pâ ənə̂ azü agala Sɔdɔmə də Gɔmɔrə.»

Ərə ə̂në ə sə kə wutu gâ tə̂ atrawaya

(Markə 13.9-13; Luki 21.12-17)

16«E wü-a! Mə wla e mata andalimi lə takpa tə̂ atshɔndjɔ. Ala e në mata aəkrɔ, e mä awlra ma ne mata agbakuduba. 17E gbɔ̈ ndə akwa e mbrə azü, mbrə ə̂në əndje sə kə na də e gâ ətshi aangbɔ ngbanga nə̂ Ajuwufu, əndje sə kə da e lə aanda aangbɔ nə̂ əndje. 18Əndje sə kə gbətɔ e ə na də e gâ ətshi əgbro azü əgɔ də alayïngerə, mbrə əmə, ndə kə pa e pa əpʉ nə̂ əmə kə əndje də azü ə̂në əndje sə̂ sə̂ tə Ajuwufu ne kɔ. 19Bale, alɔ ə̂në əndje na də e gâ ətshi alayïngbanga, e lï tshelə e lï gâ pâ äwä ə̂në e sə kə pa əpʉ də nə kɔ wala e pa atâ ne. Kʉ tə̂ alɔ nə səkɔ, aəpʉ ə̂në e sə kə pa nə kɔ, Ndjapä sə kə yisə̂ nə kə e. 20Mbrə ə̂në ə də̂ e də̂ kə pa əpʉ nə ne, Âgbɔ̂ Yîrə̂ nə̂ Abä e kə za əpʉ nə gâ lə ama e ndə kə pa e pa nə.

21«Əzü sə kə ka aye nə ndə kə pa əndje wo ətshə. Abä əgblə sə kə ka əgblə nə̂ ye, aneshe sə kə afɔ də awlra tə̂ alabä əndje də alayï əndje ə ka əndje ndə kə pa azü wo əndje. 22Tshelə azü nɔ̂ sə kə wəra tə̂ əndje tə̂ e mbrə əmə. Bale, əzü ə̂në tshə gbɔgbɔ tə̂ ye lə aərə səkɔ ʉrrr ndjɔ gâ tə̂ amanə, Ndjapä sə kə she ətshə lə kuzu. 23Alɔ ə̂në azü ma awlra gâ tə̂ e lə ə̈bə̈ gala, e kpe gâ lə ə̈bə̈ ata gala nə. Djatra əpʉ, mə pa kə e: e sə sə kə na na ye lə agala əgɔ Isərayalə nɔ̂ ne â Əgblə nə̂ Əzü sə kə yi kumu ye.

24«Ə̈bə̈ awomanda ərə ro pâ awoyisə̂ ərə kə ətshə ro ne, wala əyïkosəra ro pâ âgbɔ̂ əzü nə̂ ye ro ne. 25Awomanda ərə lï ndə kə sə mata awoyisə̂ ərə kə ətshə â əyïkosəra lï ndə kə sə mata âgbɔ̂ əzü nə̂ ye. Ə̂në azü ê əyïnga anda ə pa Beləzebulə kɔ, əndje sə kə e azü tshelə anda nə̂ ye nə atâ a!»

E zä lɔsu e nɔ̂ kə Ndjapä

(Luki 12.2-9)

26«E mä awa əndje mä ne! Mbrə ə̂në ərə nɔ̂ ə̂në ə zâ tə̂ ye wû, ə sə kə wutu gâ tə̂ ə̂ngbʉ̂tshe, ərə nɔ̂ ə̂në ə sə lə kəwû, azü nɔ̂ sə kə wusə̂ nə. 27Əpʉ ə̂në mə pa kə e lə əbutshe kɔ, e pa ndəma nə də ə̈kü alɔ. Əpʉ ə̂në əndje pâ gâ lə ətu e lə wâyâ kɔ, e mʉ əpʉ nə gashu tə̂ kumu anda. 28E mä mä awa azü ə̂në əndje wo amba akwa əzü kɔ ə lï lï ndə kə wo yîrə̂ ye ne kɔ ne. Bale, e kpë də̂ rawa Ndjapä ə̂në tshə lï ndə kə wo yîrə̂ əzü də əndu ye nɔ̂ lə əwo ə̂në ə rɨ rɨ tə̂ ərə ne kɔ. 29Əndje ka alayandjera ka bishi ə̂lê mea bale ne a? Bale, kədə Abä e kə yində nə yi ne, ə̈bə̈ nə bale sə sə kə tshu nə ne. 30Sukumu e ndje, Ndjapä dɨ̂ nɔ̂ gâ ye. 31E mä awa mä ne, e rô ə̂kpû alayandjera ngbatshe gâ ye.

32«Âdârə ə̂në, əzü ə̂në tshə pa lə ala azü ə pa əne sə tə əzü nə̂ əmə, əmə ndje, mə sə kə pa lə ala Abä əmə ə̂në tshə sə mâ lafɔ kɔ ə pa tshə sə tə əzü nə̂ əmə. 33Bale, əzü ə̂në tshə wəra tə̂ ye tə̂ əmə lə ala azü, mə sə ndje kə vʉsə̂ əpʉ nə̂ ye lə ala Abä əmə ə̂në tshə sə mâ lafɔ kɔ.»

Tshelə takpa tə̂ azü sə kə sɔ nə mbrə Jezu

(Luki 12.51-53)

34«E pä pä də mə nâ ndə kə pa blatshe sə lə takpa tə̂ azü pâ ashɔ səye ne. Mə nâ nâ də blatshe ne, bale, mə nâ də ə̈ngrʉ̈ kamba gâ lə takpa tə̂ azü. 35Mbrə ə̂në, mə nâ ndə kə pa tshelə takpa tə̂ əgblə koshe də abä nə sɔ, tshelə takpa tə̂ əgblə yashe də əyï nə sɔ, tshelə takpa tə̂ əgblə yashe də yinʉ nə sɔ. 36Azü tshelə anda nə̂ əzü sə kə sə tə alayïkowɔ nə̂ ye.»

Əzü ə wəra tə̂ ye tə̂ ye kane â za äwä Jezu

(Markə 8.34-35; Luki 9.23-24; 14.26-27)

37«Əzü ə̂në tshə yində abä nə wala əyï nə ə rô əmə, tshə lï lï ndə kə sə tə trawaya nə̂ əmə ne. Əzü ə̂në tshə yində əgblə nə̂ ye tə koshe wala tə yashe ə rô əmə, tshə lï lï ndə kə sə tə trawaya nə̂ əmə ne. 38Əzü ə̂në tshə za masheyɔ nə̂ ye za gâ pâ əgʉ ye ne ə za äwä əmə za ne, tshə lï lï ndə kə sə tə trawaya nə̂ əmə ne. 39Əzü ə̂në tshə yində kə bata əwu ye, tshə sə kə tshu nə. Bale, əzü ə̂në tshə yində kə tshu nə mbrə əmə, tshə sə kə sə tə sorô.»

Əzü ə̂në tshə wəra trawaya, tshə wəra Jezu

(Markə 9.37,41; Luki 9.48; 10.16; Zââ 13.20)

40«Əzü nɔ̂ ə̂në tshə wəra e tə ə̂rɔ̂nə, tshə wəra əmə tə ə̂rɔ̂nə. Əzü ə̂në tshə wəra əmə tə ə̂rɔ̂nə, tshə wəra ətshə ə̂në tshə wlâ əmə kɔ. 41Əzü ə̂në tshə wəra awopandəma Ndjapä tə ə̂rɔ̂nə mbrə ə̂në tshə sə tə awopandəma Ndjapä kɔ, tshə sə kə sɔtə̂ âkrâ nə̂ awopandəma Ndjapä. Əzü ə̂në tshə wəra ə̂rɔ̂ əzü tə ə̂rɔ̂nə mbrə ə̂në tshə sə tə ə̂rɔ̂ əzü kɔ, tshə sə kə sɔtə̂ âkrâ nə̂ ə̂rɔ̂ əzü. 42Əzü nɔ̂ ə̂në tshə sə kə to kʉtə̂ zɨtɨ ə̂ngû gâ lə aya kopo kə ə̈bə̈ aya əzü səye bale, mbrə ə̂në tshə sə tə trawaya nə̂ əmə kɔ, djatra əpʉ, mə pa kə e: âkrâ sə sə kə tshɔ ətshə mandânə ne.»

Currently Selected:

Matiɔ 10: liy

Highlight

Copy