Matiɔ 3

Zââ Batistə mʉ̂ əpʉ kə azü

(Markə 1.1-8; Luki 3.1-18; Zââ 1.19-28)

1Tə̂ alɔ nə səkɔ, Zââ Batistə yî kumu ye mâ lə ngbûndû əgɔ Jude â vɔ̂tə̂ kə yisə̂ Ə̂rɔ̂ Əpʉ. 2Tshə pâ: «E tshï äwä angbrɔ kə mbrə aərə nə̂ e tʉ, mbrə ə̂në Əgɔngerə tshelafɔ#3.2 Əgɔngerə tshelafɔ: Lə fraka nə, Matiɔ pâ Əgɔngerə tshelafɔ ə̂në ə yində kə pa ndə Əgɔngerə nə̂ Ndjapä. Wu lə Bakale. ndô trö gâ ye.»

3Zââ sə tə əzü ə̂në awopandəma Ndjapä Ezayi pâ əpʉ gâ pâ ye alɔ ə̂në tshə pâ:

«Ə̈bə̈ əzü sə kə ta râwâ lə ngbûndû ə pa:

“E gämba äwä ə̂në Âgbɔ̂ Əyïngerə ə na tə̂ nə kɔ,

e gämba äwä ye ndji.”»#3.3 Wu Eza 40.3.

4Zââ yî ləba ə̂në əndje mâ də əsu shamo kɔ ə î tshelə ye də ə̂wû akwa agia. Rəgo nə̂ ye kə də̂ alagbɔ̂ də əjerɔ akotrɔ. 5Azü gala Jeruzalamə də azü ashɔ Jude nɔ̂ gâ ndə azü aəgɔ ə̂në ə sə tə̂ ama ə̂ngû Jurda kɔ nâ gâ ngotə̂ ye. 6Əndje yîsə̂ anyaka nə̂ əndje gashu â Zââ nə zâ batamo kə əndje lə ə̂ngû Jurda.

7Bale, alɔ ə̂në Zââ wû ə̂kpû Afariza də Asadusa ə̂në əndje sə̂ kə na gâ tə̂ ye ndə kə pa tshə za batamo kə əndje kɔ, tshə pâ kə əndje ə pa: «E-e, angwa alɔngɔ, əde kə yisə̂ kə kpe əkɔ nə̂ Ndjapä ə̂në ə sə kə na gu nə kɔ kə e? 8E mbrə̈ tə̂ e tə ə̂rɔ̂nə ndə kə yisə̂ nə ə pa e tshî äwä angbrɔ kə mbrə aərə nə̂ e tʉ gâ ye. 9E kätə̂ kə pa mâ lə e ə pa: “Abraamo sə tə ätä ä.” Mbrə ə̂në mə pa kə e kədə Ndjapä kə yində nə, tshə lï ndə kə mbrə ndə kə pa abadja səye do tə̂ əndje tə alätä Abraamo nə. 10Gondâ sə trö ndə kə de aəshe aayɔ gâ ye. Əndje sə kə de aəshe aayɔ nɔ̂ ə̂në ə le ə̂rɔ̂ leyɔ le ne kɔ ndə kə wli gâ ala əwo. 11Əmə, mə sə kə za batamo ə̂ngû kə e ndə kə yisə̂ nə ə pa e tshî äwä angbrɔ kə mbrə aərə nə̂ e tʉ gâ ye. Bale, ə̈bə̈ əzü sə kə na gu nə mandâ əmə, tshə sə tə worɔgbɔ ə rô əmə, mə lï lï ndə kə pa mə wlerə tama tə̂ ə̈nü ye ne. Ətshə, tshə sə kə za batamo Âgbɔ̂ Yîrə̂ də ənə̂ əwo kə e. 12Tshə sə də ərə kə pe də tshelə ə̂lê rəgo lə kəna ye. Tshə sə kə ngbo tshepa lakrʉ nə̂ ye ndə kə pe tshelə ə̂lê rəgo nə̂ ye ndə kə ko nə gâ lə agrɔ, â ko krosa nə wli gâ ala əwo ə̂në ə rɨ rɨ tə̂ ərə ne kɔ.»

Batamo nə̂ Jezu

(Markə 1.9-11; Luki 3.21-22)

13Bale, Jezu âfɔ mâ lə ashɔ əgɔ Galile ə nâ gâ tə̂ Zââ mâ tə̂ ama ə̂ngû Jurda ndə kə pa Zââ za batamo kə ətshə. 14Bale, Zââ yində nə yi ne ə pâ: «Əmə kə lï ndə kə na â bə za batamo kə əmə, bale, əbə kwatə̂zə kə na gâ ndə əmə a!» 15Jezu kîrə əpʉ kə ətshə ə pa: «Ə̂në a lə ye, mä rə. Mbrə ə̂në ə sə də äwänə ndə kə pa a ma aərə nɔ̂ ə̂në ə sə tə ə̂rɔ̂nə lə ala Ndjapä kɔ.» Bale, Zââ yîndə nə. 16Pa nə ə̂në Jezu zâ batamo gâ ye kɔ, tshə wûtu la ə̂ngû nə. Kʉ pə kôto səkɔ, tshelafɔ krɔ̂, tshə wû Yîrə̂ Ndjapä ə jêrə gâ pâ ye mata gbakuduba. 17Ə̈bə̈ tshema tô mâ lafɔ ə pâ: «Ətshə səye, tshə sə tə Ɨrɨ əmə ə̂në mə yində ye tə bandanə kɔ, tshelə əmə mɔ tə̂ ye tə bandanə!»

Currently Selected:

Matiɔ 3: liy

Highlight

Copy