Matiɔ 11

1Alɔ ə̂në Jezu zâ ama kə atrawaya nə̂ ye morofo amanə bishi gâ ye kɔ, tshə âfɔ kôto ə rô na na ye ndə kə yisə̂ əpʉ kə azü ə mʉ Ə̂rɔ̂ Əpʉ lə agala əgɔ nə.

Kə yu əpʉ nə̂ Zââ Batistə

(Luki 7.18-23)

2Bale, mâ lə anda kânga-e, Zââ Batistə djî ndə əpʉ aərə ə̂në Kristə mâ kɔ. Zââ nə wlâ alabə̈ atrawaya nə̂ ye kə Jezu ndə kə yu ətshə. 3Əndje yû ətshə ə pa: «Bə sə tə ətshə ə̂në tshə sə kə na nə kɔ, wala ä ka tə̂ ə̈bə̈ ata əzü kpî a?» 4Jezu kîrə əpʉ kə əndje ə pa: «E gü ə pä ndəma əpʉ aərə ə̂në e sə kə dji nə ə sə kə wu nə kɔ kə Zââ nə: 5Alayïbula sə kə lishi, awurtʉ sə kə na ana, akwa alayïbroma sə mvo, alayïbitû sə kə dji əpʉ, akuzu she, əndje mʉ̂ Ə̂rɔ̂ Əpʉ kə alayïəyo.#11.5 Wu Eza 35.5-6; 61.1. 6Ənə̂ ye tə ə̂rɔ̂nə, əzü ə̂në lɔsu ye te te mbrə əmə ne kɔ!»

Jezu pâ əpʉ gâ pâ əpʉ nə̂ Zââ

(Luki 7.24-35)

7Alɔ ə̂në atrawaya nə̂ Zââ nə zâ äwä ndə kə gu na ye, Jezu vɔ̂tə̂ kə pa əpʉ kə ə̂kpû azü nə gâ pâ əpʉ Zââ nə ə pa: «Ərə yekɔ də̂ e nâ ə wû mâ lə ngbûndû kɔ? Ə̈bə̈ wara ə̂në əyi sə kə meme nə kɔ a? 8Bale, ərə yekɔ də̂ e nâ ə wû kɔ? E nâ ə wû ə̈bə̈ əzü ə̂në tshə yî aləba ə̂në ə fʉ wââ kɔ a? Azü ə̂në əndje yi aləba ə̂në ə fʉ wââ kɔ, əndje sə lə aanda nə̂ alayïngerə. 9Rəkɔ, ərə yekɔ də̂ e nâ ə wû kɔ? E nâ ə wû ə̈bə̈ awopandəma Ndjapä a? Mə pa djatra əpʉ kə e, tshə rô awopandəma Ndjapä. 10Ətshə də̂ Fraka nə̂ Ndjapä pâ əpʉ gâ pâ ye ə pa: “Wü-a! Əmə, mə wla əyïawla nə̂ əmə ətshi zə ndə kə pa tshə gamba äwä ətshi zə.”#11.10 Wu Mal 3.1. 11Djatra əpʉ, mə pa kə e, lə takpa tə̂ azü ə̂në əndje zû əndje ə zû kɔ, ə̈bə̈ âgbɔ̂ əzü ə̂në tshə rô Zââ Batistə kɔ guta gu ne. Bale, əngʉ əzü lə Əgɔngerə tshelafɔ sə tə âgbɔ̂ əzü ə rô ətshə. 12Ə vɔ̂tə̂ nə tə̂ alɔ kə yisə̂ əpʉ nə̂ Zââ Batistə ʉrrr ndjɔ kpəsəye, azü sə kə ma awlra ndə kə li Əgɔngerə tshelafɔ. Alayïawlra kə sə kə pra äwä ndə kə li gâ lə nə. 13Mbrə ə̂në aawopandəma Ndjapä nɔ̂ də âgbɔ̂ əpʉ nə̂ Mayïzə yîsə̂ əpʉ gâ pâ Əgɔngerə nə̂ Ndjapä kə azü ʉrrr ndjɔ gâ tə̂ alɔ Zââ Batistə. 14Kədə e yində kə dji tshelə əpʉ nə, ətshə də̂ Eli nə ə̂në əndje pâ ndə əpʉ kə na ətshə kɔ. 15Əzü ə̂në tshə sə də ətu kə dji də əpʉ, tshə djï!

16«Mə sə kə yisə̂ azü tshe kpəsəye gâ tə̂ aəde? Əndje sə mata aneshe ə̂në əndje sə̂ gâ tʉ gâ ə̂grû tshelagɔ ə sə̂ kə pa kə angâ əndje ə pa: 17“Ä ûru ədɨ ndə kə pa e vi tə̂ e, bale e vî tə̂ e vî ne! Ä vî ətshi kuzu, bale e kɨ̂ kɨ̂ ne!” 18Mbrə ə̂në Zââ nâ ə zɨ̂ ərə zɨ̂ wala ə ndjû ərə ndjû ne â azü pâ: “Tshə sə də afrɔ yîrə̂ lə ye.” 19Əgblə nə̂ Əzü nâ ə sə̂ kə zɨ ərə ə ndju ərə, əndje pâ: “Koshe səye sə tə awozɨ ərə də awondju ərə, tə gbɔbəngâ aaworɔ ngendja lapɔ də alayïnyaka.” Bale, kə wusə̂ ərə nə̂ Ndjapä sə də äwänə tə̂ äwä aərə ə̂në tshə sə kə ma nə kɔ.»

Aəgɔ ə̂në azü nə yîndə əpʉ nə̂ Jezu yî ne kɔ

(Luki 10.13-15)

20Bale, Jezu vɔ̂tə̂ kə nga kə azü agala ə̂në tshə mâ aga aərə ə̈lü lə nə kɔ. Mbrə ə̂në əndje tshî äwä angbrɔ kə ma aərə nə̂ əndje tshî tʉ ne. 21Tshə pâ: «Əyo gâ pâ e, azü gala Koraza! Əyo gâ pâ e, azü gala Betəsayida! Mbrə ə̂në, kədə azü aəgɔ Tirə də Sidɔ kə wû kəmə aərə ə̈lü ə̂në ə wûtu lə takpa tə̂ e kɔ, kandää kerə əndje yî kəmə ləba mbadja ə sə̂ gâ tʉ gâ lə mvrowo gâ ye ə tshî äwä angbrɔ kə ma aərə nə̂ əndje tʉ gâ ye. 22Âdârə ə̂në mə pa kə e, tə̂ alɔ kə wa ngbanga nə̂ Ndjapä, ngbanga nə̂ e sə kə ro pâ ənə̂ azü agala Tirə də Sidɔ.

23«Ənə̂ e azü Kaprənayɔmə, e wu ənə̂ e ə pa e sə kə o ʉrrr ə goro tshelafɔ a? Bale ne! E sə kə jerə ʉrrr mâ ə̂sə̂ akuzu-e. Mbrə ə̂në, kədə aərə ə̈lü ə̂në ə wûtu lə takpa tə̂ e kɔ kə wutu kəmə lə takpa tə̂ azü əgɔ Sɔdɔmə, kandää gala nə sə kə sə pə kəmə ʉrrr ndjɔ kpəsəye. 24Âdârə ə̂në mə pa kə e, tə̂ alɔ kə wa ngbanga nə̂ Ndjapä, ngbanga nə̂ e sə kə ro pâ ənə̂ azü gala Sɔdɔmə.»

Jezu yîsə̂ Abä nə gashu kə aneshe

(Luki 10.21-22)

25Tə̂ alɔ nə səkɔ, Jezu zâ əpʉ ə pâ: «Mə tɔlɔ əbə, Abä, Âgbɔ̂ Əyïngerə tshelafɔ də ashɔ, mbrə ə̂në, bə kô aərə sə̂ wû tə̂ aawowusə̂ âdâ aərə də aawowusə̂ ərə gâ ye â yîsə̂ nə gashu kə aneshe. 26Ayî, Abä, mbrə ə̂në bə yində nə ə pa ə sə rə.

27«Abä əmə kô aərə nɔ̂ kə əmə gâ ye. Əzü bale yerɔ Ɨrɨ nə yerɔ ne, kʉtə̂ Abä bale. Əzü bale yerɔ Abä yerɔ ne, kʉtə̂ Ɨrɨ nə də əzü ə̂në Ɨrɨ nə yində kə yisə̂ ye kə ətshə gashu kɔ.»

E nä gâ ndə əmə ka ə wu tə̂ e

28«E nä gâ tə̂ əmə, e-e ə̂në e mɔ̂ gâ ye â aərə sə kə lʉ e kɔ, mə sə kə za äwä kə e ndə kə pa e wu tə̂ e. 29E djï əpʉ ama əmə! E mända ərə ə̂në mə yisə̂ nə kə e kɔ, mbrə ə̂në mə ma awlra ma tə̂ əzü ne, lɔsu əmə sə sə gerətshe ne. Rəkɔ, e sə kə sɔtə̂ äwä ndə kə wu tə̂ e. 30Mbrə ə̂në aəpʉ nə̂ əmə gbɔ gbɔ ne â kongbɔ nə̂ əmə lʉ lʉ ne.»

Currently Selected:

Matiɔ 11: liy

Highlight

Copy