Luki 24

Jezu she

(Matiɔ 28.1-10; Markə 16.1-8; Zââ 20.1-10)

1Tə̂ angbʉlî əlo dəmashi nə, ayashe nə âfɔ pə-ê də əzɨ ə nâ mâ tə̂ manda ə̂dû nə də yombo nə ə̂në əndje gâmba gâ ye kɔ. 2Əndje wû ə pa əndje gî əkpʉ nə ə̂në əndje zâ gâ tə̂ manda ə̂dû nə kɔ gashe gâ ye. 3Əndje lî gâ lə ə̂dû nə, bale, əndje sɔ̂tə̂ əko Âgbɔ̂ Əyïngerə Jezu nə sɔ̂ ne. 4Ə̂në əndje sə̂ pə kə tegbɔ kumu əndje gâ pâ ərə nə ə̂në ə wûtu kɔ, bale, akoshe bishi wûtu gâ tə̂ əndje, aləba nə̂ əndje tshe ə tshe. 5Awa mbrə̂ ayashe nə, əndje têrə kumu əndje gâ tʉ. Akoshe nə pâ kə əndje ə pa: «Mbrə yekɔ də̂ e sə kə pra əzü ə̂në tshə sə tə sorô kɔ lə takpa tə̂ akuzu? 6Tshə sə sə kotəye ne, tshə shê gâ ye. E lï tshelə e gâ pâ əpʉ ə̂në tshə pâ kə e alɔ ə̂në tshə sə̂ pə mâ Galile kɔ 7ə pa: “Əgblə nə̂ Əzü lï ndə kə pa azü za ətshə gâ lə kəna alayïnyaka, əndje wo ətshə gâ ala masheyɔ â tə̂ vəta əlo nə, tshə sə kə she nə.”»

8Ə̂sə̂ əpʉ sə̂ ə̂në Jezu pâ kɔ tê gâ lə əndje. 9Əndje âfɔ mâ tə̂ manda ə̂dû nə je ə gû ə pâ ndəma əpʉ aərə sə̂ nɔ̂ kə azü-awla morofo amanə bale də ə̂dû atrawaya nə. 10Ayashe səkɔ kə də̂: Marə̂ nə̂ əgɔ Magədala də Zanə də Marə̂, əyï Zake gâ ndə alabə̈ ayashe nə. Əndje pâ kʉtə̂ əpʉ səkɔ kə azü-awla nə. 11Bale, azü-awla nə pâ ənə̂ əndje ə pa əpʉ səkɔ sə̂ sə̂ tə djatra əpʉ ne, əndje zâ lɔsu əndje zâ gâ tə̂ əpʉ nə̂ ayashe səkɔ ne. 12Bale, Piarə âfɔ ə kpê ärɔ̈ na na ye mâ tə̂ manda ə̂dû nə mâ je. Tshə têrə ə wû kʉtə̂ aama aləba gâ tʉ. Mandânə, tshə dô tə̂ ye gu na ye, kumu ye kpê pâ əndu ye mbrə ərə nə ə̂në ə mâ kɔ.

Atrawaya bishi te Jezu

(Markə 16.12-13)

13Kʉ pə tə̂ alɔ nə səkɔ, atrawaya bishi sə̂ kə na na ye mâ lə ə̈bə̈ aya əgɔ ə̂në əɨrɨ nə kə də̂ Emayusə kɔ. Əgɔ səkɔ dɨ̂ tə̂ Jeruzalamə ə lï də ana ə̈nü lə ə̈nü alɔ bishi. 14Lə ana nə, əndje sə̂ kə pa əpʉ gâ pâ aərə nɔ̂ ə̂në ə mbrə̂ kɔ. 15Alɔ ə̂në əndje sə̂ kə pa əpʉ nə ə sə̂ kə shera ashera gâ pâ əpʉ səkɔ, Jezu tê əndje â əndje də aəndje sə̂ kə na na ye tə̂ äwä nə. 16Əndje wû ətshə, bale, ə̈bə̈ ərə kânga äwä tə̂ əndje ndə kə pa əndje yerɔ ətshə. 17Jezu yû əndje ə pa: «Əpʉ yekɔ də̂ e pa ndə nə lə ana nə kɔ?» Əndje kâ tri, əyo rô pâ əndje gâ ye. 18Ə̈bə̈ nə bale lə takpa tə̂ əndje ə̂në əɨrɨ ye kə də̂ Kleɔpasə kɔ kîrə əpʉ kə ətshə ə pa: «Kʉtə̂ əbə tshî lə Jeruzalamə səye kə wusə̂ aərə ə̂në ə mbrə̂ lə aəlo səye kɔ wu ne a?» 19Tshə yû əndje ə pa: «Ərə yekɔ?» Əndje kîrə əpʉ kə ətshə ə pa: «Ərə ə̂në ə mbrə̂ gâ tə̂ Jezu əzü əgɔ Nazaratə kɔ. Tshə sə̂ tə worɔgbɔ awopandəma Ndjapä tə̂ äwä kə ma aərə nə̂ ye də aəpʉ nə̂ ye lə ala Ndjapä də azü nɔ̂. 20Aâgbɔ̂ azü nə̂ aawotokrɔ də alayïngbanga nə̂ ä zâ ətshə gâ lə kəna azü ndə kə pa əndje wa ngbanga kuzu gâ pâ ye â əndje wô ətshə gâ ala masheyɔ kɔ. 21Ä zâ lɔsu ä gâ pâ ye ə pa ətshə əte kə sə kə djɔ Isərayalə lə kanga. Bale, vəta əlo nə kpəsəye â aərə sə̂ mbrə̂ kɔ. 22Ə sə tə djatra əpʉ, alabə̈ ayashe ə̂në əndje sə lə takpa tə̂ ä kɔ, əndje pâ ə̈bə̈ əpʉ ə̂në kumu ä kpê pâ əndu ä mbrə nə kɔ. Əndje nâ mâ tə̂ manda ə̂dû pə-ê də əzɨ 23ə wû əko ye wû ne. Əndje gû ə pâ kə ä ə pa alane wû atrawaya nə̂ Ndjapä â əndje pâ kə alane ə pa tshə sə tə sorô. 24Alabə̈ angâ ä nâ mâ tə̂ manda ə̂dû nə mâ je ə wû aərə nə mata ə̂në ayashe nə pâ ndəma nə kɔ. Bale, ətshə, əndje wû ətshə wû ne.» 25Bale, Jezu pâ kə əndje ə pa: «E-e, azü ə̂në e wusə̂ ərə wu ne kɔ, ə̂në kə yində aəpʉ nɔ̂ ə̂në aawopandəma Ndjapä pâ kɔ gbɔ ə gbɔ tə̂ e kɔ! 26Kristə nə lï lï ndə kə pa tshə wu marä tə̂ əyo rəke əlînə ka ə li gâ lə ə̂yî ye ne a?» 27Mandânə, tshə vɔ̂tə̂ nə tə əpʉ ə̂në Mayïzə də aawopandəma Ndjapä nɔ̂ tâ gâ lə fraka kɔ ə yîsə̂ âdâ Fraka nə̂ Ndjapä ə̂në ə wû ətshə nɔ̂ kɔ kə əndje.

28Alɔ ə̂në əndje ndô trö də tshelagɔ nə ə̂në əndje sə̂ kə na gâ tə̂ nə kɔ, Jezu mâ tə̂ ye a pa də tshə yîndə kə na ngrʉ̂. 29Bale, əndje shêra ətshə ə pa: «A də a-e sə pə koye mbrə ə̂në alɔ dɨ̂ gâ ye, ətshe vɔ̂tə̂ kə bu nə gâ ye.» Tshə lî gâ lə anda ndə kə pa əndje də aəndje daka pə kôto. 30Alɔ ə̂në əndje sə̂ gâ tʉ ndə kə zɨ rəgo, tshə zâ mapa ə ê ə̂rɔ̂ əpʉ gâ pâ nə ə ngɔ̂ tshelə nə ə kô kə əndje. 31Bale, tshelə ala əndje krâ, əndje yêrɔ ətshə, mandânə, tshə yû tə̂ əndje gâ ye. 32Â əndje pâ lə takpa tə̂ əndje ə pa: «Lɔsu əzə̂ sə̂ sə̂ kə tshe nə alɔ ə̂në tshə sə̂ kə pa əpʉ kə əzə̂ ə sə̂ kə yisə̂ âdâ Fraka nə̂ Ndjapä kə əzə̂ lə äwä kɔ ne a?»

33Kʉ pə tə̂ alɔ nə səkɔ, əndje âfɔ ə dô tə̂ əndje ə gû mâ Jeruzalamə ə tê azü-awla morofo amanə bale nə də ə̂dû azü nə ə̂në əndje ngbô tə̂ əndje gâ tə̂ nə kɔ. 34Azü nə pâ kə əndje ə pa: «Djatra əpʉ, Âgbɔ̂ Əyïngerə shê gâ ye, Shemɔ wû ətshə!» 35Bale, atrawaya nə bishi pâ ndəma ərə nə ə̂në ə wûtu gâ tə̂ əndje lə äwä kɔ də äwä ə̂në əndje yêrɔ Jezu tə̂ alɔ ə̂në tshə sə̂ kə ngɔ tshelə mapa nə kɔ.

Jezu ma tə̂ ye kə atrawaya nə̂ ye

(Zââ 20.19-23)

36Alɔ ə̂në əndje sə̂ pə kə pa əpʉ səkɔ, Jezu də ə̂tə̂ ye wûtu gâ lə takpa tə̂ əndje ə blâ əndje ə pa: «Blatshe sə̈ də e!»

37Awa mbrə̂ əndje â lɔsu əndje tɔ̂ kpi kpi kpi, əndje pâ ənə̂ əndje ə pa alane wû ə̈bə̈ ngandrə gâ ye. 38Bale, Jezu pâ kə əndje ə pa: «Awa mbrə e ndə yekɔ? E sə də əpʉ ashera tə̂ lɔsu e mbrə yekɔ? 39E wü kəna əmə də ə̈nü əmə: djatra əmə kə sə̂! E göro əmə ə wü. Ngandrə sə sə də dɔ̂ngɔ̂ wala gbabi tə̂ ye mata ə̂në mə sə də nə kɔ ne.»

40Ə̂në tshə sə̂ kə pa əpʉ səkɔ, tshə mâ asheku lə akəna ye də aə̈nü ye kə əndje. 41Tshelə əndje sə̂ də ə̂rû wââ â əndje sə̂ də ashera tə̂ lɔsu əndje, kumu əndje kpê pâ əndu əndje gâ ye. Jezu yû əndje ə pa: «E sə də ə̈bə̈ ərə ndə kə zɨ nə kotəye a?»

42Əndje zâ ə̈bə̈ ə̈ndö giangû ə̂në əndje zô ə zô kɔ kə ətshə. 43Tshə zâ ə zɨ̂ də ala əndje. 44Mandânə, tshə pâ kə əndje ə pa: «Əpʉ sə̂ ə̂në mə pâ kə e alɔ ə̂në mə sə̂ pə lə takpa tə̂ e kɔ ə tə nə kə səye: aəpʉ nɔ̂ ə̂në əndje tâ gâ lə âgbɔ̂ əpʉ nə̂ Mayïzə də əpʉ nə̂ aawopandəma Ndjapä, ndje gâ lə Aətshi gâ pâ əpʉ nə̂ əmə kɔ ə lï ndə kə pa ndəma nə mbrə.»

45Bale, tshə yîsə̂ tshelə âdâ Fraka nə̂ Ndjapä kə əndje ndə kə pa əndje dji tshelə nə. 46Tshə pâ kə əndje ə pa: «Əndje tâ gâ lə fraka ə pa: Kristə sə kə wu əyo ə tshu ə she tə̂ vəta əlo nə. 47Əndje sə kə yisə̂ əpʉ də əɨrɨ ye kə azü tshepashɔ nɔ̂ ə vɔtə̂ nə mâ Jeruzalamə ə pa azü tshi äwä angbrɔ kə mbrə tə̂ əndje tʉ kanika Ndjapä gba tshelə anyaka nə̂ əndje. 48E sə tə azü ə̂në e wû aərə səkɔ də ala e gâ ye. 49Mə sə kə wla ərə ə̂në Abä əmə zâ ama ndə kə mbrə nə kɔ gâ pâ e. Bale, e-e, e sə̈ pə kpə lə gala nə kotəye ʉrrr ndjɔ awlra tshelafɔ jerə gâ pâ e gâ ye kane.»

Jezu katə̂ atrawaya nə̂ ye

(Markə 16.19-20; Azü-awla 1.9-11)

50Jezu nâ də əndje ʉrrr mâ Betani ə yî kəna ye gâ lafɔ ə ê ə̂rɔ̂ əpʉ gâ pâ əndje. 51Alɔ ə̂në tshə sə̂ kə e ə̂rɔ̂ əpʉ nə gâ pâ əndje kɔ, tshə kâtə̂ əndje ə ô na ye gâ lafɔ. 52Bale, ənə̂ əndje, əndje vrɔ̂ ətshə â dô tə̂ əndje ə gû mâ Jeruzalamə də âgbɔ̂ ə̂rû tə̂ lɔsu əndje. 53Alɔnɔ̂, əndje sə̂ mâ lə Anda Ndjapä â sə̂ kə mbe Ndjapä.

Currently Selected:

Luki 24: liy

Highlight

Copy