Luki 23

Jezu gâ ətshi Pilatə

(Matiɔ 27.1-2,11-14; Markə 15.1-5; Zââ 18.28-38)

1Azü nə nɔ̂ âfɔ äwä bale ə nâ də Jezu gâ ətshi Pilatə. 2Əndje vɔ̂tə̂ kə lea ətshə ə pa: «Ä sɔ̂tə̂ koshe səye, tshə sə̂ kə frɔ angâ ä də̂ Ajuwufu ə pa əndje dji əpʉ ama əgbro azü əgɔ dji ne ə piyi lapɔ pi mandânə səye kə âgbɔ̂ əyïngerə Sezarə ne. Tshə pâ də ə̂tə̂ ye ə pa əne sə tə Kristə, əyïngerə.» 3Bale, Pilatə nə yû ətshə də əpʉ ə pa: «Əbə, bə sə tə əyïngerə nə̂ Ajuwufu a?» Jezu kîrə əpʉ kə ətshə ə pa: «Əpʉ nə kə sə̂ â bə pa kɔ.»

4Pilatə nə pâ kə aâgbɔ̂ azü nə̂ aawotokrɔ nə də ə̂kpû azü nə ə pa: «Mə sɔtə̂ ə̈bə̈ əpʉ sɔ lə kumu koshe səye ndə kə pa mə wa ngbanga gâ pâ ye bale ne.» 5Bale, əndje shêra ə pâ: «Tshə sə kə frɔ azü ndə kə pa əndje wəra tə̂ əndje tə̂ əpʉ ama əgbro azü əgɔ, ə yisə̂ əpʉ sə̂ kə azü lə əgɔ Jude nɔ̂. Tshə vɔ̂tə̂ nə mâ lə əgɔ Galile ʉrrr â wûtu də nə ndjɔ mâtəye kɔ.»

6Alɔ ə̂në Pilatə nə djî əpʉ səkɔ, tshə yû ətshe ə pa: «Koshe səye sə tə əzü əgɔ Galile a?» 7Alɔ ə̂në tshə wû ə pa Jezu sə̂ tə əzü əgɔ ə̂në Erɔdə sə̂ tə əyïngerə nə kɔ, tshə wlâ əndʉ ye kə Erɔdə nə ə̂në tshə sə̂ ndje mâ Jeruzalamə tə̂ tshekɨ nə səkɔ.

Jezu gâ ətshi Erɔdə

8Alɔ ə̂në Erɔdə nə wû Jezu nə kɔ, tshelə ye sə̂ də âgbɔ̂ ə̂rû mbrə ə̂në ə mâ əlo ngbatshe də̂ tshə sə̂ də əgo kə wu ətshə kɔ. Tshə yîndə kə wu ətshə mbrə aəpʉ ə̂në tshə djî gâ pâ ye kɔ. Tshə yîndə kə wu ətshə də kə mbrə ə̈bə̈ ərə ə̈lü. 9Tshə yû Jezu də aəpʉ ʉrrr, bale, Jezu nə kîrə əpʉ kîrə kə ətshə bale ne. 10Aâgbɔ̂ azü nə̂ aawotokrɔ nə də aawoyisə̂ âgbɔ̂ əpʉ nə̂ Mayïzə sə̂ je, əndje lêa ətshə tə bandanə. 11Erɔdə nə də atrugu nə̂ ye mbrə̂ tə̂ Jezu tə ərə kene ə mɔ̂ ətshə. Mandânə, əndje yî ləba ə̂në ə tshe ə tshe kɔ gâ tə̂ ye ə wlâ ətshə kwatəndje kə Pilatə nə. 12Kʉ pə tə̂ alɔ nə səkɔ, Pilatə nə də Erɔdə nə mbrə̂ tə agbɔbəngâ, əndje ə̂në leme-e əndje djî tə̂ əndje djî ne kɔ.

Əndje wa ngbanga kuzu gâ lə kumu Jezu

(Matiɔ 27.15-26; Markə 15.6-15; Zââ 18.39–19.16)

13Pilatə nə wlâ ətshe ndə aâgbɔ̂ azü nə̂ aawotokrɔ nə də əgbro azü əgɔ gâ ndə azü əgɔ nə 14ə pâ kə əndje ə pa: «E nâ də koshe səye kə əmə ə pâ tshə sə̂ kə frɔ azü ndə kə pa əndje dji əpʉ ama əgbro azü əgɔ dji ne. Mə yû ətshə də ala e nɔ̂, mə sɔ̂tə̂ ə̈bə̈ əpʉ ə̂në e lêa ətshə tə̂ nə kɔ sɔ̂ bale ne. 15Erɔdə ndje sɔ̂tə̂ ə̈bə̈ əpʉ sɔ̂ lə kumu ye ne, âdârə ə̂në tshə wlâ əndʉ ye kə əzə̂ kɔ kə sə̂. Koshe səye mâ ə̈bə̈ ərə ə̂në ə lï də ngbanga kuzu kɔ mâ bale ne. 16Mə sə kə za ama ndə kə pa əndje da ətshə də djakwa. Mandânə, mə sə kə katə̂ ye.» [17Alɔnɔ̂ tə̂ əlo sandaga Pakə, Pilatə sə̂ kə wora ə̈bə̈ əyïkânga bale kə əndje.]#23.17 Əpʉ səke sə sə lə alabə̈ aangbrɔ afraka Ndjapä də ama grakə ne.

18Bale, əndje tâ râwâ mvrɔ ə pa: «Wö koshe səye ə wöra Barabasə kə ä!» 19Əndje kânga Barabasə nə mbrə ə̂në tshə sə̂ lə takpa tə̂ azü ə̂në əndje âfɔ də awlra tə̂ əgbro azü əgɔ gâ ndə tə̂ ə̂në tshə wô əzü kɔ.

20Pilatə nə kwâtə̂ye ə pâ əpʉ kə azü nə mbrə ə̂në tshə yîndə kə wora Jezu nə. 21Bale, azü nə tâ râwâ ə pa: «Kü ətshə gâ ala masheyɔ! Kü ətshə gâ ala masheyɔ!»

22Tə̂ äwä vəta nə, Pilatə nə pâ kə əndje ə pa: «Bale, əmbrʉ ərə yekɔ də̂ tshə mâ a? Mə sɔ̂tə̂ ə̈bə̈ əpʉ ə̂në ə lï də ngbanga kuzu kɔ sɔ̂ lə kumu ye bale ne. Mə sə kə za ama ndə kə pa əndje da ətshə də djakwa. Mandânə, mə sə kə wora ətshə.» 23Bale, əndje shêra kprû ə tâ râwâ tə âgbɔ̂ ə pa tshə wo ətshə gâ ala masheyɔ. Râwâ əndje rô pâ Pilatə nə gâ ye. 24Bale, Pilatə nə zâ ama Lïndə̂ ərə ə̂në əndje yîndə nə kɔ. 25Tshə wôra koshe sə̂ ə̂në əndje kânga ətshə mbrə ə̂në əndje də azü âfɔ də awlra tə̂ əgbro azü əgɔ gâ ndə tə̂ ə̂në tshə wô əzü kɔ, mata ə̂në əndje yû tshuku nə kɔ. Bale, tshə zâ Jezu nə kə əndje ə pâ əndje ma ərə tshelə əndje tə̂ ye.

Əndje na də Jezu ndə kə wo ətshə

(Matiɔ 27.31-32; Markə 15.20-21)

26Alɔ ə̂në əndje sə̂ kə za Jezu nə na na ye kɔ, əndje zâ ə̈bə̈ koshe ə̂në əɨrɨ ye kə də̂ Shemɔ, əzü əgɔ Siranə kɔ, ə̂në tshə tô mâ lə kəndɨ â sə̂ kə gu nə kɔ. Əndje zâ masheyɔ nə gâ pâ əgʉ ye ndə kə pa tshə na də nə mandâ Jezu nə.

27Ə̈bə̈ əgerə ə̂kpû azü sə̂ kə za äwä ye də alabə̈ ayashe. Ayashe nə kô kəna əndje gâ ndʉ əgʉ əndje ə sə̂ kə kɨ nə mbrə ətshə. 28Jezu lîshi gâ mandâ ye gâ tə̂ ayashe nə ə pâ kə əndje ə pa: «Ayashe Jeruzalamə, e kɨ̈ kɨ̈ mbrə əmə ne! Bale, e kɨ̈ mbrə e də aləvu e, 29mbrə ə̂në əlo sə kə na gu nə ə̂në azü sə kə pa nə ə pa: “Ənə̂ əndje tə ə̂rɔ̂nə, alayïmara də ayashe ə̂në əndje zû zû ne kɔ gâ ndə əndje ə̂në aneshe ɔ̂ angɔ əndje ɔ̂ ne kɔ!” 30Bale, azü sə kə pa kə əgbro akaga ə pa: “E yɔ̈ gâ pâ ä!” Əndje sə kə pa nə kə aaya akaga ə pa: “E tshü ä!” 31Mbrə ə̂në, kədə əndje mbrə marä tə̂ ərə rəke gâ tə̂ təyu ayɔ, ərə yekɔ də̂ əndje sə kə mbrə gâ tə̂ ə̈kü ayɔ?»

32Azü nə kô ndje alabə̈ aəmbrʉ azü bishi ə nâ də əndje ndə kə wo əndje äwä bale də Jezu nə.

Atrugu ku Jezu gâ ala masheyɔ

(Matiɔ 27.33-44; Markə 15.23-32; Zââ 19.17-24)

33Alɔ ə̂në əndje yî kumu əndje mâ tə̂ ətshe ə̂në əndje djî əɨrɨ nə ə pa «Gbɔkrɔ» kɔ gâ ye kɔ, əndje kû Jezu gâ ala masheyɔ nə kôto gâ ndə aəmbrʉ azü nə bishi nə, əndje kû ə̈bə̈ nə djoko ndə ndəkɔ ye ə kû bale nə djoko ndə gəle ye. 34Jezu pâ əpʉ ə pa: «Abä, gbä tshelə əpʉ lə kumu əndje, mbrə ə̂në əndje wusə̂ ərə ə̂në əndje sə kə mbrə nə kɔ wu ne.»

Əndje krû tshelə aləba nə̂ ye lə takpa tə̂ əndje tə̂ äwä kə tɔ də kədi.#23.34 Wu Ətsh 22.19. 35Ə̂kpû azü nâ ə kâ ndə kə wu aərə nə. Aâgbɔ̂ azü nə̂ Ajuwufu mɔ̂ ətshə ə pâ: «Tshə tshɔ̂ azü lə kuzu. Kədə tshə sə tə Kristə ə̂në Ndjapä kê ətshə ngâ gâ ye kɔ, tshə tshɔ̈ tə̂ ye də ə̂tə̂ ye lə kuzu!» 36Atrugu nə ndje mɔ̂ ətshə. Əndje nâ trö də ətshə ə zâ duva ə̂në ə kpi ə kpi kɔ kə ətshə 37ə pâ: «Kədə bə sə tə əyïngerə nə̂ Ajuwufu, tshɔ̈ tə̂ zə də ə̂tə̂ zə lə kuzu!» 38Djoko lafɔ, pâ kumu ye, əndje tâ ə̈bə̈ ngrowô ə pa: «Ətshə koye sə tə əyïngerə nə̂ Ajuwufu.»

39Ə̈bə̈ əmbrʉ əzü nə bale ə̂në əndje kû əndje gâ lafɔ kɔ gû Jezu ə pâ: «Bə sə sə tə Kristə ne a? Tshɔ̈ tə̂ zə də ə̂tə̂ zə lə kuzu ə tshɔ̈ ä ndje!» 40Bale, bəngâ nə səkɔ ngâ kə ətshə ə pâ: «Bə kpe rawa Ndjapä kpe ne a? Ə də̂ kʉtə̂ ngbanga ə̂në əndje wâ gâ pâ zə də əndje wâ ndje gâ pâ ye kɔ ne a? 41Ənə̂ əzə̂, ə sə də äwänə, mbrə ə̂në ä sɔtə̂ ərə Lïndə̂ aərə ə̂në ä mbrə̂ gâ ye kɔ. Bale, ətshə koye, tshə mâ ə̈bə̈ əmbrʉ ərə mâ bale ne.» 42Mandânə, tshə pâ: «Jezu, ə̂sə̂ əmə djërə əbə djërə ne alɔ ə̂në bə vɔtə̂ ngerə nə̂ zə.» 43Jezu kîrə əpʉ ə pa: «Djatra əpʉ, mə pa kə əbə: kpəsəye, kpəsəye, a də aəmə sə kə sə mâ lə paradi.»

Kuzu Jezu

(Matiɔ 27.45-56; Markə 15.33-41; Zââ 19.28-30)

44Ə̂në alɔ kâ kpə ə̂grû ətshe kɔ, ətshe bû sɔ pâ ashɔ nɔ̂ ʉrrr alɔ nɔ̂nɔ tə̂ ye gâ ə̂grû nə. 45Tshela alɔ bû. Tshelə əgerə ləba ə̂në əndje dû gâ lafɔ ə wâ tshelə Anda Ndjapä nə kɔ tshelə nə sûru kprû bishi. 46Jezu tâ râwâ tə âgbɔ̂ ə pa: «Abä, mə za yîrə̂ əmə gâ lə kəna zə.»#23.46 Wu Ətsh 31.6. Mandânə ə̂në tshə pâ əpʉ səkɔ, tshə tshû. 47Ə̂në kapita nə̂ atrugu nə wû aərə sə̂ rəkɔ, tshə mbê Ndjapä ə pâ: «Djatra əpʉ, koshe səye sə tə ə̂rɔ̂ əzü.»

48Ə̂kpû azü nə nɔ̂ ə̂në əndje nâ ndə kə wu ərə ə̂në ə mbrə kɔ, əndje dô tə̂ əndje gu na ye ə kô kəna əndje gâ ndʉ əgʉ əndje. 49Azü nɔ̂ ə̂në əndje yêrɔ Jezu də ayashe ə̂në əndje vɔ̂tə̂ nə pə mâ Galile ndə kə za äwä ye kɔ, əndje kâ ngrʉ̂ â wû ərə ə̂në ə sə̂ kə mbrə nə kɔ.

Jozafu shi əko Jezu

(Matiɔ 27.57-61; Markə 15.42-47; Zââ 19.38-42)

50Ə̈bə̈ əyïngbanga nə̂ Ajuwufu bale sə̂ je, əɨrɨ ye kə də̂ Jozafu. Tshə sə̂ tə ə̂rɔ̂ əzü, kə mbrə tə̂ ye sə̂ də äwänə. 51Tshə yîndə ərə ə̂në angâ nə zâ ama ndə kə mbrə nə də aərə ə̂në əndje mbrə̂ kɔ yî ne. Tshə sə̂ tə əzü əgɔ Arimate, gala nə̂ Ajuwufu. Tshə sə̂ kə ka tə̂ alɔ ngerə nə̂ Ndjapä. 52Tshə nâ mâ ndə Pilatə nə ə yû ətshə ndə kə za əko Jezu nə. 53Jozafu nə nâ ə djɔ̂ əko Jezu nə la masheyɔ nə gâ tʉ ə wôle ətshə də ləba ə shî ətshə gâ lə ə̈bə̈ ə̂dû ə̂në əndje djî gâ lə əkpʉ ə̂në əndje tê tê pa ə shi kuzu gâ lə nə ne kɔ. 54Alɔ nə səkɔ sə̂ tə̂ əlo kə gamba aərə mbrə saaba ə̂në ə ndô trö kɔ.

55Ayashe nə ə̂në əndje âfɔ mâ Galile ə zâ äwä Jezu nə kɔ, əndje nâ mandâ Jozafu nə. Əndje wû ə̂dû nə də äwä ə̂në əndje zâ əko Jezu nə gâ lə nə kɔ. 56Mandânə, əndje dô tə̂ əndje ə gû na ye ndə kə gamba kâdâ də yombo. Tə̂ əlo saaba nə, əndje wû tə̂ əndje mata ə̂në âgbɔ̂ əpʉ yîsə̂ nə kɔ.

Currently Selected:

Luki 23: liy

Highlight

Copy