ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 15

ܠܳܐ ܠܺܗ̄ܝ ܢܰܦܫܰܝܕܰܢ ܐܶ‌ܠܳܐ ܠܽܗ̄ܘ ܩܰܪܺܝܒ̥ܰܝܕ̥ܰܢ ܫܳܦܪܺܝܢܰܐ ܒܰܛّܳܒ̥̈ܳܬ̥ܳܐ

1ܗܰܢ ܢܰܩܠܐ ܐܰܚܢܰܐ ܗ̄ܰܚّܺܝ̈ܨܶܐ ܟܠܳܙ݄ܡ ܛܳܥܢܺܝܢܰܐ ܗ̄ܰܟّܶܐܒ̥̈ܶܐ ܕܰܪّܰܦܝ̈ܶܐ، ܘܠܳܐ ܠܢܰܦܫ̈ܰܝܢܰܐ ܫ݄ܦܪܺܝܢܰܐ. 2ܐܶ‌ܠܳܐ ܟܽܘܠ ܚܰܕ̱ ܡܶܢܰܢ ܠܽܗ̄ܘ ܩܰܪܺܝܒ̥ܰܝܕ̥ܶܗ ܕܳܗ̄ܘܶܐ ܫܰܦܺܝܪܳܐ ܒܰܛّܳܒ̥̈ܳܬ̥ܳܐ ܕܟ݄ܬܢܶܝ ܠܽܗ̄ܘ ܒܶܢܝܳܢܳܐ (ܕܺܗ̄ܝ ܢܰܦܫܳܐ). 3ܘ݄ܡܫܺܝܚܳܐ ܣܬܶܝ ܠܳܐ ܠܢܰܦܫܶܗ ܫܰܦ݄ܪ، ܐܶ‌ܠܳܐ ܐܟ̥ ܕ݄ܟܬ̥ܺܝܒ̥: ”ܗ̄ܽܘ ܥܰܝܒܳܐ ܕ݄ܡܥܰܝܒܳܢ̈ܶܐ ܕܰܐܥܠܳܟ̥، ܐܰܥܠܺܝ ܢܰܦ݄ܠ.“

4ܘܟܽܘܠ ܡܶܕܶܐ ܕܡܶܢ̱ ܡܶܩ݄ܕ̱ܡ ܟܬ̥ܺܝܒ̥ ܠܽܗ̄ܘ ܝܽܘܠܦܳܢܰܝܕ̥ܰܢ ܟܬ̥ܺܝܒ̥، ܠܰܫܰܢ ܕܗܳܘܶܐ ܠܰܢ ܣܰܒܪܳܐ ܒܺܗ̄ܝ ܡܣܰܝܒܪܳܢܽܘܬ̥ܳܐ ܘܒܽܗ̄ܘ ܠܽܘܒܳܒܳܐ ܕܰܟܬ̥ܳܒ̥̈ܶܐ. 5ܘܰܐ‌ܠܳܗܳܐ ܕܺܗ̄ܝ ܡܣܰܝܒܪܳܢܽܘܬ̥ܳܐ ܘܕܽܗ̄ܘ ܠܽܘܒܳܒܳܐ ܗ̄ܳܒܰܠܟ̥ܽܘ ܕ݄ܒܚܰܕ̱ ܪܶܥܝܳܢܳܐ ܗܳܘܺܝܬܽܘ ܚܰܕ̱ ܥܰܡ ܚܰܕ̱ ܒܝܶܫܽܘܥ ܡܫܺܝܚܳܐ. 6ܠܰܫܰܢ ܕ݄ܒܚܰܕ̱ ܪܶܥܝܳܢܳܐ ܘ݄ܒܚܰܕ̱ ܦܶܡܳܐ ܡܫܰܒܚܺܝܬܽܘ ܠܰܐ‌ܠܳܗܳܐ ܗ̄ܽܘ ܐܰܒܳܐ ܕܡܳܪܰܢ ܝܶܫܽܘܥ ܡܫܺܝܚܳܐ. 7ܡܰܗ̄ܘܟ̥ܰܐ، ܡܩܰܕܶܡܽܘ ܘ݄ܛܥܰܢܽܘ ܠ݄ܚܕ̥ܳܕ̥̈ܶܐ ܐܟ̥ ܕ݄ܡܫܺܝܚܳܐ ܣܬܶܝ ܡܩܰܕܰܡ ܠܶܗ ܠܟ̥ܽܘ ܠܽܗ̄ܘ ܫܽܘܒܚܳܐ ܕܰܐ‌ܠܳܗܳܐ.

ܗ̄ܽܘ ܫܽܘܒܚܳܐ ܪܰܒܳܐ ܕ݄ܡܫܺܝܚܳܐ

8ܘܟܳܐܡܰܪ ܐ̱ܢܳܐ ܕܝܶܫܽܘܥ ܡܫܺܝܚܳܐ ܡܫܰܡܰܫ ܠܶܗ ܗ̄ܺܝ ܓܙܽܘܪܬܳܐ (ܗ̄ܰܝّܽܘܕ̥̈ܳܝܶܐ) ܠܰܫܰܢ ܗ̄ܽܘ ܫܪܳܪܳܐ ܕܰܐ‌ܠܳܗܳܐ، ܠܰܫܰܢ ܕܡܰܩ݄ܡ ܗ̄ܽܘ ܘܰܥܕܳܐ ܕܰܐ‌ܠܳܗܳܐ ܠܰܗ̄ܢ ܐܰܒܳܗ̈ܶܐ. 9ܘܰܥّܰܡ̈ܶܐ ܡܫܰܒܚܺܝ ܠܰܐ‌ܠܳܗܳܐ ܡܶܢ̱ ܚܠܳܦ ܗ̄ܰܪّܰܚܡ̈ܶܐ ܕܗܰܘ݄ܢ ܐܰܥܠܰܝّܶܗ، ܐܟ̥ ܕ݄ܟܬ̥ܺܝܒ̥: ”ܓܡܰܘܕܶܐ ܐ̱ܢܳܐ ܠܳܟ̥ ܒܰܝܢ ܗ̄ܰܥّܰܡ̈ܶܐ، ܘܠܽܗ̄ܘ ܐ݄ܫܡܰܝܕ̥ܳܟ̥ ܓ݄ܡܙܰܡܰܪ ܐ̱ܢܳܐ.“

10ܘ݄ܟܬ̥ܺܝܒ̥ܳܐ ܣܬܶܝ: ”ܡ݄ܦܨܶܚܽܘ ܝܰܐ ܥܰܡ̈ܶܐ ܥܰܡ ܗ̄ܽܘ ܥܰܡܰܝܕ̥ܶܗ.“

11ܘܟܳܐܡ݄ܪ ܝܳܐ ܣܬܶܝ: ”ܡܫܰܒܶܚܽܘ ܠܡܳܪܝܳܐ ܟܽܘ̇ܠܟ̥ܽܘ ܝܰܐ ܥܰܡ̈ܶܐ، ܡܫܰܒܶܚܽܘ ܠܶܗ ܟܽܘ̇ܠܟ̥ܽܘ ܝܰܐ ܐܶܡ̈ܘܳܬ̥ܳܐ.“

12ܘܶܐܫܰܥܝܳܐ ܣܬܶܝ ܐܡ݄ܪ ܠܶܗ: ”ܓ݄ܕܗܳܘܶܐ ܘܰܪܺܝܕ̥ܳܐ ܠܺܐܝܫܰܝ، ܘܗܰܢܳܐ ܕܓ݄ܕܩܳܝ݄ܡ ܓܕܳܗ̄ܘܶܐ ܪܺܝܫܳܐ ܠܰܥّܰܡ̈ܶܐ، ܘܰܐܥܠܶܗ ܓܕܳܗ̄ܘܶܐ ܗ̄ܽܘ ܣܰܒܪܳܐ ܕܰܥّܰܡ̈ܶܐ.“

13ܘܰܐ‌ܠܳܗܳܐ ܕܽܗ̄ܘ ܣܰܒܪܳܐ ܡܳܠܰܠܟ̥ܽܘ ܗ̄ܺܝ ܦܨܺܝܚܽܘܬ̥ܳܐ ܟܽܘܠܰܗ ܘܽܗ̄ܘ ܫܠܳܡܳܐ ܒܺܗ̄ܝ ܗܰܝܡܳܢܽܘܬ̥ܳܐ، ܠܰܫܰܢ ܕܙܰܝܕܺܝܬܽܘ ܒܽܗ̄ܘ ܣܰܒܪܰܝܕ̥ܶܗ، ܒܽܗ̄ܘ ܚܰܝܠܳܐ ܕܪܽܘܚܳܐ ܕܩܽܘܕܫܳܐ.

ܗ̄ܰܪّܶܓ̥ܫ̈ܶܐ ܕܦܰܘܠܳܘܣ ܠܰܐܦ ܗ̄ܰܪّܽܘܡܳܝ̈ܶܐ

14ܘܳܐܢܳܐ ܣܬܶܝ ܟ݄ܬ ܠܺܝ ܗܰܝܡܳܢܽܘܬ̥ܳܐ ܐܰܒܟ̥ܽܘ، ܝܰܐ ܐܰܚ̈ܽܘܢܳܢܰܝܕ̥ܺܝ، ܕܗܰܬܽܘ ܣܬܶܝ ܡܰܠܝ̈ܶܐ ܛܳܒ̥̈ܳܬ̥ܳܐ ܗܰܬܽܘ، ܘ݄ܓܡܺܝܪ̈ܶܐ ܒܟܽܘܠ ܝܕ̥ܰܥܬܳܐ، ܘܟ݄ܒܟ̥ܽܘ ܡܰܘܠܦܺܝܬܽܘ (ܘܟ݄ܪܙܺܝܬܽܘ) ܠܰܚܪ̈ܶܢܶܐ ܣܬܶܝ. 15ܝܰܐ ܐܰܚ̈ܽܘܢܳܢܶܐ، ܐ݄ܫܡܳܐ ܡܰܩܘܶܐ ܠܺܝ ܦܳܬ̥ܺܝ ܟܬ̥ܽܒ̥ ܠܺܝ ܠܟ̥ܽܘ ܠܰܫܰܢ ܕܡܰܕ̥ܟܰܪ ܐ̱ܢܳܐ ܠܟ̥ܽܘ ܒܺܗ̄ܝ ܛܰܝܒܽܘܬ̥ܳܐ ܕܗܺܝܒ̥ܳܐ ܐܶ‌ܠܺܝ ܡܰܢ̱ ܐ‌ܠܳܗܳܐ: 16ܕܳܗ̄ܘܶܐ ܐ̱ܢܳܐ ܡܫܰܡܫܳܢܳܐ ܠܝܶܫܽܘܥ ܡܫܺܝܚܳܐ ܒܰܝܢ ܗ̄ܰܥّܰܡ̈ܶܐ، ܘ݄ܟܥܳܒ̥ܰܕ ܐ̱ܢܳܐ ܠܽܗ̄ܘ ܡܓܰܠܝܘ̇ܢ ܕܰܐ‌ܠܳܗܳܐ ܠܰܫܰܢ ܕܡܺܝܬܰܩܒ݄ܠ ܗ̄ܽܘ ܩܽܘܪܒܳܢܳܐ ܕܰܥّܰܡ̈ܶܐ ܘܡܺܝܩܰܕ݄ܫ ܒܪܽܘܚܳܐ ܕܩܽܘܕܫܳܐ. 17ܗܰܢ ܢܰܩܠܐ ܟ݄ܬ ܠܺܝ ܫܽܘܒܗܳܪܳܐ ܒܝܶܫܽܘܥ ܡܫܺܝܚܳܐ ܓܰܒ ܐܰ‌ܠܳܗܳܐ. 18ܘܠܰܝܒܺܝ ܕܳܐܡܰܪ ܐ̱ܢܳܐ ܡܶܕܶܐ ܕܠܳܐ ܣ݄ܡ ܠܶܗ ܡܫܺܝܚܳܐ ܥܰܠ ܐܺܝܕ̥̈ܳܬ̥ܺܝ، ܠܽܗ̄ܘ ܫܡܳܥܳܐ ܕܰܥّܰܡ̈ܶܐ، ܒܽܗ̄ܘ ܡܰܐܡܪܳܐ ܘܒܰܥܒܳܕ̥̈ܶܐ، 19ܘܒܽܗ̄ܘ ܚܰܝܠܳܐ ܕܰܗ̄ܢ ܐܳܬ̥ܘ̈ܳܬ̥ܳܐ ܘܰܬّܶܕ݄ܡܪ̈ܳܬ̥ܳܐ، ܘܒܽܗ̄ܘ ܚܰܝܠܳܐ ܕܺܗ̄ܝ ܪܽܘܚܳܐ ܕܰܐ‌ܠܳܗܳܐ، ܠܰܫܰܢ ܕܟܳܪܰܟ̥ ܐ̱ܢܳܐ ܡܶܢ̱ ܐܽܘܪܶܫܠܶܡ ܗܳܠ ܠܺܐܠܽܘܪܺܝܩܳܘܢ ܘ݄ܡܟܰܡܰܠ ܐ̱ܢܳܐ ܗ̄ܺܝ ܣܒܰܪܬ̥ܳܐ ܕ݄ܡܫܺܝܚܳܐ. 20ܘܒܽܗ̄ܘ ܟܪܳܟ̥ܰܝܕ̥ܺܝ ܡܰܚ݄ܬ ܠܺܝ ܒܒܳܠܺܝ ܕܠܳܐ ܡܣܰܒܰܪ ܐ̱ܢܳܐ ܐܰܝܟܳܐ ܕ݄ܟܪ݄ܙّܶܗ ܒ݄ܐܫܡܶܗ ܕ݄ܡܫܺܝܚܳܐ، ܠܰܫܰܢ ܕܠܳܐ ܒܳܢܶܐ ܐ̱ܢܳܐ ܥܰܠ ܫܶܬܶܐܣܬܳܐ ܢܽܘܟ̥ܪܰܝܬܳܐ. 21ܐܶ‌ܠܳܐ ܐܟ̥ ܕ݄ܟܬ̥ܺܝܒ̥: ”ܠܰܗ̄ܢ݄ܟ ܕܠܳܐ ܐܡܺܝܪ ܐܰ‌ܠّܶܗ ܐܰܥܠܶܗ ܓ݄ܕܚܳܙ݄ܢ ܠܶܗ، ܘܗܰܢ݄ܟ ܕܠܳܐ ܫܰܡܺܝܥܺܝ ܐܰܥܠܶܗ ܓ݄ܕܫܳܡܥܺܝ ܠܶܗ.“

ܦܰܘܠܳܘܣ ܐܰܙܳܠܳܐ ܠܪܽܘܡܺܝ

22ܡܰܗ̄ܘܟ̥ܰܐ، ܓ̥ܰܠܰܒܶܐ ܟܳܪ̈ܶܐ ܡܰܟܠܶܐ ܐ̱ܢܳܐ ܡܽܗ̄ܘ ܡܰܐܬ̥ܝܳܐ ܠܣܺܝܕ̥ܰܝܟ̥ܽܘ. 23ܘܳܐܥܕܳܐ ܕܠܳܐ ܦܰܝ݄ܫ ܠܺܝ ܕܽܘܟܬ̥ܳܐ ܒܰܗ̄ܢ ܐܰܬ̥ܪ̈ܰܘܳܬ̥ܰܢܺܝ، ܘܡܶܢ̱ ܐ݄ܫܢ̈ܶܐ ܓ̥ܰܠܰܒܶܐ ܠܗܺܝܩܳܐ ܗ̄ܘܰܝ ܐ̱ܢܳܐ ܕܳܐܬ̥ܶܐ ܐ̱ܢܳܐ ܠܣܺܝܕ̥ܰܝܟ̥ܽܘ، 24ܘܺܗ̄ܝ ܢܰܩܠܐ ܕ݄ܐܙّܺܝ ܐ̱ܢܳܐ ܠܰܐܣܦܰܢܺܝܰܐ، ܟ݄ܬ ܠܺܝ ܣܰܒܪܳܐ ܕܳܐܬ̥ܶܐ ܐ̱ܢܳܐ ܘܚܳܙܶܐ ܐ̱ܢܳܐ ܠܟ̥ܽܘ، ܘܗܰܬܽܘ ܓ݄ܡܠܰܘܺܝܬܽܘ ܠܺܝ ܠܬܰܡܳܐ ܒ݄ܬ̥݄ܪ ܕܡ݄ܦܨܰܚ ܐ̱ܢܳܐ ܒܺܗ̄ܝ ܚܙܰܝܬܰܬ̥ܟ̥ܽܘ ܐ݄ܫܡܳܐ. 25ܐܶ‌ܠܳܐ ܐܳܥܕܳܐ ܐܰܙܳܠܳܐ ܐ̱ܢܳܐ ܠܽܐܘܪܶܫܠܶܡ ܕ݄ܡܫܰܡܰܫ ܐ̱ܢܳܐ ܠܰܩّܰܕ̈ܺܝܫܶܐ، 26ܡܺܐܝܕ̥ܶܗ ܕܰܡܗܰܝܡܢ̈ܶܐ ܕ݄ܒܡܰܩܶܕܳܘܢܺܝܰܐ ܘܒܰܐܟ̥ܰܐܝܰܐ ܐܰܒܺܝܥܺܝ ܕ݄ܡܥܰܕܪܺܝ ܠܰܡّܶܣܟܶܢ̈ܶܐ ܩܰܕ̈ܺܝܫܶܐ ܕܟܺܝܬ ܒܽܐܘܪܶܫܠܶܡ. 27ܐܰܒܺܝܥܺܝ ܕ݄ܡܥܰܕܪ݄ܢّܶܗ ܥܰܠ ܕܟ݄ܬ ܗ̄ܘܰܐ ܐܰܥܠܰܝّܶܗ ܕܰܝܢܳܐ: ܗܰܢ݄ܟ (ܕܒܽܐܘܪܶܫܠܶܡ) ܡܥܰܕܰܪّܶܗ ܗ̄ܰܥّܰܡ̈ܶܐ ܒܰܡّܶܕ̈ܳܢܶܐ ܕܺܗ̄ܝ ܪܽܘܚܳܐ، ܗ̄ܰܥّܰܡ̈ܶܐ ܣܬܶܝ ܕܰܝܢܳܐ ܗܰܘܺܝ ܐܰܥܠܰܝّܶܗ ܕ݄ܡܫܰܡܫ݄ܢّܶܗ ܒܰܡّܶܕ̈ܳܢܶܐ ܕܽܗ̄ܘ ܦܰܓ̥ܪܳܐ. 28ܗܰܢ ܢܰܩܠܐ ܒ݄ܬ̥݄ܪ ܕܡܰܬ݄ܡ ܐ̱ܢܳܐ ܘ݄ܡܫܰܠܰܡ ܐ̱ܢܳܐ ܗ̄ܽܘ ܥܰܡܠܰܢܳܐ، ܓ݄ܕܫܳܦ̊ܰܥ ܐ̱ܢܳܐ ܐܰܥܠܰܝܟ̥ܽܘ ܒܽܗ̄ܘ ܕܰܪܒܳܐ ܠܰܐܣܦܰܢܺܝܰܐ. 29ܘܟܳܐܕ̥ܰܥ ܐ̱ܢܳܐ ܕܶܐܡܰܐ ܕܳܐܬ̥ܶܐ ܐ̱ܢܳܐ ܠܣܺܝܕ̥ܰܝܟ̥ܽܘ، ܒܺܗ̄ܝ ܒܽܘܪܟܬ̥ܳܐ ܡܠܺܝܬ̥ܳܐ ܕܽܗ̄ܘ ܡܓܰܠܝܘ̇ܢ ܕ݄ܡܫܺܝܚܳܐ ܓܕܳܐܬ̥ܶܐ ܐ̱ܢܳܐ. 30ܘܟܳܐܒܰܥ ܐ̱ܢܳܐ ܡ݄ܢܟ̥ܽܘ، ܝܰܐ ܐܰܚ̈ܽܘܢܳܢܰܝܕ̥ܺܝ، ܒܡܳܪܰܢ ܝܶܫܽܘܥ ܡܫܺܝܚܳܐ، ܘܒܺܗ̄ܝ ܚܽܘܒܳܐ ܕܺܗ̄ܝ ܪܽܘܚܳܐ، ܕ݄ܡܨܰܠܺܝܬܽܘ ܐܰܥܡܺܝ ܓ̥ܰܠܰܒܶܐ ܠܰܐ‌ܠܳܗܳܐ ܠܰܫܰܢܺܝ، 31ܕܰܐ‌ܠܳܗܳܐ ܡܦܰܨܶܐ ܠܺܝ (ܘܢܳܛܰܪ ܠܺܝ) ܡܰܗ̄ܢ ܢܳܫ̈ܶܐ ܥܰܨܝ̈ܶܐ ܕܟ݄ܬܢܶܝ ܒܺܝܗܽܘܕ̥، ܘܠܰܫܰܢ ܒܛܳܒ̥ܽܘܬ̥ܳܐ ܡܺܝܬܰܩܒܠܳܐ ܗ̄ܺܝ ܬܶܫܡܶܫܬܳܐ ܕܡܰܘܒܰܠ ܐ̱ܢܳܐ ܠܰܩّܰܕ̈ܺܝܫܶܐ ܕܒܽܐܘܪܶܫܠܶܡ. 32ܘܕܰܐ‌ܠܳܗܳܐ ܨܳܒܶܐ، ܒ݄ܦܨܺܝܚܽܘܬ̥ܳܐ ܓܕܳܐܬ̥ܶܐ ܐ̱ܢܳܐ ܠܣܺܝܕ̥ܰܝܟ̥ܽܘ ܘܡ݄ܬ̥ܢܰܚ ܐ̱ܢܳܐ ܐܰܥܡܰܝܟ̥ܽܘ. 33ܘܰܐ‌ܠܳܗܳܐ ܕܽܗ̄ܘ ܫܠܳܡܳܐ ܗܳܘܶܐ ܥܰܡ ܟܽܘ̇ܠܟ̥ܽܘ. ܐܰܡܺܝܢ.

Currently Selected:

ܐܶܓܰܪܬ̥ܳܐ ܠܰܪّܽܘܡܳܝ̈ܶܐ 15: ܟܬܒܐ

Highlight

Copy