ܡܓܰܠܝܘܢ ܕܡܪܩܘܣ 14

ܗ̄ܽܘ ܚܰܫܳܐ ܦܳܪܽܘܩܳܝܳܐ ܕܺܗ̄ܝ ܩܝܰܡܬܳܐ ܡܫܰܒܰܚܬܳܐ، ܘܽܗ̄ܘ ܕܽܘܒܳܪܳܐ ܕܥܰܠ ܝܶܫܽܘܥ

ܡܬܝ 26‏:1‏‐5؛ ܠܘܩܐ 22‏:1‏‐2؛ ܝܘܚܢܢ 11‏:45‏‐53

1ܘܒ݄ܬ̥݄ܪ ܬܪܶܝ ܝܰܘܡ̈ܶܐ ܗܳܘܶܐ ܗ̄ܘܰܐ ܗ̄ܽܘ ܦܶܨܚܳܐ ܕܰܦّܰܛܺܝܪ̈ܶܐ، ܘ݄ܐܒܥܺܝ ܗ̄ܘܰܘ̱ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܒܢܶܟ̥ܠܳܐ ܨܰܝܕܺܝ ܠܶܗ ܘܩ݄ܛܠܺܝ ܠܶܗ. 2ܐܶ‌ܠܳܐ ܐ݄ܡّܺܪ̱ܝ ܗ̄ܘܰܘ̱: ”ܠܳܐ ܒܽܗ̄ܘ ܥܶܐܕ̥ܳܐ ܕܠ݄ܐ ܐܙّܶܗ ܗܳܘܶܐ ܫܓ̥ܽܘܫܝܳܐ ܒܽܗ̄ܘ ܥܰܡܳܐ.“

ܝܶܫܽܘܥ ܟܡ݄ܡܫ݄ܚ ܒܽܗ̄ܘ ܡܶܫܚܳܐ ܕܢܰܪܕܺܝܢ

ܡܬܝ 26‏:6‏‐13؛ ܝܘܚܢܢ 12‏:1‏‐8

3ܘܗܺܝّܶܗ ܒܒܶܝܬ̥ ܥܰܢܝܳܐ، ܒܽܗ̄ܘ ܒܰܝܬܳܐ ܕܫܶܡܥܽܘܢ ܗ̄ܽܘ ܓܰܪܒ̥ܳܢܳܐ، ܣܡܺܝܟ̥ܳܐ ܗ̄ܘܰܐ ܬܰܡܳܐ، ܐܰܬ̥ܝܳܐ ܚܕ̥ܳܐ ܐܰܢ̱ܬ̥ܬܳܐ ܕܟܺܝܬ ܐܰܥܡܰܗ ܫܺܝܫܬܳܐ ܕܒܰܣܡܳܐ ܕܢܰܪܕܺܝܢ ܪܺܝܫܳܝܳܐ ܘ݄ܒܛܺܝܡܳܐ ܓ̥ܰܠܰܒܶܐ. ܘ݄ܦܬܺܝܚܳܐ ܠܰܗ، ܘ݄ܡܨܰܢܨܶܠ ܠܰܗ ܥܰܠ ܪܺܝܫܶܗ ܕܝܶܫܽܘܥ. 4ܘܟ݄ܬ ܗ̄ܘܰܐ ܢܳܫ̈ܶܐ ܡܰܢ̱ ܬّܰܠܡܺܝܕ̥̈ܶܐ ܬܰܡܳܐ ܕܥܰܝ݄ܩّܶܗ ܒܪܽܘܚܰܝّܶܗ ܘܐܡ݄ܪّܶܗ: ”ܠܡ݄ܢ ܗܰܘܺܝ ܗ̄ܽܘ ܚܽܘܣܪܳܢܳܐ ܕܽܗ̄ܘ ܒܰܣܡܰܢܳܐ؟ 5ܟܺܝܬ ܕܡܺܝܙܰܒܰܢ ܗ̄ܘܰܐ ܒܙ݄ܕ ܡܶܢ̱ ܬܠ݄ܬ̥ܡܳܐܐ ܕܺܝܢܳܪ̈ܶܐ ܘܡܺܝܬܰܗܒ̥݄ܢ ܗ̄ܘܰܘ̱ ܠܰܡّܶܣܟܶܢ̈ܶܐ.“ ܘܪܰܓ̥ܺܝܙܺܝ ܐܰܥܠܶܗ. 6ܐܶ‌ܠܳܐ ܗܺܝّܶܗ ܝܶܫܽܘܥ ܐܡ݄ܪ ܠܶܗ: ”ܛܪܰܝܽܘ ܡܶܢܰܗ! ܠܡ݄ܢ ܟܡܰܟܺܝܒ̥ܺܝܬܽܘ ܠܰܗ؟ ܥܒܳܕ̥ܳܐ ܫܰܦܺܝܪܳܐ ܣ݄ܡ ܠܰܗ ܐܰܥܡܺܝ. 7ܡܺܐܝܕ̥ܶܗ ܕ݄ܒܟܽܘܠ ܙܰܒܢܳܐ ܟ݄ܬܟ̥ܽܘ ܡܶܣܟܶܢ̈ܶܐ ܐܰܥܡܰܝܟ̥ܽܘ، ܘܶܐܡܰܐ ܕܳܐܒܥܺܝܬܽܘ ܟ݄ܒܟ̥ܽܘ ܣܰܝܡܺܝܬܽܘ ܛܳܒ̥ܽܘܬ̥ܳܐ ܐܰܥܡܰܝّܶܗ. ܐܶ‌ܠܳܐ ܐܳܢܳܐ ܠܳܐ ܒܟܽܘܠ ܙܰܒܢܳܐ ܐܰܥܡܰܝܟ̥ܽܘ ܐ̱ܢܳܐ. 8ܘܽܗ̄ܘ ܡܶܕܶܐ ܕܟ݄ܬ ܗ̄ܘܰܐ ܠܗܰܬ̥ܶܐ ܕܣܰܝܡܳܐ ܣ݄ܡ ܠܰܗ، ܘ݄ܡܩܰܕܰܡ ܠܰܗ ܐܟ̥ ܕܠܺܗ̄ܝ ܩܒ̥ܽܘܪܬܰܝܕ̥ܺܝ ܡܒܰܣܰܡ ܠܰܗ ܗ̄ܽܘ ܓܽܘܫܡܰܝܕ̥ܺܝ. 9ܘ݄ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܽܘܠ ܐܰܝܟܳܐ ܕܡ݄ܟܪܳܙܳܐ ܗ̄ܺܝ ܣܒܰܪܬ̥ܰܝܕ̥ܺܝ ܗܰܬ̥ܶܐ ܒܟܽܘܠܶܗ ܗ̄ܽܘ ܥܳܠܡܳܐ، ܘܽܗ̄ܘ ܡܶܕܶܐ ܕܣ݄ܡ ܠܰܗ ܗܰܬ̥ܶܐ ܓܡܺܝܬ݄ܫܓ̥݄ܠ ܠܽܗ̄ܘ ܕܽܘܟ̥ܪܳܢܰܝܕ̥ܰܗ.“

ܗ̄ܽܘ ܢܶܟ̥ܠܳܐ ܕܺܝܗܽܘܕ̥ܳܐ

ܡܬܝ 26‏:14‏‐16؛ ܠܘܩܐ 22‏:3‏‐6

10ܘܰܐܙّܶܗ ܝܺܗܽܘܕ̥ܳܐ ܣܟ̥ܰܪܝܽܘܛܳܐ، ܕܟ݄ܬ ܗ̄ܘܰܐ ܚܰܕ̱ ܡܰܢ̱ ܬܪܰܥܣܰܪ ܬܰܠܡܺܝܕ̥̈ܶܐ، ܓܰܒ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܕܡܰܫܠ݄ܡ ܐܰ‌ܠّܶܗ ܝܶܫܽܘܥ. 11ܘܗ݄ܢّܶܝ، ܗ̄ܺܝ ܢܰܩܠܐ ܕܫܰܡܺܝܥܺܝ، ܦܨܺܝܚܺܝ، ܘ݄ܡܘܰܥܰܕّܶܗ ܕܳܗ̄ܒ݄ܢ ܠܶܗ ܙܽܘܙ̈ܶܐ. ܘܦܰܝ݄ܫ ܟܟܳܪ݄ܟ̥ ܥܰܠ ܦܽܘܪܣܳܐ ܡܶܕܶܐ ܕܡܰܫܠܰܡ ܠܶܗ.

ܗ̄ܺܝ ܚܫܰܡܬܳܐ ܕܽܗ̄ܘ ܦܶܨܚܳܐ

ܡܬܝ 26‏:17‏‐25؛ ܠܘܩܐ 22‏:7‏‐14؛ 22‏:21‏‐23؛ ܝܘܚܢܢ 13‏:21‏‐30

12ܘܒܽܗ̄ܘ ܝܰܘܡܳܐ ܩܰܕ̱ܡܳܝܳܐ (ܕܽܗ̄ܘ ܥܶܐܕ̥ܳܐ) ܕܰܦّܰܛܺܝܪ̈ܶܐ، ܕܶܐܒܶܗ ܗ̄ܰܝّܽܘܕ̥̈ܳܝܶܐ ܟܢ݄ܚܪܺܝ (ܦܰܪܳܐ ܕܽܗ̄ܘ) ܦܶܨܚܳܐ، ܟ݄ܐܡّܺܪ̱ܝ ܠܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ: ”ܐܰܝܟܳܐ ܟ݄ܐܒܥܰܬ ܕ݄ܐܙّܰܢ ܡܛܰܝܒܺܝܢܰܐ ܠܳܟ̥ ܕ݄ܐܟ̥ܠܰܬ ܗ̄ܽܘ ܦܶܨܚܳܐ؟“ 13ܘ݄ܡܫܰܕܰܪ ܠܶܗ ܬܪܶܝ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܠܺܗ̄ܝ ܡܕ̥ܺܝܢ̱ܬܳܐ ܘܓ݄ܕܚܳܙܰܠܟ̥ܽܘ ܚܰܕ̱ ܓܰܒ̥ܪܳܐ ܕܟܳܛܳܥ݄ܢ ܓܕ̥ܳܢܳܐ ܕܡܰܝ̈ܶܐ، ܙܳܟ̥ܽܘ ܒ݄ܬ̥ܪܶܗ. 14ܘܠܰܐܝܟܳܐ ܕܥܳܒ݄ܪ، ܐܡܰܪܽܘ ܠܽܗ̄ܘ ܡܳܪܳܐ ܕܽܗ̄ܘ ܒܰܝܬܳܐ: ܗ̄ܽܘ ܡܰܠܦܳܢܰܝܕ̥ܰܢ ܟܳܐܡ݄ܪ: ܐܰܝܟܳܐ ܝܳܐ ܗ̄ܺܝ ܕܽܘܟܬ̥ܳܐ ܕܶܐܒܰܗ ܓܕܳܐܟ̥ܰܠ ܐ̱ܢܳܐ ܥܰܡ ܗ̄ܰܬّܰܠܡܺܝܕ̥̈ܰܝܕ̥ܺܝ ܗ̄ܽܘ ܦܶܨܚܳܐ؟ 15ܘܓ݄ܕܡܰܚܘܰܠܟ̥ܽܘ ܥܶܠܺܝܬ̥ܳܐ ܪܰܒܬ̥ܳܐ ܦܪ݄ܣܬܳܐ ܘ݄ܡܛܰܝܰܒܬܳܐ، ܬܰܡܳܐ ܡܛܰܝܶܒܽܘ ܠܰܢ.“ 16ܘܢܰܦܺܝܩܺܝ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܰܐܬ̥݄ܢ ܠܺܗ̄ܝ ܡܕ̥ܺܝܢ̱ܬܳܐ، ܘ݄ܚܙܰܠّܶܗ ܐܟ̥ ܕܐܡ݄ܪ ܠܰܗ ܠّܶܗ، ܘ݄ܡܛܰܝܰܒّܶܗ ܗ̄ܽܘ ܦܶܨܚܳܐ. 17ܘܥܰܡ ܓܢܰܝܬܶܗ ܕܝܰܘܡܳܐ، ܐܰܬ̥ܺܝ ܥܰܡ ܗ̄ܰܬܪܰܥܣܰܪܰܝܕ̥ܶܗ. 18ܘܗ݄ܢّܶܝ ܝܰܬܺܝܒ̥̈ܶܐ ܟ݄ܐܟ̥ܠܺܝ، ܐܡ݄ܪ ܠܶܗ ܝܶܫܽܘܥ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܚܰܕ̱ ܡ݄ܢܟ̥ܽܘ ܕܟܳܐܟ̥݄ܠ ܐܰܥܡܺܝ ܗܺܝّܶܗ ܓ݄ܕܡܰܫܠܰܡ ܠܺܝ.“ 19ܘܗ݄ܢّܶܝ ܡܫܰܪܰܠّܶܗ ܕܡܺܝܬܰܥܺܝܩܺܝ، ܘܚܰܕ̱ ܚܰܕ̱ ܐܳܡܰܪ ܗ̄ܘܰܝ ܠܶܗ: ”ܐܳܢܳܐ ܐ̱ܢܳܐ؟“ 20ܘܗܺܝّܶܗ ܐܡ݄ܪ ܠܰܗ ܠّܶܗ: ”ܚܰܕ̱ ܡܰܢ̱ ܬܪܰܥܣܰܪ ܕܛܳܡ݄ܫ ܐܺܝܕ̥ܶܗ ܐܰܥܡܺܝ ܒܽܗ̄ܘ ܣܶܦܳܩܳܐ. 21ܘܰܐܒܪܶܗ ܕܢܳܫܳܐ ܟܕ݄ܐܙّܶܗ ܐܟ̥ ܕ݄ܟܬ̥ܺܝܒ̥ ܐܰܥܠܶܗ، ܐܶ‌ܠܳܐ ܘܳܝܳܐ ܠܽܗ̄ܘ ܓܰܒ̥ܪܰܘܳܐ ܕܒܺܐܝܕ̥ܶܗ ܓܡܺܝܬܰܫܠ݄ܡ ܐܰܒܪܶܗ ܕܢܳܫܳܐ! ܛܰܒ̥ ܗ̄ܘܰܐ ܠܽܗ̄ܘ ܓܰܒ̥ܪܰܘܳܐ ܕܠܳܐ ܡܺܝܬܰܘܠܰܕ̥ ܗ̄ܘܰܐ.“

ܗ̄ܺܝ ܚܫܰܡܬܳܐ ܕܰܐܪّܳܙ̈ܶܐ

ܡܬܝ 26‏:26‏‐30؛ ܠܘܩܐ 22‏:14‏‐23؛ ܩܘܪ̈ܢܬܝܐ ܐ 11‏:23‏‐25

22ܘܗ݄ܢّܶܝ ܟܳܐܟ̥ܠܺܝ، ܡ݄ܕ ܠܶܗ ܝܶܫܽܘܥ ܗ̄ܽܘ ܠܰܚܡܳܐ ܘ݄ܡܒܰܪܰܟ̥ ܠܶܗ ܘ݄ܩܨܶܐ ܠܶܗ، ܘܗܽܒ̥ ܠܰܗ ܠّܶܗ ܘܐܡ݄ܪ ܠܰܗ ܠّܶܗ: ”ܡܽܘܕܽܘ، ܗܰܢܳܐ ܝܳܐ ܗ̄ܽܘ ܦܰܓ̥ܪܰܝܕ̥ܺܝ.“ 23ܘܡ݄ܕ ܠܶܗ ܗ̄ܽܘ ܟܳܣܳܐ ܘܡܰܘܕܶܐ ܠܶܗ ܘ݄ܡܒܰܪܰܟ̥ ܠܶܗ ܘܗܽܒ̥ ܠܰܗ ܠّܶܗ، ܘܟܽܘܠّܶܗ ܫܬܰܠّܶܗ ܡܶܢܶܗ، 24ܘܐܡ݄ܪ ܠܰܗ ܠّܶܗ: ”ܗܰܢܳܐ ܝܳܐ ܗ̄ܽܘ ܐܰܕܡܰܝܕ̥ܺܝ، ܗ̄ܽܘ ܐܰܕܡܳܐ ܕܕܺܝܰܬܺܝܩܺܝ (ܕܽܗ̄ܘ ܩܝܳܡܳܐ) ܚܰܕ̱ܬ̥ܳܐ ܕܡܶܢ̱ ܚܠܳܦ ܓ̥ܰܠܰܒܶܐ ܟܡܺܝܒ݄ܙ. 25ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܢܰܩܠܐ ܚܪܶܬܳܐ ܠ݄ܐ ܓܫܳܬܶܐ ܐ̱ܢܳܐ ܡܽܗ̄ܘ ܦܺܐܪܰܢܳܐ ܕܺܗ̄ܝ ܣܰܬܳܐ ܗܳܠ ܠܽܗ̄ܘ ܝܰܘܡܰܘܳܐ ܕܶܐܒܶܗ ܓܫܳܬܶܢܶܗ ܚܰܕ̱ܬ̥ܳܐ ܒܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“ 26ܘ݄ܡܫܰܒܰܚّܶܗ ܘܢܰܦܺܝܩܺܝ ܠܽܗ̄ܘ ܛܽܘܪܳܐ ܕܰܙّܰܝ̈ܬܶܐ.

ܝܶܫܽܘܥ ܟܡܰܘܕ̥݄ܥ ܥܰܠ ܗ̄ܽܘ ܟܦܳܪܳܐ ܕܫܶܡܥܽܘܢ

ܡܬܝ 26‏:31‏‐35؛ ܠܘܩܐ 22‏:31‏‐34؛ ܝܘܚܢܢ 13‏:36‏‐38

27ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܒܽܗ̄ܘ ܠܰܠܝܰܢܳܐ، ܟܽܘ̇ܠܟ̥ܽܘ ܓܡ݄ܦܠܳܓ̥ܺܝܬܽܘ ܐܰܥܠܺܝ، ܥܰܠ ܕܟ݄ܬ ܝܳܐ ܟܬ̥ܺܝܒ̥ܳܐ: ܓܡܳܚܶܐ ܐ̱ܢܳܐ ܠܽܗ̄ܘ ܪܳܥܝܳܐ ܘ݄ܓܡܺܝܒܰܪܒܙܺܝ ܗ̄ܰܦّܰܪ̈ܰܝܕ̥ܶܗ. 28ܐܶ‌ܠܳܐ ܡ݄ܐ ܕܩܰܝ݄ܡ ܐ̱ܢܳܐ، ܓܕܳܗ̄ܘܶܐ ܐ̱ܢܳܐ ܡܶܩ݄ܕ̱ܡ ܡ݄ܢܟ̥ܽܘ ܒܽܗ̄ܘ ܓܠܺܝܠܳܐ.“ 29ܐܡ݄ܪ ܠܶܗ ܠܶܗ ܟܶܐܦܳܐ: ”ܐܶܢ ܟܽܘܠّܶܗ ܡ݄ܦܠܳܓ̥ܺܝ، ܐܶܠܳܐ ܠܳܐ ܐܳܢܳܐ!“ 30ܐܡ݄ܪ ܠܶܗ ܠܶܗ ܝܶܫܽܘܥ: ”ܫܪܳܪܳܐ ܟܳܐܡܰܪ ܐ̱ܢܳܐ ܠܳܟ̥: ܗܰܬ، ܐܰܕܝܰܘܡܰܐ ܒܽܗ̄ܘ ܠܰܠܝܰܢܳܐ، ܘܡܶܩ݄ܕ̱ܡ ܕܩܳܪܶܐ ܗ̄ܽܘ ܙܳܓ̥ܳܐ ܬܰܪܬܶܝ ܟܳܪ̈ܶܐ، ܬܠ݄ܬ̥ ܟܳܪ̈ܶܐ ܓ݄ܕܟ݄ܦܪܰܬ ܐܶܒܺܝ.“ 31ܘܗܺܝّܶܗ ܙ݄ܕ ܐܳܡܰܪ ܗ̄ܘܰܐ: ”ܐܶܢ ܕܳܗ̄ܘܶܐ ܠܺܝ ܕܡܳܝܰܬ̥ ܐ̱ܢܳܐ ܐܰܥܡܳܟ̥، ܠ݄ܐ ܓܟܳܦܰܪ ܐ̱ܢܳܐ ܐܶܒܳܟ̥، ܡܳܪܝ!“ ܘܐܟ̥݄ܕܘܳܬ̥ܶܗ ܣܬܶܝ ܟܽܘܠّܶܗ ܐܡ݄ܪّܶܗ.

ܝܶܫܽܘܥ ܟ݄ܡܨܰܠܶܐ ܒܺܗ̄ܝ ܓܰܢܬ̥ܳܐ ܕܓܶܕܣܺܝܡܰܢ

ܡܬܝ 26‏:36‏‐46؛ ܠܘܩܐ 22‏:39‏‐46

32ܘܰܐܬ̥݄ܢ ܠܺܗ̄ܝ ܕܽܘܟܬ̥ܳܐ ܕܡ݄ܩܪܳܝܳܐ ܓܶܕܣܺܡܰܢ، ܘܐܡ݄ܪ ܠܶܗ ܠܰܬّܰܠܡܺܝܕ̥̈ܰܝܕ̥ܶܗ: ”ܝܺܬܰܒ̥ܽܘ ܗܰܪܟܶܐ ܗܳܠ ܕ݄ܡܨܰܠܶܐ ܐ̱ܢܳܐ.“

33ܘܡܰܘܒܶܠ ܠܶܗ ܐܰܥܡܶܗ ܠܟܶܐܦܳܐ ܘ݄ܠܝܰܥܩܽܘܒ ܘ݄ܠܝܽܘܚܰܢܳܢ، ܘ݄ܡܫܰܪܶܐ ܠܶܗ ܕܟܳܪܝܳܐ ܠܶܗ ܘܡܺܝܬܰܥ݄ܩ. 34ܘܐܡ݄ܪ ܠܰܗ ܠّܶܗ: ”ܟܰܪܝܳܐ ܠܰܗ ܠܢܰܦܫܺܝ ܗܳܠ ܠܽܗ̄ܘ ܡܰܘܬܳܐ. ܦܽܘܫܽܘ ܗܰܪܟܶܐ ܘ݄ܫܗܰܪܽܘ!“ 35ܘ݄ܡܩܰܪܰܒ̥ ܠܶܗ ܐ݄ܫܡܳܐ، ܘܢܰܦ݄ܠ ܥܰܠ ܗ̄ܺܝ ܐܰܪܥܳܐ ܘ݄ܡܨܰܠܶܐ ܗ̄ܘܰܐ ܕܶܐܢ ܟܳܗ̄ܘܶܐ ܕܥܳܒܪܳܐ ܡܶܢܶܗ ܗ̄ܺܝ ܫܳܥܬ̥ܳܐ. 36ܘܐܡ݄ܪ ܠܶܗ: ”ܐܰܒܳܐ، ܝܰܐ ܗ̄ܽܘ ܐܰܒܰܝܕ̥ܺܝ! ܟܽܘܠ ܡܶܕܶܐ ܟܺܝܒܳܟ̥، ܡܰܥܒ݄ܪ ܡܶܢܺܝ ܗ̄ܽܘ ܟܳܣܰܢܳܐ. ܐܶ‌ܠܳܐ ܠܳܐ ܗ̄ܽܘ ܨܶܒܝܳܢܰܝܕ̥ܺܝ، ܐܶܠܳܐ ܕܺܝܕ̥ܳܟ̥.“ 37ܘܰܐܬ̥ܺܝ ܚܙܰܠّܶܗ ܕܰܡܺܝܟ̥̈ܶܐ، ܘܐܡ݄ܪ ܠܶܗ ܠܟܶܐܦܳܐ: ”ܫܶܡܥܽܘܢ! ܕܰܡܺܝܟ̥ ܗ̄ܰܬ؟ ܠܳܐ ܩܰܕܺܝܪܰܬ ܕܫܳܗܪܰܬ ܚܕ̥ܳܐ ܫܳܥܬ̥ܳܐ؟ 38ܫܗܰܪܽܘ ܘ݄ܡܨܰܠܰܝܽܘ ܕܠܳܐ ܥ݄ܒܪܺܝܬܽܘ ܠܽܗ̄ܘ ܢܶܣܝܽܘܢܳܐ. ܗ̄ܺܝ ܪܽܘܚܳܐ ܟ݄ܐܒܥܳܐ ܘ݄ܡܛܰܝܒܬܳܐ ܝܳܐ، ܐܶ‌ܠܳܐ ܗ̄ܽܘ ܦܰܓ̥ܪܳܐ ܡܚܺܝܠܳܐ ܝܳܐ.“ 39ܘܰܐܙّܶܗ ܢܰܩܠܐ ܚܪܶܬܳܐ ܡܨܰܠܶܐ ܠܶܗ، ܘܶܐ‌ܠܶܗ ܠܽܗ̄ܘ ܡܰܐܡܪܰܘܳܐ ܐܡ݄ܪ ܠܶܗ. 40ܘܕܰܥ݄ܪ ܐܰܬ̥ܺܝ ܢܰܩܠܐ ܚܪܶܬܳܐ، ܘ݄ܚܙܰܠّܶܗ ܕܰܡܺܝܟ̥̈ܶܐ، ܥܰܠ ܕܥܰܝܢ̈ܳܬ̥ܰܝّܶܗ ܝܰܩܺܝܪܺܝ ܗ̄ܘܰܘ̱، ܘܠ݄ܐ ܐܕ̥ܥܺܝ ܗ̄ܘܰܘ̱ ܡ݄ܢ ܐ݄ܡّܺܪ̱ܝ ܠܶܗ. 41ܘܰܐܬ̥ܺܝ ܕܰܬܠ݄ܬ̥ ܟܳܪ̈ܶܐ، ܘܐܡ݄ܪ ܠܰܗ ܠّܶܗ: ”ܡܳܐܥܕܳܐ ܕܡܰܟ̥ܽܘ ܘܡ݄ܬ̥ܢܶܚܽܘ، ܡܰܛܝܳܐ ܗ̄ܺܝ ܚܰܪܰܝܬܳܐ ܘܰܐܬ̥ܝܳܐ ܗ̄ܺܝ ܫܳܥܬ̥ܳܐ، ܘܟܰܐܠܶܗ ܐܰܒܪܶܗ ܕܢܳܫܳܐ ܓܡܺܝܬܰܫܠ݄ܡ ܒܺܐܝܕ̥̈ܶܐ ܕܰܚّܰܛܳܝ̈ܶܐ. 42ܩܽܘܡܽܘ ܕ݄ܐܙّܰܢ! ܟܰܐܠܶܗ ܡܩܰܪܰܒ̥ ܠܶܗ ܗܰܘܰܐ ܕܡܰܫܠܰܡ ܠܺܝ!“

ܝܺܗܽܘܕ̥ܳܐ ܟܡܰܫܠܶܡ ܗ̄ܽܘ ܪܰܒܰܝܕ̥ܶܗ

ܡܬܝ 26‏:47‏‐56؛ ܠܘܩܐ 22‏:47‏‐53؛ ܝܘܚܢܢ 18‏:3‏‐12

43ܘܗܶܫ ܗܺܝّܶܗ ܟܡ݄ܫܓ̥݄ܠ، ܐܰܬ̥ܺܝ ܝܺܗܽܘܕ̥ܳܐ ܣܟ̥ܰܪܝܽܘܛܳܐ، ܚܰܕ̱ ܡܰܢ̱ ܬܪܰܥܣܰܪ، ܘܥܰܡܳܐ ܓ̥ܰܠܰܒܶܐ ܥܰܡ ܣܰܝ̈ܦܶܐ ܘܚܰܛܪ̈ܳܬ̥ܳܐ ܡܶܢ̱ ܓܰܒ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܰܩّܰܫ̈ܶܐ. 44ܘܽܗ̄ܘ ܡܰܫ݄ܠܡܳܢܳܐ ܗܽܒ̥ ܠܰܗ ܠّܶܗ ܐܳܬ̥ܳܐ ܘܐܡ݄ܪ ܠܶܗ: ”ܠܰܗ̄ܘܳܐ ܕܢܳܫܰܩ ܐ̱ܢܳܐ، ܗܺܝّܶܗ ܝܳܐ، ܨܽܘܕܽܘ ܠܶܗ ܛܳܒ̥ܳܐ ܘܡܰܘܒܶܠܽܘ ܠܶܗ.“ 45ܘܒܺܗ̄ܝ ܫܳܥܬ̥ܰܝܕ̥ܰܗ، ܡܩܰܕܰܡ ܠܶܗ ܘܐܡ݄ܪ ܠܶܗ ܠܶܗ: ”ܡܰܠܦܳܢܳܐ ܡܰܠܦܳܢܳܐ!“ ܘ݄ܢܫ݄ܩ ܠܶܗ. 46ܘܗ݄ܢّܶܝ ܡܰܚ݄ܬّܶܗ ܐܰܥܠܶܗ ܐܺܝܕ̥ܳܐ ܘܨ݄ܕّܶܗ. 47ܘܚܰܕ̱ ܡܰܗ̄ܢ݄ܟ ܕܩܰܝܡܺܝ ܗ̄ܘܰܘ̱ ܬܰܡܳܐ ܫܡ݄ܛ ܠܶܗ ܣܰܝܦܳܐ ܘ݄ܡܚܶܐ ܠܶܗ ܠܽܗ̄ܘ ܓܪܶܝܥܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ، ܘ݄ܩܛ݄ܥ ܠܶܗ ܐܰܕ̥ܢܶܗ. 48ܘܗܺܝّܶܗ ܝܶܫܽܘܥ ܡܰܕܥܰܪ ܠܶܗ ܘܐܡ݄ܪ ܠܰܗ ܠّܶܗ: ”ܐܟ̥ ܕܥܰܠ ܚܰܕ̱ ܡܰܫܠܚܳܢܳܐ ܢܰܦܺܝܩܺܝܬܽܘ ܒܣܰܝ̈ܦܶܐ ܘ݄ܒܚܰܛܪ̈ܳܬ̥ܳܐ ܕܨܰܝܕܺܝܬܽܘ ܠܺܝ؟ 49ܟܽܘܠ ܝܰܘܡܳܐ ܓܰܒܰܝܟ̥ܽܘ ܗ̄ܘܰܝ ܐ̱ܢܳܐ، ܘܡܰܘܠܰܦ ܗ̄ܘܰܝ ܐ̱ܢܳܐ ܒܽܗ̄ܘ ܗܰܝܟܠܳܐ ܘܠܳܐ ܨ݄ܕܟ̥ܽܘ ܠܺܝ. ܐܶ‌ܠܳܐ ܠܰܫܰܢ ܕܟܳܡܠܺܝ ܗ̄ܰܟܬ̥ܳܒ̥̈ܶܐ ܗܰܘܝܳܐ ܗܰܬ̥ܶܐ.“ 50ܗܶܕܺܝ ܛܪܰܠّܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܥܰܪܺܝܩܺܝ. 51ܘܚܰܕ̱ ܥܠܰܝܡܳܐ ܐܳܬ̥ܶܐ ܗ̄ܘܰܐ ܒ݄ܬ̥ܪܶܗ، ܘ݄ܠܒ̥ܺܝܫܳܐ ܗ̄ܘܰܐ ܫܽܘܫܶܦܳܐ ܥܰܠ ܓܽܘܫܡܶܗ، ܘܨ݄ܕّܶܗ. 52ܘܗܺܝّܶܗ ܡܰܪܦܶܐ ܠܶܗ ܗ̄ܺܝ ܡܰܢܕܶܝܠܳܐ ܘܥܰܪ݄ܩ ܕܠܳܐ ܠܒܽܘܫ̈ܶܐ.

ܝܶܫܽܘܥ ܩܕ̱ܡ ܗ̄ܽܘ ܕܺܝܢܳܐ

ܡܬܝ 26‏:57‏‐68؛ ܠܘܩܐ 22‏:54‏‐71؛ 22‏:63‏‐71؛ ܝܘܚܢܢ 18‏:13‏‐24

53ܘܡܰܘܒܰܠّܶܗ ܝܶܫܽܘܥ ܠܓܰܒ ܩܰܝܳܦܳܐ ܗ̄ܽܘ ܪܰܒܳܐ ܕܰܟّܳܗ̈ܢܶܐ، ܘܠܰܬܺܝܡܺܝ ܓܰܒܶܗ ܟܽܘܠّܶܗ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܰܩّܰܫ̈ܶܐ. 54ܘܫܶܡܥܽܘܢ، ܡܶܢ̱ ܪܽܘܚܩܳܐ، ܐܳܬ̥ܶܐ ܗ̄ܘܰܐ ܒ݄ܬ̥ܪܶܗ ܗܳܠ ܠܰܘܓ̥݄ܠ ܕܺܗ̄ܝ ܕܳܪܬܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ، ܘܝܳܬܰܒ̥ ܗ̄ܘܰܐ ܥܰܡ ܗ̄ܰܡܫܰܡܫܳܢ̈ܶܐ ܘ݄ܡܫܰܚܰܢ ܗ̄ܘܰܐ ܡܩܰܒ݄ܠ ܕܺܗ̄ܝ ܢܽܘܪܳܐ. 55ܘܰܪّܰܒ̈ܶܐ ܕܰܟّܳܗ̈ܢܶܐ ܘܟܽܘܠّܶܗ ܗ̄ܰܢ ܢܳܫ̈ܰܬّ̥ܶܗ ܐ݄ܒܥܺܝ ܗ̄ܘܰܘ̱ ܣܳܗܕܽܘܬ̥ܳܐ ܥܰܠ ܝܶܫܽܘܥ ܠܰܫܰܢ ܕܡܰܡܺܝܬ̥ܺܝ ܠܶܗ، ܘܠܳܐ ܚܙܰܠّܶܗ. 56ܡܺܐܝܕ̥ܶܗ ܕܓ̥ܰܠܰܒܶܐ ܣܳܗܕܺܝ ܗ̄ܘܰܘ̱ ܐܰܥܠܶܗ، ܐܶ‌ܠܳܐ ܗ̄ܰܣّܳܗܕ̈ܘܳܬ̥ܰܬّ̥ܶܗ ܠܰܝ̱ܬ ܗ̄ܘܰܝܢܶܝ ܐܟ̥ ܚܕ̥ܳܕ̥̈ܶܐ. 57ܘܢܳܫ̈ܶܐ ܣܳܗܕ̈ܶܐ ܕܰܕّܽܘܓ̈ܠܶܐ ܩܰܝܺܝܡܺܝ ܐܰܥܠܶܗ ܘܐܡ݄ܪّܶܗ: 58”ܐܰܚܢܰܐ ܫܰܡܺܝܥܺܝܢܰܐ ܠܶܗ ܕܐܡ݄ܪ ܠܶܗ: ܐܳܢܳܐ ܟܡܰܕܪܶܐ ܐ̱ܢܳܐ ܗ̄ܽܘ ܗܰܝܟܠܰܢܳܐ ܕܣܺܝܡ ܒܰܗ̄ܢ ܐܺܝܕ̥̈ܶܐ، ܘܒ݄ܬܠܳܬ̥ܳܐ ܝܰܘܡ̈ܶܐ ܓܒܳܢܶܐ ܐ̱ܢܳܐ ܚܪܶܢܳܐ ܕܠܳܐ ܣܺܝܡ ܒܺܐܝܕ̥̈ܶܐ.“ 59ܘܠܳܐ ܗܰܘܟ̥ܰܐ ܣܬܶܝ ܗ̄ܺܝ ܣܳܗܕܽܘܬ̥ܰܬّ̥ܶܗ ܠܰܝ̱ܬ ܗ̄ܘܰܐ ܐܟ̥ ܚܕ̥ܳܕ̥̈ܶܐ. 60ܘܩܰܝ݄ܡ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܒܽܗ̄ܘ ܦܰܠܓܳܐ ܘ݄ܡܫܰܐܶܠ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܠ݄ܐ ܟܡܰܕܥܪܰܬ ܡܶܠܬ̥ܳܐ؟ ܡ݄ܢ ܟܳܣܳܗܕܺܝ ܐܰܥܠܳܟ̥ ܗܰܢܺܝ؟“ 61ܐܶ‌ܠܳܐ ܗܺܝّܶܗ ܟܰܠܺܝ ܗ̄ܘܰܐ ܘܡܶܕܶܐ ܠܳܐ ܡܰܕܥܰܪ ܠܶܗ ܐܰܥܠܶܗ. ܘܕܰܥ݄ܪ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܡܫܰܐܶܠ ܠܶܗ ܠܶܗ ܘܐܡ݄ܪ ܠܶܗ: ”ܗܰܬ ܗ̄ܰܬ ܡܫܺܝܚܳܐ ܗ̄ܽܘ ܐܰܒܪܳܐ ܕܽܗ̄ܘ ܡܒܰܪܟ̥ܳܐ؟“ 62ܘܝܶܫܽܘܥ ܐܡ݄ܪ ܠܶܗ ܠܶܗ: ”ܐܳܢܳܐ ܐ̱ܢܳܐ! ܘܓ݄ܕܚܳܙܺܝܬܽܘ ܐܰܒܪܶܗ ܕܢܳܫܳܐ ܝܰܬܺܝܒ̥ܳܐ ܡܽܗ̄ܘ ܝܰܡܺܝܢܳܐ ܕܽܗ̄ܘ ܚܰܝܠܳܐ ܘܰܐܬ̥ܳܝܳܐ ܥܰܠ ܗ̄ܰܥّܰܝܡ̈ܶܐ ܕܺܗ̄ܝ ܫܡܰܝܳܐ.“ 63ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܩܛ݄ܥ ܠܶܗ ܗ̄ܺܝ ܩܶܡ݄ܣܬܰܝܕ̥ܶܗ ܘܐܡ݄ܪ ܠܶܗ: ”ܗܰܢ ܢܰܩܠܐ ܡ݄ܢ ܣܳܗܕ̈ܶܐ ܟܳܐܒܰܥ ܠܰܢ؟ 64ܟܰܐܠܶܗ ܡܶܢ̱ ܦܶܡܶܗ ܫܰܡܺܝܥܺܝܬܽܘ ܓܽܘܕܳܦܳܐ. ܡ݄ܢ ܟܚܳܙܺܝܬܽܘ؟“ ܘܟܽܘܠّܶܗ ܕ݄ܢّܶܗ: ”ܟܫܳܘܶܐ ܠܽܗ̄ܘ ܡܰܘܬܳܐ.“ 65ܘܗ݄ܢ ܡ݄ܢّܶܗ ܡܫܰܪܰܠّܶܗ ܕܪܰܝܩܺܝ ܒܦܳܬ̥ܶܗ، ܘ݄ܡܟܰܣ݄ܢ ܦܳܬ̥ܶܗ ܘܡܳܚ݄ܢ ܠܶܗ ܥܰܠ ܪܺܝܫܶܗ ܘ݄ܐܡّܺܪ̱ܝ: ”ܡ݄ܬܢܰܒܰܝ“. ܘܰܗ̄ܢ ܢܳܛܽܘܪ̈ܶܐ ܡܳܚ݄ܢ ܗ̄ܘܰܝ ܠܶܗ ܥܰܠ ܦܳܬ̥ܶܗ.

ܗ̄ܽܘ ܟܦܳܪܳܐ ܕܫܶܡܥܽܘܢ

66ܘܗܶܫ ܫܶܡܥܽܘܢ ܠܰܠܬܰܚ ܒܺܗ̄ܝ ܕܳܪܬܳܐ، ܐܰܬ̥ܝܳܐ ܚܕ̥ܳܐ ܥܠܰܝܡܬܳܐ ܕܽܗ̄ܘ ܪܰܒܳܐ ܕܰܟّܳܗ̈ܢܶܐ، 67ܚܙܶܐ ܠܰܗ ܕܟܳܡܫܰܚ݄ܢ ܪܽܘܚܶܗ، ܘܚ݄ܪ ܠܰܗ ܐܶܒܶܗ ܘܟܳܐܡّܳܪ̱ܐ ܠܶܗ: ”ܘܗܰܬ ܣܬܶܝ ܥܰܡ ܝܶܫܽܘܥ ܗ̄ܽܘ ܢܳܨܪܳܝܳܐ ܗ̄ܘܰܝܬ!“ 68ܘܗܺܝّܶܗ ܟܰܦ݄ܪ ܘܐܡ݄ܪ ܠܶܗ: ”ܠ݄ܐ ܟܳܐܕ̥ܰܥ ܐ̱ܢܳܐ ܡ݄ܢ ܟ݄ܐܡّܰܪ̱ܬ.“ ܘܢܰܦ݄ܩ ܠܰܪܒ̥ܰܠ ܩ݄ܕ̱ܡ ܗ̄ܽܘ ܬܰܪܥܳܐ، ܘ݄ܩܪܶܐ ܠܶܗ ܗ̄ܽܘ ܙܳܓ̥ܳܐ. 69ܢܰܩܠܐ ܚܪܶܬܳܐ ܚܙܶܐ ܠܰܗ ܠܶܗ ܗ̄ܺܝ ܥܠܰܝܡܬܰܝܳܐ، ܘ݄ܡܫܰܪܶܐ ܠܰܗ ܕ݄ܐܡّܳܪ̱ܐ ܠܰܩّܺܝܡ̈ܶܐ: ”ܗܰܢܳܐ ܣܬܶܝ ܡ݄ܢّܶܗ ܝܳܐ!“ 70ܘܗܺܝّܶܗ ܢܰܩܠܐ ܚܪܶܬܳܐ ܟܰܦ݄ܪ. ܘܒ݄ܬ̥݄ܪ ܐ݄ܫܡܳܐ، ܗܰܢ݄ܟ ܕܩܰܝܡܺܝ ܗ̄ܘܰܘ̱ ܐܡ݄ܪّܶܗ ܠܟܶܐܦܳܐ: ”ܒ݄ܫܪܳܪܳܐ ܡ݄ܢّܶܗ ܗܰܬ، ܟܰܠܳܟ̥ ܓܠܺܝܠܳܝܳܐ ܗܰܬ ܘ݄ܟܡܰܚܘܶܐ ܡܽܗ̄ܘ ܡܰܡܠܰܠܝܕ̥ܳܟ̥.“ 71ܘܗܺܝّܶܗ ܡܫܰܪܶܐ ܠܶܗ ܕܡܰܚܪ݄ܡ ܘܝܳܡܶܐ: ”ܠ݄ܐ ܟܳܐܕ̥ܰܥ ܐ̱ܢܳܐ ܠܽܗ̄ܘ ܓܰܒ̥ܪܰܢܳܐ ܕܟ݄ܐܡّܺܪ̱ܝܬܽܘ.“ 72ܘܒܺܗ̄ܝ ܫܳܥܬ̥ܰܝܕ̥ܰܗ، ܩܪܶܐ ܠܶܗ ܗ̄ܽܘ ܙܳܓ̥ܳܐ ܕܰܬّܰܪܬܶܝ ܟܳܪ̈ܶܐ، ܘܰܐܬ̥ܺܝ ܠܒܳܠܶܗ ܕܫܶܡܥܽܘܢ ܗ̄ܽܘ ܡܰܐܡܪܳܐ ܕܝܶܫܽܘܥ ܕܐܡ݄ܪ ܗ̄ܘܰܝ ܠܶܗ ܠܶܗ: ”ܡܶܩ݄ܕ̱ܡ ܕܩܳܪܶܐ ܗ̄ܽܘ ܙܳܓ̥ܳܐ ܬܰܪܬܶܝ ܟܳܪ̈ܶܐ، ܬܠ݄ܬ̥ ܓ݄ܕܟ݄ܦܪܰܬ ܐܶܒܺܝ.“ ܘ݄ܡܫܰܪܶܐ ܠܶܗ ܕܒܳܟ̥ܶܐ.

Currently Selected:

ܡܓܰܠܝܘܢ ܕܡܪܩܘܣ 14: ܟܬܒܐ

Highlight

Copy