ܡܓܰܠܝܘܢ ܕܡܪܩܘܣ 11

ܗ̄ܺܝ ܡܕܰܒܪܳܢܽܘܬ̥ܳܐ ܕܡܳܪܰܢ ܒܽܐܘܪܶܫܠܶܡ

ܗ̄ܺܝ ܥܒܰܪܬܳܐ ܕܝܶܫܽܘܥ ܠܽܐܘܪܶܫܠܶܡ ܒܙܽܘܝܳܚܳܐ ܪܰܒܳܐ

ܡܬܝ 21‏:1‏‐11؛ ܠܘܩܐ 19‏:28‏‐40؛ ܝܘܚܢܢ 12‏:12‏‐19

1ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܠܽܐܘܪܶܫܠܶܡ، ܥܰܠ ܗ̄ܽܘ ܓܰܒܳܐ ܕܒܶܝܬ̥ ܦܳܓ̈ܶܐ ܘܒܶܝܬ̥ ܥܰܢܝܳܐ، ܓܰܒ ܗ̄ܽܘ ܛܽܘܪܳܐ ܕܰܙّܰܝ̈ܬܶܐ، ܡܫܰܕܰܪ ܠܶܗ ܬܪܶܝ ܡܰܢ̱ ܬّܰܠܡܺܝܕ̥̈ܰܝܕ̥ܶܗ، 2ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܠܺܗ̄ܝ ܩܪܺܝܬ̥ܰܝܳܐ ܕܟ݄ܬ ܝܳܐ ܡܩܰܒ݄ܠ ܕܺܝܕ̥ܰܢ، ܘܡܶܚܕ̥ܳܐ ܕܥܳܒܪܺܝܬܽܘ ܠܰܗ، ܟܚܳܙܺܝܬܽܘ ܥܺܝܠܳܐ، ܕܢܳܫܳܐ ܠܳܐ ܪܰܒ̥݄ܟ̥ ܐܰܥܠܶܗ، ܫܪܰܝܽܘ ܠܶܗ ܘܡܰܝܬܰܝܽܘ ܠܶܗ. 3ܘܶܐܢ ܢܳܫܳܐ ܕܳܐܡܰܪܟ̥ܽܘ: ܡ݄ܢܝܳܐ ܗܰܬ̥ܶܐ ܕܟܳܣܰܝܡܺܝܬܽܘ؟ ܐܡܰܪܽܘ ܠܶܗ: ܠܡܳܪܰܢ ܟܠܳܙ݄ܡ. ܘܡܶܚܕ̥ܳܐ ܓ݄ܡܫܰܕܰܪ ܠܶܗ ܠܰܗ̄ܪܟܶܐ.“ 4ܘܰܐܙّ݄ܢ ܚܙܰܠّܶܗ ܥܺܝܠܳܐ ܡܰܐܣܪܳܐ ܥܰܠ ܗ̄ܽܘ ܬܰܪܥܳܐ، ܠܰܪܒ̥ܰܠ ܒܺܗ̄ܝ ܫܽܘܩܳܐ. ܘܗ݄ܢّܶܝ ܟܫܳܪ݄ܢ ܠܶܗ، 5ܢܳܫ̈ܶܐ ܡܰܗ̄ܢܺܝ ܕܩܰܝܡܺܝ ܗ̄ܘܰܘ̱ ܐܡ݄ܪّܰܢّܶܗ: ”ܡ݄ܢܝܳܐ ܗܰܬ̥ܶܐ ܕܟܳܣܰܝܡܺܝܬܽܘ، ܕܟܳܫܳܪܺܝܬܽܘ ܗ̄ܽܘ ܥܺܝܠܳܐ؟“ 6ܘܗ݄ܢّܶܝ ܐܡ݄ܪّܰܢّܶܗ ܐܟ̥ ܕܡܰܩܘܶܐ ܠܶܗ ܐܰܥܠܰܝّܶܗ ܝܶܫܽܘܥ، ܘ݄ܛܪܰܢّܶܗ. 7ܘܡܰܝܬܰܠّܶܗ ܗ̄ܽܘ ܥܺܝܠܳܐ ܠܓܰܒ ܝܶܫܽܘܥ، ܘܡܰܚ݄ܬّܶܗ ܐܰܥܠܶܗ ܗ̄ܰܠܒܽܘܫ̈ܰܬّ̥ܶܗ، ܘܪܰܒ̥݄ܟ̥ ܐܰܥܠܶܗ ܝܶܫܽܘܥ. 8ܘܓ̥ܰܠܰܒܶܐ ܦܳܪܣܺܝ ܗ̄ܘܰܘ̱ ܗ̄ܰܠܒܽܘܫ̈ܰܬّ̥ܶܗ ܒܽܗ̄ܘ ܕܰܪܒܳܐ، ܘ݄ܚܪ̈ܶܢܶܐ ܩܳܛܥܺܝ ܗ̄ܘܰܘ̱ ܣܰܘܟ̈ܶܐ ܡܰܗ̄ܢ ܐܺܝܠܳܢ̈ܶܐ ܘܦ݄ܪܣܺܝ ܗ̄ܘܰܘ̱ ܒܽܗ̄ܘ ܕܰܪܒܳܐ. 9ܘܗܰܢ݄ܟ ܕܩܽܘܕ̱ܡܶܗ (ܡܗܰܠܟ̥ܺܝ ܗ̄ܘܰܘ̱)، ܘܗܰܢ݄ܟ ܕܒ݄ܬ̥ܪܶܗ، ܡܰܙܥܩܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܐܽܘܫܰܥܢܳܐ ܒܰܡܪ̈ܰܘܡܶܐ (ܥܶܠܳܝ̈ܶܐ)! ܒܪܺܝܟ̥ܳܐ ܝܳܐ ܕܳܐܬ̥ܶܐ ܒ݄ܐܫܡܶܗ ܕܡܳܪܝܳܐ. 10ܘ݄ܒܪܺܝܟ̥ܬܳܐ ܝܳܐ ܗ̄ܺܝ ܡܰܠܟܽܘܬ̥ܳܐ ܕܳܐܬ̥ܝܳܐ، ܕܒܰܒܰܢ ܕܰܘܺܝܕ̥، ܐܽܘܫܰܥܢܳܐ ܒܰܡܪ̈ܰܘܡܶܐ.“ 11ܘܥܰܒ݄ܪ ܝܶܫܽܘܥ ܠܽܐܘܪܶܫܠܶܡ، ܠܽܗ̄ܘ ܗܰܝܟܠܳܐ، ܘ݄ܚܙܶܐ ܠܶܗ ܟܽܘܠ ܡܶܕܶܐ. ܘܥܰܡ ܓܢܰܝܬܶܗ ܕܝܰܘܡܳܐ، ܢܰܦ݄ܩ ܠܒܶܝܬ̥ ܥܰܢܝܳܐ ܥܰܡ ܗ̄ܰܬܪܰܥܣܰܪ.

ܝܶܫܽܘܥ ܟܠܳܝ݄ܛ ܗ̄ܺܝ ܬܶܐܢܳܐ

ܡܬܝ 21‏:18‏‐19

12ܘܠܽܗ̄ܘ ܝܰܘܡܳܐ ܚܪܶܢܳܐ، ܗ̄ܺܝ ܢܰܩܠܐ ܕܢܰܦ݄ܩ ܡܶܢ̱ ܒܶܝܬ̥ ܥܰܢܝܳܐ ܟܰܦ݄ܢ. 13ܘ݄ܚܙܶܐ ܠܶܗ ܬܶܐܢܳܐ ܚܕ̥ܳܐ ܡܶܢ̱ ܪܽܘܚܩܳܐ ܕܟܺܝܬ ܐܶܒܰܗ ܛܰܪ̈ܦܶܐ. ܘܰܐܬ̥ܺܝ ܠܣܺܝܕ̥ܰܗ ܕܚܳܙܶܐ ܐܶܢ ܟܺܝܬ ܐܶܒܰܗ ܡܶܕܶܐ. ܘܺܗ̄ܝ ܢܰܩܠܐ ܕܰܐܬ̥ܺܝ، ܠܳܐ ܚܙܶܐ ܠܶܗ ܐܶܒܰܗ ܐܶ‌ܠܳܐ ܛܰܪ̈ܦܶܐ، ܡܺܐܝܕ̥ܶܗ ܕܗܶܫ ܠܰܐ ܗ̄ܘܺܝ ܗ̄ܘܰܐ ܗ̄ܽܘ ܙܰܒܢܳܐ ܕܰܬّܶܐܢ̈ܶܐ. 14ܘܐܡ݄ܪ ܠܶܗ ܠܰܗ: ”ܡܳܐܥܕܳܐ ܘܗܳܠ ܠܥܳܠܰܡ ܢܳܫܳܐ ܠܳܐ ܐܟ̥݄ܠ ܡܶܢܰܟ̥ ܦܺܐܪ̈ܶܐ.“ ܘܫܰܡܺܝܥܺܝ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܰܐܬ̥݄ܢ ܠܽܐܘܪܶܫܠܶܡ.

ܝܶܫܽܘܥ ܟܡܰܘܦ݄ܩ ܗ̄ܰܡܨܰܪ̈ܦܳܢܶܐ ܡܽܗ̄ܘ ܗܰܝܟܠܳܐ

ܡܬܝ 21‏:12‏‐17؛ ܠܘܩܐ 19‏:45‏‐48؛ ܝܘܚܢܢ 2‏:13‏‐22

15ܘܥܰܒ݄ܪ ܝܶܫܽܘܥ ܠܽܗ̄ܘ ܗܰܝܟܠܳܐ ܕܰܐ‌ܠܳܗܳܐ، ܘ݄ܡܫܰܪܶܐ ܠܶܗ ܕܡܰܘܦ݄ܩ ܠܰܐܝܢܰܐ ܕܙܳܒ̥ܢܺܝ ܘ݄ܡܙܰܒܢܺܝ ܒܽܗ̄ܘ ܗܰܝܟܠܳܐ. ܘܡܰܩܠܰܒ ܠܶܗ ܗ̄ܰܛّܶܒ݄̈ܠܝܳܬ̥ܳܐ ܕܰܡܨܰܪ̈ܦܳܢܶܐ ܘܰܟّܽܘܪ̈ܣܰܘܳܬ̥ܳܐ ܕܰܗ̄ܢ݄ܟ ܕ݄ܡܙܰܒܢܺܝ ܗ̄ܘܰܘ̱ ܝܰܘܢ̈ܶܐ، 16ܘܠܳܐ ܛܳܪܶܐ ܗ̄ܘܰܐ ܢܳܫܳܐ ܕܡܰܥܒ݄ܪ ܡܶܕ̈ܳܢܶܐ ܠܰܘܓ̥݄ܠ ܒܽܗ̄ܘ ܗܰܝܟܠܳܐ. 17ܘܡܰܘܠܰܦ ܗ̄ܘܰܐ ܘܳܐܡܰܪ ܗ̄ܘܰܐ ܠّܶܗ: ”ܩܰܝ ܠܳܐ ܟܬ̥ܺܝܒ̥: ’ܗ̄ܽܘ ܒܰܝܬܰܝܕ̥ܺܝ ܒܰܝܬܳܐ ܕܺܗ̄ܝ ܨܠܽܘܬ̥ܳܐ ܓܡ݄ܩܪܶܐ ܠܟܘ̇ܠّܶܗ ܗ̄ܰܥّܰܡ̈ܶܐ‘ ܐܶ‌ܠܳܐ ܗܰܬܽܘ ܣ݄ܡܟ̥ܽܘ ܡܥܰܪܬ̥ܳܐ ܕܰܡܫܰܠܚܳܢ̈ܶܐ.“ 18ܘܫܰܡܺܝܥܺܝ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ، ܘ݄ܐܒܥܺܝ ܗ̄ܘܰܘ̱ ܐܰܝܕܰܪܒܳܐ ܡܣܰܟܪܺܝ ܠܶܗ (ܘܩ݄ܛܠܺܝ ܠܶܗ)، ܥܰܠ ܕܙܰܝܥܺܝ ܗ̄ܘܰܘ̱ ܡܶܢܶܗ، ܡܺܐܝܕ̥ܶܗ ܕܟܽܘܠܶܗ ܗ̄ܽܘ ܥܰܡܳܐ ܡܺܝܕܰܘܡܰܪ ܗ̄ܘܰܐ ܒܽܗ̄ܘ ܝܽܘܠܦܳܢܰܝܕ̥ܶܗ. 19ܘܥܰܡ ܓܢܰܝܬܶܗ ܕܝܰܘܡܳܐ، ܢܰܦܺܝܩܺܝ ܠܰܪܒ̥ܰܠ ܡܺܗ̄ܝ ܡܕ̥ܺܝܢ̱ܬܳܐ.

ܗ̄ܽܘ ܚܰܝܠܳܐ ܕܺܗ̄ܝ ܗܰܝܡܳܢܽܘܬ̥ܳܐ

ܡܬܝ 21‏:20‏‐22

20ܘܒ݄ܣܠܳܩܶܗ ܕܝܰܘܡܳܐ، ܘܗ݄ܢّܶܝ ܟܥܳܒܪܺܝ، ܚܙܰܠّܶܗ ܗ̄ܺܝ ܬܶܐܢܰܝܳܐ ܝܰܒܺܝܫܳܐ (ܢܰܫܺܝܦܳܐ) ܡܽܗ̄ܘ ܩܽܘܪܡܰܝܕ̥ܰܗ. 21ܘܰܐܬ̥ܺܝ ܠܒܳܠܶܗ ܕܫܶܡܥܽܘܢ ܘܐܡ݄ܪ ܠܶܗ ܠܶܗ: ”ܡܰܠܦܳܢܳܐ! ܟܰܐܠܰܗ ܗ̄ܺܝ ܬܶܐܢܳܐ ܕܠܺܝܛܳܐ ܠܳܟ̥ ܝܰܒܺܝܫܳܐ.“ 22ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܛܪܳܐ ܗ̄ܘܶܐ ܐܰܒܟ̥ܽܘ ܗܰܝܡܳܢܽܘܬ̥ܳܐ ܒܰܐ‌ܠܳܗܳܐ. 23ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕܳܐܡ݄ܪ ܠܽܗ̄ܘ ܛܽܘܪܰܢܳܐ، ܡ݄ܥܩܰܪ ܘ݄ܢܦܰܠ ܒܽܗ̄ܘ ܝܰܡܳܐ، ܘܠܳܐ ܡ݄ܦܠ݄ܓ̥ ܒܠܶܒܶܗ، ܐܶܠܳܐ ܕ݄ܡܗܰܝܡ݄ܢ ܕܳܗ̄ܘܶܐ ܗ̄ܽܘ ܡܶܕܰܢܳܐ ܕܳܐܡ݄ܪ، ܓܕܳܗ̄ܘܶܐ ܠܶܗ ܗ̄ܽܘ ܡܶܕܶܐ ܕܳܐܡ݄ܪ. 24ܡܰܗ̄ܘܟ̥ܰܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܽܘܠ ܡܶܕܶܐ ܕ݄ܡܨܰܠܺܝܬܽܘ ܘ݄ܡܫܰܐܺܠܺܝܬܽܘ، ܡܗܰܝܡܶܢܽܘ ܓ݄ܕܡܰܝܕܺܝܬܽܘ ܠܶܗ، ܘ݄ܓܕܳܗ̄ܘܶܐ ܐܰ‌ܠܟ̥ܽܘ. 25ܘܡ݄ܐ ܕܩܰܝܡܺܝܬܽܘ ܕ݄ܡܨܰܠܺܝܬܽܘ، ܫܒܰܩܽܘ ܠܰܗ̄ܢ ܢܳܫ̈ܶܐ ܕܟ݄ܬܟ̥ܽܘ ܐܰܥܠܰܝّܶܗ ܡܶܕܶܐ، ܕܽܗ̄ܘ ܒܰܒܰܬ̥ܟ̥ܽܘ ܣܬܶܝ ܕܒܺܗ̄ܝ ܫܡܰܝܳܐ ܕܫܳܒ݄ܩ ܗ̄ܰܚ̈ܛܳܗܰܬ̥ܟ̥ܽܘ. 26ܘܶܐܢ ܗܰܬܽܘ ܠ݄ܐ ܟܫܳܒܩܺܝܬܽܘ، ܘܠܳܐ ܗ̄ܽܘ ܒܰܒܰܬ̥ܟ̥ܽܘ ܕܒܺܗ̄ܝ ܫܡܰܝܳܐ ܓܫܳܒ݄ܩ ܗ̄ܰܚ̈ܛܳܗܰܬ̥ܟ̥ܽܘ.“

ܗ̄ܽܘ ܫܽܘܠܛܳܢܳܐ ܕܝܶܫܽܘܥ، ܘܺܗ̄ܝ ܡܰܥܡܽܘܕ̥ܺܝܬ̥ܳܐ ܕܝܽܘܚܰܢܳܢ

ܡܬܝ 21‏:23‏‐27؛ ܠܘܩܐ 20‏:1‏‐8

27ܘܢܰܩܠܐ ܚܪܶܬܳܐ ܐܰܬ̥݄ܢ ܠܽܐܘܪܶܫܠܶܡ. ܘܗܺܝّܶܗ ܡܗܰܠܰܟ̥ ܗ̄ܘܰܐ ܒܽܗ̄ܘ ܗܰܝܟܠܳܐ، ܐܰܬ̥݄ܢ ܠܣܺܝܕ̥ܶܗ ܗ̄ܰܪّܰܒ̈ܶܐ ܕܰܟّܳܗ̈ܢܶܐ ܘܰܣّܳܦܪ̈ܶܐ ܘܰܩّܰܫ̈ܶܐ، 28ܘܟ݄ܐܡّܺܪ̱ܝ ܠܶܗ: ”ܒܰܐܝܢܰܐ ܫܽܘܠܛܳܢܳܐ ܗܰܢܺܝ ܟܣܰܝܡܰܬ؟ ܘܡܰܢܝܳܐ ܕܗܽܒ̥ ܠܶܗ ܠܳܟ̥ ܗ̄ܽܘ ܫܽܘܠܛܳܢܰܢܳܐ ܕܗܰܢܺܝ ܣܰܝܡܰܬ؟“ 29ܘܗܺܝّܶܗ ܝܶܫܽܘܥ ܐܡ݄ܪ ܠܰܗ ܠّܶܗ: ”ܐܳܢܳܐ ܣܬܶܝ ܓ݄ܡܫܰܐܶܠ ܐ̱ܢܳܐ ܠܟ̥ܽܘ ܚܰܕ̱ ܫܽܘܐܳܠܳܐ، ܕ݄ܐܡّܺܪ̱ܝܬܽܘ ܠܺܝ، ܓܕܳܐܡܰܪ ܐ̱ܢܳܐ ܠܟ̥ܽܘ ܒܰܐܝܢܰܐ ܫܽܘܠܛܳܢܳܐ ܗܰܢܺܝ ܟܣܳܝܰܡ ܐ̱ܢܳܐ: 30ܗ̄ܺܝ ܡܰܥܡܽܘܕ̥ܺܝܬ̥ܳܐ ܕܝܽܘܚܰܢܳܢ، ܡܰܐܝܟܳܐ ܝܳܐ، ܡܺܗ̄ܝ ܫܡܰܝܳܐ ܐܰܘ ܡܰܗ̄ܢ ܢܳܫ̈ܶܐ؟ ܐܡܰܪܽܘ ܠܺܝ!“ 31ܘܗ݄ܢّܶܝ ܚܫܽܒّ̥ܶܗ ܒܠܶܒܰܝّܶܗ ܘܐܡ݄ܪّܶܗ: ”ܐܶܢ ܕ݄ܐܡّܺܪ̱ܝܢܰܐ ܠܶܗ ܡܺܗ̄ܝ ܫܡܰܝܳܐ، ܓܕܳܐܡܰܪ ܠܰܢ: ’ܠܡ݄ܢ ܠܳܐ ܡܗܰܝܡܰܢܟ̥ܽܘ ܐܶܒܶܗ.‘ 32ܘܕ݄ܐܡّܺܪ̱ܝܢܰܐ: ’ܡܰܗ̄ܢ ܢܳܫ̈ܶܐ،‘“ ܗ̄ܺܝ ܙܽܘܥܬ̥ܳܐ ܡܽܗ̄ܘ ܥܰܡܳܐ ܝܳܐ. ܟܽܘܠّܶܗ ܡܗܰܝܡܢܺܝ ܗ̄ܘܰܘ̱ ܕܝܽܘܚܰܢܳܢ ܒ݄ܫܪܳܪܳܐ ܢܒܺܝܳܐ ܝܳܐ. 33ܘܡܰܕܥܰܪّܶܗ ܘܐܡ݄ܪّܰܗ ܠܶܗ ܠܝܶܫܽܘܥ: ”ܠ݄ܐ ܟ݄ܐܕ̥ܥܺܝܢܰܐ!“ ܘܐܡ݄ܪ ܠܰܗ ܠّܶܗ: ”ܘܳܐܢܳܐ ܣܬܶܝ ܠ݄ܐ ܟܳܐܡܰܪ ܐ̱ܢܳܐ ܠܟ̥ܽܘ ܒܰܐܝܢܰܐ ܫܽܘܠܛܳܢܳܐ ܗܰܢܺܝ ܟܣܳܝܰܡ ܐ̱ܢܳܐ.“

Currently Selected:

ܡܓܰܠܝܘܢ ܕܡܪܩܘܣ 11: ܟܬܒܐ

Highlight

Copy