ܡܓܰܠܝܘܢ ܕܠܘܩܐ 8

ܗ̄ܽܘ ܟܪܳܟ̥ܳܐ ܕܡܳܪܰܢ

1ܘܒ݄ܬ̥݄ܪ ܡܰܗ̄ܢܺܝ، ܟܳܪܰܟ̥ ܗ̄ܘܰܐ ܝܶܫܽܘܥ ܒܰܡܕ̥̈ܺܝܢܳܬ̥ܳܐ ܘܒܰܩّ݄ܪ̈ܝܰܘܳܬ̥ܳܐ، ܘܟܳܪܰܙ ܗ̄ܘܰܐ ܘ݄ܡܣܰܒ݄ܪ ܗ̄ܺܝ ܡܰܠܟܽܘܬ̥ܳܐ ܕܰܐ‌ܠܳܗܳܐ. ܘܰܬܪܰܥܣܰܪܰܝܕ̥ܶܗ ܐܰܥܡܶܗ. 2ܘܰܗ̄ܢ ܢܶܫ̈ܶܐ ܕܢܰܝ݄ܚّܶܗ ܡܶܢ̱ ܟܶܐܒ̥̈ܶܐ ܘܡܶܢ̱ ܪ̈ܽܘܚܶܐ ܒܺܝܫ̈ܳܬ̥ܳܐ: ܡܰܪܝܰܡ ܕ݄ܟܡ݄ܩܪܳܝܳܐ ܡܰܓ̥ܕܠܰܝܬܳܐ، ܗܰܝܳܐ ܕܫܰܒ̥ܥܳܐ ܫܺܐܕ̈ܶܐ ܢܰܦܺܝܩܺܝ ܡܶܢܰܗ، 3ܘܝܽܘܚܰܢ ܗ̄ܺܝ ܐܰܢ̱ܬ̥ܬܳܐ ܕܟܽܘܙܰܐ، ܗ̄ܽܘ ܪܰܒܒܰܝܬܳܐ ܕܗܶܪܳܘܕ̥ܶܣ، ܘܫܽܘܫܰܢ، ܘ݄ܚܪ̈ܶܢܶܐ ܓ̥ܰܠܰܒܶܐ ܕ݄ܡܫܰܡܫܺܝ ܗ̄ܘܰܘ̱ ܠّܶܗ ܡܰܢ̱ ܡّܳܠܰܬّ̥ܶܗ (ܡܰܠܰܬّ̥ܶܗ).

ܡܰܬ̥ܠܳܐ ܕܽܗ̄ܘ ܙܰܪܳܥܳܐ

ܡܬܝ 13‏:1‏‐9؛ ܡܪܩܘܣ 4‏:1‏‐9

4ܘܺܗ̄ܝ ܢܰܩܠܐ ܕܠܰܬܺܝܡܺܝ ܗ̄ܘܰܘ̱ ܢܳܫ̈ܶܐ ܓ̥ܰܠܰܒܶܐ، ܐܳܬ̥݄ܢ ܗ̄ܘܰܘ̱ ܠܓܰܒܶܗ ܡܶܢ̱ ܟܽܘܠّܶܗ ܗ̄ܰܡܕ̥ܺܝ̈ܢܳܬ̥ܳܐ، ܐܡ݄ܪ ܠܶܗ ܒܡ̈ܰܬ̥ܠܶܐ: 5”ܗ̄ܽܘ ܙܰܪܳܥܳܐ ܢܰܦ݄ܩ ܕܙܳܪ݄ܥ ܗ̄ܽܘ ܙܰܪܥܰܝܕ̥ܶܗ، ܘܺܗ̄ܝ ܢܰܩܠܐ ܕ݄ܙܪ݄ܥ ܠܶܗ ܟܺܝܬ ܕܢܰܦ݄ܠ ܥܰܠ ܣܰܦ̊ܬܶܗ ܕܽܗ̄ܘ ܕܰܪܒܳܐ، ܘܕܺܝܫ، ܘܰܐܟ̥݄ܠّܶܗ ܗ̄ܰܛّܰܝܪ̈ܶܐ. 6ܘ݄ܚܪܶܢܳܐ ܢܰܦ݄ܠ ܥܰܠ ܗ̄ܽܘ ܫܽܘܥܳܐ، ܘܒܺܗ̄ܝ ܫܳܥܬ̥ܰܝܕ̥ܰܗ ܝܰܥܺܝ، ܘܡܺܐܝܕ̥ܶܗ ܕܠܰܝ̱ܬ ܗ̄ܘܰܝ ܠܶܗ ܬܰܠܺܝܠܽܘܬ̥ܳܐ ܢܰܫ݄ܦ. 7ܘ݄ܚܪܶܢܳܐ ܢܰܦ݄ܠ ܒܰܝܢ ܗ̄ܰܟّܽܘܒ̈ܶܐ، ܘܝܰܥ݄ܢ ܗ̄ܰܟّܽܘܒ̈ܶܐ ܐܰܥܡܶܗ ܘ݄ܚܢ݄ܩّܶܗ. 8ܘ݄ܚܪܶܢܳܐ ܢܰܦ݄ܠ ܒܰܐܪܥܳܐ ܛܰܒ̥ܬܳܐ ܘܫܰܦ݄ܪܬܳܐ، ܘܝܰܥܺܝ ܘܣ݄ܡ ܠܶܗ ܦܺܐܪ̈ܶܐ، ܗ̄ܽܘ ܚܰܕ̱ ܗܽܒ̥ ܠܶܗ ܡܳܐܐ.“ ܗܰܢܺܝ ܗ̄ܺܝ ܢܰܩܠܐ ܕܐܡ݄ܪ ܠܶܗ ܡܰܥܠܶܐ ܠܶܗ ܩܳܠܶܗ (ܘܐܡ݄ܪ ܠܶܗ): ”ܡܰܢ ܕܟ݄ܬ ܠܶܗ ܐܰܕ̥̈ܢܶܐ ܕܫܳܡ݄ܥ ܛܪܳܐ ܫܳܡ݄ܥ.“

ܠܡ݄ܢ ܒܰܡّܰܬ̥̈ܠܶܐ ܟܡ݄ܫܓ̥݄ܠ ܐܰܥܡܰܝّܶܗ

ܡܬܝ 13‏:10‏‐17؛ ܡܪܩܘܣ 4‏:10‏‐12

9ܘ݄ܡܫܰܐܰܠّܰܗ ܠܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܕܡ݄ܢܝܳܐ ܗ̄ܽܘ ܡܰܬ̥ܠܰܢܳܐ. 10ܘܗܺܝّܶܗ ܐܡ݄ܪ ܠܰܗ ܠّܶܗ: ”ܐܰ‌ܠܟ̥ܽܘ ܗܺܝܒ̥ ܕ݄ܐܕ̥ܥܺܝܬܽܘ ܗ̄ܽܘ ܐ̱ܪܳܙܳܐ ܕܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ، ܐܶ‌ܠܳܐ ܠܰܗ̄ܢ݄ܟ ܗ̄ܰܚܪ̈ܶܢܶܐ ܒܡ̈ܰܬ̥ܠܶܐ ܟܡܺܝܬܰܘܡ݄ܪ، ܡܺܐܝܕ̥ܶܗ ’ܕܥܰܡ ܕ݄ܟܚܳܙ݄ܢ ܠ݄ܐ ܟܚܳܙ݄ܢ (ܟܦ݄ܪܫܺܝ)، ܘܥܰܡ ܕ݄ܟܫܳܡܥܺܝ ܠ݄ܐ ܟܝ݄ܠܦܺܝ.‘

ܗ̄ܽܘ ܦܽܘܫܳܩܳܐ ܕܽܗ̄ܘ ܡܰܬ̥ܠܳܐ ܕܽܗ̄ܘ ܙܰܪܳܥܳܐ

ܡܬܝ 13‏:18‏‐23؛ ܡܪܩܘܣ 4‏:13‏‐20

11”ܘܗܰܢܳܐ ܝܳܐ ܗ̄ܽܘ ܡܰܬ̥ܠܳܐ: ܗ̄ܽܘ ܙܰܪܥܳܐ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܝܳܐ، 12ܘܗܰܢ݄ܟ ܕܥܰܠ ܣܰܦ̊ܬܶܗ ܕܽܗ̄ܘ ܕܰܪܒܳܐ ܗܰܢܺܝ ܢܶܝ ܕ݄ܟܫܳܡܥܺܝ ܗ̄ܺܝ ܡܶܠܬ̥ܳܐ، ܘܟܳܐܬ̥ܶܐ ܗ̄ܽܘ ܒܥܶܠܕܒܳܒܳܐ (ܫܺܐܕܳܐ) ܘܓܳܪ݄ܫ ܗ̄ܺܝ ܡܶܠܬ̥ܳܐ ܡܶܢ̱ ܠܶܒܰܝّܶܗ ܕܠܳܐ ܡܗܰܝܡܢܺܝ ܘܗܳܘܰܠّܶܗ ܚܰܝ̈ܶܐ. 13ܘܗܰܢܺܝ ܕܥܰܠ ܗ̄ܽܘ ܫܽܘܥܳܐ ܗܰܢܺܝ ܢܶܝ ܕܺܗ̄ܝ ܢܰܩܠܐ ܕܫ݄ܡܥܺܝ ܒ݄ܦܨܺܝܚܽܘܬ̥ܳܐ ܟܡܰܩܒܠܺܝ ܗ̄ܺܝ ܡܶܠܬ̥ܳܐ، ܘܘܰܪܝܕ̥ܳܐ ܠܰܝ̱ܬّܶܗ، ܡܰܗ̄ܘܟ̥ܰܐ ܠܙܰܒܢܳܐ ܟܰܪܝܳܐ ܝܳܐ ܗ̄ܺܝ ܗܰܝܡܳܢܽܘܬ̥ܰܬّ̥ܶܗ، ܘܒܽܗ̄ܘ ܙܰܒܢܳܐ ܕܽܗ̄ܘ ܢܶܣܝܽܘܢܳܐ ܟܢ݄ܦܠܺܝ ܒܛܶܪܒܰܠܬܳܐ. 14ܘܗܰܘܳܐ ܕܢܰܦ݄ܠ ܒܰܝܢ ܗ̄ܰܟّܽܘܒ̈ܶܐ، ܗܰܢܺܝ ܢܶܝ ܕ݄ܟܫܳܡܥܺܝ ܗ̄ܺܝ ܡܶܠܬ̥ܳܐ، ܐܶ‌ܠܳܐ ܟܡ݄ܚܢܳܩܺܝ ܒܪܶܢܝܳܐ ܕܒܽܗ̄ܘ ܥܳܠܡܳܐ، ܘܒܽܗ̄ܘ ܥܽܘܬ̥ܪܰܝܕ̥ܶܗ ܘܒܰܪ̈ܓ̥ܺܝܓ̥ܳܬ̥ܰܝܕ̥ܶܗ، ܘܦܺܐܪ̈ܶܐ ܠ݄ܐ ܟܳܗ̄ܒ݄ܢ.

15”ܘܗܰܘܳܐ ܕܒܺܗ̄ܝ ܐܰܪܥܳܐ ܛܰܒ̥ܬܳܐ ܗܰܢܺܝ ܢܶܝ ܕ݄ܒܠܶܒܳܐ ܫܰܦܝܳܐ ܘܛܳܒ̥ܳܐ ܟܫ݄ܡܥܺܝ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܘܙܳܒܛܺܝ ܠܰܗ ܘܟܳܗ̄ܒ݄ܢ ܦܺܐܪ̈ܶܐ ܒܺܗ̄ܝ ܡܣܰܝܒܪܳܢܽܘܬ̥ܳܐ.

ܗ̄ܽܘ ܡܰܬ̥ܠܳܐ ܕܺܗ̄ܝ ܫܪܳܓ̥ܳܐ

16”ܢܳܫܳܐ ܠ݄ܐ ܟܡܰܢܗ݄ܪ ܫܪܳܓ̥ܳܐ ܘ݄ܡܟܰܣܶܐ ܠܰܗ ܒܣܶܦܳܩܳܐ، ܐܰܘ ܡܰܚܰܬ ܠܶܗ ܬܰܚܬ ܗ̄ܰܓّܰܠ̈ܶܐ، ܐܶ‌ܠܳܐ ܟܡܰܚܰܬ ܠܶܗ ܥܰܠ ܗ̄ܺܝ ܡܢܳܪܬܳܐ ܕܟܽܘܠ ܚܰܕ̱ ܕܥܳܒ݄ܪ ܓܚܳܙܶܐ ܗ̄ܽܘ ܢܽܘܗܪܰܝܕ̥ܶܗ. 17ܡܺܐܝܕ̥ܶܗ ܕܠܰܝܬ ܡܶܕܶܐ ܡܟܰܣܝܳܐ ܕܠܳܐ ܡ݄ܓܠܶܐ، ܘܠܳܐ ܬܰܠܝܳܐ ܕܠܳܐ ܡܺܝܕ̥݄ܥ ܘܳܐܬ̥ܶܐ ܠܓܰܠܝܳܐ. 18ܚܙܰܝܽܘ ܐܰܝܕܰܪܒܳܐ ܫܰܡܺܝܥܺܝܬܽܘ! ܡܰܢ ܕܟ݄ܬ ܠܶܗ ܓܡܺܝܬܰܗܒ̥ܶܐ ܠܶܗ، ܘܡܰܢ ܕܠܰܝ̱ܬ ܠܶܗ، ܗ̄ܽܘ ܡܶܕܶܐ ܕ݄ܟܚܳܫܽܒ̥ ܕܟ݄ܬ ܝܳܐ ܕܺܝܕ̥ܶܗ، ܓܡܺܝܡ݄ܕ ܡܶܢܶܗ.“

ܡܰܢ ܢܶܝ ܐܶܡܺܝ ܘܰܐܚ̈ܘܿܢܳܢܺܝ

19ܘܰܐܬ̥݄ܢ ܠܓܰܒܶܗ ܗ̄ܺܝ ܐܶܡܳܐ ܘܰܗ̄ܢ ܐܰܚ̈ܽܘܢܳܢܶܐ، ܘܠܳܐ ܩܳܕܪܺܝ ܗ̄ܘܰܘ̱ ܕܡ݄ܫܓ̥ܳܠܺܝ ܐܰܥܡܶܗ ܡܰܗ̄ܢ ܢܳܫ̈ܶܐ. 20ܘܐܡ݄ܪّܰܗ ܠܶܗ: ”ܐܶܡܳܟ̥ ܘܰܐܚ̈ܘܿܢܳܢܳܟ̥ ܟܩܰܝܡܺܝ ܠܰܪܒ̥ܰܠ ܘܟ݄ܐܒܥܺܝ ܕܚܳܙ݄ܢ ܠܳܟ̥.“ 21ܘܗܺܝّܶܗ ܡܰܕܥܰܪ ܠܶܗ ܘܐܡ݄ܪ ܠܰܗ ܠّܶܗ: ”ܗܰܢܺܝ ܢܶܝ ܐܶܡܺܝ ܘܰܐܚ̈ܘܿܢܳܢܺܝ، ܐܰܝܢܰܐ ܕܟܳܫܳܡܥܺܝ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܘܣܰܝܡܺܝ ܠܰܗ.“

ܝܶܫܽܘܥ ܟܡܰܟܠܶܐ ܗ̄ܽܘ ܥܰܠܥܳܠܳܐ ܕܽܗ̄ܘ ܝܰܡܳܐ

22ܘܗܰܘܺܝ ܒܚܰܕ̱ ܡܰܢ̱ ܝّܰܘܡ̈ܳܬ̥ܳܐ، ܣܰܠ݄ܩ ܝܶܫܽܘܥ ܝܰܬܽܒ̥ ܒ݄ܣܦܺܝܢ̱ܬܳܐ، ܗܺܝّܶܗ ܘܰܬّܰܠܡܺܝܕ̥̈ܰܝܕ̥ܶܗ، ܘܐܡ݄ܪ ܠܰܗ ܠّܶܗ: ܛܪܳܐ ܥܳܒܪܺܝܢܰܐ ܠܽܗ̄ܘ ܓܰܒܰܘܳܐ ܕܺܗ̄ܝ ܝܰܡܬ̥ܳܐ. 23ܘܗ݄ܢّܶܝ ܐܰܙ̈ܳܠܶܐ، ܕܰܡ݄ܟ̥ ܝܶܫܽܘܥ. ܘܩܰܝ݄ܡ ܥܰܠܥܳܠܳܐ ܕܗܰܘܰܐ ܒܺܗ̄ܝ ܝܰܡܬ̥ܳܐ، ܘ݄ܡܩܰܪܰܒ̥ ܠܰܗ ܗ̄ܺܝ ܣܦܺܝܢ̱ܬܳܐ ܕܡ݄ܛܒ̥ܳܥܳܐ ܒܰܡّܰܝ̈ܶܐ. 24ܘ݄ܡܩܰܪܰܒّ̥ܶܗ ܡܰܩ݄ܡّܶܗ ܘܐܡ݄ܪّܰܗ ܠܶܗ: ”ܡܰܠܦܳܢܳܐ، ܡܰܠܦܳܢܳܐ، ܟܡ݄ܚܢܳܩܺܝܢܰܐ!“ ܘܗܺܝّܶܗ ܩܰܝ݄ܡ ܘܡܰܙܥܰܩ ܠܶܗ ܥܰܠ ܗ̄ܰܗّܰܘ̈ܶܐ ܘܰܓّܰܠ̈ܶܐ ܚܺܝܨ̈ܶܐ ܕܽܗ̄ܘ ܝܰܡܳܐ ܘܟܰܠ݄ܢ ܘܗܰܘܺܝ ܫܶܠܝܳܐ. 25ܘܐܡ݄ܪ ܠܰܗ ܠّܶܗ: ”ܐܰܝܟܳܐ ܝܳܐ ܗ̄ܺܝ ܗܰܝܡܳܢܽܘܬ̥ܰܬ̥ܟ̥ܽܘ؟“ ܘܗ݄ܢّܶܝ ܙܰܝܳܥ̈ܶܐ، ܡܺܝܕܰܘܡܪܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱ ܚܰܕ̱ ܠܚܰܕ̱: ”ܡܰܢܝܳܐ ܗܰܢܳܐ؟ ܕܠܰܗّܰܘ̈ܶܐ ܣܬܶܝ ܟܳܗ̄ܒܶܐ ܦܽܘܩܕܳܢܳܐ ܘܠ̈ܰܓّܰܠܶܐ ܚܺܝܨ̈ܶܐ ܘܠܽܗ̄ܘ ܝܰܡܳܐ ܘ݄ܟܫ݄ܡܥܺܝ ܠܶܗ.“

ܝܶܫܽܘܥ ܟܛܳܪ݄ܕ̥ ܕܰܝܘ̈ܶܐ ܒܽܗ̄ܘ ܫܽܘܠܛܳܢܰܝܕܶܗ

ܡܬܝ 8‏:28‏‐34؛ ܡܪܩܘܣ 5‏:1‏‐20

26ܘ݄ܩܛ݄ܥّܶܗ ܘܰܐܬ̥݄ܢ ܠܽܗ̄ܘ ܐܰܬ̥ܪܳܐ ܕܰܓّܳܕ̥ܪ̈ܳܝܶܐ ܕܟ݄ܬ ܝܳܐ ܥܰܠ ܗ̄ܽܘ ܓܰܒܳܐ ܚܪܶܢܳܐ ܡܺܗ̄ܝ ܝܰܡܬ̥ܳܐ، ܡܩܰܒ݄ܠ ܕܽܗ̄ܘ ܓܠܺܝܠܳܐ. 27ܘܺܗ̄ܝ ܢܰܩܠܐ ܕܢܰܚ݄ܬ ܠܺܗ̄ܝ ܐܰܪܥܳܐ، ܬܦܺܝܩ ܐܶܒܶܗ ܚܰܕ̱ ܓܰܒ̥ܪܳܐ ܡܺܗ̄ܝ ܡܕ̥ܺܝܢ̱ܬܳܐ، ܕܟܺܝܬ ܐܶܒܶܗ ܕܰܝܘܳܐ ܡܶܢ̱ ܙܰܒܢܳܐ ܝܰܪܺܝܟ̥ܳܐ، ܘܠܳܐ ܠܳܒ̥ܰܫ ܗ̄ܘܰܐ ܡܶܕܶܐ، ܘܠܳܐ ܝܳܬܰܒ̥ ܗ̄ܘܰܐ ܒܒܰܝܬܳܐ، ܐܶ‌ܠܳܐ ܒܰܝܢ ܗ̄ܰܩّܰܒ̥ܪ̈ܶܐ. 28ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܠܝܶܫܽܘܥ، ܡܰܙܥܰܩ ܠܶܗ ܘܢܰܦ݄ܠ ܩܽܘܕ̱ܡܶܗ، ܘ݄ܒܩܳܠܳܐ ܥܶܠܳܝܳܐ ܐܡ݄ܪ ܠܶܗ: ”ܡܳܐ ܠܳܟ̥ ܡܶܢܰܢ، ܝܰܐ ܝܶܫܽܘܥ ܗ̄ܽܘ ܐܰܒܪܳܐ ܕܰܐ‌ܠܳܗܳܐ ܡܪܰܝܡܳܐ، ܟܳܐܒܰܥ ܐ̱ܢܳܐ ܡܶܢܳܟ̥ ܕܠܳܐ ܡܫܰܢܩܰܬ ܠܺܝ،“ 29ܡܺܐܝܕ̥ܶܗ ܕܝܶܫܽܘܥ ܗܽܒ̥ ܠܶܗ ܗ̄ܘܰܐ ܦܽܘܩܕܳܢܳܐ ܠܺܗ̄ܝ ܪܽܘܚܳܐ ܒܺܝܫܬܳܐ ܕܢܳܦܩܳܐ ܡܽܗ̄ܘ ܢܳܫܳܐ، ܙܰܒܢܳܐ ܝܰܪܺܝܟ̥ܳܐ ܗܰܘܺܝ ܗ̄ܘܰܐ ܡܺܗ̄ܝ ܢܰܩܠܐ ܕ݄ܫܒܶܐ ܠܶܗ (ܙܒ݄ܛ ܠܶܗ ܗ̄ܽܘ ܫܺܐܕܳܐ)، ܘܡܺܝܬܰܐܣܰܪ ܗ̄ܘܰܐ ܒܫܺܫܠ̈ܳܬ̥ܳܐ، ܘ݄ܒܟܰܒ̈ܠܶܐ ܡ݄ܢܛ݄ܪ ܗ̄ܘܰܐ. ܘܗܺܝّܶܗ ܩܳܛܰܥ ܗ̄ܘܰܐ ܠّܶܗ؛ ܘܡܺܝܬܰܘܒܰܠ ܗ̄ܘܰܐ ܡܽܗ̄ܘ ܫܺܐܕܳܐ ܠܽܗ̄ܘ ܡܰܕ̥ܒܪܳܐ. 30ܘܝܶܫܽܘܥ ܡܫܰܐܶܠ ܠܶܗ ܠܶܗ: ”ܡ݄ܢܝܳܐ ܐ݄ܫܡܳܟ̥؟“ ܐܡ݄ܪ ܠܶܗ ܠܶܗ ”ܠܶܓ̥ܝܽܘܢ“، ܡܺܐܝܕ̥ܶܗ ܕܫܺܐܕ̈ܶܐ ܓ̥ܰܠܰܒܶܐ ܥܰܒܺܝܪܺܝ ܗ̄ܘܰܘ̱ ܐܶܒܶܗ. 31ܘ݄ܐܒܥܺܝ ܗ̄ܘܰܘ̱ ܡܶܢܶܗ ܕܠܳܐ ܗ̄ܒܰܠّܶܗ ܦܽܘܩܕܳܢܳܐ ܕ݄ܐܙّ݄ܢ ܠܽܗ̄ܘ ܬܗܽܘܡܳܐ (ܥܰܡܽܘܩܳܐ). 32ܘܟ݄ܬ ܗ̄ܘܰܐ ܬܰܡܳܐ ܒܰܩܪܳܐ ܕܓ̥ܰܠܰܒܶܐ ܚܙܺܝܪ̈ܶܐ ܕܪܳܥܝܳܐ ܒܽܗ̄ܘ ܛܽܘܪܳܐ، ܘ݄ܐܒܥܺܝ ܗ̄ܘܰܘ̱ ܡܶܢܶܗ ܕܛܳܪܰܠّܶܗ ܕܥܳܒܪܺܝ ܒܰܚܙܺܝܪ̈ܶܐ، ܘ݄ܛܪܶܐ ܠܰܗ ܠّܶܗ. 33ܘܢܰܦܺܝܩܺܝ ܗ̄ܰܫّܺܐܕ̈ܶܐ ܡܽܗ̄ܘ ܓܰܒ̥ܪܳܐ ܘܥܰܒܺܝܪܺܝ ܒܰܚܙܺܝܪ̈ܶܐ، ܘܺܗ̄ܝ ܒܰܩܪܳܐ ܟܽܘܠܰܗ ܐܰܙّܰܗ ܠܰܐܦ ܗ̄ܽܘ ܫܩܺܝܦܳܐ، ܘܢܰܦܺܝܠܺܝ ܒܺܗ̄ܝ ܝܰܡܬ̥ܳܐ ܘ݄ܚܢܺܝܩܺܝ. 34ܘܺܗ̄ܝ ܢܰܩܠܐ ܕ݄ܚܙܰܠّܶܗ ܗ̄ܰܪّܳܥܝ̈ܶܐ ܗ̄ܽܘ ܡܶܕܶܐ ܕܗܰܘܺܝ ܥܰܪܺܝܩܺܝ ܘܡܰܘܕ̥ܰܥّܶܗ ܒܰܡܕ̥̈ܺܝܢܳܬ̥ܳܐ ܘܒܰܩّ݄ܪ̈ܝܰܘܳܬ̥ܳܐ. 35ܘܢܰܦܺܝܩܺܝ ܗ̄ܰܢ ܢܳܫ̈ܶܐ ܕܚܳܙ݄ܢ ܗ̄ܽܘ ܡܶܕܶܐ ܕܗܰܘܺܝ ܘܰܐܬ̥݄ܢ ܠܓܰܒ ܝܶܫܽܘܥ، ܘ݄ܚܙܰܠّܶܗ ܗ̄ܽܘ ܓܰܒ̥ܪܰܘܳܐ ܕܢܰܦܺܝܩܺܝ ܗ̄ܰܫّܺܐܕ̈ܰܝܕ̥ܶܗ، ܟܰܐܠܶܗ ܠܒ̥ܺܝܫܳܐ ܘ݄ܡܢܰܟܦܳܢܳܐ ܘܝܰܬܺܝܒ̥ܳܐ ܓܰܒ ܗ̄ܰܪّܰܓ̥̈ܠܶܐ ܕܝܶܫܽܘܥ، ܘܙܰܝܺܝܥܺܝ. 36ܘܡܰܘܕ̥ܰܥّܰܢّܶܗ ܗܰܢ݄ܟ ܕ݄ܚܙܰܠّܶܗ ܐܰܝܕܰܪܒܳܐ ܢܰܝ݄ܚ ܠܶܗ ܠܽܗ̄ܘ ܓܰܒ̥ܪܰܘܳܐ، ܗ̄ܽܘ ܕܰܝܘܳܢܳܐ. 37ܘ݄ܐܒܥܺܝ ܗ̄ܘܰܘ̱ ܡܶܢܶܗ ܟܽܘܠܶܗ ܗ̄ܽܘ ܥܰܡܳܐ ܕܰܓّܳܕ̥ܪ̈ܳܝܶܐ ܕ݄ܐܙّܶܗ ܡܶܢ̱ ܓܰܒܰܝّܶܗ، ܡܺܐܝܕ̥ܶܗ ܕܙܽܘܥܬ̥ܳܐ ܪܰܒܬ̥ܳܐ ܢܰܦܺܝܠܳܐ ܗ̄ܘܰܐ ܐܰܥܠܰܝّܶܗ. ܘܗܺܝّܶܗ ܝܶܫܽܘܥ ܣܰܠ݄ܩ ܠܺܗ̄ܝ ܣܦܺܝܢ̱ܬܳܐ ܘܕܰܥ݄ܪ ܡܶܢ̱ ܓܰܒܰܝّܶܗ. 38ܘܽܗ̄ܘ ܓܰܒ̥ܪܰܘܳܐ ܕܢܰܦܺܝܩܺܝ ܡܶܢܶܗ ܗ̄ܰܫّܺܐܕ̈ܶܐ ܐܳܒܰܥ ܗ̄ܘܰܐ ܡܶܢܶܗ ܕܳܗ̄ܘܶܐ ܓܰܒܶܗ. ܐܶ‌ܠܳܐ ܝܶܫܽܘܥ ܫܪܶܐ ܠܶܗ ܘܐܡ݄ܪ ܠܶܗ ܠܶܗ: 39”ܕܥܰܪ ܠܽܗ̄ܘ ܒܰܝܬܰܝܕ̥ܳܟ̥ ܘܡܰܘܕ̥݄ܥ ܗ̄ܽܘ ܡܶܕܶܐ ܕܣ݄ܡ ܠܶܗ ܐܰܥܡܳܟ̥ ܐܰ‌ܠܳܗܳܐ.“ ܘܰܐܙّܶܗ، ܘܟܳܪܰܙ ܗ̄ܘܰܐ ܒܟܽܘܠܰܗ ܗ̄ܺܝ ܡܕ̥ܺܝܢ̱ܬܳܐ ܗ̄ܽܘ ܡܶܕܶܐ ܕܣ݄ܡ ܠܶܗ ܐܰܥܡܶܗ ܝܶܫܽܘܥ.

ܡܫܺܝܚܳܐ ܟܡܰܢ݄ܚ ܗ̄ܽܘ ܩܠܳܥܳܐ ܕܽܗ̄ܘ ܐܰܕܡܳܐ ܘ݄ܟܡܰܚܶܐ ܛܠܺܝܬ̥ܳܐ

40ܘܺܗ̄ܝ ܢܰܩܠܐ ܕܕܰܥ݄ܪ ܝܶܫܽܘܥ ܢܰܦܺܝܩܺܝ ܠܩܰܕ̱ܡܽܘܬ̥ܶܗ ܢܳܫ̈ܶܐ ܓ̥ܰܠܰܒܶܐ، ܡܺܐܝܕ̥ܶܗ ܕܟܽܘܠّܶܗ ܢ݄ܛܪܺܝ ܗ̄ܘܰܝ ܠܶܗ. 41ܘܚܰܕ̱ ܓܰܒ̥ܪܳܐ، ܐ݄ܫܡܶܗ ܝܽܘܐܳܪܳܫ، ܪܺܝܫܳܐ ܕ݄ܟ̥ܢܽܘܫܬܳܐ ܗ̄ܘܰܐ، ܢܰܦ݄ܠ ܩ݄ܕ̱ܡ ܪ̈ܰܓ̥ܠܳܬ̥ܶܗ ܕܝܶܫܽܘܥ، ܘܳܐܒܰܥ ܗ̄ܘܰܐ ܡܶܢܶܗ ܕܥܳܒ݄ܪ ܠܽܗ̄ܘ ܒܰܝܬܰܝܕ̥ܶܗ، 42ܡܺܐܝܕ̥ܶܗ ܕܟ݄ܬ ܗ̄ܘܰܝ ܠܶܗ ܒܰܪܬ̥ܳܐ ܝܺܚܺܝܕ̥ܰܝܬܳܐ، ܒܰܪܬ̥ܳܐ ܕ݄ܬܪܰܥܣܰܪ ܐ݄ܫܢ̈ܶܐ، ܘ݄ܡܩܰܪܰܒ̥ ܗ̄ܘܰܝ ܠܰܗ ܕܡܰܝܬ̥ܳܐ. ܘܺܗ̄ܝ ܢܰܩܠܐ ܕܰܐܙّܶܗ ܐܰܥܡܶܗ ܝܶܫܽܘܥ، ܢܳܫ̈ܶܐ ܓ̥ܰܠܰܒܶܐ ܙܳܚܡܺܝ ܗ̄ܘܰܝ ܠܶܗ. 43ܘܟ݄ܬ ܗ̄ܘܰܐ ܐܰܢ̱ܬ̥ܬܳܐ (ܟܰܐܺܝܒ̥ܬܳܐ) ܒ݄ܩܠܳܥܳܐ ܕܽܗ̄ܘ ܐܰܕܡܳܐ ܡܶܢ̱ ܬܪܰܥܣܰܪ ܐ݄ܫܢ̈ܶܐ، ܗܰܝܳܐ ܕܡܰܨܪܰܦ ܠܰܗ ܟܽܘܠܶܗ ܗ̄ܽܘ ܡܳܠܰܝܕ̥ܰܗ ܥܰܠ ܗ̄ܰܢ ܐܳܣܝ̈ܶܐ، ܘܢܳܫܳܐ ܠܳܐ ܩܰܕ݄ܪ ܕܡܰܢ݄ܚ ܠܰܗ. 44ܘ݄ܡܩܰܕܰܡ ܠܰܗ (ܠܝܶܫܽܘܥ) ܡܶܢ̱ ܒ݄ܬ̥ܪܶܗ ܘܓ݄ܫ ܠܰܗ ܒܺܗ̄ܝ ܫܦ݄̊ܠܬܳܐ ܕܽܗ̄ܘ ܠܒܽܘܫܰܝܕ̥ܶܗ، ܘܡܶܚܕ̥ܳܐ ܟܰܠܺܝ ܗ̄ܽܘ ܩܠܳܥܳܐ ܕܽܗ̄ܘ ܐܰܕܡܰܝܕ̥ܰܗ. 45ܘܐܡ݄ܪ ܠܶܗ ܝܶܫܽܘܥ: ”ܡܰܢܝܳܐ ܕܓ݄ܫ ܠܶܗ ܐܶܒܺܝ؟“ ܘܺܗ̄ܝ ܢܰܩܠܐ ܕܟܽܘܠّܶܗ ܡܰܢܟܰܪّܶܗ، ܐܡ݄ܪ ܠܶܗ ܠܶܗ ܫܶܡܥܽܘܢ ܟܶܐܦܳܐ، ܘܕܰܐܥܡܶܗ: ”ܡܰܠܦܳܢܳܐ، ܗ̄ܰܢ ܢܳܫ̈ܶܐ ܟܡܰܥܺܝܩܺܝ ܐܰܥܠܳܟ̥ ܘ݄ܡܙܰܚܡܺܝ ܠܳܟ̥، ܘܟ݄ܐܡّܰܪ̱ܬ ܡܰܢܝܳܐ ܕܓ݄ܫ ܠܶܗ ܐܶܒܺܝ.“ 46ܘܗܺܝّܶܗ ܐܡ݄ܪ ܠܶܗ: ”ܢܳܫܳܐ ܓ݄ܫ ܠܶܗ ܐܶܒܺܝ، ܡܺܐܝܕ̥ܶܗ ܕܰܐܕ̥݄ܥ ܐ̱ܢܳܐ ܕܚܰܝܠܳܐ ܢܰܦ݄ܩ ܡܶܢܺܝ.“ 47ܘܺܗ̄ܝ ܐܰܢ̱ܬ̥ܬܰܝܳܐ، ܗ̄ܺܝ ܢܰܩܠܐ ܕ݄ܚܙܶܐ ܠܰܗ ܕܠܳܐ ܛܰܥܺܝ ܠܰܗ، ܐܰܬ̥ܝܳܐ ܟܪ݄ܥܠܳܐ ܘܢܰܦܺܝܠܳܐ ܣܓ̥݄ܕ ܠܰܗ ܠܶܗ، ܘܐܡ݄ܪ ܠܰܗ ܩ݄ܕ̱ܡ ܗ̄ܽܘ ܥܰܡܳܐ ܟܽܘܠܶܗ، ܠܰܫܰܢ ܡ݄ܢ ܓ݄ܫ ܠܰܗ، ܘܰܐܝܕܰܪܒܳܐ ܡܶܚܕ̥ܳܐ ܢܰܝ݄ܚ ܠܰܗ. 48ܘܝܶܫܽܘܥ ܐܡ݄ܪ ܠܶܗ ܠܰܗ: ”ܒܰܪܬ̥ܺܝ، ܚܘܿܨ ܪܽܘܚܰܟ̥، ܗ̄ܺܝ ܗܰܝܡܳܢܽܘܬ̥ܰܝܕ̥ܰܟ̥ ܗܽܒ̥ ܠܰܗ ܠܰܟ̥ ܚܰܝ̈ܶܐ، ܙܶܠ ܒ݄ܫܠܳܡܳܐ.“

49ܘܗܶܫ ܗܺܝّܶܗ ܟܡ݄ܫܓ̥݄ܠ، ܐܰܬ̥ܺܝ ܚܰܕ̱ ܡܽܗ̄ܘ ܒܰܝܬܳܐ ܕܽܗ̄ܘ ܪܺܝܫܳܐ ܕܺܗ̄ܝ ܟ̥ܢܽܘܫܬܳܐ، ܘܐܡ݄ܪ ܠܶܗ (ܠܝܽܘܐܳܪܳܫ): ”ܡܰܝܺܝܬ̥ܳܐ ܗ̄ܺܝ ܒܰܪܬ̥ܰܝܕ̥ܳܟ̥، ܠܳܐ ܡܰܥܺܝܩܰܬ ܠܽܗ̄ܘ ܡܰܠܦܳܢܳܐ.“ 50ܘܝܶܫܽܘܥ ܫܰܡ݄ܥ ܘܐܡ݄ܪ ܠܶܗ ܠܽܗ̄ܘ ܒܰܒܳܐ ܕܺܗ̄ܝ ܛܠܺܝܬ̥ܳܐ: ”ܠܳܐ ܙܰܝܥ݄ܬ، ܒܶܠܚܽܘܕ̥ ܡܗܰܝܡ݄ܢ، ܘܟܳܗ̄ܘܶܐ ܠܰܗ ܚܰܝ̈ܶܐ.“ 51ܘܰܐܬ̥ܺܝ ܝܶܫܽܘܥ ܠܽܗ̄ܘ ܒܰܝܬܳܐ، ܘܠܳܐ ܛܪܶܐ ܠܶܗ ܢܳܫܳܐ ܕܥܳܒ݄ܪ ܐܰܥܡܶܗ ܐܶ‌ܠܳܐ ܠܫܶܡܥܽܘܢ ܘ݄ܠܝܰܥܩܽܘܒ ܘ݄ܠܝܽܘܚܰܢܳܢ، ܘܠܽܗ̄ܘ ܒܰܒܳܐ ܕܺܗ̄ܝ ܛܠܺܝܬ̥ܳܐ ܘܠܺܗ̄ܝ ܐܶܡܳܐ. 52ܘܟܽܘܠّܶܗ ܒܳܟ̥݄ܢ ܗ̄ܘܰܘ̱ ܘ݄ܡܩܰܘܠܺܝ ܗ̄ܘܰܘ̱ ܐܰܥܠܰܗ. ܐܶ‌ܠܳܐ ܝܶܫܽܘܥ ܐܡ݄ܪ ܠܶܗ: ”ܠܳܐ ܒܳܟ̥ܺܝܬܽܘ، ܥܰܠ ܕܠܳܐ ܡܰܝܺܝܬ̥ܳܐ، ܐܶ‌ܠܳܐ ܕܰܡ݄ܟ̥ܬܳܐ ܝܳܐ.“ 53ܘܓܳܚܟ̥ܺܝ ܗ̄ܘܰܘ̱ ܐܰܥܠܶܗ ܥܰܠ ܕܳܐܕ̥ܥܺܝ ܗ̄ܘܰܘ̱ ܕܡܰܝܺܝܬ̥ܳܐ. 54ܘܗܺܝّܶܗ ܡܰܘܦܰܩ ܠܶܗ ܠܟܽܘܠ ܢܳܫܳܐ ܠܰܪܒ̥ܰܠ، ܘ݄ܙܒ݄ܛ ܠܶܗ ܒܺܐܝܕ̥ܰܗ، ܘ݄ܩܪܶܐ ܠܶܗ ܠܰܗ، ܘܐܡ݄ܪ ܠܶܗ: ”ܛܰܠܺܝܬ̥ܰܐ ܩܽܘܡܺܝ!“ 55ܘܕܰܥܺܝܪܳܐ ܗ̄ܺܝ ܪܽܘܚܰܝܕ̥ܰܗ، ܘܡܶܚܕ̥ܳܐ ܩܰܝܺܝܡܳܐ. ܘܗܽܒ̥ ܠܶܗ ܦܽܘܩܕܳܢܳܐ ܕܳܗ̄ܒ݄ܢ ܠܰܗ ܡܽܐܘܟܠܳܐ. 56ܘ݄ܡܕܰܘܡܪܺܝ ܗ̄ܰܒّܰܒ̈ܳܢܰܝܕ̥ܰܗ. ܘܗܺܝّܶܗ ܡܙܰܗܪܺܝ ܠܶܗ ܕܠ݄ܐ ܐܡّܺܪ̱ܝ ܠܢܳܫܳܐ ܒܽܗ̄ܘ ܡܶܕܶܐ ܕܗܰܘܺܝ.

Currently Selected:

ܡܓܰܠܝܘܢ ܕܠܘܩܐ 8: ܟܬܒܐ

Highlight

Copy