ܡܓܰܠܝܘܢ ܕܠܘܩܐ 7
7
ܝܶܫܽܘܥ ܟܡܰܢ݄ܚ ܗ̄ܽܘ ܓܪܶܝܥܳܐ ܕܽܗ̄ܘ ܪܰܒ ܚܰܝܠܳܐ
ܡܬܝ 8:5‐13؛ ܝܘܚܢܢ 4:43‐54
1ܘܺܗ̄ܝ ܢܰܩܠܐ ܕܡܰܬ݄ܡ ܠܶܗ ܗ̄ܰܡّܰܐܡܪ̈ܰܝܕ̥ܶܗ ܟܽܘܠّܶܗ ܩܽܘܕ̱ܡܶܗ ܕܽܗ̄ܘ ܥܰܡܳܐ، ܥܰܒ݄ܪ ܝܶܫܽܘܥ ܠ݄ܟܦܰܪܢܰܚܽܘܡ. 2ܘܽܗ̄ܘ ܓܪܶܝܥܳܐ ܕܚܰܕ̱ ܩܶܢܛܪܽܘܢܳܐ (ܪܺܝܫܳܐ ܕܡܳܐܐ) ܓ̥ܰܠܰܒܶܐ ܟܰܐܺܝܒ̥ܳܐ ܗ̄ܘܰܐ، ܘܓ̥ܰܠܰܒܶܐ ܝܰܩܺܝܪܳܐ ܗ̄ܘܰܐ ܐܰܥܠܶܗ. ܘ݄ܡܩܰܪܰܒ̥ ܠܶܗ ܕܡܳܝ݄ܬ. 3ܘܫܰܡ݄ܥ ܥܰܠ ܝܶܫܽܘܥ، ܘ݄ܡܫܰܕܰܪ ܠܶܗ ܠܓܰܒܶܗ ܗ̄ܰܩّܰܫ̈ܶܐ ܕܰܝّܽܘܕ̥̈ܳܝܶܐ، ܘܳܐܒܰܥ ܗ̄ܘܰܐ ܡܶܢܶܗ ܕܳܐܬ̥ܶܐ ܡܰܚܶܐ (ܡܰܢ݄ܚ) ܠܽܗ̄ܘ ܓܪܶܝܥܰܝܕ̥ܶܗ. 4ܘܗ݄ܢّܶܝ ܗ̄ܺܝ ܢܰܩܠܐ ܕܰܐܬ̥݄ܢ ܓܰܒ ܝܶܫܽܘܥ ܓ̥ܰܠܰܒܶܐ ܐ݄ܒܥܺܝ ܗ̄ܘܰܘ̱ ܡܶܢܶܗ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܳܐ ܟܫܳܘܶܐ ܕܣܰܝܡܰܬ ܠܶܗ ܗܰܬ̥ܶܐ، 5ܡܺܐܝܕ̥ܶܗ ܕ݄ܟܪܳܚ݄ܡ ܠܽܗ̄ܘ ܥܰܡܰܝܕ̥ܰܢ، ܘܗܺܝّܶܗ ܝܳܐ ܕ݄ܒܢܶܐ ܠܶܗ ܠܰܢ ܗ̄ܺܝ ܟ̥ܢܽܘܫܬܳܐ.“ 6ܘܰܐܙّܶܗ ܝܶܫܽܘܥ ܐܰܥܡܰܝّܶܗ. ܘܺܗ̄ܝ ܢܰܩܠܐ ܕ݄ܡܩܰܪܰܒّ̥ܶܗ ܠܰܐܦ ܗ̄ܽܘ ܒܰܝܬܳܐ، ܗ̄ܽܘ ܩܶܢܛܪܽܘܢܳܐ ܡܫܰܕܰܪ ܠܶܗ ܗ̄ܰܪّܳܚ̈ܡܰܝܕ̥ܶܗ ܠܓܰܒ ܝܶܫܽܘܥ، ܘܐܡ݄ܪ ܠܶܗ ܠܶܗ: ”ܡܳܪܝ، ܠܳܐ ܡܰܘܩܪܰܬ ܥܰܠ ܪܽܘܚܳܟ̥، ܡܺܐܝܕ̥ܶܗ ܕܠ݄ܐ ܟܫܳܘܶܐ ܐ̱ܢܳܐ ܕܥܳܒܪܰܬ ܬܰܚܬ ܗ̄ܽܘ ܩܛܳܪܳܐ ܕܽܗ̄ܘ ܒܰܝܬܰܝܕ̥ܺܝ، 7ܡܰܗ̄ܘܟ̥ܰܐ ܐܳܢܳܐ ܠ݄ܐ ܟܫܳܘܶܐ ܐ̱ܢܳܐ ܕܳܐܬ̥ܶܐ ܐ̱ܢܳܐ ܠܣܺܝܕ̥ܳܟ̥، ܐܶܠܳܐ ܐܡܰܪ ܒܺܗ̄ܝ ܡܶܠܬ̥ܳܐ ܘܽܗ̄ܘ ܓܪܶܝܥܰܝܕ̥ܺܝ ܟܢܳܝܰܚ ܠܶܗ. 8ܡܺܐܝܕ̥ܶܗ ܕܳܐܢܳܐ ܣܬܶܝ ܓܰܒ̥ܪܳܐ ܐ̱ܢܳܐ ܬܰܚܬܶܗ ܕܫܽܘܠܛܳܢܳܐ، ܘܟܺܝܬ ܬܰܚܬ ܐܺܝܕ̥̈ܳܬ̥ܺܝ ܦܳܠܚ̈ܶܐ، ܘܟܳܐܡܰܪ ܐ̱ܢܳܐ ܠܰܗ̄ܢܳܐ ܙܳܟ̥، ܘܟ݄ܐܙّܶܗ، ܘܠ݄ܚܪܶܢܳܐ ܬܳܟ̥، ܘܟܳܐܬ̥ܶܐ، ܘܠܽܗ̄ܘ ܓܪܶܝܥܰܝܕ̥ܺܝ ܣܘܿܡ ܗܰܬ̥ܶܐ، ܘ݄ܟܣܳܝ݄ܡ.“ 9ܘܺܗ̄ܝ ܢܰܩܠܐ ܕܫܰܡ݄ܥ ܝܶܫܽܘܥ ܗܰܢܺܝ ܡܕܰܘܡ݄ܪ ܐܶܒܶܗ، ܘܚ݄ܪ ܠܶܗ ܒܰܗ̄ܢ ܢܳܫ̈ܶܐ ܕܟܳܐܬ̥݄ܢ ܒ݄ܬ̥ܪܶܗ، ܘܐܡ݄ܪ ܠܶܗ: ”ܟܳܐܡܰܪ ܐ̱ܢܳܐ ܠܟ̥ܽܘ، ܘܠ݄ܐ ܒܺܐܝܣܪܳܐܶܝܠ ܚܙܶܐ ܠܺܝ ܐܟ̥ ܕܺܗ̄ܝ ܗܰܝܡܳܢܽܘܬ̥ܰܬ̥ܶܐ.“ 10ܘܕܰܥܺܝܪܺܝ ܠܽܗ̄ܘ ܒܰܝܬܳܐ ܗܰܢ݄ܟ ܕ݄ܡܫܰܕܪܺܝ، ܘ݄ܚܙܰܠّܶܗ ܗ̄ܽܘ ܓܪܶܝܥܰܘܳܐ ܟܰܐܠܶܗ ܢܰܝ݄ܚ ܠܶܗ.
ܝܶܫܽܘܥ ܟܡܰܩ݄ܡ ܗ̄ܽܘ ܐܰܒܪܳܐ ܕܺܗ̄ܝ ܐܰܪܡܰܠܬܳܐ
11ܘܗܰܘܺܝ ܠܽܗ̄ܘ ܝܰܘܡܳܐ ܕܒ݄ܬ̥ܪܶܗ، ܐܶܙّܶܗ ܗ̄ܘܰܐ ܠ݄ܡܕ̥ܺܝܢ̱ܬܳܐ ܕ݄ܐܫܡܰܗ ܢܰܐܺܝܢ، ܘܰܐܥܡܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܢܳܫ̈ܶܐ ܓ̥ܰܠܰܒܶܐ. 12ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܠܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܳܐ، ܚܙܶܐ ܠܶܗ ܕܟ݄ܡܠܰܘ݄ܢ ܡܺܝܬ̥ܳܐ ܕܟ݄ܬ ܗ̄ܘܰܐ ܝܺܚܺܝܕ̥ܳܝܳܐ ܠܺܗ̄ܝ ܐܶܡܳܐ، ܘܺܗ̄ܝ ܐܶܡܳܐ ܐܰܪܡܰܠܬܳܐ ܗ̄ܘܰܐ، ܘܢܳܫ̈ܶܐ ܓ̥ܰܠܰܒܶܐ ܡܰܗ̄ܢ ܐܰܒܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܐܰܥܡܰܗ. 13ܘܝܶܫܽܘܥ ܚ݄ܙܝܳܐ ܠܶܗ ܘܡܰܪܚܰܡ ܠܶܗ ܐܰܥܠܰܗ ܘܐܡ݄ܪ ܠܶܗ ܠܰܗ: ”ܠܳܐ ܒܳܟ̥ܝܰܬ.“ 14ܘܰܐܙّܶܗ ܓ݄ܫ ܠܶܗ ܒܽܗ̄ܘ ܥܰܪܣܳܐ، ܘܗܰܢ݄ܟ ܕܛܳܥܢܺܝ ܗ̄ܘܰܝ ܠܶܗ ܟܰܠ݄ܢ. ܘܐܡ݄ܪ ܠܶܗ: ”ܥܠܰܝܡܳܐ، ܐܶܠܳܟ̥ ܟܳܐܡܰܪ ܐ̱ܢܳܐ، ܩܘܿܡ!“ 15ܘܝܰܬܽܒ̥ ܗ̄ܽܘ ܡܺܝܬ̥ܰܘܳܐ، ܘ݄ܡܫܰܪܶܐ ܠܶܗ ܕܡ݄ܫܓ̥݄ܠ، ܘܗܽܒ̥ ܠܶܗ ܠܺܗ̄ܝ ܐܶܡܳܐ. 16ܘܙܽܘܥܬ̥ܳܐ ܢܰܦܺܝܠܳܐ ܗ̄ܘܰܐ ܥܰܠ ܟܽܘܠّܶܗ ܗ̄ܰܢ ܢܳܫ̈ܶܐ، ܘ݄ܡܫܰܒܚܺܝ ܗ̄ܘܰܘ̱ ܠܰܐܠܳܗܳܐ ܘ݄ܐܡّܺܪ̱ܝ ܗ̄ܘܰܘ̱: ”ܢܒܺܝܳܐ ܪܰܒܳܐ ܩܰܝ݄ܡ ܒܰܝܢܳܬ̥ܰܢ، ܘܰܐܠܳܗܳܐ ܚ݄ܪ ܠܶܗ ܒܽܗ̄ܘ ܥܰܡܰܝܕ̥ܶܗ.“ 17ܘܢܰܦ݄ܩ ܗ̄ܽܘ ܛܶܒܰܢܳܐ ܥܰܠ ܝܶܫܽܘܥ ܒܟܽܘܠܰܗ ܝܺܗܽܘܕ̥ ܘ݄ܒܟܽܘܠܶܗ ܗ̄ܽܘ ܐܰܬ̥ܪܳܐ ܕܚܶܕ̥ܳܪܰܝّܶܗ.
ܝܶܫܽܘܥ ܘܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
ܡܬܝ 11:2‐19
18ܘܰܬّܰܠܡܺܝܕ̥̈ܶܐ ܕܝܽܘܚܰܢܳܢ ܡܰܘܕ̥ܰܥّܶܗ ܠܝܽܘܚܰܢܳܢ ܥܰܠ ܗܰܢܺܝ ܟܽܘܠّܶܗ. 19ܘ݄ܩܪܶܐ ܠܶܗ ܝܽܘܚܰܢܳܢ ܠܰܬܪܶܝ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܘ݄ܡܫܰܕܪܺܝ ܠܶܗ ܠܓܰܒ ܝܶܫܽܘܥ، ܘܐܡ݄ܪ ܠܶܗ: ”ܗܰܬ ܗ̄ܰܬ ܝܳܐ ܗܰܘܳܐ ܕ݄ܓܕܳܐܬ̥ܶܐ ܐܰܘ ܠ݄ܚܪܶܢܳܐ ܢ݄ܛܪܺܝܢܰܐ؟“ 20ܘܰܐܬ̥݄ܢ ܠܓܰܒ ܝܶܫܽܘܥ ܘܐܡ݄ܪّܰܗ ܠܶܗ: ”ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ ܡܫܰܕܰܪ ܠܶܗ ܠܰܢ ܠܓܰܒܳܟ̥ ܘܳܐܡ݄ܪ: ܗܰܬ ܗ̄ܰܬ ܝܳܐ ܗܰܘܳܐ ܕ݄ܓܕܳܐܬ̥ܶܐ ܐܰܘ ܠ݄ܚܪܶܢܳܐ ܢ݄ܛܪܺܝܢܰܐ؟“ 21ܘܒܺܗ̄ܝ ܫܳܥܬ̥ܰܝܕ̥ܰܗ، ܠܓ̥ܰܠܰܒܶܐ ܡܰܢ݄ܚ ܠܶܗ ܡܶܢ̱ ܟܶܐܒ̥̈ܶܐ ܘܡܶܢ̱ ܡ݄ܚ̈ܘܳܬ̥ܳܐ ܘܡܶܢ̱ ܪ̈ܽܘܚܶܐ ܒܺܝܫ̈ܳܬ̥ܳܐ، ܘ݄ܠܓ̥ܰܠܰܒܶܐ ܣܰܡܝ̈ܶܐ ܗܽܒ̥ ܠܰܗ ܠّܶܗ ܕܚܳܙ݄ܢ. 22ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܐܡܰܪܽܘ ܠܝܽܘܚܰܢܳܢ ܟܽܘܠ ܡܶܕܶܐ ܕ݄ܚܙܰܠܟ̥ܽܘ ܘܫܰܡܺܝܥܺܝܬܽܘ: ܗ̄ܰܣّܰܡܝ̈ܶܐ ܟܚܳܙ݄ܢ، ܘܰܚܓ̥ܺܝܪ̈ܶܐ ܟ݄ܡܗܰܠܟ̥ܺܝ، ܘܰܓّܰܪ̈ܒ̥ܳܢܶܐ ܟܡܺܝܕܰܟ݄ܢ (ܟܡ݄ܬܠܶܐ ܗ̄ܽܘ ܓܰܪܒ̥ܳܐ ܡ݄ܢّܶܗ)، ܘܰܚّܰܪ̈ܫܶܐ ܟܫ݄ܡܥܺܝ، ܘܰܡّܺܝ̈ܬ̥ܶܐ ܟܩܰܝܡܺܝ، ܘܰܦّܰܩܺܝܪ̈ܶܐ ܟܫܳܡܥܺܝ ܣܒܰܪܬ̥ܳܐ. 23ܘܛܽܘܒܳܐ ܠܡܰܢ ܕܠ݄ܐ ܟܡܰܟܫ݄ܠ ܐܶܒܺܝ.“
24ܘܺܗ̄ܝ ܢܰܩܠܐ ܕܰܐܙّ݄ܢ ܗ̄ܰܬّܰܠܡܺܝܕ̥̈ܶܐ ܕܝܽܘܚܰܢܳܢ، ܡܫܰܪܶܐ ܠܶܗ ܕܳܐܡ݄ܪ ܠܰܗ̄ܢ ܢܳܫ̈ܶܐ ܥܰܠ ܝܽܘܚܰܢܳܢ: ”ܡ݄ܢܝܳܐ ܕܢܰܦܺܝܩܺܝܬܽܘ ܠܽܗ̄ܘ ܡܰܕ̥ܒܪܳܐ ܕܚܳܙܺܝܬܽܘ؟ ܩܰܢܝܳܐ ܕܡܺܝܗ݄ܙ ܗ̄ܘܰܐ ܡܺܗ̄ܝ ܗܰܘܰܐ؟ 25ܘܶܐܠܳܐ ܡ݄ܢܝܳܐ ܕܢܰܦܺܝܩܺܝܬܽܘ ܕܚܳܙܺܝܬܽܘ؟ ܓܰܒ̥ܪܳܐ ܕܟ݄ܬ ܝܳܐ ܠܒ̥ܺܝܫܳܐ ܠܒܽܘܫ̈ܶܐ ܪ̈ܰܟܺܝܟ̥ܶܐ؟ ܟܰܐܠܶܗ ܐܰܝܢܰܐ ܕܟ݄ܬܢܶܝ ܒ݄ܠܒܽܘܫ̈ܶܐ ܫܰܦܺܝܪ̈ܶܐ ܘ݄ܒܚܰܝ̈ܶܐ ܒܰܣܺܝܡ̈ܶܐ ܒܰܩّܽܘܨܪ̈ܶܐ ܕܰܡّܰܠܟ̈ܶܐ ܢܶܝ. 26ܘܶܐܠܳܐ ܡ݄ܢܝܳܐ ܕܢܰܦܺܝܩܺܝܬܽܘ ܕܚܳܙܺܝܬܽܘ؟ ܢܒܺܝܳܐ؟ ܐܺܝܢ ܟܳܐܡܰܪ ܐ̱ܢܳܐ ܠܟ̥ܽܘ، ܘܪܰܒ ܡܰܢ̱ ܢܒܺܝ̈ܶܐ. 27ܗܰܢܳܐ ܝܳܐ ܕܰܐܥܠܶܗ ܟܬ̥ܺܝܒ̥: ’ܟܰܐܠܺܝ ܟ݄ܡܫܰܕܰܪ ܐ̱ܢܳܐ ܗ̄ܽܘ ܡܰܠܰܐܟ̥ܰܝܕ̥ܺܝ ܩܰܕ̱ܡܽܘܬ̥ܳܟ̥ ܕ݄ܡܛܰܝ݄ܒ ܗ̄ܽܘ ܕܰܪܒܳܐ ܩܽܘܕ̱ܡܳܟ̥.‘ 28ܟܳܐܡܰܪ ܐ̱ܢܳܐ ܠܟ̥ܽܘ: ܠܰܝܬ ܢܒܺܝܳܐ ܒܰܝّܰܠܕ̈ܶܐ ܕܰܗ̄ܢ ܢܶܫ̈ܶܐ ܪܰܒ ܡܶܢ̱ ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܐܶܠܳܐ ܗ̄ܽܘ ܙܥܽܘܪܳܐ ܒܺܗ̄ܝ ܡܰܠܟܽܘܬ̥ܳܐ ܕܰܐܠܳܗܳܐ ܪܰܒ ܡܶܢܶܗ ܝܳܐ.“ 29ܘܟܽܘܠܶܗ ܗ̄ܽܘ ܥܰܡܳܐ ܕܫܰܡܺܝܥܺܝ، ܥܰܡ ܗ̄ܰܡّܳܟ̥ܣ̈ܶܐ، ܡܰܘܕܰܠّܶܗ ܒܺܗ̄ܝ ܙܰܕܺܝܩܽܘܬ̥ܳܐ ܕܰܐܠܳܗܳܐ، ܡܺܐܝܕ̥ܶܗ ܕܥܰܡܺܝܕ̥ܺܝ ܒܺܗ̄ܝ ܡܰܥܡܽܘܕ̥ܺܝܬ̥ܳܐ ܕܝܽܘܚܰܢܳܢ. 30ܐܶܠܳܐ ܗ̄ܰܦܪ̈ܺܝܫܶܐ ܘܰܣّܳܦܪ̈ܶܐ ܟܰܦܺܝܪܺܝ ܒܽܗ̄ܘ ܨܶܒܝܳܢܳܐ ܕܰܐܠܳܗܳܐ، ܡܺܐܝܕ̥ܶܗ ܕܠܳܐ ܥܰܡܺܝܕ̥ܺܝ ܡܶܢܶܗ.
ܝܶܫܽܘܥ ܟܕܳܝ݄ܢ ܗ̄ܰܢ ܢܳܫ̈ܶܐ ܕܽܗ̄ܘ ܙܰܒ̥ܢܰܝܕܶܗ
31”ܗܰܢ ܢܰܩܠܐ ܠܡܰܢ ܟܳܡܕܰܡܶܐ ܐ̱ܢܳܐ ܗ̄ܽܘ ܕܳܪܰܢܳܐ، ܘ݄ܠܡܰܢ ܟܕܳܡ݄ܢ؟ 32ܟܕܳܡ݄ܢ ܠ݄ܛܠܳܝ̈ܶܐ ܕܟܳܝ݄ܬܒ̥ܺܝ ܒܺܗ̄ܝ ܫܽܘܩܳܐ، ܘ݄ܟܡܰܙܥܩܺܝ ܠܰܚّܰܒ̥ܪ̈ܳܢܰܬّ̥ܶܗ ܘܟ݄ܐܡّܺܪ̱ܝ: ܙܡ݄ܪ ܠܰܢ (ܡܙܰܡܰܪ ܠܰܢ) ܐܰܠܟ̥ܽܘ ܘܠܳܐ ܪܰܩܺܝܕܺܝܬܽܘ، ܘ݄ܡܘܰܠܘܶܠ ܠܰܢ ܐܰܠܟ̥ܽܘ ܘܠܳܐ ܒܰܟ̥ܺܝܬܽܘ. 33ܡܺܐܝܕ̥ܶܗ ܕܰܐܬ̥ܺܝ ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܠ݄ܐ ܟܳܐܟ̥݄ܠ ܠܰܚܡܳܐ ܘܠ݄ܐ ܟܫܳܬܶܐ ܚܰܡܪܳܐ، ܘܟ݄ܐܡّܺܪ̱ܝܬܽܘ: ܫܺܐܕܳܐ ܟܺܝܒܶܗ. 34ܐܰܬ̥ܺܝ ܐܰܒܪܶܗ ܕܢܳܫܳܐ ܟܳܐܟ̥݄ܠ ܘ݄ܟܫܳܬܶܐ ܘܟ݄ܐܡّܺܪ̱ܝܬܽܘ ܟܰܐܠܶܗ ܓܰܒ̥ܪܳܐ ܐܰܟ̥ܳܠܳܐ ܘܫܰܬܳܝܳܐ ܕܚܰܡܪܳܐ، ܘܪܳܚܡܳܐ ܕܰܡّܳܟ̥ܣ̈ܶܐ ܘܕܰܚّܰܛܳܝ̈ܶܐ. 35ܐܶܠܳܐ ܗ̄ܺܝ ܚܶܟ̥ܡܬ̥ܳܐ ܡܙܰܕܩܳܐ ܡܰܗ̄ܢ ܢܳܫ̈ܶܐ ܕܟ݄ܐܒܥܺܝ ܠܰܗ.“
ܗ̄ܺܝ ܬܝܳܒܽܘܬ̥ܳܐ ܕܺܗ̄ܝ ܐܰܢ̱ܬ̥ܬܳܐ ܚܰܛܳܝܬܳܐ
36ܘܰܐܬ̥ܺܝ ܚܰܕ̱ ܡܰܢ̱ ܦܪ̈ܺܝܫܶܐ ܐܰܒ݄ܥ ܡܶܢܶܗ ܕܳܐܟ̥݄ܠ ܐܰܥܡܶܗ، ܘܥܰܒ݄ܪ ܠܒܰܝܬܶܗ ܕܽܗ̄ܘ ܦܪܺܝܫܰܘܳܐ ܘ݄ܣܡܺܝܟ̥. 37ܘܟ݄ܬ ܗ̄ܘܰܐ ܐܰܢ̱ܬ̥ܬܳܐ ܚܰܛܳܝܬܳܐ ܒܺܗ̄ܝ ܡܕ̥ܺܝܢ̱ܬܰܝܳܐ. ܘܺܗ̄ܝ ܢܰܩܠܐ ܕܰܐܕ̥ܺܝܥܳܐ ܕܟ݄ܬ ܝܳܐ ܣܡܺܝܟ̥ܳܐ ܒܽܗ̄ܘ ܒܰܝܬܳܐ ܕܽܗ̄ܘ ܦܪܺܝܫܰܘܳܐ، ܡ݄ܕ ܠܰܗ ܫܺܝܫܬܳܐ ܕܒܰܣܡܳܐ، 38ܘܟܰܠܝܳܐ ܡܶܢ̱ ܒ݄ܬ̥ܪܶܗ ܓܰܒ ܪ̈ܰܓ̥ܠܳܬ̥ܶܗ ܘܒܳܟ̥ܝܳܐ ܗ̄ܘܰܐ، ܘ݄ܡܫܰܪܶܐ ܠܰܗ ܕܡܰܬ݄ܪܝܳܐ ܪ̈ܰܓ̥ܠܳܬ̥ܶܗ ܒܰܕّܰܡܥ̈ܰܝܕ̥ܰܗ، ܘ݄ܡܟܰܦܪܰܠّܶܗ ܒܽܗ̄ܘ ܣܰܥܪܳܐ ܕܪܺܝܫܰܗ، ܘܢ݄ܫܩܳܐ ܗ̄ܘܰܐ ܪ̈ܰܓ̥ܠܳܬ̥ܶܗ ܘܡ݄ܫܚܳܐ ܗ̄ܘܰܐ ܒܰܣܡܳܐ. 39ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܗ̄ܽܘ ܦܪܺܝܫܰܘܳܐ ܕ݄ܩܪܶܐ ܠܶܗ (ܠܝܶܫܽܘܥ)، ܚܫܽܒ̥ ܠܶܗ ܒܢܰܦܫܶܗ ܘܐܡ݄ܪ ܠܶܗ: ”ܗܰܢܳܐ ܕܳܗ̄ܘܶܐ ܗ̄ܘܰܐ ܢܒܺܝܳܐ، ܕܳܐܕ̥ܰܥ ܗ̄ܘܰܐ ܡܰܢܝܳܐ ܘܡ݄ܢܝܳܐ ܗ̄ܽܘ ܛܶܒܰܝܕ̥ܰܗ: ܚܰܛܳܝܬܳܐ ܝܳܐ ܗ̄ܺܝ ܐܰܢ̱ܬ̥ܬܰܝܳܐ ܕܓ݄ܫ ܠܰܗ ܐܶܒܶܗ.“ 40ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܫܶܡܥܽܘܢ، ܟ݄ܬ ܠܺܝ ܡܶܕܶܐ ܕܳܐܡܰܪ ܐ̱ܢܳܐ ܠܳܟ̥.“ ܘܗܺܝّܶܗ ܐܡ݄ܪ ܠܶܗ ܠܶܗ: ”ܐܡܰܪ، ܡܰܠܦܳܢܳܐ.“ ܘܐܡ݄ܪ ܠܶܗ ܠܶܗ ܝܶܫܽܘܥ: 41”ܟ݄ܬ ܗ̄ܘܰܐ ܬܪܶܝ ܡܕܰܝܢ̈ܶܐ ܠܚܰܕ̱ ܡܳܪܶܗ ܕܕܰܝܢܳܐ، ܥܰܠ ܚܰܕ̱ ܚܰܡّ݄ܫܡܳܐܐ ܕܺܝܢܳܪ̈ܶܐ، ܘܥܰܠ ܗ̄ܽܘ ܚܪܶܢܳܐ ܚܰܡܫܺܝ. 42ܘܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܠّܶܗ ܕܡܰܕܥܪܺܝ، ܛܪܶܐ ܠܶܗ ܠܰܬܪ̈ܰܝّܶܗ (ܗ̄ܽܘ ܕܰܝܢܰܬّ̥ܶܗ). ܗܰܢ ܢܰܩܠܐ ܐܰܝܢܰܐ ܡܰܗ̄ܢܺܝ ܓ݄ܕܪܳܚܰܡ ܠܶܗ ܙ݄ܕ؟“ 43ܡܰܕܥܰܪ ܠܶܗ ܫܶܡܥܽܘܢ ܘܐܡ݄ܪ ܠܶܗ: ”ܟܳܐܡܰܪ ܐ̱ܢܳܐ ܗܰܘܳܐ ܕ݄ܛܪܶܐ ܐܶܠܶܗ ܓ̥ܰܠܰܒܶܐ.“ ܘܐܡ݄ܪ ܠܶܗ ܠܶܗ ܝܶܫܽܘܥ: ”ܫܪܳܪܳܐ ܕ݄ܢ ܠܳܟ̥.“ 44ܘܡܰܒܪܰܡ ܠܶܗ ܦܳܬ̥ܶܗ ܠܰܐܦ ܗ̄ܺܝ ܐܰܢ̱ܬ̥ܬܳܐ ܘܐܡ݄ܪ ܠܶܗ ܠܫܶܡܥܽܘܢ: ”ܟܚܳܙܰܬ ܗ̄ܺܝ ܐܰܢ̱ܬ̥ܬܰܬ̥ܶܐ، ܐܳܢܳܐ ܥܰܒ݄ܪ ܐ̱ܢܳܐ ܠܽܗ̄ܘ ܒܰܝܬܰܝܕ̥ܳܟ̥، ܡܰܝ̈ܶܐ ܠܪ̈ܰܓ̥ܠܳܬ̥ܺܝ ܠܳܐ ܗܽܒ̥ ܠܳܟ̥ ܠܺܝ، ܐܶܠܳܐ ܗܰܬ̥ܶܐ ܒܰܕّܰܡܥ̈ܰܝܕ̥ܰܗ ܡܰܬܪܶܐ ܠܰܗ ܪ̈ܰܓ̥ܠܳܬ̥ܺܝ، ܘܒܽܗ̄ܘ ܣܰܥܪܰܝܕ̥ܰܗ ܡܟܰܦܪܺܝ ܠܰܗ. 45ܗܰܬ ܠܳܐ ܢܫ݄ܩ ܠܳܟ̥ ܠܺܝ، ܐܶܠܳܐ ܗܰܬ̥ܶܐ ܟܰܐܠܰܗ ܡܺܗ̄ܝ ܢܰܩܠܐ ܕܥܰܒܺܝܪܳܐ ܠܳܐ ܟܰܠܝܳܐ ܡܽܗ̄ܘ ܢܫܳܩܳܐ ܕܪ̈ܰܓ̥ܠܳܬ̥ܺܝ. 46ܗܰܬ ܡܶܫܚܳܐ ܠܪܺܝܫܺܝ ܠܳܐ ܡܫ݄ܚ ܠܳܟ̥، ܐܶܠܳܐ ܗܰܬ̥ܶܐ ܒܡܶܫܚܳܐ ܕܒܰܣܡܳܐ ܡܫ݄ܚ ܠܰܗ ܪ̈ܰܓ̥ܠܳܬ̥ܺܝ. 47ܡܰܗ̄ܘܟ̥ܰܐ ܟܳܐܡܰܪ ܐ̱ܢܳܐ ܠܳܟ̥: ܫܒܺܝܩܺܝ ܗ̄ܰܚ̈ܛܳܗܰܝܕ̥ܰܗ ܗ̄ܰܓّ̥ܰܠܰܒܶܐ ܥܰܠ ܕ݄ܪܚ݄ܡ ܠܰܗ ܓ̥ܰܠܰܒܶܐ. ܘܗܰܘܳܐ ܕ݄ܫܒܺܝܩ ܠܶܗ ܐ݄ܫܡܳܐ، ܐ݄ܫܡܳܐ ܟܪܳܚ݄ܡ.“ 48ܘܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܰܝܳܐ: ”ܫܒܺܝܩܺܝ ܗ̄ܰܚ̈ܛܳܗܰܝܕ̥ܰܟ̥.“ 49ܘ݄ܡܫܰܪܰܠّܶܗ ܗܰܢ݄ܟ ܕ݄ܣܡܺܝܟ̥ܺܝ ܐ݄ܡّܺܪ̱ܝ ܒܢܰܦܫ̈ܰܝّܶܗ: ”ܡܰܢܝܳܐ ܗܰܢܳܐ ܕܰܚܛܳܗ̈ܶܐ ܣܬܶܝ ܟܫܳܒ݄ܩ؟“ 50ܘܝܶܫܽܘܥ ܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܰܝܳܐ: ”ܗ̄ܺܝ ܗܰܝܡܳܢܽܘܬ̥ܰܝܕ̥ܰܟ̥ ܗܽܒ̥ ܠܰܗ ܠܰܟ̥ ܚܰܝ̈ܶܐ، ܙܶܠ ܒ݄ܫܠܳܡܳܐ.“
Currently Selected:
ܡܓܰܠܝܘܢ ܕܠܘܩܐ 7: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
ܡܓܰܠܝܘܢ ܕܠܘܩܐ 7
7
ܝܶܫܽܘܥ ܟܡܰܢ݄ܚ ܗ̄ܽܘ ܓܪܶܝܥܳܐ ܕܽܗ̄ܘ ܪܰܒ ܚܰܝܠܳܐ
ܡܬܝ 8:5‐13؛ ܝܘܚܢܢ 4:43‐54
1ܘܺܗ̄ܝ ܢܰܩܠܐ ܕܡܰܬ݄ܡ ܠܶܗ ܗ̄ܰܡّܰܐܡܪ̈ܰܝܕ̥ܶܗ ܟܽܘܠّܶܗ ܩܽܘܕ̱ܡܶܗ ܕܽܗ̄ܘ ܥܰܡܳܐ، ܥܰܒ݄ܪ ܝܶܫܽܘܥ ܠ݄ܟܦܰܪܢܰܚܽܘܡ. 2ܘܽܗ̄ܘ ܓܪܶܝܥܳܐ ܕܚܰܕ̱ ܩܶܢܛܪܽܘܢܳܐ (ܪܺܝܫܳܐ ܕܡܳܐܐ) ܓ̥ܰܠܰܒܶܐ ܟܰܐܺܝܒ̥ܳܐ ܗ̄ܘܰܐ، ܘܓ̥ܰܠܰܒܶܐ ܝܰܩܺܝܪܳܐ ܗ̄ܘܰܐ ܐܰܥܠܶܗ. ܘ݄ܡܩܰܪܰܒ̥ ܠܶܗ ܕܡܳܝ݄ܬ. 3ܘܫܰܡ݄ܥ ܥܰܠ ܝܶܫܽܘܥ، ܘ݄ܡܫܰܕܰܪ ܠܶܗ ܠܓܰܒܶܗ ܗ̄ܰܩّܰܫ̈ܶܐ ܕܰܝّܽܘܕ̥̈ܳܝܶܐ، ܘܳܐܒܰܥ ܗ̄ܘܰܐ ܡܶܢܶܗ ܕܳܐܬ̥ܶܐ ܡܰܚܶܐ (ܡܰܢ݄ܚ) ܠܽܗ̄ܘ ܓܪܶܝܥܰܝܕ̥ܶܗ. 4ܘܗ݄ܢّܶܝ ܗ̄ܺܝ ܢܰܩܠܐ ܕܰܐܬ̥݄ܢ ܓܰܒ ܝܶܫܽܘܥ ܓ̥ܰܠܰܒܶܐ ܐ݄ܒܥܺܝ ܗ̄ܘܰܘ̱ ܡܶܢܶܗ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܳܐ ܟܫܳܘܶܐ ܕܣܰܝܡܰܬ ܠܶܗ ܗܰܬ̥ܶܐ، 5ܡܺܐܝܕ̥ܶܗ ܕ݄ܟܪܳܚ݄ܡ ܠܽܗ̄ܘ ܥܰܡܰܝܕ̥ܰܢ، ܘܗܺܝّܶܗ ܝܳܐ ܕ݄ܒܢܶܐ ܠܶܗ ܠܰܢ ܗ̄ܺܝ ܟ̥ܢܽܘܫܬܳܐ.“ 6ܘܰܐܙّܶܗ ܝܶܫܽܘܥ ܐܰܥܡܰܝّܶܗ. ܘܺܗ̄ܝ ܢܰܩܠܐ ܕ݄ܡܩܰܪܰܒّ̥ܶܗ ܠܰܐܦ ܗ̄ܽܘ ܒܰܝܬܳܐ، ܗ̄ܽܘ ܩܶܢܛܪܽܘܢܳܐ ܡܫܰܕܰܪ ܠܶܗ ܗ̄ܰܪّܳܚ̈ܡܰܝܕ̥ܶܗ ܠܓܰܒ ܝܶܫܽܘܥ، ܘܐܡ݄ܪ ܠܶܗ ܠܶܗ: ”ܡܳܪܝ، ܠܳܐ ܡܰܘܩܪܰܬ ܥܰܠ ܪܽܘܚܳܟ̥، ܡܺܐܝܕ̥ܶܗ ܕܠ݄ܐ ܟܫܳܘܶܐ ܐ̱ܢܳܐ ܕܥܳܒܪܰܬ ܬܰܚܬ ܗ̄ܽܘ ܩܛܳܪܳܐ ܕܽܗ̄ܘ ܒܰܝܬܰܝܕ̥ܺܝ، 7ܡܰܗ̄ܘܟ̥ܰܐ ܐܳܢܳܐ ܠ݄ܐ ܟܫܳܘܶܐ ܐ̱ܢܳܐ ܕܳܐܬ̥ܶܐ ܐ̱ܢܳܐ ܠܣܺܝܕ̥ܳܟ̥، ܐܶܠܳܐ ܐܡܰܪ ܒܺܗ̄ܝ ܡܶܠܬ̥ܳܐ ܘܽܗ̄ܘ ܓܪܶܝܥܰܝܕ̥ܺܝ ܟܢܳܝܰܚ ܠܶܗ. 8ܡܺܐܝܕ̥ܶܗ ܕܳܐܢܳܐ ܣܬܶܝ ܓܰܒ̥ܪܳܐ ܐ̱ܢܳܐ ܬܰܚܬܶܗ ܕܫܽܘܠܛܳܢܳܐ، ܘܟܺܝܬ ܬܰܚܬ ܐܺܝܕ̥̈ܳܬ̥ܺܝ ܦܳܠܚ̈ܶܐ، ܘܟܳܐܡܰܪ ܐ̱ܢܳܐ ܠܰܗ̄ܢܳܐ ܙܳܟ̥، ܘܟ݄ܐܙّܶܗ، ܘܠ݄ܚܪܶܢܳܐ ܬܳܟ̥، ܘܟܳܐܬ̥ܶܐ، ܘܠܽܗ̄ܘ ܓܪܶܝܥܰܝܕ̥ܺܝ ܣܘܿܡ ܗܰܬ̥ܶܐ، ܘ݄ܟܣܳܝ݄ܡ.“ 9ܘܺܗ̄ܝ ܢܰܩܠܐ ܕܫܰܡ݄ܥ ܝܶܫܽܘܥ ܗܰܢܺܝ ܡܕܰܘܡ݄ܪ ܐܶܒܶܗ، ܘܚ݄ܪ ܠܶܗ ܒܰܗ̄ܢ ܢܳܫ̈ܶܐ ܕܟܳܐܬ̥݄ܢ ܒ݄ܬ̥ܪܶܗ، ܘܐܡ݄ܪ ܠܶܗ: ”ܟܳܐܡܰܪ ܐ̱ܢܳܐ ܠܟ̥ܽܘ، ܘܠ݄ܐ ܒܺܐܝܣܪܳܐܶܝܠ ܚܙܶܐ ܠܺܝ ܐܟ̥ ܕܺܗ̄ܝ ܗܰܝܡܳܢܽܘܬ̥ܰܬ̥ܶܐ.“ 10ܘܕܰܥܺܝܪܺܝ ܠܽܗ̄ܘ ܒܰܝܬܳܐ ܗܰܢ݄ܟ ܕ݄ܡܫܰܕܪܺܝ، ܘ݄ܚܙܰܠّܶܗ ܗ̄ܽܘ ܓܪܶܝܥܰܘܳܐ ܟܰܐܠܶܗ ܢܰܝ݄ܚ ܠܶܗ.
ܝܶܫܽܘܥ ܟܡܰܩ݄ܡ ܗ̄ܽܘ ܐܰܒܪܳܐ ܕܺܗ̄ܝ ܐܰܪܡܰܠܬܳܐ
11ܘܗܰܘܺܝ ܠܽܗ̄ܘ ܝܰܘܡܳܐ ܕܒ݄ܬ̥ܪܶܗ، ܐܶܙّܶܗ ܗ̄ܘܰܐ ܠ݄ܡܕ̥ܺܝܢ̱ܬܳܐ ܕ݄ܐܫܡܰܗ ܢܰܐܺܝܢ، ܘܰܐܥܡܶܗ ܗ̄ܰܬّܰܠܡܺܝܕ̥̈ܰܝܕ̥ܶܗ ܘܢܳܫ̈ܶܐ ܓ̥ܰܠܰܒܶܐ. 12ܘܺܗ̄ܝ ܢܰܩܠܐ ܕ݄ܡܩܰܪܰܒ̥ ܠܶܗ ܠܽܗ̄ܘ ܬܰܪܥܳܐ ܕܺܗ̄ܝ ܡܕ̥ܺܝܢ̱ܬܳܐ، ܚܙܶܐ ܠܶܗ ܕܟ݄ܡܠܰܘ݄ܢ ܡܺܝܬ̥ܳܐ ܕܟ݄ܬ ܗ̄ܘܰܐ ܝܺܚܺܝܕ̥ܳܝܳܐ ܠܺܗ̄ܝ ܐܶܡܳܐ، ܘܺܗ̄ܝ ܐܶܡܳܐ ܐܰܪܡܰܠܬܳܐ ܗ̄ܘܰܐ، ܘܢܳܫ̈ܶܐ ܓ̥ܰܠܰܒܶܐ ܡܰܗ̄ܢ ܐܰܒܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܐܰܥܡܰܗ. 13ܘܝܶܫܽܘܥ ܚ݄ܙܝܳܐ ܠܶܗ ܘܡܰܪܚܰܡ ܠܶܗ ܐܰܥܠܰܗ ܘܐܡ݄ܪ ܠܶܗ ܠܰܗ: ”ܠܳܐ ܒܳܟ̥ܝܰܬ.“ 14ܘܰܐܙّܶܗ ܓ݄ܫ ܠܶܗ ܒܽܗ̄ܘ ܥܰܪܣܳܐ، ܘܗܰܢ݄ܟ ܕܛܳܥܢܺܝ ܗ̄ܘܰܝ ܠܶܗ ܟܰܠ݄ܢ. ܘܐܡ݄ܪ ܠܶܗ: ”ܥܠܰܝܡܳܐ، ܐܶܠܳܟ̥ ܟܳܐܡܰܪ ܐ̱ܢܳܐ، ܩܘܿܡ!“ 15ܘܝܰܬܽܒ̥ ܗ̄ܽܘ ܡܺܝܬ̥ܰܘܳܐ، ܘ݄ܡܫܰܪܶܐ ܠܶܗ ܕܡ݄ܫܓ̥݄ܠ، ܘܗܽܒ̥ ܠܶܗ ܠܺܗ̄ܝ ܐܶܡܳܐ. 16ܘܙܽܘܥܬ̥ܳܐ ܢܰܦܺܝܠܳܐ ܗ̄ܘܰܐ ܥܰܠ ܟܽܘܠّܶܗ ܗ̄ܰܢ ܢܳܫ̈ܶܐ، ܘ݄ܡܫܰܒܚܺܝ ܗ̄ܘܰܘ̱ ܠܰܐܠܳܗܳܐ ܘ݄ܐܡّܺܪ̱ܝ ܗ̄ܘܰܘ̱: ”ܢܒܺܝܳܐ ܪܰܒܳܐ ܩܰܝ݄ܡ ܒܰܝܢܳܬ̥ܰܢ، ܘܰܐܠܳܗܳܐ ܚ݄ܪ ܠܶܗ ܒܽܗ̄ܘ ܥܰܡܰܝܕ̥ܶܗ.“ 17ܘܢܰܦ݄ܩ ܗ̄ܽܘ ܛܶܒܰܢܳܐ ܥܰܠ ܝܶܫܽܘܥ ܒܟܽܘܠܰܗ ܝܺܗܽܘܕ̥ ܘ݄ܒܟܽܘܠܶܗ ܗ̄ܽܘ ܐܰܬ̥ܪܳܐ ܕܚܶܕ̥ܳܪܰܝّܶܗ.
ܝܶܫܽܘܥ ܘܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
ܡܬܝ 11:2‐19
18ܘܰܬّܰܠܡܺܝܕ̥̈ܶܐ ܕܝܽܘܚܰܢܳܢ ܡܰܘܕ̥ܰܥّܶܗ ܠܝܽܘܚܰܢܳܢ ܥܰܠ ܗܰܢܺܝ ܟܽܘܠّܶܗ. 19ܘ݄ܩܪܶܐ ܠܶܗ ܝܽܘܚܰܢܳܢ ܠܰܬܪܶܝ ܡܰܢ̱ ܬّܰܠܡܺܝܕ̥̈ܰܝܕ̥ܶܗ ܘ݄ܡܫܰܕܪܺܝ ܠܶܗ ܠܓܰܒ ܝܶܫܽܘܥ، ܘܐܡ݄ܪ ܠܶܗ: ”ܗܰܬ ܗ̄ܰܬ ܝܳܐ ܗܰܘܳܐ ܕ݄ܓܕܳܐܬ̥ܶܐ ܐܰܘ ܠ݄ܚܪܶܢܳܐ ܢ݄ܛܪܺܝܢܰܐ؟“ 20ܘܰܐܬ̥݄ܢ ܠܓܰܒ ܝܶܫܽܘܥ ܘܐܡ݄ܪّܰܗ ܠܶܗ: ”ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ ܡܫܰܕܰܪ ܠܶܗ ܠܰܢ ܠܓܰܒܳܟ̥ ܘܳܐܡ݄ܪ: ܗܰܬ ܗ̄ܰܬ ܝܳܐ ܗܰܘܳܐ ܕ݄ܓܕܳܐܬ̥ܶܐ ܐܰܘ ܠ݄ܚܪܶܢܳܐ ܢ݄ܛܪܺܝܢܰܐ؟“ 21ܘܒܺܗ̄ܝ ܫܳܥܬ̥ܰܝܕ̥ܰܗ، ܠܓ̥ܰܠܰܒܶܐ ܡܰܢ݄ܚ ܠܶܗ ܡܶܢ̱ ܟܶܐܒ̥̈ܶܐ ܘܡܶܢ̱ ܡ݄ܚ̈ܘܳܬ̥ܳܐ ܘܡܶܢ̱ ܪ̈ܽܘܚܶܐ ܒܺܝܫ̈ܳܬ̥ܳܐ، ܘ݄ܠܓ̥ܰܠܰܒܶܐ ܣܰܡܝ̈ܶܐ ܗܽܒ̥ ܠܰܗ ܠّܶܗ ܕܚܳܙ݄ܢ. 22ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܙܳܟ̥ܽܘ ܐܡܰܪܽܘ ܠܝܽܘܚܰܢܳܢ ܟܽܘܠ ܡܶܕܶܐ ܕ݄ܚܙܰܠܟ̥ܽܘ ܘܫܰܡܺܝܥܺܝܬܽܘ: ܗ̄ܰܣّܰܡܝ̈ܶܐ ܟܚܳܙ݄ܢ، ܘܰܚܓ̥ܺܝܪ̈ܶܐ ܟ݄ܡܗܰܠܟ̥ܺܝ، ܘܰܓّܰܪ̈ܒ̥ܳܢܶܐ ܟܡܺܝܕܰܟ݄ܢ (ܟܡ݄ܬܠܶܐ ܗ̄ܽܘ ܓܰܪܒ̥ܳܐ ܡ݄ܢّܶܗ)، ܘܰܚّܰܪ̈ܫܶܐ ܟܫ݄ܡܥܺܝ، ܘܰܡّܺܝ̈ܬ̥ܶܐ ܟܩܰܝܡܺܝ، ܘܰܦّܰܩܺܝܪ̈ܶܐ ܟܫܳܡܥܺܝ ܣܒܰܪܬ̥ܳܐ. 23ܘܛܽܘܒܳܐ ܠܡܰܢ ܕܠ݄ܐ ܟܡܰܟܫ݄ܠ ܐܶܒܺܝ.“
24ܘܺܗ̄ܝ ܢܰܩܠܐ ܕܰܐܙّ݄ܢ ܗ̄ܰܬّܰܠܡܺܝܕ̥̈ܶܐ ܕܝܽܘܚܰܢܳܢ، ܡܫܰܪܶܐ ܠܶܗ ܕܳܐܡ݄ܪ ܠܰܗ̄ܢ ܢܳܫ̈ܶܐ ܥܰܠ ܝܽܘܚܰܢܳܢ: ”ܡ݄ܢܝܳܐ ܕܢܰܦܺܝܩܺܝܬܽܘ ܠܽܗ̄ܘ ܡܰܕ̥ܒܪܳܐ ܕܚܳܙܺܝܬܽܘ؟ ܩܰܢܝܳܐ ܕܡܺܝܗ݄ܙ ܗ̄ܘܰܐ ܡܺܗ̄ܝ ܗܰܘܰܐ؟ 25ܘܶܐܠܳܐ ܡ݄ܢܝܳܐ ܕܢܰܦܺܝܩܺܝܬܽܘ ܕܚܳܙܺܝܬܽܘ؟ ܓܰܒ̥ܪܳܐ ܕܟ݄ܬ ܝܳܐ ܠܒ̥ܺܝܫܳܐ ܠܒܽܘܫ̈ܶܐ ܪ̈ܰܟܺܝܟ̥ܶܐ؟ ܟܰܐܠܶܗ ܐܰܝܢܰܐ ܕܟ݄ܬܢܶܝ ܒ݄ܠܒܽܘܫ̈ܶܐ ܫܰܦܺܝܪ̈ܶܐ ܘ݄ܒܚܰܝ̈ܶܐ ܒܰܣܺܝܡ̈ܶܐ ܒܰܩّܽܘܨܪ̈ܶܐ ܕܰܡّܰܠܟ̈ܶܐ ܢܶܝ. 26ܘܶܐܠܳܐ ܡ݄ܢܝܳܐ ܕܢܰܦܺܝܩܺܝܬܽܘ ܕܚܳܙܺܝܬܽܘ؟ ܢܒܺܝܳܐ؟ ܐܺܝܢ ܟܳܐܡܰܪ ܐ̱ܢܳܐ ܠܟ̥ܽܘ، ܘܪܰܒ ܡܰܢ̱ ܢܒܺܝ̈ܶܐ. 27ܗܰܢܳܐ ܝܳܐ ܕܰܐܥܠܶܗ ܟܬ̥ܺܝܒ̥: ’ܟܰܐܠܺܝ ܟ݄ܡܫܰܕܰܪ ܐ̱ܢܳܐ ܗ̄ܽܘ ܡܰܠܰܐܟ̥ܰܝܕ̥ܺܝ ܩܰܕ̱ܡܽܘܬ̥ܳܟ̥ ܕ݄ܡܛܰܝ݄ܒ ܗ̄ܽܘ ܕܰܪܒܳܐ ܩܽܘܕ̱ܡܳܟ̥.‘ 28ܟܳܐܡܰܪ ܐ̱ܢܳܐ ܠܟ̥ܽܘ: ܠܰܝܬ ܢܒܺܝܳܐ ܒܰܝّܰܠܕ̈ܶܐ ܕܰܗ̄ܢ ܢܶܫ̈ܶܐ ܪܰܒ ܡܶܢ̱ ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܐܶܠܳܐ ܗ̄ܽܘ ܙܥܽܘܪܳܐ ܒܺܗ̄ܝ ܡܰܠܟܽܘܬ̥ܳܐ ܕܰܐܠܳܗܳܐ ܪܰܒ ܡܶܢܶܗ ܝܳܐ.“ 29ܘܟܽܘܠܶܗ ܗ̄ܽܘ ܥܰܡܳܐ ܕܫܰܡܺܝܥܺܝ، ܥܰܡ ܗ̄ܰܡّܳܟ̥ܣ̈ܶܐ، ܡܰܘܕܰܠّܶܗ ܒܺܗ̄ܝ ܙܰܕܺܝܩܽܘܬ̥ܳܐ ܕܰܐܠܳܗܳܐ، ܡܺܐܝܕ̥ܶܗ ܕܥܰܡܺܝܕ̥ܺܝ ܒܺܗ̄ܝ ܡܰܥܡܽܘܕ̥ܺܝܬ̥ܳܐ ܕܝܽܘܚܰܢܳܢ. 30ܐܶܠܳܐ ܗ̄ܰܦܪ̈ܺܝܫܶܐ ܘܰܣّܳܦܪ̈ܶܐ ܟܰܦܺܝܪܺܝ ܒܽܗ̄ܘ ܨܶܒܝܳܢܳܐ ܕܰܐܠܳܗܳܐ، ܡܺܐܝܕ̥ܶܗ ܕܠܳܐ ܥܰܡܺܝܕ̥ܺܝ ܡܶܢܶܗ.
ܝܶܫܽܘܥ ܟܕܳܝ݄ܢ ܗ̄ܰܢ ܢܳܫ̈ܶܐ ܕܽܗ̄ܘ ܙܰܒ̥ܢܰܝܕܶܗ
31”ܗܰܢ ܢܰܩܠܐ ܠܡܰܢ ܟܳܡܕܰܡܶܐ ܐ̱ܢܳܐ ܗ̄ܽܘ ܕܳܪܰܢܳܐ، ܘ݄ܠܡܰܢ ܟܕܳܡ݄ܢ؟ 32ܟܕܳܡ݄ܢ ܠ݄ܛܠܳܝ̈ܶܐ ܕܟܳܝ݄ܬܒ̥ܺܝ ܒܺܗ̄ܝ ܫܽܘܩܳܐ، ܘ݄ܟܡܰܙܥܩܺܝ ܠܰܚّܰܒ̥ܪ̈ܳܢܰܬّ̥ܶܗ ܘܟ݄ܐܡّܺܪ̱ܝ: ܙܡ݄ܪ ܠܰܢ (ܡܙܰܡܰܪ ܠܰܢ) ܐܰܠܟ̥ܽܘ ܘܠܳܐ ܪܰܩܺܝܕܺܝܬܽܘ، ܘ݄ܡܘܰܠܘܶܠ ܠܰܢ ܐܰܠܟ̥ܽܘ ܘܠܳܐ ܒܰܟ̥ܺܝܬܽܘ. 33ܡܺܐܝܕ̥ܶܗ ܕܰܐܬ̥ܺܝ ܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ، ܠ݄ܐ ܟܳܐܟ̥݄ܠ ܠܰܚܡܳܐ ܘܠ݄ܐ ܟܫܳܬܶܐ ܚܰܡܪܳܐ، ܘܟ݄ܐܡّܺܪ̱ܝܬܽܘ: ܫܺܐܕܳܐ ܟܺܝܒܶܗ. 34ܐܰܬ̥ܺܝ ܐܰܒܪܶܗ ܕܢܳܫܳܐ ܟܳܐܟ̥݄ܠ ܘ݄ܟܫܳܬܶܐ ܘܟ݄ܐܡّܺܪ̱ܝܬܽܘ ܟܰܐܠܶܗ ܓܰܒ̥ܪܳܐ ܐܰܟ̥ܳܠܳܐ ܘܫܰܬܳܝܳܐ ܕܚܰܡܪܳܐ، ܘܪܳܚܡܳܐ ܕܰܡّܳܟ̥ܣ̈ܶܐ ܘܕܰܚّܰܛܳܝ̈ܶܐ. 35ܐܶܠܳܐ ܗ̄ܺܝ ܚܶܟ̥ܡܬ̥ܳܐ ܡܙܰܕܩܳܐ ܡܰܗ̄ܢ ܢܳܫ̈ܶܐ ܕܟ݄ܐܒܥܺܝ ܠܰܗ.“
ܗ̄ܺܝ ܬܝܳܒܽܘܬ̥ܳܐ ܕܺܗ̄ܝ ܐܰܢ̱ܬ̥ܬܳܐ ܚܰܛܳܝܬܳܐ
36ܘܰܐܬ̥ܺܝ ܚܰܕ̱ ܡܰܢ̱ ܦܪ̈ܺܝܫܶܐ ܐܰܒ݄ܥ ܡܶܢܶܗ ܕܳܐܟ̥݄ܠ ܐܰܥܡܶܗ، ܘܥܰܒ݄ܪ ܠܒܰܝܬܶܗ ܕܽܗ̄ܘ ܦܪܺܝܫܰܘܳܐ ܘ݄ܣܡܺܝܟ̥. 37ܘܟ݄ܬ ܗ̄ܘܰܐ ܐܰܢ̱ܬ̥ܬܳܐ ܚܰܛܳܝܬܳܐ ܒܺܗ̄ܝ ܡܕ̥ܺܝܢ̱ܬܰܝܳܐ. ܘܺܗ̄ܝ ܢܰܩܠܐ ܕܰܐܕ̥ܺܝܥܳܐ ܕܟ݄ܬ ܝܳܐ ܣܡܺܝܟ̥ܳܐ ܒܽܗ̄ܘ ܒܰܝܬܳܐ ܕܽܗ̄ܘ ܦܪܺܝܫܰܘܳܐ، ܡ݄ܕ ܠܰܗ ܫܺܝܫܬܳܐ ܕܒܰܣܡܳܐ، 38ܘܟܰܠܝܳܐ ܡܶܢ̱ ܒ݄ܬ̥ܪܶܗ ܓܰܒ ܪ̈ܰܓ̥ܠܳܬ̥ܶܗ ܘܒܳܟ̥ܝܳܐ ܗ̄ܘܰܐ، ܘ݄ܡܫܰܪܶܐ ܠܰܗ ܕܡܰܬ݄ܪܝܳܐ ܪ̈ܰܓ̥ܠܳܬ̥ܶܗ ܒܰܕّܰܡܥ̈ܰܝܕ̥ܰܗ، ܘ݄ܡܟܰܦܪܰܠّܶܗ ܒܽܗ̄ܘ ܣܰܥܪܳܐ ܕܪܺܝܫܰܗ، ܘܢ݄ܫܩܳܐ ܗ̄ܘܰܐ ܪ̈ܰܓ̥ܠܳܬ̥ܶܗ ܘܡ݄ܫܚܳܐ ܗ̄ܘܰܐ ܒܰܣܡܳܐ. 39ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܗ̄ܽܘ ܦܪܺܝܫܰܘܳܐ ܕ݄ܩܪܶܐ ܠܶܗ (ܠܝܶܫܽܘܥ)، ܚܫܽܒ̥ ܠܶܗ ܒܢܰܦܫܶܗ ܘܐܡ݄ܪ ܠܶܗ: ”ܗܰܢܳܐ ܕܳܗ̄ܘܶܐ ܗ̄ܘܰܐ ܢܒܺܝܳܐ، ܕܳܐܕ̥ܰܥ ܗ̄ܘܰܐ ܡܰܢܝܳܐ ܘܡ݄ܢܝܳܐ ܗ̄ܽܘ ܛܶܒܰܝܕ̥ܰܗ: ܚܰܛܳܝܬܳܐ ܝܳܐ ܗ̄ܺܝ ܐܰܢ̱ܬ̥ܬܰܝܳܐ ܕܓ݄ܫ ܠܰܗ ܐܶܒܶܗ.“ 40ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܫܶܡܥܽܘܢ، ܟ݄ܬ ܠܺܝ ܡܶܕܶܐ ܕܳܐܡܰܪ ܐ̱ܢܳܐ ܠܳܟ̥.“ ܘܗܺܝّܶܗ ܐܡ݄ܪ ܠܶܗ ܠܶܗ: ”ܐܡܰܪ، ܡܰܠܦܳܢܳܐ.“ ܘܐܡ݄ܪ ܠܶܗ ܠܶܗ ܝܶܫܽܘܥ: 41”ܟ݄ܬ ܗ̄ܘܰܐ ܬܪܶܝ ܡܕܰܝܢ̈ܶܐ ܠܚܰܕ̱ ܡܳܪܶܗ ܕܕܰܝܢܳܐ، ܥܰܠ ܚܰܕ̱ ܚܰܡّ݄ܫܡܳܐܐ ܕܺܝܢܳܪ̈ܶܐ، ܘܥܰܠ ܗ̄ܽܘ ܚܪܶܢܳܐ ܚܰܡܫܺܝ. 42ܘܡܺܐܝܕ̥ܶܗ ܕܠܰܝ̱ܬ ܗ̄ܘܰܐ ܠّܶܗ ܕܡܰܕܥܪܺܝ، ܛܪܶܐ ܠܶܗ ܠܰܬܪ̈ܰܝّܶܗ (ܗ̄ܽܘ ܕܰܝܢܰܬّ̥ܶܗ). ܗܰܢ ܢܰܩܠܐ ܐܰܝܢܰܐ ܡܰܗ̄ܢܺܝ ܓ݄ܕܪܳܚܰܡ ܠܶܗ ܙ݄ܕ؟“ 43ܡܰܕܥܰܪ ܠܶܗ ܫܶܡܥܽܘܢ ܘܐܡ݄ܪ ܠܶܗ: ”ܟܳܐܡܰܪ ܐ̱ܢܳܐ ܗܰܘܳܐ ܕ݄ܛܪܶܐ ܐܶܠܶܗ ܓ̥ܰܠܰܒܶܐ.“ ܘܐܡ݄ܪ ܠܶܗ ܠܶܗ ܝܶܫܽܘܥ: ”ܫܪܳܪܳܐ ܕ݄ܢ ܠܳܟ̥.“ 44ܘܡܰܒܪܰܡ ܠܶܗ ܦܳܬ̥ܶܗ ܠܰܐܦ ܗ̄ܺܝ ܐܰܢ̱ܬ̥ܬܳܐ ܘܐܡ݄ܪ ܠܶܗ ܠܫܶܡܥܽܘܢ: ”ܟܚܳܙܰܬ ܗ̄ܺܝ ܐܰܢ̱ܬ̥ܬܰܬ̥ܶܐ، ܐܳܢܳܐ ܥܰܒ݄ܪ ܐ̱ܢܳܐ ܠܽܗ̄ܘ ܒܰܝܬܰܝܕ̥ܳܟ̥، ܡܰܝ̈ܶܐ ܠܪ̈ܰܓ̥ܠܳܬ̥ܺܝ ܠܳܐ ܗܽܒ̥ ܠܳܟ̥ ܠܺܝ، ܐܶܠܳܐ ܗܰܬ̥ܶܐ ܒܰܕّܰܡܥ̈ܰܝܕ̥ܰܗ ܡܰܬܪܶܐ ܠܰܗ ܪ̈ܰܓ̥ܠܳܬ̥ܺܝ، ܘܒܽܗ̄ܘ ܣܰܥܪܰܝܕ̥ܰܗ ܡܟܰܦܪܺܝ ܠܰܗ. 45ܗܰܬ ܠܳܐ ܢܫ݄ܩ ܠܳܟ̥ ܠܺܝ، ܐܶܠܳܐ ܗܰܬ̥ܶܐ ܟܰܐܠܰܗ ܡܺܗ̄ܝ ܢܰܩܠܐ ܕܥܰܒܺܝܪܳܐ ܠܳܐ ܟܰܠܝܳܐ ܡܽܗ̄ܘ ܢܫܳܩܳܐ ܕܪ̈ܰܓ̥ܠܳܬ̥ܺܝ. 46ܗܰܬ ܡܶܫܚܳܐ ܠܪܺܝܫܺܝ ܠܳܐ ܡܫ݄ܚ ܠܳܟ̥، ܐܶܠܳܐ ܗܰܬ̥ܶܐ ܒܡܶܫܚܳܐ ܕܒܰܣܡܳܐ ܡܫ݄ܚ ܠܰܗ ܪ̈ܰܓ̥ܠܳܬ̥ܺܝ. 47ܡܰܗ̄ܘܟ̥ܰܐ ܟܳܐܡܰܪ ܐ̱ܢܳܐ ܠܳܟ̥: ܫܒܺܝܩܺܝ ܗ̄ܰܚ̈ܛܳܗܰܝܕ̥ܰܗ ܗ̄ܰܓّ̥ܰܠܰܒܶܐ ܥܰܠ ܕ݄ܪܚ݄ܡ ܠܰܗ ܓ̥ܰܠܰܒܶܐ. ܘܗܰܘܳܐ ܕ݄ܫܒܺܝܩ ܠܶܗ ܐ݄ܫܡܳܐ، ܐ݄ܫܡܳܐ ܟܪܳܚ݄ܡ.“ 48ܘܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܰܝܳܐ: ”ܫܒܺܝܩܺܝ ܗ̄ܰܚ̈ܛܳܗܰܝܕ̥ܰܟ̥.“ 49ܘ݄ܡܫܰܪܰܠّܶܗ ܗܰܢ݄ܟ ܕ݄ܣܡܺܝܟ̥ܺܝ ܐ݄ܡّܺܪ̱ܝ ܒܢܰܦܫ̈ܰܝّܶܗ: ”ܡܰܢܝܳܐ ܗܰܢܳܐ ܕܰܚܛܳܗ̈ܶܐ ܣܬܶܝ ܟܫܳܒ݄ܩ؟“ 50ܘܝܶܫܽܘܥ ܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܰܝܳܐ: ”ܗ̄ܺܝ ܗܰܝܡܳܢܽܘܬ̥ܰܝܕ̥ܰܟ̥ ܗܽܒ̥ ܠܰܗ ܠܰܟ̥ ܚܰܝ̈ܶܐ، ܙܶܠ ܒ݄ܫܠܳܡܳܐ.“
Currently Selected:
:
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation