ܡܓܰܠܝܘܢ ܕܠܘܩܐ 5
5
ܗ̄ܰܬّܰܠܡܺܝܕ̥̈ܶܐ ܩܰܕ̱ܡܳܝ̈ܶܐ ܕܝܶܫܽܘܥ
ܡܬܝ 4:18‐22؛ ܡܪܩܘܣ 1:16‐20
1ܘܗܰܘܺܝ، ܗ̄ܺܝ ܢܰܩܠܐ ܕܠܰܬܺܝܡܺܝ ܐܰܥܠܶܗ ܗ̄ܰܢ ܢܳܫ̈ܶܐ ܕܫ݄ܡܥܺܝ ܗ̄ܽܘ ܡܰܐܡܪܳܐ ܕܰܐܠܳܗܳܐ، ܘܗܺܝّܶܗ ܩܳܝܰܡ ܗ̄ܘܰܐ ܥܰܠ ܣܰܦ̊ܬܰܗ ܕܺܗ̄ܝ ܝܰܡܬ̥ܳܐ ܕܓܶܢܶܣܰܪ، 2ܚܙܶܐ ܠܶܗ ܬܰܪܬܶܝ ܣܦܺܝܢ̈ܶܐ ܟܰܠܝ̈ܶܐ ܥܰܠ ܗ̄ܽܘ ܓܰܒܳܐ ܕܺܗ̄ܝ ܝܰܡܬ̥ܳܐ، ܘܨܰܝܳܕ̈ܶܐ ܕܢܰܦܺܝܩܺܝ ܡ݄ܢّܶܗ، ܘܡܰܫܺܝܓ̥ܺܝ ܗ̄ܘܰܘ̱ ܗ̄ܰܡܨܺܝܕ̥̈ܳܬ̥ܰܬّ̥ܶܗ. 3ܘ݄ܚܕ̥ܳܐ ܡ݄ܢّܶܗ ܕܫܶܡܥܽܘܢ ܟܶܐܦܳܐ ܗ̄ܘܰܐ. ܘܝܶܫܽܘܥ ܣܰܠ݄ܩ ܝܰܬܽܒ̥ ܐܶܒܰܗ، ܘܰܐܒ݄ܥ ܕܡܰܪܚܩܺܝ ܠܰܗ ܐ݄ܫܡܳܐ ܡܺܗ̄ܝ ܐܰܪܥܳܐ ܠܰܡّܰܝ̈ܶܐ. ܘܝܳܬܰܒ̥ ܗ̄ܘܰܐ ܘܡܰܘܠܰܦ ܗ̄ܘܰܐ ܗ̄ܰܢ ܢܳܫ̈ܶܐ ܡܺܗ̄ܝ ܣܦܺܝܢ̱ܬܳܐ. 4ܘܺܗ̄ܝ ܢܰܩܠܐ ܕܟܰܠܺܝ ܡܽܗ̄ܘ ܡܰܐܡܪܰܝܕ̥ܶܗ، ܐܡ݄ܪ ܠܶܗ ܠܫܶܡܥܽܘܢ: ”ܩܠܰܥܽܘ ܠܰܐܦ ܗ̄ܽܘ ܥܽܘܡܩܳܐ، ܘ݄ܡܚܰܠܶܩܽܘ ܗ̄ܺܝ ܡܨܺܝܕ̥ܬ̥ܰܬ̥ܟ̥ܽܘ ܠܽܗ̄ܘ ܨܰܝܕܳܐ.“ 5ܡܰܕܥܰܪ ܠܶܗ ܫܶܡܥܽܘܢ ܘܐܡ݄ܪ ܠܶܗ ܠܶܗ: ”ܡܰܠܦܳܢܳܐ، ܒܰܛܺܝܠܺܝܢܰܐ ܗ̄ܽܘ ܠܰܠܝܳܐ ܟܽܘܠܶܗ، ܘܡܶܕܶܐ ܠܳܐ ܙܒ݄ܛ ܠܰܢ. ܐܶܠܳܐ ܥܰܠ ܗ̄ܽܘ ܡܰܐܡܪܰܝܕ̥ܳܟ̥ ܟ݄ܡܚܰܠܰܩ ܐ̱ܢܳܐ ܗ̄ܺܝ ܡܨܺܝܕ̥ܬܳܐ.“
6ܘܺܗ̄ܝ ܢܰܩܠܐ ܕܗܰܬ̥ܶܐ ܣ݄ܡّܶܗ، ܨ݄ܕّܶܗ ܢܽܘܢ̈ܶܐ ܓ̥ܰܠܰܒܶܐ ܓ̥ܰܠܰܒܶܐ، ܘܡ݄ܩܛܳܥܳܐ ܗ̄ܘܰܐ ܗ̄ܺܝ ܡܨܺܝܕ̥ܬ̥ܰܬّ̥ܶܗ. 7ܘ݄ܪܡ݄ܙّܶܗ ܠܰܚّܰܒ̥ܪ̈ܳܢܰܬّ̥ܶܗ ܕܒܺܗ̄ܝ ܣܦܺܝܢ̱ܬܳܐ ܚܪܶܬܳܐ ܕܳܐܬ̥݄ܢ ܡܥܰܕܪ݄ܢّܶܗ. ܘܺܗ̄ܝ ܢܰܩܠܐ ܕܰܐܬ̥݄ܢ ܡܠܰܠّܶܗ ܗ̄ܰܬّܰܪܬܶܝ ܣܦܺܝܢ̈ܶܐ ܗܳܠ ܕܩܰܪܺܝܒ̥ܺܝ ܕܛܳܒ̥ܥܺܝ (ܡ݄ܚܢܳܩܺܝ ܒܰܡّܰܝ̈ܶܐ). 8ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܫܶܡܥܽܘܢ ܟܶܐܦܳܐ، ܢܰܦ݄ܠ ܩ݄ܕ̱ܡ ܪ̈ܰܓ̥ܠܳܬ̥ܶܗ ܕܝܶܫܽܘܥ، ܘܐܡ݄ܪ ܠܶܗ ܠܶܗ: ”ܡܳܪܝ، ܟܳܐܒܰܥ ܐ̱ܢܳܐ ܡܶܢܳܟ̥: ܪܚܰܩ ܡܶܢܺܝ، ܥܰܠ ܕܟ݄ܬ ܐ̱ܢܳܐ ܓܰܒ̥ܪܳܐ ܚܰܛܳܝܳܐ،“ 9ܡܺܐܝܕ̥ܶܗ ܕ݄ܡܕܰܘܡܰܪ ܗ̄ܘܰܐ، ܘܟܽܘܠّܶܗ ܕܰܐܥܡܶܗ ܥܰܠ ܗ̄ܽܘ ܨܰܝܕܰܘܳܐ ܕܰܗ̄ܢ ܢܽܘܢ̈ܶܐ ܕܨ݄ܕّܶܗ. 10ܘܗܰܘܟ̥ܰܐ ܣܬܶܝ ܠܝܰܥܩܽܘܒ ܘ݄ܠܝܽܘܚܰܢܳܢ، ܗ̄ܰܢ ܐܰܒܢ̈ܶܐ ܕܙܰܒܕܰܝ، ܕܟ݄ܬ ܗ̄ܘܰܝ ܢܶܝ ܫܰܘܬܳܦ̈ܶܐ (ܫܳܪ̈ܺܝܟܶܐ) ܕܫܶܡܥܽܘܢ. ܘܝܶܫܽܘܥ ܐܡ݄ܪ ܠܶܗ ܠܫܶܡܥܽܘܢ: ”ܠܳܐ ܙܰܝܥ݄ܬ، ܡܳܐܥܕܳܐ ܢܳܫ̈ܶܐ ܓܨܰܝܕܰܬ ܠܰܚّܰܝ̈ܶܐ.“ 11ܘ݄ܡܩܰܪܰܒّ̥ܶܗ ܗ̄ܰܣܦܺܝܢ̈ܶܐ ܠܺܗ̄ܝ ܐܰܪܥܳܐ، ܘ݄ܛܪܰܠّܶܗ ܟܽܘܠ ܡܶܕܶܐ ܘܰܐܙّ݄ܢ ܒ݄ܬ̥ܪܶܗ.
ܝܶܫܽܘܥ ܟܡܰܢ݄ܚ (ܡܕܰܟܶܐ) ܓܰܪܒ̥ܳܢܳܐ
ܡܬܝ 8:1‐4؛ ܡܪܩܘܣ 1:40‐45
12ܘܺܗ̄ܝ ܢܰܩܠܐ ܕܟ݄ܬ ܗ̄ܘܰܐ ܝܶܫܽܘܥ ܒ݄ܚܕ̥ܳܐ ܡܰܢ̱ ܡܕ̥ܺܝ̈ܢܳܬ̥ܳܐ، ܐܰܬ̥ܺܝ ܓܰܒ̥ܪܳܐ ܡܰܠܝܳܐ ܟܽܘܠܶܗ ܓܰܪܒ̥ܳܐ. ܚܙܶܐ ܠܶܗ ܝܶܫܽܘܥ ܘܢܰܦ݄ܠ ܥܰܠ ܦܳܬ̥ܶܗ ܘܳܐܒܰܥ ܗ̄ܘܰܐ ܡܶܢܶܗ، ܘܐܡ݄ܪ ܠܶܗ ܠܶܗ: ”ܡܳܪܝ، ܐܶܢ ܟ݄ܐܒܥܰܬ، ܟܺܝܒܳܟ̥ ܡܕܰܟ݄ܬ ܠܺܝ (ܡܰܢܺܝܚ݄ܬ ܠܺܝ).“ 13ܘܝܶܫܽܘܥ ܦܫ݄ܛ ܠܶܗ ܐܺܝܕ̥ܶܗ، ܓ݄ܫ ܠܶܗ ܐܶܒܶܗ، ܘܐܡ݄ܪ ܠܶܗ ܠܶܗ: ”ܟܳܐܒܰܥ ܐ̱ܢܳܐ، ܗܘܰܝ ܕܰܟ̥ܝܳܐ (ܛܪܳܐ ܢܳܝܰܚ ܠܳܟ̥).“ ܘܒܺܗ̄ܝ ܫܳܥܬ̥ܰܝܕ̥ܰܗ ܐܰܙّܶܗ ܡܶܢܶܗ ܗ̄ܽܘ ܓܰܪܒ̥ܰܝܕ̥ܶܗ ܘ݄ܡܕܰܟܶܐ. 14ܘܦܽܘܩܕܳܢܳܐ ܗܽܒ̥ ܠܶܗ ܠܶܗ ܘܐܡ݄ܪ ܠܶܗ: ”ܠܢܳܫܳܐ ܠ݄ܐ ܐܡّܰܪ̱ܬ، ܐܶܠܳܐ ܙܳܟ̥ ܡܰܚܘܰܝ ܪܽܘܚܳܟ̥ ܠܰܟّܳܗ̈ܢܶܐ، ܘ݄ܡܩܰܪܽܒ̥ ܩܽܘܪܒܳܢܳܐ ܡܶܢ̱ ܚܠܳܦ ܕܰܐܙّܶܗ ܡܶܢܳܟ̥ ܗ̄ܽܘ ܓܰܪܒ̥ܳܐ، ܐܟ̥ ܕܽܗ̄ܘ ܦܽܘܩܕܳܢܳܐ ܕܡܽܘܫܶܐ، ܕܳܗ̄ܘܝܳܐ ܣܳܗܕܽܘܬ̥ܳܐ ܐܰܠّܶܗ.“ 15ܘܙ݄ܕ ܢܰܦ݄ܩ ܐܰܥܠܶܗ ܛܶܒܳܐ، ܘܥܰܡܳܐ ܓ̥ܰܠܰܒܶܐ ܠܳܬܰܡ ܗ̄ܘܰܐ ܕܫܳܡ݄ܥ ܡܶܢܶܗ ܘܠܰܫܰܢ ܕܢܳܝܰܚّܶܗ ܡܰܢ̱ ܟّܶܐܒ̥̈ܰܬّ̥ܶܗ. 16ܘܗܺܝّܶܗ ܐ݄ܙّܶܗ ܗ̄ܘܰܐ ܠܽܗ̄ܘ ܡܰܕ̥ܒܪܳܐ ܘ݄ܡܨܰܠܶܐ ܗ̄ܘܰܐ.
ܝܶܫܽܘܥ ܟܫܳܒ݄ܩ ܚܛܳܗ̈ܶܐ ܘ݄ܟܡܰܚ݄ܨ ܡܫܰܪ̈ܝܶܐ
ܡܬܝ 9:1‐8؛ ܡܪܩܘܣ 2:1‐12
17ܘ݄ܒܚܰܕ̱ ܡܰܢ̱ ܝّܰܘܡ̈ܶܐ، ܘܝܶܫܽܘܥ ܡܰܘܠܰܦ ܗ̄ܘܰܐ، ܦܪ̈ܺܝܫܶܐ ܘܡܰܠܦܳܢ̈ܶܐ ܕܽܗ̄ܘ ܢܳܡܽܘܣܳܐ ܝܳܬܒ̥ܺܝ ܗ̄ܘܰܘ̱، ܐܰܬ̥݄ܢ ܗ̄ܘܰܘ̱ ܡܰܢ̱ ܩّ݄ܪ̈ܝܰܘܳܬ̥ܳܐ ܟܽܘܠّܶܗ ܕܽܗ̄ܘ ܓܠܺܝܠܳܐ ܘܕܺܝܗܽܘܕ̥ ܘܕܽܐܘܪܶܫܠܶܡ. ܘܽܗ̄ܘ ܚܰܝܠܳܐ ܕܡܳܪܝܳܐ ܟ݄ܬ ܗ̄ܘܰܐ ܕܡܰܢ݄ܚّܶܗ. 18ܘܢܳܫ̈ܶܐ ܡܰܝܬܰܠّܶܗ ܒ̈ܰܓّܰܠܶܐ ܓܰܒ̥ܪܳܐ ܚܰܕ̱ ܡܫܰܪܝܳܐ (ܡܪܰܝܚܳܐ)، ܘ݄ܐܒܥܺܝ ܗ̄ܘܰܘ̱ ܕܥܳܒܪܺܝ ܡܰܚܬܺܝ ܠܶܗ ܩܽܘܕ̱ܡܶܗ (ܕܝܶܫܽܘܥ). 19ܘܺܗ̄ܝ ܢܰܩܠܐ ܕܠܳܐ ܚܙܰܠّܶܗ ܕܰܐܝܕܰܪܒܳܐ ܡܰܥܒܪܺܝ ܠܶܗ ܡܽܗ̄ܘ ܥܰܡܳܐ ܓ̥ܰܠܰܒܶܐ، ܣܰܠܺܝܩܺܝ ܠܺܗ̄ܝ ܓܳܪܳܐ، ܘ݄ܡܛܰܘܛܰܚّܶܗ ܥܰܡ ܗ̄ܰܓّܰܠܰܝ̈ܕ̥ܶܗ ܡܽܗ̄ܘ ܩܛܳܪܳܐ ܠܽܗ̄ܘ ܦܰܠܓܳܐ ܩܽܘܕ̱ܡܶܗ ܕܝܶܫܽܘܥ. 20ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܝܶܫܽܘܥ ܗ̄ܺܝ ܗܰܝܡܳܢܽܘܬ̥ܰܬّ̥ܶܗ، ܐܡ݄ܪ ܠܶܗ ܠܽܗ̄ܘ ܡܫܰܪܝܰܘܳܐ: ”ܓܰܒ̥ܪܳܐ، ܫܒܺܝܩܺܝ ܗ̄ܰܚ̈ܛܳܗܰܝܕ̥ܳܟ̥.“ 21ܘܰܣّܳܦܪ̈ܶܐ ܘܰܦܪ̈ܺܝܫܶܐ ܡܫܰܪܰܠّܶܗ ܕܚܳܫܒ̥ܺܝ ܠܰܗ (ܒܠܶܒܰܝّܶܗ) ܘ݄ܐܡّܺܪ̱ܝ: ”ܡܰܢܝܳܐ ܗܰܢܳܐ ܕܟܳܡ݄ܫܓ̥݄ܠ ܓܽܘܕܳܦܳܐ؟ ܘܡܰܢ ܟܺܝܒܶܗ ܕܫܳܒ݄ܩ ܗ̄ܰܚܛܳܗ̈ܶܐ ܐܶܠܳܐ ܐܰܠܳܗܳܐ ܒܶܠܚܽܘܕ̥ܶܗ؟“ 22ܘܝܶܫܽܘܥ ܐܰܕ̥݄ܥ ܡ݄ܢ ܟܚ݄ܫܒ̥ܺܝ ܒܠܶܒܰܝّܶܗ، ܘܡܰܕܥܰܪ ܠܶܗ ܘܐܡ݄ܪ ܠܰܗ ܠّܶܗ: ”ܡ݄ܢܝܳܐ ܕܟܳܚ݄ܫܒ̥ܺܝܬܽܘ ܒܠܶܒܰܝܟ̥ܽܘ؟ 23ܐܰܝܢܰܐ ܙ݄ܕ ܦܫܺܝܩܳܐ ܕܳܐܡ݄ܪ: ’ܫܒܺܝܩܺܝ ܗ̄ܰܚ̈ܛܳܗܰܝܕ̥ܳܟ̥؟‘ ܐܰܘ ܕܳܐܡ݄ܪ: ’ܩܘܿܡ ܡܗܰܠ݄ܟ̥؟‘ 24ܐܶܠܳܐ ܠܰܫܰܢ ܕ݄ܐܕ̥ܥܺܝܬܽܘ ܕܰܐܒܪܶܗ ܕܢܳܫܳܐ ܟ݄ܬ ܠܶܗ ܫܽܘܠܛܳܢܳܐ ܒܺܗ̄ܝ ܐܰܪܥܳܐ ܕܫܳܒ݄ܩ ܗ̄ܰܚܛܳܗ̈ܶܐ،“ ܐܡ݄ܪ ܠܶܗ ܠܽܗ̄ܘ ܡܫܰܪܝܳܐ: ”ܩܘܿܡ، ܛܥܰܢ ܗ̄ܰܓّܰܠܰܝ̈ܕ̥ܳܟ̥ ܘܙܳܟ̥ ܠܽܗ̄ܘ ܒܰܝܬܰܝܕ̥ܳܟ̥.“ 25ܘܡܶܚܕ̥ܳܐ ܩܰܝ݄ܡ ܩ݄ܕ̱ܡ ܥܰܝܢ̈ܳܬ̥ܰܝّܶܗ، ܘ݄ܛܥ݄ܢ ܠܶܗ ܗ̄ܰܓّܰܠܰܝ̈ܕ̥ܶܗ، ܘܰܐܙّܶܗ ܠܽܗ̄ܘ ܒܰܝܬܰܝܕ̥ܶܗ، ܘܗܺܝّܶܗ ܟ݄ܡܫܰܒ݄ܚ ܠܰܐܠܳܗܳܐ. 26ܘܟܽܘܠ ܢܳܫܳܐ ܡܕܰܘܡ݄ܪ، ܘ݄ܡܫܰܒܚܺܝ ܗ̄ܘܰܘ̱ ܠܰܐܠܳܗܳܐ، ܘ݄ܡܠ݄ܢ ܙܽܘܥܬ̥ܳܐ، ܘ݄ܐܡّܺܪ̱ܝ ܗ̄ܘܰܘ̱: ”ܐܰܕܝܰܘܡܰܐ ܚܙܶܐ ܠܰܢ ܬܶܕ݄ܡܪ̈ܳܬ̥ܳܐ.“
ܝܶܫܽܘܥ ܟܩܳܪܶܐ ܠܠܶܘܺܝ ܡܰܬܰܝ
ܡܬܝ 9:9‐13؛ ܡܪܩܘܣ 2:13‐17
27ܒ݄ܬ̥݄ܪ ܡܰܗ̄ܢܺܝ، ܢܰܦ݄ܩ ܝܶܫܽܘܥ ܘ݄ܚܙܶܐ ܠܶܗ ܡܳܟ̥ܣܳܐ ܕ݄ܐܫܡܶܗ ܠܶܘܺܝ، ܝܰܬܺܝܒ̥ܳܐ ܒܒܶܝܬ̥ ܡܳܟ̥ܣ̈ܶܐ، ܘܐܡ݄ܪ ܠܶܗ ܠܶܗ: ”ܬܳܟ̥ ܒ݄ܬ̥ܪܺܝ.“ 28ܘ݄ܛܪܶܐ ܠܶܗ ܟܽܘܠ ܡܶܕܶܐ ܘܩܰܝ݄ܡ ܐܰܙّܶܗ ܒ݄ܬ̥ܪܶܗ. 29ܘܠܶܘܺܝ ܣ݄ܡ ܠܶܗ ܩܽܘܒܳܠܳܐ (ܚܫܰܡܬܳܐ) ܪܰܒܳܐ ܒܽܗ̄ܘ ܒܰܝܬܰܝܕ̥ܶܗ، ܘܟ݄ܬ ܗ̄ܘܰܐ ܢܳܫ̈ܶܐ ܓ̥ܰܠܰܒܶܐ ܡܰܢ̱ ܡّܳܟ̥ܣ̈ܶܐ ܘܡܰܢ̱ ܚܪ̈ܶܢܶܐ ܝܰܬܺܝܒ̥̈ܶܐ ܐܰܥܡܰܝّܶܗ. 30ܘ݄ܡܛܰܪܛܡܺܝ ܗ̄ܘܰܘ̱ ܗ̄ܰܣّܳܦܪ̈ܶܐ ܘܰܦܪ̈ܺܝܫܶܐ ܘ݄ܐܡّܺܪ̱ܝ ܗ̄ܘܰܘ̱ ܠܰܬّܰܠܡܺܝܕ̥̈ܰܝܕ̥ܶܗ: ”ܠܡ݄ܢ ܥܰܡ ܗ̄ܰܡّܳܟ̥ܣ̈ܶܐ ܘܰܚّܰܛܳܝ̈ܶܐ ܟ݄ܐܟ̥ܠܺܝܬܽܘ ܘ݄ܟܫܳܬܺܝܬܽܘ؟“ 31ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܠܳܐ ܟܳܐܒ݄ܥ ܐܳܣܝܳܐ ܠܰܗ̄ܢ ܢܰܝܺܝܚ̈ܶܐ، ܐܶܠܳܐ ܠܰܐܝܢܰܐ ܕܟ݄ܬܢܶܝ ܟܰܐܺܝܒ̥̈ܶܐ ܟܰܐܺܝܒ̥̈ܶܐ. 32ܐܳܢܳܐ ܠܰܐ ܐܬ̥ܺܝ ܐ̱ܢܳܐ ܕܩܳܪܶܐ ܐ̱ܢܳܐ ܠܙܰܕ̈ܺܝܩܶܐ ܐܶܠܳܐ ܠܚܰܛܳܝ̈ܶܐ ܠܺܗ̄ܝ ܬܝܳܒܽܘܬ̥ܳܐ.“
ܐܶܡܰܐ ܟܨܰܝܡܺܝ ܗ̄ܰܬّܰܠܡܺܝܕ̥̈ܶܐ؟
ܡܬܝ 9:14‐17؛ ܡܪܩܘܣ 2:18‐22
33ܘܗ݄ܢّܶܝ ܐ݄ܡّܺܪ̱ܝ ܗ̄ܘܰܝ ܠܶܗ: ”ܠܡ݄ܢ ܗ̄ܰܬّܰܠܡܺܝܕ̥̈ܶܐ ܕܝܽܘܚܰܢܳܢ ܘܕܰܦܪ̈ܺܝܫܶܐ ܟܽܘܠ ܢܰܩܠܐ ܟܨܰܝܡܺܝ ܘܟ݄ܡܨܰܠ݄ܢ، ܐܶܠܳܐ ܗ̄ܰܬّܰܠܡܺܝܕ̥̈ܰܝܕ̥ܳܟ̥ ܟ݄ܐܟ̥ܠܺܝ ܘ݄ܟܫܳܬ݄ܢ.“ 34ܘܗܺܝّܶܗ ܐܡ݄ܪ ܠܰܗ ܠّܶܗ: ”ܠܰܒܟ̥ܽܘ ܛܳܪܺܝܬܽܘ ܗ̄ܰܢ ܢܳܫ̈ܶܐ ܕܺܗ̄ܝ ܡ݄ܫܬܽܘܬ̥ܳܐ ܕܨܰܝܡܺܝ ܡ݄ܩܰܐ ܕܟ݄ܬ ܝܳܐ ܗ̄ܽܘ ܚܰܬ̥ܢܳܐ ܐܰܥܡܰܝّܶܗ. 35ܐܶܠܳܐ ܓܕܳܐܬ̥݄ܢ ܝܰܘܡ̈ܶܐ، ܗ̄ܺܝ ܢܰܩܠܐ ܕܡܺܝܡ݄ܕ ܗ̄ܽܘ ܚܰܬ̥ܢܳܐ ܡ݄ܢّܶܗ، ܒܰܝّܰܘܡ̈ܳܬ̥ܰܢ݄ܟ ܓܨܰܝܡܺܝ.“ 36ܘܐܡ݄ܪ ܠܰܗ ܠّܶܗ ܡܰܬ̥ܠܳܐ: ”ܢܳܫܳܐ ܠ݄ܐ ܟܩܳܛ݄ܥ ܪܽܘܩܥܳܐ ܡܶܢ̱ ܠܒܽܘܫܳܐ ܚܰܕ̱ܬ̥ܳܐ ܘܡܰܚ݄ܬ ܠܰܗ ܥܰܠ ܠܒܽܘܫܳܐ ܒܰܝܺܝܩܳܐ، ܕܠܳܐ ܩܳܛ݄ܥ ܗ̄ܽܘ ܚܰܕ̱ܬ̥ܳܐ، ܘܽܗ̄ܘ ܒܰܝܺܝܩܳܐ ܠ݄ܐ ܟܠܳܚܰܡ ܠܶܗ ܗ̄ܺܝ ܪܽܘܩܥܳܐ ܕܡܽܗ̄ܘ ܚܰܕ̱ܬ̥ܳܐ. 37ܘܠܳܐ ܢܳܫܳܐ ܡܳܠܶܐ ܚܰܡܪܳܐ ܚܰܕ̱ܬ̥ܳܐ ܒܓܰܘܕ̈ܶܐ ܒܰܝܺܝܩ̈ܶܐ، ܘܶܐܠܳܐ ܗ̄ܽܘ ܚܰܡܪܳܐ ܚܰܕ̱ܬ̥ܳܐ ܟܢܳܩܽܒ̥ ܗ̄ܰܓّܰܘܕ̈ܶܐ، ܘܽܗ̄ܘ ܚܰܡܪܳܐ ܟܡܺܝܒ݄ܙ، ܘܰܓّܰܘܕ̈ܶܐ ܟܚ݄ܪܒ̥ܺܝ. 38ܐܶܠܳܐ ܗ̄ܽܘ ܚܰܡܪܳܐ ܚܰܕ̱ܬ̥ܳܐ ܟܡ݄ܡܠܶܐ ܒܓܰܘܕ̈ܶܐ ܚܰܕ̱̈ܬ̥ܶܐ؛ (ܘܗܰܘܟ̥ܰܐ) ܗ̄ܰܬܪ̈ܰܝّܶܗ ܟܡ݄ܢܛܳܪܺܝ. 39ܘܠܳܐ ܢܳܫܳܐ ܟܫܳܬܶܐ ܚܰܡܪܳܐ ܥܰܬܺܝܩܳܐ ܘܡܶܚܕ̥ܳܐ ܟܳܐܒ݄ܥ ܚܰܡܪܳܐ ܚܰܕ̱ܬ̥ܳܐ، ܥܰܠ ܓܕܳܐܡ݄ܪ ܗ̄ܽܘ ܚܰܡܪܳܐ ܥܰܬܺܝܩܳܐ ܒܰܣ݄ܡ ܝܳܐ.“
Currently Selected:
ܡܓܰܠܝܘܢ ܕܠܘܩܐ 5: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
