ܡܓܰܠܝܘܢ ܕܠܘܩܐ 15

ܡܫܺܝܚܳܐ ܟܡܰܩܒ݄ܠ ܗ̄ܰܚّܰܛܳܝ̈ܶܐ

ܗ̄ܽܘ ܡܰܬ̥ܠܳܐ ܕܽܗ̄ܘ ܦܰܪܳܐ ܡܣܰܟܪܳܐ

ܡܬܝ 18‏:12‏‐14

1ܗ̄ܰܡّܳܟ̥ܣ̈ܶܐ ܘܰܚّܰܛܳܝ̈ܶܐ ܡܩܰܕܡܺܝ ܗ̄ܘܰܘ̱ ܠܣܺܝܕ̥ܶܗ ܕܫ݄ܡܥܺܝ ܠܶܗ. 2ܘܰܣّܳܦܪ̈ܶܐ ܘܰܦܪ̈ܺܝܫܶܐ ܡܛܰܪܛܡܺܝ ܗ̄ܘܰܘ̱ ܘ݄ܐܡّܺܪ̱ܝ ܗ̄ܘܰܘ̱: ”ܗܰܢܳܐ ܟܡܰܩܒ݄ܠ ܠܰܚّܰܛܳܝ̈ܶܐ ܘܟܳܐܟ̥݄ܠ ܐܰܥܡܰܝّܶܗ.“ 3ܘܝܶܫܽܘܥ ܐܡ݄ܪ ܠܰܗ ܠّܶܗ ܗ̄ܽܘ ܡܰܬ̥ܠܰܢܳܐ: 4”ܡܰܢܝܳܐ ܓܰܒ̥ܪܳܐ ܡ݄ܢܟ̥ܽܘ ܕܟ݄ܬ ܠܶܗ ܡܳܐܐ ܦܰܪ̈ܶܐ، ܘ݄ܕܡܺܝܣܰܟ݄ܪ ܚܰܕ̱ ܡ݄ܢّܶܗ ܠ݄ܐ ܟܛܳܪܶܐ ܗ̄ܰܬّ݄ܫܥܳܐ ܘܬ݄ܫܥܺܝ ܒܽܗ̄ܘ ܡܰܕ̥ܒܪܳܐ ܘܟ݄ܐܙّܶܗ ܟܳܪ݄ܟ̥ ܥܰܠ ܗܰܘܳܐ ܕ݄ܡܣܰܟ݄ܪ ܗܳܠ ܕܚܳܙܶܐ ܠܶܗ؟ 5ܘܡ݄ܐ ܕ݄ܚܙܶܐ ܠܶܗ ܟܡ݄ܦܨ݄ܚ ܘ݄ܟܛܳܥܰܢ ܠܶܗ ܥܰܠ ܟܰܬܦ̈ܳܬ̥ܶܗ، 6ܘܟܳܐܬ̥ܶܐ ܠܽܗ̄ܘ ܒܰܝܬܰܝܕ̥ܶܗ، ܘ݄ܟܩܳܪܶܐ ܠܰܪّܳܚ̈ܡܰܝܕ̥ܶܗ ܘܠܰܫܒܳܒ̈ܰܝܕ̥ܶܗ ܘܳܐܡܰܪّܶܗ: ܡ݄ܦܨܶܚܽܘ ܐܰܥܡܺܝ ܥܰܠ ܕ݄ܚܙܶܐ ܠܺܝ ܗ̄ܽܘ ܦܰܪܰܝܕ̥ܺܝ ܕ݄ܡܣܰܟܰܪ ܗ̄ܘܰܐ. 7ܟܳܐܡܰܪ ܐ̱ܢܳܐ ܠܟ̥ܽܘ: ܗܰܘܟ̥ܰܐ ܓܕܽܗ̄ܘܝܳܐ ܦܨܺܝܚܽܘܬ̥ܳܐ ܒܺܗ̄ܝ ܫܡܰܝܳܐ ܥܰܠ ܚܰܕ̱ ܚܰܛܳܝܳܐ ܕܬܳܝ݄ܒ ܙ݄ܕ ܡܰܢ̱ ܬّ݄ܫܥܳܐ ܘܬ݄ܫܥܺܝ ܙܰܕ̈ܺܝܩܶܐ ܕܠ݄ܐ ܟܳܐܒܰܥّܶܗ ܬܝܳܒܽܘܬ̥ܳܐ.“

ܡܰܬ̥ܠܳܐ ܕܽܗ̄ܘ ܙܽܘܙܳܐ ܡܣܰܟܪܳܐ

8”ܐܰܘ ܐܰܝܢܰܐ ܐܰܢ̱ܬ̥ܬܳܐ ܝܳܐ ܕܟ݄ܬ ܠܰܗ ܥܰܣܪܳܐ ܙܽܘܙ̈ܶܐ، ܘ݄ܡܣܰܟܪܳܐ ܚܰܕ̱ ܡ݄ܢّܶܗ، ܘܠܳܐ ܡܰܢܗܪܳܐ ܗ̄ܺܝ ܫܪܳܓ̥ܳܐ ܘܟܳܢܫܳܐ ܗ̄ܽܘ ܒܰܝܬܳܐ ܘܟ݄ܪܟ̥ܳܐ ܐܰܥܠܶܗ ܛܳܒ̥ܳܐ ܛܳܒ̥ܳܐ ܗܳܠ ܕܚܳܙܝܳܐ ܠܶܗ. 9ܘܡ݄ܐ ܕ݄ܚܙܶܐ ܠܰܗ ܟܩܳܪܝܳܐ ܠܰܪّܳܚ̈ܡܰܝܕ̥ܰܗ ܘܠܰܫܒܳܒ̈ܰܝܕ̥ܰܗ ܘܟܳܐܡّܳܪ̱ܐ: ܡ݄ܦܨܶܚܽܘ ܐܰܥܡܺܝ ܥܰܠ ܕ݄ܚܙܶܐ ܠܺܝ ܗ̄ܽܘ ܙܽܘܙܰܝܕܺܝ ܕ݄ܡܣܰܟܰܪ ܗ̄ܘܰܐ. 10ܟܳܐܡܰܪ ܐ̱ܢܳܐ ܠܟ̥ܽܘ: ܗܰܘܟ̥ܰܐ ܓܕܽܗ̄ܘܝܳܐ ܦܨܺܝܚܽܘܬ̥ܳܐ ܩ݄ܕ̱ܡ ܗ̄ܰܡّܰܠܰܐܟ̥̈ܶܐ ܕܰܐ‌ܠܳܗܳܐ ܥܰܠ ܚܰܕ̱ ܚܰܛܳܝܳܐ ܕܬܳܝ݄ܒ.“

ܗ̄ܽܘ ܡܰܬ̥ܠܳܐ ܕܽܗ̄ܘ ܐܰܒܪܳܐ ܛܰܥܝܳܐ

11ܘܕܰܥ݄ܪ ܝܶܫܽܘܥ ܐܡ݄ܪ ܠܰܗ ܠّܶܗ: ”ܟ݄ܬ ܗ̄ܘܰܐ ܠܚܰܕ̱ ܓܰܒ̥ܪܳܐ ܬܪܶܝ ܐܰܒܢ̈ܶܐ. 12ܘܽܗ̄ܘ ܐܰܒܪܰܝܕ̥ܶܗ ܗ̄ܽܘ ܙܥܽܘܪܳܐ ܐܡ݄ܪ ܠܶܗ ܠܶܗ: ܒܰܒܺܝ، ܗܰܒ̥ ܠܺܝ ܗ̄ܺܝ ܦܳܠܓܽܘܬ̥ܳܐ ܕ݄ܟܡܳܛܝܳܐ ܠܺܝ ܡܽܗ̄ܘ ܒܰܝܬܰܝܕ̥ܳܟ̥. ܘ݄ܦܠ݄ܓ̥ ܠܶܗ ܗ̄ܽܘ ܩܶܢܝܳܢܰܝܕ̥ܶܗ ܒܰܝܢܳܬ̥ܰܝّܶܗ. 13ܘܒ݄ܬ̥݄ܪ ܟܡܳܐ ܝܰܘܡ̈ܶܐ، ܡܟܰܢܰܫ ܠܶܗ ܗ̄ܽܘ ܐܰܒܪܳܐ ܙܥܽܘܪܳܐ ܟܽܘܠ ܡܶܕܶܐ ܕܡܰܛܺܝ ܠܶܗ، ܘܰܐܙّܶܗ ܠܰܐܬ̥ܪܳܐ ܪܰܚܽܘܩܳܐ. ܘܬܰܡܳܐ ܡܒܰܪܒܰܙ ܠܶܗ ܗ̄ܽܘ ܩܶܢܝܳܢܰܝܕ̥ܶܗ ܕܠܳܐ ܚܫܳܒ̥ܳܐ ܒܚܰܝ̈ܶܐ ܒܰܛܺܝ̈ܠܶܐ. 14ܘܺܗ̄ܝ ܢܰܩܠܐ ܕܡܰܬ݄ܡ ܠܶܗ ܟܽܘܠ ܡܶܕܶܐ ܕܟ݄ܬ ܗ̄ܘܰܝ ܠܶܗ، ܗܰܘܺܝ ܟܰܦܢܳܐ ܪܰܒܳܐ ܒܽܗ̄ܘ ܐܰܬ̥ܪܰܘܳܐ، ܘ݄ܡܫܰܪܶܐ ܕܢܳܩ݄ܨ ܐܰܥܠܶܗ. 15ܘܰܐܙّܶܗ ܡܰܛܺܝ ܠܚܰܕ̱ ܡܰܗ̄ܢ ܐܰܒܢ̈ܶܐ ܕܺܗ̄ܝ ܡܕ̥ܺܝܢ̱ܬܳܐ ܕܽܗ̄ܘ ܐܰܬ̥ܪܰܘܳܐ. ܘܗܺܝّܶܗ ܡܫܰܕܰܪ ܠܶܗ ܠܚܰܩܠܳܐ ܕܡܰܪܥܶܐ ܚܙܺܝܪ̈ܶܐ. 16ܘܪܳܝܰܓ ܗ̄ܘܰܐ ܕܡܳܠܶܐ ܓܰܘܶܗ ܡܰܢ̱ ܚّܰܪ̈ܢܽܘܒ̥ܶܐ، ܗܰܢ݄ܟ ܕܳܐܟ̥ܠܺܝ ܗ̄ܘܰܘ̱ ܗ̄ܰܚܙܺܝܪ̈ܶܐ، ܘܢܳܫܳܐ ܠܳܐ ܗ̄ܳܒܶܐ ܗ̄ܘܰܝ ܠܶܗ. 17ܘܺܗ̄ܝ ܢܰܩܠܐ ܕܕܰܥ݄ܪ ܠܢܰܦܫܶܗ (ܘܰܐܬ̥ܺܝ ܗܰܘܢܶܗ ܠܪܺܝܫܶܗ) ܐܡ݄ܪ ܠܶܗ: ܟܡܳܐ ܐܰܓ̥ܺܝܪ̈ܶܐ ܟܺܝܬ ܒܽܗ̄ܘ ܒܰܝܬܳܐ ܕܒܰܒܺܝ ܕܟܳܙܳܝ݄ܕ ܗ̄ܽܘ ܠܰܚܡܳܐ ܩܽܘܕ̱ܡܰܝّܶܗ، ܘܳܐܢܳܐ ܗܰܪܟܶܐ ܟܡܳܝܰܬ̥ ܐ̱ܢܳܐ ܡܽܗ̄ܘ ܟܰܦܢܳܐ. 18ܓ݄ܕܩܳܝܰܡ ܐ̱ܢܳܐ ܘ݄ܐܙّܺܝ ܐ̱ܢܳܐ ܠܓܰܒ ܒܰܒܺܝ ܘܳܐܡܰܪ ܐ̱ܢܳܐ ܠܶܗ: ܒܰܒܺܝ، ܚܰܛܺܝ ܐ̱ܢܳܐ ܒܺܗ̄ܝ ܫܡܰܝܳܐ ܘܩܽܘܕ̱ܡܳܟ̥، 19ܘܡܳܐܥܕܳܐ ܠ݄ܐ ܟܫܳܘܶܐ ܐ̱ܢܳܐ ܕܡ݄ܩܪܶܐ ܐ̱ܢܳܐ ܗ̄ܽܘ ܐܰܒܪܰܝܕ̥ܳܟ̥ ܣܘ̇ܡ ܠܺܝ ܐܟ̥ ܕܚܰܕ̱ ܡܰܢ̱ ܥّܰܒ̥ܳܕ̈ܰܝܕ̥ܳܟ̥. 20ܘܩܰܝ݄ܡ ܐܰܬ̥ܺܝ ܠܓܰܒ ܗ̄ܽܘ ܒܰܒܳܐ. ܘܗܶܫ ܗܺܝّܶܗ ܪܰܚܽܘܩܳܐ، ܗ̄ܽܘ ܒܰܒܳܐ ܚܙܶܐ ܠܶܗ، ܘܡܰܪܚܰܡ ܠܶܗ ܐܰܥܠܶܗ، ܘܪܰܗ݄ܛ ܢܰܦ݄ܠ ܥܰܠ ܩܕ̥ܳܠܶܗ ܘ݄ܢܫ݄ܩ ܠܶܗ. 21ܘܽܗ̄ܘ ܐܰܒܪܳܐ ܐܡ݄ܪ ܠܶܗ ܠܶܗ: ’ܒܰܒܺܝ، ܚܰܛܺܝ ܐ̱ܢܳܐ ܒܺܗ̄ܝ ܫܡܰܝܳܐ ܘܩܽܘܕ̱ܡܳܟ̥، ܘܠ݄ܐ ܟܫܳܘܶܐ ܐ̱ܢܳܐ ܕܡ݄ܩܪܶܐ ܐ̱ܢܳܐ ܗ̄ܽܘ ܐܰܒܪܰܝܕ̥ܳܟ̥.‘ 22ܐܶ‌ܠܳܐ ܗ̄ܽܘ ܒܰܒܳܐ ܐܡ݄ܪ ܠܶܗ ܠܰܓܪ̈ܶܝܥܰܝܕ̥ܶܗ: ’ܡܰܘܦܶܩܽܘ ܗ̄ܽܘ ܠܒܽܘܫܳܐ ܫܰܦܺܝܪܳܐ ܘܡܰܠܒ̥ܶܫܽܘ ܠܶܗ، ܘܡܰܚܶܬܽܘ ܥܙܰܩܬܳܐ ܒܺܐܝܕ̥ܶܗ، ܘ݄ܡܣܳܢ̈ܶܐ ܒܪ̈ܰܓ̥ܠܳܬ̥ܶܗ. 23ܘܡܰܝܬܰܝܽܘ ܢܚܰܪܽܘ ܗ̄ܽܘ ܬܰܘܪܳܐ ܬܰܩܺܝܢܳܐ، ܘܳܐܟ̥ܠܺܝܢܰܐ ܘܡܺܝܒܰܣܡܺܝܢܰܐ، 24ܥܰܠ ܕܽܗ̄ܘ ܐܰܒܪܰܝܕ̥ܺܝ ܗܰܢܳܐ ܡܺܝܬ̥ܳܐ ܗ̄ܘܰܐ ܘܰܐܬ̥ܺܝ ܠܰܚّܰܝ̈ܶܐ، ܘ݄ܡܣܰܟܪܳܐ ܗ̄ܘܰܐ ܘ݄ܚܙܶܐ.‘ ܘ݄ܡܫܰܪܰܠّܶܗ ܕܡ݄ܦܨܳܚܺܝ. 25ܘܽܗ̄ܘ ܐܰܒܪܳܐ ܪܰܒܳܐ ܒܺܗ̄ܝ ܚܰܩܠܳܐ ܗ̄ܘܰܐ، ܘܺܗ̄ܝ ܢܰܩܠܐ ܕܰܐܬ̥ܺܝ ܘ݄ܡܩܰܪܰܒ̥ ܠܶܗ ܠܽܗ̄ܘ ܒܰܝܬܳܐ، ܫܰܡ݄ܥ ܩܳܠܳܐ ܕ݄ܙܡܳܪܳܐ {ܘܪܰܩܕܳܐ} ܕܓ̥ܰܠܰܒܶܐ.

26”ܘ݄ܩܪܶܐ ܠܶܗ ܠܚܰܕ̱ ܡܰܢ̱ ܛܠܳܝ̈ܶܐ ܘ݄ܡܫܰܐܶܠ ܠܶܗ: ’ܡ݄ܢܝܳܐ ܗܰܢܳܐ؟‘ 27ܐܡ݄ܪ ܠܶܗ ܠܶܗ: ’ܐܰܚܽܘܢܳܟ̥ ܐܰܬ̥ܺܝ، ܘܒܰܒܳܟ̥ ܢܚ݄ܪ ܠܶܗ ܗ̄ܽܘ ܬܰܘܪܳܐ ܬܰܩܺܝܢܳܐ، ܥܰܠ ܕ݄ܚܙܶܐ ܠܶܗ ܒ݄ܫܠܳܡܳܐ.‘ 28ܘ݄ܪܓ̥ܺܝܙ، ܘܠܰܐ ܐܒ݄ܥ ܕܥܳܒ݄ܪ. ܘܢܰܦ݄ܩ ܗ̄ܽܘ ܒܰܒܳܐ ܘܰܐܒ݄ܥ ܡܶܢܶܗ (ܕܥܳܒ݄ܪ). 29ܘܗܺܝّܶܗ ܐܡ݄ܪ ܠܶܗ ܠܽܗ̄ܘ ܒܰܒܳܐ: ’ܟܰܐܠܺܝ، ܟܡܳܐ ܐ݄ܫܢ̈ܶܐ ܟܥܳܒ̥ܰܕ ܐ̱ܢܳܐ ܣܺܝܕ̥ܳܟ̥ ܥܰܒܕܽܘܬ̥ܳܐ، ܘ݄ܒܢܰܩܠܐ ܠܳܐ ܬܒ̥݄ܪ ܠܺܝ ܗ̄ܽܘ ܡܰܐܡܪܰܝܕ̥ܳܟ̥، ܘܠܳܐ ܢܰܩܠܐ ܨܰܦܽܘܪܳܐ ܗܽܒ̥ ܠܳܟ̥ ܠܺܝ ܕܡ݄ܦܨܰܚ ܐ̱ܢܳܐ ܥܰܡ ܗ̄ܰܪّܳܚ̈ܡܰܝܕ̥ܺܝ. 30ܘܠܰܗ̄ܢܳܐ، ܗ̄ܽܘ ܐܰܒܪܰܝܕ̥ܳܟ̥، ܒ݄ܬ̥݄ܪ ܕ݄ܡܒܰܪܒܰܙ ܠܶܗ ܗ̄ܽܘ ܡܳܠܰܝܕ̥ܳܟ̥ ܥܰܡ ܗ̄ܰܙّܰܢܳܝ̈ܶܐ ܘܰܐܬ̥ܺܝ، ܢܚ݄ܪ ܠܳܟ̥ ܠܶܗ ܗ̄ܽܘ ܬܰܘܪܳܐ ܬܰܩܺܝܢܳܐ.‘ 31ܘܽܗ̄ܘ ܒܰܒܳܐ ܐܡ݄ܪ ܠܶܗ ܠܶܗ: ’ܐܰܒܪܺܝ، ܗܰܬ ܐܰܥܡܺܝ ܗܰܬ ܒܟܽܘܠ ܙܰܒܢܳܐ، ܘܟܽܘܠ ܡܶܕܶܐ ܕܟ݄ܬ ܝܳܐ ܕܺܝܕ̥ܺܝ، ܕܺܝܕ̥ܳܟ̥ ܝܳܐ. 32ܐܶ‌ܠܳܐ ܐܳܒܰܥ ܗ̄ܘܰܐ ܕܡܺܝܒܰܣܡܺܝܢܰܐ ܘܡ݄ܦܨܳܚܺܝܢܰܐ ܥܰܠ ܕܰܐܚܽܘܢܳܟ̥ ܗܰܢܳܐ ܡܺܝܬ̥ܳܐ ܗ̄ܘܰܐ ܘܰܐܬ̥ܺܝ ܠܰܚّܰܝ̈ܶܐ، ܘ݄ܡܣܰܟܪܳܐ ܗ̄ܘܰܐ ܘ݄ܚܙܶܐ.‘“

Currently Selected:

ܡܓܰܠܝܘܢ ܕܠܘܩܐ 15: ܟܬܒܐ

Highlight

Copy