ܡܓܰܠܝܘܢ ܕܠܘܩܐ 14

ܝܶܫܽܘܥ ܟܡܰܢ݄ܚ ܒܫܰܒܬ̥ܳܐ ܠܟܰܐܺܝܒ̥ܳܐ

1ܘܗܰܘܺܝ، ܗ̄ܺܝ ܢܰܩܠܐ ܕܥܰܒ݄ܪ ܠܒܰܝܬܳܐ ܕܚܰܕ̱ ܡܰܢ̱ ܪّܺܝܫܳܢ̈ܶܐ ܕܰܦܪ̈ܺܝܫܶܐ ܕܳܐܟ̥݄ܠ ܠܰܚܡܳܐ ܒܝܰܘܡܶܗ ܕܫܰܒܬ̥ܳܐ، ܘܗ݄ܢّܶܝ ܢ݄ܛܪܺܝ ܗ̄ܘܰܝ ܠܶܗ، 2ܘܟܰܐܠܶܗ ܚܰܕ̱ ܓܰܒ̥ܪܳܐ، ܒܟܶܐܒ̥ܳܐ ܕܡܰܝ̈ܶܐ ܟܺܝܬ ܩܽܘܕ̱ܡܶܗ. 3ܘܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܰܣّܳܦܪ̈ܶܐ ܘܠܰܦܪ̈ܺܝܫܶܐ: ”ܐܶܢ ܫܰܠܺܝܛܳܐ ܝܳܐ ܒܫܰܒܬ̥ܳܐ ܕܡܰܢ݄ܚ؟“ 4ܘܗ݄ܢّܶܝ ܠܳܐ ܡܬܰܢܰܠّܶܗ. ܘܡ݄ܕ ܠܶܗ ܘܡܰܢ݄ܚ ܠܶܗ، ܘ݄ܛܪܶܐ ܠܶܗ ܕ݄ܐܙّܶܗ. 5ܘܐܡ݄ܪ ܠܰܗ ܠّܶܗ: ”ܡܰܢ ܡ݄ܢܟ̥ܽܘ ܕܢܳܦ݄ܠ ܗ̄ܽܘ ܐܰܒܪܰܝܕ̥ܶܗ ܐܰܘ ܗ̄ܽܘ ܬܰܘܪܰܝܕ̥ܶܗ ܒܺܗ̄ܝ ܒܺܐܪܳܐ ܒܝܰܘܡܶܗ ܕܫܰܒܬ̥ܳܐ ܘܠܳܐ ܡܶܚܕ̥ܳܐ ܕܠ݄ܐ ܟܡܳܣܰܩ ܠܶܗ؟“ 6ܘܠܳܐ ܩܰܕܺܝܪܺܝ ܕܡܰܕܥܪܺܝ ܐܰܥܠܶܗ ܒܰܗ̄ܬ̥ܶܐ.

ܗ̄ܺܝ ܛܳܒ̥ܽܘܬ̥ܳܐ ܕܺܗ̄ܝ ܡܰܟܺܝܟ̥ܽܘܬ̥ܳܐ

7ܘܐܡ݄ܪ ܠܶܗ ܡܰܬ̥ܠܳܐ ܥܰܠ ܗܰܢ݄ܟ ܗ̄ܰܩّܰܪ̈ܝܶܐ ܬܰܡܳܐ، ܥܰܠ ܕ݄ܚܙܰܠّܶܗ ܕܟܳܟ݄ܪܟ̥ܺܝ ܕܡܰܝܕܺܝ ܕܽܘ̈ܟܳܬ̥ܳܐ ܕܒܽܗ̄ܘ ܪܺܝܫܳܐ ܕܽܗ̄ܘ ܣܡܳܟ̥ܳܐ، 8”(ܐܡ݄ܪ ܠܶܗ:) ܐܶܡܰܐ ܕܡ݄ܩܪܰܬ ܡܶܢ̱ ܢܳܫܳܐ ܠܺܗ̄ܝ ܡ݄ܫܬܽܘܬ̥ܳܐ، ܠ݄ܐ ܐܙّܳܟ̥ ܝ݄ܬܒ̥ܰܬ ܒܽܗ̄ܘ ܪܺܝܫܳܐ ܕܽܗ̄ܘ ܣܡܳܟ̥ܳܐ، ܕܠ݄ܐ ܐܙّܶܗ ܗܳܘܶܐ ܬܰܡܳܐ ܢܳܫܳܐ ܩܰܪܝܳܐ ܙ݄ܕ ܡܝܰܩܪܳܐ ܡܶܢܳܟ̥، 9ܘ݄ܓܕܳܐܬ̥ܶܐ ܗܰܘܳܐ ܕ݄ܩܪܶܐ ܠܶܗ ܐܶ‌ܠܳܟ̥ ܘܶܐ‌ܠܶܗ، ܘܕܳܐܡܰܪ ܠܳܟ̥: ܗܰܒ̥ ܗ̄ܺܝ ܕܽܘܟܬ̥ܳܐ ܠܰܗ̄ܢܳܐ، ܘ݄ܓܡܺܝܢܰܟܦܰܬ ܗ̄ܺܝ ܢܰܩܠܐ ܕܩܰܝܡܰܬ ܘ݄ܐܙّܳܟ̥ ܠܕܽܘܟܬ̥ܳܐ ܚܪܶܬܳܐ. 10ܐܶ‌ܠܳܐ ܗ̄ܺܝ ܢܰܩܠܐ ܕܡ݄ܩܪܰܬ ܙܳܟ̥ ܝܺܬܰܒ̥ ܒܺܗ̄ܝ ܕܽܘܟܬ̥ܳܐ ܚܰܪܰܝܬܳܐ، ܘܡ݄ܐ ܕܰܐܬ̥ܺܝ ܗܰܘܳܐ ܕ݄ܩܪܶܐ ܠܶܗ ܠܳܟ̥ ܓܕܳܐܡܰܪ ܠܳܟ̥: ܪܳܚܡܳܐ، ܣܠܰܩ ܝܺܬܰܒ̥ ܠܰܠܥ݄ܠ. ܘ݄ܓܕܳܗ̄ܘܶܐ ܠܳܟ̥ ܐܺܝܩܳܪܳܐ ܩ݄ܕ̱ܡ ܟܽܘܠّܶܗ ܗ̄ܰܝّܰܬܺܝܒ̥̈ܶܐ ܕܟ݄ܬܢܶܝ ܐܰܥܡܳܟ̥. 11ܡܺܐܝܕ̥ܶܗ ܕܟܽܘܠ ܕܡܰܘܪܽܒ̥ ܪܽܘܚܶܗ ܓܡܺܝܬܰܢܚ݄ܬ، ܘܟܽܘܠ ܕܡܰܢܚ݄ܬ ܪܽܘܚܶܗ ܟܝܳܪܽܒ̥.“

ܠܡܰܢ ܓܩܳܪܰܬ ܠܽܗ̄ܘ ܡܽܐܘܟܠܳܐ؟

12ܘܐܡ݄ܪ ܠܶܗ ܣܬܶܝ ܠܰܗ̄ܘܳܐ ܕ݄ܩܪܶܐ ܠܶܗ ܠܶܗ (ܠܡܳܪܳܐ ܕܺܗ̄ܝ ܡ݄ܫܬܽܘܬ̥ܳܐ): ”ܗ̄ܺܝ ܢܰܩܠܐ ܕܣܰܝܡܰܬ ܥܪܰܝܬܳܐ ܐܰܘ ܚܫܰܡܬܳܐ، ܠܳܐ ܩܳܪܰܬ ܗ̄ܰܪّܳܚ̈ܡܰܝܕ̥ܳܟ̥ ܐܰܘ ܗ̄ܰܢ ܐܰܚ̈ܽܘܢܳܢܰܝܕ̥ܳܟ̥ ܐܰܘ ܗ̄ܰܩّܰܪ̈ܺܝܒ̥ܳܢܰܝܕ̥ܳܟ̥ ܘܠܳܐ ܗ̄ܰܫܒܳܒ̈ܰܝܕ̥ܳܟ̥ ܗ̄ܰܥّܰܬܺܝܪ̈ܶܐ، ܕܠ݄ܐ ܐܙّܶܗ ܗ݄ܢّܶܝ ܣܬܶܝ ܩܳܪ݄ܢ ܠܳܟ̥، ܘܗܰܢܳܐ ܓܕܳܗ̄ܘܶܐ ܗ̄ܽܘ ܐܰܓ̥ܪܰܝܕ̥ܳܟ̥. 13ܐܶ‌ܠܳܐ ܗ̄ܺܝ ܢܰܩܠܐ ܕܣܰܝܡܰܬ ܩܪܰܝܬܳܐ ܠܽܗ̄ܘ ܡܽܐܘܟܠܳܐ، ܩܪܰܝ ܠܰܡّܶܣܟܶܢ̈ܶܐ ܘܠܰܗ̄ܢ ܢܰܦܺܝ̈ܠܶܐ ܘܠܰܚܓ̥ܺܝܪ̈ܶܐ ܘܠܰܣّܰܡܝ̈ܶܐ. 14ܘܛܽܘܒܳܐ ܐܶ‌ܠܳܟ̥ ܥܰܠ ܕܠܰܝ̱ܬّܶܗ ܡܶܕܶܐ ܕܳܗ̄ܒ݄ܢ ܠܳܟ̥ ܐܰܓ̥ܪܳܐ، ܡܺܐܝܕ̥ܶܗ ܕ݄ܓܕܳܗ̄ܘܶܐ ܠܳܟ̥ ܐܰܓ̥ܪܳܐ ܒܺܗ̄ܝ ܩܝܰܡܬܳܐ ܕܰܙّܰܕ̈ܺܝܩܶܐ.“

ܗ̄ܽܘ ܡܰܬ̥ܠܳܐ ܕܺܗ̄ܝ ܡ݄ܫܬܽܘܬ̥ܳܐ

ܡܬܝ 22‏:1‏‐10

15ܘܺܗ̄ܝ ܢܰܩܠܐ ܕܫܰܡ݄ܥ ܚܰܕ̱ ܡܰܢ̱ ܣܡܺܝܟ̥̈ܰܢܺܝ، ܐܡ݄ܪ ܠܶܗ ܠܶܗ: ”ܛܽܘܒܳܐ ܠܰܗ̄ܘܳܐ ܕܳܐܟ̥݄ܠ ܠܰܚܡܳܐ ܒܺܗ̄ܝ ܡܰܠܟܽܘܬ̥ܳܐ ܕܰܐ‌ܠܳܗܳܐ.“ 16ܘܝܶܫܽܘܥ ܐܡ݄ܪ ܠܶܗ ܠܶܗ: ”ܚܰܕ̱ ܓܰܒ̥ܪܳܐ ܣ݄ܡ ܠܶܗ ܚܫܰܡܬܳܐ ܪܰܒܬ̥ܳܐ ܘ݄ܩܪܶܐ ܠܶܗ ܠܓ̥ܰܠܰܒܶܐ. 17ܘ݄ܡܫܰܕܰܪ ܠܶܗ ܗ̄ܽܘ ܓܪܶܝܥܰܝܕ̥ܶܗ ܒܙܰܒܢܳܐ ܕܺܗ̄ܝ ܚܫܰܡܬܳܐ ܕܳܐܡ݄ܪ ܠܰܐܝܢܰܐ ܕ݄ܩܪ݄ܢ: ܟܰܐܠܶܗ ܟܽܘܠ ܡܶܕܶܐ ܡܛܰܝܒܳܐ ܝܳܐ ܐܰ‌ܠܟ̥ܽܘ، ܬܳܟ̥ܽܘ. 18ܘܟܽܘܠّܶܗ، ܐܟ̥ ܚܕ̥ܳܕ̥̈ܶܐ، ܡܫܰܪܰܠّܶܗ ܕܓܳܪܫܺܝ ܪܽܘܚܰܝّܶܗ. ܗ̄ܽܘ ܩܰܕ̱ܡܳܝܳܐ ܐܡ݄ܪ ܠܶܗ ܠܶܗ: ’ܙܒ̥݄ܢ ܠܺܝ ܚܰܩܠܳܐ، ܘ݄ܟܠܳܙ݄ܡ ܢܳܦܰܩ ܐ̱ܢܳܐ ܕܚܳܙܶܐ ܐ̱ܢܳܐ ܠܰܗ، ܟܳܐܒܰܥ ܐ̱ܢܳܐ ܡܶܢܳܟ̥ ܕܛܳܪܰܬ ܠܺܝ ܕܡ݄ܓܪܰܫ ܐ̱ܢܳܐ.‘ 19ܘ݄ܚܪܶܢܳܐ ܐܡ݄ܪ ܠܶܗ: ’ܙܒ̥݄ܢ ܠܺܝ ܚܰܡܫܳܐ ܙܰܘ̈ܓܶܐ ܕܬܰܘܪ̈ܶܐ، ܘܰܐܙܳܠܳܐ ܐ̱ܢܳܐ ܕܚܳܝܰܪ ܐ̱ܢܳܐ ܛܳܒ̥ܳܐ ܐܰܥܠܰܝّܶܗ، ܟܳܐܒܰܥ ܐ̱ܢܳܐ ܡܶܢܳܟ̥ ܕܛܳܪܰܬ ܠܺܝ ܕܡ݄ܓܪܰܫ ܐ̱ܢܳܐ.‘

20”ܘ݄ܚܪܶܢܳܐ ܐܡ݄ܪ ܠܶܗ: ’ܡ݄ܕ ܠܺܝ ܐܰܢ̱ܬ̥ܬܳܐ، ܘܡܰܗ̄ܘܟ̥ܰܐ ܠܰܝܒܺܝ ܐܳܬ̥ܶܐ ܐ̱ܢܳܐ.‘ 21ܘܰܐܬ̥ܺܝ ܗ̄ܽܘ ܓܪܶܝܥܰܘܳܐ ܘܐܡ݄ܪ ܠܶܗ ܗܰܢܺܝ ܠܽܗ̄ܘ ܡܳܪܰܝܕ̥ܶܗ. ܘ݄ܪܓ̥ܺܝܙ ܡܳܪܶܗ ܕܽܗ̄ܘ ܒܰܝܬܳܐ، ܘܐܡ݄ܪ ܠܶܗ ܠܽܗ̄ܘ ܓܪܶܝܥܰܝܕ̥ܶܗ: ’ܡܰܠ݄ܙ ܢܦܰܩ ܠܰܫّܽܘܩ̈ܶܐ ܘܠܰܕّܰܪ̈ܒܳܢܶܐ ܕܺܗ̄ܝ ܡܕ̥ܺܝܢ̱ܬܳܐ، ܘܡܰܥܒ݄ܪ ܠܰܗ̄ܪܟܶܐ ܗ̄ܰܡّܶܣܟܶܢ̈ܶܐ ܘܰܗ̄ܢ ܢܰܦܺܝ̈ܠܶܐ ܘܰܚܓ̥ܺܝܪ̈ܶܐ ܘܰܣّܰܡܝ̈ܶܐ.‘ 22ܘܽܗ̄ܘ ܓܪܶܝܥܳܐ ܐܡ݄ܪ ܠܶܗ: ’ܝܰܐ ܡܳܪܰܝܕ̥ܺܝ، ܗܰܘܺܝ ܐܟ̥ ܕܐܡ݄ܪ ܠܳܟ̥، ܘܗܶܫ ܟܺܝܬ ܕܽܘܟܬ̥ܳܐ.‘ 23ܘܽܗ̄ܘ ܡܳܪܳܐ ܐܡ݄ܪ ܠܶܗ ܠܽܗ̄ܘ ܓܪܶܝܥܰܝܕ̥ܶܗ: ’ܢܦܰܩ ܠܰܕّܰܪ̈ܒܳܢܶܐ ܕܠܰܪܒ̥ܰܠ ܘܠܰܚّܰܩ̈ܠܶܐ، ܘܚܘܿܨ ܥܰܠ ܗ̄ܰܢ ܢܳܫ̈ܶܐ ܕܳܐܬ̥݄ܢ ܥ݄ܒܪܺܝ ܗܳܠ ܕܡ݄ܡܠܶܐ ܗ̄ܽܘ ܒܰܝܬܰܝܕ̥ܺܝ.‘ 24ܘܟܳܐܡܰܪ ܐ̱ܢܳܐ ܠܟ̥ܽܘ: ܚܰܕ̱ ܡܰܗ̄ܢ݄ܟ ܕ݄ܩܪ݄ܢ ܗ̄ܘܰܘ̱ (ܒܺܗ̄ܝ ܩܰܕ̱ܡܰܝܬܳܐ) ܠ݄ܐ ܟܛ݄ܥܡܺܝ ܡܺܗ̄ܝ ܚܫܰܡܬܰܝܕ̥ܺܝ.“

ܗ̄ܽܘ ܛܪܳܝܳܐ ܕܽܗ̄ܘ ܥܳܠܡܳܐ ܘܽܗ̄ܘ ܡܛܳܝܳܐ ܠܝܶܫܽܘܥ

ܡܬܝ 10‏:37‏‐38

25ܘܺܗ̄ܝ ܢܰܩܠܐ ܕ݄ܡܗܰܠܟ̥ܺܝ ܗ̄ܘܰܘ̱ ܐܰܥܡܶܗ ܢܳܫ̈ܶܐ ܓ̥ܰܠܰܒܶܐ، ܘܚ݄ܪ ܠܶܗ ܐܰܒّܶܗ ܘܐܡ݄ܪ ܠܰܗ ܠّܶܗ: 26”ܡܰܢ ܕܳܐܬ̥ܶܐ ܠܓܰܒܺܝ ܘܠܳܐ ܡܥܰܢܰܬ ܡܽܗ̄ܘ ܒܰܒܰܝܕ̥ܶܗ ܘܡܺܗ̄ܝ ܐܶܡܰܝܕ̥ܶܗ، ܘܡܰܗ̄ܢ ܐܰܚ̈ܽܘܢܳܢܰܝܕ̥ܶܗ ܘܡܰܗ̄ܢ ܐܰܚ̈ܘܳܬ̥ܰܝܕ̥ܶܗ، ܘܡܺܗ̄ܝ ܐܰܢ̱ܬ̥ܬܰܝܕ̥ܶܗ ܘܡܰܗ̄ܢ ܐܰܒܢ̈ܰܝܕ̥ܶܗ، ܘܡܺܗ̄ܝ ܢܰܦܫܰܝܕ̥ܶܗ ܣܬܶܝ، ܬܰܠܡܺܝܕ̥ܳܐ ܠܰܝܒܶܗ ܕܗܳܘܶܐ ܠܺܝ. 27ܘܡܰܢ ܕܠܳܐ ܫܳܩ݄ܠ ܗ̄ܽܘ ܨܠܺܝܒܰܝܕ̥ܶܗ ܘܳܐܬ̥ܶܐ ܒ݄ܬ̥ܪܺܝ، ܬܰܠܡܺܝܕ̥ܳܐ ܠܰܝܒܶܗ ܕܗܳܘܶܐ ܠܺܝ. 28ܡܺܐܝܕ̥ܶܗ ܕܡܰܢܝܳܐ ܡ݄ܢܟ̥ܽܘ ܕܳܐܒ݄ܥ ܕܒܳܢܶܐ ܡܰܓ̥ܕܠܳܐ، ܘܠܳܐ ܒܺܗ̄ܝ ܩܰܕ̱ܡܰܝܬܳܐ ܟܝܳܬܽܒ̥ ܟܚܳܫܽܒ̥ ܡ݄ܩܰܐ ܟ݄ܐܙّܶܗ ܐܰܥܠܶܗ ܘܚܳܙܶܐ ܐܶܢ ܟ݄ܬ ܠܶܗ ܕܡܰܬ݄ܡ ܠܶܗ؟ 29ܕܠܳܐ ܒ݄ܬ̥݄ܪ ܕܡܰܚ݄ܬ ܗ̄ܺܝ ܫܶܬܶܐܣܬܳܐ ܘܠ݄ܐ ܩܳܕ݄ܪ ܡܰܬ݄ܡ ܠܶܗ، ܟܽܘܠ ܕܚܳܙ݄ܢ ܠܶܗ ܓܓܳܚܟ̥ܺܝ ܐܰܥܠܶܗ، 30ܘ݄ܓܕ݄ܐܡّܺܪ̱ܝ: ܗ̄ܽܘ ܓܰܒ̥ܪܰܢܳܐ ܡܫܰܪܶܐ ܠܶܗ ܕܒܳܢܶܐ ܘܠܳܐ ܩܰܕ݄ܪ ܕܡܰܬ݄ܡ ܠܶܗ. 31ܐܰܘ ܡܰܢܝܳܐ ܗ̄ܽܘ ܡܰܠܟܳܐ ܕ݄ܐܙّܶܗ ܠܽܗ̄ܘ ܚܰܪܒܳܐ ܕ݄ܡܩܰܛ݄ܠ ܥܰܡ ܡܰܠܟܳܐ ܚܪܶܢܳܐ، ܘܠܳܐ ܒܺܗ̄ܝ ܩܰܕ̱ܡܰܝܬܳܐ ܟܝܳܬܽܒ̥ ܘ݄ܟܚܳܫܰܒ̥ ܠܰܗ ܐܶܢ ܟܺܝܒܶܗ ܒܥܰܣܪܳܐ ܐܰ‌ܠܦܳܐ ܩܳܝ݄ܡ ܒܦܳܬ̥ܶܗ ܕܰܗ̄ܘܳܐ ܕܟܳܐܬ̥ܶܐ ܠܶܗ ܒܥ݄ܣܪܺܝ ܐܰ‌ܠܦܳܐ؟ 32ܘܶܐܢ ܠܰܝܒܶܗ، ܗܳܠ ܡ݄ܩܰܐ ܕܟ݄ܬ ܝܳܐ ܗܶܫ ܪܰܚܽܘܩܳܐ ܡܶܢܶܗ، ܟ݄ܡܫܰܕܰܪ ܠܶܗ ܫܠܺܝܚ̈ܶܐ ܘܳܐܒ݄ܥ ܡܶܢܶܗ ܫܠܳܡܳܐ. 33ܗܰܘܟ̥ܰܐ ܟܽܘܠ ܢܳܫܳܐ ܡ݄ܢܟ̥ܽܘ ܕܠܳܐ ܛܳܪܶܐ ܗ̄ܽܘ ܡܳܠܰܝܕ̥ܶܗ ܟܽܘܠܶܗ ܠܰܝܒܶܗ ܗܳܘܶܐ ܠܺܝ ܬܰܠܡܺܝܕ̥ܳܐ.

ܗ̄ܽܘ ܡܰܠܚܳܐ

ܡܬܝ 5‏:13؛ ܡܪܩܘܣ 9‏:50

34”ܫܰܦ݄ܪܬܳܐ ܝܳܐ ܗ̄ܺܝ ܡܰܠܚܳܐ، ܘܶܐܢ ܕܫܳܗܘܳܐ ܗ̄ܺܝ ܡܰܠܚܳܐ، ܒܡ݄ܢ ܓܡܺܝܡܰܠܚܳܐ؟ 35ܠܳܐ ܠܺܗ̄ܝ ܐܰܪܥܳܐ ܘܠܳܐ ܠܽܗ̄ܘ ܣܰܪܘܳܐ ܟܛܳܒ̥ܝܳܐ، ܠܰܪܒ̥ܰܠ ܟܡܺܝܚܰܠܩܳܐ. ܡܰܢ ܕܟ݄ܬ ܠܶܗ ܐܰܕ̥̈ܢܶܐ ܕܫܳܡ݄ܥ ܛܪܳܐ ܫܳܡ݄ܥ.“

Currently Selected:

ܡܓܰܠܝܘܢ ܕܠܘܩܐ 14: ܟܬܒܐ

Highlight

Copy