ܡܓܰܠܝܘܢ ܕܠܘܩܐ 1
1
ܗ̄ܽܘ ܪܺܝܫܳܐ ܕܽܗ̄ܘ ܦܽܘܪܩܳܢܳܐ
1ܡܺܐܝܕ̥ܶܗ ܕܓ̥ܰܠܰܒܶܐ ܐܰܒܺܝܥܺܝ ܕܟ݄ܬ̥ܒ̥ܺܝ ܬܰܫܥܝ̈ܳܬ̥ܳܐ ܕܰܥܒܳܕ̥̈ܶܐ ܐܰܝܢܰܐ ܕܰܐܚܢܰܐ ܟܳܐܕ̥ܥܺܝܢܰܢّܶܗ ܛܳܒ̥ܳܐ ܛܳܒ̥ܳܐ، 2ܐܟ̥ ܕܽܗ̄ܘ ܡܶܕܶܐ ܕܡܰܫܠܰܡّܰܗ ܠܰܢ ܗܰܢ݄ܟ ܕܡܶܢ̱ ܡܶܩ݄ܕ̱ܡ ܗܰܘ݄ܢ ܚܰܙܳܝ̈ܶܐ ܘ݄ܡܫܰܡܫܳܢ̈ܶܐ ܕܺܗ̄ܝ ܡܶܠܬ̥ܳܐ، 3ܘ݄ܚܙܶܐ ܐܶܠܺܝ ܣܬܶܝ، ܥܰܠ ܕܟ݄ܬ ܗ̄ܘܰܝ ܐ̱ܢܳܐ ܩܰܪܺܝܒ̥ܳܐ ܠܟܘ̇ܠّܶܗ، ܕܚܳܝܰܪ ܐ̱ܢܳܐ ܐܰܒّܶܗ ܛܳܒ̥ܳܐ ܛܳܒ̥ܳܐ ܠܰܫܰܢ ܕܟܳܬ̥ܰܒ̥ ܐ̱ܢܳܐ ܠܳܟ̥ ܟܽܘܠ ܡܶܕܶܐ ܒܽܗ̄ܘ ܕܰܘܪܰܝܕ̥ܶܗ، ܢܰܨܺܝܚܳܐ ܬܶܐܳܘܦܺܝܠܶܐ، 4ܠܰܫܰܢ ܕ݄ܐܕ̥ܥܰܬ ܗ̄ܽܘ ܫܪܳܪܳܐ ܕܰܡّܰܐܡܪ̈ܶܐ ܕ݄ܡܬܰܠܡ݄ܕ̥ܰܬ ܐܰܠّܶܗ.
ܗ̄ܺܝ ܣܒܰܪܬ̥ܳܐ ܕܽܗ̄ܘ ܒܰܛܢܳܐ ܕܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
5ܒܰܝّܰܘܡ̈ܳܬ̥ܳܐ ܕܗܶܪܳܘܕ̥ܶܣ ܗ̄ܽܘ ܡܰܠܟܳܐ ܕܺܝܗܽܘܕ̥ܳܐ، ܟ݄ܬ ܗ̄ܘܰܐ ܚܰܕ̱ ܟܳܗܢܳܐ، ܐ݄ܫܡܶܗ ܙܟ̥ܰܪܝܳܐ، ܡܺܗ̄ܝ ܬܶܫܡܶܫܬܳܐ ܕܒܶܝܬ̥ ܐܰܒܺܝܳܐ. ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܡܰܢ̱ ܒܢ̈ܳܬ̥ܳܐ ܕܰܐܗܪܽܘܢ ܗ̄ܘܰܐ، ܐ݄ܫܡܰܗ ܐܶܠܺܝܫܒܰܥ. 6ܘܰܬܪ̈ܰܝّܶܗ ܙܰܕ̈ܺܝܩܶܐ ܗ̄ܘܰܝܢܶܝ ܩ݄ܕ̱ܡ ܐܰܠܳܗܳܐ، ܘ݄ܡܗܰܠܟ̥ܺܝ ܗ̄ܘܰܘ̱ ܒܟܽܘܠّܶܗ ܗ̄ܰܦّܽܘܩܕ̈ܳܢܶܐ ܘܒܺܗ̄ܝ ܟܺܐܢܽܘܬ̥ܳܐ ܕܡܳܪܝܳܐ ܕܠܳܐ ܦܰܘܕܳܐ. 7ܘܰܐܒܪܳܐ ܠܰܝ̱ܬ ܗ̄ܘܰܐ ܠّܶܗ، ܡܺܐܝܕ̥ܶܗ ܕܶܐܠܺܝܫܒܰܥ ܥܩܰܪܬ̥ܳܐ ܗ̄ܘܰܐ، ܘܰܬܪ̈ܰܝّܶܗ ܗܰܘ݄ܢ ܗ̄ܘܰܘ̱ ܪ̈ܰܒܶܐ ܒܽܗ̄ܘ ܥܽܘܡܪܳܐ.
8ܘܗܰܘܺܝ ܗ̄ܘܰܐ، ܗ̄ܺܝ ܢܰܩܠܐ ܕ݄ܡܟܰܗܰܢ ܗ̄ܘܰܐ ܒܽܗ̄ܘ ܕܰܘܪܳܐ ܕܺܗ̄ܝ ܬܶܫܡܶܫܬܰܝܕ̥ܶܗ ܩ݄ܕ̱ܡ ܐܰܠܳܗܳܐ، 9ܒܽܗ̄ܘ ܥܝܳܕ̥ܳܐ ܕܺܗ̄ܝ ܟܳܗܢܽܘܬ̥ܳܐ، ܡܰܛܺܝ ܠܶܗ (ܕܰܘܪܳܐ) ܕܡܰܚ݄ܬ ܒܰܣܡ̈ܶܐ، ܘܥܰܒ݄ܪ ܠܽܗ̄ܘ ܗܰܝܟܠܳܐ ܕܡܳܪܝܳܐ. 10ܘܽܗ̄ܘ ܥܰܡܳܐ ܟܽܘܠܶܗ ܡܨܰܠܶܐ ܗ̄ܘܰܐ ܠܰܪܒ̥ܰܠ ܒܽܗ̄ܘ ܙܰܒܢܳܐ ܕܰܒّܰܣܡ̈ܶܐ. 11ܘ݄ܚܙܶܐ ܐܶܠܶܗ، ܠ݄ܙܟ̥ܰܪܝܳܐ، ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܩܺܝܡܳܐ ܡܽܗ̄ܘ ܝܰܡܺܝܢܳܐ ܕܽܗ̄ܘ ܡܰܕ̥ܒܚܳܐ ܕܰܒّܰܣܡ̈ܶܐ. 12ܘ݄ܫܓ̥ܺܝܫ ܙܟ̥ܰܪܝܳܐ ܗ̄ܺܝ ܢܰܩܠܐ ܕ݄ܚܙܶܐ ܠܶܗ، ܘܙܽܘܥܬ̥ܳܐ ܢܰܦܺܝܠܳܐ ܐܰܥܠܶܗ. 13ܘܽܗ̄ܘ ܡܰܠܰܐܟ̥ܳܐ ܐܡ݄ܪ ܠܶܗ ܠܶܗ: ”ܙܟ̥ܰܪܝܳܐ، ܠܳܐ ܙܰܝܥܰܬ، ܥܰܠ ܕ݄ܫܡܺܝܥܳܐ ܗ̄ܺܝ ܨܠܽܘܬ̥ܰܝܕ̥ܳܟ̥، ܘܺܗ̄ܝ ܐܰܢ̱ܬ̥ܬܰܝܕ̥ܳܟ̥ ܐܶܠܺܝܫܒܰܥ ܓܡܰܘܠܕܳܐ ܠܳܟ̥ ܐܰܒܪܳܐ، ܘ݄ܓܩܳܪܰܬ ܐ݄ܫܡܶܗ ܝܽܘܚܰܢܳܢ. 14ܘ݄ܓܕܳܗ̄ܘܶܐ ܠܳܟ̥ ܦܨܺܝܚܽܘܬ̥ܳܐ ܘܒܽܘܣܳܡܳܐ، ܘܓ̥ܰܠܰܒܶܐ ܓܡ݄ܦܨܳܚܺܝ ܒܽܗ̄ܘ ܡܰܘܠܳܕ̥ܰܝܕ̥ܶܗ، 15ܥܰܠ ܕ݄ܓܕܳܗ̄ܘܶܐ ܪܰܒܳܐ ܩ݄ܕ̱ܡ ܡܳܪܝܳܐ. ܘܚܰܡܪܳܐ ܘܫܰܟ̥ܪܳܐ ܠ݄ܐ ܓܫܳܬܶܐ، ܘܪܽܘܚܳܐ ܕܩܽܘܕܫܳܐ ܓܡ݄ܡܠܶܐ ܗܶܫ ܗܺܝّܶܗ ܒܟܰܪܣܳܐ ܕܺܗ̄ܝ ܐܶܡܳܐ. 16ܘܓ݄ܕܡܰܕܥ݄ܪ ܓ̥ܰܠܰܒܶܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܠܡܳܪܝܳܐ ܐܰܠܳܗܰܬّ̥ܶܗ. 17ܘܗܺܝّܶܗ ܓܕ݄ܐܙّܶܗ ܩܽܘܕ̱ܡܶܗ ܒܺܗ̄ܝ ܪܽܘܚܳܐ ܘܒܽܗ̄ܘ ܚܰܝܠܳܐ ܕܶܐܠܺܝܳܐ ܗ̄ܽܘ ܢܒܺܝܳܐ ܕܡܰܕܥ݄ܪ ܗ̄ܽܘ ܠܶܒܳܐ ܕܰܒّܰܒ̈ܶܐ ܥܰܠ ܗ̄ܰܢ ܐܰܒܢ̈ܶܐ، ܘܠܰܐܝܢܰܐ ܕܠ݄ܐ ܟܫ݄ܡܥܺܝ ܠܺܝܕ̥ܰܥܬܳܐ ܕܰܟّܺܐܢ̈ܶܐ (ܓܡܰܕܥ݄ܪ)، ܘܕ݄ܡܛܰܝ݄ܒ ܠܡܳܪܝܳܐ ܥܰܡܳܐ ܓܡܺܝܪܳܐ.“ 18ܙܟ̥ܰܪܝܳܐ ܐܡ݄ܪ ܠܶܗ ܠܽܗ̄ܘ ܡܰܠܰܐܟ̥ܳܐ: ”ܐܰܝܕܰܪܒܳܐ ܓܕܳܐܕ̥ܰܥ ܐ̱ܢܳܐ ܗܰܬ̥ܶܐ، ܘܳܐܢܳܐ ܣܳܒ̥ܳܐ ܐ̱ܢܳܐ، ܘܺܗ̄ܝ ܐܰܢ̱ܬ̥ܬܰܝܕ̥ܺܝ ܝܰܪܺܝܒ̥ܳܐ ܒܽܗ̄ܘ ܥܽܘܡܪܳܐ؟“ 19ܘܡܰܕܥܰܪ ܠܶܗ ܗ̄ܽܘ ܡܰܠܰܐܟ̥ܳܐ ܘܐܡ݄ܪ ܠܶܗ ܠܶܗ: ”ܐܳܢܳܐ ܐ̱ܢܳܐ ܓܰܒܪܺܝܐܶܝܠ ܕ݄ܟܩܳܝܰܡ ܐ̱ܢܳܐ ܩ݄ܕ̱ܡ ܐܰܠܳܗܳܐ، ܘ݄ܡܫܰܕܰܪ ܐ̱ܢܳܐ ܕܡ݄ܫܓ̥ܰܠ ܐ̱ܢܳܐ ܐܰܥܡܳܟ̥ ܘ݄ܡܣܰܒܰܪ ܐ̱ܢܳܐ ܠܳܟ̥ ܗܰܢܺܝ. 20ܡܳܐܥܕܳܐ ܓܕܳܗ̄ܘܰܬ ܫܰܬܺܝܩܳܐ ܘܠܰܝܒܳܟ̥ ܕܡ݄ܫܓ̥ܳܠܰܬ ܗܳܠ ܠܽܗ̄ܘ ܝܰܘܡܳܐ ܕܗܰܢܺܝ ܓܕܳܗ̄ܘ݄ܢ، ܥܰܠ ܕܠܳܐ ܡܰܫ݄ܪ ܠܳܟ̥ ܠܰܡّܰܐܡܪ̈ܰܝܕ̥ܺܝ ܗܰܢܺܝ ܕܓ݄ܕܟܳܡܠܺܝ ܒܽܗ̄ܘ ܙܰܒܢܰܬّ̥ܶܗ.“
21ܘܽܗ̄ܘ ܥܰܡܳܐ ܩܳܝܰܡ ܗ̄ܘܰܐ ܘܢܳܛܰܪ ܗ̄ܘܰܐ ܠ݄ܙܟ̥ܰܪܝܳܐ، ܘܡܺܝܕܰܘܡܪܺܝ ܗ̄ܘܰܘ̱ ܥܰܠ ܗ̄ܽܘ ܥܶܘܳܩܰܝܕ̥ܶܗ ܕܒܽܗ̄ܘ ܗܰܝܟܠܳܐ. 22ܘܺܗ̄ܝ ܢܰܩܠܐ ܕܢܰܦ݄ܩ ܙܟ̥ܰܪܝܳܐ، ܠܳܐ ܩܳܕܰܪ ܗ̄ܘܰܐ ܕܡ݄ܫܓ̥݄ܠ ܐܰܥܡܰܝّܶܗ، ܘܰܐܕ̥ܺܝܥܺܝ ܕܚܶܙܘܳܐ ܚܙܶܐ ܠܶܗ ܒܽܗ̄ܘ ܗܰܝܟܠܳܐ. ܘܗܺܝّܶܗ ܒܰܪّܶܡ̈ܙܶܐ ܪܳܡܰܙ ܗ̄ܘܰܐ ܠّܶܗ، ܘܦܰܝ݄ܫ ܚܰܪܫܳܐ. 23ܘܺܗ̄ܝ ܢܰܩܠܐ ܕܟܰܡܺܝܠܺܝ ܗ̄ܰܝّܰܘܡ̈ܶܐ ܕܺܗ̄ܝ ܬܶܫܡܶܫܬܰܝܕ̥ܶܗ، ܐܰܙّܶܗ ܠܽܗ̄ܘ ܒܰܝܬܰܝܕ̥ܶܗ. 24ܘܗܰܘܺܝ ܒ݄ܬ̥݄ܪ ܡܰܢ̱ ܝّܰܘܡ̈ܳܬ̥ܰܢ݄ܟ، ܐܶܠܺܝܫܒܰܥ ܗ̄ܺܝ ܐܰܢ̱ܬ̥ܬܰܝܕ̥ܶܗ ܛܥܺܝܢܳܐ، ܘܬ݄ܠܝܳܐ ܗ̄ܘܰܐ ܪܽܘܚܰܗ ܚܰܡܫܳܐ ܝܰܪ̈ܚܶܐ، ܘ݄ܐܡّܳܪ̱ܐ ܗ̄ܘܰܐ: 25”ܗܰܢܺܝ ܣ݄ܡ ܠܶܗ ܐܰܥܡܺܝ ܡܳܪܝܳܐ، ܒܰܝّܰܘܡ̈ܶܐ ܕܚ݄ܪ ܠܶܗ ܐܶܒܺܝ ܕܡܳܝ݄ܕ ܗ̄ܺܝ ܢܶܟܦܽܘܬ̥ܰܝܕ̥ܺܝ ܕܒܰܝܢ ܗ̄ܰܢ ܢܳܫ̈ܶܐ.“
ܗ̄ܺܝ ܣܒܰܪܬ̥ܳܐ ܕܽܗ̄ܘ ܡܰܘܠܳܕܳܐ ܕܡܳܪܰܢ ܝܶܫܽܘܥ
26ܘܒܽܗ̄ܘ ܝܰܪܚܳܐ ܕܰܗ̄ܢ ܐ݄ܫܬܳܐ، ܡܫܰܕ݄ܪ ܓܰܒܪܺܝܐܶܝܠ ܗ̄ܽܘ ܡܰܠܰܐܟ̥ܳܐ ܡܶܢ̱ ܓܰܒ ܐܰܠܳܗܳܐ ܠܽܗ̄ܘ ܓܠܺܝܠܳܐ، ܠ݄ܡܕ̥ܺܝܢ̱ܬܳܐ ܕ݄ܐܫܡܰܗ ܢܳܨܪܰܬ̥، 27ܓܰܒ ܒܬ̥ܽܘܠܬܳܐ ܢܟ̥ܺܝܪܰܝܬܳܐ ܠܓܰܒ̥ܪܳܐ ܕ݄ܐܫܡܶܗ ܝܰܘܣܶܦ، ܡܽܗ̄ܘ ܒܰܝܬܳܐ ܕܕܰܘܺܝܕ̥، ܘ݄ܐܫܡܰܗ ܕܺܗ̄ܝ ܒܬ̥ܽܘܠܬܳܐ ܡܰܪܝܰܡ. 28ܘܽܗ̄ܘ ܡܰܠܰܐܟ̥ܳܐ ܥܰܒ݄ܪ ܠܣܺܝܕ̥ܰܗ، ܘܐܡ݄ܪ ܠܶܗ ܠܰܗ: ”ܫܠܳܡܳܐ ܐܶܠܰܟ̥ ܝܰܐ ܡܠܺܝܬ̥ܳܐ ܛܰܝܒܽܘܬ̥ܳܐ، ܡܳܪܰܢ ܐܰܥܡܰܟ̥ ܝܳܐ، ܡܒܰܪܰܟ̥ܬܳܐ ܗܰܬ ܒܰܝܢ ܗ̄ܰܢ ܢܶܫ̈ܶܐ.“ 29ܘܗܺܝّܰܗ، ܗ̄ܺܝ ܢܰܩܠܐ ܕ݄ܚܙܶܐ ܠܰܗ، ܙܰܝܺܝܥܳܐ ܡܽܗ̄ܘ ܡܰܐܡܪܰܝܕ̥ܶܗ، ܘܚܳܫܒ̥ܳܐ ܗ̄ܘܰܐ ܘ݄ܐܡّܳܪ̱ܐ ܗ̄ܘܰܐ ܕܡ݄ܢܝܳܐ ܗ̄ܽܘ ܫܠܳܡܰܢܳܐ؟ 30ܘܽܗ̄ܘ ܡܰܠܰܐܟ̥ܳܐ ܐܡ݄ܪ ܠܶܗ ܠܰܗ: ”ܡܰܪܝܰܡ، ܠܳܐ ܙܰܝܥܰܬ، ܥܰܠ ܕܗܰܘܺܝ ܠܰܟ̥ ܛܰܝܒܽܘܬ̥ܳܐ ܓܰܒ ܐܰܠܳܗܳܐ. 31ܟܰܐܠܰܟ̥ ܓܡ݄ܛܥܳܢܰܬ ܘ݄ܓܝ݄ܠܕ̥ܰܬ ܐܰܒܪܳܐ، ܘ݄ܓܩܳܪܝܰܬ ܐ݄ܫܡܶܗ ܝܶܫܽܘܥ. 32ܗܰܢܳܐ ܓܕܳܗ̄ܘܶܐ ܪܰܒܳܐ، ܘܽܗ̄ܘ ܐܰܒܪܳܐ ܕܽܗ̄ܘ ܥܶܠܳܝܳܐ ܓܡ݄ܩܪܶܐ. ܘܡܳܪܝܳܐ ܐܰܠܳܗܳܐ ܓܕܳܗ̄ܒܶܐ ܠܶܗ ܗ̄ܽܘ ܟܽܘܪܣܝܳܐ ܕܕܰܘܺܝܕ̥ ܗ̄ܽܘ ܒܰܒܰܝܕ̥ܶܗ. 33ܘܓ݄ܕܡܰܡܠ݄ܟ ܥܰܠ ܗ̄ܽܘ ܒܰܝܬܳܐ ܕܝܰܥܩܽܘܒ ܠܥܳܠܰܡ، ܘܠܺܗ̄ܝ ܡܰܠܟܽܘܬ̥ܰܝܕ̥ܶܗ ܚܰܪܰܝܬܳܐ ܠ݄ܐ ܓܕܳܗ̄ܘܶܐ .“ 34ܡܰܪܝܰܡ ܐܡ݄ܪ ܠܰܗ ܠܽܗ̄ܘ ܡܰܠܰܐܟ̥ܳܐ: ”ܐܰܝܕܰܪܒܳܐ ܓܕܽܗ̄ܘܝܳܐ ܗܰܬ̥ܶܐ ܕܓܰܒ̥ܪܳܐ ܠܰܐ ܐܕ̥݄ܥ ܠܺܝ؟“ 35ܡܰܕܥܰܪ ܠܶܗ ܗ̄ܽܘ ܡܰܠܰܐܟ̥ܳܐ ܘܐܡ݄ܪ ܠܶܗ ܠܰܗ: ”ܪܽܘܚܳܐ ܕܩܽܘܕܫܳܐ ܓܕܳܐܬ̥ܝܳܐ، ܘܽܗ̄ܘ ܚܰܝܠܳܐ ܕܽܗ̄ܘ ܥܶܠܳܝܳܐ ܓܢܳܚ݄ܬ ܐܰܥܠܰܟ̥، ܡܰܗ̄ܘܟ̥ܰܐ ܗܰܘܳܐ ܕܡܺܝܬܰܘܠ݄ܕ̥ ܐܶܒܰܟ̥ ܩܰܕܺܝܫܳܐ ܝܳܐ، ܘܽܗ̄ܘ ܐܰܒܪܳܐ ܕܰܐܠܳܗܳܐ ܓܡ݄ܩܪܶܐ. 36ܘܟܰܐܠܰܗ ܐܶܠܺܝܫܒܰܥ، ܗ̄ܺܝ ܩܰܪܽܒ̥ܬܰܝܕ̥ܰܟ̥، ܗܺܝّܰܗ ܣܬܶܝ ܛܥܺܝܢܳܐ ܐܰܒܪܳܐ ܒܺܗ̄ܝ ܣܳܒ̥ܽܘܬ̥ܰܝܕ̥ܰܗ. ܘܗܰܢܳܐ ܝܳܐ ܗ̄ܽܘ ܝܰܪܚܳܐ ܕܰܗ̄ܢ ܐ݄ܫܬܳܐ ܠܰܗ̄ܝܳܐ ܕ݄ܟܡ݄ܩܪܳܝܳܐ ܥܩܰܪܬ̥ܳܐ، 37ܥܰܠ ܕܠܰܝܬ ܡܶܕܶܐ ܥܰܣܩܳܐ ܩ݄ܕ̱ܡ ܐܰܠܳܗܳܐ.“ 38ܘܐܡ݄ܪ ܠܰܗ ܡܰܪܝܰܡ: ”ܟܰܐܠܺܝ ܐ̱ܢܳܐ ܗ̄ܺܝ ܓܪܰܥܬܳܐ ܕܡܳܪܝܳܐ، ܛܪܳܐ ܗ̄ܘܶܐ ܠܺܝ ܐܟ̥ ܕܽܗ̄ܘ ܡܰܐܡܪܰܝܕ̥ܳܟ̥.“ ܘܰܐܙّܶܗ ܗ̄ܽܘ ܡܰܠܰܐܟ̥ܳܐ ܡܶܢ̱ ܓܰܒܰܗ.
ܗ̄ܽܘ ܡܰܐܙܠܳܐ ܕܡܰܪܝܰܡ ܣܶܕ̱ ܐܶܠܺܝܫܒܰܥ
39ܘܒܰܝّܰܘܡ̈ܳܬ̥ܰܢ݄ܟ، ܩܰܝܺܝܡܳܐ ܡܰܪܝܰܡ ܘܰܐܙّܰܗ ܡܰܠ݄ܙܬܳܐ ܠܽܗ̄ܘ ܛܽܘܪܳܐ، ܠܺܗ̄ܝ ܡܕ̥ܺܝܢ̱ܬܳܐ ܕܺܝܗܽܘܕ̥. 40ܘܥܰܒܺܝܪܳܐ ܠܽܗ̄ܘ ܒܰܝܬܳܐ ܕ݄ܙܟ̥ܰܪܝܳܐ، ܘ݄ܡܫܰܐܶܠ ܠܰܗ ܒܽܗ̄ܘ ܫܠܳܡܳܐ ܕܶܐܠܺܝܫܒܰܥ. 41ܘܗܰܘܺܝ ܗ̄ܺܝ ܢܰܩܠܐ ܕܫܰܡܺܝܥܳܐ ܐܶܠܺܝܫܒܰܥ ܗ̄ܽܘ ܫܠܳܡܳܐ ܕܡܰܪܝܰܡ، ܗ̄ܽܘ ܙܥܽܘܪܳܐ ܕ݄ܒܟܰܪܣܰܗ ܦܨܺܝܚ ܘܪܰܡ݄ܫ، ܘܡܰܠܝܳܐ ܐܶܠܺܝܫܒܰܥ ܪܽܘܚܳܐ ܕܩܽܘܕܫܳܐ. 42ܘܡܰܙܥܰܩ ܠܰܗ ܒܩܳܠܳܐ ܥܶܠܳܝܳܐ ܘܐܡ݄ܪ ܠܰܗ ܠܡܰܪܝܰܡ: ”ܡܒܰܪܰܟ̥ܬܳܐ ܗܰܬ ܒܰܗ̄ܢ ܢܶܫ̈ܶܐ، ܘ݄ܡܒܰܪܟ̥ܳܐ ܝܳܐ ܗ̄ܽܘ ܦܺܐܪܳܐ ܕ݄ܒܟܰܪܣܰܟ̥. 43ܡܰܐܝܟܳܐ ܠܺܝ ܗܰܬ̥ܶܐ ܕܺܗ̄ܝ ܐܶܡܳܐ ܕܽܗ̄ܘ ܡܳܪܰܝܕ̥ܺܝ ܐ݄ܬ̥ܝܳܐ ܠܣܺܝܕ̥ܺܝ، 44ܟܰܐܠܶܗ، ܗ̄ܺܝ ܢܰܩܠܐ ܕܢܰܦ݄ܠ ܗ̄ܽܘ ܩܳܠܳܐ ܕܽܗ̄ܘ ܫܠܳܡܰܝܕ̥ܰܟ̥ ܒܰܐܕ̥̈ܢܺܝ، ܒ݄ܦܨܺܝܚܽܘܬ̥ܳܐ ܪܰܒܬ̥ܳܐ ܪܰܡ݄ܫ ܗ̄ܽܘ ܙܥܽܘܪܳܐ ܒܟܰܪܣܺܝ. 45ܘܛܽܘܒܳܐ ܠܡܰܢ ܕ݄ܡܗܰܝܡܰܢ ܠܰܗ ܕ݄ܓܕܳܗ̄ܘ݄ܢ ܗܰܢܺܝ ܕ݄ܫܓ̥ܺܝܠ ܐܰܥܡܰܗ ܡܶܢ̱ ܡܳܪܝܳܐ.“
ܗ̄ܺܝ ܬܶܫܒܽܘܚܬܳܐ ܕܡܰܪܝܰܡ
46ܘܡܰܪܝܰܡ ܐܡ݄ܪ ܠܰܗ: ”ܢܰܦܫܺܝ ܟܡܰܘܪܒ̥ܳܐ ܡܳܪܝܳܐ، 47ܘܪܽܘܚܺܝ ܟܡ݄ܦܨܳܚܳܐ ܒܰܐܠܳܗܳܐ ܗ̄ܽܘ ܡܰܚܝܳܢܰܝܕ̥ܺܝ، 48ܕܚ݄ܪ ܠܶܗ ܒܺܗ̄ܝ ܡܰܟܺܝܟ̥ܽܘܬ̥ܳܐ ܕܺܗ̄ܝ ܓܪܰܥܬܰܝܕ̥ܶܗ، ܕܟܰܐܠܶܗ ܡܳܐܥܕܳܐ ܗ̄ܰܕّܳܪ̈ܶܐ ܟܽܘܠّܶܗ ܛܽܘܒܳܐ ܓܕܳܗ̄ܒ݄ܢ ܠܺܝ، 49ܡܺܐܝܕ̥ܶܗ ܕܽܗ̄ܘ ܚܰܝܠܬ̥ܳܢܳܐ ܣ݄ܡ ܠܶܗ ܐܰܥܡܺܝ ܡܶܕ̈ܳܢܶܐ ܪ̈ܰܒܶܐ. ܘ݄ܐܫܡܶܗ ܩܰܕܺܝܫܳܐ ܝܳܐ، 50ܘܽܗ̄ܘ ܚܢܳܢܰܝܕ̥ܶܗ ܟܦܳܝ݄ܫ ܠܙܰܒܢ̈ܶܐ ܘܕܳܪ̈ܶܐ ܥܰܠ ܐܰܝܢܰܐ ܕܣܳܓ̥ܕܺܝ ܠܶܗ. 51ܣ݄ܡ ܠܶܗ ܙܳܟ̥ܽܘܬ̥ܳܐ ܒ݄ܕܪܳܥܶܗ، ܘ݄ܡܒܰܪܒܰܙ ܠܶܗ ܗܰܢ݄ܟ ܕܚܳܙ݄ܢ ܗ̄ܘܰܘ̱ ܪ̈ܽܘܚܰܝّܶܗ ܪ̈ܰܒܶܐ. 52ܡܰܢܦܶܠ ܠܶܗ ܡܳܪ̈ܶܐ ܕܽܗ̄ܘ ܚܰܝܠܳܐ ܡܰܢ̱ ܟّܽܘܪ̈ܣܝܶܐ، ܘܡܰܥܠܶܐ ܠܶܗ ܗ̄ܰܡّܰܟܺܝܟ̥̈ܶܐ. 53ܡܰܣܒ̥ܰܥ ܠܶܗ ܗ̄ܰܟّܰܦܺܝ̈ܢܶܐ ܛܳܒ̥̈ܳܬ̥ܳܐ، ܘܡܰܦܩܰܪ ܠܶܗ ܗ̄ܰܥّܰܬܺܝܪ̈ܶܐ. 54ܡܥܰܕܰܪ ܠܶܗ ܗ̄ܽܘ ܓܪܶܝܥܰܝܕ̥ܶܗ ܐܺܝܣܪܳܐܶܝܠ، ܘܡܰܚܘܶܐ ܠܶܗ ܗ̄ܽܘ ܚܢܳܢܰܝܕ̥ܶܗ، 55ܐܟ̥ ܕ݄ܫܓ̥ܺܝܠ ܥܰܡ ܗ̄ܰܒّܰܒܳܢ̈ܰܝܕ̥ܰܢ، ܥܰܡ ܐܰܒܪܳܗܳܡ ܘܥܰܡ ܗ̄ܽܘ ܙܰܪܥܰܝܕ̥ܶܗ ܠܥܳܠܰܡ.“ 56ܘܦܰܝܺܝܫܳܐ ܡܰܪܝܰܡ ܓܰܒ ܐܶܠܺܝܫܒܰܥ ܡܶܕܶܐ ܬܠܳܬ̥ܳܐ ܝܰܪ̈ܚܶܐ ܘܕܰܥܺܝܪܳܐ ܠܽܗ̄ܘ ܒܰܝܬܰܝܕ̥ܰܗ.
ܗ̄ܽܘ ܡܰܘܠܳܕܳܐ ܕܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
57ܘܗܰܘܺܝ ܗ̄ܘܰܐ ܗ̄ܽܘ ܙܰܒܢܳܐ ܕܶܐܠܺܝܫܒܰܥ ܕܝܳܠܕܳܐ، ܘܡܰܘܠܰܕ ܠܰܗ ܐܰܒܪܳܐ. 58ܘܫܰܡܺܝܥܺܝ ܗ̄ܰܫܒܳܒ̈ܰܝܕ̥ܰܗ ܘܰܩّܰܪ̈ܺܝܒ̥ܰܝܕ̥ܰܗ ܕܰܐܠܳܗܳܐ ܓ̥ܰܠܰܒܶܐ ܡܰܪܚܰܡ ܠܶܗ ܐܰܥܠܰܗ، ܘܡ݄ܦܨܳܚܺܝ ܗ̄ܘܰܘ̱ ܐܰܥܡܰܗ. 59ܘܗܰܘܺܝ ܠܽܗ̄ܘ ܝܰܘܡܳܐ ܕܰܬܡܰܢܝܳܐ، ܐܰܬ̥݄ܢ ܕܓ݄ܙܪܺܝ (ܡܛܰܗܪܺܝ) ܠܽܗ̄ܘ ܛܰܠܝܳܐ ܘܩܳܪ݄ܢ ܗ̄ܘܰܝ ܠܶܗ ܒ݄ܐܫܡܶܗ ܕܽܗ̄ܘ ܒܰܒܳܐ، ܙܟ̥ܰܪܝܳܐ. 60ܘܺܗ̄ܝ ܐܶܡܳܐ ܡܰܕܥܰܪ ܠܰܗ ܘܐܡ݄ܪ ܠܰܗ ܠّܶܗ: ”ܠܳܐ ܗܰܘܟ̥ܰܐ، ܐܶܠܳܐ ܓܡ݄ܩܪܶܐ ܝܽܘܚܰܢܳܢ.“ 61ܘܐܡ݄ܪّܰܗ ܠܰܗ: ”ܠܰܝܬ ܢܳܫܳܐ ܡܰܗ̄ܢ ܢܳܫ̈ܰܝܕ̥ܰܟ̥ (ܒܺܗ̄ܝ ܫܰܪܒܬ̥ܰܝܕ̥ܰܟ̥) ܕ݄ܟܡ݄ܩܪܶܐ ܒܽܗ̄ܘ ܐ݄ܫܡܰܢܳܐ.“ 62ܘ݄ܪܡ݄ܙّܶܗ ܠܽܗ̄ܘ ܒܰܒܰܝܕ̥ܶܗ ܕܡ݄ܢ ܟܳܐܒ݄ܥ ܡܰܚ݄ܬ ܐ݄ܫܡܶܗ. 63ܘܰܐܒ݄ܥ ܠܽܘܚܳܐ، ܘ݄ܟܬ̥ܽܒ̥ ܠܶܗ ܘܐܡ݄ܪ ܠܶܗ: ”ܝܽܘܚܰܢܳܢ ܝܳܐ ܐ݄ܫܡܶܗ.“ ܘܟܽܘܠّܶܗ ܡܕܰܘܡܪܺܝ. 64ܘܡܶܚܕ̥ܳܐ ܦܬܺܝܚ ܦܶܡܶܗ ܘܠܶܫܳܢܶܗ، ܘ݄ܫܓ̥ܺܝܠ ܘ݄ܡܒܰܪܰܟ̥ ܠܶܗ ܠܰܐܠܳܗܳܐ. 65ܘܗܰܘܝܳܐ ܙܽܘܥܬ̥ܳܐ ܥܰܠ ܗ̄ܰܫܒܳܒ̈ܰܬّ̥ܶܗ ܟܽܘܠّܶܗ. ܘ݄ܒܟܽܘܠܶܗ ܗ̄ܽܘ ܛܽܘܪܳܐ ܕܺܝܗܽܘܕ̥، ܗܰܢܺܝ ܡܺܝܬܰܫܓ̥ܠܺܝ ܗ̄ܘܰܘ̱. 66ܘܟܽܘܠّܶܗ ܕܫܰܡܺܝܥܺܝ ܚ݄ܫܒ̥ܺܝ ܗ̄ܘܰܘ̱ ܒܠܶܒܰܝّܶܗ ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܢ ܓܕܳܗ̄ܘܶܐ ܗ̄ܽܘ ܛܰܠܝܰܢܳܐ؟ ܘܺܐܝܕ̥ܶܗ ܕܡܳܪܝܳܐ ܐܰܥܡܶܗ ܗ̄ܘܰܐ.“
ܗ̄ܺܝ ܬܶܫܒܽܘܚܬܳܐ ܕ݄ܙܟ̥ܰܪܝܳܐ ܘܺܗ̄ܝ ܢܒܺܝܽܘܬ̥ܰܝܕ̥ܶܗ
67ܘ݄ܙܟ̥ܰܪܝܳܐ، ܗ̄ܽܘ ܒܰܒܳܐ ܡܠܶܐ ܪܽܘܚܳܐ ܕܩܽܘܕܫܳܐ، ܘܡ݄ܬ̥ܢܰܒܶܐ ܠܶܗ ܘܐܡ݄ܪ ܠܶܗ: 68”ܡܒܰܪܟ̥ܳܐ ܝܳܐ ܡܳܪܝܳܐ ܐܰܠܳܗܳܐ ܕܺܐܝܣܪܳܐܶܝܠ ܕܰܐܬ̥ܺܝ ܓܰܒ ܗ̄ܽܘ ܥܰܡܰܝܕ̥ܶܗ، ܘܣ݄ܡ ܠܶܗ ܠܶܗ ܦܽܘܪܩܳܢܳܐ، 69ܘܡܰܩ݄ܡ ܠܶܗ ܠܰܢ ܦܳܪܽܘܩܳܐ ܪܰܒܳܐ ܒܽܗ̄ܘ ܒܰܝܬܳܐ ܕܕܰܘܺܝܕ̥ ܗ̄ܽܘ ܥܰܒܕܰܝܕ̥ܶܗ، 70ܐܟ̥ ܕ݄ܫܓ̥ܺܝܠ ܒܦܶܡܶܗ ܕܰܢܒܺܝ̈ܰܝܕ̥ܶܗ ܗ̄ܰܩّܰܕ̈ܺܝܫܶܐ ܕܡܶܢ̱ ܥܳܠܰܡ، 71ܕܗܺܝّܶܗ ܦܳܪܰܩ ܠܰܢ ܡܰܢ̱ ܒܥܶܠܕ̈ܒܳܒܰܝܕ̥ܰܢ ܘܡܺܗ̄ܝ ܐܺܝܕ̥ܳܐ ܕܟܽܘܠّܶܗ ܗ̄ܰܡܥܰܢ̈ܬܳܢܰܝܕ̥ܰܢ. 72ܘܣ݄ܡ ܠܶܗ ܗ̄ܽܘ ܚܢܳܢܰܝܕ̥ܶܗ ܥܰܡ ܗ̄ܰܒّܰܒܳܢ̈ܰܝܕ̥ܰܢ، ܘܡܰܕ̥ܟܰܪ ܠܶܗ ܗ̄ܰܘّܰܥܕ̈ܰܝܕ̥ܶܗ ܗ̄ܰܩّܰܕ̈ܺܝܫܶܐ، 73ܘܽܗ̄ܘ ܝܺܡܳܝܳܐ ܕܺܝܡܶܐ ܠܶܗ ܠܰܐܒܪܳܗܳܡ ܗ̄ܽܘ ܒܰܒܰܝܕ̥ܰܢ ܓܕܳܗ̄ܒܶܐ ܠܰܢ: 74ܦܽܘܪܩܳܢܳܐ ܡܶܢ̱ ܐܺܝܕ̥ܶܗ ܕܰܒܥܶܠܕ̈ܒܳܒܰܝܕ̥ܰܢ، ܘ݄ܕܠܳܐ ܙܽܘܥܬ̥ܳܐ ܣܳܓ̥ܕܺܝܢܰܐ ܩܽܘܕ̱ܡܶܗ 75ܟܽܘܠّܶܗ ܗ̄ܰܝّܰܘܡ̈ܳܬ̥ܰܝܕ̥ܰܢ ܒܟܺܐܢܽܘܬ̥ܳܐ ܘ݄ܒܙܰܕܺܝܩܽܘܬ̥ܳܐ. 76ܘܗܰܬ ܛܰܠܝܳܐ، ܗ̄ܽܘ ܢܒܺܝܳܐ ܕܽܗ̄ܘ ܥܶܠܳܝܳܐ ܓܡ݄ܩܪܰܬ، ܥܰܠ ܕ݄ܓܕ݄ܐܙّܳܟ̥ ܩ݄ܕ̱ܡ ܦܳܬ̥ܶܗ ܕܡܳܪܝܳܐ ܕ݄ܡܛܰܝܒܰܬ ܗ̄ܽܘ ܕܰܪܒܰܝܕ̥ܶܗ. 77ܓܕܳܗ̄ܒܶܐ ܝܕ̥ܰܥܬܳܐ ܕܰܚّܰܝ̈ܶܐ ܠܽܗ̄ܘ ܥܰܡܰܝܕ̥ܶܗ ܒܫܽܘܒܩܳܢܳܐ ܕܰܚ̈ܛܳܗܰܬّ̥ܶܗ، 78ܒܰܪّܰܚܡ̈ܶܐ ܕܽܗ̄ܘ ܚܢܳܢܳܐ ܕܰܐܠܳܗܰܝܕ̥ܰܢ ܕܰܐܒّܶܗ ܓܕܳܐܬ̥ܶܐ ܠܓܰܒܰܢ: ܢܽܘܗܪܳܐ ܡܺܗ̄ܝ ܫܡܰܝܳܐ، 79ܕܡܰܢܗ݄ܪ ܥܰܠ ܗܰܢ݄ܟ ܕܟ݄ܬܢܶܝ ܝܰܬܺܝܒ̥̈ܶܐ ܒܽܗ̄ܘ ܚܶܫܟ̥ܳܐ ܘܒܰܛّܶܠ̈ܳܠܶܐ ܕܽܗ̄ܘ ܡܰܘܬܳܐ، ܘܬܳܪ݄ܨ ܪ̈ܰܓ̥ܠܳܬ̥ܰܝܢܰܐ ܒܽܗ̄ܘ ܕܰܪܒܳܐ ܕܽܗ̄ܘ ܫܠܳܡܳܐ.“
80ܘܽܗ̄ܘ ܛܰܠܝܳܐ ܝܳܪܰܒ̥ ܗ̄ܘܰܐ ܘܡܺܝܚ݄ܨ ܗ̄ܘܰܐ ܒܺܗ̄ܝ ܪܽܘܚܳܐ، ܘܒܽܗ̄ܘ ܡܰܕ̥ܒܪܳܐ ܗܳܘܶܐ ܗ̄ܘܰܐ ܗܳܠ ܠܽܗ̄ܘ ܝܰܘܡܳܐ ܕܡܰܚܘܶܐ ܠܺܐܝܣܪܳܐܶܝܠ.
Currently Selected:
ܡܓܰܠܝܘܢ ܕܠܘܩܐ 1: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
ܡܓܰܠܝܘܢ ܕܠܘܩܐ 1
1
ܗ̄ܽܘ ܪܺܝܫܳܐ ܕܽܗ̄ܘ ܦܽܘܪܩܳܢܳܐ
1ܡܺܐܝܕ̥ܶܗ ܕܓ̥ܰܠܰܒܶܐ ܐܰܒܺܝܥܺܝ ܕܟ݄ܬ̥ܒ̥ܺܝ ܬܰܫܥܝ̈ܳܬ̥ܳܐ ܕܰܥܒܳܕ̥̈ܶܐ ܐܰܝܢܰܐ ܕܰܐܚܢܰܐ ܟܳܐܕ̥ܥܺܝܢܰܢّܶܗ ܛܳܒ̥ܳܐ ܛܳܒ̥ܳܐ، 2ܐܟ̥ ܕܽܗ̄ܘ ܡܶܕܶܐ ܕܡܰܫܠܰܡّܰܗ ܠܰܢ ܗܰܢ݄ܟ ܕܡܶܢ̱ ܡܶܩ݄ܕ̱ܡ ܗܰܘ݄ܢ ܚܰܙܳܝ̈ܶܐ ܘ݄ܡܫܰܡܫܳܢ̈ܶܐ ܕܺܗ̄ܝ ܡܶܠܬ̥ܳܐ، 3ܘ݄ܚܙܶܐ ܐܶܠܺܝ ܣܬܶܝ، ܥܰܠ ܕܟ݄ܬ ܗ̄ܘܰܝ ܐ̱ܢܳܐ ܩܰܪܺܝܒ̥ܳܐ ܠܟܘ̇ܠّܶܗ، ܕܚܳܝܰܪ ܐ̱ܢܳܐ ܐܰܒّܶܗ ܛܳܒ̥ܳܐ ܛܳܒ̥ܳܐ ܠܰܫܰܢ ܕܟܳܬ̥ܰܒ̥ ܐ̱ܢܳܐ ܠܳܟ̥ ܟܽܘܠ ܡܶܕܶܐ ܒܽܗ̄ܘ ܕܰܘܪܰܝܕ̥ܶܗ، ܢܰܨܺܝܚܳܐ ܬܶܐܳܘܦܺܝܠܶܐ، 4ܠܰܫܰܢ ܕ݄ܐܕ̥ܥܰܬ ܗ̄ܽܘ ܫܪܳܪܳܐ ܕܰܡّܰܐܡܪ̈ܶܐ ܕ݄ܡܬܰܠܡ݄ܕ̥ܰܬ ܐܰܠّܶܗ.
ܗ̄ܺܝ ܣܒܰܪܬ̥ܳܐ ܕܽܗ̄ܘ ܒܰܛܢܳܐ ܕܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
5ܒܰܝّܰܘܡ̈ܳܬ̥ܳܐ ܕܗܶܪܳܘܕ̥ܶܣ ܗ̄ܽܘ ܡܰܠܟܳܐ ܕܺܝܗܽܘܕ̥ܳܐ، ܟ݄ܬ ܗ̄ܘܰܐ ܚܰܕ̱ ܟܳܗܢܳܐ، ܐ݄ܫܡܶܗ ܙܟ̥ܰܪܝܳܐ، ܡܺܗ̄ܝ ܬܶܫܡܶܫܬܳܐ ܕܒܶܝܬ̥ ܐܰܒܺܝܳܐ. ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܡܰܢ̱ ܒܢ̈ܳܬ̥ܳܐ ܕܰܐܗܪܽܘܢ ܗ̄ܘܰܐ، ܐ݄ܫܡܰܗ ܐܶܠܺܝܫܒܰܥ. 6ܘܰܬܪ̈ܰܝّܶܗ ܙܰܕ̈ܺܝܩܶܐ ܗ̄ܘܰܝܢܶܝ ܩ݄ܕ̱ܡ ܐܰܠܳܗܳܐ، ܘ݄ܡܗܰܠܟ̥ܺܝ ܗ̄ܘܰܘ̱ ܒܟܽܘܠّܶܗ ܗ̄ܰܦّܽܘܩܕ̈ܳܢܶܐ ܘܒܺܗ̄ܝ ܟܺܐܢܽܘܬ̥ܳܐ ܕܡܳܪܝܳܐ ܕܠܳܐ ܦܰܘܕܳܐ. 7ܘܰܐܒܪܳܐ ܠܰܝ̱ܬ ܗ̄ܘܰܐ ܠّܶܗ، ܡܺܐܝܕ̥ܶܗ ܕܶܐܠܺܝܫܒܰܥ ܥܩܰܪܬ̥ܳܐ ܗ̄ܘܰܐ، ܘܰܬܪ̈ܰܝّܶܗ ܗܰܘ݄ܢ ܗ̄ܘܰܘ̱ ܪ̈ܰܒܶܐ ܒܽܗ̄ܘ ܥܽܘܡܪܳܐ.
8ܘܗܰܘܺܝ ܗ̄ܘܰܐ، ܗ̄ܺܝ ܢܰܩܠܐ ܕ݄ܡܟܰܗܰܢ ܗ̄ܘܰܐ ܒܽܗ̄ܘ ܕܰܘܪܳܐ ܕܺܗ̄ܝ ܬܶܫܡܶܫܬܰܝܕ̥ܶܗ ܩ݄ܕ̱ܡ ܐܰܠܳܗܳܐ، 9ܒܽܗ̄ܘ ܥܝܳܕ̥ܳܐ ܕܺܗ̄ܝ ܟܳܗܢܽܘܬ̥ܳܐ، ܡܰܛܺܝ ܠܶܗ (ܕܰܘܪܳܐ) ܕܡܰܚ݄ܬ ܒܰܣܡ̈ܶܐ، ܘܥܰܒ݄ܪ ܠܽܗ̄ܘ ܗܰܝܟܠܳܐ ܕܡܳܪܝܳܐ. 10ܘܽܗ̄ܘ ܥܰܡܳܐ ܟܽܘܠܶܗ ܡܨܰܠܶܐ ܗ̄ܘܰܐ ܠܰܪܒ̥ܰܠ ܒܽܗ̄ܘ ܙܰܒܢܳܐ ܕܰܒّܰܣܡ̈ܶܐ. 11ܘ݄ܚܙܶܐ ܐܶܠܶܗ، ܠ݄ܙܟ̥ܰܪܝܳܐ، ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܩܺܝܡܳܐ ܡܽܗ̄ܘ ܝܰܡܺܝܢܳܐ ܕܽܗ̄ܘ ܡܰܕ̥ܒܚܳܐ ܕܰܒّܰܣܡ̈ܶܐ. 12ܘ݄ܫܓ̥ܺܝܫ ܙܟ̥ܰܪܝܳܐ ܗ̄ܺܝ ܢܰܩܠܐ ܕ݄ܚܙܶܐ ܠܶܗ، ܘܙܽܘܥܬ̥ܳܐ ܢܰܦܺܝܠܳܐ ܐܰܥܠܶܗ. 13ܘܽܗ̄ܘ ܡܰܠܰܐܟ̥ܳܐ ܐܡ݄ܪ ܠܶܗ ܠܶܗ: ”ܙܟ̥ܰܪܝܳܐ، ܠܳܐ ܙܰܝܥܰܬ، ܥܰܠ ܕ݄ܫܡܺܝܥܳܐ ܗ̄ܺܝ ܨܠܽܘܬ̥ܰܝܕ̥ܳܟ̥، ܘܺܗ̄ܝ ܐܰܢ̱ܬ̥ܬܰܝܕ̥ܳܟ̥ ܐܶܠܺܝܫܒܰܥ ܓܡܰܘܠܕܳܐ ܠܳܟ̥ ܐܰܒܪܳܐ، ܘ݄ܓܩܳܪܰܬ ܐ݄ܫܡܶܗ ܝܽܘܚܰܢܳܢ. 14ܘ݄ܓܕܳܗ̄ܘܶܐ ܠܳܟ̥ ܦܨܺܝܚܽܘܬ̥ܳܐ ܘܒܽܘܣܳܡܳܐ، ܘܓ̥ܰܠܰܒܶܐ ܓܡ݄ܦܨܳܚܺܝ ܒܽܗ̄ܘ ܡܰܘܠܳܕ̥ܰܝܕ̥ܶܗ، 15ܥܰܠ ܕ݄ܓܕܳܗ̄ܘܶܐ ܪܰܒܳܐ ܩ݄ܕ̱ܡ ܡܳܪܝܳܐ. ܘܚܰܡܪܳܐ ܘܫܰܟ̥ܪܳܐ ܠ݄ܐ ܓܫܳܬܶܐ، ܘܪܽܘܚܳܐ ܕܩܽܘܕܫܳܐ ܓܡ݄ܡܠܶܐ ܗܶܫ ܗܺܝّܶܗ ܒܟܰܪܣܳܐ ܕܺܗ̄ܝ ܐܶܡܳܐ. 16ܘܓ݄ܕܡܰܕܥ݄ܪ ܓ̥ܰܠܰܒܶܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܠܡܳܪܝܳܐ ܐܰܠܳܗܰܬّ̥ܶܗ. 17ܘܗܺܝّܶܗ ܓܕ݄ܐܙّܶܗ ܩܽܘܕ̱ܡܶܗ ܒܺܗ̄ܝ ܪܽܘܚܳܐ ܘܒܽܗ̄ܘ ܚܰܝܠܳܐ ܕܶܐܠܺܝܳܐ ܗ̄ܽܘ ܢܒܺܝܳܐ ܕܡܰܕܥ݄ܪ ܗ̄ܽܘ ܠܶܒܳܐ ܕܰܒّܰܒ̈ܶܐ ܥܰܠ ܗ̄ܰܢ ܐܰܒܢ̈ܶܐ، ܘܠܰܐܝܢܰܐ ܕܠ݄ܐ ܟܫ݄ܡܥܺܝ ܠܺܝܕ̥ܰܥܬܳܐ ܕܰܟّܺܐܢ̈ܶܐ (ܓܡܰܕܥ݄ܪ)، ܘܕ݄ܡܛܰܝ݄ܒ ܠܡܳܪܝܳܐ ܥܰܡܳܐ ܓܡܺܝܪܳܐ.“ 18ܙܟ̥ܰܪܝܳܐ ܐܡ݄ܪ ܠܶܗ ܠܽܗ̄ܘ ܡܰܠܰܐܟ̥ܳܐ: ”ܐܰܝܕܰܪܒܳܐ ܓܕܳܐܕ̥ܰܥ ܐ̱ܢܳܐ ܗܰܬ̥ܶܐ، ܘܳܐܢܳܐ ܣܳܒ̥ܳܐ ܐ̱ܢܳܐ، ܘܺܗ̄ܝ ܐܰܢ̱ܬ̥ܬܰܝܕ̥ܺܝ ܝܰܪܺܝܒ̥ܳܐ ܒܽܗ̄ܘ ܥܽܘܡܪܳܐ؟“ 19ܘܡܰܕܥܰܪ ܠܶܗ ܗ̄ܽܘ ܡܰܠܰܐܟ̥ܳܐ ܘܐܡ݄ܪ ܠܶܗ ܠܶܗ: ”ܐܳܢܳܐ ܐ̱ܢܳܐ ܓܰܒܪܺܝܐܶܝܠ ܕ݄ܟܩܳܝܰܡ ܐ̱ܢܳܐ ܩ݄ܕ̱ܡ ܐܰܠܳܗܳܐ، ܘ݄ܡܫܰܕܰܪ ܐ̱ܢܳܐ ܕܡ݄ܫܓ̥ܰܠ ܐ̱ܢܳܐ ܐܰܥܡܳܟ̥ ܘ݄ܡܣܰܒܰܪ ܐ̱ܢܳܐ ܠܳܟ̥ ܗܰܢܺܝ. 20ܡܳܐܥܕܳܐ ܓܕܳܗ̄ܘܰܬ ܫܰܬܺܝܩܳܐ ܘܠܰܝܒܳܟ̥ ܕܡ݄ܫܓ̥ܳܠܰܬ ܗܳܠ ܠܽܗ̄ܘ ܝܰܘܡܳܐ ܕܗܰܢܺܝ ܓܕܳܗ̄ܘ݄ܢ، ܥܰܠ ܕܠܳܐ ܡܰܫ݄ܪ ܠܳܟ̥ ܠܰܡّܰܐܡܪ̈ܰܝܕ̥ܺܝ ܗܰܢܺܝ ܕܓ݄ܕܟܳܡܠܺܝ ܒܽܗ̄ܘ ܙܰܒܢܰܬّ̥ܶܗ.“
21ܘܽܗ̄ܘ ܥܰܡܳܐ ܩܳܝܰܡ ܗ̄ܘܰܐ ܘܢܳܛܰܪ ܗ̄ܘܰܐ ܠ݄ܙܟ̥ܰܪܝܳܐ، ܘܡܺܝܕܰܘܡܪܺܝ ܗ̄ܘܰܘ̱ ܥܰܠ ܗ̄ܽܘ ܥܶܘܳܩܰܝܕ̥ܶܗ ܕܒܽܗ̄ܘ ܗܰܝܟܠܳܐ. 22ܘܺܗ̄ܝ ܢܰܩܠܐ ܕܢܰܦ݄ܩ ܙܟ̥ܰܪܝܳܐ، ܠܳܐ ܩܳܕܰܪ ܗ̄ܘܰܐ ܕܡ݄ܫܓ̥݄ܠ ܐܰܥܡܰܝّܶܗ، ܘܰܐܕ̥ܺܝܥܺܝ ܕܚܶܙܘܳܐ ܚܙܶܐ ܠܶܗ ܒܽܗ̄ܘ ܗܰܝܟܠܳܐ. ܘܗܺܝّܶܗ ܒܰܪّܶܡ̈ܙܶܐ ܪܳܡܰܙ ܗ̄ܘܰܐ ܠّܶܗ، ܘܦܰܝ݄ܫ ܚܰܪܫܳܐ. 23ܘܺܗ̄ܝ ܢܰܩܠܐ ܕܟܰܡܺܝܠܺܝ ܗ̄ܰܝّܰܘܡ̈ܶܐ ܕܺܗ̄ܝ ܬܶܫܡܶܫܬܰܝܕ̥ܶܗ، ܐܰܙّܶܗ ܠܽܗ̄ܘ ܒܰܝܬܰܝܕ̥ܶܗ. 24ܘܗܰܘܺܝ ܒ݄ܬ̥݄ܪ ܡܰܢ̱ ܝّܰܘܡ̈ܳܬ̥ܰܢ݄ܟ، ܐܶܠܺܝܫܒܰܥ ܗ̄ܺܝ ܐܰܢ̱ܬ̥ܬܰܝܕ̥ܶܗ ܛܥܺܝܢܳܐ، ܘܬ݄ܠܝܳܐ ܗ̄ܘܰܐ ܪܽܘܚܰܗ ܚܰܡܫܳܐ ܝܰܪ̈ܚܶܐ، ܘ݄ܐܡّܳܪ̱ܐ ܗ̄ܘܰܐ: 25”ܗܰܢܺܝ ܣ݄ܡ ܠܶܗ ܐܰܥܡܺܝ ܡܳܪܝܳܐ، ܒܰܝّܰܘܡ̈ܶܐ ܕܚ݄ܪ ܠܶܗ ܐܶܒܺܝ ܕܡܳܝ݄ܕ ܗ̄ܺܝ ܢܶܟܦܽܘܬ̥ܰܝܕ̥ܺܝ ܕܒܰܝܢ ܗ̄ܰܢ ܢܳܫ̈ܶܐ.“
ܗ̄ܺܝ ܣܒܰܪܬ̥ܳܐ ܕܽܗ̄ܘ ܡܰܘܠܳܕܳܐ ܕܡܳܪܰܢ ܝܶܫܽܘܥ
26ܘܒܽܗ̄ܘ ܝܰܪܚܳܐ ܕܰܗ̄ܢ ܐ݄ܫܬܳܐ، ܡܫܰܕ݄ܪ ܓܰܒܪܺܝܐܶܝܠ ܗ̄ܽܘ ܡܰܠܰܐܟ̥ܳܐ ܡܶܢ̱ ܓܰܒ ܐܰܠܳܗܳܐ ܠܽܗ̄ܘ ܓܠܺܝܠܳܐ، ܠ݄ܡܕ̥ܺܝܢ̱ܬܳܐ ܕ݄ܐܫܡܰܗ ܢܳܨܪܰܬ̥، 27ܓܰܒ ܒܬ̥ܽܘܠܬܳܐ ܢܟ̥ܺܝܪܰܝܬܳܐ ܠܓܰܒ̥ܪܳܐ ܕ݄ܐܫܡܶܗ ܝܰܘܣܶܦ، ܡܽܗ̄ܘ ܒܰܝܬܳܐ ܕܕܰܘܺܝܕ̥، ܘ݄ܐܫܡܰܗ ܕܺܗ̄ܝ ܒܬ̥ܽܘܠܬܳܐ ܡܰܪܝܰܡ. 28ܘܽܗ̄ܘ ܡܰܠܰܐܟ̥ܳܐ ܥܰܒ݄ܪ ܠܣܺܝܕ̥ܰܗ، ܘܐܡ݄ܪ ܠܶܗ ܠܰܗ: ”ܫܠܳܡܳܐ ܐܶܠܰܟ̥ ܝܰܐ ܡܠܺܝܬ̥ܳܐ ܛܰܝܒܽܘܬ̥ܳܐ، ܡܳܪܰܢ ܐܰܥܡܰܟ̥ ܝܳܐ، ܡܒܰܪܰܟ̥ܬܳܐ ܗܰܬ ܒܰܝܢ ܗ̄ܰܢ ܢܶܫ̈ܶܐ.“ 29ܘܗܺܝّܰܗ، ܗ̄ܺܝ ܢܰܩܠܐ ܕ݄ܚܙܶܐ ܠܰܗ، ܙܰܝܺܝܥܳܐ ܡܽܗ̄ܘ ܡܰܐܡܪܰܝܕ̥ܶܗ، ܘܚܳܫܒ̥ܳܐ ܗ̄ܘܰܐ ܘ݄ܐܡّܳܪ̱ܐ ܗ̄ܘܰܐ ܕܡ݄ܢܝܳܐ ܗ̄ܽܘ ܫܠܳܡܰܢܳܐ؟ 30ܘܽܗ̄ܘ ܡܰܠܰܐܟ̥ܳܐ ܐܡ݄ܪ ܠܶܗ ܠܰܗ: ”ܡܰܪܝܰܡ، ܠܳܐ ܙܰܝܥܰܬ، ܥܰܠ ܕܗܰܘܺܝ ܠܰܟ̥ ܛܰܝܒܽܘܬ̥ܳܐ ܓܰܒ ܐܰܠܳܗܳܐ. 31ܟܰܐܠܰܟ̥ ܓܡ݄ܛܥܳܢܰܬ ܘ݄ܓܝ݄ܠܕ̥ܰܬ ܐܰܒܪܳܐ، ܘ݄ܓܩܳܪܝܰܬ ܐ݄ܫܡܶܗ ܝܶܫܽܘܥ. 32ܗܰܢܳܐ ܓܕܳܗ̄ܘܶܐ ܪܰܒܳܐ، ܘܽܗ̄ܘ ܐܰܒܪܳܐ ܕܽܗ̄ܘ ܥܶܠܳܝܳܐ ܓܡ݄ܩܪܶܐ. ܘܡܳܪܝܳܐ ܐܰܠܳܗܳܐ ܓܕܳܗ̄ܒܶܐ ܠܶܗ ܗ̄ܽܘ ܟܽܘܪܣܝܳܐ ܕܕܰܘܺܝܕ̥ ܗ̄ܽܘ ܒܰܒܰܝܕ̥ܶܗ. 33ܘܓ݄ܕܡܰܡܠ݄ܟ ܥܰܠ ܗ̄ܽܘ ܒܰܝܬܳܐ ܕܝܰܥܩܽܘܒ ܠܥܳܠܰܡ، ܘܠܺܗ̄ܝ ܡܰܠܟܽܘܬ̥ܰܝܕ̥ܶܗ ܚܰܪܰܝܬܳܐ ܠ݄ܐ ܓܕܳܗ̄ܘܶܐ .“ 34ܡܰܪܝܰܡ ܐܡ݄ܪ ܠܰܗ ܠܽܗ̄ܘ ܡܰܠܰܐܟ̥ܳܐ: ”ܐܰܝܕܰܪܒܳܐ ܓܕܽܗ̄ܘܝܳܐ ܗܰܬ̥ܶܐ ܕܓܰܒ̥ܪܳܐ ܠܰܐ ܐܕ̥݄ܥ ܠܺܝ؟“ 35ܡܰܕܥܰܪ ܠܶܗ ܗ̄ܽܘ ܡܰܠܰܐܟ̥ܳܐ ܘܐܡ݄ܪ ܠܶܗ ܠܰܗ: ”ܪܽܘܚܳܐ ܕܩܽܘܕܫܳܐ ܓܕܳܐܬ̥ܝܳܐ، ܘܽܗ̄ܘ ܚܰܝܠܳܐ ܕܽܗ̄ܘ ܥܶܠܳܝܳܐ ܓܢܳܚ݄ܬ ܐܰܥܠܰܟ̥، ܡܰܗ̄ܘܟ̥ܰܐ ܗܰܘܳܐ ܕܡܺܝܬܰܘܠ݄ܕ̥ ܐܶܒܰܟ̥ ܩܰܕܺܝܫܳܐ ܝܳܐ، ܘܽܗ̄ܘ ܐܰܒܪܳܐ ܕܰܐܠܳܗܳܐ ܓܡ݄ܩܪܶܐ. 36ܘܟܰܐܠܰܗ ܐܶܠܺܝܫܒܰܥ، ܗ̄ܺܝ ܩܰܪܽܒ̥ܬܰܝܕ̥ܰܟ̥، ܗܺܝّܰܗ ܣܬܶܝ ܛܥܺܝܢܳܐ ܐܰܒܪܳܐ ܒܺܗ̄ܝ ܣܳܒ̥ܽܘܬ̥ܰܝܕ̥ܰܗ. ܘܗܰܢܳܐ ܝܳܐ ܗ̄ܽܘ ܝܰܪܚܳܐ ܕܰܗ̄ܢ ܐ݄ܫܬܳܐ ܠܰܗ̄ܝܳܐ ܕ݄ܟܡ݄ܩܪܳܝܳܐ ܥܩܰܪܬ̥ܳܐ، 37ܥܰܠ ܕܠܰܝܬ ܡܶܕܶܐ ܥܰܣܩܳܐ ܩ݄ܕ̱ܡ ܐܰܠܳܗܳܐ.“ 38ܘܐܡ݄ܪ ܠܰܗ ܡܰܪܝܰܡ: ”ܟܰܐܠܺܝ ܐ̱ܢܳܐ ܗ̄ܺܝ ܓܪܰܥܬܳܐ ܕܡܳܪܝܳܐ، ܛܪܳܐ ܗ̄ܘܶܐ ܠܺܝ ܐܟ̥ ܕܽܗ̄ܘ ܡܰܐܡܪܰܝܕ̥ܳܟ̥.“ ܘܰܐܙّܶܗ ܗ̄ܽܘ ܡܰܠܰܐܟ̥ܳܐ ܡܶܢ̱ ܓܰܒܰܗ.
ܗ̄ܽܘ ܡܰܐܙܠܳܐ ܕܡܰܪܝܰܡ ܣܶܕ̱ ܐܶܠܺܝܫܒܰܥ
39ܘܒܰܝّܰܘܡ̈ܳܬ̥ܰܢ݄ܟ، ܩܰܝܺܝܡܳܐ ܡܰܪܝܰܡ ܘܰܐܙّܰܗ ܡܰܠ݄ܙܬܳܐ ܠܽܗ̄ܘ ܛܽܘܪܳܐ، ܠܺܗ̄ܝ ܡܕ̥ܺܝܢ̱ܬܳܐ ܕܺܝܗܽܘܕ̥. 40ܘܥܰܒܺܝܪܳܐ ܠܽܗ̄ܘ ܒܰܝܬܳܐ ܕ݄ܙܟ̥ܰܪܝܳܐ، ܘ݄ܡܫܰܐܶܠ ܠܰܗ ܒܽܗ̄ܘ ܫܠܳܡܳܐ ܕܶܐܠܺܝܫܒܰܥ. 41ܘܗܰܘܺܝ ܗ̄ܺܝ ܢܰܩܠܐ ܕܫܰܡܺܝܥܳܐ ܐܶܠܺܝܫܒܰܥ ܗ̄ܽܘ ܫܠܳܡܳܐ ܕܡܰܪܝܰܡ، ܗ̄ܽܘ ܙܥܽܘܪܳܐ ܕ݄ܒܟܰܪܣܰܗ ܦܨܺܝܚ ܘܪܰܡ݄ܫ، ܘܡܰܠܝܳܐ ܐܶܠܺܝܫܒܰܥ ܪܽܘܚܳܐ ܕܩܽܘܕܫܳܐ. 42ܘܡܰܙܥܰܩ ܠܰܗ ܒܩܳܠܳܐ ܥܶܠܳܝܳܐ ܘܐܡ݄ܪ ܠܰܗ ܠܡܰܪܝܰܡ: ”ܡܒܰܪܰܟ̥ܬܳܐ ܗܰܬ ܒܰܗ̄ܢ ܢܶܫ̈ܶܐ، ܘ݄ܡܒܰܪܟ̥ܳܐ ܝܳܐ ܗ̄ܽܘ ܦܺܐܪܳܐ ܕ݄ܒܟܰܪܣܰܟ̥. 43ܡܰܐܝܟܳܐ ܠܺܝ ܗܰܬ̥ܶܐ ܕܺܗ̄ܝ ܐܶܡܳܐ ܕܽܗ̄ܘ ܡܳܪܰܝܕ̥ܺܝ ܐ݄ܬ̥ܝܳܐ ܠܣܺܝܕ̥ܺܝ، 44ܟܰܐܠܶܗ، ܗ̄ܺܝ ܢܰܩܠܐ ܕܢܰܦ݄ܠ ܗ̄ܽܘ ܩܳܠܳܐ ܕܽܗ̄ܘ ܫܠܳܡܰܝܕ̥ܰܟ̥ ܒܰܐܕ̥̈ܢܺܝ، ܒ݄ܦܨܺܝܚܽܘܬ̥ܳܐ ܪܰܒܬ̥ܳܐ ܪܰܡ݄ܫ ܗ̄ܽܘ ܙܥܽܘܪܳܐ ܒܟܰܪܣܺܝ. 45ܘܛܽܘܒܳܐ ܠܡܰܢ ܕ݄ܡܗܰܝܡܰܢ ܠܰܗ ܕ݄ܓܕܳܗ̄ܘ݄ܢ ܗܰܢܺܝ ܕ݄ܫܓ̥ܺܝܠ ܐܰܥܡܰܗ ܡܶܢ̱ ܡܳܪܝܳܐ.“
ܗ̄ܺܝ ܬܶܫܒܽܘܚܬܳܐ ܕܡܰܪܝܰܡ
46ܘܡܰܪܝܰܡ ܐܡ݄ܪ ܠܰܗ: ”ܢܰܦܫܺܝ ܟܡܰܘܪܒ̥ܳܐ ܡܳܪܝܳܐ، 47ܘܪܽܘܚܺܝ ܟܡ݄ܦܨܳܚܳܐ ܒܰܐܠܳܗܳܐ ܗ̄ܽܘ ܡܰܚܝܳܢܰܝܕ̥ܺܝ، 48ܕܚ݄ܪ ܠܶܗ ܒܺܗ̄ܝ ܡܰܟܺܝܟ̥ܽܘܬ̥ܳܐ ܕܺܗ̄ܝ ܓܪܰܥܬܰܝܕ̥ܶܗ، ܕܟܰܐܠܶܗ ܡܳܐܥܕܳܐ ܗ̄ܰܕّܳܪ̈ܶܐ ܟܽܘܠّܶܗ ܛܽܘܒܳܐ ܓܕܳܗ̄ܒ݄ܢ ܠܺܝ، 49ܡܺܐܝܕ̥ܶܗ ܕܽܗ̄ܘ ܚܰܝܠܬ̥ܳܢܳܐ ܣ݄ܡ ܠܶܗ ܐܰܥܡܺܝ ܡܶܕ̈ܳܢܶܐ ܪ̈ܰܒܶܐ. ܘ݄ܐܫܡܶܗ ܩܰܕܺܝܫܳܐ ܝܳܐ، 50ܘܽܗ̄ܘ ܚܢܳܢܰܝܕ̥ܶܗ ܟܦܳܝ݄ܫ ܠܙܰܒܢ̈ܶܐ ܘܕܳܪ̈ܶܐ ܥܰܠ ܐܰܝܢܰܐ ܕܣܳܓ̥ܕܺܝ ܠܶܗ. 51ܣ݄ܡ ܠܶܗ ܙܳܟ̥ܽܘܬ̥ܳܐ ܒ݄ܕܪܳܥܶܗ، ܘ݄ܡܒܰܪܒܰܙ ܠܶܗ ܗܰܢ݄ܟ ܕܚܳܙ݄ܢ ܗ̄ܘܰܘ̱ ܪ̈ܽܘܚܰܝّܶܗ ܪ̈ܰܒܶܐ. 52ܡܰܢܦܶܠ ܠܶܗ ܡܳܪ̈ܶܐ ܕܽܗ̄ܘ ܚܰܝܠܳܐ ܡܰܢ̱ ܟّܽܘܪ̈ܣܝܶܐ، ܘܡܰܥܠܶܐ ܠܶܗ ܗ̄ܰܡّܰܟܺܝܟ̥̈ܶܐ. 53ܡܰܣܒ̥ܰܥ ܠܶܗ ܗ̄ܰܟّܰܦܺܝ̈ܢܶܐ ܛܳܒ̥̈ܳܬ̥ܳܐ، ܘܡܰܦܩܰܪ ܠܶܗ ܗ̄ܰܥّܰܬܺܝܪ̈ܶܐ. 54ܡܥܰܕܰܪ ܠܶܗ ܗ̄ܽܘ ܓܪܶܝܥܰܝܕ̥ܶܗ ܐܺܝܣܪܳܐܶܝܠ، ܘܡܰܚܘܶܐ ܠܶܗ ܗ̄ܽܘ ܚܢܳܢܰܝܕ̥ܶܗ، 55ܐܟ̥ ܕ݄ܫܓ̥ܺܝܠ ܥܰܡ ܗ̄ܰܒّܰܒܳܢ̈ܰܝܕ̥ܰܢ، ܥܰܡ ܐܰܒܪܳܗܳܡ ܘܥܰܡ ܗ̄ܽܘ ܙܰܪܥܰܝܕ̥ܶܗ ܠܥܳܠܰܡ.“ 56ܘܦܰܝܺܝܫܳܐ ܡܰܪܝܰܡ ܓܰܒ ܐܶܠܺܝܫܒܰܥ ܡܶܕܶܐ ܬܠܳܬ̥ܳܐ ܝܰܪ̈ܚܶܐ ܘܕܰܥܺܝܪܳܐ ܠܽܗ̄ܘ ܒܰܝܬܰܝܕ̥ܰܗ.
ܗ̄ܽܘ ܡܰܘܠܳܕܳܐ ܕܝܽܘܚܰܢܳܢ ܗ̄ܽܘ ܡܰܥܡܕ̥ܳܢܳܐ
57ܘܗܰܘܺܝ ܗ̄ܘܰܐ ܗ̄ܽܘ ܙܰܒܢܳܐ ܕܶܐܠܺܝܫܒܰܥ ܕܝܳܠܕܳܐ، ܘܡܰܘܠܰܕ ܠܰܗ ܐܰܒܪܳܐ. 58ܘܫܰܡܺܝܥܺܝ ܗ̄ܰܫܒܳܒ̈ܰܝܕ̥ܰܗ ܘܰܩّܰܪ̈ܺܝܒ̥ܰܝܕ̥ܰܗ ܕܰܐܠܳܗܳܐ ܓ̥ܰܠܰܒܶܐ ܡܰܪܚܰܡ ܠܶܗ ܐܰܥܠܰܗ، ܘܡ݄ܦܨܳܚܺܝ ܗ̄ܘܰܘ̱ ܐܰܥܡܰܗ. 59ܘܗܰܘܺܝ ܠܽܗ̄ܘ ܝܰܘܡܳܐ ܕܰܬܡܰܢܝܳܐ، ܐܰܬ̥݄ܢ ܕܓ݄ܙܪܺܝ (ܡܛܰܗܪܺܝ) ܠܽܗ̄ܘ ܛܰܠܝܳܐ ܘܩܳܪ݄ܢ ܗ̄ܘܰܝ ܠܶܗ ܒ݄ܐܫܡܶܗ ܕܽܗ̄ܘ ܒܰܒܳܐ، ܙܟ̥ܰܪܝܳܐ. 60ܘܺܗ̄ܝ ܐܶܡܳܐ ܡܰܕܥܰܪ ܠܰܗ ܘܐܡ݄ܪ ܠܰܗ ܠّܶܗ: ”ܠܳܐ ܗܰܘܟ̥ܰܐ، ܐܶܠܳܐ ܓܡ݄ܩܪܶܐ ܝܽܘܚܰܢܳܢ.“ 61ܘܐܡ݄ܪّܰܗ ܠܰܗ: ”ܠܰܝܬ ܢܳܫܳܐ ܡܰܗ̄ܢ ܢܳܫ̈ܰܝܕ̥ܰܟ̥ (ܒܺܗ̄ܝ ܫܰܪܒܬ̥ܰܝܕ̥ܰܟ̥) ܕ݄ܟܡ݄ܩܪܶܐ ܒܽܗ̄ܘ ܐ݄ܫܡܰܢܳܐ.“ 62ܘ݄ܪܡ݄ܙّܶܗ ܠܽܗ̄ܘ ܒܰܒܰܝܕ̥ܶܗ ܕܡ݄ܢ ܟܳܐܒ݄ܥ ܡܰܚ݄ܬ ܐ݄ܫܡܶܗ. 63ܘܰܐܒ݄ܥ ܠܽܘܚܳܐ، ܘ݄ܟܬ̥ܽܒ̥ ܠܶܗ ܘܐܡ݄ܪ ܠܶܗ: ”ܝܽܘܚܰܢܳܢ ܝܳܐ ܐ݄ܫܡܶܗ.“ ܘܟܽܘܠّܶܗ ܡܕܰܘܡܪܺܝ. 64ܘܡܶܚܕ̥ܳܐ ܦܬܺܝܚ ܦܶܡܶܗ ܘܠܶܫܳܢܶܗ، ܘ݄ܫܓ̥ܺܝܠ ܘ݄ܡܒܰܪܰܟ̥ ܠܶܗ ܠܰܐܠܳܗܳܐ. 65ܘܗܰܘܝܳܐ ܙܽܘܥܬ̥ܳܐ ܥܰܠ ܗ̄ܰܫܒܳܒ̈ܰܬّ̥ܶܗ ܟܽܘܠّܶܗ. ܘ݄ܒܟܽܘܠܶܗ ܗ̄ܽܘ ܛܽܘܪܳܐ ܕܺܝܗܽܘܕ̥، ܗܰܢܺܝ ܡܺܝܬܰܫܓ̥ܠܺܝ ܗ̄ܘܰܘ̱. 66ܘܟܽܘܠّܶܗ ܕܫܰܡܺܝܥܺܝ ܚ݄ܫܒ̥ܺܝ ܗ̄ܘܰܘ̱ ܒܠܶܒܰܝّܶܗ ܘ݄ܐܡّܺܪ̱ܝ ܗ̄ܘܰܘ̱: ”ܡ݄ܢ ܓܕܳܗ̄ܘܶܐ ܗ̄ܽܘ ܛܰܠܝܰܢܳܐ؟ ܘܺܐܝܕ̥ܶܗ ܕܡܳܪܝܳܐ ܐܰܥܡܶܗ ܗ̄ܘܰܐ.“
ܗ̄ܺܝ ܬܶܫܒܽܘܚܬܳܐ ܕ݄ܙܟ̥ܰܪܝܳܐ ܘܺܗ̄ܝ ܢܒܺܝܽܘܬ̥ܰܝܕ̥ܶܗ
67ܘ݄ܙܟ̥ܰܪܝܳܐ، ܗ̄ܽܘ ܒܰܒܳܐ ܡܠܶܐ ܪܽܘܚܳܐ ܕܩܽܘܕܫܳܐ، ܘܡ݄ܬ̥ܢܰܒܶܐ ܠܶܗ ܘܐܡ݄ܪ ܠܶܗ: 68”ܡܒܰܪܟ̥ܳܐ ܝܳܐ ܡܳܪܝܳܐ ܐܰܠܳܗܳܐ ܕܺܐܝܣܪܳܐܶܝܠ ܕܰܐܬ̥ܺܝ ܓܰܒ ܗ̄ܽܘ ܥܰܡܰܝܕ̥ܶܗ، ܘܣ݄ܡ ܠܶܗ ܠܶܗ ܦܽܘܪܩܳܢܳܐ، 69ܘܡܰܩ݄ܡ ܠܶܗ ܠܰܢ ܦܳܪܽܘܩܳܐ ܪܰܒܳܐ ܒܽܗ̄ܘ ܒܰܝܬܳܐ ܕܕܰܘܺܝܕ̥ ܗ̄ܽܘ ܥܰܒܕܰܝܕ̥ܶܗ، 70ܐܟ̥ ܕ݄ܫܓ̥ܺܝܠ ܒܦܶܡܶܗ ܕܰܢܒܺܝ̈ܰܝܕ̥ܶܗ ܗ̄ܰܩّܰܕ̈ܺܝܫܶܐ ܕܡܶܢ̱ ܥܳܠܰܡ، 71ܕܗܺܝّܶܗ ܦܳܪܰܩ ܠܰܢ ܡܰܢ̱ ܒܥܶܠܕ̈ܒܳܒܰܝܕ̥ܰܢ ܘܡܺܗ̄ܝ ܐܺܝܕ̥ܳܐ ܕܟܽܘܠّܶܗ ܗ̄ܰܡܥܰܢ̈ܬܳܢܰܝܕ̥ܰܢ. 72ܘܣ݄ܡ ܠܶܗ ܗ̄ܽܘ ܚܢܳܢܰܝܕ̥ܶܗ ܥܰܡ ܗ̄ܰܒّܰܒܳܢ̈ܰܝܕ̥ܰܢ، ܘܡܰܕ̥ܟܰܪ ܠܶܗ ܗ̄ܰܘّܰܥܕ̈ܰܝܕ̥ܶܗ ܗ̄ܰܩّܰܕ̈ܺܝܫܶܐ، 73ܘܽܗ̄ܘ ܝܺܡܳܝܳܐ ܕܺܝܡܶܐ ܠܶܗ ܠܰܐܒܪܳܗܳܡ ܗ̄ܽܘ ܒܰܒܰܝܕ̥ܰܢ ܓܕܳܗ̄ܒܶܐ ܠܰܢ: 74ܦܽܘܪܩܳܢܳܐ ܡܶܢ̱ ܐܺܝܕ̥ܶܗ ܕܰܒܥܶܠܕ̈ܒܳܒܰܝܕ̥ܰܢ، ܘ݄ܕܠܳܐ ܙܽܘܥܬ̥ܳܐ ܣܳܓ̥ܕܺܝܢܰܐ ܩܽܘܕ̱ܡܶܗ 75ܟܽܘܠّܶܗ ܗ̄ܰܝّܰܘܡ̈ܳܬ̥ܰܝܕ̥ܰܢ ܒܟܺܐܢܽܘܬ̥ܳܐ ܘ݄ܒܙܰܕܺܝܩܽܘܬ̥ܳܐ. 76ܘܗܰܬ ܛܰܠܝܳܐ، ܗ̄ܽܘ ܢܒܺܝܳܐ ܕܽܗ̄ܘ ܥܶܠܳܝܳܐ ܓܡ݄ܩܪܰܬ، ܥܰܠ ܕ݄ܓܕ݄ܐܙّܳܟ̥ ܩ݄ܕ̱ܡ ܦܳܬ̥ܶܗ ܕܡܳܪܝܳܐ ܕ݄ܡܛܰܝܒܰܬ ܗ̄ܽܘ ܕܰܪܒܰܝܕ̥ܶܗ. 77ܓܕܳܗ̄ܒܶܐ ܝܕ̥ܰܥܬܳܐ ܕܰܚّܰܝ̈ܶܐ ܠܽܗ̄ܘ ܥܰܡܰܝܕ̥ܶܗ ܒܫܽܘܒܩܳܢܳܐ ܕܰܚ̈ܛܳܗܰܬّ̥ܶܗ، 78ܒܰܪّܰܚܡ̈ܶܐ ܕܽܗ̄ܘ ܚܢܳܢܳܐ ܕܰܐܠܳܗܰܝܕ̥ܰܢ ܕܰܐܒّܶܗ ܓܕܳܐܬ̥ܶܐ ܠܓܰܒܰܢ: ܢܽܘܗܪܳܐ ܡܺܗ̄ܝ ܫܡܰܝܳܐ، 79ܕܡܰܢܗ݄ܪ ܥܰܠ ܗܰܢ݄ܟ ܕܟ݄ܬܢܶܝ ܝܰܬܺܝܒ̥̈ܶܐ ܒܽܗ̄ܘ ܚܶܫܟ̥ܳܐ ܘܒܰܛّܶܠ̈ܳܠܶܐ ܕܽܗ̄ܘ ܡܰܘܬܳܐ، ܘܬܳܪ݄ܨ ܪ̈ܰܓ̥ܠܳܬ̥ܰܝܢܰܐ ܒܽܗ̄ܘ ܕܰܪܒܳܐ ܕܽܗ̄ܘ ܫܠܳܡܳܐ.“
80ܘܽܗ̄ܘ ܛܰܠܝܳܐ ܝܳܪܰܒ̥ ܗ̄ܘܰܐ ܘܡܺܝܚ݄ܨ ܗ̄ܘܰܐ ܒܺܗ̄ܝ ܪܽܘܚܳܐ، ܘܒܽܗ̄ܘ ܡܰܕ̥ܒܪܳܐ ܗܳܘܶܐ ܗ̄ܘܰܐ ܗܳܠ ܠܽܗ̄ܘ ܝܰܘܡܳܐ ܕܡܰܚܘܶܐ ܠܺܐܝܣܪܳܐܶܝܠ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation