ܡܓܰܠܝܘܢ ܕܝܘܚܢܢ 7

ܝܶܫܽܘܥ ܟܣܳܠ݄ܩ ܠܰܝّܰܘܡ̈ܶܐ ܕܽܗ̄ܘ ܥܶܐܕ̥ܳܐ ܥܰܠ ܡܟܰܣܝܳܐ

1ܘܒ݄ܬ̥݄ܪ ܡܰܗ̄ܢܺܝ، ܡܗܰܠܰܟ̥ ܗ̄ܘܰܐ ܝܶܫܽܘܥ ܒܽܗ̄ܘ ܓܠܺܝܠܳܐ، ܘܠܳܐ ܐܒܰܥ ܗ̄ܘܰܐ ܕ݄ܡܗܰܠ݄ܟ̥ ܒܺܝܗܽܘܕ̥ ܡܺܐܝܕ̥ܶܗ ܕܰܝّܽܘܕ̥̈ܳܝܶܐ ܐ݄ܒܥܺܝ ܗ̄ܘܰܘ̱ ܕܩܳܛܠܺܝ ܠܶܗ. 2ܘܩܰܪܽܒ̥ ܗ̄ܘܰܐ ܗ̄ܽܘ ܥܶܐܕ̥ܳܐ ܕܰܡ̈ܛܰܠܶܐ ܕܰܝّܽܘܕ̥̈ܳܝܶܐ. 3ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܐܡ݄ܪّܰܗ ܠܶܗ: ”ܢܦܰܩ ܡܰܗ̄ܪܟܶܐ ܘܙܳܟ̥ ܠܺܝܗܽܘܕ̥ ܕܚܳܙ݄ܢ ܗ̄ܰܬّܰܠܡܺܝܕ̥̈ܰܝܕ̥ܳܟ̥ ܗ̄ܰܥܒܳܕ̥̈ܶܐ ܕ݄ܟܣܰܝܡܰܬ، 4ܥܰܠ ܕܠܰܝܬ ܢܳܫܳܐ ܕܣܳܝ݄ܡ ܡܶܕܶܐ ܒܟܰܣܝܳܐ ܘܗܺܝّܶܗ ܟܳܐܒ݄ܥ ܕܡܰܚܘܶܐ ܒܓܰܠܝܳܐ. ܘܶܐܢ ܗܰܢܺܝ ܟܣܰܝܡܰܬ، ܡܰܚܘܰܝ ܪܽܘܚܳܟ̥ ܠܽܗ̄ܘ ܥܳܠܡܳܐ.“ 5ܡܺܐܝܕ̥ܶܗ ܕܰܗ̄ܢ ܐܰܚ̈ܽܘܢܳܢܰܝܕ̥ܶܗ ܣܬܶܝ ܠܳܐ ܡܗܰܝܡܰܢّܶܗ ܐܶܒܶܗ. 6ܘܐܡ݄ܪ ܠܰܗ ܠّܶܗ ܝܶܫܽܘܥ: ”ܗ̄ܽܘ ܙܰܒܢܰܝܕ̥ܺܝ ܗܶܫ ܠܳܐ ܡܰܛܺܝ. ܐܶ‌ܠܳܐ ܗܰܬܽܘ ܟܽܘܠ ܙܰܒܢܳܐ ܗ̄ܽܘ ܙܰܒܢܰܬ̥ܟ̥ܽܘ ܝܳܐ. 7ܗ̄ܽܘ ܥܳܠܡܳܐ ܠܰܝܒܶܗ ܕܡܥܰܢ݄ܬ ܡ݄ܢܟ̥ܽܘ، ܐܶ‌ܠܳܐ ܟ݄ܡܥܰܢ݄ܬ ܡܶܢܺܝ ܥܰܠ ܕ݄ܟܣܳܗܰܕ ܐ̱ܢܳܐ ܐܰܥܠܶܗ ܕܰܥܒܳܕ̥̈ܰܝܕ̥ܶܗ ܒܺܝܫ̈ܶܐ ܢܶܝ. 8ܗܰܬܽܘ ܣܠܰܩܽܘ ܠܽܗ̄ܘ ܥܶܐܕ̥ܰܢܳܐ، ܐܳܢܳܐ ܠ݄ܐ ܟܣܳܠܰܩ ܐ̱ܢܳܐ ܐܳܥܕܳܐ ܠܽܗ̄ܘ ܥܶܐܕ̥ܰܢܳܐ، ܥܰܠ ܕܽܗ̄ܘ ܙܰܒܢܰܝܕ̥ܺܝ ܗܶܫ ܠܳܐ ܬܰܝ݄ܡ.“ 9ܐܡ݄ܪ ܠܶܗ ܗܰܢܺܝ، ܘܦܰܝ݄ܫ ܒܽܗ̄ܘ ܓܠܺܝܠܳܐ.

10ܘܺܗ̄ܝ ܢܰܩܠܐ ܕܣܰܠܺܝܩܺܝ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܠܽܗ̄ܘ ܥܶܐܕ̥ܳܐ، ܗܺܝّܶܗ ܣܬܶܝ ܣܰܠ݄ܩ ܠܳܐ ܒܓܰܠܝܳܐ، ܐܶ‌ܠܳܐ ܐܟ̥ ܕ݄ܡܟܰܣܝܳܐ. 11ܘܰܝّܽܘܕ̥̈ܳܝܶܐ ܟܳܪܟ̥ܺܝ ܗ̄ܘܰܘ̱ ܐܰܥܠܶܗ ܒܽܗ̄ܘ ܥܶܐܕ̥ܳܐ ܘ݄ܐܡّܺܪ̱ܝ ܗ̄ܘܰܘ̱: ”ܗܰܘܳܐ ܐܰܝܟܳܐ ܝܳܐ؟“ 12ܘܟ݄ܬ ܗ̄ܘܰܐ ܛܽܘܪܛܳܡܳܐ ܓ̥ܰܠܰܒܶܐ ܐܰܥܠܶܗ ܒܰܝܢ ܗ̄ܰܢ ܢܳܫ̈ܶܐ، ܗ݄ܢ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܛܳܒ̥ܳܐ ܝܳܐ“، ܘܗ݄ܢ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܠܳܐ، ܐܶ‌ܠܳܐ ܟܡܰܛܥܶܐ ܗ̄ܽܘ ܥܰܡܳܐ.“ 13ܘܢܳܫܳܐ ܠ݄ܐ ܡ݄ܫܓ̥ܰܠ ܗ̄ܘܰܐ ܐܰܥܠܶܗ ܒܓܰܠܝܳܐ ܡܺܗ̄ܝ ܙܽܘܥܬ̥ܳܐ ܕܰܝّܽܘܕ̥̈ܳܝܶܐ.

ܝܶܫܽܘܥ ܟܡܰܘܠ݄ܦ ܒܰܝّܰܘܡ̈ܳܬ̥ܳܐ ܕܽܗ̄ܘ ܥܶܐܕ̥ܳܐ

14ܘܒܽܗ̄ܘ ܦܰܠܓܳܐ ܕܰܝّܰܘܡ̈ܶܐ ܕܽܗ̄ܘ ܥܶܐܕ̥ܳܐ، ܣܰܠ݄ܩ ܝܶܫܽܘܥ ܠܽܗ̄ܘ ܗܰܝܟܠܳܐ ܘܡܰܘܠܰܦ ܗ̄ܘܰܐ. 15ܘܡܺܝܕܰܘܡܪܺܝ ܗ̄ܘܰܘ̱ ܗ̄ܰܝّܽܘܕ̥̈ܳܝܶܐ ܘ݄ܐܡّܺܪ̱ܝ ܗ̄ܘܰܘ̱: ”ܐܰܝܕܰܪܒܳܐ ܟܳܐܕ̥݄ܥ ܗ̄ܰܟܬ̥ܳܒ̥̈ܶܐ، ܘܗܺܝّܶܗ ܠܳܐ ܝܰܠ݄ܦ.“ 16ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܗ̄ܽܘ ܝܽܘܠܦܳܢܰܝܕ̥ܺܝ ܠܰܝ̱ܬ ܝܳܐ ܕܺܝܕ̥ܺܝ، ܐܶ‌ܠܳܐ ܕܰܗ̄ܘܳܐ ܕ݄ܡܫܰܕܰܪ ܠܶܗ ܠܺܝ. 17ܡܰܢ ܕܳܐܒ݄ܥ ܕܣܳܝ݄ܡ ܗ̄ܽܘ ܨܶܒܝܳܢܳܐ ܕܰܐ‌ܠܳܗܳܐ، ܟܝܳܠ݄ܦ (ܘܳܐܕ݄̥ܥ) ܗ̄ܽܘ ܝܽܘܠܦܳܢܰܝܕ̥ܺܝ ܐܶܢ ܡܰܢ̱ ܐ‌ܠܳܗܳܐ ܝܳܐ ܐܰܘ ܐܳܢܳܐ ܡܶܢ̱ ܩ݄ܕ̱ܡ ܕܪܽܘܚܺܝ ܟܡ݄ܫܓ̥ܰܠ ܐ̱ܢܳܐ. 18ܡܰܢ ܕܡܶܢ̱ ܩ݄ܕ̱ܡ ܪܽܘܚܶܗ ܟܡ݄ܫܓ̥݄ܠ، ܫܽܘܒܚܳܐ ܠܪܽܘܚܶܗ ܟܳܐܒ݄ܥ. ܐܶ‌ܠܳܐ ܗܰܘܳܐ ܕܳܐܒ݄ܥ ܫܽܘܒܚܳܐ ܠܰܗ̄ܘܳܐ ܕ݄ܡܫܰܕܰܪ ܠܶܗ ܫܰܪܺܝܪܳܐ ܝܳܐ ܘܠܰܝܬ ܢܶܟ̥ܠܳܐ ܒܠܶܒܶܗ. 19ܟܰܐܠܶܗ، ܠܰܝ̱ܬ ܗ̄ܘܰܐ ܡܽܘܫܶܐ ܕܗܽܒ̥ ܠܶܗ ܠܟ̥ܽܘ ܗ̄ܽܘ ܢܳܡܽܘܣܳܐ؟ ܘܢܳܫܳܐ ܡ݄ܢܟ̥ܽܘ ܠ݄ܐ ܟܢܳܛܰܪ ܠܶܗ. 20ܡ݄ܢܝܳܐ ܕܟ݄ܐܒܥܺܝܬܽܘ ܕܩܳܛܠܺܝܬܽܘ ܠܺܝ؟“ ܘܰܗ̄ܢ ܢܳܫ̈ܶܐ ܡܰܕܥܰܪّܶܗ ܘܐܡ݄ܪّܶܗ: ”ܕܰܝܘܳܐ ܟܺܝܬ ܐܶܒܳܟ̥! ܡܰܢܝܳܐ ܕܟܳܐܒ݄ܥ ܩܳܛܶܠ ܠܳܟ̥؟“ 21ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܚܰܕ̱ ܥܒ̥ܳܕ̥ܳܐ ܣ݄ܡ ܠܺܝ، ܘܟܽܘ̇ܠܟ̥ܽܘ ܡܕܰܘܡܪܺܝܬܽܘ. 22ܡܰܗ̄ܘܟ̥ܰܐ ܡܽܘܫܶܐ ܗܽܒ̥ ܠܶܗ ܠܟ̥ܽܘ ܗ̄ܺܝ ܓܙܽܘܪܬܳܐ، ܘܺܗ̄ܝ ܓܙܽܘܪܬܳܐ ܠܰܝ̱ܬ ܗ̄ܘܰܐ ܡܶܢ̱ ܡܽܘܫܶܐ ܐܶ‌ܠܳܐ ܡܰܢ̱ ܒّܰܒܳܢ̈ܶܐ ܗ̄ܘܰܐ، ܘܗܰܬܽܘ ܟܓ݄ܙܪܺܝܬܽܘ ܗ̄ܽܘ ܢܳܫܳܐ ܒܝܰܘܡܶܗ ܕܫܰܒܬ̥ܳܐ. 23ܐܶܢ ܒܝܰܘܡܶܗ ܕܫܰܒܬ̥ܳܐ ܟܓ݄ܙܪܺܝܬܽܘ ܗ̄ܽܘ ܢܳܫܳܐ ܠܰܫܰܢ ܕܠܳܐ ܬܳܒ̥ܪܺܝܬܽܘ ܗ̄ܽܘ ܢܳܡܽܘܣܳܐ ܕܡܽܘܫܶܐ، ܠܡ݄ܢ ܟ݄ܡܛܰܪܛܡܺܝܬܽܘ ܐܰܥܠܺܝ ܕܡܰܢ݄ܚ ܠܺܝ ܢܳܫܳܐ ܒܝܰܘܡܶܗ ܕܫܰܒܬ̥ܳܐ؟ 24ܠܳܐ ܕܰܝܢܺܝܬܽܘ ܒܬܰܪܬܶܝ ܦ̈ܳܬ̥ܳܬ̥ܳܐ، ܐܶ‌ܠܳܐ ܕܺܝܢܳܐ ܟܺܐܢܳܐ ܕܽܘܢܽܘ.“

ܗܰܢܳܐ ܝܳܐ ܡܫܺܝܚܳܐ؟

25ܘ݄ܐܡّܺܪ̱ܝ ܗ̄ܘܰܘ̱ ܢܳܫ̈ܶܐ ܡܶܢ̱ ܐܽܘܪܶܫܠܶܡ: ”ܠܰܝ̱ܬ ܝܳܐ ܗܰܢܳܐ ܕܟ݄ܐܒܥܺܝ ܕܩܳܛܠܺܝ؟ 26ܟܰܐܠܶܗ ܒܓܰܠܝܳܐ ܟܡ݄ܫܓ̥݄ܠ ܘܡܶܕܶܐ ܠ݄ܐ ܟ݄ܐܡّܺܪ̱ܝ ܠܶܗ! ܕܠ݄ܐ ܐܙّܶܗ ܐܰܕ̥ܺܝܥܺܝ ܗ̄ܰܩّܰܫ̈ܰܝܕ̥ܰܢ ܕܰܗ̄ܢܳܐ ܝܳܐ ܒ݄ܫܪܳܪܳܐ ܡܫܺܝܚܳܐ؟ 27ܐܶ‌ܠܳܐ ܠܰܗ̄ܢܳܐ، ܟ݄ܐܕ̥ܥܺܝܢܰܐ ܡܰܐܝܟܳܐ ܝܳܐ، ܘ݄ܡܫܺܝܚܳܐ، ܐܶܡܰܐ ܕܳܐܬ̥ܶܐ، ܢܳܫܳܐ ܠ݄ܐ ܟܳܐܕ̥݄ܥ ܡܰܐܝܟܳܐ ܝܳܐ.“ 28ܘܝܶܫܽܘܥ ܡܰܥܠܶܐ ܠܶܗ ܩܳܠܶܗ ܘܗܺܝّܶܗ ܟܡܰܘܠ݄ܦ ܒܽܗ̄ܘ ܗܰܝܟܠܳܐ، ܘܐܡ݄ܪ ܠܶܗ: ”ܟ݄ܐܕ̥ܥܺܝܬܽܘ ܠܺܝ، ܘܟ݄ܐܕ̥ܥܺܝܬܽܘ ܡܰܐܝܟܳܐ ܐ̱ܢܳܐ، ܘܡܶܢ̱ ܩ݄ܕ̱ܡ ܪܽܘܚܺܝ ܠܰܐ ܐܬ̥ܺܝ ܐ̱ܢܳܐ، ܐܶ‌ܠܳܐ ܫܰܪܺܝܪܳܐ ܝܳܐ ܗܰܘܳܐ ܕ݄ܡܫܰܕܰܪ ܠܶܗ ܠܺܝ، ܗܰܘܳܐ ܕܗܰܬܽܘ ܠ݄ܐ ܟ݄ܐܕ̥ܥܺܝܬܽܘ ܠܶܗ. 29ܐܶ‌ܠܳܐ ܐܳܢܳܐ ܟܳܐܕ̥ܰܥܢܶܗ، ܕܡܶܢ̱ ܓܰܒܶܗ ܐ̱ܢܳܐ، ܘܗܺܝّܶܗ ܡܫܰܕܰܪ ܠܶܗ ܠܺܝ.“ 30ܘܰܐܒܺܝܥܺܝ ܕܙܳܒܛܺܝ ܠܶܗ، ܐܶ‌ܠܳܐ ܢܳܫܳܐ ܠܳܐ ܡܰܚܰܬ ܠܶܗ ܐܺܝܕ̥ܳܐ ܐܰܥܠܶܗ، ܥܰܠ ܕܺܗ̄ܝ ܫܳܥܬ̥ܰܝܕ̥ܶܗ ܗܶܫ ܠܰܐ ܐܬ̥ܝܳܐ ܗ̄ܘܰܐ.

ܗ̄ܰܕّܰܚܫ̈ܶܐ ܕ݄ܡܫܰܕܪܺܝ ܕܙܳܒܛܺܝ ܝܶܫܽܘܥ

31ܘܓ̥ܰܠܰܒܶܐ ܡܰܗ̄ܢ ܢܳܫ̈ܶܐ ܡܗܰܝܡܰܢّܶܗ ܐܶܒܶܗ، ܘ݄ܐܡّܺܪ̱ܝ ܗ̄ܘܰܘ̱: ”ܗ̄ܺܝ ܢܰܩܠܐ ܕܳܐܬ̥ܶܐ ܡܫܺܝܚܳܐ، ܩܰܝ ܓ݄ܕܣܳܝ݄ܡ ܐܳܬ̥ܘ̈ܳܬ̥ܳܐ ܙ݄ܕ ܡܽܗ̄ܘ ܡܶܕܶܐ ܕܰܗ̄ܢܳܐ ܟܣܳܝ݄ܡ؟“ 32ܘܫܰܡܺܝܥܺܝ ܗ̄ܰܦܪ̈ܺܝܫܶܐ ܗ̄ܽܘ ܡܰܐܡܪܳܐ ܕ݄ܐܡّܺܪ̱ܝ ܗ̄ܘܰܘ̱ ܐܰܥܠܶܗ ܗ̄ܰܢ ܢܳܫ̈ܶܐ، ܘܗ݄ܢّܶܝ ܘܰܪّܰܒ̈ܶܐ ܕܰܟّܳܗ̈ܢܶܐ ܡܫܰܕܰܪّܶܗ ܕ̈ܰܚܫܶܐ ܕܙܳܒܛܺܝ ܠܶܗ. 33ܘܐܡ݄ܪ ܠܶܗ ܝܶܫܽܘܥ: ”ܐ݄ܫܡܳܐ ܚܪܶܢܳܐ ܐܰܥܡܰܝܟ̥ܽܘ ܐ̱ܢܳܐ، ܘܟ݄ܐܙّܺܝ ܐ̱ܢܳܐ ܠܓܰܒ ܡܰܢ ܕ݄ܡܫܰܕܰܪ ܠܶܗ ܠܺܝ. 34ܘܓ݄ܕܟ݄ܪܟ̥ܺܝܬܽܘ ܐܰܥܠܺܝ ܘܠ݄ܐ ܟܚܳܙܺܝܬܽܘ ܠܺܝ، ܘܒܺܗ̄ܝ ܕܽܘܟܬ̥ܳܐ ܕܟ݄ܬ ܐ̱ܢܳܐ ܐܳܢܳܐ ܠܰܒܟ̥ܽܘ ܕܳܐܬ̥ܺܝܬܽܘ.“ 35ܘܰܝّܽܘܕ̥̈ܳܝܶܐ ܐ݄ܡّܺܪ̱ܝ ܗ̄ܘܰܘ̱ ܒܠܶܒܰܝّܶܗ: ”ܗܰܢܳܐ ܠܰܐܝܟܳܐ ܓܕ݄ܐܙّܶܗ ܕܰܐܚܢܰܐ ܠܰܝܒܰܢ ܚܳܙܺܝܢܰܐ ܠܶܗ؟ ܩܰܝ ܠܰܗ̄ܢ ܐܰܬ̥ܪ̈ܰܘܳܬ̥ܳܐ ܕܰܥّܰܡ̈ܶܐ ܓܕ݄ܐܙّܶܗ ܘܡܰܘܠ݄ܦ ܗ̄ܰܚّܰܢ̈ܦܶܐ؟ 36ܡ݄ܢܝܳܐ ܗܰܬ̥ܶܐ ܕܟܳܐܡ݄ܪ: ܓ݄ܕܟ݄ܪܟ̥ܺܝܬܽܘ ܐܰܥܠܺܝ ܘܠ݄ܐ ܟܚܳܙܺܝܬܽܘ ܠܺܝ، ܘܒܺܗ̄ܝ ܕܽܘܟܬ̥ܳܐ ܕܟ݄ܬ ܐ̱ܢܳܐ ܐܳܢܳܐ، ܠܰܒܟ̥ܽܘ ܕܳܐܬ̥ܺܝܬܽܘ؟“

ܗ̄ܰܢ ܢܰܗܪ̈ܶܐ ܕܰܡّܰܝ̈ܶܐ ܚܰܝ̈ܶܐ

37ܘܒܽܗ̄ܘ ܝܰܘܡܳܐ ܪܰܒܳܐ، ܕܟ݄ܬ ܝܳܐ ܗ̄ܽܘ ܝܰܘܡܳܐ ܚܰܪܳܝܳܐ ܕܽܗ̄ܘ ܥܶܐܕ̥ܳܐ، ܩܰܝ݄ܡ ܝܶܫܽܘܥ ܟܡܰܥܠܶܐ ܩܳܠܶܗ ܘܳܐܡ݄ܪ: ”ܕܢܳܫܳܐ ܕܟ݄ܬ ܝܳܐ ܨܰܗܝܳܐ ܛܪܳܐ ܐܳܬ̥ܶܐ ܠܓܰܒܺܝ ܘܫܳܬܶܐ. 38ܟܽܘܠ ܡܰܢ ܕ݄ܡܗܰܝܡ݄ܢ ܐܶܒܺܝ، ܐܟ̥ ܕܐܡ݄ܪ ܠܶܗ ܗ̄ܽܘ ܟܬ̥ܳܒ̥ܳܐ، ܢܰܗܪ̈ܶܐ ܕܡܰܝ̈ܶܐ ܚܰܝ̈ܶܐ ܟܩ݄ܠܥܺܝ ܡܶܢ̱ ܓܰܘܶܗ.“ 39ܘܐܡ݄ܪ ܠܶܗ ܗܰܬ̥ܶܐ ܥܰܠ ܗ̄ܺܝ ܪܽܘܚܳܐ ܕ݄ܓܡܰܝܕܺܝ ܠܰܗ ܗܰܢܺܝ ܕ݄ܡܗܰܝܡܢܺܝ ܐܶܒܶܗ. ܡܺܐܝܕ̥ܶܗ ܕܺܗ̄ܝ ܪܽܘܚܳܐ ܗܶܫ ܠܳܐ ܡܬܰܗܽܒ̥ܝܳܐ ܗ̄ܘܰܐ، ܕܗܶܫ ܝܶܫܽܘܥ ܠܳܐ ܡܫܰܒܰܚ ܗ̄ܘܰܐ.

ܦܠܺܝܓ̥ܽܘܬ̥ܳܐ ܕܒܰܝܢ ܗ̄ܰܢ ܢܳܫ̈ܶܐ

40ܘܓ̥ܰܠܰܒܶܐ ܡܰܗ̄ܢ ܢܳܫ̈ܶܐ ܕܫܰܡܺܝܥܺܝ ܗ̄ܽܘ ܡܰܐܡܪܰܝܕ̥ܶܗ ܐܡ݄ܪّܶܗ: ”ܗܰܢܳܐ ܒ݄ܫܪܳܪܳܐ ܢܒܺܝܳܐ ܝܳܐ.“ 41ܘܗ݄ܢ ܡ݄ܢّܶܗ ܐ݄ܡّܺܪ̱ܝ ܗ̄ܘܰܘ̱: ”ܗܰܢܳܐ ܝܳܐ ܡܫܺܝܚܳܐ!“ ܘܗ݄ܢ ܐ݄ܡّܺܪ̱ܝ ܗ̄ܘܰܘ̱: ”ܩܰܝ ܡܽܗ̄ܘ ܓܠܺܝܠܳܐ ܓܕܳܐܬ̥ܶܐ ܡܫܺܝܚܳܐ؟ 42ܠܳܐ ܟܰܐܠܶܗ ܗ̄ܽܘ ܟܬ̥ܳܒ̥ܳܐ ܟܳܐܡ݄ܪ ܕܡܽܗ̄ܘ ܙܰܪܥܳܐ ܕܕܰܘܺܝܕ̥ ܘܡܶܢ̱ ܒܶܝܬ̥ ܠܚܶܡ، ܗ̄ܺܝ ܩܪܺܝܬ̥ܳܐ ܕܕܰܘܺܝܕ̥، ܓܕܳܐܬ̥ܶܐ ܡܫܺܝܚܳܐ؟“ 43ܘܗܰܘܺܝ ܗ̄ܘܰܐ ܦܠܺܝܓ̥ܽܘܬ̥ܳܐ ܒܰܝܢ ܗ̄ܰܢ ܢܳܫ̈ܶܐ ܠܰܫܰܢܶܗ. 44ܘܟ݄ܬ ܗ̄ܘܰܐ ܢܳܫ̈ܶܐ ܡ݄ܢّܶܗ ܐ݄ܒܥܺܝ ܗ̄ܘܰܘ̱ ܕܙܳܒܛܺܝ ܠܶܗ ܐܶ‌ܠܳܐ ܢܳܫܳܐ ܠܳܐ ܡܰܚܰܬ ܠܶܗ ܐܺܝܕ̥ܳܐ ܐܰܥܠܶܗ.

ܗ̄ܰܪّܺܝܫܳܢ̈ܶܐ ܘܰܦܪ̈ܺܝܫܶܐ ܠ݄ܐ ܟܳܐܬ̥݄ܢ ܠ݄ܚܕ̥ܳܕ̥̈ܶܐ

45ܘܰܐܬ̥݄ܢ ܗ̄ܰܕّܰܚ̈ܫܰܢ݄ܟ ܓܰܒ ܗ̄ܽܘ ܪܰܒܳܐ ܕܰܟّܳܗ̈ܢܶܐ ܘܕܰܦܪ̈ܺܝܫܶܐ. ܘܰܟّܳܗ̈ܢܶܐ ܐܡ݄ܪّܰܢّܶܗ: ”ܩܰܝ ܠܳܐ ܡܰܝܬܰܠܟ̥ܽܘ؟“ 46ܗ̄ܰܕّܰܚܫ̈ܶܐ ܡܰܕܥܰܪّܶܗ: ”ܒܢܰܩܠܐ ܢܳܫܳܐ ܠܳܐ ܫܓ̥ܺܝܠ ܗܰܘܟ̥ܰܐ ܐܟ̥݄ ܕܟܳܡ݄ܫܓ̥݄ܠ ܗ̄ܽܘ ܓܰܒ̥ܪܰܢܳܐ.“ 47ܗ̄ܰܦܪ̈ܺܝܫܶܐ ܐܡ݄ܪّܰܢّܶܗ: ”ܩܰܝ ܗܰܬܽܘ ܣܬܶܝ ܗܰܘܺܝܬܽܘ ܛܰܥܝ̈ܶܐ؟ 48ܩܰܝ ܢܳܫܳܐ ܡܰܢ̱ ܪّܺܝܫܳܢ̈ܶܐ ܐܰܘ ܡܰܢ̱ ܦܪ̈ܺܝܫܶܐ ܡܗܰܝܡܰܢ ܠܶܗ ܐܶܒܶܗ؟ 49ܐܶ‌ܠܳܐ ܗ̄ܽܘ ܥܰܡܰܢܳܐ ܕܠ݄ܐ ܟܳܐܕ̥݄ܥ ܗ̄ܽܘ ܢܳܡܽܘܣܳܐ، ܘܗܰܢܺܝ ܠܺܝ̈ܛܶܐ ܢܶܝ.“ 50ܘܐܡ݄ܪ ܠܰܗ ܠّܶܗ ܢܺܝܩܳܕܺܝܡܳܘܣ، ܕܟ݄ܬ ܝܳܐ ܚܰܕ̱ ܡ݄ܢّܶܗ، ܗܰܘܳܐ ܕܰܐܬ̥ܺܝ ܗ̄ܘܰܐ ܓܰܒ ܝܶܫܽܘܥ ܒܠܰܠܝܳܐ: 51”ܩܰܝ ܗ̄ܽܘ ܢܳܡܽܘܣܰܝܕ̥ܰܢ ܟܕܳܝ݄ܢ ܢܳܫܳܐ ܕܠܳܐ ܒܺܗ̄ܝ ܩܰܕ̱ܡܰܝܬܳܐ ܫܳܡ݄ܥ ܡܶܢܶܗ ܘܳܐܕ̥݄ܥ ܡ݄ܢ ܣ݄ܡ ܠܶܗ؟“ 52ܡܰܕܥܰܪّܶܗ ܐܰܥܠܶܗ ܘܐܡ݄ܪّܰܗ ܠܶܗ: ”ܩܰܝ ܗܰܬ ܣܬܶܝ ܡܽܗ̄ܘ ܓܠܺܝܠܳܐ ܗܰܬ؟ ܚܘܿܪ ܘ݄ܚܙܰܝ ܕܠ݄ܐ ܩܰܝ݄ܡ ܢܒܺܝܳܐ ܡܽܗ̄ܘ ܓܠܺܝܠܳܐ.“

53ܒ݄ܬ̥݄ܪܟܶܐ ܟܽܘܠ ܚܰܕ̱ ܐܰܙّܶܗ ܠܽܗ̄ܘ ܒܰܝܬܰܝܕ̥ܶܗ.

Currently Selected:

ܡܓܰܠܝܘܢ ܕܝܘܚܢܢ 7: ܟܬܒܐ

Highlight

Copy