ܡܓܰܠܝܘܢ ܕܝܘܚܢܢ 8

ܗ̄ܺܝ ܐܰܢ̱ܬ̥ܬܳܐ ܓܰܝܳܪܬܳܐ

1ܘܰܐܙّܶܗ ܝܶܫܽܘܥ ܠܽܗ̄ܘ ܛܽܘܪܳܐ ܕܰܙّܰܝ̈ܬܶܐ. 2ܘ݄ܒܩܶܕܰܡܬܳܐ، ܕܰܥ݄ܪ ܐܰܬ̥ܺܝ ܠܽܗ̄ܘ ܗܰܝܟܠܳܐ، ܘܽܗ̄ܘ ܥܰܡܳܐ ܟܽܘܠܶܗ ܐܰܬ̥ܺܝ ܠܓܰܒܶܗ، ܘܝܰܬܽܒ̥ ܡܫܰܪܶܐ ܠܶܗ ܕܡܰܘܠܰܦّܶܗ. 3ܗ̄ܰܣّܳܦܪ̈ܶܐ ܘܰܦܪ̈ܺܝܫܶܐ ܡܰܝܬܰܠّܶܗ ܐܰܢ̱ܬ̥ܬܳܐ ܕ݄ܙܒܺܝܛܳܐ ܒܙܳܢܝܽܘܬ̥ܳܐ. ܘܡܰܩܺܝܡܰܠّܶܗ ܒܽܗ̄ܘ ܦܰܠܓܳܐ، 4ܘܐܡ݄ܪّܰܗ ܠܶܗ: ”ܡܰܠܦܳܢܳܐ، ܗ̄ܺܝ ܐܰܢ̱ܬ̥ܬܰܬ̥ܶܐ ܙܒܺܝܛܳܐ ܒܓܰܠܝܳܐ ܒܽܗ̄ܘ ܥܒ̥ܳܕ̥ܳܐ ܕܺܗ̄ܝ ܙܳܢܝܽܘܬ̥ܳܐ. 5ܘܒܽܗ̄ܘ ܢܳܡܽܘܣܳܐ ܕܡܽܘܫܶܐ ܐܡ݄ܪ ܠܶܗ ܕܪܳܓ̥ܡܺܝܢܰܐ ܠܢܳܫ̈ܶܐ ܕ݄ܐܟ̥ ܕܰܗ̄ܢܺܝ. ܐܳܥܕܳܐ ܗܰܬ ܡ݄ܢ ܟ݄ܐܡّܰܪ̱ܬ؟“ 6ܗܰܬ̥ܶܐ ܐܡ݄ܪّܰܗ ܠܶܗ ܕ݄ܡܢܰܣ݄ܢ ܠܶܗ ܠܰܫܰܢ ܕܳܗ̄ܘܰܠّܶܗ ܡܶܕܶܐ ܕܡܰܫܟ݄ܢ ܐܰܥܠܶܗ. ܐܶ‌ܠܳܐ ܝܶܫܽܘܥ ܟ݄ܦ ܠܶܗ ܪܽܘܚܶܗ ܠܰܠܬܰܚ ܘ݄ܟܬ̥ܽܒ̥ ܠܶܗ ܥܰܠ ܗ̄ܺܝ ܐܰܪܥܳܐ. 7ܘܺܗ̄ܝ ܢܰܩܠܐ ܕܦܰܝܺܝܫܺܝ ܡܫܰܐܺܠܺܝ ܠܶܗ، ܩܰܝ݄ܡ ܘܐܡ݄ܪ ܠܰܗ ܠّܶܗ: ”ܐܰܝܢܰܐ ܡ݄ܢܟ̥ܽܘ ܕܟ݄ܬܝܳܐ ܕܠܳܐ ܚܛܺܝܬ̥ܳܐ ܛܪܳܐ ܗܳܘܶܐ ܗ̄ܽܘ ܩܰܕ̱ܡܳܝܳܐ ܕܡܳܚܶܐ ܠܰܗ ܟܶܐܦܳܐ.“ 8ܘܕܰܥ݄ܪ ܟ݄ܦ ܠܶܗ ܪܽܘܚܶܗ ܘ݄ܟܬ̥ܽܒ̥ ܠܶܗ ܥܰܠ ܗ̄ܺܝ ܐܰܪܥܳܐ. 9ܘܗ݄ܢّܶܝ، ܗ̄ܺܝ ܢܰܩܠܐ ܕܫܰܡܺܝܥܺܝ، ܚܰܕ̱ ܒ݄ܬ̥݄ܪ ܡܽܗ̄ܘ ܚܪܶܢܳܐ ܢܰܦܺܝܩܺܝ، ܡܫܰܪܰܠّܶܗ ܡܰܢ̱ ܩّܰܫ̈ܶܐ، ܘܦܰܝܺܝܫܳܐ ܗ̄ܺܝ ܐܰܢ̱ܬ̥ܬܳܐ ܠܪܽܘܚܰܗ ܒܺܗ̄ܝ ܕܽܘܟܬ̥ܰܝܕ̥ܰܗ. 10ܘܺܗ̄ܝ ܢܰܩܠܐ ܕܩܰܝ݄ܡ ܝܶܫܽܘܥ ܐܡ݄ܪ ܠܶܗ ܠܺܗ̄ܝ ܐܰܢ̱ܬ̥ܬܳܐ: ”ܐܰܝܟܳܐ ܢܶܝ؟ ܢܳܫܳܐ ܠܳܐ ܕ݄ܢ ܠܶܗ ܠܰܟ̥؟“ 11ܘܗܺܝّܰܗ ܡܰܕܥܰܪ ܠܰܗ: ”ܘܠܳܐ ܢܳܫܳܐ، ܡܳܪܝܳܐ.“ ܘܐܡ݄ܪ ܠܶܗ ܝܶܫܽܘܥ: ”ܘܳܐܢܳܐ ܣܬܶܝ ܠ݄ܐ ܟܕܳܝܰܢ ܐ̱ܢܳܐ ܠܰܟ̥. ܙܰܟ̥، ܘܠܳܐ ܕܳܥܪܰܬ ܕܣܰܝܡܰܬ ܚܛܺܝܬ̥ܳܐ.“

ܝܶܫܽܘܥ ܗ̄ܽܘ ܢܽܘܗܪܳܐ ܕܽܗ̄ܘ ܥܳܠܡܳܐ ܝܳܐ

12ܘܕܰܥ݄ܪ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܐܳܢܳܐ ܐ̱ܢܳܐ ܗ̄ܽܘ ܢܽܘܗܪܳܐ ܕܽܗ̄ܘ ܥܳܠܡܳܐ. ܡܰܢ ܕܳܐܬ̥ܶܐ ܒ݄ܬ̥ܪܺܝ ܠ݄ܐ ܓ݄ܡܗܰܠ݄ܟ̥ ܒܽܗ̄ܘ ܥܰܡܛܳܢܳܐ، ܐܶ‌ܠܳܐ ܓܚܳܙܶܐ ܗ̄ܽܘ ܢܽܘܗܪܳܐ ܕܰܚّܰܝ̈ܶܐ.“ 13ܐܡ݄ܪّܰܗ ܠܶܗ ܗ̄ܰܦܪ̈ܺܝܫܶܐ: ”ܗܰܬ ܥܰܠ ܢܰܦܫܳܟ̥ ܟܣ݄ܗܕܰܬ، ܗ̄ܺܝ ܣܳܗܕܽܘܬ̥ܰܝܕ̥ܳܟ̥ ܠܰܝ̱ܬ ܝܳܐ ܫܰܪ݄ܪܬܳܐ.“ 14ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܘܶܐܢ ܟܣܳܗܰܕ ܐ̱ܢܳܐ ܥܰܠ ܢܰܦܫܺܝ، ܗ̄ܺܝ ܣܳܗܕܽܘܬ̥ܰܝܕ̥ܺܝ ܫܰܪ݄ܪܬܳܐ ܝܳܐ ܥܰܠ ܕܟܳܐܕ̥ܰܥ ܐ̱ܢܳܐ ܡܰܐܝܟܳܐ ܐܰܬ̥ܺܝ ܐ̱ܢܳܐ ܘܠܰܐܝܟܳܐ ܓܕ݄ܐܙّܺܝ ܐ̱ܢܳܐ. ܐܶ‌ܠܳܐ ܗܰܬܽܘ ܠ݄ܐ ܟ݄ܐܕ̥ܥܺܝܬܽܘ ܡܰܐܝܟܳܐ ܐܰܬ̥ܺܝ ܐ̱ܢܳܐ ܘܠܰܐܝܟܳܐ ܓܕ݄ܐܙّܺܝ ܐ̱ܢܳܐ. 15ܗܰܬܽܘ ܒܕܺܝܢܳܐ ܕܽܗ̄ܘ ܦܰܓ̥ܪܳܐ (ܕܰܗ̄ܢ ܢܳܫ̈ܶܐ) ܟܕܰܝܢܺܝܬܽܘ، ܐܶ‌ܠܳܐ ܐܳܢܳܐ ܠܢܳܫܳܐ ܠ݄ܐ ܟܕܳܝܰܢ ܐ̱ܢܳܐ. 16ܘ݄ܕܕܳܝܰܢ ܐ̱ܢܳܐ ܣܬܶܝ، ܗ̄ܽܘ ܕܺܝܢܰܝܕ̥ܺܝ ܫܰܪܺܝܪܳܐ ܝܳܐ ܥܰܠ ܕܠ݄ܐ ܟܕܳܝܰܢ ܐ̱ܢܳܐ ܒܶܠܚܽܘܕ̥ܺܝ، ܐܶ‌ܠܳܐ ܐܳܢܳܐ ܘܽܗ̄ܘ ܐܰܒܰܝܕ̥ܺܝ ܕ݄ܡܫܰܕܰܪ ܠܶܗ ܠܺܝ. 17ܘܒܽܗ̄ܘ ܢܳܡܽܘܣܰܬ̥ܟ̥ܽܘ ܟܬ̥ܺܝܒ̥ܳܐ ܕܺܗ̄ܝ ܣܳܗܕܽܘܬ̥ܳܐ ܕ݄ܬܪܶܝ ܓܰܒܪ̈ܶܐ ܫܰܪ݄ܪܬܳܐ ܝܳܐ. 18ܐܳܢܳܐ ܐ̱ܢܳܐ ܕ݄ܟܣܳܗܰܕ ܐ̱ܢܳܐ ܥܰܠ ܢܰܦܫܺܝ ܘܽܗ̄ܘ ܐܰܒܰܝܕ̥ܺܝ ܕ݄ܡܫܰܕܰܪ ܠܶܗ ܠܺܝ ܟܣܳܗ݄ܕ ܐܰܥܠܺܝ.“ 19ܘܐܡ݄ܪّܰܗ ܠܶܗ: ”ܐܰܝܟܳܐ ܝܳܐ ܒܰܒܳܟ̥؟“ ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܰܗ ܠّܶܗ: ”ܠܳܐ ܐܶ‌ܠܺܝ ܟ݄ܐܕ̥ܥܺܝܬܽܘ ܘܠܳܐ ܠܽܗ̄ܘ ܐܰܒܰܝܕ̥ܺܝ، ܘܶܐܢ ܕ݄ܐܕ̥ܥܺܝܬܽܘ ܗ̄ܘܰܘ̱ ܐܶ‌ܠܺܝ ܠܽܗ̄ܘ ܐܰܒܰܝܕ̥ܺܝ ܣܬܶܝ ܐ݄ܕ̥ܥܺܝܬܽܘ ܗ̄ܘܰܘ̱.“ 20ܗ̄ܰܡّܰܐܡܪ̈ܰܢܺܝ ܐܡܺܝܪܺܝ ܠܶܗ ܒܒܶܝܬ̥ ܓܰܙܳܐ، ܘܗܺܝّܶܗ ܟܡܰܘܠ݄ܦ ܒܽܗ̄ܘ ܗܰܝܟܠܳܐ، ܘܢܳܫܳܐ ܠܳܐ ܙܒ݄ܛ ܠܶܗ، ܥܰܠ ܕܠܰܐ ܐܬ̥ܝܳܐ ܗ̄ܘܰܐ ܗܶܫ ܗ̄ܺܝ ܫܳܥܬ̥ܰܝܕ̥ܶܗ.

ܠܰܒܟ̥ܽܘ ܕܳܐܬ̥ܺܝܬܽܘ ܠܽܗ̄ܘ ܐܰܬ̥ܪܳܐ ܕ݄ܐܙّܺܝ ܐ̱ܢܳܐ

21ܘܝܶܫܽܘܥ ܕܰܥ݄ܪ ܐܡ݄ܪ ܠܰܗ ܠّܶܗ: ”ܐܳܢܳܐ ܐܰܙܳܠܳܐ ܐ̱ܢܳܐ، ܘܓ݄ܕܟ݄ܪܟ̥ܺܝܬܽܘ ܐܰܥܠܺܝ، ܘ݄ܓܡܰܝܬ̥ܺܝܬܽܘ ܒܰܚ̈ܛܳܗܰܬ̥ܟ̥ܽܘ. ܘܠܰܐܝܟܳܐ ܕܳܐܢܳܐ ܐܰܙܳܠܳܐ، ܗܰܬܽܘ ܠܰܒܟ̥ܽܘ ܐܳܬ̥ܺܝܬܽܘ.“ 22ܐܡ݄ܪّܶܗ ܗ̄ܰܝّܽܘܕ̥̈ܳܝܶܐ: ”ܩܰܝ ܓ݄ܕܩܳܛ݄ܠ ܪܽܘܚܶܗ ܕܟܳܐܡ݄ܪ: ܠܰܐܝܟܳܐ ܕܳܐܢܳܐ ܐܰܙܳܠܳܐ، ܗܰܬܽܘ ܠܰܒܟ̥ܽܘ ܐܳܬ̥ܺܝܬܽܘ.“ 23ܘܐܡ݄ܪ ܠܰܗ ܠّܶܗ: ”ܗܰܬܽܘ ܡܶܢ̱ ܕܠܰܠܬܰܚ ܗܰܬܽܘ، ܐܳܢܳܐ ܡܶܢ̱ ܕܠܰܠܥ݄ܠ ܐ̱ܢܳܐ. ܗܰܬܽܘ ܡܽܗ̄ܘ ܥܳܠܡܰܢܳܐ ܗܰܬܽܘ، ܐܳܢܳܐ ܠܰܝ̱ܬ ܐ̱ܢܳܐ ܡܽܗ̄ܘ ܥܳܠܡܰܢܳܐ. 24ܐܡ݄ܪ ܠܺܝ ܐܰ‌ܠܟ̥ܽܘ ܕܓ݄ܕܡܰܝܬ̥ܺܝܬܽܘ ܒܰܚ̈ܛܳܗܰܬ̥ܟ̥ܽܘ. ܘ݄ܕܠܳܐ ܡܗܰܝܡܢܺܝܬܽܘ ܕܳܐܢܳܐ ܐ̱ܢܳܐ ܓܡܰܝܬ̥ܺܝܬܽܘ ܒܰܚ̈ܛܳܗܰܬ̥ܟ̥ܽܘ.“ 25ܘܐܡ݄ܪّܰܗ ܠܶܗ ܗ̄ܰܝّܽܘܕ̥̈ܳܝܶܐ: ”ܗܰܬ، ܡܰܢ ܗܰܬ؟“ ܝܶܫܽܘܥ ܐܡ݄ܪ ܠܰܗ ܠّܶܗ: ”ܕ݄ܡܫܰܪܶܐ ܠܺܝ ܕܡ݄ܫܓ̥ܰܠ ܐ̱ܢܳܐ ܐܰܥܡܰܝܟ̥ܽܘ، 26ܓ̥ܰܠܰܒܶܐ ܟ݄ܬ ܠܺܝ ܕܳܐܡܰܪ ܐ̱ܢܳܐ ܐܰܥܠܰܝܟ̥ܽܘ ܘܕܳܝܰܢ ܐ̱ܢܳܐ ܠܟ̥ܽܘ. ܐܶ‌ܠܳܐ ܗܰܘܳܐ ܕ݄ܡܫܰܕܰܪ ܠܶܗ ܠܺܝ ܫܰܪܺܝܪܳܐ ܝܳܐ، ܘܗܰܢܺܝ ܕܫܰܡ݄ܥ ܐ̱ܢܳܐ ܡܶܢܶܗ ܗܰܢܺܝ ܢܶܝ ܕܟܳܐܡܰܪ ܐ̱ܢܳܐ ܒܽܗ̄ܘ ܥܳܠܡܳܐ.“ 27ܘܠܰܐ ܐܕ̥ܺܝܥܺܝ ܕܥܰܠ ܗ̄ܽܘ ܐܰܒܳܐ ܐܳܡܰܪ ܗ̄ܘܰܐ.

28ܘܢܰܩܠܐ ܚܪܶܬܳܐ ܝܶܫܽܘܥ ܐܡ݄ܪ ܠܰܗ ܠّܶܗ: ”ܐܶܡܰܐ ܕܓ݄ܕܡܰܥܠܺܝܬܽܘ ܠܰܐܒܪܶܗ ܕܢܳܫܳܐ، ܗ̄ܺܝ ܢܰܩܠܝܳܐ ܓܕ݄ܐܕ̥ܥܺܝܬܽܘ ܕܳܐܢܳܐ ܐ̱ܢܳܐ. ܘܡܶܕܶܐ ܡܶܢ̱ ܩ݄ܕ̱ܡ ܪܽܘܚܺܝ ܠ݄ܐ ܟܣܳܝܰܡ ܐ̱ܢܳܐ، ܐܶ‌ܠܳܐ ܐܟ̥ ܕܡܰܘܠܰܦ ܠܶܗ ܠܺܝ ܗ̄ܽܘ ܐܰܒܳܐ ܗܰܘܟ̥ܰܐ ܟܡ݄ܫܓ̥ܰܠ ܐ̱ܢܳܐ. 29ܘܡܰܢ ܕ݄ܡܫܰܕܰܪ ܠܶܗ ܠܺܝ ܐܰܥܡܺܝ ܝܳܐ، ܗ̄ܽܘ ܐܰܒܰܝܕ̥ܺܝ ܠܳܐ ܛܪܶܐ ܠܶܗ ܠܺܝ ܠܪܽܘܚܺܝ، ܥܰܠ ܕܟܳܣܳܝܰܡ ܐ̱ܢܳܐ ܗ̄ܽܘ ܡܶܕܶܐ ܕܫܳܦܰܪ ܠܶܗ ܒܟܽܘܠ ܙܰܒܢܳܐ.“ 30ܘܺܗ̄ܝ ܢܰܩܠܐ ܕܐܡ݄ܪ ܠܶܗ ܗ̄ܰܡّܰܐܡܪ̈ܰܢܺܝ، ܓ̥ܰܠܰܒܶܐ ܢܳܫ̈ܶܐ ܡܗܰܝܡܰܢّܶܗ ܐܶܒܶܗ.

ܥܰܒܕ̈ܶܐ ܘܰܐܒܢ̈ܶܐ ܚܺܐܪ̈ܶܐ

31ܘܝܶܫܽܘܥ ܐܡ݄ܪ ܠܶܗ ܠܰܝّܽܘܕ̥̈ܳܝܶܐ ܕ݄ܡܗܰܝܡܰܢّܶܗ ܐܶܒܶܗ: ”ܐܶܢ ܕܦܰܝܫܺܝܬܽܘ ܒܽܗ̄ܘ ܡܰܐܡܪܰܝܕ̥ܺܝ، ܒ݄ܫܪܳܪܳܐ ܬܰܠܡܺܝܕ̥̈ܰܝܕ̥ܺܝ ܗܰܬܽܘ. 32ܘ݄ܓܕ݄ܐܕ̥ܥܺܝܬܽܘ ܗ̄ܽܘ ܫܪܳܪܳܐ، ܘܽܗ̄ܘ ܫܪܳܪܳܐ ܓ݄ܡܚܰܪܰܪܟ̥ܽܘ.“ 33ܘܐܡ݄ܪّܰܗ ܠܶܗ: ”ܐܰܚܢܰܐ ܗ̄ܽܘ ܙܰܪܥܳܐ ܕܰܐܒܪܳܗܳܡ ܐܰܚܢܰܐ، ܘܒܰܚّܰܝ̈ܶܐ ܠܰܐ ܗ̄ܘܺܝܢܰܐ ܥܰܒܕ̈ܶܐ ܠܢܳܫ̈ܶܐ! ܐܰܝܕܰܪܒܳܐ ܟ݄ܐܡّܰܪ̱ܬ ܓܕܳܗ̄ܘܺܝܬܽܘ ܚܺܐܪ̈ܶܐ؟“ 34ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܟܽܘܠ ܚܰܕ̱ ܕܣܳܝ݄ܡ ܚܛܺܝܬ̥ܳܐ، ܥܰܒܕܳܐ ܝܳܐ ܕܺܗ̄ܝ ܚܛܺܝܬ̥ܳܐ. 35ܘܽܗ̄ܘ ܥܰܒܕܳܐ ܠ݄ܐ ܟܦܳܝ݄ܫ ܒܽܗ̄ܘ ܒܰܝܬܳܐ ܗܳܠ ܥܳܠܰܡ، ܐܶ‌ܠܳܐ ܗ̄ܽܘ ܐܰܒܪܳܐ ܠܥܳܠܰܡ ܟܦܳܝ݄ܫ. 36ܘܶܐܢ ܗ̄ܽܘ ܐܰܒܪܳܐ ܓ݄ܡܚܰܪܰܪܟ̥ܽܘ، ܒ݄ܫܪܳܪܳܐ ܓܕܳܗ̄ܘܺܝܬܽܘ ܚܺܐܪ̈ܶܐ. 37ܟܳܐܕ̥ܰܥ ܐ̱ܢܳܐ ܕܽܗ̄ܘ ܙܰܪܥܳܐ ܕܰܐܒܪܳܗܳܡ ܗܰܬܽܘ. ܐܶ‌ܠܳܐ ܟ݄ܐܒܥܺܝܬܽܘ ܕܩܳܛܠܺܝܬܽܘ ܠܺܝ، ܡܺܐܝܕ̥ܶܗ ܕܽܗ̄ܘ ܡܰܐܡܪܰܝܕ̥ܺܝ ܠܰܝ̱ܬ ܠܶܗ ܕܽܘܟܬ̥ܳܐ ܒܠܶܒܰܝܟ̥ܽܘ. 38ܐܳܢܳܐ، ܗ̄ܽܘ ܡܶܕܶܐ ܕ݄ܚܙܶܐ ܠܺܝ ܓܰܒ ܗ̄ܽܘ ܐܰܒܰܝܕ̥ܺܝ ܟܡ݄ܫܓ̥ܰܠ ܐ̱ܢܳܐ، ܘܗܰܬܽܘ ܗ̄ܽܘ ܡܶܕܶܐ ܕ݄ܚܙܰܠܟ̥ܽܘ ܓܰܒ ܗ̄ܽܘ ܒܰܒܰܬ̥ܟ̥ܽܘ ܟܣܰܝܡܺܝܬܽܘ.“ 39ܡܰܕܥܰܪّܶܗ ܘܐܡ݄ܪّܰܗ ܠܶܗ: ”ܗ̄ܽܘ ܒܰܒܰܝܕ̥ܰܢ ܐܰܒܪܳܗܳܡ ܝܳܐ.“ ܘܝܶܫܽܘܥ ܐܡ݄ܪ ܠܰܗ ܠّܶܗ: ”ܕܳܗ̄ܘܺܝܬܽܘ ܗ̄ܘܰܘ̱ ܗ̄ܰܢ ܐܰܒܢ̈ܶܐ ܕܰܐܒܪܳܗܳܡ، ܣܰܝܡܺܝܬܽܘ ܗ̄ܘܰܘ̱ ܐܟ̥ ܕܽܗ̄ܘ ܡܶܕܶܐ ܕܣܳܝܰܡ ܗ̄ܘܰܐ ܐܰܒܪܳܗܳܡ. 40ܘܳܐܥܕܳܐ ܟ݄ܐܒܥܺܝܬܽܘ ܕܩܳܛܠܺܝܬܽܘ ܠܺܝ، ܐܳܢܳܐ ܕ݄ܫܓ̥ܺܝܠ ܠܺܝ ܐܰܥܡܰܝܟ̥ܽܘ ܗ̄ܽܘ ܫܪܳܪܳܐ ܕܫܰܡ݄ܥܢܶܗ ܡܰܢ̱ ܐ‌ܠܳܗܳܐ؛ ܗܰܬ̥ܶܐ ܐܰܒܪܳܗܳܡ ܠܳܐ ܣܺܝܡܳܐ ܠܶܗ. 41ܗܰܬܽܘ ܟܣܰܝܡܺܝܬܽܘ ܐܟ̥ ܕܣܰܝܡܺܝ ܗ̄ܘܰܘ̱ ܗ̄ܰܒّܰܒܳܢ̈ܰܬ̥ܟ̥ܽܘ.“ ܐܡ݄ܪّܰܗ ܠܶܗ: ”ܐܰܚܢܰܐ ܠܰܝ̱ܬܢܰܐ ܐܰܒܢ̈ܶܐ ܕܙܳܢܝܽܘܬ̥ܳܐ! ܚܰܕ̱ ܐܰܒܳܐ ܟ݄ܬ ܠܰܢ، ܐܰ‌ܠܳܗܳܐ.“ 42ܝܶܫܽܘܥ ܐܡ݄ܪ ܠܰܗ ܠّܶܗ: ”ܕܳܗ̄ܘܶܐ ܗ̄ܘܰܐ ܐܰ‌ܠܳܗܳܐ ܗ̄ܽܘ ܒܰܒܰܬ̥ܟ̥ܽܘ ܪ݄ܚܡܺܝܬܽܘ ܗ̄ܘܰܝ ܠܺܝ، ܡܺܐܝܕ̥ܶܗ ܕܳܐܢܳܐ ܣܬܶܝ ܡܰܢ̱ ܐ‌ܠܳܗܳܐ ܢܰܦ݄ܩ ܐ̱ܢܳܐ ܘܰܐܬ̥ܺܝ ܐ̱ܢܳܐ، ܘܠܳܐ ܡܶܢ̱ ܩ݄ܕ̱ܡ ܪܽܘܚܺܝ ܐܰܬ̥ܺܝ ܐ̱ܢܳܐ، ܐܶ‌ܠܳܐ ܗܺܝّܶܗ ܡܫܰܕܰܪ ܠܶܗ ܠܺܝ. 43ܩܰܝ ܠ݄ܐ ܟܦ݄ܗܡܺܝܬܽܘ ܗ̄ܽܘ ܡܰܐܡܪܰܝܕ̥ܺܝ؟ ܥܰܠ ܕܠܰܒܟ̥ܽܘ ܫ݄ܡܥܺܝܬܽܘ ܗ̄ܽܘ ܡܰܐܡܪܰܝܕ̥ܺܝ.

ܡܰܢܝܳܐ ܗ̄ܽܘ ܐܳܟ̥ܶܠܩܰܪܨܳܐ؟ (ܗ̄ܽܘ ܫܺܐܕܳܐ؟)

44”ܗܰܬܽܘ ܡܶܢ̱ ܒܰܒܳܐ ܕܟ݄ܬ ܝܳܐ ܗ̄ܽܘ ܣܳܛܳܢܳܐ ܗܰܬܽܘ، ܘ݄ܟܪܳܚܡܺܝܬܽܘ ܕܣܰܝܡܺܝܬܽܘ ܐܟ̥ ܕܺܗ̄ܝ ܪܶܓܬ̥ܳܐ ܕܽܗ̄ܘ ܒܰܒܰܬ̥ܟ̥ܽܘ، ܗܰܘܳܐ ܕܡܽܗ̄ܘ ܪܺܝܫܳܐ ܩܰܛܳܠܳܐ ܗ̄ܘܰܐ ܕܰܗ̄ܢ ܢܳܫ̈ܶܐ، ܘܠ݄ܐ ܟܩܳܝ݄ܡ ܒܽܗ̄ܘ ܫܪܳܪܳܐ، ܥܰܠ ܕܠܰܝܬ ܐܶܒܶܗ ܫܪܳܪܳܐ. ܐܶܡܰܐ ܕܟܳܡ݄ܫܓ̥݄ܠ ܕ̈ܽܘܓܠܶܐ، ܡܽܗ̄ܘ ܡܶܕܶܐ ܕܟ݄ܬ ܠܶܗ ܟܡ݄ܫܓ̥݄ܠ، ܡܺܐܝܕ̥ܶܗ ܕ݄ܡܕܰܓܠܳܢܳܐ ܝܳܐ ܘܽܗ̄ܘ ܒܰܒܳܐ ܕܽܗ̄ܘ ܡܕܰܓܠܳܢܳܐ. 45ܘܳܐܢܳܐ ܕܟܳܐܡܰܪ ܐ̱ܢܳܐ ܗ̄ܽܘ ܫܪܳܪܳܐ ܠ݄ܐ ܟ݄ܡܗܰܝܡܢܺܝܬܽܘ ܠܺܝ. 46ܡܰܢ ܡ݄ܢܟ̥ܽܘ ܟܺܝܒܶܗ ܕܡܰܚܘܶܐ ܕܣ݄ܡ ܠܺܝ ܚܛܺܝܬ̥ܳܐ؟ ܘܶܐܢ ܗ̄ܽܘ ܫܪܳܪܳܐ ܟܡ݄ܫܓ̥ܰܠ ܐ̱ܢܳܐ، ܩܰܝ ܠ݄ܐ ܟ݄ܡܗܰܝܡܢܺܝܬܽܘ ܠܺܝ؟ 47ܡܰܢ ܕܟ݄ܬ ܝܳܐ ܡܰܢ̱ ܐ‌ܠܳܗܳܐ، ܗ̄ܰܡّܰܐܡܪ̈ܶܐ ܕܰܐ‌ܠܳܗܳܐ ܟܫܳܡ݄ܥ. ܘܗܰܬܽܘ ܠ݄ܐ ܟܫ݄ܡܥܺܝܬܽܘ، ܥܰܠ ܕܠܰܝ̱ܬ ܗ̄ܰܬܽܘ ܡܰܢ̱ ܐ‌ܠܳܗܳܐ.“

ܗ̄ܽܘ ܝܰܘܡܳܐ ܕܰܐܒܪܳܗܳܡ ܪܳܚܰܡ ܗ̄ܘܰܐ ܕܚܳܙܶܐ ܠܶܗ

48ܘܡܰܕܥܰܪّܶܗ ܗ̄ܰܝّܽܘܕ̥̈ܳܝܶܐ ܘܐܡ݄ܪّܰܗ ܠܶܗ: ”ܠܰܝ̱ܬ ܝܳܐ ܛܰܒ̥ ܕ݄ܐܡّܺܪ̱ܝܢܰܐ (ܐܰܥܠܳܟ̥) ܕܫܳܡܪܳܝܳܐ ܗܰܬ؟ ܘܕܰܝܘܳܐ ܟ݄ܬ ܠܳܟ̥؟“ 49ܝܶܫܽܘܥ ܐܡ݄ܪ ܠܰܗ ܠّܶܗ: ”ܐܳܢܳܐ، ܕܰܝܘܳܐ ܠܰܝ̱ܬ ܠܺܝ، ܐܶ‌ܠܳܐ ܟܳܡܝܰܩܰܪ ܐ̱ܢܳܐ ܠܽܗ̄ܘ ܐܰܒܰܝܕ̥ܺܝ، ܘܗܰܬܽܘ ܟ݄ܡܨܰܥܪܺܝܬܽܘ ܠܺܝ. 50ܐܳܢܳܐ ܠ݄ܐ ܟܳܐܒܰܥ ܐ̱ܢܳܐ ܫܽܘܒܚܳܐ ܠܪܽܘܚܺܝ. ܟܺܝܬ ܡܰܢ ܕܟܳܐܒ݄ܥ ܘܕܳܝ݄ܢ. 51ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕܢܳܛ݄ܪ ܗ̄ܽܘ ܡܰܐܡܪܰܝܕ̥ܺܝ ܠ݄ܐ ܟܚܳܙܶܐ ܡܰܘܬܳܐ ܠܥܳܠܰܡ.“ 52ܐܡ݄ܪّܰܗ ܠܶܗ ܗ̄ܰܝّܽܘܕ̥̈ܳܝܶܐ: ”ܐܳܥܕܳܐ ܐܰܕ̥ܺܝܥܺܝܢܰܐ ܕܟ݄ܬ ܠܳܟ̥ ܕܰܝܘܳܐ. ܐܰܒܪܳܗܳܡ ܡܰܝ݄ܬ̥ (ܘܡܰܝܺܝܬ̥ܺܝ) ܗ̄ܰܢܒܺܝ̈ܶܐ، ܘܗܰܬ ܟ݄ܐܡّܰܪ̱ܬ: ܡܰܢ ܕܢܳܛ݄ܪ ܗ̄ܽܘ ܡܰܐܡܪܰܝܕ̥ܺܝ ܠ݄ܐ ܟܛܳܥ݄ܡ ܗ̄ܽܘ ܡܰܘܬܳܐ ܠܥܳܠܰܡ. 53ܩܰܝ ܗܰܬ ܪܰܒ ܗܰܬ ܡܽܗ̄ܘ ܒܰܒܰܝܕ̥ܰܢ ܐܰܒܪܳܗܳܡ ܕܡܰܝ݄ܬ̥، ܘܡܰܗ̄ܢ ܢܒܺܝ̈ܶܐ ܕܡܰܝܺܝܬ̥ܺܝ؟ ܡܰܢ ܟܣܰܝܡܰܬ ܪܽܘܚܳܟ̥؟“ 54ܝܶܫܽܘܥ ܐܡ݄ܪ ܠܰܗ ܠّܶܗ: ”ܐܶܢ ܐܳܢܳܐ ܟ݄ܡܫܰܒܰܚ ܐ̱ܢܳܐ ܢܰܦܫܺܝ، ܗ̄ܽܘ ܫܽܘܒܚܰܝܕ̥ܺܝ ܠܰܝ̱ܬ ܝܳܐ ܡܶܕܶܐ. ܗ̄ܽܘ ܐܰܒܰܝܕ̥ܺܝ ܝܳܐ ܕܟ݄ܡܫܰܒܰܚ ܠܺܝ، ܗܰܘܳܐ ܕܟ݄ܐܡّܺܪ̱ܝܬܽܘ ܕܟ݄ܬ ܝܳܐ ܐܰ‌ܠܳܗܰܝܕ̥ܰܢ. 55ܘܠܰܐ ܐܕ̥ܺܝܥܺܝܬܽܘ ܠܶܗ، ܐܶ‌ܠܳܐ ܐܳܢܳܐ ܟܳܐܕ̥ܰܥܢܶܗ. ܘܶܐܢ ܕܳܐܡܰܪ ܐ̱ܢܳܐ ܕܠ݄ܐ ܟܳܐܕ̥ܰܥܢܶܗ ܟܳܗ̄ܘܶܐ ܐ̱ܢܳܐ ܡܕܰܓܠܳܢܳܐ ܐ̱ܟ̥݄ܕܘܳܬ̥ܰܝܟ̥ܽܘ. ܐܶ‌ܠܳܐ ܟܳܐܕ̥ܰܥܢܶܗ ܘܽܗ̄ܘ ܡܰܐܡܪܰܝܕ̥ܶܗ ܟܢܳܛܰܪ ܐ̱ܢܳܐ. 56ܐܰܒܪܳܗܳܡ، ܗ̄ܽܘ ܒܰܒܰܬ̥ܟ̥ܽܘ ܪܳܝܰܓ ܗ̄ܘܰܐ ܕܚܳܙܶܐ ܗ̄ܽܘ ܝܰܘܡܰܝܕ̥ܺܝ، ܘ݄ܚܙܶܐ ܠܶܗ ܘ݄ܦܨܺܝܚ.“ 57ܘܐܡ݄ܪّܰܗ ܠܶܗ ܗ̄ܰܝّܽܘܕ̥̈ܳܝܶܐ: ”ܘܗܶܫ ܠܰܐ ܗ̄ܘܰܬ ܐܰܒܪܶܗ ܕܚܰܡܫܺܝ ܐ݄ܫܢ̈ܶܐ، ܘ݄ܚܙܶܐ ܠܳܟ̥ ܐܰܒܪܳܗܳܡ؟“ 58ܝܶܫܽܘܥ ܐܡ݄ܪ ܠܰܗ ܠّܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܶܩ݄ܕ̱ܡ ܕܳܗ̄ܘܶܐ ܐܰܒܪܳܗܳܡ ܐܳܢܳܐ ܐ̱ܢܳܐ.“ 59ܘܡ݄ܕّܶܗ ܟܶܐܦ̈ܶܐ ܕܡܳܚ݄ܢ ܠܶܗ، ܐܶ‌ܠܳܐ ܝܶܫܽܘܥ ܬܰܠܺܝ، ܘܢܰܦ݄ܩ ܡܽܗ̄ܘ ܗܰܝܟܠܳܐ. ܘܥܰܒ݄ܪ ܒܰܝܢܳܬ̥ܰܝّܶܗ ܘܰܐܙّܶܗ.

Currently Selected:

ܡܓܰܠܝܘܢ ܕܝܘܚܢܢ 8: ܟܬܒܐ

Highlight

Copy