ܡܓܰܠܝܘܢ ܕܝܘܚܢܢ 13

ܬܶܘܠܺܝܦܳܐ ܕܰܫܠܺܝܚ̈ܶܐ

ܝܶܫܽܘܥ ܟܡܰܫ݄ܓ̥ ܪ̈ܰܓ̥ܠܶܐ ܕܰܬّܰܠܡܺܝܕ̥̈ܶܐ

1ܘܡܶܩ݄ܕ̱ܡ ܡܽܗ̄ܘ ܥܶܐܕ̥ܳܐ ܕܽܗ̄ܘ ܦܶܨܚܳܐ، ܝܶܫܽܘܥ ܐܳܕ̥ܰܥ ܗ̄ܘܰܐ ܕܡܰܛܝܳܐ ܗ̄ܺܝ ܫܳܥܬ̥ܳܐ ܕܡ݄ܢܩ݄ܠ ܡܽܗ̄ܘ ܥܳܠܡܰܢܳܐ ܓܰܒ ܗ̄ܽܘ ܐܰܒܳܐ. ܘ݄ܪܚ݄ܡ ܠܶܗ ܗܰܢܺܝ ܕܕܺܝܕ̥ܶܗ ܕܒܽܗ̄ܘ ܥܳܠܡܰܢܳܐ، ܘܗܳܠ ܠܺܗ̄ܝ ܚܰܪܰܝܬܳܐ ܪܚܺܝܡܺܝ ܠܶܗ. 2ܘܺܗ̄ܝ ܢܰܩܠܐ ܕܗܰܘܝܳܐ ܗ̄ܺܝ ܚܫܰܡܬܳܐ، ܗ̄ܽܘ ܣܳܛܳܢܳܐ ܡܰܚܰܬ ܠܶܗ ܒܠܶܒܶܗ ܕܺܝܗܽܘܕ̥ܳܐ ܗ̄ܽܘ ܐܰܒܪܳܐ ܕܫܶܡܥܽܘܢ ܗ̄ܽܘ ܣܟ̥ܰܪܝܽܘܛܳܐ ܠܰܫܰܢ ܕܡܰܫܠܰܡ ܠܶܗ. 3ܘܗܺܝّܶܗ ܝܶܫܽܘܥ، ܡܺܐܝܕ̥ܶܗ ܕܳܐܕ̥ܰܥ ܗ̄ܘܰܐ ܕܟܽܘܠ ܡܶܕܶܐ ܗ̄ܽܘ ܐܰܒܳܐ ܗܽܒ̥ ܠܶܗ ܒܺܐܝܕ̥ܶܗ، ܘܳܐܕ̥ܰܥ ܗ̄ܘܰܐ ܕܡܰܢ̱ ܐ‌ܠܳܗܳܐ ܢܰܦ݄ܩ ܘܓܰܒ ܐܰ‌ܠܳܗܳܐ ܐܰܙܳܠܳܐ، 4ܩܰܝ݄ܡ ܡܺܗ̄ܝ ܚܫܰܡܬܳܐ، ܘܡܰܚܬ ܠܶܗ ܗ̄ܰܠܒܽܘܫ̈ܰܝܕ̥ܶܗ، ܘܡ݄ܕ ܠܶܗ ܡܰܢܕܺܝܠܳܐ ܘܡܰܐܣ݄ܪ ܠܶܗ ܒܚܰܨܶܗ. 5ܘܒ݄ܙ ܠܶܗ ܡܰܝ̈ܶܐ ܒܽܗ̄ܘ ܣܶܦܳܩܳܐ، ܘ݄ܡܫܰܪܶܐ ܠܶܗ ܕܡܰܫ݄ܓ̥ ܪܰܓ̥̈ܠܳܬ̥ܶܗ ܕܰܬّܰܠܡܺܝܕ̥̈ܰܝܕ̥ܶܗ، ܘ݄ܡܟܰܦܰܪّܶܗ ܒܽܗ̄ܘ ܡܰܢܕܺܝܠܳܐ ܕܡܰܐܣ݄ܪ ܠܶܗ ܥܰܠ ܚܰܨܶܗ. 6ܘܺܗ̄ܝ ܢܰܩܠܐ ܕܡܰܛܺܝ ܓܰܒ ܫܶܡܥܽܘܢ ܟܶܐܦܳܐ، ܫܶܡܥܽܘܢ ܐܡ݄ܪ ܠܶܗ ܠܶܗ: ”ܡܳܪܝ: ܗܰܬ ܟܡܰܫܺܝܓ̥݄ܬ ܠܺܝ ܪ̈ܰܓ̥ܠܳܬ̥ܺܝ؟“ 7ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܗ̄ܽܘ ܡܶܕܶܐ ܕ݄ܟܣܳܝܰܡ ܐ̱ܢܳܐ، ܗܰܬ ܠ݄ܐ ܟ݄ܐܕ̥ܥܰܬ ܠܶܗ ܐܳܥܕܳܐ، ܐܶ‌ܠܳܐ ܒ݄ܬ̥݄ܪ ܓܕ݄ܐܕ̥ܥܰܬ.“ 8ܫܶܡܥܽܘܢ ܟܶܐܦܳܐ ܐܡ݄ܪ ܠܶܗ ܠܶܗ: ”ܠܥܳܠܰܡ ܠ݄ܐ ܟܳܗ̄ܘܶܐ ܕܡܰܫܺܝܓ̥ܰܬ ܪ̈ܰܓ̥ܠܳܬ̥ܺܝ.“ ܝܶܫܽܘܥ ܐܡ݄ܪ ܠܶܗ ܠܶܗ: ”ܐܶܢ ܕܠܳܐ ܡܰܫ݄ܓ̥ ܐ̱ܢܳܐ ܠܳܟ̥ ܠ݄ܐ ܟܳܗ̄ܘܶܐ ܠܳܟ̥ ܡܢܳܬ̥ܳܐ ܐܰܥܡܺܝ.“ 9ܘܫܶܡܥܽܘܢ ܟܶܐܦܳܐ ܐܡ݄ܪ ܠܶܗ ܠܶܗ: ”ܕܳܗ̄ܘܝܳܐ ܗܰܘܟ̥ܰܐ، ܡܳܪܝ، ܡܰܫ݄ܓ̥ ܠܳܐ ܪ̈ܰܓ̥ܠܳܬ̥ܺܝ ܠܚܽܘܕ̥ܰܝّܶܗ ܐܶ‌ܠܳܐ ܐܺܝܕ̥̈ܳܬ̥ܺܝ ܘܪܺܝܫܺܝ ܣܬܶܝ.“ 10ܝܶܫܽܘܥ ܐܡ݄ܪ ܠܶܗ ܠܶܗ: ”ܕܟ݄ܬܝܳܐ ܡܰܫܓ̥ܳܐ ܠ݄ܐ ܟܳܐܒܰܥ ܠܶܗ ܐܶ‌ܠܳܐ ܕܡܰܫ݄ܓ̥ ܪ̈ܰܓ̥ܠܳܬ̥ܶܗ ܠܚܽܘܕ̥ܰܝّܶܗ، ܡܺܐܝܕ̥ܶܗ ܕܟܽܘܠܶܗ ܕܰܟ̥ܝܳܐ ܝܳܐ. ܗܰܬܽܘ ܣܬܶܝ ܟܽܘ̇ܠܟ̥ܽܘ ܕܰܟ̥ܝ̈ܶܐ ܗܰܬܽܘ، ܐܶ‌ܠܳܐ ܠܳܐ ܟܽܘ̇ܠܟ̥ܽܘ.“ 11ܘܳܐܕ̥ܰܥ ܗ̄ܘܰܐ ܝܶܫܽܘܥ ܠܰܗ̄ܘܳܐ ܕܡܰܫܠܰܡ ܠܶܗ، ܡܰܗ̄ܘܟ̥ܰܐ ܐܡ݄ܪ ܠܶܗ ܕܠܳܐ ܟܽܘ̇ܠܟ̥ܽܘ ܕܰܟ̥ܝ̈ܶܐ ܗܰܬܽܘ. 12ܘܺܗ̄ܝ ܢܰܩܠܐ ܕܡܰܫ݄ܓ̥ ܠܶܗ ܪ̈ܰܓ̥ܠܳܬ̥ܰܝّܶܗ، ܠܒ̥݄ܫ ܠܶܗ ܗ̄ܰܠܒܽܘܫ̈ܰܝܕ̥ܶܗ ܘܝܰܬܽܒ̥ ܘܐܡ݄ܪ ܠܰܗ ܠّܶܗ: ”ܟ݄ܐܕ̥ܥܺܝܬܽܘ ܡ݄ܢ ܣ݄ܡ ܠܺܝ ܠܟ̥ܽܘ؟ 13ܗܰܬܽܘ ܟ݄ܐܡّܺܪ̱ܝܬܽܘ ܠܺܝ ܡܰܠܦܳܢܳܐ ܘܡܳܪܰܢ، ܘܛܳܒ̥ܳܐ ܟ݄ܐܡّܺܪ̱ܝܬܽܘ، ܥܰܠ ܕܟ݄ܬ ܐ̱ܢܳܐ ܗܰܘܟ̥ܰܐ. 14ܘܶܐܢ ܐܳܢܳܐ ܕܟ݄ܬ ܐ̱ܢܳܐ ܗ̄ܽܘ ܡܳܪܰܬ̥ܟ̥ܽܘ ܘܽܗ̄ܘ ܡܰܠܦܳܢܰܬ̥ܟ̥ܽܘ ܡܰܫ݄ܓ̥ ܠܺܝ ܪ̈ܰܓ̥ܠܳܬ̥ܰܝܟ̥ܽܘ، ܡ݄ܩܰܐ ܗܰܬܽܘ ܟܺܝܬ ܐܰܥܠܰܝܟ̥ܽܘ ܕܡܰܫܺܝܓ̥ܺܝܬܽܘ ܗ̄ܰܪّܰܓ̥̈ܠܶܐ ܕ݄ܚܕ̥ܳܕ̥̈ܶܐ. 15ܗܽܒ̥ ܠܺܝ ܠܟ̥ܽܘ ܗ̄ܽܘ ܡܰܬ̥ܠܰܢܳܐ: ܒܶܗ ܐܰܝܕܰܪܒܳܐ ܐܳܢܳܐ ܣ݄ܡ ܠܺܝ ܐܰ‌ܠܟ̥ܽܘ ܗܰܬܽܘ ܣܬܶܝ ܗܰܘܟ̥ܰܐ ܕܣܰܝܡܺܝܬܽܘ (ܠ݄ܚܕ̥ܳܕ̥̈ܶܐ). 16ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܕܠܰܝܬ ܓܪܶܝܥܳܐ ܪܰܒ ܡܽܗ̄ܘ ܡܳܪܰܝܕ̥ܶܗ، ܘܠܳܐ ܫܠܺܝܚܳܐ ܪܰܒ ܡܰܗ̄ܘܳܐ ܕ݄ܡܫܰܕܰܪ ܠܶܗ. 17ܐܶܢ ܗܰܢܺܝ ܕ݄ܐܕ̥ܥܺܝܬܽܘ، ܛܽܘܒܳܢ̈ܶܐ ܗܰܬܽܘ ܗ̄ܺܝ ܢܰܩܠܐ ܕܣܰܝܡܺܝܬܽܘܢّܶܗ.

ܝܶܫܽܘܥ ܟܡܰܘܕ̥݄ܥ ܗ̄ܽܘ ܢܶܟ̥ܠܳܐ ܕܺܝܗܽܘܕ̥ܳܐ

18”ܠܳܐ ܥܰܠ ܟܽܘ̇ܠܟ̥ܽܘ ܟܳܐܡܰܪ ܐ̱ܢܳܐ، ܟܳܐܕ̥ܰܥ ܐ̱ܢܳܐ ܠܰܐܝܢܰܐ ܕ݄ܓܒܶܐ ܠܺܝ، ܐܶ‌ܠܳܐ ܠܰܫܰܢ ܕܟܳܡ݄ܠ ܗ̄ܽܘ ܟܬ̥ܳܒ̥ܳܐ: ’ܗܰܘܳܐ ܕܳܐܟ̥݄ܠ ܐܰܥܡܺܝ ܠܰܚܡܳܐ، ܗܺܝّܶܗ ܩܰܝ݄ܡ ܐܰܥܠܺܝ.‘ 19ܡܳܐܥܕܳܐ ܟܳܐܡܰܪ ܐ̱ܢܳܐ ܠܟ̥ܽܘ ܡܶܩ݄ܕ̱ܡ ܕܳܗ̄ܘܶܐ، ܘܺܗ̄ܝ ܢܰܩܠܐ ܕܳܗ̄ܘܶܐ ܓܕ݄ܡܗܰܝܡܢܺܝܬܽܘ ܕܳܐܢܳܐ ܐ̱ܢܳܐ. 20ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܡܰܢ ܕܡܰܩܒ݄ܠ ܠܡܰܢ ܕ݄ܡܫܰܕܰܪ ܐ̱ܢܳܐ، ܐܶ‌ܠܺܝ ܟܡܰܩܒ݄ܠ. ܘܡܰܢ ܕܶܐ‌ܠܺܝ ܟܡܰܩܒ݄ܠ، ܟܡܰܩܒ݄ܠ ܠܡܰܢ ܕ݄ܡܫܰܕܰܪ ܠܶܗ ܠܺܝ.“

21ܗܰܢܺܝ ܐܡ݄ܪ ܠܶܗ ܝܶܫܽܘܥ، ܘܥܰܝ݄ܩ ܠܶܒܶܗ ܘ݄ܣܗ݄ܕ ܠܶܗ ܘܐܡ݄ܪ ܠܶܗ: ”ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܟ̥ܽܘ: ܚܰܕ̱ ܡ݄ܢܟ̥ܽܘ ܓ݄ܕܡܰܫܠܰܡ ܠܺܝ.“ 22ܘܚ݄ܪّܶܗ ܗ̄ܰܬّܰܠܡܺܝܕ̥̈ܶܐ ܒ݄ܚܕ̥ܳܕ̥̈ܶܐ ܥܰܠ ܕܠ݄ܐ ܐܕ̥ܥܺܝ ܗ̄ܘܰܘ̱ ܥܰܠ ܡܰܢ ܟܳܐܡ݄ܪ. 23ܘܚܰܕ̱ ܡܰܢ̱ ܬّܰܠܡܺܝܕ̥̈ܶܐ ܕܟ݄ܬ ܗ̄ܘܰܐ ܝܰܬܺܝܒ̥ܳܐ ܣܺܝܕ̥ܶܗ، ܗܰܘܳܐ ܕܪܳܚܰܡ ܗ̄ܘܰܝ ܠܶܗ ܝܶܫܽܘܥ، 24ܠܰܗ̄ܢܳܐ، ܪܡ݄ܙ ܠܶܗ ܫܶܡܥܽܘܢ ܟܶܐܦܳܐ، ܠܰܫܰܢ ܕ݄ܡܫܰܐܶܠ ܡܶܢ̱ ܝܶܫܽܘܥ ܕܡܰܢܝܳܐ ܗܰܢܳܐ ܕܐܡ݄ܪ ܠܶܗ ܐܰܥܠܶܗ. 25ܘܽܗ̄ܘ ܬܰܠܡܺܝܕ̥ܳܐ ܡܩܰܕܰܡ ܠܶܗ ܠܰܐܦ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܡܳܪܝ، ܡܰܢܝܳܐ ܗܰܢܳܐ؟“ 26ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ: ”ܗܰܘܳܐ ܕܛܳܡܰܫ ܐ̱ܢܳܐ ܗ̄ܽܘ ܠܰܚܡܳܐ ܘܳܗ̄ܒܶܐ ܐ̱ܢܳܐ ܠܶܗ ܝܳܐ.“ ܘ݄ܛܡ݄ܫ ܠܶܗ ܝܶܫܽܘܥ ܗ̄ܽܘ ܠܰܚܡܳܐ ܘܗܽܒ̥ ܠܶܗ ܠܺܝܗܽܘܕ̥ܳܐ ܗ̄ܽܘ ܐܰܒܪܳܐ ܕܫܶܡܥܽܘܢ ܗ̄ܽܘ ܣܟ̥ܰܪܝܽܘܛܳܐ. 27ܘܒ݄ܬ̥݄ܪ (ܕܡ݄ܕ ܠܶܗ) ܗ̄ܽܘ ܠܰܚܡܳܐ، ܥܰܒ݄ܪ ܐܶܒܶܗ ܗ̄ܽܘ ܣܳܛܳܢܳܐ. ܘܐܡ݄ܪ ܠܶܗ ܠܶܗ ܝܶܫܽܘܥ: ”ܗ̄ܽܘ ܡܶܕܶܐ ܕܣܰܝܡܰܬ ܠܶܗ، ܣܽܘܡܶܗ ܡܰܠܺܝܙܳܐ.“ 28ܘܢܳܫܳܐ ܡܰܢ̱ ܝّܰܬܺܝܒ̥̈ܶܐ ܠܰܐ ܐܕ̥݄ܥ ܥܰܠ ܡ݄ܢ ܐܡ݄ܪ ܠܶܗ ܠܶܗ، 29ܗ݄ܢ ܡ݄ܢّܶܗ ܚܫܽܒّ̥ܶܗ، ܡܺܐܝܕ̥ܶܗ ܕܽܗ̄ܘ ܟܺܝܣܳܐ ܕܰܙّܽܘܙ̈ܶܐ ܥܰܡ ܝܺܗܽܘܕ̥ܳܐ ܗ̄ܘܰܐ، ܦܽܘܩܕܳܢܳܐ ܗܽܒ̥ ܠܶܗ ܠܶܗ ܕܙܳܒ̥݄ܢ ܡܶܕܶܐ ܕܳܐܒ݄ܥ ܠܽܗ̄ܘ ܥܶܐܕ̥ܳܐ، ܐܰܘ ܕܳܗ̄ܒܶܐ ܡܶܕܶܐ ܠܰܡّܶܣܟܶܢ̈ܶܐ. 30ܘܺܝܗܽܘܕ̥ܳܐ ܐܰܟ̥ܺܝܠ ܠܶܗ ܗ̄ܽܘ ܠܰܚܡܳܐ، ܘܡܶܚܕ̥ܳܐ ܢܰܦ݄ܩ ܠܰܪܒ̥ܰܠ. ܘܠܰܠܝܳܐ ܗ̄ܘܰܐ ܗ̄ܺܝ ܢܰܩܠܐ ܕܢܰܦ݄ܩ.

ܗ̄ܽܘ ܦܽܘܩܕܳܢܳܐ ܚܰܕ̱ܬ̥ܳܐ

31ܘܐܡ݄ܪ ܠܶܗ ܝܶܫܽܘܥ: ”ܐܳܥܕܳܐ ܡܫܰܒ݄ܚ ܐܰܒܪܶܗ ܕܢܳܫܳܐ ܘܰܐ‌ܠܳܗܳܐ ܡܫܰܒ݄ܚ ܐܶܒܶܗ. 32ܘܶܐܢ ܐܰ‌ܠܳܗܳܐ ܡܫܰܒ݄ܚ ܐܶܒܶܗ، ܐܰ‌ܠܳܗܳܐ ܣܬܶܝ ܟ݄ܡܫܰܒܰܚ ܠܶܗ ܐܶܒܶܗ، ܘܡܶܚܕ̥ܳܐ ܟ݄ܡܫܰܒܰܚ ܠܶܗ. 33ܝܰܐ ܗ̄ܰܢ ܐܰܒܢ̈ܰܝܕ̥ܺܝ: ܐ݄ܫܡܳܐ ܚܪܶܬܳܐ ܐܰܥܡܰܝܟ̥ܽܘ ܐ̱ܢܳܐ، ܘ݄ܓܕ݄ܐܒܥܺܝܬܽܘ ܠܺܝ، ܘ݄ܐܟ̥ ܕܐܡ݄ܪ ܠܺܝ ܠܰܝّܽܘܕ̥̈ܳܝܶܐ، ܐܳܥܕܳܐ ܐܰ‌ܠܟ̥ܽܘ ܣܬܶܝ ܟܳܐܡܰܪ ܐ̱ܢܳܐ: ܠܰܐܝܟܳܐ ܕܳܐܢܳܐ ܐ݄ܙّܺܝ ܐ̱ܢܳܐ، ܗܰܬܽܘ ܠܰܒܟ̥ܽܘ ܐܳܬ̥ܺܝܬܽܘ. 34ܦܽܘܩܕܳܢܳܐ ܚܰܕ̱ܬ̥ܳܐ ܟܳܗ̄ܒܶܐ ܐ̱ܢܳܐ ܠܟ̥ܽܘ: ܪܚܰܡܽܘ ܠ݄ܚܕ̥ܳܕ̥̈ܶܐ، ܐܟ̥ ܕܳܐܢܳܐ ܪܚ݄ܡ ܠܺܝ ܠܟ̥ܽܘ ܗܰܬܽܘ ܣܬܶܝ ܪܚܰܡܽܘ ܠ݄ܚܕ̥ܳܕ̥̈ܶܐ. 35ܒܰܗ̄ܬ̥ܶܐ ܟܽܘܠ ܚܰܕ̱ ܓܕܳܐܕ̥݄ܥ ܕܰܬّܰܠܡܺܝܕ̥̈ܰܝܕ̥ܺܝ ܗܰܬܽܘ، ܐܶܡܰܐ ܕܳܗ̄ܘܰܠܟ̥ܽܘ ܚܽܘܒܳܐ ܠ݄ܚܕ̥ܳܕ̥̈ܶܐ.“

ܝܶܫܽܘܥ ܟܡܰܘܕ̥݄ܥ ܥܰܠ ܗ̄ܽܘ ܟܦܳܪܳܐ ܕܫܶܡܥܽܘܢ

ܡܬܝ 26‏:31‏‐35؛ ܡܪܩܘܣ 14‏:27‏‐31؛ ܠܘܩܐ 22‏:31‏‐34

36ܐܡ݄ܪ ܠܶܗ ܠܶܗ ܠܫܶܡܥܽܘܢ ܟܶܐܦܳܐ: ”ܡܳܪܰܢ، ܠܰܐܝܟܳܐ ܓܕ݄ܐܙّܳܟ̥؟“ ܡܰܕܥܰܪ ܠܶܗ ܝܶܫܽܘܥ ܘܐܡ݄ܪ ܠܶܗ ܠܶܗ: ”ܠܰܐܝܟܳܐ ܕܟ݄ܬ ܐ̱ܢܳܐ ܐܰܙܳܠܳܐ، ܗܰܬ ܐܳܥܕܳܐ ܠܰܝܒܳܟ̥ ܐܳܬ̥ܰܬ ܒ݄ܬ̥ܪܺܝ. ܐܶ‌ܠܳܐ ܒܺܗ̄ܝ ܚܰܪܰܝܬܳܐ ܓܕܳܐܬ̥ܰܬ.“ 37ܐܡ݄ܪ ܠܶܗ ܫܶܡܥܽܘܢ ܟܶܐܦܳܐ: ”ܡܳܪܝ، ܠܡ݄ܢ ܐܳܥܕܳܐ ܠܰܝܒܺܝ ܐܳܬ̥ܶܐ ܐ̱ܢܳܐ ܒ݄ܬ̥ܪܳܟ̥، ܗ̄ܺܝ ܢܰܦܫܰܝܕ̥ܺܝ ܡܶܢ̱ ܚܠܳܦܳܟ̥ ܟܡܰܚ݄ܬܢܰܗ.“ 38ܐܡ݄ܪ ܠܶܗ ܠܶܗ ܝܶܫܽܘܥ: ”ܟܡܰܚܬܰܬ ܢܰܦܫܳܟ̥ ܡܶܢ̱ ܚܠܳܦܺܝ؟ ܫܪܳܪܳܐ ܫܪܳܪܳܐ ܟܳܐܡܰܪ ܐ̱ܢܳܐ ܠܳܟ̥: ܗܶܫ ܠ݄ܐ ܓܩܳܪܶܐ ܗ̄ܽܘ ܙܳܓ̥ܳܐ، ܗܰܬ ܓ݄ܕܟ݄ܦܪܰܬ ܐܶܒܺܝ ܬܠ݄ܬ̥ ܟܳܪ̈ܶܐ.“

Currently Selected:

ܡܓܰܠܝܘܢ ܕܝܘܚܢܢ 13: ܟܬܒܐ

Highlight

Copy