ܣܶܦܪܳܐ ܕ݄ܒܪܺܝܬ̥ܳܐ 7
7
1ܘܐܡ݄ܪ ܠܶܗ ܐܰܠܳܗܳܐ ܠܢܽܘܚ: ”ܥܒܰܪ ܗܰܬ ܘܟܽܘܠܶܗ ܗ̄ܽܘ ܒܰܝܬܰܝܕ̥ܳܟ̥ ܠܺܗ̄ܝ ܩܺܝܒܽܘܬ̥ܳܐ، ܥܰܠ ܕ݄ܚܙܶܐ ܠܺܝ ܠܳܟ̥ ܕܟ݄ܬ ܗ̄ܰܬ ܙܰܕܺܝܩܳܐ ܩܽܘܕ̱ܡܺܝ ܒܽܗ̄ܘ ܕܳܪܰܢܳܐ. 2ܘܡܶܢ̱ ܟܽܘܠܶܗ ܗ̄ܽܘ ܒܥܺܝܪܳܐ ܕܰܟ̥ܝܳܐ، ܡܘ̇ܕ ܠܳܟ̥ ܫܰܒ̥ܥܳܐ ܫܰܒ̥ܥܳܐ ܕܶܟܪ̈ܶܐ ܘܢܶܩܒ̈ܳܬ̥ܳܐ. ܘܡܽܗ̄ܘ ܒܥܺܝܪܳܐ ܕܠܰܝ̱ܬ ܝܳܐ ܕܰܟ̥ܝܳܐ، ܬܪܶܝ ܬܪܶܝ، ܕܶܟܪ̈ܶܐ ܘܢܶܩܒ̈ܳܬ̥ܳܐ. 3ܘܡܽܗ̄ܘ ܛܰܝܪܳܐ ܕܺܗ̄ܝ ܫܡܰܝܳܐ ܣܬܶܝ ܫܰܒ̥ܥܳܐ ܫܰܒ̥ܥܳܐ، ܕܶܟܪ̈ܶܐ ܘܢܶܩܒ̈ܳܬ̥ܳܐ، ܕܦܳܝ݄ܫ ܗ̄ܽܘ ܙܰܪܥܰܬّ̥ܶܗ ܚܰܝܳܐ ܥܰܠ ܦܳܬ̥ܰܗ ܕܟܽܘܠܰܗ ܗ̄ܺܝ ܐܰܪܥܳܐ. 4ܡܺܐܝܕ̥ܶܗ ܕܡܳܐܥܕܳܐ ܠܫܰܒ̥ܥܳܐ ܝܰܘܡ̈ܶܐ ܓܡܰܢܚܰܬ ܐ̱ܢܳܐ ܡܰܛܪܳܐ ܥܰܠ ܗ̄ܺܝ ܐܰܪܥܳܐ، ܐܰܪܒܥܺܝ ܐܺܝܡܳܡ̈ܶܐ ܘܰܐܪܒܥܺܝ ܠܰܠܝ̈ܶܐ، ܘ݄ܓܠܳܚܶܐ ܐ̱ܢܳܐ ܟܘ̇ܠ ܚܰܝܳܐ ܕܣ݄ܡ ܠܺܝ ܡܶܢ̱ ܦܳܬ̥ܰܗ ܕܺܗ̄ܝ ܐܰܪܥܳܐ.“ 5ܘܣ݄ܡ ܠܶܗ ܢܽܘܚ ܒܟܘ̇ܠ ܦܽܘܩܕܳܢܳܐ ܕܡܳܪܝܳܐ.
6ܘܢܽܘܚ ܐܰܒܪܶܗ ܕܫܶܬ̥ܡܳܐܐ ܐ݄ܫܢ̈ܶܐ ܗ̄ܘܰܐ، ܘܗܰܘܺܝ ܗ̄ܽܘ ܛܰܘܦܳܢܳܐ ܕܰܡّܰܝ̈ܶܐ ܥܰܠ ܗ̄ܺܝ ܐܰܪܥܳܐ. 7ܘܥܰܒ݄ܪ ܢܽܘܚ ܘܰܗ̄ܢ ܐܰܒܢ̈ܰܝܕ̥ܶܗ ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܘܰܗ̄ܢ ܢܶܫ̈ܶܐ ܕܰܗ̄ܢ ܐܰܒܢ̈ܰܝܕ̥ܶܗ ܐܰܥܡܶܗ ܠܺܗ̄ܝ ܩܺܝܒܽܘܬ̥ܳܐ ܡܶܩ݄ܕ̱ܡ ܗ̄ܰܡّܰܝ̈ܶܐ ܕܽܗ̄ܘ ܛܰܘܦܳܢܳܐ. 8ܘܡܽܗ̄ܘ ܒܥܺܝܪܳܐ ܕܰܟ̥ܝܳܐ، ܘܡܽܗ̄ܘ ܒܥܺܝܪܳܐ ܕܠܰܝ̱ܬ ܝܳܐ ܕܰܟ̥ܝܳܐ، ܘܡܽܗ̄ܘ ܛܰܝܪܳܐ ܘܡܶܢ̱ ܟܘ̇ܠ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ. 9ܬܪܶܝ ܬܪܶܝ ܥܰܒܺܝܪܺܝ ܥܰܡ ܢܽܘܚ ܠܺܗ̄ܝ ܩܺܝܒܽܘܬ̥ܳܐ، ܕܶܟܪ̈ܶܐ ܘܢܶܩܒ̈ܳܬ̥ܳܐ، ܐܟ̥ ܕܽܗ̄ܘ ܦܽܘܩܕܳܢܳܐ ܕܰܐܠܳܗܳܐ ܠܢܽܘܚ.
10ܘܗܰܘܺܝ ܒ݄ܬ̥݄ܪ ܫܰܒ̥ܥܳܐ ܝܰܘܡ̈ܶܐ، ܗ̄ܰܡّܰܝ̈ܶܐ ܕܽܗ̄ܘ ܛܰܘܦܳܢܳܐ ܗܰܘ݄ܢ ܥܰܠ ܗ̄ܺܝ ܐܰܪܥܳܐ. 11ܒܺܗ̄ܝ ܫܰܢ̱ܬܳܐ ܕܰܫّܶܬ̥ܡܳܐܐ ܐ݄ܫܢ̈ܶܐ ܕܰܚّܰܝ̈ܶܐ ܕܢܽܘܚ، ܒܽܗ̄ܘ ܝܰܪܚܳܐ ܕܰܬܪܶܝ، ܘܒ݄ܫܒ̥ܰܥܣܰܪ ܒܽܗ̄ܘ ܝܰܪܚܳܐ، ܒܽܗ̄ܘ ܝܰܘܡܰܢܳܐ، ܦܬܺܝܚܺܝ ܟܽܘܠّܶܗ ܗ̄ܰܡܥܺܝܢ̈ܶܐ ܕܽܗ̄ܘ ܥܽܘܡܩܳܐ ܪܰܒܳܐ، ܘܰܟّܰܘ̈ܶܐ (ܡܰܪܙܺܝܒ̥̈ܶܐ) ܕܰܡّܰܝ̈ܶܐ ܕܺܗ̄ܝ ܫܡܰܝܳܐ ܦܬܺܝܚܺܝ. 12ܘܗܰܘܺܝ ܡܰܛܪܳܐ ܥܰܠ ܗ̄ܺܝ ܐܰܪܥܳܐ ܐܰܪܒܥܺܝ ܐܺܝܡܳܡ̈ܶܐ ܘܰܐܪܒܥܺܝ ܠܰܠܝ̈ܶܐ. 13ܒܽܗ̄ܘ ܝܰܘܡܰܢܳܐ ܥܰܒ݄ܪ ܢܽܘܚ ܘܫܶܝܡ ܘܚܳܡ ܘܝܰܦܶܬ̥، ܗ̄ܰܢ ܐܰܒܢ̈ܶܐ ܕܢܽܘܚ، ܘܺܗ̄ܝ ܐܰܢ̱ܬ̥ܬܳܐ ܕܢܽܘܚ ܘܰܬܠ݄ܬ̥ ܢܶܫ̈ܶܐ ܕܰܗ̄ܢ ܐܰܒܢ̈ܰܝܕ̥ܶܗ ܐܰܥܡܶܗ ܠܺܗ̄ܝ ܩܺܝܒܽܘܬ̥ܳܐ 14ܗ݄ܢّܶܝ ܘܟܽܘܠܰܗ ܗ̄ܺܝ ܚܰܝܽܘܬ̥ܳܐ ܐܟ̥ ܕܽܗ̄ܘ ܓܶܢܣܰܝܕ̥ܰܗ، ܘܟܽܘܠܶܗ ܗ̄ܽܘ ܒܥܺܝܪܳܐ ܐܟ̥ ܕܽܗ̄ܘ ܓܶܢܣܰܝܕ̥ܰܗ، ܘܟܽܘܠܶܗ ܗ̄ܽܘ ܪܰܚܫܳܐ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ ܐܟ̥ ܕܽܗ̄ܘ ܓܶܢܣܰܝܕ̥ܶܗ، ܘܟܽܘܠܶܗ ܗ̄ܽܘ ܛܰܝܪܳܐ ܐܟ̥ ܕܽܗ̄ܘ ܓܶܢܣܰܝܕ̥ܶܗ، ܘܟܘ̇ܠ ܨܰܦܪܽܘܢܳܐ ܘܟܘ̇ܠ ܕܟ݄ܬ ܠܶܗ ܓܶܦ̈ܶܐ. 15ܥܰܒܺܝܪܺܝ ܥܰܡ ܢܽܘܚ ܠܺܗ̄ܝ ܩܺܝܒܽܘܬ̥ܳܐ، ܬܪܶܝ ܬܪܶܝ ܡܶܢ̱ ܟܘ̇ܠ ܦܰܓ̥ܪܳܐ ܕܟܺܝܬ ܐܰܒّܶܗ ܪܽܘܚܳܐ ܕܰܚّܰܝ̈ܶܐ. 16ܘܗܰܢܺܝ ܕܥܰܒܺܝܪܺܝ ܕܶܟܪ̈ܶܐ ܘܢܶܩܒ̈ܳܬ̥ܳܐ ܡܶܢ̱ ܟܘ̇ܠ ܦܰܓ̥ܪܳܐ ܥܰܒܺܝܪܺܝ، ܐܟ̥ ܕܡܰܩܘܶܐ ܠܶܗ ܐܰܥܠܶܗ ܐܰܠܳܗܳܐ. ܘ݄ܣܟ̥݄ܪ ܠܶܗ ܡܳܪܝܳܐ ܒܦܳܬ̥ܶܗ.
17ܘܗܰܘܺܝ ܛܰܘܦܳܢܳܐ ܐܰܪܒܥܺܝ ܝܰܘܡ̈ܶܐ ܥܰܠ ܗ̄ܺܝ ܐܰܪܥܳܐ. ܘܙܰܝܺܝܕܺܝ ܗ̄ܰܡّܰܝ̈ܶܐ ܘ݄ܛܥ݄ܢّܶܗ ܠܺܗ̄ܝ ܩܺܝܒܽܘܬ̥ܳܐ، ܘܥܰܠܺܝܳܐ ܡܺܗ̄ܝ ܐܰܪܥܳܐ. 18ܘܚܺܝܨܺܝ ܗ̄ܰܡّܰܝ̈ܶܐ ܘܙܰܝܺܝܕܺܝ ܓ̥ܰܠܰܒܶܐ ܥܰܠ ܗ̄ܺܝ ܐܰܪܥܳܐ. ܘ݄ܡܗܰܠܟ̥ܳܐ ܗ̄ܘܰܐ ܗ̄ܺܝ ܩܺܝܒܽܘܬ̥ܳܐ ܥܰܠ ܦܳܬ̥ܶܗ ܕܰܡّܰܝ̈ܶܐ. 19ܘܰܡّܰܝ̈ܶܐ ܚܺܝܨܺܝ ܓ̥ܰܠܰܒܶܐ ܥܰܠ ܗ̄ܺܝ ܐܰܪܥܳܐ، ܘ݄ܡܟܰܣ݄ܢ ܟܽܘܠّܶܗ ܗ̄ܰܛّܽܘܪ̈ܶܐ ܥܶܠܳܝ̈ܶܐ ܕܬܰܚܬ ܗ̄ܺܝ ܫܡܰܝܳܐ ܟܽܘܠܰܗ. 20ܚܰܡܫܰܥܣܰܪ ܕܪ̈ܳܥܶܐ ܒܽܗ̄ܘ ܥ݄ܠܝܳܐ ܥܰܠ݄ܢ ܗ̄ܰܡّܰܝ̈ܶܐ. ܘ݄ܡܟܰܣ݄ܢ ܗ̄ܰܛّܽܘܪ̈ܶܐ. 21ܘܣܰܝ݄ܦ ܟܘ̇ܠ ܦܰܓ̥ܪܳܐ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ: ܗ̄ܰܛّܰܝܪ̈ܶܐ ܘܽܗ̄ܘ ܒܥܺܝܪܳܐ ܘܰܚّܰܝ̈ܘܳܬ̥ܳܐ، ܘܟܘ̇ܠ ܪܰܚܫܳܐ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ، ܘܟܽܘܠّܶܗ ܗ̄ܰܢ ܢܳܫ̈ܶܐ. 22ܟܘ̇ܠ ܕܟܺܝܬ ܢܫܰܡܬܳܐ ܕܪܽܘܚܳܐ ܕܚܰܝ̈ܶܐ ܒܦܳܬ̥ܶܗ ܒܺܗ̄ܝ ܐܰܪܥܳܐ ܡܰܝ݄ܬ̥. 23ܘ݄ܠܚܶܐ ܠܶܗ ܠܟܘ̇ܠ ܕܩܳܝܰܡ ܗ̄ܘܰܐ ܥܰܠ ܦܳܬ̥ܰܗ ܕܺܗ̄ܝ ܐܰܪܥܳܐ: ܡܰܗ̄ܢ ܢܳܫ̈ܶܐ ܘܗ݄ܠ ܠܰܚّܰܝ̈ܘܳܬ̥ܳܐ ܘܗ݄ܠ ܠܽܗ̄ܘ ܪܰܚܫܳܐ ܘܗ݄ܠ ܠܽܗ̄ܘ ܛܰܝܪܳܐ ܕܺܗ̄ܝ ܫܡܰܝܳܐ ܠܚ݄ܢ ܡܺܗ̄ܝ ܐܰܪܥܳܐ. ܘܦܰܝ݄ܫ ܢܽܘܚ ܘܕܰܐܥܡܶܗ ܒܺܗ̄ܝ ܩܺܝܒܽܘܬ̥ܳܐ 24ܘܙܰܝܺܝܕܺܝ ܗ̄ܰܡّܰܝ̈ܶܐ ܥܰܠ ܗ̄ܺܝ ܐܰܪܥܳܐ ܡܳܐܐ ܘܚܰܡܫܺܝ ܝܰܘܡ̈ܶܐ.
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 7: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
