ܣܶܦܪܳܐ ܕ݄ܒܪܺܝܬ̥ܳܐ 8

1ܘܡܰܕ̥ܟܰܪ ܠܶܗ ܐܰ‌ܠܳܗܳܐ ܠܢܽܘܚ، ܘ݄ܠܟܽܘܠܰܗ ܗ̄ܺܝ ܚܰܝܽܘܬ̥ܳܐ، ܘ݄ܠܟܽܘܠܶܗ ܗ̄ܽܘ ܒܥܺܝܪܳܐ، ܘ݄ܠܟܽܘܠܶܗ ܗ̄ܽܘ ܛܰܝܪܳܐ ܕܰܐܥܡܶܗ ܒܺܗ̄ܝ ܩܺܝܒܽܘܬ̥ܳܐ. ܘܡܰܩ݄ܡ ܠܶܗ ܐܰ‌ܠܳܗܳܐ ܗܰܘܰܐ ܥܰܠ ܗ̄ܺܝ ܐܰܪܥܳܐ، ܘܟܰܠ݄ܢ ܗ̄ܰܡّܰܝ̈ܶܐ. 2ܘ݄ܣܟ̥ܺܝܪܺܝ ܗ̄ܰܡܥܺܝܢ̈ܶܐ ܕܰܡّܰܝ̈ܶܐ ܕܽܗ̄ܘ ܥܽܘܡܩܳܐ ܘܰܟّܰܘ̈ܶܐ (ܗ̄ܰܡّܰܙܪ̈ܺܝܒܶܐ) ܕܺܗ̄ܝ ܫܡܰܝܳܐ، ܘܟܰܐܠܺܝ ܗ̄ܽܘ ܡܰܛܪܳܐ ܡܺܗ̄ܝ ܫܡܰܝܳܐ. 3ܘܕܰܥܺܝܪܺܝ ܗ̄ܰܡّܰܝ̈ܶܐ ܡܺܗ̄ܝ ܐܰܪܥܳܐ، ܐ݄ܫܡܳܐ ܐ݄ܫܡܳܐ، ܘܢܰܩܺܝܨܺܝ ܗ̄ܰܡّܰܝ̈ܶܐ ܒ݄ܬ̥݄ܪ ܡܳܐܐ ܘܚܰܡܫܺܝ ܝܰܘܡ̈ܶܐ. 4ܘܟܰܠܝܳܐ ܗ̄ܺܝ ܩܺܝܒܽܘܬ̥ܳܐ ܒܽܗ̄ܘ ܝܰܪܚܳܐ ܕܰܫّܰܒ̥ܥܳܐ، ܫܒ̥ܰܥܣܰܪ ܒܽܗ̄ܘ ܝܰܪܚܳܐ، ܥܰܠ ܗ̄ܰܛّܽܘܪ̈ܶܐ ܕܩܰܪܕܽܘ. 5ܘܰܡّܰܝ̈ܶܐ ܟܘ̇ܠ ܕܳܐܬ̥ܶܐ ܗ̄ܘܰܐ ܢܳܩܨܺܝ ܗ̄ܘܰܘ̱ ܗ݄ܠ ܠܽܗ̄ܘ ܝܰܪܚܳܐ ܕܰܥّܰܣܪܳܐ، ܒܚܰܕ̱ ܒܽܗ̄ܘ ܝܰܪܚܳܐ ܕܰܥّܰܣܪܳܐ ܚܙ݄ܢ ܪ̈ܺܝܫܶܐ ܕܰܛّܽܘܪ̈ܶܐ.

6ܘܗܰܘܺܝ ܡܶܢ̱ ܒ݄ܬ̥݄ܪ ܐܰܪܒܥܺܝ ܝܰܘܡ̈ܶܐ، ܦܬ݄ܚ ܠܶܗ ܢܽܘܚ ܗ̄ܺܝ ܟܰܘܬ̥ܳܐ ܕܺܗ̄ܝ ܩܺܝܒܽܘܬ̥ܳܐ ܕܣ݄ܡ ܠܶܗ. 7ܘ݄ܡܫܰܕܰܪ ܠܶܗ ܛܰܝܪܳܐ (ܥܽܘܪܒܳܐ)، ܘ݄ܢܦܳܩܳܐ ܢܰܦ݄ܩ ܘܠܳܐ ܕܰܥ݄ܪ ܗ݄ܠ ܕܝܰܒܺܝܫܺܝ ܗ̄ܰܡّܰܝ̈ܶܐ ܡܶܢ̱ ܦܳܬ̥ܰܗ ܕܺܗ̄ܝ ܐܰܪܥܳܐ. 8ܘ݄ܡܫܰܕܰܪ ܠܶܗ ܠܺܗ̄ܝ ܝܰܘܢܳܐ ܡܶܢ̱ ܣܺܝܕ̥ܶܗ ܕܚܳܙܶܐ ܐܶܢ ܢܰܩܺܝܨܺܝ ܗ̄ܰܡّܰܝ̈ܶܐ ܡܶܢ̱ ܦܳܬ̥ܰܗ ܕܺܗ̄ܝ ܐܰܪܥܳܐ. 9ܘܠܳܐ ܚܙܶܐ ܠܰܗ ܗ̄ܺܝ ܝܰܘܢܳܐ ܕܽܘܟܬ̥ܳܐ ܕܡܰܚܬܳܐ ܪܰܓ̥ܠܰܗ. ܘܕܰܥܺܝܪܳܐ ܠܣܺܝܕܶܗ ܠܺܗ̄ܝ ܩܺܝܒܽܘܬ̥ܳܐ، ܡܺܐܝܕ̥ܶܗ ܕܟ݄ܬ ܗ̄ܘܰܘ̱ ܡܰܝ̈ܶܐ ܥܰܠ ܦܳܬ̥ܰܗ ܕܺܗ̄ܝ ܐܰܪܥܳܐ ܟܽܘܠܰܗ. ܘ݄ܦܫ݄ܛ ܠܶܗ ܐܺܝܕ̥ܶܗ ܘܡܺܝܕܳܐ ܠܶܗ ܘܡܰܥ݄ܒܪܳܐ ܠܶܗ ܠܣܺܝܕܶܗ ܠܺܗ̄ܝ ܩܺܝܒܽܘܬ̥ܳܐ. 10ܘܦܰܝ݄ܫ ܫܰܒ̥ܥܳܐ ܝܰܘܡ̈ܶܐ ܚܪ̈ܶܢܶܐ، ܘܕܰܥ݄ܪ ܡܫܰܕܪܳܐ ܠܶܗ ܠܺܗ̄ܝ ܝܰܘܢܳܐ ܡܺܗ̄ܝ ܩܺܝܒܽܘܬ̥ܳܐ. 11ܘܠܰܐܦ ܓܢܰܝܬܶܗ ܕܝܰܘܡܳܐ، ܐܰܬ̥ܝܳܐ ܗ̄ܺܝ ܝܰܘܢܳܐ ܠܣܺܝܕܶܗ، ܘܟܰܐܠܶܗ ܛܰܪܦܳܐ ܕܙܰܝܬܽܘܢܳܐ ܟܙܳܒܛܳܐ ܒܦܶܡܰܗ. ܘܰܐܕ̥݄ܥ ܢܽܘܚ ܕܢܰܩܺܝܨܺܝ ܗ̄ܰܡّܰܝ̈ܶܐ ܡܶܢ̱ ܦܳܬ̥ܰܗ ܕܺܗ̄ܝ ܐܰܪܥܳܐ. 12ܘܦܰܝ݄ܫ ܫܰܒ̥ܥܳܐ ܝܰܘܡ̈ܶܐ ܚܪ̈ܶܢܶܐ، ܘ݄ܡܫܰܕܰܪ ܠܶܗ ܗ̄ܺܝ ܝܰܘܢܳܐ. ܘܺܗ̄ܝ ܝܰܘܢܳܐ ܢܰܩܠܐ ܚܪܶܬܳܐ ܠܳܐ ܕܰܥܺܝܪܳܐ ܠܣܺܝܕܶܗ. 13ܘܗܰܘܺܝ ܒܺܗ̄ܝ ܫܰܢ̱ܬܳܐ ܕܰܫّܶܬ̥ܡܳܐܐ ܘ݄ܚܕ̥ܳܐ، ܚܰܕ̱ ܒܽܗ̄ܘ ܝܰܪܚܳܐ ܩܰܕ̱ܡܳܝܳܐ، ܝܰܒܺܝܫܺܝ ܗ̄ܰܡّܰܝ̈ܶܐ ܡܺܗ̄ܝ ܐܰܪܥܳܐ. ܘ݄ܦܬ݄ܚ ܠܶܗ ܢܽܘܚ ܗ̄ܽܘ ܬܰܪܥܳܐ ܕܺܗ̄ܝ ܩܺܝܒܽܘܬ̥ܳܐ ܘ݄ܚܙܶܐ ܠܶܗ ܘܟܰܐܠܰܗ ܝܰܒܺܝܫܳܐ ܦܳܬ̥ܰܗ ܕܺܗ̄ܝ ܐܰܪܥܳܐ. 14ܘܒܽܗ̄ܘ ܝܰܪܚܳܐ ܕܰܬܪܶܝ، ܒܫܰܒ̥ܥܳܐ ܘܥ݄ܣܪܺܝ ܒܽܗ̄ܘ ܝܰܪܚܳܐ، ܝܰܒܺܝܫܳܐ ܗ̄ܺܝ ܐܰܪܥܳܐ.

15ܘ݄ܫܓ̥ܺܝܠ ܐܰ‌ܠܳܗܳܐ ܥܰܡ ܢܽܘܚ ܘܐܡ݄ܪ ܠܶܗ ܠܶܗ: 16”ܢܦܰܩ ܡܺܗ̄ܝ ܩܺܝܒܽܘܬ̥ܳܐ ܗܰܬ ܘܺܗ̄ܝ ܐܰܢ̱ܬ̥ܬܰܝܕ̥ܳܟ̥ ܘܰܗ̄ܢ ܐܰܒܢ̈ܰܝܕ̥ܳܟ̥ ܘܰܗ̄ܢ ܢܶܫ̈ܶܐ ܕܰܗ̄ܢ ܐܰܒܢ̈ܰܝܕ̥ܳܟ̥ ܐܰܥܡܳܟ̥، 17ܘܟܽܘܠܰܗ ܗ̄ܺܝ ܚܰܝܽܘܬ̥ܳܐ ܕܰܐܥܡܳܟ̥ ܡܶܢ̱ ܟܘ̇ܠ ܦܰܓ̥ܪܳܐ ܘܽܗ̄ܘ ܛܰܝܪܳܐ ܘܽܗ̄ܘ ܒܥܺܝܪܳܐ ܘܟܘ̇ܠ ܪܰܚܫܳܐ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ، ܡܰܘܦ݄ܩ ܐܰܥܡܳܟ̥. ܘ݄ܛܪܳܐ ܡܰܘܠܕܺܝ ܒܺܗ̄ܝ ܐܰܪܥܳܐ، ܘܳܗ̄ܒ݄ܢ ܦܺܐܪ̈ܶܐ ܘܙܰܝܕܺܝ ܥܰܠ ܗ̄ܺܝ ܐܰܪܥܳܐ.“ 18ܘܢܰܦ݄ܩ ܢܽܘܚ ܘܺܗ̄ܝ ܐܰܢ̱ܬ̥ܬܰܝܕ̥ܶܗ ܘܰܗ̄ܢ ܐܰܒܢ̈ܰܝܕ̥ܶܗ ܘܰܗ̄ܢ ܢܶܫ̈ܶܐ ܕܰܗ̄ܢ ܐܰܒܢ̈ܰܝܕ̥ܶܗ ܐܰܥܡܶܗ. 19ܘܟܽܘܠܰܗ ܗ̄ܺܝ ܚܰܝܽܘܬ̥ܳܐ ܘܟܽܘܠܶܗ ܗ̄ܽܘ ܒܥܺܝܪܳܐ ܘܟܽܘܠܶܗ ܗ̄ܽܘ ܛܰܝܪܳܐ ܘܟܘ̇ܠ ܕܟܳܪܳܚ݄ܫ ܥܰܠ ܗ̄ܺܝ ܐܰܪܥܳܐ ܠܰܓّܶܢܣ̈ܰܬّ̥ܶܗ، ܢܰܦܺܝܩܺܝ ܡܺܗ̄ܝ ܩܺܝܒܽܘܬ̥ܳܐ.

20ܘ݄ܒܢܶܐ ܠܶܗ ܢܽܘܚ ܡܰܕ̥݄ܒܚܳܐ ܠܡܳܪܝܳܐ. ܘܡ݄ܕ ܠܶܗ ܡܶܢ̱ ܟܘ̇ܠ ܚܰܝܽܘܬ̥ܳܐ ܕܟ̥ܺܝܬ̥ܳܐ ܘܡܶܢ̱ ܟܘ̇ܠ ܛܰܝܪܳܐ ܕܰܟ̥ܝܳܐ ܘܡܰܣܠܰܩ ܠܶܗ ܝܰܩܕܳܐ ܥܰܠ ܗ̄ܽܘ ܡܰܕ̥݄ܒܚܳܐ. 21ܘ݄ܢܩ݄ܚ ܠܶܗ ܡܳܪܝܳܐ ܪܶܝܚܳܐ ܕܽܗ̄ܘ ܩܽܘܪܒܳܢܳܐ ܝܰܩܺܝܕ̥ܳܐ، ܪܶܝܚܳܐ ܕܡܰܬ̥ܢ݄ܚ، ܘܐܡ݄ܪ ܠܶܗ ܡܳܪܝܳܐ ܒܠܶܒܶܗ: ”ܢܰܩܠܐ ܚܪܶܬܳܐ ܠ݄ܐ ܓܕܳܥܰܪ ܐ̱ܢܳܐ ܠܳܝܰܛ ܐ̱ܢܳܐ ܠܺܗ̄ܝ ܐܰܪܥܳܐ ܠܰܫܰܢ ܗ̄ܽܘ ܢܳܫܳܐ. ܡܺܐܝܕ̥ܶܗ ܕܺܗ̄ܝ ܡܰܚܫܰܒܬ̥ܳܐ ܕܽܗ̄ܘ ܢܳܫܳܐ ܒܺܝܫܬܳܐ ܝܳܐ ܡܶܢ̱ ܢܰܥܡܽܘܬ̥ܶܗ. ܢܰܩܠܐ ܚܪܶܬܳܐ ܠ݄ܐ ܓܕܳܥܰܪ ܐ̱ܢܳܐ ܡܳܚܶܐ ܐ̱ܢܳܐ ܠܟܘ̇ܠ ܚܰܝܳܐ ܐܟ̥ ܕܣ݄ܡ ܠܺܝ. 22ܘܡܳܐܥܕܳܐ (ܘܰܐܙܳܠܳܐ) ܟܽܘܠّܶܗ ܗ̄ܰܝّܰܘܡ̈ܳܬ̥ܳܐ ܕܺܗ̄ܝ ܐܰܪܥܳܐ ܙܪܳܥܳܐ ܘ݄ܚܨܳܕܳܐ، ܩܽܘܪܳܐ ܘܚܶܡܳܐ، ܩܰܝܛܳܐ ܘܣܰܬ̥ܘܳܐ، ܐܺܝܡܳܡܳܐ ܘܠܰܠܝܳܐ ܠ݄ܐ ܓܒܳܛܠܺܝ.“

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 8: ܟܬܒܐ

Highlight

Copy