ܣܶܦܪܳܐ ܕ݄ܒܪܺܝܬ̥ܳܐ 48
48
1ܘܗܰܘܺܝ ܒ݄ܬ̥݄ܪ ܡܰܢ̱ ܡّܰܐܡܪ̈ܰܢܺܝ، ܐܡܺܝܪ ܠܝܰܘܣܶܦ: ”ܟܰܐܠܶܗ ܒܰܒܳܟ̥ ܟܰܝܺܝܒ̥ܳܐ ܝܳܐ.“ ܘܡܰܘܒܶܠ ܠܶܗ ܗ̄ܰܬܪܶܝ ܐܰܒܢ̈ܰܝܕ̥ܶܗ ܐܰܥܡܶܗ، ܡܢܰܫܶܐ ܘܰܐܦܪܶܝܡ. 2ܘܡܰܘܕ̥ܰܥّܶܗ ܠܝܰܥܩܽܘܒ ܘܐܡ݄ܪّܰܗ ܠܶܗ: ”ܟܰܐܠܶܗ ܗ̄ܽܘ ܐܰܒܪܰܝܕ̥ܳܟ̥ ܝܰܘܣܶܦ ܐܰܬ̥ܺܝ ܠܣܺܝܕ̥ܳܟ̥.“ ܘܚܺܝܨ ܐܺܝܣܪܳܐܶܝܠ، ܘܝܰܬܽܒ̥ ܥܰܠ ܗ̄ܽܘ ܥܰܪܣܳܐ.
3ܘܐܡ݄ܪ ܠܶܗ ܐܺܝܣܪܳܐܶܝܠ ܠܝܰܘܣܶܦ: ”ܐܺܝܠܫܰܕܰܝ ܓܠܶܐ ܐܰܥܠܺܝ ܒܠܽܘܙ ܒܺܗ̄ܝ ܐܰܪܥܳܐ ܕ݄ܟܢܰܥܢ ܘ݄ܡܒܰܪܰܟ̥ ܠܶܗ ܠܺܝ. 4ܘܐܡ݄ܪ ܠܶܗ ܠܺܝ: ܟܰܐܠܶܗ ܟܳܡܒܰܪܰܟ̥ܢܳܟ̥ ܘ݄ܓܡܰܙ݄ܕܢܳܟ̥، ܘ݄ܓܣܳܝܰܡܢܳܟ̥ ܟܶܢܫܳܐ ܕܥܰܡ̈ܶܐ. ܘ݄ܓܕܳܗ̄ܒܶܢܳܟ̥ ܗ̄ܺܝ ܐܰܪܥܰܬ̥ܶܐ ܠܽܗ̄ܘ ܙܰܪܥܰܝܕ̥ܳܟ̥ ܒ݄ܬ̥݄ܪ ܡܶܢܳܟ̥ ܝܳܪܬܽܘܬ̥ܳܐ ܠܥܳܠܰܡ. 5ܘܳܐܥܕܳܐ ܗ̄ܰܬܪܶܝ ܐܰܒܢ̈ܰܝܕ̥ܳܟ̥ ܕܡܰܘܠܕܺܝ ܐܶܠܳܟ̥ ܒܺܗ̄ܝ ܐܰܪܥܳܐ ܕܡܶܨܪܶܝܢ ܡܶܩ݄ܕ̱ܡ ܕܳܐܬ̥ܶܐ ܐ̱ܢܳܐ ܠܓܰܒܳܟ̥ ܠܺܗ̄ܝ ܐܰܪܥܳܐ ܕܡܶܨܪܶܝܢ ܕܺܝܕ̥ܺܝ ܢܶܝ. ܐܰܦܪܶܝܡ ܘ݄ܡܢܰܫܶܐ ܐܶܠܺܝ ܓܕܳܗ̄ܘ݄ܢ ܐܟ̥ ܕܪܽܘܒܶܝܠ ܘܐܟ̥݄ ܕܫܶܡܥܽܘܢ ܓܕܳܗ̄ܘ݄ܢ ܐܶܠܺܝ. 6ܘܰܗ̄ܢ ܐܰܒܢ̈ܶܐ ܕ݄ܓܡܰܘܠܕܰܬ ܒ݄ܬ̥݄ܪ ܡ݄ܢّܶܗ ܐܶܠܳܟ̥ ܓܕܳܗ̄ܘ݄ܢ ܥܰܠ ܐ݄ܫܡܶܗ ܕܰܗ̄ܢ ܐܰܚ̈ܽܘܢܳܢܰܬّ̥ܶܗ ܓܡ݄ܩܪ݄ܢ ܒܺܗ̄ܝ ܝܳܪܬܽܘܬ̥ܰܬّ̥ܶܗ. 7ܘܳܐܢܳܐ ܐܰܬ̥ܳܝܳܐ ܡܶܢ̱ ܦܳܕܳܢ ܕܳܐܪܳܡ، ܡܰܝܺܝܬ̥ܳܐ ܒܰܝܢ ܐܺܝܕ̥̈ܳܬ̥ܺܝ ܪܳܚܶܝܠ ܒܺܗ̄ܝ ܐܰܪܥܳܐ ܕ݄ܟܢܰܥܢ ܒܽܗ̄ܘ ܕܰܪܒܳܐ، ܐܟ̥ ܡܰܗ̄ܠܟ̥ܳܐ ܕܫܰܘܛܳܐ ܠܽܗ̄ܘ ܬܰܪܥܳܐ ܕܳܐܦܪܰܬ̥. ܘ݄ܩܒ̥ܺܝܪܳܐ ܠܺܝ ܬܰܡܳܐ ܒܽܗ̄ܘ ܕܰܪܒܳܐ ܕܳܐܦܪܰܬ̥ ܕܟ݄ܬ ܝܳܐ ܒܶܝܬ̥ ܠܚܶܡ.“
8ܘ݄ܚܙܶܐ ܠܶܗ ܐܺܝܣܪܳܐܶܝܠ ܠܰܗ̄ܢ ܐܰܒܢ̈ܶܐ ܕܝܰܘܣܶܦ ܘܐܡ݄ܪ ܠܶܗ ܠܶܗ: ”ܡܰܢ ܢܶܝ ܗܰܢܺܝ؟“ 9ܘܐܡ݄ܪ ܠܶܗ ܝܰܘܣܶܦ ܠܽܗ̄ܘ ܒܰܒܳܐ: ”ܗ̄ܰܢ ܐܰܒܢ̈ܰܝܕ̥ܺܝ ܢܶܝ ܕܗܽܒ̥ ܠܶܗ ܠܺܝ ܐܰܠܳܗܳܐ ܗܰܪܟܶܐ.“ ܘܐܡ݄ܪ ܠܶܗ: ”ܡܩܰܪܶܒ̥݄ܢ ܠܓܰܒܺܝ ܕ݄ܡܒܰܪܰܟ̥ܢܰܢّܶܗ.“ 10ܘܰܥّܰܝܢ̈ܶܐ ܕܺܐܝܣܪܳܐܶܝܠ ܝܰܩܺܝܪܺܝ ܡܺܗ̄ܝ ܣܳܒ̥ܽܘܬ̥ܳܐ، ܘܠܰܝܒܶܗ ܕܚܳܙܶܐ ܗ̄ܘܰܐ ܛܳܒ̥ܳܐ. ܘ݄ܡܩܰܪܒ̥ܺܝ ܠܶܗ ܠܓܰܒܶܗ ܘ݄ܢܫܺܝܩܺܝ ܠܶܗ ܘ݄ܡܥܰܦܩܺܝ ܠܶܗ. 11ܘܐܡ݄ܪ ܠܶܗ ܐܺܝܣܪܳܐܶܝܠ ܠܝܰܘܣܶܦ: ”ܠܳܐ ܦܰܝ݄ܫ ܗ̄ܘܰܝ ܠܺܝ ܣܰܒܪܳܐ ܕܚܳܙܶܐ ܐ̱ܢܳܐ ܦܳܬ̥ܳܟ̥، ܘܟܰܐܠܶܗ ܐܰܠܳܗܳܐ ܡܰܚܘܶܐ ܠܶܗ ܠܺܝ ܗ̄ܽܘ ܙܰܪܥܰܝܕ̥ܳܟ̥ ܣܬܶܝ.“ 12ܘܡܰܩܺܝܡܺܝ ܠܶܗ ܝܰܘܣܶܦ ܡܶܢ̱ ܩ݄ܕ̱ܡ ܒܰܪ̈ܟܳܬ̥ܶܗ، ܘ݄ܣܓ̥݄ܕّܶܗ ܩܽܘܕ̱ܡܶܗ ܥܰܠ ܦܳܬ̥ܰܝّܶܗ ܥܰܠ ܗ̄ܺܝ ܐܰܪܥܳܐ.
13ܘܡܰܘܒܶܠ ܠܶܗ ܝܰܘܣܶܦ ܠܰܬܪܶܝ ܐܰܒܢ̈ܰܝܕ̥ܶܗ، ܠܰܐܦܪܶܝܡ ܒܺܐܝܕ̥ܶܗ ܕܺܗ̄ܝ ܝܰܡܺܝܢܳܐ ܡܽܗ̄ܘ ܣܶܡܳܠܳܐ ܕܺܐܝܣܪܳܐܶܝܠ، ܘܠ݄ܡܢܰܫܶܐ ܒܺܐܝܕ̥ܶܗ ܕܺܗ̄ܝ ܣܶܡܳܠܳܐ ܡܺܗ̄ܝ ܝܰܡܺܝܢܳܐ ܕܺܐܝܣܪܳܐܶܝܠ، ܘ݄ܡܩܰܪܒ̥ܺܝ ܠܶܗ ܠܓܰܒܶܗ. 14ܘ݄ܦܫ݄ܛ ܠܶܗ ܐܺܝܣܪܳܐܶܝܠ ܗ̄ܺܝ ܝܰܡܺܝܢܰܝܕ̥ܶܗ ܘܡܰܚܬܳܐ ܠܶܗ ܥܰܠ ܪܺܝܫܶܗ ܕܰܐܦܪܶܝܡ، ܕܟ݄ܬ ܝܳܐ ܗ̄ܽܘ ܙܥܽܘܪܳܐ، ܘܽܗ̄ܘ ܣܶܡܳܠܰܝܕ̥ܶܗ ܥܰܠ ܪܺܝܫܶܗ ܕ݄ܡܢܰܫܶܐ. ܡܚܰܠܰܦ ܠܶܗ ܐܺܝܕ̥̈ܳܬ̥ܶܗ ܥܰܠ ܕ݄ܡܢܰܫܶܐ ܗ̄ܘܰܐ ܗ̄ܽܘ ܒܽܘܟ̥ܪܳܐ. 15ܘ݄ܡܒܰܪܰܟ̥ ܠܶܗ ܝܰܥܩܽܘܒ ܠܝܰܘܣܶܦ ܗ̄ܽܘ ܐܰܒܪܰܝܕ̥ܶܗ ܘܐܡ݄ܪ ܠܶܗ: ”ܐܰܠܳܗܳܐ ܕܫܰܦܺܝܪܺܝ ܩܽܘܕ̱ܡܶܗ ܗ̄ܰܒّܰܒ̈ܰܝܕ̥ܺܝ، ܐܰܒܪܳܗܳܡ ܘܺܐܝܣܚܳܩ، ܐܰܠܳܗܳܐ ܕ݄ܡܕܰܒܰܪ ܠܶܗ ܠܺܝ ܡܶܢ̱ ܢܰܥܡܽܘܬ̥ܺܝ ܘܗ݄ܠ ܠܰܐܕܝܰܘܡܰܐ، 16ܗ̄ܽܘ ܡܰܠܰܐܟ̥ܳܐ ܕ݄ܡܦܰܨܶܐ ܠܶܗ ܠܺܝ ܡܶܢ̱ ܟܘ̇ܠ ܒܺܝܫܳܐ ܡܒܰܪܰܟ̥ ܠܰܙܥܽܘܪ̈ܶܐ، ܘܡ݄ܩܪܶܐ ܐ݄ܫܡܺܝ ܐܰܥܠܰܝّܶܗ ܘ݄ܐܫܡܶܗ ܕܰܒّܰܒ̈ܰܝܕ̥ܺܝ، ܐܰܒܪܳܗܳܡ ܘܺܐܝܣܚܳܩ، ܘܝܳܪܒ̥ܺܝ ܘܙܰܝܕܺܝ ܒܓܰܘܰܗ ܕܺܗ̄ܝ ܐܰܪܥܳܐ.“
17ܘ݄ܚܙܶܐ ܠܶܗ ܝܰܘܣܶܦ ܕܡܰܚ݄ܬ ܠܶܗ ܗ̄ܽܘ ܒܰܒܰܝܕ̥ܶܗ ܐܺܝܕ̥ܶܗ ܕܺܗ̄ܝ ܝܰܡܺܝܢܳܐ ܥܰܠ ܪܺܝܫܶܗ ܕܰܐܦܪܶܝܡ ܘܠܳܐ ܒܰܣ݄ܡ ܠܶܗ. ܘ݄ܣܡ݄ܟ̥ ܠܶܗ ܠܺܐܝܕ̥ܶܗ ܕܽܗ̄ܘ ܒܰܒܳܐ ܠܰܫܰܢ ܕܡܰܥܒܰܪ ܠܰܗ ܡܶܢ̱ ܪܺܝܫܶܗ ܕܰܐܦܪܶܝܡ ܘ݄ܕܡܰܚܰܬ ܠܰܗ ܥܰܠ ܪܺܝܫܶܗ ܕ݄ܡܢܰܫܶܐ. 18ܘܐܡ݄ܪ ܠܶܗ ܝܰܘܣܶܦ ܠܽܗ̄ܘ ܒܰܒܳܐ: ”ܠܳܐ ܗܰܘܟ̥ܰܐ، ܒܰܒܺܝ، ܐܶܠܳܐ ܗܰܢܳܐ ܝܳܐ ܗ̄ܽܘ ܒܽܘܟ̥ܪܳܐ، ܡܰܚ݄ܬ ܗ̄ܺܝ ܝܰܡܺܝܢܰܝܕ̥ܳܟ̥ ܥܰܠ ܪܺܝܫܶܗ.“ 19ܘܽܗ̄ܘ ܒܰܒܰܝܕ̥ܶܗ ܠܰܐ ܐܒ݄ܥ ܘܐܡ݄ܪ ܠܶܗ: ”ܟܳܐܕ̥ܰܥ ܐ̱ܢܳܐ، ܐܰܒܪܺܝ، ܟܳܐܕ̥ܰܥ ܐ̱ܢܳܐ. ܘܗܺܝّܶܗ ܣܬܶܝ ܓܕܳܗ̄ܘܶܐ ܥܰܡܳܐ، ܘܗܺܝّܶܗ ܣܬܶܝ ܓܝܳܪܽܒ̥. ܐܶܠܳܐ ܐܰܚܽܘܢܶܗ ܗ̄ܽܘ ܢܰܥܺܝܡܳܐ ܓܕܳܗ̄ܘܶܐ ܪܰܒ ܡܶܢܶܗ، ܘܽܗ̄ܘ ܙܰܪܥܰܝܕ̥ܶܗ ܓܕܳܗ̄ܘܶܐ ܥܰܡ̈ܶܐ ܪ̈ܰܒܶܐ.“ 20ܘ݄ܡܒܰܪܟ̥ܺܝ ܠܶܗ ܒܽܗ̄ܘ ܝܰܘܡܰܘܳܐ ܘܐܡ݄ܪ ܠܶܗ: ”ܐܶܒܳܟ̥ ܓܡܺܝܒܰܪ݄ܟ̥ ܐܺܝܣܪܳܐܶܝܠ. ܘ݄ܓܕ݄ܐܡّܺܪ̱ܝ: ܐܰܠܳܗܳܐ ܣܳܝܰܡ ܠܳܟ̥ ܐܟ̥ ܕܰܐܦܪܶܝܡ ܘ݄ܐܟ̥ ܕ݄ܡܢܰܫܶܐ.“ ܘܡܰܚ݄ܬ ܠܶܗ ܐܰܦܪܶܝܡ ܡܶܩ݄ܕ̱ܡ ܡܶܢ̱ ܡܢܰܫܶܐ.
21ܘܐܡ݄ܪ ܠܶܗ ܐܺܝܣܪܳܐܶܝܠ ܠܝܰܘܣܶܦ: ”ܟܰܐܠܺܝ ܐܳܢܳܐ ܓܡܳܝܰܬ̥ ܐ̱ܢܳܐ. ܘܰܐܠܳܗܳܐ ܗܳܘܶܐ ܐܰܥܡܰܝܟ̥ܽܘ، ܘܡܰܕܥܰܪܟ̥ܽܘ ܠܺܗ̄ܝ ܐܰܪܥܳܐ ܕܰܒّܰܒܳܢ̈ܰܬ̥ܟ̥ܽܘ. 22ܘܳܐܢܳܐ ܟܰܐܠܶܗ ܗܽܒ̥ ܠܺܝ ܠܳܟ̥ ܡܢܳܬ̥ܳܐ ܙܳܝܽܘܕܬܳܐ ܙ݄ܕ ܡܰܗ̄ܢ ܐܰܚ̈ܽܘܢܳܢܰܝܕ̥ܳܟ̥، ܕ݄ܫܩܺܝܠܳܐ ܠܺܝ ܡܺܗ̄ܝ ܐܺܝܕ̥ܳܐ ܕܰܗ̄ܢ ܐܳܡܽܘܪ̈ܳܝܶܐ ܒܽܗ̄ܘ ܣܰܝܦܰܝܕ̥ܺܝ ܘܒܺܗ̄ܝ ܩܶܫܬܰܝܕ̥ܺܝ.“
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 48: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
