ܣܶܦܪܳܐ ܕ݄ܒܪܺܝܬ̥ܳܐ 46
46
1ܘܡܰܛܥܰܢ ܠܶܗ ܐܺܝܣܪܳܐܶܝܠ ܗܺܝّܶܗ ܘܟܘ̇ܠ ܕܟ݄ܬ ܠܶܗ ܘܰܐܬ̥ܺܝ ܠܒܺܪܫܒܰܥ، ܘ݄ܡܕܰܒܰܚ ܠܶܗ ܕܶܒܚܬ̥ܳܐ ܠܰܐܠܳܗܳܐ ܕܽܗ̄ܘ ܒܰܒܰܝܕ̥ܶܗ ܐܺܝܣܚܳܩ. 2ܘܐܡ݄ܪ ܠܶܗ ܐܰܠܳܗܳܐ ܠܺܐܝܣܪܳܐܶܝܠ ܒܽܗ̄ܘ ܚܶܙܘܳܐ ܕܽܗ̄ܘ ܠܰܠܝܳܐ، ܘܐܡ݄ܪ ܠܶܗ: ”ܝܰܥܩܽܘܒ ܝܰܥܩܽܘܒ.“ ܘܐܡ݄ܪ ܠܶܗ: ”ܟܰܐܠܺܝ ܐ̱ܢܳܐ.“ 3ܘܐܡ݄ܪ ܠܶܗ: ”ܐܳܢܳܐ ܐ̱ܢܳܐ ܐܺܝܠ ܐܰܠܳܗܳܐ ܕܒܰܒܳܟ̥، ܠܳܐ ܙܰܝܥܰܬ ܕܢܳܚܬܰܬ ܠܡܶܨܪܶܝܢ ܥܰܠ ܕܥܰܡܳܐ ܪܰܒܳܐ ܓܣܳܝܰܡܢܳܟ̥ ܬܰܡܳܐ 4ܐܳܢܳܐ ܓܢܳܚܰܬ ܐ̱ܢܳܐ ܐܰܥܡܳܟ̥ ܘܳܐܢܳܐ ܓܡܰܣܠܰܩܢܳܟ̥. ܘܝܰܘܣܶܦ ܓ݄ܕܡܰܚ݄ܬ ܐܺܝܕ̥̈ܳܬ̥ܶܗ ܥܰܠ ܥܰܝܢ̈ܳܬ̥ܳܟ̥.“
5ܘܩܰܝ݄ܡ ܝܰܥܩܽܘܒ ܡܶܢ̱ ܒܺܪܫܒܰܥ. ܘܡܰܘܒܰܠّܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠܝܰܥܩܽܘܒ ܗ̄ܽܘ ܒܰܒܰܬّ̥ܶܗ ܘܠܰܗ̄ܢ ܢܰܥܺܝܡ̈ܰܬّ̥ܶܗ ܘܠܰܗ̄ܢ ܢܶܫ̈ܰܬّ̥ܶܗ ܒܰܡّܰܪ̈ܟܒܳܬ̥ܳܐ ܕ݄ܡܫܰܕܪܺܝ ܠܶܗ ܦܶܪܥܽܘܢ ܠܽܗ̄ܘ ܛܥܳܢܰܝܕ̥ܶܗ. 6ܘܡ݄ܕّܶܗ ܗ̄ܰܚّܰܝ̈ܘܳܬ̥ܰܬّ̥ܶܗ ܘܰܩّܰܢܝܳܢ̈ܰܬّ̥ܶܗ ܕܗܰܘܺܝ ܐܰܠّܶܗ ܒܺܗ̄ܝ ܐܰܪܥܳܐ ܕ݄ܟܢܰܥܢ، ܘܰܐܬ̥݄ܢ ܠܡܶܨܪܶܝܢ، ܝܰܥܩܽܘܒ ܘܟܽܘܠܶܗ ܗ̄ܽܘ ܙܰܪܥܰܝܕ̥ܶܗ ܐܰܥܡܶܗ. 7ܗ̄ܰܢ ܐܰܒܢ̈ܰܝܕ̥ܶܗ ܘܰܗ̄ܢ ܐܰܒܢ̈ܶܐ ܕܰܗ̄ܢ ܐܰܒܢ̈ܰܝܕ̥ܶܗ ܐܰܥܡܶܗ، ܗ̄ܰܒܢ̈ܳܬ̥ܰܝܕ̥ܶܗ ܘܰܒܢ̈ܳܬ̥ܳܐ ܕܰܗ̄ܢ ܐܰܒܢ̈ܰܝܕ̥ܶܗ، ܘܟܽܘܠܶܗ ܗ̄ܽܘ ܙܰܪܥܰܝܕ̥ܶܗ ܡܰܥ݄ܒܪܺܝ ܠܶܗ ܐܰܥܡܶܗ ܠܡܶܨܪܶܝܢ.
8ܘܗܰܢܺܝ ܢܶܝ ܗ̄ܰܢ ܐ݄ܫܡܳܢ̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܕܥܰܒܺܝܪܺܝ ܠܡܶܨܪܶܝܢ: ܝܰܥܩܽܘܒ ܘܰܗ̄ܢ ܐܰܒܢ̈ܰܝܕ̥ܶܗ، ܗ̄ܽܘ ܒܽܘܟ̥ܪܳܐ ܕܝܰܥܩܽܘܒ ܪܽܘܒܶܝܠ. 9ܗ̄ܰܢ ܐܰܒܢ̈ܶܐ ܕܪܽܘܒܶܝܠ: ܚܢܽܘܟ̥ ܘܦܰܠܽܘ ܘܚܶܨܪܽܘܢ ܘܟܰܪܡܺܝ. 10ܘܰܗ̄ܢ ܐܰܒܢ̈ܶܐ ܕܫܶܡܥܽܘܢ: ܝܰܡܳܘܐܶܝܠ ܘܝܳܡܺܝܢ ܘܳܐܗܳܪ ܘܝܳܟܺܝܢ ܘܨܳܚܳܪ ܘܫܳܐܘܳܠ ܗ̄ܽܘ ܐܰܒܪܳܐ ܕܺܗ̄ܝ ܟܢܰܥܢܰܝܬܳܐ. 11ܘܰܗ̄ܢ ܐܰܒܢ̈ܶܐ ܕܠܶܘܺܝ: ܓܶܪܫܽܘܢ ܘܩܳܗܳܬ̥ ܘ݄ܡܪܳܪܺܝ. 12ܘܰܗ̄ܢ ܐܰܒܢ̈ܶܐ ܕܺܝܗܽܘܕ̥ܳܐ: ܥܺܝܪ ܘܽܐܘܢܳܢ ܘܫܶܠܳܐ ܘܦܰܪܨ ܘܙܰܪܚ. ܘܡܰܝܺܝܬ̥ܺܝ ܥܺܝܪ ܘܽܐܘܢܳܢ ܒܺܗ̄ܝ ܐܰܪܥܳܐ ܕ݄ܟܢܰܥܢ. ܘܗܰܘ݄ܢ ܗ̄ܰܢ ܐܰܒܢ̈ܶܐ ܕܦܰܪܨ: ܚܶܨܪܽܘܢ ܘܚܳܡܽܘܠ. 13ܘܰܗ̄ܢ ܐܰܒܢ̈ܶܐ ܕܺܐܝܣܳܟܳܪ: ܬܽܘܠܳܥ ܘܦܽܘܐܳܐ ܘܐܽܘܝܳܒ ܘܫܶܡܪܽܘܢ. 14ܘܰܗ̄ܢ ܐܰܒܢ̈ܶܐ ܕ݄ܙܒܳܘܠܽܘܢ: ܣܳܕܳܪ ܘܰܐܠܽܘܢ ܘܢܰܚܠܳܐܶܝܠ. 15ܗܰܢܺܝ ܢܶܝ ܗ̄ܰܢ ܐܰܒܢ̈ܶܐ ܕܠܶܝܳܐ ܕܡܰܘܠܕܺܝ ܠܰܗ ܠܝܰܥܩܽܘܒ ܒܦܳܕܳܢ ܕܳܐܪܳܡ، ܘ݄ܠܕܺܝܢܰܐ ܗ̄ܺܝ ܒܰܪܬ̥ܰܝܕ̥ܶܗ. ܟܽܘܠّܶܗ ܗ̄ܰܢ ܢܰܦܫ̈ܳܬ̥ܳܐ ܕܰܗ̄ܢ ܐܰܒܢ̈ܰܝܕ̥ܶܗ ܘܰܒܢ̈ܳܬ̥ܰܝܕ̥ܶܗ ܬܠ݄ܬ̥ ܘ݄ܬܠܶܬ̥ܺܝ.
16ܘܰܗ̄ܢ ܐܰܒܢ̈ܶܐ ܕܓܳܕ: ܨܶܦܺܝܽܘܢ ܘܚܰܓܺܝ ܘܫܽܘܢܺܝ ܘܰܐܨܒܥܽܘܢ ܘܥܰܕܺܝ ܘܰܐܪܽܘܕ. ܘܰܐܕܪܺܝ. 17ܘܰܗ̄ܢ ܐܰܒܢ̈ܶܐ ܕܳܐܫܺܝܪ: ܝܰܡܢܳܐ ܘܝܰܫܘܳܐ ܘܝܰܫܘܺܝ ܘ݄ܒܪܺܝܥܳܐ ܘܣܰܪܚ ܗ̄ܺܝ ܚܳܬ̥ܰܬّ̥ܶܗ. ܘܰܗ̄ܢ ܐܰܒܢ̈ܶܐ ܕ݄ܒܪܺܝܥܳܐ: ܚܳܒܳܪ ܘܡܰܠܟܺܝܶܠ. 18ܗܰܢܺܝ ܢܶܝ ܗ̄ܰܢ ܐܰܒܢ̈ܶܐ ܕܙܶܠܦܳܐ ܕܗܽܒ̥ ܠܶܗ ܠܳܒܳܢ ܠܠܶܝܰܐ ܗ̄ܺܝ ܒܰܪܬ̥ܰܝܕ̥ܶܗ ܘܡܰܘܠܰܕ ܠܰܗ ܗܰܢܺܝ ܠܝܰܥܩܽܘܒ: ܫܬܰܥܣܰܪ ܢܰܦܫ̈ܳܬ̥ܳܐ.
19ܘܰܗ̄ܢ ܐܰܒܢ̈ܶܐ ܕܪܳܚܶܝܠ ܗ̄ܺܝ ܐܰܢ̱ܬ̥ܬܳܐ ܕܝܰܥܩܽܘܒ: ܝܰܘܣܶܦ ܘܒܶܢܝܳܡܶܝܢ. 20ܘܗܰܘܺܝ ܠܝܰܘܣܶܦ ܒܺܗ̄ܝ ܐܰܪܥܳܐ ܕܡܶܨܪܶܝܢ ܡܢܰܫܶܐ ܘܰܐܦܪܶܝܡ ܕܡܰܘܠܰܕ ܠܰܗ ܠܶܗ ܐܰܣܝܰܬ ܗ̄ܺܝ ܒܰܪܬ̥ܳܐ ܕܦܽܘܛܺܝܦܪܰܥ ܗ̄ܽܘ ܟܽܘܡܪܳܐ ܕܳܐܘܳܢ. 21ܘܰܗ̄ܢ ܐܰܒܢ̈ܶܐ ܕܒܶܢܝܳܡܶܝܢ: ܒܳܠܳܥ ܘܰܐܟܒܳܪ ܘܰܐܫܟܳܠ ܘܓܶܪܳܐ ܘܢܰܥܡܳܢ ܘܰܐܚܺܝ ܘܳܐܪܽܘܫ ܘܡܳܦܺܝܡ ܘܚܳܦܺܝܡ ܘܳܐܕܳܪ. 22ܗܰܢܺܝ ܢܶܝ ܗ̄ܰܢ ܐܰܒܢ̈ܶܐ ܕܪܳܚܶܝܠ ܕܡܰܘܠܰܕ ܠܰܗ ܠܝܰܥܩܽܘܒ: ܐܰܪܒܰܥܣܰܪ ܢܰܦܫ̈ܳܬ̥ܳܐ.
23ܘܰܗ̄ܢ ܐܰܒܢ̈ܶܐ ܕܕܳܢ ܚܽܘܫܺܝܡ. 24ܘܰܗ̄ܢ ܐܰܒܢ̈ܶܐ ܕܢܰܦܬܳܠܺܝ: ܢܰܚܨܳܐܶܝܠ ܘܓܽܘܢܺܝ ܘܚܳܨܳܪ ܘܫܳܠܺܝܡ. 25ܗܰܢܺܝ ܢܶܝ ܗ̄ܰܢ ܐܰܒܢ̈ܶܐ ܕܒܰܠܗܳܐ ܕܗܽܒ̥ ܠܶܗ ܠܳܒܳܢ ܠܪܳܚܶܝܠ ܗ̄ܺܝ ܒܰܪܬ̥ܰܝܕ̥ܶܗ، ܘܡܰܘܠܰܕ ܠܰܗ ܗܰܢܺܝ ܠܝܰܥܩܽܘܒ: ܟܽܘܠّܶܗ ܫܒ̥ܰܥ ܢܰܦܫ̈ܳܬ̥ܳܐ.
26ܟܽܘܠّܶܗ ܗ̄ܰܢ ܢܰܦܫ̈ܳܬ̥ܳܐ ܕܥܰܒܺܝܪܺܝ ܥܰܡ ܝܰܥܩܽܘܒ ܠܡܶܨܪܶܝܢ ܕܢܰܦܺܝܩܺܝ ܡܶܢ̱ ܚܰܨܶܗ، ܕܠܳܐ ܡܰܗ̄ܢ ܢܶܫ̈ܶܐ ܕܰܗ̄ܢ ܐܰܒܢ̈ܶܐ ܕܝܰܥܩܽܘܒ، ܟܽܘܠّܶܗ ܫܶܬ̥ ܘ݄ܐܫܬܺܝ ܢܰܦܫ̈ܳܬ̥ܳܐ. 27ܘܰܗ̄ܢ ܐܰܒܢ̈ܶܐ ܕܝܰܘܣܶܦ ܕܗܰܘ݄ܢ ܠܶܗ ܒܡܶܨܪܶܝܢ ܬܰܪܬܶܝ ܢܰܦܫ̈ܳܬ̥ܳܐ. ܟܽܘܠّܶܗ ܗ̄ܰܢ ܢܰܦܫ̈ܳܬ̥ܳܐ ܕܒܶܝ ܝܰܥܩܽܘܒ ܕܥܰܒܺܝܪܺܝ ܠܡܶܨܪܶܝܢ ܫܰܒ̥ܥܺܝ.
28ܘ݄ܡܫܰܕܰܪ ܠܶܗ ܠܺܝܗܽܘܕ̥ܳܐ ܒܩܰܕ̱ܡܽܘܬ̥ܶܗ ܠܓܰܒ ܝܰܘܣܶܦ ܠܰܫܰܢ ܐܳܬ̥ܶܐ ܠܩܰܕ̱ܡܽܘܬ̥ܶܗ ܠܓܶܫܳܢ. ܘܰܐܬ̥݄ܢ ܠܺܗ̄ܝ ܐܰܪܥܳܐ ܕܓܶܫܳܢ. 29ܘܚ݄ܨ ܠܶܗ ܝܰܘܣܶܦ ܗ̄ܰܡّܰܪ̈ܟܒܳܬ̥ܰܝܕ̥ܶܗ ܘܣܰܠ݄ܩ ܠܩܰܕ̱ܡܽܘܬ̥ܶܗ ܕܺܐܝܣܪܳܐܶܝܠ ܗ̄ܽܘ ܒܰܒܰܝܕ̥ܶܗ ܠܓܶܫܳܢ. ܘ݄ܚܙܶܐ ܠܶܗ، ܘܢܰܦ݄ܠ ܥܰܠ ܩܕ̥ܳܠܶܗ ܘܒܰܟ̥ܺܝ ܥܰܠ ܩܕ̥ܳܠܶܗ. 30ܘܐܡ݄ܪ ܠܶܗ ܐܺܝܣܪܳܐܶܝܠ ܠܝܰܘܣܶܦ: ”ܗܰܢ ܢܰܩܠܐ ܛܪܳܐ ܡܳܝܰܬ̥ ܐ̱ܢܳܐ ܡܶܢ̱ ܒ݄ܬ̥݄ܪ ܕ݄ܚܙܶܐ ܠܺܝ ܦܳܬ̥ܳܟ̥ ܝܰܐ ܐܰܒܪܺܝ ܕܟ݄ܬ ܗ̄ܰܬ ܚܰܝܳܐ.“ 31ܘܐܡ݄ܪ ܠܶܗ ܝܰܘܣܶܦ ܠܰܗ̄ܢ ܐܰܚ̈ܽܘܢܳܢܶܐ ܘܠܰܒّܶܝ ܒܰܒܶܗ: ”ܟܣܳܠܰܩ ܐ̱ܢܳܐ ܡܰܘܕ̥ܰܥ ܐ̱ܢܳܐ ܠܦܶܪܥܽܘܢ، ܘܳܐܡܰܪ ܐ̱ܢܳܐ ܠܶܗ: ܐܰܚ̈ܽܘܢܳܢܺܝ ܘܒܶܝ ܒܰܒܺܝ ܕܒܺܗ̄ܝ ܐܰܪܥܳܐ ܕ݄ܟܢܰܥܢ ܐܰܬ̥݄ܢ ܠܓܰܒܺܝ. 32ܘܰܓّܰܒ̥ܪ̈ܶܐ ܪ̈ܳܥܝܶܐ ܕ݄ܥܘܳܢ̈ܶܐ ܢܶܝ ܥܰܠ ܕܟ݄ܬّܶܗ ܩܶܢ̈ܝܳܢܶܐ. ܘܰܥܘܳܢ̈ܰܬّ̥ܶܗ ܘܰܬّܰܘܪ̈ܰܬّ̥ܶܗ ܘܟܘ̇ܠ ܕܟ݄ܬّܶܗ ܡܰܝܬܰܠّܶܗ ܐܰܥܡܰܝّܶܗ. 33ܘܺܗ̄ܝ ܢܰܩܠܐ ܕܩܳܪܰܠܟ̥ܽܘ ܦܶܪܥܽܘܢ ܘܳܐܡܰܪܟ̥ܽܘ ܡ݄ܢ ܟܥܳܒ̥ܕܺܝܬܽܘ؟ 34ܐܡܰܪܽܘ ܠܶܗ: ܡܳܪ̈ܶܐ ܕܩܶܢ̈ܝܳܢܶܐ ܢܶܝ ܗ̄ܰܓܪ̈ܶܝܥܰܝܕ̥ܳܟ̥ ܡܶܢ̱ ܢܰܥܡܽܘܬ̥ܰܝّܶܗ ܘܗ݄ܠ ܐܳܥܕܳܐ، ܐܰܚܢܰܐ ܘܰܒّܰܒ̈ܰܝܕ̥ܰܢ. ܠܰܫܰܢ ܕܝܳܬܒ̥ܺܝܬܽܘ ܒܺܗ̄ܝ ܐܰܪܥܳܐ ܕܓܶܫܳܢ. ܡܺܐܝܕ̥ܶܗ ܕ݄ܡܚܰܩܪ̈ܶܐ ܗ̄ܘܰܝܢܶܝ ܓܰܒ ܗ̄ܰܡّܶܨܪ̈ܳܝܶܐ ܗ̄ܰܪّܳܥܝ̈ܶܐ ܕܰܥܘܳܢ̈ܶܐ.“
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 46: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
