ܣܶܦܪܳܐ ܕ݄ܒܪܺܝܬ̥ܳܐ 32

1ܘ݄ܒܨܰܦܪܳܐ ܩܶܕܰܡܬܳܐ ܩܰܝ݄ܡ ܠܳܒܳܢ ܘ݄ܢܫ݄ܩ ܠܶܗ ܗ̄ܰܢ ܐܰܒܢ̈ܰܝܕ̥ܶܗ ܘܰܒܢ̈ܳܬ̥ܰܝܕ̥ܶܗ ܘ݄ܡܒܰܪܟ̥ܺܝ ܠܶܗ، ܘܕܰܥ݄ܪ ܠܳܒܳܢ ܘܰܐܙّܶܗ ܠܽܗ̄ܘ ܐܰܬ̥ܪܰܝܕ̥ܶܗ. 2ܘܝܰܥܩܽܘܒ ܣܬܶܝ ܐܰܙّܶܗ ܒܽܗ̄ܘ ܕܰܪܒܰܝܕ̥ܶܗ ܘܰܡّܰܠܰܐܟ̥̈ܶܐ ܕܰܐ‌ܠܳܗܳܐ ܐܰܬ̥݄ܢ ܩܽܘܕ̱ܡܶܗ. 3ܘܐܡ݄ܪ ܠܶܗ ܝܰܥܩܽܘܒ ܗ̄ܺܝ ܢܰܩܠܐ ܕ݄ܚܙܰܠّܶܗ: ”ܗ̄ܺܝ ܡܰܫܪܺܝܬ̥ܳܐ ܕܰܐ‌ܠܳܗܳܐ ܝܳܐ ܗܰܬ̥ܶܐ.“ ܘ݄ܩܪܶܐ ܠܶܗ ܐ݄ܫܡܶܗ ܕܽܗ̄ܘ ܐܰܬ̥ܪܰܘܳܐ ”ܡܰܚܢܺܝܡ“.

4ܘ݄ܡܫܰܕܰܪ ܠܶܗ ܝܰܥܩܽܘܒ ܡܫܰܕܪ̈ܶܐ ܒܩܰܕ̱ܡܽܘܬ̥ܶܗ ܠܓܰܒ ܥܺܝܣܽܘ ܗ̄ܽܘ ܐܰܚܽܘܢܰܝܕ̥ܶܗ ܠܺܗ̄ܝ ܐܰܪܥܳܐ ܕܣܳܥܺܝܪ ܠܺܗ̄ܝ ܚܰܩܠܳܐ ܕܰܐܕܽܘܡ. 5ܘܗܽܒ̥ ܠܰܗ ܠّܶܗ ܦܽܘܩܕܳܢܳܐ ܘܐܡ݄ܪ ܠܰܗ ܠّܶܗ: ”ܗܰܘܟ̥ܰܐ ܓܕ݄ܐܡّܺܪ̱ܝܬܽܘ ܠܽܗ̄ܘ ܡܳܪܰܝܕ̥ܺܝ ܥܺܝܣܽܘ، ܗܰܘܟ̥ܰܐ ܟܳܐܡ݄ܪ ܗ̄ܽܘ ܓܪܶܝܥܰܝܕ̥ܳܟ̥ ܝܰܥܩܽܘܒ: ܥܰܡ ܠܳܒܳܢ ܦܰܝ݄ܫ ܐ̱ܢܳܐ، ܘ݄ܡܥܰܘܰܩ ܐ̱ܢܳܐ ܗ݄ܠ ܠܰܐܕܝܰܘܡܰܐ. 6ܘܗܰܘܺܝ ܠܺܝ ܬܰܘܪ̈ܶܐ ܘ݄ܚܡܳܪ̈ܶܐ ܘ݄ܥܘܳܢ̈ܶܐ ܘ݄ܓܪ̈ܶܝܥܶܐ ܘ݄ܓܪ̈ܰܥܝܳܬ̥ܳܐ، ܘ݄ܡܫܰܕܰܪ ܠܺܝ ܕܡܰܘܕ̥ܰܥ ܐ̱ܢܳܐ ܠܽܗ̄ܘ ܡܳܪܰܝܕ̥ܺܝ ܕܚܳܙܶܐ ܐ̱ܢܳܐ ܪ̈ܰܚܡܶܐ ܒܥܰܝܢ̈ܳܬ̥ܳܟ̥.“

7ܘܕܰܥܺܝܪܺܝ ܗ̄ܰܡܫܰܕܪ̈ܶܐ ܠܓܰܒ ܝܰܥܩܽܘܒ ܘܐܡ݄ܪّܰܗ ܠܶܗ: ”ܐܰܙّܰܢ ܠܓܰܒ ܥܺܝܣܽܘ ܐܰܚܽܘܢܳܟ̥ ܘܟܰܐܠܶܗ ܗܺܝّܶܗ ܣܬܶܝ ܐܰܬ̥ܳܝܳܐ ܠܩܰܕ̱ܡܽܘܬ̥ܳܟ̥، ܘܰܐܥܡܶܗ ܐܰܪܒܰܥܡܳܐܐ ܓܰܒ̥ܪ̈ܶܐ.“ 8ܘܙܰܝ݄ܥ ܝܰܥܩܽܘܒ ܘܥܰܝ݄ܩ ܠܶܗ ܓ̥ܰܠܰܒܶܐ. ܘ݄ܦܠ݄ܓ̥ ܠܶܗ ܗ̄ܽܘ ܥܰܡܳܐ ܕܰܐܥܡܶܗ ܘܰܥܘܳܢ̈ܶܐ ܘܰܬّܰܘܪ̈ܶܐ ܘܰܓّܰܡ̈ܠܶܐ ܠܬܰܪܬܶܝ ܡܰܫܪ̈ܝܳܬ̥ܳܐ. 9ܘܐܡ݄ܪ ܠܶܗ ܝܰܥܩܽܘܒ: ”ܐܶܢ ܕܳܐܬ̥ܶܐ ܥܺܝܣܽܘ ܐܰܚܽܘܢܺܝ ܥܰܠ ܚܕ̥ܳܐ ܡܰܫܪܺܝܬ̥ܳܐ ܘܡܳܚܶܐ ܠܰܗ، ܗ̄ܺܝ ܡܰܫܪܺܝܬ̥ܳܐ ܕܦܰܝܺܝܫܳܐ ܓܦܳܠܛܳܐ.“

10ܘ݄ܡܨܰܠܶܐ ܠܶܗ ܝܰܥܩܽܘܒ ܘܐܡ݄ܪ ܠܶܗ: ”ܐܰ‌ܠܳܗܳܐ ܕܒܰܒܺܝ ܐܰܒܪܳܗܳܡ، ܐܰ‌ܠܳܗܳܐ ܕܒܰܒܺܝ ܐܺܝܣܚܳܩ، ܡܳܪܝܳܐ ܕܐܡ݄ܪ ܠܶܗ ܠܺܝ: ܕܥܰܪ ܠܺܗ̄ܝ ܐܰܪܥܳܐ ܕܰܒّܰܒܳܢ̈ܰܝܕ̥ܳܟ̥ ܘܠܺܗ̄ܝ ܕܽܘܟܬ̥ܳܐ ܕܡܰܘܠܕ̥ܰܬ ܐܶܒܰܗ، ܘܛܳܒ̥ܽܘܬ̥ܳܐ ܓܣܳܝܰܡ ܐ̱ܢܳܐ ܐܰܥܡܳܟ̥. 11ܢܳܩܽܘܨܳܐ ܐ̱ܢܳܐ ܡܶܢ̱ ܟܽܘܠّܶܗ ܗ̄ܰܛّܰܝܒ̈ܘܳܬ̥ܰܝܕ̥ܳܟ̥، ܘܡܶܢ̱ ܟܽܘܠܶܗ ܗ̄ܽܘ ܫܪܳܪܳܐ ܕܣ݄ܡ ܠܳܟ̥ ܥܰܡ ܗ̄ܽܘ ܥܰܒܕܰܝܕ̥ܳܟ̥، ܥܰܠ ܕܒܺܗ̄ܝ ܚܰܛܪܰܝܕ̥ܺܝ ܫܰܦ݄̊ܥ ܐ̱ܢܳܐ ܝܽܘܪܕܢܳܢ ܗܰܢܳܐ، ܘܳܐܥܕܳܐ ܦܠ݄ܓ̥ ܐ̱ܢܳܐ ܠܬܰܪܬܶܝ ܡܰܫܪ̈ܝܳܬ̥ܳܐ. 12ܦܪܰܩ ܠܺܝ ܡܺܗ̄ܝ ܐܺܝܕ̥ܶܗ ܕܥܺܝܣܽܘ ܐܰܚܽܘܢܺܝ ܥܰܠ ܕܟܳܙܳܝܰܥ ܐ̱ܢܳܐ ܡܶܢܶܗ ܕܠ݄ܐ ܐܙّܶܗ ܐܳܬ̥ܶܐ ܘܡܳܚܶܐ ܠܺܝ، (ܘܩܳܛ݄ܠ) ܗ̄ܺܝ ܐܶܡܳܐ ܥܰܡ ܗ̄ܰܢ ܐܰܒܢ̈ܰܝܕ̥ܰܗ. 13ܘܗܰܬ ܐܡ݄ܪ ܠܳܟ̥: ܛܳܒ̥ܽܘܬ̥ܳܐ ܓܣܳܝܰܡ ܐ̱ܢܳܐ ܐܰܥܡܳܟ̥، ܘ݄ܓܣܳܝܰܡ ܐ̱ܢܳܐ ܗ̄ܽܘ ܙܰܪܥܰܝܕ̥ܳܟ̥ ܐܟ̥ ܕܽܗ̄ܘ ܚܳܠܳܐ ܕܽܗ̄ܘ ܝܰܡܳܐ ܕܠ݄ܐ ܓܡ݄ܒܢܶܐ ܡܺܗ̄ܝ ܣܰܓܺܝܽܘܬ̥ܰܝܕ̥ܶܗ.“

14ܘܦܰܝ݄ܫ ܬܰܡܳܐ ܗ̄ܽܘ ܠܰܠܝܰܘܳܐ، ܘܡ݄ܕ ܠܶܗ ܡܽܗ̄ܘ ܡܶܕܶܐ ܕܡܰܝܬܶܐ ܠܶܗ ܒܺܐܝܕ̥ܶܗ ܩܽܘܪܒܳܢܳܐ ܠܥܺܝܣܽܘ ܗ̄ܽܘ ܐܰܚܽܘܢܰܝܕ̥ܶܗ: 15ܥ̈ܶܙܶܐ ܡܰܐܬ̥ܶܝ، ܘܬܰܝ̈ܫܶܐ ܥ݄ܣܪܺܝ، ܥܘܳܢ̈ܶܐ ܡܰܐܬ̥ܶܝ، ܘܦܰܪ̈ܶܐ ܥ݄ܣܪܺܝ، 16ܓܰܡ̈ܠܶܐ ܡܰܘܢܩܳܢ̈ܶܐ ܘܰܗ̄ܢ ܐܰܒܢ̈ܰܬّ̥ܶܗ: ܬܠܶܬ̥ܺܝ، ܬܰܘܪ̈ܳܬ̥ܳܐ: ܐܰܪܒܥܺܝ، ܘܬܰܘܪ̈ܶܐ: ܥܰܣܪܳܐ، ܚܡ݄ܪ̈ܝܳܬ̥ܳܐ: ܥ݄ܣܪܺܝ، ܘܥܺܝ̈ܠܶܐ: ܥܰܣܪܳܐ. 17ܘܗܽܒ̥ ܠܶܗ ܒܺܐܝܕ̥ܶܗ ܕܰܓܪ̈ܶܝܥܰܝܕ̥ܶܗ ܩܰܛܥܳܐ ܩܰܛܥܳܐ ܠܚܽܘܕ̥ܶܗ، ܘܐܡ݄ܪ ܠܶܗ ܠܰܓܪ̈ܶܝܥܰܝܕ̥ܶܗ: ”ܫܦ̊ܰܥܽܘ ܩܰܕ̱ܡܽܘܬ̥ܺܝ، ܘܡܰܪܘܶܚܽܘ ܒܰܝܢܶܗ ܩܰܛܥܳܐ ܠܩܰܛܥܳܐ.“ 18ܘܗܽܒ̥ ܠܶܗ ܦܽܘܩܕܳܢܳܐ ܠܽܗ̄ܘ ܩܰܕ̱ܡܳܝܳܐ ܘܐܡ݄ܪ ܠܶܗ ܠܶܗ: ”ܗ̄ܺܝ ܢܰܩܠܐ ܕܳܐܬ̥ܶܐ ܩܽܘܕ̱ܡܳܟ̥ ܥܺܝܣܽܘ ܐܰܚܽܘܢܺܝ ܘ݄ܡܫܰܐܶܠ ܠܳܟ̥ ܘܳܐܡܰܪ ܠܳܟ̥ ܕܡܰܢ ܗܰܬ ܘܠܰܐܝܟܳܐ ܐܰܙܳܠܳܐ، ܘ݄ܕܡܰܢ ܢܶܝ ܗܰܢܺܝ ܕܩܽܘܕ̱ܡܳܟ̥؟ 19ܐܰܡܰܪ ܠܶܗ: ܕܽܗ̄ܘ ܓܪܶܝܥܰܝܕ̥ܳܟ̥ ܝܰܥܩܽܘܒ ܢܶܝ، ܩܽܘܪܒܳܢܳܐ ܡܫܰܕܪܺܝ ܠܶܗ ܠܽܗ̄ܘ ܡܳܪܰܝܕ̥ܺܝ ܥܺܝܣܽܘ، ܘܟܰܐܠܶܗ ܗܺܝّܶܗ ܣܬܶܝ ܐܰܬ̥ܳܝܳܐ ܝܳܐ ܒ݄ܬ̥ܪܰܢ.“ 20ܘܗܽܒ̥ ܠܶܗ ܦܽܘܩܕܳܢܳܐ ܠܕܰܬܪܶܝ ܘ݄ܠܕܰܬܠܳܬ̥ܳܐ ܣܬܶܝ ܘ݄ܠܟܽܘܠّܶܗ ܕܟ݄ܐܙّ݄ܢ ܒ݄ܬ̥݄ܪ ܗ̄ܰܩّܰܛܥ̈ܶܐ ܘܐܡ݄ܪ ܠܶܗ: ”ܐܟ̥ ܕܽܗ̄ܘ ܡܰܐܡܪܰܢܳܐ ܓܕ݄ܐܡّܺܪ̱ܝܬܽܘ ܠܥܺܝܣܽܘ ܗ̄ܺܝ ܢܰܩܠܐ ܕܚܳܙܺܝܬܽܘ ܠܶܗ. 21ܘܕܳܐܡّܺܪ̱ܝܬܽܘ ܠܶܗ: ܟܰܐܠܶܗ ܗ̄ܽܘ ܓܪܶܝܥܰܝܕ̥ܳܟ̥ ܣܬܶܝ، ܝܰܥܩܽܘܒ، ܟܳܐܬ̥ܶܐ ܒ݄ܬ̥ܪܰܢ.“ ܥܰܠ ܕܐܡ݄ܪ ܠܶܗ: ”ܓܡܰܬ̥ܢܰܚ ܐ̱ܢܳܐ ܗ̄ܽܘ ܪܽܘܓ̥ܙܰܝܕ̥ܶܗ ܒܽܗ̄ܘ ܩܽܘܪܒܳܢܳܐ ܕܟ݄ܐܙّܶܗ ܩܰܕ̱ܡܽܘܬ̥ܺܝ. ܘܒ݄ܬ̥݄ܪܟܶܐ ܓܚܳܙܶܐ ܐ̱ܢܳܐ ܦܳܬ̥ܶܗ، ܟܺܝܬ ܕܳܗ̄ܘܶܐ ܠܺܝ ܦܳܬ̥ܳܐ ܣܺܝܕ̥ܶܗ.“ 22ܘܥܰܒ݄ܪ ܗ̄ܽܘ ܩܽܘܪܒܳܢܳܐ ܩܽܘܕ̱ܡܶܗ، ܘܗܺܝّܶܗ ܦܰܝ݄ܫ ܒܽܗ̄ܘ ܠܰܠܝܰܘܳܐ ܒܺܗ̄ܝ ܡܰܫܪܺܝܬ̥ܳܐ.

23ܘܰܐܬ̥ܺܝ ܒܠܰܠܝܳܐ ܘܡ݄ܕ ܠܶܗ ܠܰܬّܰܪܬܶܝ ܢܶܫ̈ܰܝܕ̥ܶܗ ܘܰܬّܰܪܬܶܝ ܓܪ̈ܰܥܝܳܬ̥ܰܬّ̥ܶܗ، ܘܰܚܕ̥ܰܥܣܰܪ ܐܰܒܢ̈ܰܝܕ̥ܶܗ ܘܡܰܥ݄ܒܪܺܝ ܠܶܗ ܒܽܗ̄ܘ ܡܰܕ̥݄ܒܪܳܐ ܕܝܳܒܳܩ. 24ܘܡܰܘܒܠܺܝ ܠܶܗ ܘܡܰܫܦ̊ܥܺܝ ܠܶܗ ܗ̄ܽܘ ܢܰܚܠܳܐ، ܘܡܰܥܒܰܪ ܠܶܗ ܟܘ̇ܠ ܕܟ݄ܬ ܠܶܗ. 25ܘܦܰܝ݄ܫ ܝܰܥܩܽܘܒ ܠܚܽܘܕ̥ܶܗ. ܘܓܰܒ̥ܪܳܐ ܚܰܕ̱ ܡܩܰܛܶܠ ܠܶܗ ܐܰܥܡܶܗ ܗ݄ܠ ܠܩܶܕܰܡܬܳܐ. 26ܘ݄ܚܙܶܐ ܠܶܗ ܕܠܰܝܒܶܗ ܐܰܥܠܶܗ، ܘ݄ܡܩܰܪܰܒ̥ ܠܶܗ ܠܥܰܛܡܶܗ، ܘܟܰܝܺܝܒ̥ܳܐ ܥܰܛܡܶܗ ܕܝܰܥܩܽܘܒ ܗ̄ܺܝ ܢܰܩܠܐ ܕ݄ܡܩܰܛܶܠ ܠܶܗ ܐܰܥܡܶܗ. 27ܘܐܡ݄ܪ ܠܶܗ ܠܶܗ: ”ܡܰܪܦܰܝ ܠܺܝ ܥܰܠ ܕܣܰܠ݄ܩ ܗ̄ܽܘ ܝܰܘܡܳܐ.“ ܘܐܡ݄ܪ ܠܶܗ (ܝܰܥܩܽܘܒ): ”ܠ݄ܐ ܓܡܰܪܦܶܢܳܟ̥ ܕܠܳܐ ܡܒܰܪܟ̥ܰܬ ܠܺܝ.“ 28ܘܐܡ݄ܪ ܠܶܗ ܠܶܗ: ”ܐܰܝܕܰܪܒܳܐ ܝܳܐ ܐ݄ܫܡܳܟ̥؟“ ܘܐܡ݄ܪ ܠܶܗ: ”ܝܰܥܩܽܘܒ.“ 29ܐܡ݄ܪ ܠܶܗ ܠܶܗ: ”ܢܰܩܠܐ ܚܪܶܬܳܐ ܠܳܐ ܝܰܥܩܽܘܒ ܓܡ݄ܩܪܶܐ ܐ݄ܫܡܳܟ̥، ܐܶܠܳܐ ܐܺܝܣܪܳܐܶܝܠ ܥܰܠ ܕ݄ܟܰܠܰܬ ܥܰܡ ܡܰܠܰܐܟ̥ܳܐ ܘܥܰܡ ܓܰܒ̥ܪܳܐ، ܘܰܐܬ̥ܺܝ ܡܶܢܳܟ̥.“ 30ܘ݄ܡܫܰܐܶܠ ܠܶܗ ܝܰܥܩܽܘܒ ܘܐܡ݄ܪ ܠܶܗ: ”ܡܰܚܘܰܝ ܠܺܝ ܐ݄ܫܡܳܟ̥ (ܡ݄ܢܝܳܐ)؟“ ܘܐܡ݄ܪ ܠܶܗ ܠܶܗ: ”ܠܡ݄ܢ ܟܳܡܫܰܐ‌ܺܠܰܬ ܥܰܠ ܐ݄ܫܡܺܝ؟“ ܘ݄ܡܒܰܪܰܟ̥ ܠܶܗ ܬܰܡܳܐ.

31ܘ݄ܩܪܶܐ ܠܶܗ ܝܰܥܩܽܘܒ ܐ݄ܫܡܶܗ ܕܽܗ̄ܘ ܐܰܬ̥ܪܰܘܳܐ ”ܦܢܽܘܐܶܝܠ ܥܰܠ ܕ݄ܚܙܶܐ ܠܺܝ ܗ̄ܽܘ ܡܰܠܰܐܟ̥ܳܐ ܦܳܬ̥ܳܐ ܡܩܰܒ݄ܠ ܦܳܬ̥ܳܐ ܘܦܰܠܺܝܛܳܐ ܗ̄ܺܝ ܢܰܦܫܰܝܕ̥ܺܝ.“ 32ܘܢܰܦܺܝܩܳܐ ܠܶܗ ܗ̄ܺܝ ܫܶܡܫܳܐ ܗ̄ܺܝ ܢܰܩܠܐ ܕܢܰܦ݄ܩ ܡܶܢ̱ ܦܢܽܘܐܶܝܠ، ܘܗܰܘܺܝ ܗ̄ܘܰܐ ܚܓ̥ܺܝܪܳܐ ܡܶܢ̱ ܥܰܛܡܶܗ. 33ܡܰܗ̄ܘܟ̥ܰܐ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܠ݄ܐ ܟܳܐܟ̥ܠܺܝ ܗ̄ܽܘ ܓܳܝܕܳܐ ܕܺܗ̄ܝ ܥܰܛܡܳܐ ܕܺܗ̄ܝ ܪܰܓ̥ܠܳܐ ܗ݄ܠ ܠܰܐܕܝܰܘܡܰܐ، ܥܰܠ ܕ݄ܡܚܶܐ ܠܶܗ ܒܽܗ̄ܘ ܪܺܝܫܳܐ ܕܺܗ̄ܝ ܥܰܛܡܳܐ ܕܝܰܥܩܽܘܒ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 32: ܟܬܒܐ

Highlight

Copy