ܣܶܦܪܳܐ ܕ݄ܒܪܺܝܬ̥ܳܐ 29

1ܘܩܰܝ݄ܡ ܝܰܥܩܽܘܒ ܘܰܐܙّܶܗ ܠܺܗ̄ܝ ܐܰܪܥܳܐ ܕܰܗ̄ܢ ܐܰܒܢ̈ܶܐ ܕܽܗ̄ܘ ܡܰܕ݄ܢܚܳܐ. 2ܘ݄ܚܙܶܐ ܠܶܗ، ܘܟܰܐܠܰܗ ܒܺܐܪܳܐ ܒܚܰܩܠܳܐ. ܘܬܰܡܳܐ ܬܠܳܬ̥ܳܐ ܩܰܛܥ̈ܶܐ ܕ݄ܥܘܳܢ̈ܶܐ ܪ̈ܰܒ̥ܺܝܥܶܐ ܐܰܥܠܰܗ ܡܺܐܝܕ̥ܶܗ ܕܡܺܗ̄ܝ ܒܺܐܪܰܝܳܐ ܫܳܬ݄ܢ ܗ̄ܘܰܘ̱ ܗ̄ܰܩّܰܛܥ̈ܶܐ. ܘܟܶܐܦܳܐ ܪܰܒܬ̥ܳܐ ܟ݄ܬ ܗ̄ܘܰܐ ܥܰܠ ܦܶܡܰܗ ܕܺܗ̄ܝ ܒܺܐܪܳܐ. 3ܘܠܳܬܡܺܝ ܗ̄ܘܰܘ̱ ܟܽܘܠّܶܗ ܗ̄ܰܩّܰܛܥ̈ܶܐ ܠܬܰܡܳܐ، ܘ݄ܡܓܰܢܕܪܺܝ ܗ̄ܘܰܘ̱ ܗ̄ܺܝ ܟܶܐܦܳܐ ܡܶܢ̱ ܦܶܡܰܗ ܕܺܗ̄ܝ ܒܺܐܪܳܐ، ܘܡܰܫܬ݄ܢ ܗ̄ܘܰܘ̱ ܗ̄ܰܩّܰܛܥ̈ܶܐ. ܘܡܰܕ݄ܥܪܺܝ ܗ̄ܘܰܘ̱ ܗ̄ܺܝ ܟܶܐܦܳܐ ܠܦܶܡܰܗ ܕܺܗ̄ܝ ܒܺܐܪܳܐ، ܠܕܽܘܟܬ̥ܰܗ. 4ܐܡ݄ܪ ܠܰܗ ܠّܶܗ ܝܰܥܩܽܘܒ: ”ܐܰܚ̈ܽܘܢܳܢܺܝ، ܡܰܐܝܟܳܐ ܗܰܬܽܘ؟“ ܐܡ݄ܪّܰܗ ܠܶܗ: ”ܡܶܢ̱ ܚܳܪܳܢ ܐܰܚܢܰܐ.“ 5ܐܡ݄ܪ ܠܰܗ ܠّܶܗ: ”ܟܳܐܕ̥ܥܺܝܬܽܘ ܠܠܳܒܳܢ ܗ̄ܽܘ ܐܰܒܪܳܐ ܕܢܳܚܽܘܪ؟“ ܐܡ݄ܪّܰܗ ܠܶܗ: ”ܟܳܐܕ̥ܥܺܝܢܰܐ.“ 6ܐܡ݄ܪ ܠܰܗ ܠّܶܗ: ”ܒ݄ܫܠܳܡܳܐ ܝܳܐ؟“ ܐܡ݄ܪّܰܗ ܠܶܗ: ”ܐܺܝܢ ܒ݄ܫܠܳܡܳܐ ܝܳܐ، ܘܟܰܐܠܰܗ ܪܳܚܶܝܠ ܗ̄ܺܝ ܒܰܪܬ̥ܰܝܕ̥ܶܗ ܐܰܬ̥ܰܝܬܳܐ ܥܰܡ ܗ̄ܰܥܘܳܢ̈ܶܐ.“ 7ܐܡ݄ܪ ܠܰܗ ܠّܶܗ ܝܰܥܩܽܘܒ: ”ܟܰܐܠܶܗ ܗܶܫ ܗ̄ܽܘ ܝܰܘܡܳܐ ܚܶܠܳܝܳܐ ܝܳܐ، ܠܰܝ̱ܬ ܝܳܐ ܗ̄ܽܘ ܙܰܒܢܳܐ ܕܽܗ̄ܘ ܬܶܠܬܺܝܡܳܐ ܕܰܚّܰܝ̈ܘܳܬ̥ܳܐ، ܡܰܫܬܶܝܽܘ ܗ̄ܰܥܘܳܢ̈ܶܐ ܘܙܳܟ̥ܽܘ ܡܰܪܥܶܝܽܘ.“ 8ܐܡ݄ܪّܰܗ ܠܶܗ: ”ܠܰܝܒܰܢ ܗ݄ܠ ܕܠܳܐ ܠܳܬܡܺܝ ܟܽܘܠّܶܗ ܗ̄ܰܩّܰܛܥ̈ܶܐ، ܘ݄ܡܓܰܢܕܪܺܝ ܗ̄ܺܝ ܟܶܐܦܳܐ ܡܶܢ̱ ܦܶܡܰܗ ܕܺܗ̄ܝ ܒܺܐܪܳܐ، ܘܡܰܫܬܺܝܢܰܐ ܗ̄ܰܥܘܳܢ̈ܶܐ.“

9ܘܗܶܫ ܗܺܝّܶܗ ܟܡ݄ܫܓ̥݄ܠ ܐܰܥܡܰܝّܶܗ، ܪܳܚܶܝܠ ܐܰܬ̥ܝܳܐ ܥܰܡ ܗ̄ܰܥܘܳܢ̈ܶܐ ܕܽܗ̄ܘ ܒܰܒܳܐ ܥܰܠ ܕܟ݄ܬ ܗ̄ܘܰܐ ܪܳܥܺܝܬ̥ܳܐ. 10ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܝܰܥܩܽܘܒ ܠܪܳܚܶܝܠ ܗ̄ܺܝ ܒܰܪܬ̥ܳܐ ܕܠܳܒܳܢ ܗ̄ܽܘ ܐܰܚܽܘܢܳܐ ܕܺܗ̄ܝ ܐܶܡܳܐ ܘܠܰܥܘܳܢ̈ܶܐ ܕܠܳܒܳܢ ܗ̄ܽܘ ܐܰܚܽܘܢܳܐ ܕܺܗ̄ܝ ܐܶܡܳܐ، ܡܩܰܪܰܒ̥ ܠܶܗ ܝܰܥܩܽܘܒ ܘ݄ܡܓܰܢܕܰܪ ܠܶܗ ܗ̄ܺܝ ܟܶܐܦܳܐ ܡܶܢ̱ ܦܶܡܰܗ ܕܺܗ̄ܝ ܒܺܐܪܳܐ ܘܡܰܫܬܶܐ ܠܶܗ ܗ̄ܰܥܘܳܢ̈ܶܐ ܕܠܳܒܳܢ ܗ̄ܽܘ ܐܰܚܽܘܢܳܐ ܕܺܗ̄ܝ ܐܶܡܳܐ. 11ܘ݄ܢܫ݄ܩ ܠܶܗ ܝܰܥܩܽܘܒ ܠܪܳܚܶܝܠ، ܘܡܰܥܠܶܐ ܠܶܗ ܩܳܠܶܗ ܘܒܰܟ̥ܺܝ. 12ܘܡܰܘܕ̥ܰܥ ܠܶܗ ܝܰܥܩܽܘܒ ܠܪܳܚܶܝܠ ܕܟ݄ܬ ܝܳܐ ܗ̄ܽܘ ܐܰܒܪܳܐ ܕܪܰܦܩܳܐ ܗ̄ܽܘ ܐܰܚܽܘܢܳܐ ܕܽܗ̄ܘ ܒܰܒܰܝܕ̥ܰܗ. ܘܪܰܗܺܝܛܳܐ ܘܡܰܘܕ̥ܰܥ ܠܰܗ ܠܽܗ̄ܘ ܒܰܒܳܐ. 13ܘܺܗ̄ܝ ܢܰܩܠܐ ܕܫܰܡ݄ܥ ܠܳܒܳܢ ܗ̄ܽܘ ܛܶܒܳܐ ܕܝܰܥܩܽܘܒ ܗ̄ܽܘ ܐܰܒܪܳܐ ܕܺܗ̄ܝ ܚܳܬ̥ܰܝܕ̥ܶܗ، ܪܰܗ݄ܛ ܠܩܰܕ̱ܡܽܘܬ̥ܶܗ ܘ݄ܥܦ݄ܩ ܠܶܗ ܘ݄ܢܫ݄ܩ ܠܶܗ ܘܡܰܝܬܶܐ ܠܶܗ ܠܽܗ̄ܘ ܒܰܝܬܰܝܕ̥ܶܗ. ܘܐܡ݄ܪ ܠܶܗ ܠܠܳܒܳܢ ܥܰܠ ܟܽܘܠّܶܗ ܗ̄ܰܡّܰܐܡܪ̈ܰܢܺܝ. 14ܘܐܡ݄ܪ ܠܶܗ ܠܶܗ ܠܳܒܳܢ: ”ܒ݄ܫܪܳܪܳܐ ܗ̄ܽܘ ܓܰܪܡܰܝܕ̥ܺܝ ܘܽܗ̄ܘ ܒܰܣܪܰܝܕ̥ܺܝ ܗܰܬ.“ ܘܝܰܬܽܒ̥ ܓܰܒܶܗ ܝܰܪܚܳܐ ܕܝܰܘܡ̈ܳܬ̥ܳܐ.

15ܘܐܡ݄ܪ ܠܶܗ ܠܳܒܳܢ ܠܝܰܥܩܽܘܒ: ”ܒ݄ܫܪܳܪܳܐ ܐܰܚܽܘܢܺܝ ܗܰܬ، ܘ݄ܟܥܳܒ̥ܕܰܬ ܠܺܝ ܡܰܓܳܢ (ܕܠܳܐ ܐܰܓ̥ܪܳܐ)؟ ܐܡܰܪ ܠܺܝ: ܡ݄ܢܝܳܐ ܗ̄ܽܘ ܐܰܓ̥ܪܰܝܕ̥ܳܟ̥؟“ 16ܘ݄ܠܠܳܒܳܢ ܟ݄ܬ ܗ̄ܘܰܝ ܠܶܗ ܬܰܪܬܶܝ ܒܢ̈ܳܬ̥ܳܐ، ܐ݄ܫܡܰܗ ܕܺܗ̄ܝ ܪܰܒܬ̥ܳܐ ܠܶܝܰܐ ܘ݄ܐܫܡܰܗ ܕܺܗ̄ܝ ܙܥܽܘܪܬܳܐ ܪܳܚܶܝܠ. 17ܘܥܰܝܢ̈ܶܐ ܕܠܶܝܳܐ ܪ̈ܰܦܝܶܐ ܗ̄ܘܰܝܢܶܝ. ܘܪܳܚܶܝܠ ܫܰܦ݄ܪܬܳܐ ܗ̄ܘܰܐ ܒܺܗ̄ܝ ܚܙܰܝܬܰܝܕ̥ܰܗ ܘ݄ܚܠܺܝܬ̥ܳܐ ܒܺܗ̄ܝ ܨܽܘܪܬܰܝܕ̥ܰܗ. 18ܘ݄ܪܚ݄ܡ ܠܶܗ ܝܰܥܩܽܘܒ ܠܪܳܚܶܝܠ ܘܐܡ݄ܪ ܠܶܗ: ”ܓܥܳܒ̥ܰܕ ܐ̱ܢܳܐ ܠܳܟ̥ ܫܒ̥ܰܥ ܐ݄ܫܢ̈ܶܐ ܒܪܳܚܶܝܠ ܗ̄ܺܝ ܒܰܪܬ̥ܰܝܕ̥ܳܟ̥ ܗ̄ܺܝ ܙܥܽܘܪܬܳܐ.“ 19ܐܡ݄ܪ ܠܶܗ ܠܶܗ ܠܳܒܳܢ: ”ܕܳܗ̄ܒܶܐ ܐ̱ܢܳܐ ܠܳܟ̥ ܝܳܐ ܛܰܒ̥ ܡܶܢ̱ ܕܳܗ̄ܒܶܢܰܗ ܠܢܳܫܳܐ ܚܪܶܢܳܐ. ܝܺܬܰܒ̥ (ܦܘ̇ܫ) ܐܰܥܡܺܝ.“ 20ܘ݄ܥܒ̥݄ܕ ܠܶܗ ܝܰܥܩܽܘܒ ܒܪܳܚܶܝܠ ܫܒ̥ܰܥ ܐ݄ܫܢ̈ܶܐ، ܘܗܰܘ݄ܢ ܒܥܰܝܢ̈ܶܐ ܐܟ̥ ܝܰܘܡ̈ܳܬ̥ܳܐ ܟܰܪ̈ܝܶܐ، ܥܰܠ ܕܪܳܚܰܡ ܗ̄ܘܰܝ ܠܰܗ.

21ܘܐܡ݄ܪ ܠܶܗ ܝܰܥܩܽܘܒ ܠܠܳܒܳܢ: ”ܗܰܒ̥ ܠܺܝ ܗ̄ܺܝ ܐܰܢ̱ܬ̥ܬܰܝܕ̥ܺܝ، ܥܰܠ ܕܬܰܝܺܝܡܺܝ ܗ̄ܰܝّܰܘܡ̈ܳܬ̥ܳܐ، ܘ݄ܓܥܳܒܰܪ ܐ̱ܢܳܐ ܠܣܺܝܕܰܗ.“ 22ܘܡܰܠܬܰܡ ܠܶܗ ܠܳܒܳܢ ܠܟܽܘܠّܶܗ ܗ̄ܰܢ ܢܳܫ̈ܶܐ ܕܽܗ̄ܘ ܐܰܬ̥ܪܳܐ ܘܣ݄ܡ ܠܶܗ ܡܶܫܬܽܘܬ̥ܳܐ. 23ܘܒ݄ܛܒ̥ܳܥܶܗ ܕܝܰܘܡܳܐ، ܡܰܘܒܶܠ ܠܶܗ ܠܠܶܝܰܐ ܗ̄ܺܝ ܒܰܪܬ̥ܳܐ ܘܡܰܥ݄ܒܪܳܐ ܠܶܗ ܠܣܺܝܕܶܗ. ܘܥܰܒ݄ܪ ܐܰܥܠܰܗ. 24ܘܠܳܒܳܢ ܗܽܒ̥ ܠܶܗ ܗ̄ܺܝ ܓܪܰܥܬܰܝܕ̥ܶܗ ܙܶܠܦܳܐ ܠܺܗ̄ܝ ܒܰܪܬ̥ܰܝܕ̥ܶܗ ܠܶܝܰܐ ܐܟ̥ ܓܪܰܥܬܳܐ. 25ܘܺܗ̄ܝ ܢܰܩܠܐ ܕܰܗ̄ܘܺܝ ܨܰܦܪܳܐ ܘ݄ܚܙܶܐ ܠܶܗ ܕܠܶܝܳܐ ܝܳܐ، ܐܡ݄ܪ ܠܶܗ ܠܠܳܒܳܢ: ”ܡ݄ܢܝܳܐ ܗܰܢܳܐ ܕܣ݄ܡ ܠܳܟ̥ ܐܶܒܺܝ؟ ܐܳܢܳܐ ܠܰܫܰܢ ܪܳܚܶܝܠ ܥܒ̥݄ܕ ܠܺܝ ܐܰܥܡܳܟ̥، ܠܡ݄ܢ ܡܕܰܓ݄ܠ ܠܳܟ̥ ܐܰܥܠܺܝ؟“ 26ܘܐܡ݄ܪ ܠܶܗ ܠܳܒܳܢ ܠܝܰܥܩܽܘܒ: ”ܠ݄ܐ ܟܳܗ̄ܘܶܐ ܗܰܘܟ̥ܰܐ ܒܽܗ̄ܘ ܐܰܬ̥ܪܰܝܕ̥ܰܢ ܕܡܺܝܬܰܗܽܒ̥ܝܳܐ ܗ̄ܺܝ ܙܥܽܘܪܬܳܐ ܡܶܩ݄ܕ̱ܡ ܡܺܗ̄ܝ ܪܰܒܬ̥ܳܐ. 27ܡܰܬ݄ܡ ܗ̄ܺܝ ܡܶܫܬܽܘܬ̥ܳܐ ܕܰܗ̄ܬ̥ܶܐ، ܘ݄ܓܕܳܗ̄ܒܶܢܳܟ̥ ܗܰܝܳܐ ܣܬܶܝ ܒܽܗ̄ܘ ܥܒ̥ܳܕܳܐ ܕܥܳܒ̥ܕܰܬ ܐܰܥܡܺܝ ܢܰܩܠܐ ܚܪܶܬܳܐ ܫܒ̥ܰܥ ܐ݄ܫܢ̈ܶܐ ܚܪ̈ܶܢܶܐ.“ 28ܘܣ݄ܡ ܠܶܗ ܝܰܥܩܽܘܒ ܗܰܘܟ̥ܰܐ، ܘܡܰܬ݄ܡ ܠܶܗ ܗ̄ܺܝ ܡܶܫܬܽܘܬ̥ܳܐ ܕܰܗ̄ܝܳܐ ܣܬܶܝ. ܘܗܽܒ̥ ܠܶܗ ܠܶܗ ܠܪܳܚܶܝܠ ܗ̄ܺܝ ܒܰܪܬ̥ܰܝܕ̥ܶܗ ܐܰܢ̱ܬ̥ܬܳܐ. 29ܘܗܽܒ̥ ܠܶܗ ܠܳܒܳܢ ܠܪܳܚܶܝܠ، ܗ̄ܺܝ ܒܰܪܬ̥ܰܝܕ̥ܶܗ، ܒܰܠܗܳܐ ܗ̄ܺܝ ܓܪܰܥܬܰܝܕ̥ܶܗ ܓܪܰܥܬܳܐ. 30ܘܥܰܒ݄ܪ ܥܰܠ ܪܳܚܶܝܠ ܣܬܶܝ، ܘ݄ܪܚ݄ܡ ܠܶܗ ܠܪܳܚܶܝܠ ܙ݄ܕ ܡܶܢ̱ ܠܶܝܰܐ. ܘ݄ܥܒ̥݄ܕ ܠܶܗ ܐܰܥܡܶܗ ܢܰܩܠܐ ܚܪܶܬܳܐ ܫܒ̥ܰܥ ܐ݄ܫܢ̈ܶܐ ܚܪ̈ܶܢܶܐ.

31ܘ݄ܚܙܶܐ ܠܶܗ ܡܳܪܝܳܐ ܕܠܶܝܳܐ ܠܰܝ̱ܬ ܝܳܐ ܪܚܺܝܡܬܳܐ. ܘ݄ܦܬ݄ܚ ܠܶܗ ܟܰܪܣܰܗ. ܘܪܳܚܶܝܠ ܥܩܰܪܬ̥ܳܐ ܗ̄ܘܰܐ. 32ܘ݄ܒܛܺܝܢܳܐ ܠܶܝܰܐ ܘܡܰܘܠܰܕ ܠܰܗ ܐܰܒܪܳܐ ܘ݄ܩܪܶܐ ܠܰܗ ܐ݄ܫܡܶܗ ܪܽܘܒܶܝܠ ܥܰܠ ܕܐܡ݄ܪ ܠܰܗ: ”ܕ݄ܚܙܶܐ ܠܶܗ ܐܰ‌ܠܳܗܳܐ ܗ̄ܺܝ ܬܒ̥ܺܝܪܽܘܬ̥ܰܝܕ̥ܺܝ، ܐܳܥܕܳܐ ܓ݄ܕܪܳܚܰܡ ܠܺܝ ܗ̄ܽܘ ܓܰܒ̥ܪܰܝܕ̥ܺܝ.“ 33ܘܢܰܩܠܐ ܚܪܶܬܳܐ ܒܛܺܝܢܳܐ، ܘܡܰܘܠܰܕ ܠܰܗ ܐܰܒܪܳܐ ܘܐܡ݄ܪ ܠܰܗ: ”ܥܰܠ ܕܫܰܡ݄ܥ ܡܳܪܝܳܐ ܕܠܰܝܬ ܐ̱ܢܳܐ ܪܚܺܝܡܬܳܐ، ܗܽܒ̥ ܠܶܗ ܠܺܝ ܗܰܢܳܐ ܣܬܶܝ.“ ܘ݄ܩܪܶܐ ܠܰܗ ܐ݄ܫܡܶܗ ܫܶܡܥܽܘܢ. 34ܘܢܰܩܠܐ ܚܪܶܬܳܐ ܒܛܺܝܢܳܐ، ܘܡܰܘܠܰܕ ܠܰܗ ܐܰܒܪܳܐ ܘܐܡ݄ܪ ܠܰܗ: ”ܗ̄ܰܢ ܢܰܩܠܐ ܓ݄ܕܠܳܘܶܐ ܠܺܝ ܗ̄ܽܘ ܓܰܒ̥ܪܰܝܕ̥ܺܝ ܥܰܠ ܕܡܰܘܠܰܕ ܠܺܝ ܠܶܗ ܬܠܳܬ̥ܳܐ ܐܰܒܢ̈ܶܐ.“ ܡܰܗ̄ܘܟ̥ܰܐ ܩܪܶܐ ܠܰܗ ܐ݄ܫܡܶܗ ܠܶܘܺܝ. 35ܘܢܰܩܠܐ ܚܪܶܬܳܐ ܒܛܺܝܢܳܐ، ܘܡܰܘܠܰܕ ܠܰܗ ܐܰܒܪܳܐ ܘܐܡ݄ܪ ܠܰܗ: ”ܗ̄ܰܢ ܢܰܩܠܐ ܓܡܰܘܕܝܳܐ ܐ̱ܢܳܐ ܠܡܳܪܝܳܐ،“ ܡܰܗ̄ܘܟ̥ܰܐ ܩܪܶܐ ܠܰܗ ܐ݄ܫܡܶܗ ܝܺܗܽܘܕ̥ܳܐ. ܘ݄ܩܛܺܝܥܳܐ ܡܽܗ̄ܘ ܝܰܠܕܳܐ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 29: ܟܬܒܐ

Highlight

Copy