ܣܶܦܪܳܐ ܕ݄ܒܪܺܝܬ̥ܳܐ 17
17
1ܘܗܰܘܺܝ ܐܰܒܪܳܡ ܐܰܒܪܶܗ ܕ݄ܬܫܰܥ ܘܬ݄ܫܥܺܝ ܐ݄ܫܢ̈ܶܐ، ܘ݄ܓܠܶܐ ܡܳܪܝܳܐ ܥܰܠ ܐܰܒܪܳܡ ܘܐܡ݄ܪ ܠܶܗ ܠܶܗ: ”ܐܳܢܳܐ ܐ̱ܢܳܐ ܐܺܝܠܫܰܕܰܝ ܐܰܠܳܗܳܐ، ܗܘܰܝ ܛܳܒ̥ܳܐ ܩܽܘܕ̱ܡܺܝ ܘܡܶܕܶܐ ܥܰܝܒܳܐ ܠܳܐ ܣܰܝܡܰܬ. 2ܘ݄ܓܕܳܗ̄ܒܶܐ ܐ̱ܢܳܐ ܗ̄ܽܘ ܩܝܳܡܰܝܕ̥ܺܝ ܒܰܝܢ ܐܶܠܺܝ ܘܶܐܠܳܟ̥، ܘ݄ܓܡܰܙ݄ܕܢܳܟ̥ ܓ̥ܰܠܰܒܶܐ ܓ̥ܰܠܰܒܶܐ.“ 3ܘܢܰܦ݄ܠ ܐܰܒܪܳܡ ܥܰܠ ܦܳܬ̥ܶܗ. ܘ݄ܫܓ̥ܺܝܠ ܐܰܠܳܗܳܐ ܐܰܥܡܶܗ ܘܐܡ݄ܪ ܠܶܗ ܠܶܗ: 4”ܟܰܐܠܶܗ ܐܳܢܳܐ ܓܡܰܩ݄ܡ ܐ̱ܢܳܐ ܗ̄ܽܘ ܩܝܳܡܰܝܕ̥ܺܝ ܐܰܥܡܳܟ̥، ܘ݄ܓܕܳܗ̄ܘܰܬ ܒܰܒܳܐ ܠܥܰܡ̈ܶܐ ܓ̥ܰܠܰܒܶܐ. 5ܘܢܰܩܠܐ ܚܪܶܬܳܐ ܠ݄ܐ ܓܡ݄ܩܪܶܐ ܐ݄ܫܡܳܟ̥ ܐܰܒܪܳܡ، ܐܶܠܳܐ ܓܕܳܗ̄ܘܶܐ ܐ݄ܫܡܳܟ̥ ܐܰܒܪܳܗܳܡ ܥܰܠ ܕܣ݄ܡ ܠܺܝ ܠܳܟ̥ ܒܰܒܳܐ ܠܓ̥ܰܠܰܒܶܐ ܥܰܡ̈ܶܐ. 6ܘ݄ܓܛܳܪܶܢܳܟ̥ ܕܣܰܝܡܰܬ ܦܺܐܪ̈ܶܐ ܘ݄ܓܡܰܙ݄ܕܢܳܟ̥ ܓ̥ܰܠܰܒܶܐ ܓ̥ܰܠܰܒܶܐ، ܘ݄ܓܣܳܝܰܡ ܐ̱ܢܳܐ ܡܶܢܳܟ̥ ܥܰܡ̈ܶܐ، ܘܡܰܠܟ̈ܶܐ ܓܢܳܦܩܺܝ ܡܶܢ̱ ܚܰܨܳܟ̥. 7ܘ݄ܓܡܰܩ݄ܡ ܐ̱ܢܳܐ ܗ̄ܽܘ ܩܝܳܡܰܝܕ̥ܺܝ ܒܰܝܢ ܐܶܠܺܝ ܘܶܐܠܳܟ̥، ܘܒܰܝܢ ܗ̄ܽܘ ܙܰܪܥܰܝܕ̥ܳܟ̥ ܡܶܢ̱ ܒ݄ܬ̥ܪܳܟ̥ ܠܰܕّܳܪ̈ܰܬّ̥ܶܗ، ܠܽܗ̄ܘ ܩܝܳܡܳܐ ܕ݄ܠܥܳܠܰܡ. ܘ݄ܓܕܳܗ̄ܘܶܐ ܐ̱ܢܳܐ ܠܳܟ̥ ܐܰܠܳܗܳܐ ܘܠܽܗ̄ܘ ܙܰܪܥܰܝܕ̥ܳܟ̥ ܡܶܢ̱ ܒ݄ܬ̥ܪܳܟ̥. 8ܘ݄ܓܕܳܗ̄ܒܶܢܳܟ̥ ܘܠܽܗ̄ܘ ܙܰܪܥܰܝܕ̥ܳܟ̥ ܡܶܢ̱ ܒ݄ܬ̥ܪܳܟ̥ ܗ̄ܺܝ ܐܰܪܥܳܐ ܕܟܳܥܳܡܪܰܬ ܐܶܒܰܗ، ܟܽܘܠܰܗ ܗ̄ܺܝ ܐܰܪܥܳܐ ܕ݄ܟܢܰܥܢ ܐܟ̥ ܕܝܽܘܪܬ̥ܳܢܳܐ ܗ݄ܠ ܠܥܳܠܰܡ. ܘ݄ܓܕܳܗ̄ܘܶܐ ܐ̱ܢܳܐ ܐܰܠّܶܗ ܐܰܠܳܗܳܐ.“
9ܘܐܡ݄ܪ ܠܶܗ ܐܰܠܳܗܳܐ ܠܰܐܒܪܳܗܳܡ: ”ܗܰܬ ܢܛܰܪ ܗ̄ܽܘ ܩܝܳܡܰܝܕ̥ܺܝ، ܗܰܬ ܘܽܗ̄ܘ ܙܰܪܥܰܝܕ̥ܳܟ̥ ܡܶܢ̱ ܒ݄ܬ̥ܪܳܟ̥ ܠܰܕّܳܪ̈ܰܬّ̥ܶܗ. 10ܗܰܢܳܐ ܝܳܐ ܗ̄ܽܘ ܩܝܳܡܰܝܕ̥ܺܝ ܕܢܳܛܪܺܝܬܽܘ ܒܰܝܢ ܐܶܠܺܝ ܘܰܐܠܟ̥ܽܘ، ܘܒܰܝܢ ܗ̄ܽܘ ܙܰܪܥܰܝܕ̥ܳܟ̥ ܡܶܢ̱ ܒ݄ܬ̥ܪܳܟ̥، ܕܓܳܙܪܺܝܬܽܘ ܟܘ̇ܠ ܐܰܒܪܳܐ. 11ܘܓܳܙܪܺܝܬܽܘ ܗ̄ܽܘ ܒܰܣܪܳܐ ܕܺܗ̄ܝ ܥܽܘܪܠܽܘܬ̥ܰܬ̥ܟ̥ܽܘ، ܘ݄ܓܕܽܗ̄ܘܝܳܐ ܐܳܬ̥ܳܐ ܕܽܗ̄ܘ ܩܝܳܡܳܐ ܒܰܝܢ ܐܶܠܺܝ ܘܰܐܠܟ̥ܽܘ. 12ܘܽܗ̄ܘ ܐܰܒܪܳܐ ܕ݄ܬܡܰܢܝܳܐ ܝܰܘܡ̈ܶܐ ܛܪܳܐ ܡ݄ܓܙ݄ܪ ܟܘ̇ܠ ܐܰܒܪܳܐ ܡܰܢܟ̥ܽܘ ܠܰܕّܳܪ̈ܰܬ̥ܟ̥ܽܘ (ܠܰܗ̄ܢ ܐܰܒܢ̈ܶܐ ܕܰܗ̄ܢ ܐܰܒܢ̈ܰܬ̥ܟ̥ܽܘ): ܗ̄ܽܘ ܐܰܒܪܳܐ ܕܽܗ̄ܘ ܒܰܝܬܳܐ، ܘܽܗ̄ܘ ܓܪܶܝܥܳܐ ܕ݄ܙܒ̥ܺܝܢ ܒܟܶܣܦܳܐ، ܟܘ̇ܠ ܐܰܒܪܳܐ ܕܢܽܘܟ̥ܪܳܝܳܐ ܕܠܰܝ̱ܬ ܝܳܐ ܡܽܗ̄ܘ ܙܰܪܥܰܝܕ̥ܳܟ̥. 13ܓܙܳܪܳܐ ܛܪܳܐ ܓܳܙ݄ܪ ܗ̄ܽܘ ܐܰܒܪܳܐ ܕܽܗ̄ܘ ܒܰܝܬܰܝܕ̥ܳܟ̥، ܘܽܗ̄ܘ ܓܪܶܝܥܰܝܕ̥ܳܟ̥ ܕ݄ܙܒ̥݄ܢ ܠܳܟ̥ ܒܟܶܣܦܳܐ. ܘ݄ܛܪܳܐ ܗ̄ܘܶܐ ܠܽܗ̄ܘ ܩܝܳܡܰܝܕ̥ܺܝ ܒܽܗ̄ܘ ܒܰܣܪܰܬ̥ܟ̥ܽܘ ܩܝܳܡܳܐ ܕ݄ܠܥܳܠܰܡ. 14ܘܽܗ̄ܘ ܐܰܒܪܳܐ ܠܳܐ ܓܙܺܝܪܳܐ (ܥܽܘܪܠܳܐ) ܕܠ݄ܐ ܓܓܳܙ݄ܪ ܗ̄ܽܘ ܒܰܣܪܳܐ ܕܺܗ̄ܝ ܥܽܘܪܠܽܘܬ̥ܰܝܕ̥ܶܗ، ܛܪܳܐ ܡ݄ܦܪܳܫܳܐ ܗ̄ܺܝ ܢܰܦܫܰܝܳܐ ܡܽܗ̄ܘ ܥܰܡܰܝܕ̥ܰܗ، ܥܰܠ ܕ݄ܡܒܰܛ݄ܠ ܠܰܗ ܗ̄ܽܘ ܩܝܳܡܰܝܕ̥ܺܝ.“
15ܘܐܡ݄ܪ ܠܶܗ ܐܰܠܳܗܳܐ ܠܰܐܒܪܳܗܳܡ: ”ܣܰܪܰܝ ܗ̄ܺܝ ܐܰܢ̱ܬ̥ܬܰܝܕ̥ܳܟ̥ ܠܳܐ ܩܳܪܰܬ ܐ݄ܫܡܰܗ ܣܰܪܰܝ، ܥܰܠ ܕܣܰܪܳܐ ܝܳܐ ܐ݄ܫܡܰܗ. 16ܘܓ݄ܡܒܰܪܰܟ̥ܢܰܗ، ܘ݄ܓܕܳܗ̄ܒܶܢܳܟ̥ ܐܰܒܪܳܐ ܣܬܶܝ ܡܶܢܰܗ. ܘܓ݄ܡܒܰܪܰܟ̥ܢܶܗ، ܘ݄ܓܕܳܗ̄ܘܶܐ ܥܰܡ̈ܶܐ، ܘܡܰܠܟ̈ܶܐ ܕܥܰܡ̈ܶܐ ܡܶܢܶܗ ܓܕܳܗ̄ܘ݄ܢ“. 17ܘܢܰܦ݄ܠ ܐܰܒܪܳܗܳܡ ܥܰܠ ܦܳܬ̥ܶܗ، ܘܓܰܚ݄ܟ̥ ܘܐܡ݄ܪ ܠܶܗ ܒܠܶܒܶܗ: ”ܠܰܐܒܪܳܐ ܕܡܳܐܐ ܐ݄ܫܢ̈ܶܐ ܓܡܺܝܬܰܘܠ݄ܕ ܐܰܒܪܳܐ؟ ܐܰܘ ܣܰܪܳܐ، ܒܰܪܬ̥ܳܐ ܕܬ݄ܫܥܺܝ ܐ݄ܫܢ̈ܶܐ ܓܡܰܘܠܕܳܐ؟“
18ܘܐܡ݄ܪ ܠܶܗ ܐܰܒܪܳܗܳܡ ܠܰܐܠܳܗܳܐ: ”ܕܚܳܙܝܳܐ ܥܰܝܢܺܝ ܐܺܝܫܡܳܥܶܝܠ ܕܚܳܝܶܐ ܩܽܘܕ̱ܡܳܟ̥.“ 19ܘܐܡ݄ܪ ܠܶܗ ܐܰܠܳܗܳܐ ܠܰܐܒܪܳܗܳܡ: ”ܒ݄ܫܪܳܪܳܐ ܣܰܪܳܐ ܗ̄ܺܝ ܐܰܢ̱ܬ̥ܬܰܝܕ̥ܳܟ̥ ܓܡܰܘܠܕܳܐ ܠܳܟ̥ ܐܰܒܪܳܐ، ܘ݄ܓܩܳܪܰܬ ܐ݄ܫܡܶܗ ܐܺܝܣܚܳܩ، ܘ݄ܓܡܰܩ݄ܡ ܐ̱ܢܳܐ ܗ̄ܽܘ ܩܝܳܡܰܝܕ̥ܺܝ ܐܰܥܡܶܗ، ܠ݄ܩܝܳܡܳܐ ܕ݄ܠܥܳܠܰܡ، ܘܠܽܗ̄ܘ ܙܰܪܥܰܝܕ̥ܶܗ ܡܶܢ̱ ܒ݄ܬ̥ܪܶܗ. 20ܘܥܰܠ ܐܺܝܫܡܳܥܶܝܠ ܫܰܡ݄ܥܢܳܟ̥. ܟܰܐܠܶܗ ܡܒܰܪܰܟ̥ ܠܺܝ ܘܡܰܙ݄ܕ ܠܺܝ ܘܡܰܘܪܰܒ̥ ܠܺܝ ܓ̥ܰܠܰܒܶܐ ܓ̥ܰܠܰܒܶܐ. ܬܪܰܥܣܰܪ ܪ̈ܺܝܫܳܢܶܐ ܓܡܰܘܠ݄ܕ. ܘܥܰܡܳܐ ܪܰܒܳܐ ܓܣܳܝܰܡܢܶܗ. 21ܘܽܗ̄ܘ ܩܝܳܡܰܝܕ̥ܺܝ ܓܡܰܩ݄ܡ ܐ̱ܢܳܐ ܠܶܗ ܥܰܡ ܐܺܝܣܚܳܩ، ܕ݄ܓܡܰܘܠܕܳܐ ܠܳܟ̥ ܣܰܪܳܐ ܒܽܗ̄ܘ ܙܰܒܢܰܢܳܐ، ܫܰܢ̱ܬܳܐ ܚܪܶܬܳܐ.“ 22ܡ݄ܐ ܕܡܰܬ݄ܡ ܠܶܗ ܗ̄ܽܘ ܡܰܐܡܪܰܝܕ̥ܶܗ ܕܰܐܥܡܶܗ، ܥܰܠܺܝ ܐܰܠܳܗܳܐ ܡܶܢ̱ ܐܰܒܪܳܗܳܡ.
23ܘܡܰܘܒܶܠ ܠܶܗ ܐܰܒܪܳܗܳܡ ܠܺܐܝܫܡܳܥܶܝܠ ܗ̄ܽܘ ܐܰܒܪܰܝܕ̥ܶܗ، ܘܟܽܘܠّܶܗ ܗ̄ܰܡّܰܘܠܕ̈ܶܐ (ܗ̄ܰܢ ܐܰܒܢ̈ܶܐ) ܕܽܗ̄ܘ ܒܰܝܬܰܝܕ̥ܶܗ ܘ݄ܠܟܽܘܠّܶܗ ܗ̄ܰܓܪ̈ܶܝܥܰܝܕ̥ܶܗ، ܟܘ̇ܠ ܐܰܒܪܳܐ ܡܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܳܐ ܕܰܐܒܪܳܗܳܡ، ܘ݄ܓܙ݄ܪ ܠܶܗ ܗ̄ܽܘ ܒܰܣܪܳܐ ܕܺܗ̄ܝ ܥܽܘܪܠܽܘܬ̥ܰܬّ̥ܶܗ ܒܽܗ̄ܘ ܝܰܘܡܰܢܳܐ ܐܟ̥ ܕ݄ܫܓ̥ܺܝܠ ܐܰܥܡܶܗ ܐܰܠܳܗܳܐ. 24ܘܰܐܒܪܳܗܳܡ ܐܰܒܪܳܐ ܕ݄ܬܫܰܥ ܘܬ݄ܫܥܺܝ ܐ݄ܫܢ̈ܶܐ ܗ̄ܘܰܐ ܗ̄ܺܝ ܢܰܩܠܐ ܕ݄ܓܙ݄ܪ ܠܶܗ ܗ̄ܽܘ ܒܰܣܪܳܐ ܕܺܗ̄ܝ ܥܽܘܪܠܽܘܬ̥ܰܝܕ̥ܶܗ. 25ܘܺܐܝܫܡܳܥܶܝܠ ܗ̄ܽܘ ܐܰܒܪܰܝܕ̥ܶܗ، ܐܰܒܪܶܗ ܕ݄ܬܠܳܬ̥ܰܥܣܰܪ ܐ݄ܫܢ̈ܶܐ ܗ̄ܘܰܐ ܗ̄ܺܝ ܢܰܩܠܐ ܕ݄ܓܙ݄ܪ ܠܶܗ ܗ̄ܽܘ ܒܰܣܪܳܐ ܕܺܗ̄ܝ ܥܽܘܪܠܽܘܬ̥ܰܝܕ̥ܶܗ. 26ܒܽܗ̄ܘ ܝܰܘܡܰܢܳܐ ܓܙ݄ܪ ܠܶܗ ܐܰܒܪܳܗܳܡ ܗ̄ܽܘ ܐܰܒܪܰܝܕ̥ܶܗ ܐܺܝܫܡܳܥܶܝܠ. 27ܘ݄ܠܟܽܘܠّܶܗ ܗ̄ܰܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܶܗ: ܗ̄ܰܡّܰܘܠܕ̈ܶܐ (ܗ̄ܰܢ ܐܰܒܢ̈ܶܐ) ܕܽܗ̄ܘ ܒܰܝܬܰܝܕ̥ܶܗ، ܘܰܓܪ̈ܶܝܥܰܝܕ̥ܶܗ، ܘܰܗ̄ܢ ܐܰܒܢ̈ܶܐ ܢܽܘܟ̥ܪ̈ܳܝܶܐ ܣܬܶܝ ܓܙܺܝܪܺܝ ܠܶܗ ܐܰܥܡܶܗ.
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 17: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
