ܣܶܦܪܳܐ ܕܡܰܦܩܳܢܳܐ 15

1ܗ̄ܺܝ ܢܰܩܠܝܳܐ، ܡܫܰܒܰܚّܶܗ ܡܽܘܫܶܐ ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܗ̄ܺܝ ܬܶܫܒܽܘܚܬܰܬ̥ܶܐ ܠܡܳܪܝܳܐ ܘܐܡ݄ܪّܶܗ: ”ܡܫܰܒܚܺܝܢܰܐ ܠܡܳܪܝܳܐ ܗ̄ܽܘ ܡܫܰܒܚܳܐ، ܕܥܰܠܺܝ ܥܰܠ ܗ̄ܰܣّܘ̇ܣܝ̈ܶܐ، ܘܰܪّܰܒ̥ܳܟ̥̈ܰܬّ̥ܶܗ ܡܚܰܠܩܺܝ ܠܶܗ ܒܽܗ̄ܘ ܝܰܡܳܐ. 2ܚܰܝܠܬ̥ܳܢܳܐ ܘ݄ܡܫܰܒܚܳܐ ܝܳܐ ܝܰܗ ܡܳܪܝܳܐ، ܘܗܰܘܺܝ ܠܰܢ ܦܳܪܽܘܩܳܐ. ܗܰܢܳܐ ܝܳܐ ܗ̄ܽܘ ܐܰ‌ܠܳܗܰܝܕ̥ܺܝ ܓ݄ܡܫܰܒܰܚܢܶܗ، ܐܰ‌ܠܳܗܳܐ ܕܒܰܒܺܝ ܓ݄ܡܪܰܡܪܰܡܢܶܗ. 3ܡܳܪܝܳܐ ܓܰܒܳܪܳܐ ܘ݄ܩܪܰܒܬ̥ܳܢܳܐ، ܡܳܪܝܳܐ ܝܳܐ ܐ݄ܫܡܶܗ. 4ܗ̄ܰܡّܰܪ̈ܟܒܳܬ̥ܳܐ ܕܦܶܪܥܽܘܢ ܘܽܗ̄ܘ ܚܰܝܠܰܝܕ̥ܶܗ ܡܚܰܠܰܩ ܠܶܗ ܒܽܗ̄ܘ ܝܰܡܳܐ. ܘܰܓّܰܒܝ̈ܶܐ ܕܰܓّܰܒܳܪ̈ܰܝܕ̥ܶܗ ܚܢܺܝܩܺܝ ܠܶܗ ܒܽܗ̄ܘ ܝܰܡܳܐ ܕܣܽܘܦ. 5ܗ̄ܰܡّܰܝ̈ܶܐ ܥܰܡܽܘܩ̈ܶܐ ܡܟܰܣܰܢّܶܗ. ܢܰܦܺܝܠܺܝ ܠܽܗ̄ܘ ܥܽܘܡܩܳܐ ܘܢܰܚܺܝܬܺܝ ܐܟ̥ ܕܰܟّܶܐܦ̈ܶܐ.

6”ܗ̄ܺܝ ܝܰܡܺܝܢܰܝܕ̥ܳܟ̥، ܡܳܪܝܳܐ، ܡܥܰܪܰܡܬܳܐ ܝܳܐ ܒܽܗ̄ܘ ܚܰܝܠܳܐ. ܗ̄ܺܝ ܝܰܡܺܝܢܰܝܕ̥ܳܟ̥، ܡܳܪܝܳܐ، ܬܒ̥݄ܪ ܠܰܗ ܗ̄ܰܒܥܶܠܕ̈ܒܳܒܰܝܕ̥ܳܟ̥. 7ܒܽܗ̄ܘ ܚܰܝܠܰܝܕ̥ܳܟ̥ ܗ̄ܽܘ ܪܰܒܳܐ ܕܪܶܐ ܠܳܟ̥ ܗ̄ܰܡܥܰܢ̈ܬܳܢܶܐ ܕܡܶܢܳܟ̥. ܡܫܰܕܰܪ ܠܳܟ̥ ܗ̄ܽܘ ܪܽܘܓ̥ܙܰܝܕ̥ܳܟ̥ ܘܰܐܟ̥ܺܝܠܺܝ ܠܶܗ ܐܟ̥ ܕܽܗ̄ܘ ܓܶܠܳܐ ܢܰܫܺܝܦܳܐ. 8ܒܺܗ̄ܝ ܢܦܰܚܬܳܐ ܕܽܗ̄ܘ ܪܽܘܓ̥ܙܰܝܕ̥ܳܟ̥ ܡܥܰܪܡܺܝ ܗ̄ܰܡّܰܝ̈ܶܐ، ܩܰܝܺܝܡܺܝ ܐܟ̥ ܕܫܽܘܪ̈ܶܐ ܕܡܰܝ̈ܶܐ ܩܰܠܳܥ̈ܶܐ، ܢܨܺܝܒ̥ܺܝ ܒܰܥّܽܘܡܩ̈ܶܐ ܒܠܶܒܶܗ ܕܽܗ̄ܘ ܝܰܡܳܐ.

9”ܐܡ݄ܪ ܠܶܗ ܗ̄ܽܘ ܒܥܶܠܕܒܳܒܳܐ: ܓܫܳܕ̥ܶܐ ܐ̱ܢܳܐ ܒ݄ܬ̥ܪܰܝّܶܗ ܘܡܳܛܶܢܰܢّܶܗ، ܘ݄ܡܦܰܠܰܓ̥ ܐ̱ܢܳܐ ܗ̄ܽܘ ܩܰܢܝܳܢܳܐ ܕܽܗ̄ܘ ܩܪܳܒܳܐ. ܗ̄ܺܝ ܢܰܦܫܰܝܕ̥ܺܝ ܓܒܳܠܥܰܠّܶܗ. ܘ݄ܓܫܳܡܰܛ ܐ̱ܢܳܐ ܗ̄ܽܘ ܣܰܝܦܰܝܕ̥ܺܝ ܘܺܐܝܕ̥ܺܝ ܓܡܰܣܺܝܦܰܠّܶܗ. 10ܡܰܩ݄ܡ ܠܳܟ̥ ܗ̄ܺܝ ܗܰܘܰܝܕ̥ܳܟ̥، ܘܽܗ̄ܘ ܝܰܡܳܐ ܡܟܰܣܰܠّܶܗ. ܚܢܺܝܩܺܝ ܐܟ̥ ܕܽܗ̄ܘ ܐܰܒܳܪܳܐ (ܪܶܨܰܨ) ܒܡܰܝ̈ܶܐ ܚܺܝ̈ܨܶܐ. 11ܡܰܢܝܳܐ ܐܟ̥ܳܬ̥ܳܟ̥ ܡܳܪܝܳܐ؟ ܡܰܢܝܳܐ ܐܟ̥ܳܬ̥ܳܟ̥ ܡܫܰܒܚܳܐ ܒܽܗ̄ܘ ܩܽܘܕܫܰܝܕ̥ܶܗ، ܡܰܙܺܝܥܳܢܳܐ ܘ݄ܡܫܰܒܚܳܐ ܘܣܰܝܳܡܳܐ ܕܬܶܕ݄ܡܪ̈ܳܬ̥ܳܐ. 12ܡܰܥܠܶܐ ܠܳܟ̥ ܗ̄ܺܝ ܝܰܡܺܝܢܰܝܕ̥ܳܟ̥، ܘܺܗ̄ܝ ܐܰܪܥܳܐ ܒܠܺܝܥܺܝ ܠܰܗ. 13ܡܕܰܒܰܪ ܠܳܟ̥ ܒܺܗ̄ܝ ܛܰܝܒܽܘܬ̥ܰܝܕ̥ܳܟ̥ ܠܽܗ̄ܘ ܥܰܡܰܢܳܐ ܕ݄ܦܪ݄ܩ ܠܳܟ̥. ܡܕܰܒܰܪ ܠܳܟ̥ ܒܽܗ̄ܘ ܚܰܝܠܰܝܕ̥ܳܟ̥ ܠܽܗ̄ܘ ܒܰܝܬܰܝܕ̥ܳܟ̥ ܗ̄ܽܘ ܡܩܰܕܫܳܐ. 14ܫܰܡܺܝܥܺܝ ܗ̄ܰܥّܰܡ̈ܶܐ ܘܙܰܝܺܝܥܺܝ. ܘܺܗ̄ܝ ܙܽܘܥܬ̥ܳܐ ܙܒ݄ܛ ܠܰܗ ܗ̄ܰܝّܰܬܺܝܒ̥̈ܶܐ ܕܒ݄ܦܠܶܫܬ. 15ܗܶܕܺܝ ܙܰܝܺܝܥܺܝ ܗ̄ܰܪّܰܒܳܢ̈ܶܐ ܕܰܐܕܽܘܡ، ܘܰܓّܰܒ̥ܪ̈ܶܐ ܕܡܽܘܐܳܒ ܬܶܪܥܺܝܠܳܐ ܡܰܪܥܰܠّܶܗ. ܘ݄ܬܒ̥ܺܝܪܺܝ ܟܽܘܠّܶܗ ܗ̄ܰܥّܳܡܽܘܪ̈ܶܐ ܕ݄ܟܢܰܥܢ. 16ܓܢܳܦܠܳܐ ܐܰܥܠܰܝّܶܗ ܙܽܘܥܬ̥ܳܐ ܘܬܶܪܥܰܠܬܳܐ. ܒܺܗ̄ܝ ܪܰܒܽܘܬ̥ܳܐ ܕܽܗ̄ܘ ܕܪܳܥܰܝܕ̥ܳܟ̥ ܓܢܳܦܠܺܝ ܒܰܡّܰܝ̈ܶܐ ܐܟ̥ ܕܰܟّܶܐܦ̈ܶܐ ܗ݄ܠ ܕܫܳܦ݄̊ܥ ܗ̄ܽܘ ܥܰܡܰܝܕ̥ܳܟ̥، ܗ݄ܠ ܕܫܳܦ݄̊ܥ ܗ̄ܽܘ ܥܰܡܰܢܳܐ ܕ݄ܦܪ݄ܩ ܠܳܟ̥. 17ܓܡܰܝܬܰܬّܶܗ ܘܢܳܨܒ̥ܰܬّܶܗ (ܙܳܪܥܰܬّܶܗ) ܒܽܗ̄ܘ ܛܽܘܪܳܐ ܕܺܗ̄ܝ ܝܳܪܬܽܘܬ̥ܰܝܕ̥ܳܟ̥. ܕܽܘܟܬ̥ܳܐ ܠܽܗ̄ܘ ܝܺܬܳܒ̥ܰܝܕ̥ܳܟ̥ ܣ݄ܡ ܠܳܟ̥، ܡܳܪܝܳܐ، ܗ̄ܽܘ ܡܩܰܕܫܰܝܕ̥ܳܟ̥. ܡܳܪܝܳܐ ܒܺܐܝܕ̥̈ܳܬ̥ܳܟ̥ ܣܽܘܡܶܗ. 18ܡܳܪܝܳܐ ܓܡܰܡܠ݄ܟ̥ ܠܥܳܠܰܡ ܥܳܠܡܺܝܢ.“ 19ܡܺܐܝܕ̥ܶܗ ܕܥܰܒܺܝܪܺܝ ܗ̄ܰܣّܘ̇ܣܝ̈ܶܐ ܕܦܶܪܥܽܘܢ ܘܰܡّܰܪ̈ܟܒܳܬ̥ܰܝܕ̥ܶܗ ܘܰܦّܰܪ̈ܳܫܰܝܕ̥ܶܗ ܒܓܰܘܶܗ ܕܽܗ̄ܘ ܝܰܡܳܐ. ܘܡܰܕܥܰܪ ܠܶܗ ܡܳܪܝܳܐ ܐܰܥܠܰܝّܶܗ ܗ̄ܰܡّܰܝ̈ܶܐ ܕܽܗ̄ܘ ܝܰܡܳܐ. ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܡܗܰܠܰܟّ̥ܶܗ ܥܰܠ ܗ̄ܺܝ ܐܰܪܥܳܐ ܝܰܒ݄ܫܬܳܐ ܒܓܰܘܶܗ ܕܽܗ̄ܘ ܝܰܡܳܐ.

20ܘܡܰܪܝܰܡ ܗ̄ܺܝ ܢܒܺܝܬ̥ܳܐ، ܗ̄ܺܝ ܚܳܬ̥ܳܐ ܕܰܐܗܪܽܘܢ، ܡ݄ܕ ܠܰܗ ܒܺܐܝܕ̥ܰܗ ܦܠܰܓܳܐ، ܘܢܰܦܺܝܩܺܝ ܟܽܘܠّܶܗ ܗ̄ܰܢ ܢܶܫ̈ܶܐ ܒ݄ܬ̥ܪܰܗ ܒܰܦܠܰܓ̈ܶܐ ܘܒܰܪ̈ܒܺܝܥܶܐ. 21ܘܡܰܪܝܰܡ ܡܙܰܡܪܳܐ ܗ̄ܘܰܐ ܠّܶܗ: ”ܡܫܰܒܶܚܽܘ ܠܡܳܪܝܳܐ ܗ̄ܽܘ ܥܶܠܳܝܳܐ، ܕܥܰܠܺܝ ܥܰܠ ܗ̄ܰܣّܘ̇ܣܝ̈ܶܐ، ܘܠܰܪّܰܒ̥ܳܟ̥̈ܰܬّ̥ܶܗ ܡܚܰܠܰܩ ܠܶܗ ܒܽܗ̄ܘ ܝܰܡܳܐ.“

22ܘܡܰܛܥܰܢ ܠܶܗ ܡܽܘܫܶܐ ܠܒܶܝ ܐܺܝܣܪܳܐܶܝܠ ܡܽܗ̄ܘ ܝܰܡܳܐ ܕܣܽܘܦ، ܘܢܰܦܺܝܩܺܝ ܠܽܗ̄ܘ ܡܰܕ̥݄ܒܪܳܐ ܕܫܽܘܕ، ܘܰܐܬ̥݄ܢ ܗܰܠܟ̥ܳܐ ܕ݄ܬܠܳܬ̥ܳܐ ܝܰܘܡ̈ܶܐ ܒܽܗ̄ܘ ܡܰܕ̥݄ܒܪܳܐ، ܘܠܳܐ ܚܙܰܠّܶܗ ܡܰܝ̈ܶܐ. 23ܘܰܐܬ̥݄ܢ ܠܡܽܘܪܰܬ̥، ܘܠܳܐ ܩܰܕܺܝܪܺܝ ܕܫܳܬ݄ܢ ܡܰܝ̈ܶܐ ܡܶܢ̱ ܡܽܘܪܰܬ̥ ܥܰܠ ܕܟ݄ܬ ܗ̄ܘܰܝܢܶܝ ܡܰܪ̱ܺܝܪ̈ܶܐ، ܡܰܗ̄ܘܟ̥ܰܐ ܩܪܰܠّܶܗ ܐ݄ܫܡܶܗ ܕܽܗ̄ܘ ܐܰܬ̥ܪܰܘܳܐ ܡܽܘܪܰܬ̥. 24ܘ݄ܡܛܰܪܛܰܡّܶܗ ܗ̄ܽܘ ܥܰܡܳܐ ܥܰܠ ܡܽܘܫܶܐ ܘܐܡ݄ܪّܶܗ: ”ܡ݄ܢ ܓܫܳܬܺܝܢܰܐ؟“ 25ܘ݄ܡܨܰܠܶܐ ܠܶܗ ܡܽܘܫܶܐ ܩ݄ܕ̱ܡ ܡܳܪܝܳܐ، ܘܡܳܪܝܳܐ ܡܰܚܘܶܐ ܠܶܗ ܠܶܗ ܩܰܝܣܳܐ، ܘ݄ܡܚܰܠܰܩ ܠܶܗ ܒܰܡّܰܝ̈ܶܐ ܘܚܰܠ݄ܢ ܗ̄ܰܡّܰܝ̈ܶܐ. ܬܰܡܳܐ ܡܰܘܠܰܦ ܠܶܗ ܢܳܡܽܘܣ̈ܶܐ ܘܕܺܝܢ̈ܶܐ، ܘܬܰܡܳܐ ܡܢܰܣܶܐ ܠܶܗ. 26ܘܐܡ݄ܪ ܠܶܗ ܠܶܗ: ”ܐܶܢ ܫܡܳܥܳܐ ܕܫܳܡܥܰܬ ܗ̄ܽܘ ܡܰܐܡܪܳܐ ܕܡܳܪܝܳܐ ܐܰ‌ܠܳܗܰܝܕ̥ܳܟ̥̥، ܘܽܗ̄ܘ ܡܶܕܶܐ ܕܟ݄ܬ ܝܳܐ ܛܳܒ̥ܳܐ ܟܣܰܝܡܰܬ ܩܽܘܕ̱ܡܶܗ، ܘܡܰܨܺܝܬ̥ܰܬ ܥܰܠ ܗ̄ܰܦّܽܘܩܕ̈ܳܢܰܝܕ̥ܶܗ، ܘܢܳܛܪܰܬ ܟܽܘܠّܶܗ ܗ̄ܰܩܝܳܡ̈ܰܝܕ̥ܶܗ، ܟܽܘܠّܶܗ ܗ̄ܰܡܚ̈ܰܝܬܳܬ̥ܳܐ ܕܡܰܝܬܶܐ ܠܺܝ ܥܰܠ ܗ̄ܰܡّܶܨܪ̈ܳܝܶܐ ܠܳܐ ܓܡܰܝܬܶܢܰܢّܶܗ ܐܰܥܠܳܟ̥، ܥܰܠ ܕܳܐܢܳܐ ܐ̱ܢܳܐ ܡܳܪܝܳܐ ܗ̄ܽܘ ܐܳܣܝܰܝܕ̥ܳܟ̥.“ 27ܘܰܐܬ̥݄ܢ ܠܳܐ‌ܠܺܝܡ. ܘܬܰܡܳܐ ܟ݄ܬ ܗ̄ܘܰܐ ܬܪܰܥܣܰܪ ܥܰܝܢ̈ܳܬ̥ܳܐ ܕܡܰܝ̈ܶܐ، ܘܫܰܒ̥ܥܺܝ ܕ̈ܶܩܠܶܐ (ܬܰܡܪ̈ܶܐ). ܘ݄ܫܪܰܠّܶܗ ܬܰܡܳܐ ܓܰܒ ܗ̄ܰܡّܰܝ̈ܶܐ.

Currently Selected:

ܣܶܦܪܳܐ ܕܡܰܦܩܳܢܳܐ 15: ܟܬܒܐ

Highlight

Copy