ܥܒܳܕ̥̈ܶܐ ܕܰܫܠܺܝܚ̈ܶܐ 6

ܗ̄ܽܘ ܣܰܝܦܳܐ ܕܥܰܠ ܗ̄ܺܝ ܥܺܕ̱ܬܳܐ ܟܡܰܪܘ݄ܚ ܘ݄ܟܡܰܙ݄ܕ ܗ̄ܺܝ ܣܒܰܪܬ̥ܳܐ

ܗ̄ܰܡܫܰܡܫܳܢ̈ܶܐ ܩܰܕ̱ܡܳܝ̈ܶܐ

1ܘܒܰܝّܰܘܡ̈ܳܬ̥ܰܢ݄ܟ، ܗ̄ܺܝ ܢܰܩܠܐ ܕܙܰܝܺܝܕܺܝ ܗ̄ܰܬّܰܠܡܺܝܕ̥̈ܶܐ، ܡܛܰܪܛܡܺܝ ܗ̄ܘܰܘ̱ ܗ̄ܰܬّܰܠܡܺܝܕ̥̈ܶܐ ܝܰܘܢܳܝ̈ܶܐ ܥܰܠ ܥّܶܒܪ̈ܳܝܶܐ ܥܰܠ ܕܡ݄ܛܠܳܡܺܝ ܗ̄ܘܰܘ̱ ܗ̄ܰܢ ܐܰܪ̈ܡܠܳܬ̥ܰܬّ̥ܶܗ ܒܺܗ̄ܝ ܬܶܫܡܶܫܬܳܐ ܕܟܽܘܠ ܝܰܘܡܳܐ. 2ܘܰܬܪܰܥܣܰܪ ܫܠܺܝܚ̈ܶܐ ܩܪܰܠّܶܗ ܠܟܽܘܠܶܗ ܗ̄ܽܘ ܟܶܢܫܳܐ ܕܰܬّܰܠܡܺܝܕ̥̈ܶܐ ܘܐܡ݄ܪّܰܢّܶܗ: ”ܠܰܝ̱ܬ ܝܳܐ ܫܰܦܺܝܪܳܐ ܕܛܳܪܺܝܢܰܐ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ ܘ݄ܡܫܰܡܫܺܝܢܰܐ ܗ̄ܰܦّܳܬܽܘܪ̈ܶܐ ܕܰܡّܶܐܟܠܳܢ̈ܶܐ. 3ܗܰܢ ܢܰܩܠܐ، ܚܽܘܪܽܘ ܛܳܒ̥ܳܐ ܝܰܐ ܐܰܚ̈ܽܘܢܳܢܶܐ، ܘ݄ܡܢܰܩܶܝܽܘ ܫܰܒ̥ܥܳܐ ܓܰܒܪ̈ܶܐ ܡ݄ܢܟ̥ܽܘ ܕܟܺܝܬ ܐܰܥܠܰܝّܶܗ ܣܳܗܕܽܘܬ̥ܳܐ ܘܡܰܠܝ̈ܶܐ ܪܽܘܚܳܐ ܕܡܳܪܝܳܐ ܘܚܶܟ̥ܡܬ̥ܳܐ، ܘܓ݄ܕܡܰܩܺܝܡܺܝܢܰܢّܶܗ ܥܰܠ ܗ̄ܽܘ ܫܘܓ̥ܠܰܢܳܐ. 4ܘܰܐܚܢܰܐ ܓܦܰܝܫܺܝܢܰܐ ܗ̄ܽܘ ܙܰܒܢܳܐ ܟܽܘܠܶܗ ܒܺܗ̄ܝ ܨܠܽܘܬ̥ܳܐ ܘܒܺܗ̄ܝ ܬܶܫܡܶܫܬܳܐ ܕܺܗ̄ܝ ܡܶܠܬ̥ܳܐ.“ 5ܘܟܽܘܠܶܗ ܗ̄ܽܘ ܥܰܡܳܐ ܫܰܦ݄ܪ ܠܶܗ ܗ̄ܽܘ ܡܰܐܡܪܰܢܳܐ، ܘ݄ܓܒܰܠّܶܗ ܠܶܐܣܛܶܦܰܢܳܘܣ، ܓܰܒ̥ܪܳܐ ܡܰܠܝܳܐ ܗܰܝܡܳܢܽܘܬ̥ܳܐ ܘܪܽܘܚܳܐ ܕܩܽܘܕܫܳܐ، ܘ݄ܠܦܺܝܠܺܝܦܳܘܣ ܘܠ݄ܦܪܳܟܳܪܳܘܣ ܘ݄ܠܢܺܝܩܰܢܳܘܪ ܘ݄ܠܛܺܝܡܳܘܢ ܘ݄ܠܦܰܪܡܶܢܰܐ ܘ݄ܠܢܺܝܩܳܠܰܐܘܳܣ ܕܡܶܢ̱ ܐܰܢܛܺܝܳܟ̥ܺܝܰܐ ܕܠܰܝ̱ܬ ܗ̄ܘܰܐ ܝܽܘܕ̥ܳܝܳܐ. 6ܗܰܢܺܝ ܩܰܝܺܝܡܺܝ ܩ݄ܕ̱ܡ ܗ̄ܰܫܠܺܝܚ̈ܶܐ، ܘܺܗ̄ܝ ܢܰܩܠܐ ܕ݄ܡܨܰܠܰܠّܶܗ ܡܰܚ݄ܬّܶܗ ܐܰܥܠܰܝّܶܗ ܐܺܝܕ̥ܳܐ. 7ܘܺܗ̄ܝ ܡܶܠܬ̥ܳܐ ܕܰܐ‌ܠܳܗܳܐ ܝܳܪܒ̥ܳܐ ܗ̄ܘܰܐ، ܘܙܳܝܰܕ ܗ̄ܘܰܐ ܓ̥ܰܠܰܒܶܐ ܗ̄ܽܘ ܡܶܢܝܳܢܳܐ ܕܰܬّܰܠܡܺܝܕ̥̈ܶܐ ܒܽܐܘܪܶܫܠܶܡ، ܘܥܰܡܳܐ ܓ̥ܰܠܰܒܶܐ ܡܰܢ̱ ܝّܽܘܕ̥̈ܳܝܶܐ ܫ݄ܡܥܺܝ ܗ̄ܘܰܘ̱ ܠܺܗ̄ܝ ܗܰܝܡܳܢܽܘܬ̥ܳܐ.

ܐܶܣܛܶܦܰܢܳܘܣ ܟܡܺܝܕ݄ܢ

8ܘܶܐܣܛܶܦܰܢܳܘܣ ܡܰܠܝܳܐ ܗ̄ܘܰܐ ܛܰܝܒܽܘܬ̥ܳܐ ܘܚܰܝܠܳܐ، ܘܣܳܝܰܡ ܗ̄ܘܰܐ ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܒܰܝܢ ܗ̄ܽܘ ܥܰܡܳܐ. 9ܘܢܳܫ̈ܶܐ ܡܺܗ̄ܝ ܟ̥ܢܽܘܫܬܳܐ ܕ݄ܟܡ݄ܩܪܳܝܳܐ ܠܺܒ̊ܶܪܛܺܝܢܽܘ (ܥܰܒܕ̈ܶܐ ܚܺܐܪ̈ܶܐ) ܘܩܽܘܪ̈ܺܝܢܳܝܶܐ ܘܰܐ‌ܠܶܟܣܰܢܕܪ̈ܳܝܶܐ ܘܡܶܢ̱ ܩܺܝܠܺܝܩܺܝܰܐ ܘܡܶܢ̱ ܐܰܣܺܝܰܐ، ܘܕܳܪܫܺܝ ܗ̄ܘܰܘ̱ ܥܰܡ ܐܶܣܛܶܦܰܢܳܘܣ. 10ܘܠܳܐ ܩܳܕܪܺܝ ܗ̄ܘܰܘ̱ ܕܩܰܝܡܺܝ ܡܩܰܒ݄ܠ ܕܺܗ̄ܝ ܚܶܟ̥ܡܬ̥ܳܐ ܘܕܺܗ̄ܝ ܪܽܘܚܳܐ ܕܡ݄ܫܓ̥ܳܠܳܐ ܗ̄ܘܰܐ ܐܶܒܶܗ. 11ܗ̄ܺܝ ܢܰܩܠܝܳܐ، ܡܫܰܕܰܪّܶܗ ܓܰܒܪ̈ܶܐ ܘܡܰܘܠܦ݄ܢّܶܗ ܕ݄ܐܡّܺܪ̱ܝ ܕܰܐܚܢܰܐ ܫܰܡܺܝܥܺܝܢܰܐ ܡܶܢܶܗ ܕܐܡ݄ܪ ܠܶܗ ܡܰܐܡܪ̈ܶܐ ܕܓܽܘܕܳܦܳܐ ܥܰܠ ܡܽܘܫܶܐ ܘܥܰܠ ܐܰ‌ܠܳܗܳܐ. 12ܘ݄ܫܓ̥݄ܫّܶܗ ܗ̄ܽܘ ܥܰܡܳܐ ܘܰܩّܰܫ̈ܶܐ ܘܰܣّܳܦܪ̈ܶܐ. ܘܰܐܬ̥݄ܢ ܘܩܰܝܺܝܡܺܝ ܐܰܥܠܶܗ ܘ݄ܢܬ݄ܫّܶܗ ܡܰܝܬܰܠّܶܗ ܠܦܰܠܓܶܗ ܕܽܗ̄ܘ ܟܢܽܘܫܝܳܐ. 13ܘܡܰܩ݄ܡّܶܗ ܣܳܗܕ̈ܶܐ ܡܕ̈ܰܓܠܳܢܶܐ ܕܟ݄ܐܡّܺܪ̱ܝ: ”ܗ̄ܽܘ ܓܰܒ̥ܪܰܢܳܐ ܠܳܐ ܟܫܳܠܶܐ ܟܡ݄ܫܓ̥݄ܠ ܡܰܐܡܪ̈ܶܐ ܡܩܰܒ݄ܠ ܕܽܗ̄ܘ ܢܳܡܽܘܣܳܐ ܘܥܰܠ ܗ̄ܽܘ ܐܰܬ̥ܪܰܢܳܐ ܗ̄ܽܘ ܡܩܰܕܫܳܐ. 14ܘܰܐܚܢܰܐ ܫܰܡܺܝܥܺܝܢܰܐ ܠܶܗ ܕܟܳܐܡ݄ܪ: ܝܶܫܽܘܥ ܗܰܢܳܐ ܗ̄ܽܘ ܢܳܨܪܳܝܳܐ ܓܡܰܚܪܽܒ̥ ܗ̄ܽܘ ܐܰܬ̥ܪܰܢܳܐ ܘ݄ܡܚܰܠ݄ܦ ܗ̄ܰܥܝܳܕ̥̈ܶܐ ܕܗܽܒ̥ ܠܶܗ ܠܟ̥ܽܘ ܡܽܘܫܶܐ.“ 15ܘܚ݄ܪّܶܗ ܐܶܒܶܗ ܟܽܘܠّܶܗ ܗ̄ܰܝّܰܬܺܝܒ̥̈ܶܐ ܕܒܽܗ̄ܘ ܟܢܽܘܫܝܳܐ ܘ݄ܚܙܰܠّܶܗ ܦܳܬ̥ܶܗ ܐܟ̥ ܕܦܳܬ̥ܶܗ ܕܡܰܠܰܐܟ̥ܳܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 6: ܟܬܒܐ

Highlight

Copy