ܥܒܳܕ̥̈ܶܐ ܕܰܫܠܺܝܚ̈ܶܐ 7
7
ܡܰܦܬܰܚ ܦܶܡܳܐ ܕܶܐܣܛܶܦܰܢܳܘܣ
1ܘܽܗ̄ܘ ܪܰܒܳܐ ܕܰܟّܳܗ̈ܢܶܐ ܡܫܰܐܶܠ ܠܶܗ ܠܶܗ ܕܶܐܢ ܗܰܢܺܝ ܗܰܘܟ̥ܰܐ ܢܶܝ؟ 2ܘܗܺܝّܶܗ ܐܡ݄ܪ ܠܶܗ: ”ܝܰܐ ܓܰܒ̥ܪ̈ܶܐ ܐܰܚ̈ܽܘܢܳܢܶܐ ܘܒܰܒܳܢ̈ܶܐ، ܫܡܰܥܽܘ: ܐܰܠܳܗܳܐ ܕܺܗ̄ܝ ܬܶܫܒܽܘܚܬܳܐ ܚܙܶܐ ܠܒܰܒܰܢ ܐܰܒܪܳܗܳܡ ܗܶܫ ܡܺܗ̄ܝ ܢܰܩܠܐ ܕܟ݄ܬ ܗ̄ܘܰܐ ܒܒܶܝܬ̥ ܢܰܗܪ̈ܺܝܢ، ܡܶܩ݄ܕ̱ܡ ܕܳܐܬ̥ܶܐ ܘܥܳܡ݄ܪ ܒܚܳܪܳܢ. 3ܘܐܡ݄ܪ ܗ̄ܘܰܝ ܠܶܗ ܠܶܗ: ’ܢܦܰܩ ܡܺܗ̄ܝ ܐܰܪܥܰܝܕ̥ܳܟ̥ ܘܡܶܢ̱ ܓܰܒ ܗ̄ܰܢ ܢܳܫ̈ܰܝܕ̥ܳܟ̥ ܘܬܳܟ̥ ܠܺܗ̄ܝ ܐܰܪܥܳܐ ܕ݄ܓܡܰܚܘܶܢܳܟ̥.‘ 4ܘܺܗ̄ܝ ܢܰܩܠܝܳܐ، ܢܰܦ݄ܩ ܐܰܒܪܳܗܳܡ ܡܺܗ̄ܝ ܐܰܪܥܳܐ ܕܰܟّܰܠܕ̈ܳܝܶܐ ܘܰܐܬ̥ܺܝ ܝܰܬܽܒ̥ ܒܚܳܪܳܢ. ܘܡܶܢ̱ ܬܰܡܳܐ، ܗ̄ܺܝ ܢܰܩܠܐ ܕܡܰܝ݄ܬ̥ ܗ̄ܽܘ ܒܰܒܳܐ، ܐܰܠܳܗܳܐ ܡܰܝܬܶܐ ܠܶܗ ܠܺܗ̄ܝ ܐܰܪܥܰܬ̥ܶܐ ܕܶܐܒܰܗ ܟܥܳܡܪܺܝܬܽܘ ܐܰܕܝܰܘܡܰܐ. 5ܘܠܳܐ ܗܽܒ̥ ܠܶܗ ܠܶܗ ܐܶܒܰܗ ܝܳܪܬ̥ܽܘܬ̥ܳܐ ܘܠܳܐ ܕܽܘܟܬ̥ܳܐ ܕ݄ܕܝܰܫܬܳܐ ܕܪܰܓ̥ܠܳܐ. ܐܶܠܳܐ ܡܘܰܥܰܕ ܗ̄ܘܰܐ ܠܶܗ ܕܳܗ̄ܒܶܐ ܠܶܗ ܝܳܐ ܐܟ̥ ܕܝܳܪܬܽܘܬ̥ܳܐ ܐܶܠܶܗ ܘܠܽܗ̄ܘ ܙܰܪܥܰܝܕ̥ܶܗ، ܘܗܶܫ ܠܰܝ̱ܬ ܗ̄ܘܰܝ ܠܶܗ ܐܰܒܪܳܐ. 6ܘ݄ܫܓ̥ܺܝܠ ܐܰܠܳܗܳܐ ܐܰܥܡܶܗ ܘܐܡ݄ܪ ܠܶܗ ܠܶܗ: ’ܗ̄ܽܘ ܙܰܪܥܰܝܕ̥ܳܟ̥ ܓܕܳܗ̄ܘܶܐ ܬܰܘܬܳܒ̥ܳܐ (ܓܰܠܘܳܝܳܐ) ܒܰܐܪܥܳܐ ܢܽܘܟ̥ܪܰܝܬܳܐ، ܓܡܰܦ݄ܠܚܺܝ ܠܶܗ ܐܟ̥ ܕ݄ܓܪܶܝܥܳܐ ܘ݄ܓܡܰܥܺܝܩܺܝ ܠܶܗ ܐܰܪܒܰܥܡܳܐܐ ܐ݄ܫܢ̈ܶܐ. 7ܘܠܽܗ̄ܘ ܥܰܡܳܐ ܕ݄ܓܦܳܠܚܺܝ ܠܶܗ ܓܪܰܥܝܽܘܬ̥ܳܐ، ܐܳܢܳܐ ܓܕܳܝܰܢ ܐ̱ܢܳܐ ܠܶܗ،‘ ܐܡ݄ܪ ܠܶܗ ܐܰܠܳܗܳܐ. ܘܒ݄ܬ̥݄ܪ ܡܰܗ̄ܢܺܝ، ܓܢܳܦܩܺܝ ܘ݄ܓܣܳܓ̥ܕܺܝ ܠܺܝ ܒܽܗ̄ܘ ܐܰܬ̥ܪܰܢܳܐ. 8ܘܗܽܒ̥ ܠܶܗ ܠܶܗ ܩܝܳܡܳܐ ܕܺܗ̄ܝ ܓܙܽܘܪܬܳܐ، ܘܒ݄ܬ̥݄ܪܟܶܐ (ܐܰܒܪܳܗܳܡ) ܡܰܘܠܰܕ ܠܶܗ ܐܺܝܣܚܳܩ ܘ݄ܓܙ݄ܪ ܠܶܗ ܒܽܗ̄ܘ ܝܰܘܡܳܐ ܕܰܬܡܰܢܝܳܐ. ܘܺܐܝܣܚܳܩ ܡܰܘܠܰܕ ܠܶܗ ܠܝܰܥܩܽܘܒ ܘܝܰܥܩܽܘܒ ܡܰܘܠܰܕ ܠܶܗ ܠܰܒّܰܒܳܢ̈ܰܝܕ̥ܰܢ ܗ̄ܰܬܪܰܥܣܰܪ. 9ܘܗ݄ܢّܶܝ ܗ̄ܰܒّܰܒܳܢ̈ܰܝܕ̥ܰܢ ܚܣ݄ܡّܶܗ ܒܝܰܘܣܶܦ ܘ݄ܡܙܰܒܰܢّܶܗ ܠܡܶܨܪܶܝܢ. ܘܰܐܠܳܗܳܐ ܐܰܥܡܶܗ ܗ̄ܘܰܐ. 10ܘ݄ܦܪ݄ܩ ܠܶܗ ܡܰܢ̱ ܡّܰܥܺܝ̈ܩܳܢܰܝܕ̥ܶܗ ܟܽܘܠّܶܗ، ܘܗܽܒ̥ ܠܶܗ ܠܶܗ ܛܰܝܒܽܘܬ̥ܳܐ ܘܚܶܟ̥ܡܬ̥ܳܐ ܩ݄ܕ̱ܡ ܦܶܪܥܽܘܢ ܗ̄ܽܘ ܡܰܠܟܳܐ ܕܡܶܨܪܶܝܢ؛ ܘܡܰܩ݄ܡ ܠܶܗ ܪܺܝܫܳܐ ܥܰܠ ܡܶܨܪܶܝܢ ܘܥܰܠ ܗ̄ܽܘ ܒܰܝܬܰܝܕ̥ܶܗ ܟܽܘܠܶܗ.
11”ܘܗܰܘܺܝ ܟܰܦܢܳܐ ܘܡܰܥܺܝܩܽܘܬ̥ܳܐ ܪܰܒܬ̥ܳܐ ܒܟܽܘܠܰܗ ܡܶܨܪܶܝܢ ܘܒܺܗ̄ܝ ܐܰܪܥܳܐ ܕ݄ܟܢܰܥܢ، ܘܰܒّܰܒܳܢ̈ܰܝܕ̥ܰܢ ܠܳܐ ܦܰܝ݄ܫّܶܗ ܡܶܕܶܐ ܕܳܐܟ̥ܠܺܝ. 12ܘܺܗ̄ܝ ܢܰܩܠܐ ܕܫܰܡ݄ܥ ܝܰܥܩܽܘܒ ܕܟܺܝܬ ܚ̈ܶܛܶܐ ܒܡܶܨܪܶܝܢ، ܡܫܰܕܰܪ ܠܶܗ ܗ̄ܰܒّܰܒܳܢ̈ܰܝܕ̥ܰܢ ܒܺܗ̄ܝ ܢܰܩܠܐ ܩܰܕ̱ܡܰܝܬܳܐ. 13ܘܒܺܗ̄ܝ ܢܰܩܠܐ ܕܰܬّܰܪܬܶܝ ܕܰܐܙّ݄ܢ، ܝܰܘܣܶܦ ܡܰܘܕ̥ܰܥ ܠܶܗ ܪܽܘܚܶܗ ܠܰܗ̄ܢ ܐܰܚ̈ܽܘܢܳܢܶܐ. ܘܦܶܪܥܽܘܢ ܣܬܶܝ ܐܰܕ̥݄ܥ ܗ̄ܰܢ ܢܳܫ̈ܶܐ ܕܝܰܘܣܶܦ. 14ܘ݄ܡܫܰܕܰܪ ܗ̄ܘܰܝ ܠܶܗ ܝܰܘܣܶܦ ܘܡܰܝܬܶܐ ܠܶܗ ܝܰܥܩܽܘܒ ܗ̄ܽܘ ܒܰܒܳܐ ܘܺܐܝܩܰܪܬ̥ܰܝܕ̥ܶܗ ܟܽܘܠܰܗ ܘܗܳܘ݄ܢ ܗ̄ܘܰܘ̱ ܚܰܡّܶܫ ܘܫܰܒ̥ܥܺܝ ܢܰܦܫ̈ܳܬ̥ܶܐ. 15ܘܢܰܚ݄ܬ ܝܰܥܩܽܘܒ ܠܡܶܨܪܶܝܢ، ܘܬܰܡܳܐ ܡܰܝ݄ܬ̥ ܗܺܝّܶܗ ܘܰܒّܰܒܳܢ̈ܰܝܕ̥ܰܢ. 16ܘ݄ܢܩܺܝܠ ܠ݄ܫܟܺܝܡ ܘ݄ܡܬܰܚ݄ܬ ܒܽܗ̄ܘ ܩܰܒ̥ܪܳܐ ܕ݄ܙܒ̥݄ܢ ܗ̄ܘܰܝ ܠܶܗ ܐܰܒܪܳܗܳܡ ܒܟܶܣܦܳܐ ܡܰܗ̄ܢ ܐܰܒܢ̈ܶܐ ܕ݄ܚܡܽܘܪ. 17ܘܺܗ̄ܝ ܢܰܩܠܐ ܕܡܰܛܺܝ ܗ̄ܽܘ ܙܰܒܢܳܐ ܕܽܗ̄ܘ ܡܶܕܶܐ ܕ݄ܡܘܰܥܰܕ ܗ̄ܘܰܝ ܠܶܗ ܒܺܝܡܳܝܳܐ ܐܰܠܳܗܳܐ ܠܰܐܒܪܳܗܳܡ، ܘܙܰܝ݄ܕ ܗ̄ܘܰܐ ܗ̄ܽܘ ܥܰܡܳܐ ܒܡܶܨܪܶܝܢ ܘܝܰܪܽܒ̥ ܗ̄ܘܰܐ، 18ܗܳܠ ܕܩܰܝ݄ܡ ܡܰܠܟܳܐ ܚܪܶܢܳܐ ܥܰܠ ܡܶܨܪܶܝܢ ܕܠܳܐ ܐܕ̥ܰܥ ܗ̄ܘܰܐ ܠܝܰܘܣܶܦ. 19ܘܢܰܦ݄ܩ ܢܟ̥ܺܝܠܳܐ ܥܰܡ ܗ̄ܽܘ ܥܰܡܰܝܕ̥ܰܢ، ܘܡܰܥ݄ܩ ܠܶܗ ܥܰܠ ܗ̄ܰܒّܰܒܳܢ̈ܰܝܕ̥ܰܢ، ܘܗܽܒ̥ ܠܶܗ ܦܽܘܩܕܳܢܳܐ ܕܡܺܝܚܰܠܩܺܝ ܗ̄ܰܙܥܽܘܪ̈ܰܬّ̥ܶܗ ܕܠܳܐ ܦܰܝܫܺܝ ܒܰܚّܰܝ̈ܶܐ. 20ܘܒܽܗ̄ܘ ܙܰܒܢܰܘܳܐ ܡܬܰܘܠܰܕ̥ (ܡܰܘܠ݄ܕ) ܡܽܘܫܶܐ، ܘ݄ܪܚܺܝܡܳܐ ܗ̄ܘܰܐ ܥܰܠ ܐܰܠܳܗܳܐ، ܘ݄ܡܪܰܒܶܐ ܬܠܳܬ̥ܳܐ ܝܰܪ̈ܚܶܐ ܒܽܗ̄ܘ ܒܰܝܬܳܐ ܕܽܗ̄ܘ ܒܰܒܳܐ. 21ܘܺܗ̄ܝ ܢܰܩܠܐ ܕ݄ܡܚܰܠ݄ܩ ܡܺܗ̄ܝ ܐܶܡܳܐ، ܗ̄ܺܝ ܒܰܪܬ̥ܳܐ ܕܦܶܪܥܽܘܢ ܚܙܶܐ ܠܰܗ ܘ݄ܡܪܰܒܶܐ ܠܰܗ ܐܟ̥ ܕܐܰܒܪܳܐ. 22ܘܡܽܘܫܶܐ ܝܰܠ݄ܦ ܟܽܘܠܰܗ ܗ̄ܺܝ ܚܶܟ̥ܡܬ̥ܳܐ ܕܰܡّܶܨܪ̈ܳܝܶܐ، ܘ݄ܡܗܺܝܪܳܐ ܗ̄ܘܰܐ ܒܽܗ̄ܘ ܡܰܐܡܪܰܝܕ̥ܶܗ ܘܒܽܗ̄ܘ ܥܒܳܕ̥ܰܝܕ̥ܶܗ. 23ܘܺܗ̄ܝ ܢܰܩܠܐ ܕܗܰܘܺܝ ܐܰܒܪܶܗ ܕܰܐܪܒܥܺܝ ܐ݄ܫܢ̈ܶܐ، ܣܰܠ݄ܩ ܥܰܠ ܒܳܠܶܗ ܕ݄ܐܙّܶܗ ܚܳܙܶܐ ܠܰܗ̄ܢ ܐܰܚ̈ܽܘܢܳܢܰܝܕ̥ܶܗ، ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ. 24ܘ݄ܚܙܶܐ ܠܶܗ ܚܰܕ̱ ܡܰܗ̄ܢ ܐܰܒܢ̈ܶܐ ܕܽܗ̄ܘ ܥܰܡܰܝܕ̥ܶܗ ܕ݄ܟܳܡܺܝܬܰܘܒ݄ܠ ܒܽܗ̄ܘ ܚܰܝܠܳܐ، ܘܰܐܬ̥ܺܝ ܥ݄ܠ ܡܶܢܶܗ ܘܣ݄ܡ ܠܶܗ ܠܶܗ ܕܺܝܢܳܐ ܘ݄ܩܛܺܝܠ ܠܶܗ ܗ̄ܽܘ ܡܶܨܪܳܝܰܘܳܐ ܕܛܳܠܰܡ ܗ̄ܘܰܝ ܠܶܗ. 25ܘ݄ܚܫܽܒ̥ ܠܶܗ ܕܰܗ̄ܢ ܐܰܚ̈ܽܘܢܳܢܰܝܕ̥ܶܗ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ ܓܕ݄ܐܕ̥ܥܺܝ ܕܰܐܠܳܗܳܐ ܓܕܳܗ̄ܒܰܠّܶܗ ܦܽܘܪܩܳܢܳܐ ܥܰܠ ܐܺܝܕ̥ܶܗ، ܐܶܠܳܐ ܠܰܐ ܐܕ̥ܺܝܥܺܝ. 26ܘܒܽܗ̄ܘ ܝܰܘܡܳܐ ܚܪܶܢܳܐ، ܚܙܰܠّܶܗ ܩܰܝ̈ܺܝܬ̥ܶܐ ܒ݄ܚܕ̥ܳܕ̥̈ܶܐ، ܘܰܐܒ݄ܥ ܡ݄ܢّܶܗ ܕܳܐܬ̥݄ܢ ܠ݄ܚܕ̥ܳܕ̥̈ܶܐ، ܘܳܐܡܰܪ ܗ̄ܘܰܐ: ’ܝܰܐ ܓܰܒܪ̈ܶܐ، ܐܰܚ̈ܽܘܢܳܢܶܐ ܗܰܬܽܘ، ܥܰܠ ܡ݄ܢ ܟܩܰܝܬ̥ܺܝܬܽܘ ܒ݄ܚܕ̥ܳܕ̥̈ܶܐ؟‘ 27ܘܗܰܘܳܐ ܕܛܳܠܰܡ ܗ̄ܘܰܐ ܗ̄ܽܘ ܚܰܒ̥ܪܳܐ ܬܦ݄ܟ ܠܶܗ ܡܽܘܫܶܐ ܡܶܢ̱ ܓܰܒܶܗ ܘܐܡ݄ܪ ܠܶܗ ܠܶܗ: ’ܡܰܢ ܡܰܩ݄ܡ ܠܶܗ ܠܳܟ̥ ܐܰܥܠܰܢ ܪܺܝܫܳܐ ܘܕܰܝܳܢܳܐ؟ 28ܩܰܝ ܟ݄ܐܒܥܰܬ ܕܩܳܛܠܰܬ ܠܺܝ ܐܟ̥ ܕ݄ܩܛܺܝܠ ܠܳܟ̥ ܐܰܬ̥ܡ݄ܠ ܗ̄ܽܘ ܡܶܨܪܳܝܳܐ؟‘ 29ܘܥܰܠ ܗ̄ܽܘ ܡܰܐܡܪܰܢܳܐ ܥܰܪ݄ܩ ܡܽܘܫܶܐ، ܘܰܐܙّܶܗ ܗܰܘܺܝ ܬܰܘܬܳܒ̥ܳܐ (ܓܰܠܘܳܝܳܐ) ܒܺܗ̄ܝ ܐܰܪܥܳܐ ܕܡܶܕܝܰܢ، ܘܗܰܘܺܝ ܠܶܗ ܬܪܶܝ ܐܰܒܢ̈ܶܐ. 30ܘܺܗ̄ܝ ܢܰܩܠܐ ܕ݄ܡܟܰܡܶܠ ܠܶܗ ܬܰܡܳܐ ܐܰܪܒܥܺܝ ܐ݄ܫܢ̈ܶܐ، ܚܙܶܐ ܐܶܠܶܗ ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܒܽܗ̄ܘ ܡܰܕ̥ܒܪܳܐ ܕܛܽܘܪ ܣܺܝܢܰܝ ܒܢܽܘܪܳܐ ܕܟܳܝܳܩܕܳܐ ܒܽܗ̄ܘ ܣܰܠܽܘܢܳܐ. 31ܘܡܽܘܫܶܐ ܡܕܰܘܡ݄ܪ ܒܽܗ̄ܘ ܚܶܙܘܳܐ ܕ݄ܚܙܶܐ ܠܶܗ، ܘܺܗ̄ܝ ܢܰܩܠܐ ܕ݄ܡܩܰܕܰܡ ܠܶܗ ܕܚܳܙܶܐ، ܡܳܪܝܳܐ ܐܡ݄ܪ ܠܶܗ ܠܶܗ ܒܩܳܠܳܐ: 32’ܐܳܢܳܐ ܐ̱ܢܳܐ ܐܰܠܳܗܳܐ ܕܰܒّܰܒܳܢ̈ܰܝܕ̥ܳܟ̥، ܐܰܠܳܗܳܐ ܕܰܐܒܪܳܗܳܡ ܘܕܺܐܝܣܚܳܩ ܘ݄ܕܝܰܥܩܽܘܒ.‘ ܘܡܽܘܫܶܐ ܡܰܪܥܰܠ ܗ̄ܘܰܐ ܘܙܳܝܰܥ ܗ̄ܘܰܐ ܕܚܳܝ݄ܪ ܒܽܗ̄ܘ ܚܶܙܘܳܐ. 33ܘܡܳܪܝܳܐ ܐܡ݄ܪ ܠܶܗ ܠܶܗ: ’ܫܠܰܚ ܗ̄ܰܡܣܳܢ̈ܰܝܕ̥ܳܟ̥ ܡܶܢ̱ ܪ̈ܰܓ̥ܠܳܬ̥ܳܟ̥، ܥܰܠ ܕܺܗ̄ܝ ܐܰܪܥܳܐ ܕܟܳܩܰܝܡܰܬ ܐܰܥܠܰܗ ܡܩܰܕܰܫܬܳܐ ܝܳܐ. 34ܚܙܳܝܳܐ ܚܙܶܐ ܠܺܝ ܗ̄ܺܝ ܡܰܥܺܝܩܽܘܬ̥ܳܐ ܕܽܗ̄ܘ ܥܰܡܰܝܕ̥ܺܝ ܕ݄ܒܡܶܨܪܶܝܢ، ܘܽܗ̄ܘ ܬܶܢܺܝܢܰܝܕ̥ܶܗ ܫܰܡ݄ܥ ܐ̱ܢܳܐ، ܘܢܰܚ݄ܬ ܐ̱ܢܳܐ ܕܦܳܪܰܩ ܐ̱ܢܳܐ ܠܶܗ. ܘܳܐܥܕܳܐ ܬܳܟ̥ ܕ݄ܡܫܰܕܰܪܢܳܟ̥ ܠܡܶܨܪܶܝܢ‘ 35ܠܰܗ̄ܢܳܐ ܡܽܘܫܶܐ ܕܟܰܦܺܝܪܺܝ ܐܶܒܶܗ ܘܐܡ݄ܪّܰܗ ܠܶܗ: ’ܡܰܢ ܡܰܩ݄ܡ ܠܶܗ ܠܳܟ̥ ܐܰܥܠܰܢ ܪܺܝܫܳܐ ܘܕܰܝܳܢܳܐ،‘ ܠܰܗ̄ܢܳܐ ܐܰܠܳܗܳܐ ܡܫܰܕܰܪ ܠܰܗ ܠّܶܗ ܝܳܐ ܪܺܝܫܳܐ ܘܦܳܪܽܘܩܳܐ ܒܺܐܝܕ̥ܶܗ ܕܽܗ̄ܘ ܡܰܠܰܐܟ̥ܰܘܳܐ ܕ݄ܚܙܶܐ ܐܶܠܶܗ ܒܽܗ̄ܘ ܣܰܠܽܘܢܳܐ. 36ܗܰܢܳܐ ܝܳܐ ܕܡܰܘܦܩܺܝ ܠܶܗ ܘܗܺܝّܶܗ ܟܣܳܝ݄ܡ ܐܳܬ̥ܘ̈ܳܬ̥ܳܐ ܘܬܶܕ݄ܡܪ̈ܳܬ̥ܳܐ ܘܚܰܝ̈ܠܶܐ ܒܺܗ̄ܝ ܐܰܪܥܳܐ ܕܡܶܨܪܶܝܢ ܘܒܽܗ̄ܘ ܝܰܡܳܐ ܕܣܽܘܦ ܘܒܽܗ̄ܘ ܡܰܕ̥ܒܪܳܐ ܐܰܪܒܥܺܝ ܐ݄ܫܢ̈ܶܐ. 37ܗܰܢܳܐ ܝܳܐ ܡܽܘܫܶܐ ܗܰܘܳܐ ܕܐܡ݄ܪ ܠܶܗ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ: ’ܡܳܪܝܳܐ ܐܰܠܳܗܳܐ ܓ݄ܕܡܰܩ݄ܡܟ̥ܽܘ ܢܒܺܝܳܐ ܐܟ̥݄ܕܘܳܬ̥ܺܝ ܡܒܰܝܢ ܗ̄ܰܢ ܐܰܚ̈ܽܘܢܳܢܰܬ̥ܟ̥ܽܘ، ܐܶܠܶܗ ܓܫܳܡܥܺܝܬܽܘ!‘ 38ܗܰܢܳܐ ܝܳܐ ܕܗܰܘܺܝ ܗ̄ܘܰܐ ܒܺܗ̄ܝ ܟ̥ܢܽܘܫܬܳܐ ܒܽܗ̄ܘ ܡܰܕ̥ܒܪܳܐ ܥܰܡ ܗ̄ܽܘ ܡܰܠܰܐܟ̥ܰܘܳܐ ܕܡ݄ܫܓ̥ܰܠ ܗ̄ܘܰܐ ܐܰܥܡܶܗ ܘܥܰܡ ܗ̄ܰܒّܰܒܳܢ̈ܰܝܕ̥ܰܢ ܒܽܗ̄ܘ ܛܽܘܪܳܐ ܕܣܺܝܢܰܝ، ܘܗܺܝّܶܗ ܝܳܐ ܕܡܰܩܒܶܠ ܠܶܗ ܗ̄ܰܡّܶܠ̈ܶܐ ܕܰܚّܰܝ̈ܶܐ ܕܳܗ̄ܒܶܐ ܠܰܢ. 39ܐܶܠܳܐ ܗ̄ܰܒّܰܒܳܢ̈ܰܝܕ̥ܰܢ ܠܰܐ ܐܒܺܝܥܺܝ ܕܫ݄ܡܥܺܝ ܠܶܗ، ܐܶܠܳܐ ܛܪܰܠّܶܗ ܡܶܢܶܗ، ܘ݄ܒܠܶܒܰܝّܶܗ ܕܰܥܺܝܪܺܝ ܠܡܶܨܪܶܝܢ. 40ܘܐܡ݄ܪّܶܗ ܠܰܐܗܪܽܘܢ: ’ܣ݄ܡ ܠܰܢ ܐܰܠܳܗ̈ܶܐ ܕ݄ܡܗܰܠܟ̥ܺܝ ܒܩܰܕ̱ܡܽܘܬ̥ܰܢ ܥܰܠ ܕܰܗ̄ܢܳܐ ܡܽܘܫܶܐ ܕܡܰܘܦܰܩ ܠܶܗ ܠܰܢ ܡܺܗ̄ܝ ܐܰܪܥܳܐ ܕܡܶܨܪܶܝܢ ܠ݄ܐ ܟ݄ܐܕ̥ܥܺܝܢܰܐ ܡ݄ܢ ܗܰܘܺܝ ܠܶܗ.‘ 41ܘܣ݄ܡ ܠܰܗ ܠّܶܗ ܐܰܪܘܳܢܳܐ ܒܰܝّܰܘܡ̈ܳܬ̥ܰܢ݄ܟ، ܘ݄ܕܒ݄ܚّܶܗ ܕܶܒܚ̈ܶܐ ܠܰܨّܰܠܡ̈ܶܐ، ܘܡܺܝܒܰܣܡܺܝ ܗ̄ܘܰܘ̱ ܒܽܗ̄ܘ ܡܶܕܶܐ ܕܣ݄ܡّܶܗ ܒܺܐܝܕ̥̈ܳܬ̥ܰܝّܶܗ. 42ܘܕܰܥ݄ܪ ܐܰܠܳܗܳܐ ܘܡܰܫ݄ܠܡܺܝ ܠܶܗ ܕܣܳܓ̥ܕܺܝ ܠܰܚّܰܝ̈ܠܶܐ ܕܺܗ̄ܝ ܫܡܰܝܳܐ (ܗ̄ܰܟّܽܘܟܒ̥̈ܶܐ) ܐܟ̥ ܕ݄ܟܬ̥ܺܝܒ̥ ܒܽܗ̄ܘ ܟܬ̥ܳܒ̥ܳܐ ܕܰܗ̄ܢ ܢܒܺܝ̈ܶܐ: ’ܐܰܪܒܥܺܝ ܐ݄ܫܢ̈ܶܐ ܒܽܗ̄ܘ ܡܰܕ̥ܒܪܳܐ ܩܰܝ ܕܶܒܚ̈ܶܐ ܘܩܽܘܪ̈ܒܳܢܶܐ ܡܩܰܪܰܒ̥ܟ̥ܽܘ ܠܺܝ، ܝܰܐ ܗ̄ܰܢ ܐܰܒܢ̈ܶܐ ܕܺܐܝܣܪܳܐܶܝܠ؟ 43ܐܶܠܳܐ ܡ݄ܕܟ̥ܽܘ ܗ̄ܽܘ ܡܰܫܟܢܳܐ ܕܡܰܠܟܽܘܡ ܘܽܗ̄ܘ ܟܽܘܟܒ̥ܳܐ ܕܰܐܠܳܗܳܐ ܕܰܪܦܳܢ، ܗ̄ܰܨّܰܠܡ̈ܶܐ ܕܣ݄ܡܟ̥ܽܘ ܕܣܳܓ̥ܕܺܝܬܽܘܢّܶܗ. ܓܡܰܘܒܰܠ ܐ̱ܢܳܐ ܠܟ̥ܽܘ ܠܪܰܚ݄ܩ ܡܶܢ̱ ܒܳܒܶܠ.‘ 44ܟܰܐܠܶܗ ܗ̄ܽܘ ܡܰܫܟܢܳܐ ܕܺܗ̄ܝ ܣܳܗܕܽܘܬ̥ܳܐ ܕܰܒّܰܒܳܢ̈ܰܝܕ̥ܰܢ، ܒܽܗ̄ܘ ܡܰܕ̥ܒܪܳܐ ܗ̄ܘܰܐ، ܐܟ̥ ܕܽܗ̄ܘ ܦܽܘܩܕܳܢܳܐ ܕܰܗ̄ܘܳܐ ܕ݄ܫܓ̥ܺܝܠ ܥܰܡ ܡܽܘܫܶܐ ܕܣ݄ܡ ܠܶܗ ܒܺܗ̄ܝ ܨܽܘܪܬܳܐ ܕܡܰܚܘܶܐ ܠܶܗ ܠܶܗ. 45ܘܶܐܠܶܗ ܠܽܗ̄ܘ ܡܰܫܟܢܰܢܳܐ، ܗ̄ܰܒّܰܒܳܢ̈ܰܝܕ̥ܰܢ ܥܰܡ ܝܶܫܽܘܥ (ܐܰܒܪܶܗ ܕܢܽܘܢ) ܡܰܥܒܰܪّܶܗ ܠܺܗ̄ܝ ܐܰܪܥܳܐ ܕܗܽܒ̥ ܠܰܗ ܠّܶܗ ܐܰܠܳܗܳܐ ܝܳܪܬ̥ܽܘܬ̥ܳܐ ܡܰܢ̱ ܥّܰܡ̈ܶܐ ܗܰܢ݄ܟ ܕ݄ܫܕܶܐ ܠܶܗ ܡܶܢ̱ ܩܽܘܕ̱ܡܰܝّܶܗ. (ܘܽܗ̄ܘ ܡܰܫܟܢܳܐ) ܡܰܛܺܝ ܗܳܠ ܠܰܝّܰܘܡ̈ܶܐ ܕܕܰܘܺܝܕ̥، 46ܗܰܘܳܐ ܕ݄ܚܙܶܐ ܠܶܗ ܪ̈ܰܚܡܶܐ ܩ݄ܕ̱ܡ ܐܰܠܳܗܳܐ، ܘܰܐܒ݄ܥ ܕܚܳܙܶܐ ܡܰܫܟܢܳܐ ܠܰܐܠܳܗܳܐ ܕܝܰܥܩܽܘܒ، 47ܘ݄ܫܠܶܝܡܳܘܢ ܒܢܶܐ ܠܶܗ ܠܶܗ ܒܰܝܬܳܐ. 48ܐܰܠܳܗܳܐ ܡܪܰܝܡܳܐ ܠܳܐ ܝܰܬܽܒ̥ (ܒܒܰܝܬܳܐ) ܕܣܺܝܡ ܒܺܐܝܕ̥̈ܳܬ̥ܳܐ، ܐܟ̥ ܕܐܡ݄ܪ ܠܶܗ ܗ̄ܽܘ ܢܒܺܝܳܐ: 49’ܡܳܪܝܳܐ ܟܳܐܡ݄ܪ: ܗ̄ܺܝ ܫܡܰܝܳܐ ܗ̄ܽܘ ܟܽܘܪܣܝܰܝܕ̥ܺܝ ܝܳܐ، ܘܺܗ̄ܝ ܐܰܪܥܳܐ ܗ̄ܺܝ ܕܝܰܫܬܳܐ ܕܪ̈ܰܓ̥ܠܳܬ̥ܺܝ ܝܳܐ، ܐܰܝܢܰܐ ܝܳܐ ܗ̄ܽܘ ܒܰܝܬܳܐ ܕ݄ܓܒܳܢܺܝܬܽܘ ܠܺܝ؟ ܘܰܐܝܢܰܐ ܝܳܐ ܗ̄ܽܘ ܐܰܬ̥ܪܳܐ ܕܡ݄ܬ̥ܢܰܚ ܐ̱ܢܳܐ ܐܶܒܶܗ؟ 50ܠܳܐ ܟܰܐܠܰܗ ܐܺܝܕ̥ܺܝ ܣ݄ܡ ܠܰܗ ܗܰܢܺܝ ܟܽܘܠّܶܗ؟‘
51”ܝܰܐ ܩܫܶܐ ܩܕ̥ܳܠܳܐ ܘ݄ܕܠܰܝ̱ܬ ܢܶܝ ܓܙܺܝܪ̈ܶܐ (ܡܛܰܗܪ̈ܶܐ) ܒܠܶܒܰܝّܶܗ ܘܒܽܗ̄ܘ ܫܡܳܥܰܬّܶܗ، ܗܰܬܽܘ ܒܟܽܘܠ ܙܰܒܢܳܐ ܡܩܰܒ݄ܠ ܕܪܽܘܚܳܐ ܕܩܽܘܕܫܳܐ ܟܳܩܰܝܡܺܝܬܽܘ، ܐܟ̥ ܕܰܒّܰܒܳܢ̈ܰܬ̥ܟ̥ܽܘ ܗܰܬܽܘ ܣܬܶܝ ܗܰܘܟ̥ܰܐ! 52ܠܰܐܝܢܰܐ ܡܰܗ̄ܢ ܢܒܺܝ̈ܶܐ، ܗܰܢ݄ܟ ܕܡܶܢ̱ ܡܶܩ݄ܕ̱ܡ ܡܰܚܘܰܠّܶܗ ܥܰܠ ܗ̄ܽܘ ܡܰܐܬ̥ܝܳܐ ܕܽܗ̄ܘ ܙܰܕܺܝܩܳܐ (ܡܫܺܝܚܳܐ) ܕܰܒّܰܒܳܢ̈ܰܬ̥ܟ̥ܽܘ ܠܳܐ ܛܪܺܝܕ݄̥ܢّܶܗ ܘ݄ܩܛܺܝܠ݄ܢّܶܗ؟ ܗܰܘܳܐ ܕܗܰܬܽܘ ܡܰܫܠܰܡܟ̥ܽܘ ܘ݄ܩܛ݄ܠܟ̥ܽܘ. 53ܘܡܰܩܒܰܠܟ̥ܽܘ ܗ̄ܽܘ ܢܳܡܽܘܣܳܐ ܒܽܗ̄ܘ ܦܽܘܩܕܳܢܳܐ ܕܰܡّܰܠܰܐܟ̥̈ܶܐ، ܘܠܳܐ ܢܛ݄ܪܟ̥ܽܘ.“
ܪܓܳܡܳܐ ܕܶܐܣܛܶܦܰܢܳܘܣ
54ܘܺܗ̄ܝ ܢܰܩܠܐ ܕܗܰܢܺܝ ܫܰܡܺܝܥܺܝ، ܡܠ݄ܢ ܪܽܘܓ̥ܙܳܐ ܒܢܰܦܫ̈ܰܝّܶܗ ܘܓܳܢܨܺܝ ܗ̄ܘܰܘ̱ ܥܰܪ̈ܫܳܢܰܝّܶܗ ܐܰܥܠܶܗ. 55ܘܗܺܝّܶܗ (ܐܶܣܛܶܦܰܢܳܘܣ) ܡܠܶܐ ܗ̄ܘܰܐ ܗܰܝܡܳܢܽܘܬ̥ܳܐ ܘܪܽܘܚܳܐ ܕܩܽܘܕܫܳܐ، ܚ݄ܪ ܠܶܗ ܒܺܗ̄ܝ ܫܡܰܝܳܐ ܘ݄ܚܙܶܐ ܠܶܗ ܗ̄ܺܝ ܬܶܫܒܽܘܚܬܳܐ ܕܰܐܠܳܗܳܐ ܘܝܶܫܽܘܥ ܩܺܝܡܳܐ ܡܽܗ̄ܘ ܝܰܡܺܝܢܳܐ ܕܰܐܠܳܗܳܐ. 56ܘܐܡ݄ܪ ܠܶܗ: ”ܟܰܐܠܺܝ ܟܚܳܙܶܐ ܐ̱ܢܳܐ ܗ̄ܰܫܡܰܝ̈ܶܐ ܦܬܺܝܚ̈ܶܐ ܘܰܐܒܪܶܗ ܕܢܳܫܳܐ ܩܺܝܡܳܐ ܡܽܗ̄ܘ ܝܰܡܺܝܢܳܐ ܕܰܐܠܳܗܳܐ.“ 57ܘܡܰܙܥܰܩّܶܗ ܒܩܳܠܳܐ ܥܶܠܳܝܳܐ، ܘ݄ܣܟ̥݄ܪّܶܗ ܐܰܕ̥̈ܢܳܬ̥ܰܝّܶܗ، ܘܟܽܘܠّܶܗ ܩܰܝܺܝܡܺܝ ܐܰܥܠܶܗ. 58ܘ݄ܙܒ݄ܛّܶܗ ܘܡܰܘܦܰܩّܶܗ ܠܰܪܒ̥ܰܠ ܡܺܗ̄ܝ ܡܕ̥ܺܝܢ̱ܬܳܐ ܘܪܳܓ̥ܡܺܝ ܗ̄ܘܰܝ ܠܶܗ. ܘܗܰܢܺܝ ܕ݄ܣܗ݄ܕّܶܗ ܐܰܥܠܶܗ ܡܰܚ݄ܬّܶܗ ܗ̄ܰܠܒܽܘܫ̈ܰܬّ̥ܶܗ ܩ݄ܕ̱ܡ ܪ̈ܰܓ̥ܠܶܐ ܕܚܰܕ̱ ܥܠܰܝܡܳܐ ܕ݄ܟܡ݄ܩܪܶܐ ܫܳܐܘܳܠ. 59ܘܪܳܓ̥ܡܺܝ ܗ̄ܘܰܝ ܠܶܗ ܠܶܐܣܛܶܦܰܢܳܘܣ، ܗܺܝّܶܗ ܡܨܰܠܶܐ ܗ̄ܘܰܐ ܘܳܐܡܰܪ ܗ̄ܘܰܐ: ”ܡܳܪܰܢ ܝܶܫܽܘܥ ܡܰܩܒ݄ܠ ܗ̄ܺܝ ܪܽܘܚܰܝܕ̥ܺܝ.“ 60ܘ݄ܒܪ݄ܟ ܠܶܗ ܘܡܰܙܥܰܩ ܠܶܗ ܒܩܳܠܳܐ ܥܶܠܳܝܳܐ ܘܐܡ݄ܪ ܠܶܗ: ”ܡܳܪܰܢ، ܠܳܐ ܚ݄ܫܒ̥ܰܬّܶܗ ܝܳܐ ܗܰܬ̥ܶܐ ܚܛܺܝܬ̥ܳܐ.“ ܘܗܺܝّܶܗ ܐܳܡܰܪ ܗ̄ܘܰܐ ܗܰܬ̥ܶܐ ܡܫܰܢܶܐ ܠܶܗ.
Currently Selected:
ܥܒܳܕ̥̈ܶܐ ܕܰܫܠܺܝܚ̈ܶܐ 7: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
