Matayo 23

Yesu kowalakila wafunda ndagizi na Mafalisayo

Maluko 12:38,39; Luka 11:43-46; 20:45,46

1Amala Yesu kadilongela bumbila da wanhu na waluko wake. 2Wafunda ndagizi za Musa wao wana udaho wa kufambula ndagizi za Musa. 3Kwaivo gogeni na kusang'hana jojose donda wawalongeleni. Mbali seke muwawinze ziwotenda kwavija hawosang'hana gaja gowawalongela mweye. 4Wao wofunga mbahasha zizamile na wowapika wanhu mmayega, mbali wao wenyego hawalonda kuwataza hata chidogo. 5Wao wosang'hana mbuli zao ili wanhu wawaone. Wovala vihande va mbende mvihanga vao na mmakono vili na mayandiko ga ndagizi na wokunza mhindo nhali mmakoti gao. 6Wolonda nyafasi za nhogolwa mzisona na vigoda va haulongozi Mzing'anda za kuiting'hanila Wayahudi, 7wolonda kulamusigwa kwa nhogolwa hawaikunzanya wanhu wengi na kulonda kukemigwa na wanhu, ‘Labi.’

8Mbali mweye hamlondeka kukemkemigwa “Labi,” Kwavija mweye mose mwa wajalusona wangu na mfundaji wenu imwe. 9Hebu seke mumkeme munhu yoyose hano muiisi ‘Tata,’ kwavija munayo Tata imwe tu kuulanga kwa Mulungu. 10Na sekemkemigwe ‘Vilongozi’ manake chilongozi wenu imwe iyo Kilisito. 11Yeli mkulu kumwenu kolondeka yawe mtumwa wenu. 12Yoitenda mkulu kotelemsigwa, na yoitenda mdodo kokwinuligwa.

Yesu kowalakila watenda giladi

Maluko 12:40; Luka 11:39-42,44,52; 20:47

13“Moluona wafunda ndagizi na Mafalisayo, watendagiladi! Muwakimila wanhu kwingila muufaume wa kuulanga kwa Mulungu. Mbali mweye wenyego hamwingila mng'anda, na hamlonda kuweng'ha nyafasi ya kwingila waja wolonda kwingila muufaume uo. 14Moluona wafunda ndagizi na Mafalisayo, watendagiladi! Muwaonela wagane kwa kuwasolela vinhu vao na kuilagusa kua mnoga kwa kupula Mulungu kwa chipindi chitali. Kwaivo mokwinukiligwa hakulu. 15“Moluona mweye wafunda ndagizi na Mafalisayo, mtendagiladi! Mohunganika mwibahali na muiisi ili mumpate munhu imwe yawinze nzila yenu. Na mwahampata momwagiza ng'hani na momtenda yasonge kwingila jehanamu kubita mweye wenyego. 16“Moluona walongozaji vipofu! Mweye molonga munhu yahailahila kwa ng'anda ya Mulungu, kulahila kwake iyo si chinhu, mbali yahailahila kwa zahabu ya ng'anda ya Mulungu kuilahila uko komwamha.’ 17Mweye vipofu wabozi! Dilihi dofaya ng'hani. Zahabu hebu ng'anda ya Mulungu iitenda zahabu kua ya Mulungu?

18Kaidi molonga munhu yayahailahila kwa chilemela si mbuli, mbali yaha ilahila kwa chija chikigwe hachanha hachilemela chakulavila nhambiko, lahilo ijo domwamha. 19Mweye vipofu! Chilihi chifaya ng'hani. Dija gweko hebu chilemela chitenda ijo gweko kua nang'hana? 20Yoilahila kwa chilemela koilahila kwa icho chilemela, na kwa chochose chikigwe baho, 21Na yoilahila kwa ng'anda ya Mulungu koilahila kwaiyo ng'anda ya Mulungu na kwaija Mulungu yokala umo mng'anda, 22Nayo yoilahila kwa ulanga kwa Mulungu koilahila mchigoda cha ulongozi wa Mulungu na kwaiyo Mulungu yakalile mchigoda icho. 23“Moluona mweye wafunda ndagizi na Mafalisayo, watendagiladi! Mowalihiza wanhu fungu dimwe mmafungu kumi ya vitu vidogo kama mbegu za mboga za mayani, binzali na ufuta, na kuno moleka mbuli zifaya za ndagizi kama vija, kutenda mbuli zitogoligwa na Mulungu na kua na bazi na kua na nhogola na kutogoligwa na Mulungu. Gano iyo galondeka kugamha bila kuisemwa gaja gamwenga. 24Vilongozi vipofu! Movabula ng'ozi kulawa chimng'wa, mbali momela kihongwe! 25“Moluona wafunda ndagizi za Musa na Mafalisayo mweye watendagiladi! Mosunha vikombe na bakuli kwa kunze, mbali mgati mleka kumema vinhu vumpatile kwa ubokaji na ugila. 26Mfalisayo chipofu! Tanhu chisunhe chikombe mgati na kunze kobung'huka ivija. 27“Moluona wafunda ndagizi za Musa na Mafalisayo mweye watendagiladi! Mkala kama makabuli gabakigwe chokaa gaja kwa kunze gooneka ganoga, mbali mgati imema mivuha ya mitufi na usisa wa chila aina. 28Ivija na mwenye mokoneka na wanhu kwa kunze mnoga, mbali mgati mmema giladi na malozo.

Kulamuligwa kokwiza

Luka 11:47-51

29“Moluona wafunda ndagizi za Musa na Mafalisayo, watendagiladi! Mozenga mapanga ga Walagusi wa Mulungu na kugahamba goya mapanga ga wanhu wanogile. 30Na molonga, ‘Kama cheye chahakalile muugima wa wavyele wetu chihalekile kuilumba nao kuwakoma Walagusi wa Mulungu! 31Ivo mogangamiza mweye wenyego kua, mweye mwana wa wanhu wawakomile Walagusi. 32Ena, komelezeni sang'hano ija wavele zenu waisongile! 33Mweye ulelo wa nyoka yeli na sumu! Modahaze kuubanga ulamuzi uja wa moto wa mazua gose galibule uhelelo? 34Iyo mana niye nowagalila walagusi wa Mulungu, wanhu weli na nzewele na ilimu, mowakoma na wamwenga kuwawamba mumsalaba, na wamwenga mowalibula viboko Mnzing'anda za kuiting'hanila Wahayudi na kuwazambwila mzikae. 35Ivo molamuligwa kwa mbuli ya kuwakoma wanhu wose wanogile muuisi mweye na wasaho zenu. Enaa, kulawa kukomigwa kwa Abeli yakalile kabule dihile, mbaka ija ya Zakalia mwana wa Balikia, ija mumkomile Muing'anda ya Mulungu kati ya hanang'hane na chilemela. 36Nowalongela kweli, ulelo uno wolamuligwa kwa mbuli zino.

Yesu kana wende na kae ya Yelusalemu

Luka 13:34,35

37“Yelusalemu! Gweye Yusalemu! Kowakoma walagusi wa Mulungu na kuwatoa mabwe waja watumigwe kumwako. Mala nyingahi nigeza kuwakunzanya wanago kumwangu, kama vija nguku vookunza vinzia mzimbawa zake, mbali kulema. 38Ivo, kae yako yolekigwa uchiwa. 39Nokulongela, honda mnione kaidi mbaka wahalonga,

‘Yeng'higwe ganogile ga Mulungu iyo yokwiza kwa zina da Mndewa.’”

Currently Selected:

Matayo 23: KBV

Highlight

Copy