Matayo 19

Mafundo kwambuli ya Nyasa

Maluko 10:1-12

1Yesu viyakomeleze kulonga mbuli izo, kahalawa Galilaya kaita muiisi ya Yudea, umwambu mwa Lwanda lwa Yoludani. 2Wanhu wengi wamuwinza uko nayo kawahonya. 3Mafalisayo wamwenga wamuwinza, wamuuza kwa kumgeza, “Ivo yofaa mulume kumwasa mwehe wake kwa mbuli yoyose ija?” 4Yesu kawedika kawalongela, “Ivo hamsomile mayandiko ga Mulungu kua Mulungu viyamulumbile munhu baho umwaka kamulumba mulume na muke? 5Kalonga, ‘Kwambuli iyo mulume komleka tata yake na mami yake, kuilumba na mwehe wake, nao waidi wokua lukuli lumwe?’ 6Kwa ivo, wao sio waidi mbali lukuli lumwe. Ivo chiyalumbile Mulungu, munhu sekeyawagole.” 7Mbali wao wamuuza, “Ivo habali Musa kachilagiza muke yeng'higwe balua ya nyasa na yalekigwe?” 8Yesu kawedika, “Musa kaweng'ha chibali cha kuwasa wehe zenu kwa mbuli udala wa mioyo yenu, mbali haikalile ivo baho haichanduso. 9Ivo nowalongeleni, yeye yomwasa mwehe wake kwambuli imwenga yoyose ija ila kwa mbuli ya ugoni, yahasola mwehe imwenga kotenda ugoni.” 10Waluko wake wamlongela, “Yahawa mbuli za mulume na mwehe ivo zili, yofaya kuleka kusola.” 11Yesu kawalongela, “Sio wose wodaha kutogola hala dino, ila tu waja weng'higwe mbuli iyo na Mulungu. 12Kwa vija hana mbuli nyingi za kuleka kusola. Wamwenga kwavija waleligwa wabule nguvu za chilume, na wamwenga kwa vija watendigwa ivo na wanhu, na wamwenga walamula kuleka kusola kwa mbuli ya ufaume wa Mulungu. Yodaha kutogola fundo dino na atende ivo.”

Yesu kowapulila ganogile kwa Mulungu wana wadodo

Maluko 10:13-16; Luka 18:15-17

13Amala wanhu wamgalila Yesu wana wadodo ila yawekile mikono na kuwapulila. Mbali waluko wawakimila. 14Yesu kalonga, “Walekeni wao wana weze kumwangu hebu sekemuwakimile, manake ufaume wa Kuulanga kwa Mulungu ni wa wanhu weli kama wana wano.” 15Ivo Yesu kawapulila ganogile ga Mulungu, amala kasegela hanu haja.

Mbwanga mzenzi

Maluko 10:17-31; Luka 18:18-30

16Munhu imwe mzenzi kamuwinza Yesu kamuuza, “Mfundaji, nh'ende choni chinogile ili mhate ugima ulibule uhelelo?” 17Yesu kamlongela, “Habali koniuza kwa mbuli ya dinogile? Hana munhu imwe tu yanogile. Wahalonda kwingila muugima ulibule uhelelo goga ndagizi za Mulungu.”

18Ija mbwanga mzenzi kamuuza, “Ndagizi zilihi?” Yesu kalonga, “Sekeukome, Sekeutende ugoni, Sekewibe, Seke ulonge uvwizi, 19Wategeleze tata yako na mami yako na mwing'he wende miyago kama vuuwigesa mwenyego.”

20Ija mbwanga kamlongela, “Gago gose nigagoga, nh'ende choni chimwenga?” 21Yesu kamlongela, “Kama uhalonda kutogoligwa ng'hani na Mulungu, genda ukagule vinhu vako uweng'he vikumbi muyega sente izo, na gweye kokua na usigavu Kuulanga kwa Mulungu amala izo uniwinze.” 22Mbwanga iyo viyahulike gago, kasegela yeli na giogio, kwa vija kakala na uzenzi mkulu ng'hani.

23Baho Yesu kawalongela waluko wake, “Nowalongeleni kweli yokua vidala ng'hani kwa mzenzi kwingila muu Ufaume wa Mulungu. 24Kaidi nowalongeleni, ibuha ng'hani kwa mnyama ngamia kwingila mdizonzo da sindano, kubita mzenzi kwingila muufaume wa Mulungu.”

25Waluko waja viwahulike ivo, wakanganya ng'hani, wamuuza, “Ivo yelihi yodaha kuloholigwa?” 26Yesu kawalola kalonga, “Kwa wanhu mbuli ino haidahika, mbali kwa Mulungu mbuli zose zodahika.”

27Amala Petulo kalonga, “Na cheye vilihi? Chileka vose chikuwinza, ivo chopata choni?” 28Yesu kawalongela, “Nowalongela kweli, Mwana wa Munhu yahakala mchigoda chake cha ufaume muukulu wa isi ya sambi, mweye moniwinza na kukala mvigoda kumi na vidi mogalamula makabila kumi na maidi ga Izilaeli. 29Na chila yalekila ng'anda hebu ndugu hebu lumbu hebu tata hebu mama hebu wana hebu migunda, kwa mbuli yangu kobokela mala mia na kubita, na kubokela ugima ulibule uhelelo. 30Mbali walongole wokua wa chikomelezo na wachikomelezo wolongola.

Currently Selected:

Matayo 19: KBV

Highlight

Copy