Sang’hano za Wasenga 2

Muhe wa Mulungu kawahulumukila wamtogole Yesu.

1Vidivikile zua da Pentekoste, wose wamtogole Yesu wakala waikunzanye hanhu hamwe. 2Bahaja dizi kama mbumo mkulu wa beho ulawa kuulanga kwa Mulungu uimemeza ng'anda yose iwakalile. 3Labaho vilawilila vinhu vioneke kama ng'humbi da moto, viigolie na kuwakalila uchanha mwa chila munhu. 4Wose walongozigwa na Muhe wa Mulungu, wasonga kulonga ulonzi umwenga si wao kama Muhe wa Mulungu viyawadahize. 5Uko Yelusalemu wakala Wayahudi womfugamila Mulungu, wolawa chila hanhu muiisi. 6Chila munhu kawahulika bumbila da wamtogole Kilisito. Wose wasinhuka kuwahulika wolonga kwa ulonzi wake mwenyego. 7Wazaganyika na kukanganya kuno woiuza, “Ivo, wano wose ichiwahulika sio wenekae wa Galilaya! 8Yokuwaze chila munhu mmwetu kowahulika viyolonga chaukae? 9Wamwenga mmwetu wolawila isi ya Pati na wa Medi na wa Elamu na wamwenga wenekae wa Mesopotamia, Uyahudi na Kapadokia na Ponto na Asia. 10Wamwenga wolawila Fuligia na Pamfulia na Misili na isi za Libia behi na Kilene, na nyambenyambe kulawa Lumi, 11Wayahudi na wanhu watogole dini ya Kiyahudi, wamwenga walawa isi ya Kilete isi izungulukigwe na mazi na Alabia. Cheye chose chohulika viwolonga mbuli ng'hulu kwa ulonzi wetu wenyego.” 12Wanhu wose wakanganya na kuzaganyika kuno woiuza, “Mbuli zino manake choni?” 13Mbali wamwenga wawazeha wolonga, “Wanhu wano wakoligwa divai ya sambi!”

Petulo kowalongela wanhu

14Baho Petulo kema haulongozi ha waja watumigwa kumi na imwe kasonga kuwaligulila wanhu kwa dizi kulu, “Wayahudi wayangu na mweye mose wenekae wa hano Yelusalemu, nhegelezeni goya mbuli zangu. 15Wanhu wano hawakoligwe ka vumgesa, kwavija sambi ni saa nhatu imitondo. 16Mbali ino ni mbuli iyalongile Yoeli mlagusi wa Mulungu.

17Mndewa kalonga, ‘Mdizua da uhelelo

nowatilila wanhu wose Muhe wangu

wanenu wachike na wachilume wokwiza kulava ulagusi

wabwanga wenu woona maloleso,

na wavele wenu wolota nzozi.

18Enaa, hata watumigwa wangu wa chike na wachilume

nowatilila Muhe wangu mdizua ijo

nao wazilongelela mbuli zangu.

19Nosang'hana uzonza uchanha kwa Mulungu

na vilaguso muiisi

hokua na damu na moto na yosi dizamile

20Zua dogeligwa ziza

na mwezi wokua mdung'hu kama damu

Zua dija kulu na ukulu wa Mndewa dokua ding'hali hadinavika.

21Baho yoyose yonda kupula kwazina da Mndewa koloholigwa.’

22“Wanhu wa Izilaeli tegelezeni mbuli zino! Yesu wa Nazaleti yakalile na udaho wake uwo uoneka kweli kwanzila ya mujiza na uzonza na vilaguso vija Mulungu yavisang'hane mmwenu kubitila Yesu kama vumanyile. 23Kulawa haumwanduso Mulungu mwenyego kalonda Yesu yagogigwe na mweye na mweye mumkoma kwa kuwaleka wanhu wehile wamuwambe mumsalaba. 24Labaho Mulungu kamzilibula na kamsegezela usungu wa ifa kwavija havidahike ifa imuhume. 25Kwavija Daudi kalonga kwambuli ya Yesu,

‘Nimuona Mndewa Mulungu mala zose, nayo kabehi na nie kwa kunhaza, ivo sidumba chinhu.

26Kwaivo, moyo wangu udeng'helela na nhoa ng'henze kwa ndeng'helelo

na ivija lukuli lwangu nao

wokwiza kuilegeha mditamanilo,

27kwavija gweye Mulungu huuleka muhe wangu kwa wanhu wafile, hebu humleka mtumigwa wako mtogoligwa yaole kudipanga.

28Kunilagusila nzila ya kunilongoza muugima,

kokwiza nimemeza ndeng'helo kwavija kwa habehi na niye'

29Mbwiga zangu, nolonda kuwalongeleni hazelu kabisa mbuli zija zimpatile Daudi, wasao wetu. Yeye kadanganika na kawandigwa na panga jake da bahano mbaka vino sambi. 30Ila kwavija Daudi kakala mlagusi, na kavimanya kua Mulungu kamlalika kwa kuilahila kua yahamwikile imwe mwa ulelo wake yawe mfaume kama viyawile yeye. 31Daudi kaiona umwaka mbuli ino ing'hali hainalawilila, ivo kalonga kwa mbuli ya uzilibuko wa Kilisito haja viyalongile,

halekigwe kudipanga

hebu lukuli lwake hauonile kwa wanhu wafile.

32Mulungu iyo yamzilibule ino Yesu na cheye chose chiiona mbuli iyo. 33Yesu kenuligwa kuita kuulanga kwa Mulungu, yadahe kulongoza hamwe na Mulungu na keng'higwa Muhe wa Mulungu kama Tata viyamlalike. Ivija Yesu kaching'ha Muhe wa Mulungu na chino icho mchihulika na kuchiona. 34Daudi mwenyego hasoligwe kuita kuulanga kwa Mulungu,

mbali kalonga Mndewa Mulungu kamlongela Mndewa wangu

kala ubanzi wangu wa kulume,

35mbaka hondanitende uwalongoze wahasanyi wako.’

36“Waizilaeli wose wavimanye kua ino iyo kweli Yesu imumuwambile mumsalaba iyo ija Mulungu yamtendile kua Mndewa na Kilisito!” 37Baho, wanhu viwahulike ivo, walumila mmoyo wamuuza Petulo na waja watumigwa wamwenga, “Ndugu zetu sambi chitendeze?”

38Petulo kawedika, “Galongeni na kugaleka malozo genu na chila munhu yabatizigwe kwa zina da Yesu Kilisito, na Mulungu kowalekesela malozo genu na kubokela ija nhunza ya Muhe wa Mulungu. 39Kwavija, laliko dino ni kwambuli yenu na wanenu na wose wokala kutali na waja wose wonda wakemigwe na Mndewa Mulungu wetu.” 40Kwa mbuli zimwenga nyingi Petulo kagangamiza na kuwashwangiza wanhu kuno kolonga, “Iloholeni kulawa muulelo uno wa ubananzi!” 41Wengi wazitogola mbuli zake na kubatizigwa, zua ijo wanhu kama elufu nhatu wongezeka mwa waja wamtogole Yesu. 42Wano wose wagendelela kufundigwa na watumigwa wa Yesu na wakala hamwe kama ndugu na waja hamwe na kumpula Mulungu.

Viwokala waja wamtogole Kilisito

43Watumigwa wa Mulungu wakala wosang'hana vilaguso na miujiza mingi na wanhu wose wakala wokanganya ng'hani na kumwing'ha nhogolwa Mulungu. 44Waja wose wamtogole Kilisito wagendelela kuwa chinhu chimwe na wakala woigolela vinhu vao. 45Wokala wovigula vinhu vao na chila chinhu chiweli nacho, amala waigolela sente chila munhu vija viyalondile. 46Wagendelela kuiting'hana hamwe mazua gose hai ng'anda ya Mulungu na chipindi cha ndia waiting'hana mzing'anda zao, kuno woja ndia kwa ndeng'helelo kwa moyo mzelu, 47Wamwing'ha Mulungu nhogolwa na wawatogola, chila zua Mndewa kakala yowongezela wanhu wakalile woloholigwa.

Currently Selected:

Sang’hano za Wasenga 2: KBV

Highlight

Copy