Sang’hano za Wasenga 10

Petulo na Kolinelio

1Kukala na munhu imwe uko Kaisalea yokemigwa Kolinelio, munhu iyo kakala mkulu wa chikosi cha wamilizi chikemigwe, “Chikosi cha Kaisalia.” 2Iyo na wanhu wa ukae yake wakala womtegeleza Mulungu. Kakala yompula Mulungu mazua gose na kuwataza ng'hani vikumbi muyega. 3Zua dimwe kama saa tisa chigulogulo, kaona maloleso, kamuona mtumigwa wa kwa Mulungu kulawa kuulanga, yomuwinza na kumkema, “Kolinelio!” 4Kolinelio kambunhulila meso kuno yodumba kalonga, “Gomkulu kuna choni?”

Iyo mtumigwa wa kwa Mulungu kamlongela, “Mulungu katogola pulo jako na kaona nhosa zako kwa vikumbi muyega, kadi hazisemwa mazua gose. 5Sambi, walagize wanhu waite Yafa wakamkeme munhu imwe zina jake Simoni hebu yokemigwa Petulo. 6Iyo kokala ukae kwa Simoni msang'hanaji wa vinhu va mbende, iyo ng'anda yake yabehi na bahali.” 7Iyo mtumigwa wa kwa Mulungu yakalile yolonga nayo viyasegele, Kolinelio kawakema watumigwa wake waidi hamwe na mmilizi imwe yomtegeleza Mulungu, ija yakalile imwe mwa watazi wake yakalile mmilizi wake wa behi ng'hani. 8Kolinelio kawalongela mbuli zose zilawilile amala kawalagiza waite Yafa.

9Igolo yake saa sita imisi wanhu wao viwakalile mmabehi na kae ya Yafa imisi Petulo kakwela kuchanha kudilingo kupula. 10Viyakalile yopula kaona nzala kalonda yapate ndia. Ndia viikalile yokwambikigwa kaona maloleso. 11Kaona ulanga ugubuligwa na chinhu kama golole kulu chohulumusigwa chihawa chigogigwa mhindo zose nne. 12Mgati yake kukala na aina zose za wanyama wakalile na magulu mane na wotambala na ndege. 13Amala kahulika dizi,”Petulo ima na uchinje uje!” 14Petulo kalonga, “Habule Mndewa, sinakuja chinhu chochose mwiko hebu ndia imtenda munhu seke yatogoligwe kumfugamila Mulungu.”

15Kaihulika kaidi dizi, “Chinhu chija Mulungu chiyalongile chodaha kujigwa, seke ulonge kua mwiko kujigwa.” 16Mbuli iyo ilawilila mala nhatu amala golole dija dibwelezigwa kuulanga.

17Petulo viyakalile yan'li koiuza, maloleso gago manake choni, waja wanhu watumigwe na Kolinelio, viwakalile waimanya ng'anda ya Simoni wavika haulwivi. 18Watoa hodi wauza, “Ivo, hano hana nyambenyambe yokemigwa Simoni Petulo?”

19Petulo viyakalile yang'hali yotonga kwambuli ya gaja maloleso Muhe wa Mulungu kamulongela, “Simoni, hano hana wanhu wadatu wokuzambwila. 20“Hulumuka na uite nao bila kuiuza, kwavija nie iyo niwalagize.” 21Baho, Petulo kahulumuka na kuwalongela waja wanhu, “Nie iyo munizambwila. Habali mwiza?”

22Wanhu waja wamwidikila, “Chilagizigwa na Kolinelio,” ija mkulu wa wemilizi. “Iyo munhu mtendagoya yomtegeleza Mulungu, na Wayahudi wose womtegeleza. Iyo kalagizigwa na mtumigwa wa kwa Mulungu yakugoneke ukae yake ili yategeleze gaja gonda umlongele.” 23Petulo kawalongela wengile mng'anda na kawen' hakuwasa.

Igolo yake kasegela hamwe nao, kuno woilongoza na ndugu wamwenga womtogola Kilisito kulawa Yafa. 24Zua da kaidi wavika Kaisalia na uko Kolinelio kakala yowabeta hamwe na ndugu zake na mbwiga zake. 25Petulo viyakalile yokwingila, Kolinelio kalawa kunze kumbokela, kamfugamila mavindi na kuidulika hasi kwa kumtogola. 26Mbali Petulo kamwinula na kumulongela, “Ima, nie ivija na munhu tu.” 27Petulo kagendelela kulongelela na Kolinelilo kuno wokwingila mng'anda muja yawavikile wanhu wengi waikunzanye.” 28Petulo kawalongela, “Mweye mvimanya kabisa kua ndagizi yetu Wayahudi yochigoma kuilumba na munhu ija heli Muyahudi hebu kuita kumtembelela. Mbali Mulungu kanilongela seke nimgese munhu yoyose kua hatogoligwa nayo hebu hanang'hane. 29Ivo, vumnikemile niza bila kuiuza, sambi nonda nivimanye habali mng'hema?” 30Kolinelio kalonga, “Saa kama zino mazua madatu kabitile ng'hala nopula mng'anda yangu ikala kama saa tisa chigulogulo. Bahaja munhu yavalile vivalo vizelu chwee! Kanimila haulongozi hangu 31na kalonga, ‘Kolinelio! Mulungu kahulika kupula kwako na nhosa ziuweng'ha vikumbi muyenga Mulungu hazisemwile. 32Walagize wanhu waite Yofa kwa munhu yokemigwa Simon kwazina dimwenga kokemigwa Petulo. Iyo yeli muing'anda ya Simoni msang'hana vinhu va mbende, yokala behi na bahali.’ 33Kwaivo nilopola kulagizila wanhu wakukeme, na kutenda goya kwiza. Sambi chose cha hano haulongozi wa Mulungu, kutegeleza chochose chija Mndewa chiyakulagiza kulonga.”

Petulo kolonga na wanhu

34Baho Petulo kasonga kulonga, “Sambi nivimanya kabisa kua kweli Mulungu habagula na komsang'hala chila munhu kuilinga na imwenga. 35Munhu wa isi yoyose yomtegeleza Mulungu na kusang'hana gaja galondigwa nayo, iyo kobokeligwa na Mulungu. 36Mweye moumanya uja usenga Mulungu yaugalile kwa wanhu wa Izilaeli, uligula Usenga Unogile ugala utindiwala kubitila Yesu Kilisito yeli Mndewa wa wose. 37Mweye mvimavya gaja gose galawilile muiisi yose ya Wayahudi kusoga Galilaya, Yohana viyasongile kuligula mbuli ya kubatiza. 38Mummanya Yesu wa Nazaleti na vija Mulungu viyamsagule na kumwaing'ha Muhe wake na udaho. Kakala yogenda chila hanhu yosang'hana ganogile na kuwahonya wanhu wose waoneligwe na Mwenembago, kwavija Mulungu kakala hamwe nayo. 39Cheye chigaona gago gose gayasang'hane muiisi ya Yudea na muikae ya Yelusalemu. Wamkoma na kumuwamba mumsalaba. 40Ila Mulungu kamzilibula zua da kadatu, amala kamtenda yaoneke na wanhu, 41haoneke kwa chila munhu, mbali kwa waja tu wasaguligwe na Mulungu wamuone nao iyo cheye chisaguligwe kuja na kung'wa hamwe nayo viyazilibuke. 42Kachilagiza kuuligula Usenga Unogile kwa wanhu wose na kuwalongela gaja gachionile kua Yesu iyo yasaguligwe na Mulungu yawe mlamuzi wa wagima na wafile. 43Walagusi wose wa Mulungu walongelela kwambuli yake kua chila munhu yomtogola, kolekeseligwa malozo gake gose kwa zina jake.

Wanhu wa isi zimwenga wobokela Muhe wa Mulungu

44Chipindi Petulo viyakalile yogendelela kulonga mbuli izo, Muhe wa Mulungu kawezila wose wakalile wotegeleza usenga uo. 45Waja Wayahudi wamtogole Kilisito wezile hamwe na Petulo kulawa Yofa wakanganya kuona kua Mulungu kaweng'ha nhunza ya Muhe wake wanhu wa isi zimwenga. 46Wavimanya ivo kwavija wawahulika wolonga kwa ulonzi umwenga wa nhogolwa kwa Mulungu. Baho Petulo kalonga, 47“Wanhu wano wambokela Muhe wa Mulungu kama cheye wenyego vichimbokele. Ivo, hana munhu yoyose yodaha kuwakimila wanhu wano sekewabatizigwe kwa mazi?” 48Baho kalagiza wanhu wabatizigwe kwa zina da Yesu Kilisito. Amala wanhu waja wampula Petulo yakale nao kwa mazua madodo.

Currently Selected:

Sang’hano za Wasenga 10: KBV

Highlight

Copy