1 Wakolinto 1

1Niye Paulo ija nikemigwe na Mulungu kama viyalondile niwe msenga wa Kilisito Yesu, hano na hamwe na Sositenesi ija mtogola Kilisito mietu.

2Nowandikila mweye bumbila da wamtogola Kilisito mli uko Kolinto, mweye muilumbile hamwe na Kilisito Yesu na kuwakema kua wanhu wake, mkemigwa kua wanhu wa Mulungu, hamwe na wanhu wose hohose womfugamila Mndewa Yesu Kilisito yeli Mndewa wao na Mndewa wetu.

3Nowapulileni unovu wa Mulungu na utindiwala kulawa Mulungu Tata yetu na Mndewa wetu Yesu Kilisito ukale na mweye mose.

Paulo komwing'ha hewela Mulungu

4Mazua gose nomwing'ha hewela Mulungu wangu kwa mbuli yenu kwa unovu yoweng'hani mweye kubitila Yesu Kilisito. 5Kwa kuilumba na Kilisito mwing'higwa chila chinhu, hamwe na kulanga chila chinhu chija Mulungu chiyalonda uchilonge, na kukimanya chila chinhu chija Mulungu chiyalonda uchimanye. 6Ino yolagusa kua usenga wa Yesu Kilisito uchiwaligulile ni waukweli 7sambi hamuhungukiligwe kubokela dinogile da Mulungu jojose, kuno mobeta kubwela kwake Mndewa wetu Yesu Kilisito. 8Nayo kokwiza kugendelela kuwagela moyo kumsang'hanila Mndewa na habule yolonda yawalamule kua mbananga mbaka zua dija da uhelelo Mndewa wetu Yesu Kilisito vondayabwele. 9Mulungu mazua gose kosang'hana chija chiyalalike kusang'hana, iyo yawakemile mweye muwe na ubwiga na Mwanage, Yesu Kilisito Mndewa wetu.

Kuigola kwa bumbila da wamtogole Kilisito

10Mbwiga zangu, nowapuleni kwa udaho wa Mndewa wetu Yesu Kilisito. Muitegeleze kwa chila mbuli zimlonga na seke muihasanye mgati yenu, muitogolele na kwa zija zimtonga na zija zimgesa. 11Wamtogole Kilisito wayangu, mbuli nizipatile kulawa kwa wanhu wamwenga wa kae ya Kuloe, zolagusa hazelu kua hamuilumba goya mmwenu. 12Ima niike goya mbuli ino. Chila munhu mmwenu kolonga jake. Imwe kolonga, “Niye nomuwinza na kumtogola Paulo,” imwenga, “Niye nomuwinza na kumtogola Apolo,” imwenga kolonga, “Niye nomuwinza na kumtogola Kefa,” na imwenga kolonga, “Niye nomuwinza na kumtogola Kilisito.” 13Ivo, Kilisito kaigola mmabumbila? Ivo, Paulo iyo yawambigwe kwa mbuli yenu? Hebu ivo mbatizigwa ili muwe wajalusona wa Paulo? 14Nomwing'ha hewela Mulungu kua simbatize munhu yoyose mmwenu mbali niwabatiza Kilisipo na Gayo waiyeka. 15Baho habule munhu yonda yalonge kabatizigwa ili yawe mjalusona wangu.

16Enaa, nibatiza lukolo lwa Sitefana, mbali sivimanya kama nibatiza munhu imwenga kaidi. 17Kilisito haning'ile sang'hano da kubatiza wanhu, ila kaning'ha sang'hano da kuligula Usenga Unogile, bila kutumanila ugalu wanhu viwalonga, nihasang'hana ivo ili udaho wa ifa ya Yesu mumsalaba seke ioneka yabule chinhu.

Udaho wa Kilisito na nzewele ya Mulungu

18Mafundo kwa mbuli ya msalaba gooneka ubozi kwa waja woita kwaga, mbali kumwetu cheye chiloholigwa ni udaho wa Mulungu. 19Mayandiko ga Mulungu gandikigwa,

“Nokwiza kuzibananga nzewele zao za weli na nzewele

na chowasa kutali umanyi wa weli na ilimu.”

20Kakulihi yeli na nzewele? Kakulihi iyo mfunda ndagizi? Nayo kakulihi Galu wa kuibishila? Mulungu kaitenda nzewele ya wanhu wa isi kua ubozi.

21Mulungu kana nzewele, wanhu hawadaha kummanya Mulungu kwa kubitila nzewele zao wenyego. Badili yake Mulungu katumila usenga wa Yesu Kilisito kuwalohola wanhu, uja uwoneka kua ni ubozi kwa wamwenga, mbali waja woutogola usenga uwo woloholigwa. 22Wayahudi wolonda chilaguso ili watogole na Wayunani wolonda nzewele ili watogole, 23mbali cheye chomligula Kilisito yawambigwe mumsalaba. Kwa Wayahudi mbuli ino ng'walo, na kwa Wayunani ni ubozi, 24mbali kwa Wayahudi hebu kwa Wayunani wasaguligwe na Mulungu, Kilisito yawambigwe muumsaba ni udaho wa Mulungu na nzewele ya Mulungu. 25Chija chioneka na wanhu kuwa ni ubozi wa Mulungu, china ulamuzi unogile kubita nzewele ya chiunhu, na chija chioneka kuwa ni uzidilwa wa Mulungu, china udaho kubita ludabwa lwa chiunhu.

26Mbwiga zangu, sekemuisemwe chipindi chimkemigwe. Chiunhu wanhu watonga kua wengi wenu mkalabule nzewele. Wengi wakalabule ludabwa hebu kuwa wanhu weli na ukulu. 27Iyo kulonga, Mulungu kagasagula gaja gawayaona wanhu wa isi kua ni ubozi, ili yawagele chinyala weli na nzewele, na kagasagula gaja gawaona wanhu wa isi kua ni uzidilwa ili yawagele chinyala weli na ludabwa. 28Mulungu kawasagula vikumbimuyega waja wozehigwa, ili yawalaguse kua wanhu waja wooneka kua wanhu goya muiisi hawafaya, kasang'hana ivo ili munhu yoyose yaleke kuigoda kwa Mulungu. 29Baho habule munhu yodaha kuigodela chochose ha Mulungu. 30Mulungu mwenyego iyo yawadahize kuilumba na Kilisito Yesu. Mulungu kamtenda Kilisito yawe nzewele yetu. Kubitila iyo cheye chotogoligwa na Mulungu, chokua wanhu wake Mulungu na kukomboligwa. 31Baho, kama Mayandiko ga Mulungu vigandikigwe, “Iyo yolonda kuigoda na yaigodele sang'hano ya Mndewa iyasang'hane.

Currently Selected:

1 Wakolinto 1: KBV

Highlight

Copy

Compare