Alumi 5
5
Kʉtula nɨkihʉmbashʉya ni Itunda
1Kʉnsoko kagombeka kʉng'wi Itunda kʉkɨɨla ʉhʉɨɨli, ʉgwa kʉkete matiliga kʉng'wi Itunda kʉkɨɨla Isekʉlʉ witʉ Kilisito. 2Kʉkɨɨla kʉhʉɨɨla kʉng'witʉ kʉng'wa Yesʉ, Itunda ʉkʉpee ʉkende wakwe. Itungo ɨlɨ kʉlongolekile kishiɨ mʉʉkende wakwe. Kiloile ikʉlʉ, kʉnsoko kʉsʉmbɨɨye kɨna kʉkamantana ni Itunda mʉʉkʉlʉ lakwe. 3Shanga yayo du, ingɨ ga nʉkʉlowa mʉlwago kʉzekʉlɨngile kɨna ʉlwago lɨsasha kiʉmɨɨlya, 4wiʉmɨɨlyi wɨsasha ʉkamatɨku, nʉ ʉkamatɨku wɨsasha ʉsʉmbɨɨlyi. 5Ʉsʉmbɨɨlyi witʉ shanga ʉkʉʉkatapya kʉnsoko Itunda wakondilye kʉʉletela ʉlowa wakwe mʉnkolo yitʉ, kʉkɨɨla a Ng'wahʉ Ng'welu nʉwazile.
6Naɨkʉkɨlɨ kʉlemilwe kiguna, itungo lang'wa Kilisito, naɨlapika, wɨkasha kʉnsoko itʉ nɨkɨanya mɨlandʉ. 7Ingɨ, ikaku mʉntʉ kʉsha kʉnsoko amʉntʉ nʉkete ntendo nza, kwala bahu mʉntʉ washe kʉnsoko amʉntʉ nʉwankolo nza. 8Ingɨ Itunda wakondilye kʉkamɨnkɨɨlya kɨna ʉkʉloilwe ikʉlʉ, kʉnsoko apo naɨkʉkɨlɨ kɨanyamɨlandʉ, Kilisito Yesʉ aʉkule kʉnsoko itʉ. 9Kʉnsoko itungo ɨlɨ kagombilwe ni Itunda kʉkɨɨla sakami ang'wa Kilisito, ingɨ yigeelekile kɨna ʉhumile kʉʉguna mikʉo lang'wi Itunda! 10Kʉnsoko naɨ kɨalʉgʉ ang'wi Itunda, Itunda aɨkʉsakilye kʉkamɨnkane nʉyo kʉkɨɨla nsha a Ng'waakwe, itɨɨ anga kʉkamɨnkanigwe shanga kʉ ʉgunwa kʉnsoko Itunda mʉpanga. 11Hangɨ shanga yayo du, ingɨ nʉkiloa kʉng'wi Itunda kʉnsoko ang'wa Kilisito Yesʉ, nɨ kʉkɨɨla kʉng'wakwe kʉgombwe ni Itunda.
Adamu nʉ Kilisito
12Kʉlʉlo gwa, kʉkɨɨla mʉntʉ ʉng'wɨ mʉlandʉ aɨwingɨe mʉantʉ ɨhi mʉʉnkumbigʉlʉ, nɨnsha ɨkasakigwa kʉ antʉ ɨhi. Kʉlʉlo ɨnsha ɨkaapikɨɨla antʉ ɨhi, kʉnsoko ɨhi itʉmile mʉlandʉ. 13Kʉnsoko naɨkʉtilɨ malagɨɨlyo ang'wa Musa, mɨlandʉ aɨmolɨ mʉʉnkumbigʉlʉ, ingɨ kʉnsoko aɨkʉtilɨ anga malagɨɨlyo, mɨlandʉ shanga ɨaligwa. 14Nɨitɨ ga, kʉpuma matungo ang'wa Adamu kʉpikɨɨla matungo ang'wa Musa, ɨnsha aɨkolɨ kʉ antʉ ɨhi nɨshanga atendile mʉlandʉ anga Adamu naɨ ʉmʉhitile Itunda. Adamu aɨwimpyanigwe nʉ Kilisito naɨʉzɨɨza. 15Ingɨ mʉlandʉ wang'wa Adamu shanga lɨhumile kimpyanigwa nʉ ʉkende wang'wi Itunda. Kʉnsoko, palʉng'wɨ nʉkʉtula mʉlandʉ nʉwa mʉntʉ ʉng'wɨ aɨsakilye nsha mʉ antʉ ɨhi, kʉ ʉza wamʉntʉ ʉng'wɨ, ingɨ ʉ Kilisito, Itunda waongeeye antʉ ɨhi ʉkende wakwe ni ipegwa yakwe. 16Ikolɨ nsuta mʉ ipegwa yang'wi Itunda nʉ mʉlandʉ nʉa mʉntʉ ʉyo nʉng'wɨ. Kʉnsoko, igazo nɨla mʉntʉ ʉng'wɨ, Itunda wɨkalamʉla kʉpɨsɨɨlya, ingɨ antʉ ɨdʉ naɨ agaza, Itunda wɨkaapa kɨpegwa ka kʉalekela mɨlandʉ. 17Ɨtai, anga ɨze kʉkɨɨla mʉlandʉ nʉa mʉntʉ ʉng'wɨ, antʉ ɨkandya kʉsha nsoko amʉntʉ yʉyo nʉʉng'wɨ, ɨhi nɨakʉsɨngɨɨlya ʉkende nʉwanso nʉwang'wɨ Itunda akʉpegwa kɨpegwa kakwe mʉ ʉaligwi waahʉɨɨli, akʉtema mʉʉpanga kʉ nzɨla amʉntʉ yʉyo nʉʉng'wɨ, ʉ Kilisito Yesʉ.
18Kʉlʉlo, igazo la mʉntʉ ʉng'wɨ lɨkaletelya ʉpɨsɨɨligwi kʉ antʉ ɨhi naɨitʉmile mɨlandʉ, ʉʉgwa nʉʉza nʉwa mʉntʉ ʉng'wɨ kileta ʉhʉɨɨli nʉ ʉpanga kʉ antʉ ɨhi. 19Hangɨ kʉnsoko igazo nɨla mʉntʉ ʉng'wɨ antʉ idʉ ɨkingɨla mʉmɨlandʉ, ʉʉgwa nʉkʉkɨɨla kʉ mʉntʉ ʉng'wɨ ʉkʉkʉtenda antʉ ɨdʉ agombwe ni Itunda.
20Malagɨɨlyo naɨiletilwe ɨkasasha kongeeleka mɨlandʉ, nɨmɨlandʉ naɨongeeleka, ʉkende wang'wi Itunda ʉkongeeleka nangalu. 21Anga ʉ mʉlandʉ naɨ ʉkete ntendo nza nʉkʉsasha nsha, nʉ ʉkende wang'wi Itunda ga ʉkʉsasha antʉ ɨdʉ agombwe ni Itunda nʉkʉaletela ʉpanga nʉwa kalɨ na kalɨ kʉkɨɨla Kilisito Yesʉ Isekʉlʉ witʉ.
The New Testament in Isanzu @The Word for The World International and Isanzu Language translation. All rights reserved