Alumi 1
1
1Ʉnene Paʉlo mitʉmi wang'wa Kilisito Yesʉ, nɨ nɨmitʉmi nɨ niholanigwe nʉ kitangwa kʉnsoko akʉtanantya Nkani Nza niyang'wi Itunda.
2Pakalɨ Itunda naɨʉatambʉɨe ɨantʉ kɨna ʉkʉapa Nkani Nza kʉkɨɨla amanga akwe, anga nɨyandɨkilwe Mʉwandɨkwa wakwe. 3Impola izi Ninza yimʉganʉe Ng'wana wang'wi Itunda, Isekʉlʉ witʉ ʉ Yesʉ Kilisito, mʉkɨʉntʉ kakwe aɨʉtugɨwe miele lang'wa Daudi, 4ingɨ kʉ ʉhumi nʉwa Ng'wahʉ Ng'welʉ yʉyʉ naɨ ʉkumʉʉwe kɨna ng'wenso Ng'wana wang'wi Itunda naɨ wiʉkigwe, ingɨ Kilisito Isekʉlʉ witʉ. 5Kʉkɨɨla Kilisito nʉwanso, ʉnene mpewe ʉkendepwa kʉtula mitʉmi nʉwa kʉitanga antʉ nɨshanga Ayahudi ahume kʉhʉɨɨla nʉ kʉkela. 6Mʉantʉ nɨanso nʉ nyenye ga mʉkolɨ, mitangilwe mʉtule mɨantʉ akwe ʉ Kilisito Yesʉ mʉkola.
7Kʉitɨ gwa, nʉmʉandɨkɨe mɨhi nɨmʉkolɨ kʉ Loma, kɨna Itunda nʉmʉloilwe nangaluu, wɨkamʉhola mʉtule mɨantʉ akwe.
Kʉmʉlompa Itunda Tata witʉ ni Isekʉlʉ witu Kilisito wamʉpe ʉnyenye ʉkende nɨ matiliga.
Malompi nɨ malʉmbɨɨlyo kʉng'wi Itunda
8Ng'wandyo lʉkʉlʉ, nʉmʉlʉmbɨɨye Itunda kʉkɨɨla Kilisito, kʉnsoko kʉhʉɨɨla kʉng'wanyu yakumʉka mahɨɨ ɨhi. 9Itunda ʉyʉ nɨkʉmitʉmɨla kʉnkolo ane ɨhɨ nɨ kʉtanantya Nkani Nza niya Ng'waakwe. Ingɨ ng'wenso ʉine nʉ kʉlɨnga kɨna nʉmʉkɨmbʉkile matungo ɨhi mʉ malompi ane. 10Kʉmʉlompa Itunda anga walowe, kʉmpa lyoma niza nɨlakɨza kʉng'wanyu. 11Kʉnsoko nsʉmbɨɨye nangalu nʉmʉone nihume kʉmʉaɨɨlya mʉlije ɨpegwa niya kɨnkolo mʉkamatɨke mʉ ʉhʉɨɨli wanyu. 12Ingɨ anga kʉtule palʉng'wɨ ʉnene nʉ nyenye kikomelye ɨnkolo kʉ mʉhʉɨɨla Isekʉlʉ witʉ ʉ Kilisito.
13Anyandʉgʉ ane ndoilwe mʉlɨnge kɨna nkʉa yɨdʉ aɨnɨkenda hiya kʉmiʉmbaʉmbɨla, ingɨ itungo ɨlɨ nkɨlɨ ngiɨigwe. Nihume kʉatanantɨlya antʉ amʉhʉɨɨle ʉ Kilisito anga nɨtanantilye kʉ antʉ a mahɨɨ mangɨza. 14Ʉnene ntakɨwe kʉatanantɨlya antʉ a mahɨɨ ɨhi Ayunani nawa nɨshanga Ayunani, antʉ nɨakete mahala ang'wɨ nɨagila mahala, kʉ antʉ nɨasomile ang'wɨ nɨshanga asomile. 15Yɨyo nsoko ndoilwe kʉmʉtanantɨlya Impola Ninza ʉnyenye nɨmʉkolɨ kʉ Lumi.
Yikolɨ ngulu mʉ Mpola Ninza
16Ʉnene shanga kʉhung'wa minyala kʉtanantya Nkani Nza, kʉnsoko Nkani Nza ingɨ ʉhumi wang'wi Itunda nʉɨleta ʉguni kʉ antʉ ɨhi nɨakʉhʉɨɨla ʉ Yesʉ, kandɨɨlya Ayahudi sʉnga antʉ nɨshanga Ayahudi. 17Kʉnsoko Nkani Nza ilagɨɨe kɨna Itunda ʉloilwe antʉ atule ingɨ ahume kʉgombeka pang'waakwe, lʉkani ʉlʉ litʉng'wa kʉhʉɨɨli kandɨɨlya ʉng'wandyo sʉnga nitungo ɨlɨ. Yandɨkilwe kɨna, “Mʉntʉ nʉkʉmʉhʉɨɨla ʉkishiɨ kʉ ʉhʉɨɨli.”
Magazo a antʉ
18Kʉpuma kilunde Itunda ʉatakɨɨe antʉ ɨhi kʉnsoko aʉpɨlʉki nʉ ʉbɨ wɨhi nʉwa antʉ, kʉkɨɨla nzɨla yao nɨmbɨ nɨɨgilya nkani niyatai ileke kʉkumʉka. 19Kʉnsoko, makani ɨhi nang'wi Itunda aɨkilwe kɨhenga kʉng'wao. 20Kʉnsoko kʉpuma Itunda naɨʉtundile ihɨɨ, ʉhumi wakwe nʉwa kalɨ na akalɨ nʉ ʉpuumo wakwe ʉng'wenso kʉtula Itunda, palʉng'wɨ nʉkʉtula igeelekile kɨhenga wɨzelɨngwa kʉpumɨɨla kʉ ayo nʉwitʉmile ingɨ ana antʉ azeleng'wa kilongola. 21Antʉ awa palʉng'wɨ nʉkʉtula alɨngile kɨna Itunda ʉkolɨ, ingɨ shanga ɨmʉpaa ʉkʉlʉ mʉitakɨwe, hangɨ shanga ɨmʉsongelya. Shanga ɨsɨga nɨiza, apʉngʉtae nɨ mahalao ʉpʉngʉ ʉtilɨ. 22Isania kɨna akete mahala, kʉnʉ shanga alɨngile anga kɨntʉ, 23apeile kipolya kʉng'wi Itunda nʉwishiɨ kalɨ na kalɨ, kɨmɨkɨɨli kakwe akipolya kʉ adʉdʉ nɨimpyani nɨantʉ niisha, niikalɨ ni nyʉnyi ang'wi ikalɨ niyagula.
24Kʉnsoko yɨyo Itunda ʉalekile atyate kitʉma ʉbɨ mʉaloewe mʉ nkolo yao nʉkitendeela makani amɨnyala mʉmɨɨliao. 25Akʉkaɨla tai ang'wi Itunda ʉtule ʉteele, akʉiye nʉkʉsania iʉmbwa nʉkʉmʉleka Itunda nʉʉmbile, ʉyo nʉwɨkʉligwa ɨkalɨ kalɨ! Tai ituleʉ.
26Kʉlʉlo Itunda wɨkaaleka atyate nsula nɨmbɨɨ. Sʉnga asʉngʉ ɨkakaɨla kʉtʉmɨla mɨɨlɨ kʉ agohaao, ɨkatula kitɨna enso. 27Nɨitʉnja ga, alekile ʉtʉmɨli nʉwa mɨɨlɨ anga naɨaʉmbilwe kʉasʉngʉ, nɨenso ɨkatula kitɨna enso. Itʉnja akitendeela makani amɨnyala, akʉlija ʉpɨsɨɨligwa mʉ likalo lao kʉnsoko antendo yao nimbɨ.
28Kʉnsoko antu aɨahitile kʉmʉlɨnga Itunda, ingɨ Itunda wɨkaaleka atyate masɨgoao naʉlimɨli, ɨkituma makani nɨshanga anonee kitʉma. 29Izʉe mpyani yɨhi niyaʉbɨ, ʉsambo, ʉbɨɨ, wikapi nʉ ʉlaku nʉ kʉpantɨka nsao niyawii. Izʉe wɨlu nʉ ʉbʉlagi nʉ ʉgali, ʉkongelani nɨ masɨgo nɨmabɨɨ antʉ awa ategetani, 30hangɨ akinyɨli, ingɨ antu akʉbɨpɨlwa ni Itunda, abehʉli, ɨlʉgoha, nʉwilolyi, amankata akʉtenda nɨmabɨɨ, hangɨ agila lwijo kʉ aleliao, 31apʉngʉ, shanga ɨheja malapo nɨilapɨe, agilanga ʉkende agila ga nɨkɨaisa kʉ antʉ nɨangɨza. 32Palʉng'wɨ nʉkʉtula amalɨngile ɨmalagɨɨlyo atai nang'wi Itunda kɨna antʉ nɨitʉma intendo anga niyanso atakɨwe ashe. Kʉkɨla nanso ʉdu, shanga kɨna akitʉma makani nanso enso akola, ingɨ ga nʉkʉalʉmbɨɨlya awo nɨakitʉma makani nanso.
The New Testament in Isanzu @The Word for The World International and Isanzu Language translation. All rights reserved