Maliko 10
10
Yesʉ ʉkʉʉtambʉla ʉwileki
Matayo 19:1-12; Lʉka 16:18
1Sʉnga ʉ Yesʉi akahega kʉ Kapelenaʉmu, akaputa ʉmongo nʉwa Yolodani akenda kʉ Yʉdea. Milʉndo nʉwa antʉ akamʉhanga hangɨ, akaamanyisa anga naɨwizɨɨe.
2Itɨ gwa, Apalisayo ang’wɨ akamʉhanga ʉ Yesʉi, akamʉkolya azemʉgema, “Itɨɨ, mʉmalagɨɨlyo itʉ igombigwe ne mʉgoha kʉmʉleka mʉkɨmakwe?”
3Yesʉ akaasʉkɨɨlya, “Itɨɨ, Musa aɨ ʉmʉlagɨɨlyo ntʉnɨ?”
4Nɨenso akalʉnga, “Musa aɨʉgombilye kɨna mʉgoha ʉhumile kʉmʉandɨkɨla mʉkɨmakwe itʉtʉ nɨla wileki.”
5Yesʉ akaaɨla, “Musa aɨ ʉmʉandɨkɨe ilagɨɨlyo nɨlanso kʉnsoko shanga mɨambaa inkani nɨ mʉkʉmanyisigwa. 6Ingɨ puma kʉtundwa kʉ ʉnkumbigʉlʉ Itunda aɨ ʉmʉʉmbile mitʉnja nʉ mʉsʉngʉ. 7Itɨ gwa mʉgoha ʉkʉmʉleka ihe nʉ nyinya, ʉkʉkamɨnkana nʉ mʉkɨmakwe, 8nɨenso nɨabɨɨlɨ akʉtula mʉɨlɨ ʉng’wɨ. kʉlʉlo, shanga abɨɨlɨ hangɨ ingɨ mʉɨlɨ ʉng’wɨ. 9Itɨ gwa, Itunda nʉkɨkamantanilye, mʉntʉ waleke kʉkɨtemanʉla.”
10Naɨingɨla hangɨ mʉnyʉmba, amanyisigwa akamʉkolya ikani nɨlawileki. 11Yesʉ akaaɨla, “Mʉgoha nʉkʉmʉleka mʉkɨmakwe watɨne mʉkɨma mʉngɨza, ʉkʉgoolya kʉmʉkɨmakwe. 12Mʉkɨma nʉkileka nʉmʉgohakwe nʉkʉtɨnwa nʉmʉgoha mʉngɨɨza ʉkʉgoolya kʉmʉgohakwe.
Yesʉ ʉkʉakembeta ang’enya nɨaniino
Matayo 19:13-15; Lʉka 18:15-17
13Antʉ aɨ aatwae ang’enya nɨaniino kʉng’wa Yesʉ waaɨkɨɨllye mɨkono wahume kʉakembeta, amanyisigwa akwe akaapatya.
14Naɨwaona itɨ ʉ Yesʉi, akabɨpɨlwa akaaɨla, “Aleki ang’enya nɨanso aze kʉng’wane, leki kʉagilyi, ʉtemi wang’wi Itunda ingɨ waantʉ nɨhanga ang’enya nɨaniino awa itɨ. 15Kʉmʉɨla ɨtai, mʉntʉ wɨhi nʉkʉhita kʉʉsɨngɨɨlya ʉtemi wang’wi Itunda anga ʉhʉɨɨli nʉwa mʉng’enya nʉmʉniino shanga ʉkingɨla mʉng’wanso.” 16Sʉnga Yesʉ akaahola ang’enya nɨaniino, akaaʉngatɨla, aka aɨkɨɨlya mɨkono, aka akembeta.
Mʉntʉ nɨ mʉgolɨ
Matayo 19:16-30; Lʉka 18:18-30
17Yesʉ naɨwandya ʉmʉhinzo wakwe, mʉntʉ ʉng’wɨ akamʉmankɨɨla, akenda pantongela akwe akatugama, akamʉkolya, “Mʉmanyisi nʉmʉza, ntendeʉlɨ mpantɨke ʉpanga nʉwa kalɨ na kalɨ?”
18Yesʉ akamʉkolya, “Nɨkɨ ʉkʉnitanga nɨmʉza? Kʉtilɨ nʉmʉza ingɨ Itunda du. 19Yesʉ akalongoleka kʉmʉɨla ʉlɨngɨlene ɨmalagɨɨlyo ang’wa Musa, ‘Leka kʉgoolya, Leka kʉbʉlaga, Leka kia, Leka kʉkʉɨɨla ʉteele, Leka kʉlongopa, Akʉlye tataako nʉ iyaako.’”
20Nʉng’wenso akamʉsʉkɨɨlya, “Mʉmanyisi kʉpuma mʉʉhʉmba wane nɨmatyatile malagiilyo aya ɨhi.”
21Yesʉ akamʉgoza, akamʉlowa, akamʉɨla, “Ʉkepewe kɨntʉ kɨng’wɨ. Longola ʉgʉlye maintʉ ako ɨhi nʉkete, ʉape ɨaʉla mpia nɨyanso, nʉewe ʉkʉtula nɨnsaɨlo kigʉlʉ, sʉnga ʉpembye ʉntyate.” 22Mʉntu ʉyʉ naɨ waɨlwa itɨ, akaalɨka mʉnkolo akwe, akalongola nʉʉkɨɨa, kʉnsoko aɨʉkete nsao yɨdʉ.
23Yesʉ akagoza kʉnʉ nɨ kʉnʉ, akaatambʉɨla amanyisigwa akwe, “Kɨnyaʉlɨ nɨikakʉ agolɨ kingɨla mʉʉtemi wang’wi Itunda!”
24Amanyisigwa akwe akakʉɨlwa inkani yakwe. Yesʉ akaaɨla hangɨ, “Ahʉmba ɨane ingɨ ikakʉ nangaluu mʉntʉ kingɨla mʉʉtemi wang’wi Itunda! 25Ingɨ itotu kɨkalɨ nɨkitangwaa ngamia kʉhepela mʉnzʉʉnki a sindano kʉkɨla mʉntʉ nɨ mʉgolɨ kingɨla mʉʉtemi wang’wi Itunda.
26Amanyisigwa akwe akakʉɨlwa nangalu akikolya, “Nyenyu gwa, nʉhumile kʉgunɨka?”
27Yesʉ akaagozeela amanyisigwa akwe, akaaɨla, “Kʉantʉ shanga ihumɨkile, kʉng’wi Itunda shanga ʉ, kʉng’wi Itunda maintʉ ɨhi ahumɨkile.”
28Petelo akamʉkolya, “Itɨɨ, ʉsese kʉlekile maintʉ itʉ ɨhi kakʉtyata?”
29Yesʉ akalʉnga, “Kʉmʉɨla ɨtai, mʉntʉ wɨhi nʉlekile ito ang’wɨ heu ang’wɨ mʉluna nʉwa kɨsʉngʉ ang’wɨ ihe ang’wɨ nyinya ang’wɨ ana ang’wɨ mɨgʉnda kʉnsoko ane ni Nkani Nza, 30ʉkʉlija maintʉ idʉ kʉkɨlɨnkɨɨla anga, nyʉmba, aheu, nɨalʉna nɨakɨsʉngʉ, nʉnyinya nɨana nɨmɨgʉnda, nʉlwago, nɨ matungo nazile akʉsɨngɨɨlya ʉpanga nʉwa kalɨ na kalɨ. 31Ingɨ nɨatongee akʉtula akʉsɨkɨɨlya nawa nɨasɨkɨɨye akʉtula atongee.”
Yesʉ ʉkʉtambʉla nsha nʉ wiʉki wakwe nkʉa akataatu
Matayo 20:17-19; Lʉka 18:31-34
32Itɨ gwa, Yesʉ akaatonga naɨakole mʉnzɨla alongoe kʉ Yelusalemu, Yesʉ aɨʉatongee. Amanyisigwa akatula nʉ woa, nɨantʉ naɨ alondoe akatula nʉ woa. Yesʉ akaakoma amanyisigwa ao nɨ kʉmi nabɨɨlɨ, akatula atambʉɨla makani nakʉmʉhanga. 33Yesʉ akaaɨla, “Tegeelyi! Kʉlongoe kʉ Yelusalemu, kʉng’wanso ʉnene Ng’waa Mʉntʉ kʉɨkwa mʉmɨkono apolyi nɨakʉlʉ nɨamanyisi amalagɨɨlyo ang’wa Musa, nɨenso akʉmpɨsɨɨlya kʉmbʉlaga nʉkʉntwala kʉ antʉ nɨ shanga Ayahudi, 34Nɨenso akʉndalaha, akʉntyɨla matɨ. akʉnkʉa namɨsheleti nʉkʉmbʉlaga. Ingɨ mʉlʉhikʉ nʉla kataatʉ kiʉka.”
Yakobo nʉ Yohana akʉmʉlompa Yesʉ ʉkʉlʉ
Matayo 20:20-28
35Ana ang’wa Zebedayo, ʉ Yakobo nʉ Yohana, akamʉhanga ʉ Yesʉi akamʉɨla, “Mʉmanyisi, kɨkolɨ kɨntʉ kʉʉkʉlompa ʉkʉtendeele.”
36Yesʉ akaakolya, “Itɨɨ, mʉloilwe nʉmʉtendeele ntʉnɨ?”
37Akamʉsʉkɨɨlya, “Nʉɨkikiɨ mituntu lako nʉlaʉkʉlʉ nikʉlyo, ʉkʉgombye kikiɨ nʉewe ʉng’wɨ ipande lako nɨla kɨgoha nʉmʉya ipande lako nɨla nkɨgɨ.”
38Yesʉ akaaɨla, “Shanga mʉlɨngɨle nɨmʉkʉkɨlompa! Itɨɨ, mʉhumilene kʉgimya kagigwa anga nɨzeagigwa ʉnene, ang’wɨ kʉbʉlagwa anga nɨzebʉlagwa ʉnene?”
39Akamʉsʉkɨɨlya, “Kuhumile.”
Yesʉ wɨkaaɨla, “Tai mʉkagigwa anga nene, ang’wɨ mʉkʉbʉlagwa anga nene. 40Ingɨ ʉlʉ nʉla kikiɨ ʉng’wɨ ipande la kɨgoha ang’wɨ ipande la nkɨgɨ lyoma nɨlanso shanga nene kʉʉnoneelya. Itunda ʉkʉapa awo nʉwanoneleeye.”
41Amanyisigwa nɨangɨɨza awo ni ikʉmi naɨigule nanso, akaatakɨɨla ɨa Yohana nʉ Yakobo. 42Itɨ gwa,Yesʉ akaitanga ɨhi palʉng’wɨ, akaatambʉɨla, “Mʉlɨngɨle kɨna awa nɨasɨgɨɨwe atemi aantʉ nɨshanga Ayahudi ɨatema ɨantʉ ao kʉngulu, hangɨ akʉlʉ nɨanso ɨonyeelya ɨantʉ ao. 43Ingɨ ʉnyenye ileke kʉtula itɨ, mʉntʉ wɨhi nʉloilwe kʉtula mʉkʉlʉ anyu, ʉtakɨwe watule mitʉmi wanyu. 44Nʉloilwe kʉtʉla mʉtongeeli, ʉtakɨwe watule mitʉmi wa antʉ ɨhi. 45Kʉlʉnga itɨ kʉnsoko nʉnene Ng’waa Mʉntʉ shanga aɨ nzilitʉmɨlwa, ingɨ kʉitʉmɨla, nʉkʉpumya ʉpanga wakwe kʉtula kɨkomoli ka antʉ ɨdʉ.”
Yesʉ ʉkʉmʉkomya mʉpokʉ nʉitangwa Batimayo
Matayo 20:29-34; Lʉka 18:35-43
46Sʉnga naɨ akapika kʉ Yeliko, nʉ Yesʉi nɨamanyisigwa akwe palʉng’wɨ nʉ milʉndo waantʉ naɨ ʉkʉhega mʉkɨsalɨ nɨkanso aze ine, mʉpoku nʉitangwa Batimayo, aɨ wikiɨ mʉmpelo ipanda wazilompeelya maintʉ. 47Naɨ wija kɨna Yesʉ mʉnya kʉ Nazaleti ʉkɨile pang’wanso, akandya kitʉnta, “Ʉewe Yesʉ, Ng’wana nʉwa ndʉgʉ a ʉtemi wang’wa Daudi, mbaisɨɨlye!”
48Antʉ ɨdʉ akamʉkenela kʉnsoko wakilage, ingɨ nʉwanso akalongoleka kitʉnta, “Ʉewe Yesʉ, Ng’wana nʉwa ndʉgʉ a ʉtemi wang’wa Daudi, mbaisɨɨlye!”
49Yesʉ akimɨka, akalʉnga, “Mʉɨli waze.”
Itɨ gwa akamitanga ʉmʉpokʉ nʉwanso, akamʉɨla, “Komya ɨnkolo! Imɨke, ʉkʉitanga.”
50Nʉng’wenso akimɨka akagʉma itugalo lakwe, akaputa, akamʉhanga ʉ Yesʉi.
51Yesʉ akamʉkolya, “Ʉkʉhiya ntʉni?” Mʉpokʉ nʉwanso akamʉsʉkɨɨlya,
“Mʉmanyisi, kʉlompa kʉona.”
52Yesʉ akamʉɨla, “Longola, kʉhʉɨɨla kʉng’wako wakomigwa.”
Papo paapo mʉpokʉ nʉwanso akandya kʉona, akamʉtyata ʉ Yesʉi.
Currently Selected:
Maliko 10: IBV
Highlight
Share
Copy
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved
