Matayo 19

Yesʉ ʉkʉmanyisa makani awileki nʉwa mʉgoha nʉ mʉkɨma

Maliko 10:1-12

1Yesʉ naɨwakondya kʉligitya inkani nɨanso, wɨkahega kʉ Galilaya, wɨkalongola kʉ kɨsalɨ Yʉdea, itʉmbɨ nɨla mongo nʉwa Yolodani. 2Antʉ ɨdʉ ɨkamʉtyata kʉko, nʉyo wɨkaakomya.

3Apalisayo ang'wɨao ɨkamʉhanga amʉgeme, ɨkamʉkolya, “Itɨɨ, inoneene mʉgoha kʉmʉleka mʉsʉngʉ wakwe kʉnsoko ɨhi?”

4Yesʉ wɨkasʉkɨɨlya, “Itɨɨ, shanga mʉsomilene Nkani yang'wi Itunda kɨna kʉpʉma ʉng'wandyo naɨʉkʉʉmba, aɨʉʉmbile mitʉnja nʉ mʉsʉngʉ? 5Nʉyo wɨkalʉnga, ‘Yɨyɨ nsoko mitʉnja ʉkʉmʉleka ihe nʉ nyinya, akʉkamɨnkana nʉ mʉsʉngʉ wakwe, ɨhi mʉʉbɨɨlɨ akʉtʉla imʉili ʉng'wɨ.’ 6Kʉɨtɨ, awa nɨabɨɨlɨ akʉtʉla mʉili ʉng'wɨ shanga ɨabɨɨlɨ. Ʉʉgwa ɨkɨ Itunda nʉkamɨnkanilye, mʉntʉ wɨhi waleke kʉkɨtemanʉla”

7Nɨanso ingɨ ɨkamʉkolya, “Niki gwa, Mʉsa aɨʉkʉlagiiye kʉmʉtemela mʉsʉngʉ wakwe itʉtʉ nɨla kileka?”

8Yesʉ wɨkaaɨla, ʉ Mʉsa aɨʉmʉɨɨe mʉhʉmile kileka nɨasʉngʉ anyʉ kʉnsoko aʉkakʉ wanyu nɨshanga mɨamba nɨmʉkʉmanyisigwa, ingɨ kʉpʉma ʉng'wandyo aɨkʉtilɨ. 9Ʉnene kʉmʉɨla, mʉntʉ wɨhi nʉkʉmʉleka ʉmʉsʉngʉ wakwe kʉnsoko aʉgoolya nʉyo wamʉtine mʉsʉngʉ mʉngɨza, ʉkʉtula ʉkʉgoolya. Nʉyʉ nʉkʉmʉtɨna mʉsʉngʉ ʉyʉ nʉlekilwe nʉyo ga ʉkʉtula wagoolya.”

10Amanyisigwa akwe ɨkamʉila, angaɨze makani amitʉnja nʉ mʉsʉngʉ ɨlɨitɨ, ingɨ bahʉ mʉntʉ waleke kʉtina,”

11Yesʉ wɨkaaɨla, “Shanga antʉ ɨhi nɨahʉmile kʉgomba, ihʉmikile kʉantʉ awa Itunda nʉapee ikani nɨlanso. 12Kʉnsoko ikolɨ inkwaatya yidʉ niyakʉleka kʉtina, Nɨang'wɨ kʉnsoko atʉgilweʉʉ, nɨang'wɨ atendeewe nɨantʉ, nɨang'wɨ alamʉe aleke kʉtina kʉnsoko aʉtemi nʉwa kigʉlʉ. Nʉhʉmile kʉamba ʉmanyisigwa ʉwʉ nʉwaambe.

Yesʉ ʉkʉakembeta ang'enya nɨaniino

Maliko 10:13-16; Lʉka 18:15-17

13Sʉnga antʉ ɨkamʉletela ʉ Yesʉ ang'enya nɨaniino waakembeta nʉkʉalompeela. Ingɨ amanyisigwa ang'wa Yesʉ ɨkaagilya. 14Yesʉ wɨkaaɨla, “Aleki ang'enya nɨaniino aze kʉng'wane, leki kʉagilyi, kʉnsoko Ʉtemi nʉa kigʉlʉ ingɨ waantʉ nʉwininompya anga ang'enya awa.”

15Ʉgwa, Yesʉ wɨkaakembeta, sʉnga wɨkahega pang'wanso.

Mʉhʉmba nɨmʉgolɨ

Maliko 10:17-31; Lʉka 18:18-30

16Mʉntʉ ʉng'wɨ aɨʉmʉhangile ʉ Yesʉ, wɨkamʉkolya, “Mʉmanyisi nɨmʉkende, nitʉme kɨntʉ kɨɨ nɨkɨza nihʉme kʉlija ʉpanga nʉwa mahikʉ ɨhi nɨmagila anga mpelo?”

17Yesʉ wɨkamʉɨla “Nɨkɨ ʉkʉnintanga nɨmʉkende? Kʉtilɨ nɨmʉkende ingɨ ʉng'wɨdu Itunda wing'wene. Ingɨ ang'wɨ ʉloilwe kʉlija ʉpanga nʉ wamahikʉ ɨhi nɨmagila mpelo, amba ɨmalagiilyo ang'wi Itunda.”

18Mʉntʉ nʉwanso wɨkamʉkolya, “Malagɨɨlyo naʉli ʉloilwe nɨmaambe?”

Yesʉ wɨkamʉsʉkɨɨlya, “Leka kʉbʉlaga, Leka kʉgoolya, Leka kɨa, Leka kʉtambʉla ʉteele, 19Mʉkʉlye tataako nʉ iyaako, hangi, Mʉlowe mɨako anga nʉwiloilwe ʉewe.” 20Mʉhʉmba nʉwanso wɨkamʉɨla “Malagɨɨlyo nanso ɨhi nɨmakomaniiye, itɨɨ, nkɨlɨ mpee kɨntʉ kɨɨ?” 21Yesʉ wɨkamʉɨla “Ang'wɨ ʉloilwe kʉtula wɨmʉkende, longola ʉgʉlye insao yako yɨhi nʉkete, ʉape ahimbɨ mpia niyanso, sʉnga wɨze ʉntyate, nʉewe ʉkʉtʉla wiɨkɨlya kɨʉto kako kigʉlʉ.” 22Mʉhʉmba nʉwanso naɨwɨja itɨ, wɨkalongola waze ʉhʉkilye, kʉnsoko aɨʉkete nsao yɨdʉ. 23Yesʉ wɨkaaɨla amanyisigwa akwe, “Kʉmʉɨla ɨtai yɨkʉtula ikaku kʉagolɨ kingɨla mʉʉtemi nʉwakigʉlʉ. 24Kʉmʉɨla hangɨ, ingɨ yɨhumɨkile kɨkalɨ nɨkitangwa ngamɨa kʉkɨɨla mibolomyo nɨla sindano, kʉkɨla ʉmʉgolɨ kingɨla kʉʉtemi wakigʉlʉ.”

25Amanyisigwa akwe nɨenso naɨgʉlye nanso ɨkakʉɨlwa nangalʉ, ɨkamʉkolya, “Itɨɨ, nyenyʉ gwa nʉhʉmile kʉgʉnɨka?”

26Yesʉ wɨkaakendegeela, wɨkaaɨla, “Kʉantʉ ɨkani ɨlɨ shanga lɨhʉmikile, ingɨ kʉng'wɨ Itunda makani ɨhi ahumɨkile.”

27Sʉnga Petelo wɨkamʉɨla “Kaʉsese gwa? Nɨkʉlekile maintʉ ɨhi kakʉtyata wewe; kʉʉpantɨka ntʉni?

28Yesʉ wɨkaaɨla, “Kʉmʉtambʉila ɨtai, apo Ng'wana wa mʉntʉ nʉkikiɨ mituntu nɨla ʉtemi nɨlɨkʉmɨlɨgɨnta mʉʉnkʉmbigʉlʉ nʉʉpya, nʉnyenye naɨmʉntyatile mʉkikaɨla matuntu ikʉmi na abɨɨlɨ mʉzealamʉla Aisilaeli ndʉgʉ ikʉmi na ibɨɨlɨɨ. 29Nʉ mʉntʉ wɨhi nʉlekile ito, ang'wɨ aheu akwe, ang'wɨ alʉna nɨakima, ang'wɨ ihe, ang'wɨ nyinya, ang'wɨ ana, ang'wɨ migʉnda, kʉnsoko ane, ʉzelija nkʉa igana, nʉkʉpegwa ʉpanga mahikʉ ɨhi nimagila anga mpelo. 30Ingɨ nɨatongee akʉsɨkɨɨlya, nawa nɨsɨkɨɨye akʉtongela.

Currently Selected:

Matayo 19: IBV

Highlight

Copy