Yohana 6

Yesʉ ʉkʉlɨsa ndya antʉ elupu itaano

Matayo 14:13-21; Maliko 6:30-44; Lʉka 9:10-17

1Naɨyakɨla nanso, Yesʉ wɨkaputa itʉmbɨ nɨla lʉzi nʉlʉkʉlʉ nʉla Galilaya ang’wi lʉzɨ nʉlʉkʉlʉ nʉla Tibelia. 2Milʉndo ʉkʉlʉ nʉwa antʉ ʉkamʉtyata kʉnsoko antʉ nɨanso aɨaine ilɨngasɨɨlyo naɨʉkendituma niakʉakomya alwae. 3Yesʉ wɨkanankɨla mʉlʉgʉlʉ, wɨkɨkiɨ pihɨpalʉng’wɨ nɨamanyisigwa akwe. 4Matungo nanso iloeelya nɨla Ayahudi nɨlitangwa Pasaka aɨlahumbeela. 5Yesʉ naɨwagoza nʉkʉona antʉ ɨdʉ apembilye kʉng’wakwe, wɨkamʉɨla ʉ Pilipo, “Kʉgʉɨla pɨɨ mɨkate antʉ awa ahume kʉlya?” 6Yesʉ aɨʉtambʉe itɨ kʉmʉgema Pilipo, ingɨ ng’wenso aɨʉlɨngile nʉʉkitʉma.

7Pilipo wɨkamʉsʉkɨɨlya, “Anga azaitule kʉkete mpia yɨdʉ, antʉ awa ga shanga akenela itule mʉntʉ wɨhi ʉkʉpegwa ʉnino da”

8Ʉng’wɨ mʉamanyisigwa akwe nʉwitangwa Endelea, mʉluna wang’wi Simon Petelo, wɨkamʉɨla, 9“Apaitɨ ʉkolɨ mʉhʉmba ʉng’wɨ ʉkete mikatɨ ɨtaano angano nɨ nsamaki ibɨɨlɨ, ingɨ izi yɨkʉkondya ntʉni kʉantʉ awa nɨɨdu itɨ?”

10Pang’wanso ipwa nidabʉ. Yesʉ wɨkalʉnga, “Ikalɨnshi antʉ.” Ʉʉgwa, antʉ akishiɨ, ʉaligwa wao aɨitunja elupu itaano. 11Yesʉ wɨkahola mɨkate nanso, wɨkamʉsongelya Itunda, wɨkaagalanya antʉ awo ɨhi naɨikiɨ, wɨkatendaʉʉ ni nsamaki, antʉ ɨhi ɨkalija mʉitakɨwɨ. 12Antʉ naɨikʉta Yesʉ wɨkaaɨla amanyisigwa akwe, “Hoeli ʉsago kɨleke kʉlimɨla anga kɨntʉ kɨhi.” 13Ʉʉgwa ɨkahoeela ʉsago nʉwa mɨkate angano ninsamaki naɨasigilye antʉ naɨalɨe, ɨkizʉlya nkapu ikʉmi na ibɨɨlɨ. 14Antʉ naɨaona kɨlɨngasɨɨlyo nɨkanso Yesʉ naɨwitʉmile, ɨkalʉnga, “Ɨtai taai ʉyʉ yʉyʉ mʉmanga nʉang’wi Itunda nʉʉzile mʉʉnkumbigʉlʉ. 15Yesʉ naɨwalɨnga kɨna antʉ aɨalowa amʉtemye Ʉtemi, wɨkikoma nɨenso wɨkalongola winyene mʉlʉgʉlʉ.

Yesʉ ʉkʉgenda migʉlya amazɨ

Matayo 14:22-33; Maliko 6:45-52

16Mpɨndɨ lyoa naɨlɨkʉhaɨɨla, amanyisigwa akwe ɨkahulumʉka kʉlʉzɨ nʉlʉkʉlʉ. 17Ɨkanankɨla mibɨnɨ ɨkatula tambʉka kenda kʉ Kapelinaʉmu. Matungo nanso kiti aɨkituma nʉ Yesʉ aɨwakɨlɨ kʉapikɨɨla. 18Lʉzi nʉlʉkʉlʉ lɨkakanzɨka nsoko ang’wega ʉkʉlʉ naɨʉkʉkunka. 19Amanyisigwa akwe naɨendile lʉgendo nʉla maɨli itaano ang’wɨ mʉtandatʉ, ɨkamʉona Yesʉ ʉkʉgenda migʉlya amazɨ, ʉkʉhumbeela pibɨnɨ, ɨkogopa nangalu. 20Sʉnga Yesʉ wɨkaaɨla, “Leki kogopi, ingɨ nene!” 21Papo paapo kʉʉlowa ɨkigombya kʉmʉnankɨlya mibɨnɨ, papo ibɨnɨ lɨkapika kitʉmbɨ, kihɨɨ naɨalomee.

Antʉ akʉmʉduma Yesʉ

22Lʉhikʉ naɨlʉtyatɨɨe milʉndo waantʉ naɨasagile kitʉmbɨ lakabɨɨlɨ ɨkakɨmbʉka kɨna pang’wanso aɨlɨkolɨ ibɨnɨ lɨng’wɨ du, nʉ Yesʉ shanga aɨaheganilye nɨamanyisigwa akwe, ingɨ amanyisigwa aɨahegile ɨenso du. 23Mabɨnɨ mangɨɨza kʉpumɨɨla kʉ Tibelia ɨkapika pang’wanso antʉ naɨalɨɨe mikatɨ, pa Isekʉlʉ aɨʉmʉsongeeye Itunda. 24Itɨgwa, antʉ nɨanso naɨakesa kɨna Yesʉ nɨamanyisigwa akwe aɨɨkʉtilɨ pang’wanso, ɨkanankɨla mʉmabɨnɨ ɨkalongola kʉ Kapelinaʉmu ɨzemʉduma Yesʉ.

Yesʉ ingɨ mʉkate nʉwɨleta ʉpanga

25Antʉ nɨanso naɨ amʉhanga ʉ Yesʉ kitʉmbɨ lalʉzɨ ɨkamʉkolya, “Mʉmanyisi, wapika nalɨ kʉnʉ itɨ?”

26Yesʉ wɨkaasʉkɨɨlya, “Kʉmʉɨla ɨtai, mʉkʉnduma shanga kʉnsoko mʉine kɨlɨngasɨɨlyo, ingɨ kʉnsoko aɨmʉlɨe mɨkate mɨkikʉta. 27Mʉleke kiaja kʉnsoko andya nɨyɨola, ingɨ iyagɨɨli ɨndya nɨyishiɨ kʉnsoko aʉpanga nʉwa kalɨ na kalɨ. Ng’waa Mʉntʉ ni Ihe ʉmʉɨkile, nʉwanso yʉyo ʉkʉmʉpa ʉlʉdya nʉlanso.”

28Sʉnga ɨkamʉkolya, “Kʉtendeʉlɨ gwa kʉhume kitʉma mɨlɨmo ang’wi Itunda?” 29Yesʉ wɨkaasʉkɨɨlya, “Mʉlɨmo wang’wi Itunda ingɨ sʉwʉ, mʉhʉɨɨli ʉyo nʉmʉtʉmile.” 30Ɨkamʉkolya, “Ʉkʉʉtendeela kɨlɨngasɨɨlyo kɨɨ kʉhume kʉona, kʉʉhʉɨɨle? Itɨɨ, ʉkitʉma kɨntʉ kɨɨ? 31Atata itʉ aɨʉapee lʉndya nʉlitangwa mana naɨakolɨ mʉwɨɨ, anga nɨyandɨkilwe Mʉʉandɨkwa wang’wi Itunda, ‘Aɨʉapee lʉdya naɨlʉpumɨɨe kigʉlʉ.”’ 32Sʉnga Yesʉ wɨkaaɨla, “Kʉmʉɨla ɨtai, shanga Musa naɨʉmʉpee lʉdya nʉlʉpumɨɨe kigʉlʉ, ingɨ Tata wane nɨwɨmʉpeza ʉnyenye lʉdya nʉlatai kʉpumɨɨla kigʉlʉ. 33Kʉnsoko lʉdya lang’wi Itunda ingɨ ʉyo nʉʉkʉsima kʉpumɨɨla kigʉlʉ hangɨ wɨʉpeza ʉnkumbigʉlʉ ʉpanga.”

34Itɨgwa, ɨkamʉɨla, “Isekʉlʉ, kandɨɨlya ino nɨmahikʉ ɨhi ʉkʉpeze lʉdya nʉlanso.” 35Yesʉ wɨkaaɨɨla, “Yʉnene lʉdya nʉla ʉpanga. Mʉntʉ nʉkʉpembya kʉng’wane shanga ʉkʉhung’wa nzala, nʉʉkʉnihʉɨɨla shanga ʉkʉhung’wa nyota lʉkʉlʉ. 36Ingɨ anga naɨ nʉmʉtambʉɨe kɨna mamona mʉkɨlɨ kʉnihʉɨɨla. 37Antʉ ɨhi nʉ Tata nʉʉkʉmpa akʉntyata. Nʉ mʉntʉ wɨhi nʉpembilye kʉng’wane shanga kʉmʉhita, 38kʉnsoko nsimile kʉpuma kigʉlʉ shanga kʉnsoko nitʉme nindoewe, ingɨ nitʉme ɨko nʉtakile ʉyo nʉndagɨigwe. 39Aya yaya uloilwe nitʉme ʉyo nʉntʉmile, ndeke kʉmʉlimɨlya ga nʉyʉ nʉng’wɨ mʉ awo naɨ ʉmpee, ingɨ niiʉshe ɨhi nʉmpee. 40Kɨntʉ nɨkɨkʉlʉ nʉloilwe ʉ Tata wane ingɨ sɨkɨ, mʉntʉ wɨhi nʉkʉmʉona ʉ Ng’wana nʉkʉmʉhʉɨɨla watule nʉʉpanga nʉwa kalɨ na kalɨ. Nʉ nene kʉmiʉsha lʉhikʉ nʉla mpelo.”

41Itɨ gwa Ayahudi ɨkatula kʉmʉnang’anɨla kʉnsoko aɨʉlɨɨye, “Ʉnene ingɨ nɨ lʉdya nʉlʉsimile kʉpumɨɨla kigʉlʉ.” 42Ɨkatula lʉnga, “Itɨɨ, ʉyʉ shanga ng’wana wang’wa Yusupu ne? Kʉalɨngile ihe nʉ nyinya. Ʉhumile ʉlɨ kʉlʉnga kɨna ʉsimile kʉpumɨɨla kigʉlʉ?”

43Yesʉ wɨkaaɨla, “Leki kinang’anɨla nyenye kʉ nyenye. 44Kʉtilɨ mʉntʉ nʉhumile kɨza kʉng’wane, anga wahite kʉlutwa nʉ Tata nʉwane nʉntʉmile, nʉ nene kʉmiʉsha mʉntʉ nʉwanso lʉhikʉ nʉla mpelo. 45Mʉmbugulu niya amanga yandɨkilwe itɨ, ‘Antʉ ɨhi akʉmanyisigwa nʉ Tata.’ Mʉntʉ wɨhi nʉkija nʉkʉlɨnga aya nʉkʉtambʉla ʉ Tata ʉzile kʉng’wane. 46Kʉtilɨ mʉntʉ wɨhi nʉwamʉine ʉ Tata, kʉleka ʉyo nʉpumɨɨe kung’wi Itunda, nʉwanso wing’wene ʉdu yʉyo wamʉine Itunda. 47Kʉmʉɨla ɨtai, kɨna ʉyʉ nʉkʉhʉɨɨla ʉkete ʉpanga nʉwa kalɨ na kalɨ. 48Ʉnene ingɨ nɨmʉkate nʉwa ʉpanga. 49Atata anyu ʉko mʉwɨ aɨalɨe ndya naɨ ipumɨɨla kigʉlʉ, ingɨ ɨkasha. 50Ingɨ apa ʉkolɨ mʉkate nʉʉsimile kʉpumɨɨla kigʉlʉ, mʉntʉ wɨhi anga walye, shanga ʉkʉsha. 51Ʉnene ingɨ lʉdya nʉlʉpanga nɨnsimile kʉpuma kigʉlʉ. Mʉntʉ wɨhi nʉkʉlya lʉdya ʉlʉ ʉkishiɨ ɨkalɨ na kalɨ. Nʉ lʉdya ʉlʉ nɨkʉpumya ingɨ mʉɨlɨ wane kʉnsoko a ʉpanga nʉwa antʉ amihɨɨ. 52Papo gwa Ayahudi ɨkatulikolya ɨenso, “Mʉntʉ ʉyʉ ʉhumile ʉlɨ kʉʉpeza mʉɨlɨ nʉwakwe, kʉʉlye?” 53Kʉitɨ Yesʉ wɨkaaɨla, “Kʉmʉɨli ɨtai, anga mʉhite kʉlya mʉɨlɨ nʉwa Ng’waa Mʉntʉ nʉkʉng’wa sakami akwe, ʉnyenye mʉkʉtula mɨagila anga ʉpanga. 54Mʉntʉ wɨhi nʉkʉlya mʉɨlɨ wane nʉkʉng’wa sakami ane ʉkʉtula nʉʉpanga nʉwa kalɨ na kalɨ, nʉ nene kʉmiʉsha lʉhikʉ nʉla mpelo. 55Kʉnsoko mʉɨlɨ wane ingɨ lʉdya nʉla tai, nɨsakami ane ingɨ kɨng’wegwa nɨka tai. 56Mʉntʉ wɨhi nʉkʉʉlya mʉɨli wane nʉ kʉng’wa sakami ane, ʉkikiɨ mʉng’wane, nʉ nene kikiɨ mʉng’wakwe. 57Anga ʉ Tata nɨmʉpanga nʉntʉmile, kʉkɨɨla Tata ʉnene nɨshiɨ, ʉʉgwa mʉntʉ wɨhi nʉkʉndya ʉnene ʉkishiɨ kʉkɨɨla nene. 58Ingɨ, ʉlʉ lʉlʉ lʉdya nʉlʉsimile kʉpuma kigʉlʉ, shanga ihangaanga lʉdya nʉla mana naɨalɨe atata anyu, panyambele ɨkasha. Nʉʉkʉlya lʉdya ʉlʉ ʉkishiɨ kalɨ na kalɨ.” 59Yesʉ aɨʉtambʉe nkani izi naɨ ʉkʉmanyisa mʉnyʉmba akʉtankanɨla Ayahudi ʉko kʉ Kapelinaumu

Nkani niyɨleta ʉpanga nʉwa kalɨ na kalɨ

60Itɨgwa, ɨdʉ amanyisigwa akwe ɨdʉ naɨija nanso, ɨkalʉnga, “Ʉmanyisigwa ʉwʉitɨ ingɨ ʉkaku! Nyanyu nʉhumile kʉʉgomba?”

61Yesʉ wɨkalɨnga mʉnkolo akwe, akaze wakɨlɨ kʉɨlwa nʉ mʉntʉ wɨhi kɨna amanyisigwa akwe aɨakʉnang’ana kʉnsoko aʉmanyisi wakwe, wɨkaakolya, “Itɨɨ, nɨkɨ ʉmanyisi ʉwʉ ʉkʉmʉtasha? 62Yɨkʉtulaʉlɨ gwa anga nɨmʉzɨɨza mʉona ʉ Ng’waa Mʉntʉ ʉkʉtulya kigʉlʉ ʉko naɨ ʉpembeeye? 63Ng’wahʉ wang’wi Itunda yʉyo wɨmʉpeza ʉmʉntʉ ʉpanga, ʉmʉɨlɨ shanga ʉhumile kʉtenda anga kɨntʉ kɨhi. Nkani izi nɨkʉmʉɨla ingɨ Ng’wahʉ hangɨ ʉpanga. 64Nɨ itɨga ingɨ mʉng’wanyu amolɨ nɨshanga ahʉɨɨe.” Yesʉ aɨʉtambʉe nanso kʉnsoko kʉpuma ʉng’wandyo nyenyu nɨshanga ahʉɨɨe, hangɨ nyenyu nʉzɨɨza mʉsuɨpa. 65Sʉnga Yesʉ wɨkalʉnga, yɨyo ndogoelyo aɨnʉmʉtambʉɨe kɨna kʉtilɨ mʉntʉ nʉ humile kɨza kʉng’wane anga wahite kʉaɨɨligwa nʉ Tata wane.” 66Kʉpumɨɨla hapo, amanyisigwa akwe ɨdʉ ɨkamʉleka, ɨkaleka kʉkʉɨlania nʉng’wenso. 67Kʉlʉlo, Yesʉ wɨkaakolya amanyisigwa akwe awo ni ikʉmi na abɨɨlɨ, “Itɨɨ, nʉ nyenye ga makalongola ne?”

68Simoni Petelo wɨkamʉsʉkɨɨlya, “Isekʉlʉ, kʉhege kʉlongole kʉng’wa nyanyu? Ʉewe ʉkete nkani niya ʉpanga wa kalɨ na kalɨ. 69Ʉsese kʉhʉɨɨe, hangɨ kalɨnga kɨna ʉewe ingɨ wɨ Ng’wana wang’wi Itunda nʉ mʉpanga.” 70Yesʉ wɨkaaɨla amanyisigwa akwe, “Itɨɨ, shanga aɨnimuhoile ʉnyenye mikʉmi naabɨɨlɨ? Nɨitɨ ga ʉng’wɨ wanyu apaitɨ ingɨ shetani!” 71Yesʉ aɨʉkʉmʉlapa Yʉda, ng’wana wang’wa Simon Isikalioti, ʉng’wɨao mʉamanyisigwa nikʉmi naabɨɨlɨ, panyambele yʉyo nʉzɨɨza mʉsuɨpa.

Currently Selected:

Yohana 6: IBV

Highlight

Copy