Ntendo 28
28
Makani naɨwitʉmile ʉ Paʉlo kʉ Kisiwa ka Malita
1Naɨkapika iza kʉmpelo a lʉzɨ, papo kɨkalɨnga kɨna kisiwa nɨkanso kitangwa Malita. 2Akolihɨɨ mʉ kɨsiwa nɨkanso aɨankolo nza. Kʉnsoko ambula naɨkʉkʉɨle nɨmpepo naɨ ɨkʉhumileka ɨkɨɨla ʉmoto nʉkʉɨla ʉsese kɨhi kote. 3Paʉlo wɨkahoeela iligo nɨya nkwɨ wɨkatula iɨkiɨla mʉmoto. Papo gwa kʉnsoko a ʉpyʉ nʉwa moto, nzoka aʉhʉngʉ ʉtaki ɨkapuma mʉnkwɨ niyanso ɨkakamantɨɨla nʉkipalingɨɨlya mʉkono wang'wa Paʉlo. 4Akolihɨɨ nɨanso naɨamɨona nzoka nanso ɨning'inile mʉmʉkono wang'wa Paʉlo, ɨkitambʉɨla, “Ihumɨlile ʉ mʉntʉ ʉyʉ ʉkʉtula wabʉlaganɨle, nɨitiga ʉgunɨkile kʉpuma mʉlʉzɨ, alʉngʉ itʉ shanga akʉmʉleka walongoleke kishiɨ.” 5Ingɨ ʉ Paʉlo wɨkamɨkanantɨla mʉ moto nzoka nanso kʉnʉ nʉwanso shanga waze ʉlemaigwe. 6Antʉ ɨkasʉmbɨɨlya waɨmbe ang'wɨ wagwe nʉ kʉsha. Ingɨ naɨasʉmbɨɨlya itungo ɨlɨpu nʉkʉona kʉtilɨ anga kɨntʉ kɨhi nɨkɨpumie, ɨkakaɨla isɨgo lao nʉkandya kʉlʉnga kɨna ʉyʉ ingɨ ʉng'wɨao mʉ alʉngʉ.
7Pakupɨ nɨnkɨka nanso, aɨʉkolɨ mʉgʉnda ʉkʉlʉ nʉwa mʉntʉ ʉng'wɨ witangwa Pʉbilio, mʉtongeeli nʉwa kɨsiwa nɨkanso, aɨʉkʉsɨngɨɨye nʉ kʉʉkendepa nangʉlʉ kʉ mahikʉ ataatʉ. 8Ihe wang'wa Pʉbilio aɨmʉlwae kʉnʉ ʉlae mʉʉlɨlɨ, ʉkʉlwala nʉkʉpanza sakami. Paʉlo wɨkingɨla mʉnyʉmba wamʉone, naɨ wamʉlompeela, wɨkamʉɨkɨɨlya mɨkono nʉ kʉmʉkomya. 9Makani aya naɨlɨpumɨe, antʉ ɨhi naɨalwae mʉ kɨsiwa nɨkanso ɨkapembya ʉ Paʉlo ɨkaponigwa. 10Antʉ akɨsalɨ nɨkanso ɨkakʉlʉmba nʉkʉʉpa ipegwa yɨdʉ kʉnsoko amakani naɨwitʉmile ʉ Paʉlo, nʉsese naɨkandya ʉ mʉhɨnzo kʉkɨɨla amʉlʉzɨ, ɨkanakɨlya mʉ meli maintʉ ɨhi naɨkʉmatakile.
Mʉhɨnzo wang'wa Paʉlo kʉpuma kʉ Malita kenda kʉ Lumi
11Myelyi ɨtaatʉ naɨkɨla kɨkanankila mʉ meli naimɨkile mʉ kɨsiwa nɨkanso kʉnsoko ampepo kɨkandya mʉhɨnzo. Meli nɨpembeeye kʉ Alekisandilia ɨndɨkilwe logo la “Alʉngʉ a Mapaha” nɨitangwa Kasita nʉ Polʉkisi. 12Kɨkapika kʉ Silakʉsa pang'wanso kɨkikiɨ mahikʉ ataatʉ. 13Kʉpuma pang'wanso lʉhikʉ naɨ lʉtyatile kɨkapika kʉ Legio. Naɨlakɨla lʉhikʉ lʉng'wɨ ng'wega ʉkʉlʉ wɨkandya kʉkʉnka kʉpembelya takama, kɨkalongoleka nʉ mʉhɨnzo lʉhikʉ nʉla kabɨɨlɨ kɨkapika kʉ kɨsalɨ ka Puteoli. 14Kʉng'wanso kɨkaahanga anyandʉgʉ, kɨkasɨngɨɨligwa kʉdʉe nɨenso mahikʉ mʉpungatɨ. Itɨʉʉ naɨkʉpikile kʉ Lumi. 15Anyandʉgʉ a kʉ Lumi naɨigulye impola yitʉ, ɨkaza kʉʉsɨngɨɨlya pa ʉgalagalo nʉwa Apio nɨ Mɨkahawa Itaatʉ. Paʉlo naɨ waaona, wɨkamʉlompa Itunda nʉkʉakomya nkolo.
Paʉlo ʉko kʉ Lumi
16Naɨkapika kʉ Lumi, Paʉlo wɨkagombigwa kishiɨ wing'wene palʉng'wɨ nʉ mʉmboi nʉwa kʉmʉsʉnja.
17Mahikʉ ataatʉ naɨakɨla Paʉlo wɨkaitanga palʉng'wɨ atongeeli nɨa Kiyahudi. Naɨilʉnda wɨkaaɨla, “Anyandʉgʉ ane, palʉng'wɨ nʉkʉtula shanga nitʉmile anga ikani lɨhi nibɨ kʉ antʉ itʉ ang'wɨ kʉhita ntendo niya atata itʉ, ingɨ aɨntungilwe kʉ Yelusalemu nɨkatalwa mʉʉhumi nʉwa Alumi. 18Alumi nɨenso naɨakondya kʉnkolenkeelya, ɨkahiya kʉndekela kʉnsoko shanga ɨkaona igazo lɨhi nɨntendile nɨlakʉsasha mbʉlagwe. 19Ingɨ Ayahudi nɨang'wɨ naɨahita ikani nɨlanso, nɨkatakɨlwa kʉlompa ʉsemelwa ʉwʉ ʉtalwe kʉng'wa Kaisali Mʉtemi nʉmʉkʉlʉ nʉwa kʉ Lumi walamʉle, palʉng'wɨ nʉ kʉtula aɨnɨmʉgila isosho lɨhi nɨla kʉasemela antʉ ane. 20Itɨ gwa anga nihume kitambʉlya nʉ nyenye, ingɨ kʉnsoko isʉmbɨɨlyo nɨla Aisilaeli ntungilwe mɨnyololo.”
21Nɨanso ɨkamʉsʉkɨɨlya, “Ʉsese shanga kʉsɨngɨɨye anga balʉa nɨlako lɨhi kʉpuma kʉ Yʉdea, hangɨ kʉtilɨ anga mʉnyandʉgʉ wɨhi nʉzile apa kʉpumya mpola ang'wɨ kʉtambʉla ikani lɨhi nibɨ kʉng'wako. 22Ingɨ kʉloilwe kija kʉpuma kʉng'wako nʉsɨgile kʉnsoko kʉlɨngile kɨna nkɨka yɨhi shanga alɨgombile iumbɨ ɨlɨ.”
23Ikaɨka lʉhikʉ nʉla kʉtankana nʉ Paʉlo, antʉ ɨdʉ ɨkapembya mʉnyʉmba nʉwikiɨ ʉ Paʉlo kandɨɨlya daʉ kʉpikɨɨla mpindi wɨkaaganʉɨla nʉ kʉalɨngansa kʉ Ʉtemi wang'wi Itunda wazegema kʉapema amʉhʉɨɨle ʉ Yesʉ kʉkɨɨla malagɨɨlyo ang'wa Musa nʉ mʉmbugulu niya amanga. 24Antʉ ang'wɨ ɨkahʉɨɨla kʉ nkani nʉtambʉe ʉ Paʉlo, nɨang'wɨ shanga ɨkahʉɨɨla. 25Itɨ gwa ɨkatula kikʉngʉma enso kʉ enso, ɨkatulahega, Paʉlo wɨkaatambʉɨla lʉkani lʉng'wɨ. “Ng'wahʉ Ng'welʉ aɨʉtambʉɨe ɨtai kʉatata anyu naɨkʉtambʉla mpola yang'wi Isekʉlʉ Yesʉ kʉkɨɨla Isaya. 26Wazelʉnga,
“‘Longola kʉ antʉ awa ʉatambʉɨle,
“Mʉkʉtulija ingɨ shanga mʉkʉtulalɨnga,
Mʉkʉtulaona, ingɨ shanga mʉzemanya,”
27kʉnsoko nkolo niya antʉ awa yakagupile,
nɨakʉtwɨao alitopile,
atutilyee kʉmiho aleke kʉona.
nʉkʉtegeelya kʉ akʉtwɨao.
Anga ɨze shangaʉʉ aza azeona kʉ mihoao
akʉlɨnga kʉnkolo niyao nʉkʉmpɨlʉkɨla,
nʉ nene nɨaponie.’
28Sʉnga ʉ Paʉlo wɨkatambʉla, “Kʉlʉlo ndoilwe ʉnyenye Ayahudi mʉlɨnge kɨna, ʉkomolwi ʉwʉ nʉwang'wi Itunda watawe kʉ antʉ nɨshanga Ayahudi, nɨenso akʉtegeelya.” 29Paʉlo naɨwakondya kʉtambʉla nkani izi, Ayahudi ɨkahega azikolya ɨenso.
30Paʉlo aɨwɨshiɨ myaka ɨbɨɨli mʉnyʉmba naɨʉpangile, wɨkaze asɨngɨɨlya antʉ ɨhi naɨakendɨza kʉmʉlamʉsha. 31Wazetanantya Ʉtemi wang'wi Itunda nʉ kʉmanyisa makani ayo nang'wi Isekʉlʉ Yesʉ Kilisito, kʉ ʉkamatɨku kʉnʉ shanga waze wogopile ɨkaze kʉtilɨ anga mʉntʉ nʉwa kʉmʉgilya kʉtambʉla kɨntʉ kɨhi.
The New Testament in Isanzu @The Word for The World International and Isanzu Language translation. All rights reserved