Ntendo 24
24
Ayahudi akʉmʉsemela ʉ Paʉlo
1Naɨakila mahikʉ ataano, Mʉkʉlʉ nʉwa Apolyi ʉ Anania wɨkapika kʉ Kaisalia palʉng'wɨ nɨanyampala ang'wɨ azeityatile nʉ mʉntʉ ʉng'wɨ mʉlɨngi nʉwa malagɨɨlyo ang'wa Musa witangwa Telitulo. Ɨkamʉsemela Paʉlo kʉ Mʉkʉlʉ nʉwanso. 2Paʉlo naɨwitangwa wingɨle mʉnyʉmba, Telitulo wɨkandya kʉmʉsemela ʉ Paʉlo wazelʉnga,
“Mʉkʉlʉ Pelikisi, mahikʉ ɨdʉ iza kiloile kʉnsoko matiliga nʉwigombya nʉʉza nʉkolɨ mʉantʉ kʉnsoko amasɨgo ako nɨmaza nɨɨza ʉkete nʉkʉtenda mihɨɨ itʉ. 3Matungo ɨhɨ nɨ nkɨka yɨhi kʉsɨngɨɨye makanɨ aya ɨhi kʉʉlowa nʉ kʉʉlʉmbɨɨlya ʉewe Mʉkʉlʉ Pelikisi. 4Ingɨ ndeke kʉʉkatalya, kʉʉkende nʉwako kʉʉlompa ʉkʉtegeelye iniino. 5Kaona kɨna mʉntʉ ʉyʉ mʉsʉmbʉli, ʉkʉkinyɨla minyomo kʉ Ayahudi ang'wɨ mihɨɨ ɨhi. Ʉyʉ ingɨ mʉtongeeli midale nɨla Anazaleti. 6Hangɨ aɨʉgemile kʉtenda makani nɨshanga atakɨwe pa Nyʉmba ang'wi Itunda, ingɨ kɨkamʉamba kɨkalowa kʉmʉlamʉla kʉtyata malagɨɨlyo itʉ. 7Ingɨ mankata ʉ Lisia, wɨkingɨɨla nʉkʉmʉheja kʉ ngulu, 8sʉnga walagɨɨlya antʉ nɨamʉsemee aze kʉng'wako. Anga ʉmʉkolenkeelye ʉewe ʉmʉntʉ ʉkʉlɨnga makani ɨhi ayo nɨkʉmʉsemee.” 9Ayahudi ɨkihanja ɨkakʉɨɨla nʉkʉlʉnga kɨna makani aya nʉsemewe ʉ Paʉlo ingɨ tai.
Paʉlo ʉkilongola pang'wa Pelikisi
10Sʉnga Mʉkʉlʉ Pelikisi wɨkamʉpa kɨlɨngasɨɨlyo ʉ Paʉlo wilongole, Paʉlo nʉyo wɨkasʉkɨɨlya,
“Nɨngile kɨna ʉewe waile wɨmʉlamʉli mihɨɨ ɨyɨ kʉ myaka ɨdʉ, kʉlʉlo kilongola kʉʉlowa ʉkʉlʉ pang'wako. 11Ʉhumile kʉlɨnga iza kɨna akɨlɨ kʉkɨla mahikʉ ikʉmi na abɨɨlɨ kʉpuma nɨnendela kʉ Yelusalemu kipolya. 12Antʉ awa nɨakʉnsemela shanga aza anihangɨle kikʉngʉma nʉ mʉntʉ wɨhi pa Nyʉmba ang'wi Itunda, ang'wɨ kʉkinyɨla maumbɨ a antʉ mʉnyʉmba niya kʉtankanɨla Ayahudi, ang'wɨ pɨhi mʉkɨsalɨ nɨkanso. 13Hangɨ shanga ahumile kʉʉɨla ɨtai a makani aya nɨakʉnsemela. 14Ingɨ, ngombile kɨna ʉnene nɨmʉkʉlya Itunda nʉwa atata itʉ, nɨshiɨ kʉtyata Nzɨla ɨyo nɨanso nɨɨmitanga aʉmanyisi waʉteele. Nihʉɨɨe makani ɨhi naandɨkilwe mʉmbugulu niya malagɨɨlyo nɨ amanga. 15Ʉnene nkete isʉmbɨɨlyo anga nɨakete nɨanso, kɨna antʉ nɨakende nawa nɨabɨɨ akiʉka. 16Kʉlʉlo mahikʉ ɨhi nkagupile kʉtula nɨnkolo nza kʉng'wi Itunda nʉ kʉ antʉ.
17“Itɨ gwa, myaka ɨdʉ akɨla ʉnene aɨnkolɨ kʉlɨ, nɨkatulya kʉ Yelusalemu nɨzeleta ʉaɨɨlya kʉ ahimbɨ nʉ kʉpumya isongelyo kʉng'wi Itunda. 18Naza niɨkile iza ngombeke kʉmʉkʉlya Itunda, papo aza anihangɨle pa Nyʉmba ang'wi Itunda. Aza kʉtilɨ anga iumbɨ nɨla antʉ palʉng'wɨ nʉnene, hangɨ shanga azakinyɨe anga antʉ kʉsasha minyomo. 19Ingɨ akolɨ Ayahudi ang'wɨ kʉpuma kʉ Asia, nɨanso wawo atakɨwe kʉza kʉng'wako ansemele anga ɨzelɨkolɨ ikani lɨhi nibɨ nɨnitʉmile, 20ang'wɨ antʉ awa nɨakolɨ apaitɨ atambule igazo nazaaine apo nazanimɨkile ntongeela ianza nikʉlʉ, 21ingɨ ntambʉe ikani lɨng'wɨ duu pa ntongeelaao, ‘Ʉnene kʉnsemelwa kʉnsoko nihʉɨɨe kɨna ashi akiʉkigwa.”’
22Papo Mʉkʉlʉ ʉ Pelikisi naɨʉmɨlɨngile iza ɨ Nzɨla nanso, wɨkadɨlya kʉtegeelya ʉsemelwa wang'wa Paʉlo wazelʉnga, “Mankata Lisia nʉʉkʉhulumʉka kʉza kʉnʉ, papo kʉʉlamʉla ʉsemelwa ʉwʉ.” 23Papo wɨkalagɨɨlya mʉkʉlʉ wiumbɨ nɨla anyambita wamʉsʉnje iza ingɨ aze wagombigwe kutenda makani akwe nɨ ahʉmbaʉya aleke kʉgiligwa azemʉaɨɨlya.
Pelikisi nʉ Dulusila akʉtegeelya ʉsemelwa wang'wa Paʉlo
24Naɨakila mahikʉ kɨtʉʉnga Pelikisi wɨkapika azeakʉɨe nʉ mʉsʉngʉ wakwe ʉ Dulusila, mʉsʉngʉ ʉyʉ aɨ Mʉyahudi. Wɨkalagɨɨlya witangɨligwe ʉ Paʉlo, wɨkamʉtegeelya wazetambʉla ndogoelyo akʉmʉhʉɨɨla ʉ Yesʉ Kilisito. 25Ingɨ ʉ Paʉlo naɨʉkʉtambʉla mpola niya ɨtai ane, ɨkepyi hangɨ nʉkʉ mpola niya kʉʉlamʉli nʉʉzile, Pelikisi wɨkogopa wɨkalʉnga, “Geela papo. Ʉhumile kʉhega. Anga ndije lyoma kʉitanga.” 26Itungo lɨlo lɨɨlo Pelikisi aɨʉsʉmbɨɨye kɨna ʉ Paʉlo wɨkamʉpa nkumba mʉlomo wamʉlekele. Itɨ gwa wɨkatula sʉkɨnkania kʉmitanga itambʉlye.
27Naɨakɨla myaka ɨbɨɨlɨ, Polikio Pesito wɨkatema palyoma lang'wa Pelikisi, kʉnsoko Pelikisi aɨʉkʉhiya kʉaloeelya ɨ Ayahudi, wɨkamʉleka ʉ Paʉlo mʉkadulumu.
The New Testament in Isanzu @The Word for The World International and Isanzu Language translation. All rights reserved