Ntendo 22
22
1Paʉlo wɨkalongoleka kʉtambʉla, “Anyandʉgʉ ane nɨ atata ane, tegeelyi makani aya nɨlɨ.” 2Antʉ awa naɨija ʉkʉtambʉla ntambʉ a Kiebulania, ɨkakilaja ihɨtwɨ. Papo ʉ Paʉlo wɨkalʉnga.
3“Ʉnene nɨ Mʉyahudi, ntugɨwe kʉ kɨsalɨ ka Taliso ʉko kʉ Kilikia, nkʉɨe mʉkɨsalɨ kɨkɨ, ndeilwe nʉ Gamalieli. Manyisigwe iza malagɨɨlyo a atata itʉ, aɨnɨmʉkamatɨku kʉng'wi Itunda anga ʉnyenye nɨmɨlɨ lelo. 4Aɨnɨagilye nʉkʉabʉlaga ɨantʉ nɨatyatile Nzɨla ɨyɨ, nɨzeaamba itʉnja nɨasʉngʉ nʉkʉatunga mʉkadulumu. 5Mʉpolyi nʉ Mʉkʉlʉ nianza lɨhi nɨla anyampala ahumile kʉkʉɨɨla ikani nɨlanso. Kʉpuma kʉng'waao aɨnɨhola balʉa nɨaandɨkɨwe Ayahudi nɨakolɨ kʉ Damesiki, Ʉnene aɨnɨlongola nʉkʉaamba ɨantʉ nɨkaatunga nʉkʉaleta kʉ Yelusalemu ahume kʉpɨsɨɨligwa.
Paʉlo ʉkʉganʉla kɨnyaʉlɨ ʉ Kilisito naɨʉmigee
Ntendo 9:1-19; 26:12-18
6“Itɨ gwa naɨnkolɨ mʉnzɨla nongoe kʉ Damesiki, itungo nɨla saa mʉtandatʉ ng'ʉng'wɨ, kʉpumpugɨɨlya nzelya nkʉlʉ kʉpuma kilunde ɨkanalɨkɨla mpande yɨhi. 7Nʉnene nɨkagwa pihɨ, nɨkija lʉli lʉkʉmbɨla, ‘Sauli, Sauli. Nɨkɨ ʉkʉnaja?’ 8Ʉnene nɨkakolya, ‘Ʉewe wɨnyenyu Isekʉlʉ?’ Nʉyo wɨkambɨla, ‘Ʉnene nɨ Yesʉ nʉwa kʉ Nazaleti ʉewe nɨwɨnaja.’ 9Itɨ gwa awa naɨɨpalʉng'wɨ nʉnene aɨamɨine ɨnzelya nanso, ingɨ shanga aɨigulye ʉlʉli nʉla ʉyʉ nʉkitambʉlya nʉnene. 10Ʉnene nɨkakolya, ‘Isekʉlʉ ntende ʉlɨ?’ Isekʉlʉ wɨkambɨla, ‘Ʉka ʉlongole kʉ Damesiki, kʉng'wanso ʉkʉɨlwa makani ɨhi nʉpangɨwe kʉtenda.’ 11Kʉlʉlo nɨkaleng'wa kʉona kʉnsoko a ʉmɨlɨgɨntu nʉwa nzelya, ɨane ɨkamamba mʉkono ɨkantala kʉ Damesiki.
12“Kʉ Dameski aɨʉkolɨ mʉntʉ ʉng'wɨ lina lake Anania, mʉntʉ ʉyʉ aɨʉambile malagɨɨlyo ang'wa Musa hangɨ aɨʉsanigwe nɨ Ayahudi ɨhi nɨishiɨ kʉng'wanso. 13Anania wɨkimɨka pakupɨ nʉ nene wɨkalʉnga, ‘Mʉnyandʉgʉ Sauli, ona hangɨ!’ Papo paapo miho ane ɨkahuma kʉona hangɨ, ʉnene nikʉmʉona. 14Sʉnga Anania wɨkalʉnga, ‘Itunda nʉwa Atata itʉ wakʉhola ʉewe ʉhume kʉlɨnga ʉʉlowa wakwe, ʉmʉone nʉanso nɨ Mʉnya Tai hangɨ ʉhume kija inkani nʉkʉtambʉla. 15Ʉewe wɨkatula atambʉɨla antʉ kʉnsoko makani ɨhi nʉmaine nʉkija. 16Itungo ɨlɨ gwa, nɨkɨ ʉkitintɨka? Ʉka, ʉbadisigwe weligwe ʉhume kʉlekelwa mɨlandʉ ako, ʉlɨkʉlye ɨlina lakwe.’
Isekʉlʉ ʉkʉmʉlagɨɨlya Paʉlo kʉtanantya kʉ antʉ nɨshanga Ayahudi
17“Itɨ gwa nɨkatulya kʉ Yelusalemu, naɨkʉlompa mʉ Nyʉmba ang'wi Itunda, nɨkaona mʉloto, 18nɨkamʉona Isekʉlʉ ʉkʉmbɨla, ‘Ipatɨɨlye, hega mʉ Yelusalemu kʉnsoko antʉ shanga akʉgomba lʉkani lane nʉʉkʉatambʉɨla.’ 19Ʉnene nɨkamʉsʉkɨɨlya, ‘Isekʉlʉ, antʉ awa alɨngile naɨnɨkendakɨɨla mʉnyʉmba yɨhi niya kʉtankanɨla Ayahudi kʉaamba nʉ kʉatunga mʉkadulumu nʉ kʉakʉa awa naɨakʉhʉɨɨe. 20Nɨ kɨna mitʉmi nʉwako ʉ Sitepwano naɨ ʉkʉbʉlagwa ʉnene aɨnkolɨ papo, nɨkagomba ntendo nanso kʉnʉ nɨze mambɨɨe ɨngʉo a antʉ naɨakʉmʉbʉlaga.’ 21Papo Isekʉlʉ wɨkambɨla, ‘Longola, kʉnsoko nɨkakʉlagɨɨlya kʉlɨ, kʉantʉ nɨshanga Ayahudi.”’
22Kʉpikɨɨla apa milʉndo nʉwa antʉ aɨamʉtegeeye ʉ Paʉlo, ingɨ naɨʉtambʉe ʉdu nkani izi, papo ɨkandya kitʉnta azelʉnga, “Mʉheje mihɨɨ! Mʉbʉlagi! Mʉntʉ ʉyʉ nʉwa itɨ shanga ʉtakɨwe kishiɨ!” 23Naɨakɨlɨ akitʉnta nʉ kʉpununta ngʉoao kʉnʉ azekunkʉla ʉlʉnkʉndɨ. 24Mankata nʉwanso nʉwa anyambita wɨkalagɨɨlya ʉ Paʉlo wingɨligwe mʉnkambɨ a anyambita, wɨkaaɨla kɨna amʉkʉe mɨsheleti ahume kʉlɨnga nɨkɨ antʉ azogooye itɨ. 25Ingɨ naɨakondya kʉmʉtunga ɨmɨkoha ahume kʉmʉkʉa mɨsheleti, Paʉlo wɨkamʉkolya mʉtongeeli nʉidale nɨla anyambita naɨwimɨkile pakupɨ nʉ ng'wenso, “Itɨɨ, igombigwene mʉmalagɨɨlyo kʉmʉkʉa mʉntʉ nɨ mʉnya kʉ Lumi ize wakɨlɨ kʉpɨsɨɨligwa igazo lakwe?”
26Mʉtongeeli ʉyʉ nʉwiumbɨ nɨla anyambita naɨ wija inkani izi, wɨkamʉhanga ʉ mankata nʉkʉmʉɨla, “Ʉkʉhiya kʉtenda ʉlɨ? Kʉnsoko mʉntʉ ʉyʉ ingɨ mʉnya kʉ Lumi.”
27Itɨgwa mankata ʉyʉ wɨkamhʉanga ʉ Paʉlo wɨkamʉkolya, “Mbɨle, ʉewe wɨmʉnya kʉ Lumi?”
Paʉlo wɨkasʉkɨɨlya, “Ee! Ʉnene nɨ mʉnya kʉ Lumi.”
28Papo mankata nʉwanso wɨkalʉnga, “Ʉnene ntʉmɨe mpia yɨdʉ kʉʉgʉla ʉ Lumi wane.”
Paʉlo wɨkalʉnga “Ʉnene ingɨ nɨ mʉ Lumi kʉʉtugwa.”
29Papo antʉ awa naɨihambaa kʉmʉkolenkeelya ʉ Paʉlo ɨkalimɨla. Mankata nʉyo wɨkogopa, naɨwalɨnga kɨna amʉtungile ʉ Paʉlo kʉ minyololo, mʉ Lumi kʉʉtugwa.
Paʉlo ʉkʉtalwa pianza nikʉlʉ nɨla Ayahudi
30Mʉdaʉao, mankata wɨkalowa kʉlɨnga ikʉlʉ kʉʉlʉ nɨkɨ ʉ Paʉlo ʉsemewe nɨ Ayahudi, wɨkamʉtungʉɨla nʉkʉlagɨɨlya apolyi nɨakʉlʉ nianza nɨla anyampala atankane. Sʉnga wɨkamʉleta ʉ Paʉlo wɨkamimɨsha pɨanza nɨla anyampala.
The New Testament in Isanzu @The Word for The World International and Isanzu Language translation. All rights reserved