Ntendo 14
14
Paʉlo nʉ Balinaba akolɨ kʉ Ikonio
1Kʉng'wanso kʉ kɨsalɨ ka Ikonio Paʉlo nʉ Balinaba aɨingɨlania mʉ nyʉmba niya kʉtankanɨla Ayahudi anga naɨizɨɨe. Ɨkatanantya Nkani Nza niyang'wi Itunda kʉʉkamatɨku Ayahudi nɨ Agiliki ɨkahʉɨɨla. 2Ingɨ Ayahudi naɨ ahʉɨɨe ɨka ahʉgʉlya antʉ nɨ shanga Ayahudi nɨshanga ahʉɨɨe nʉkʉakinyɨla aakʉe antʉ nɨ shanga Ayahudi nɨahʉɨɨe. 3Paʉlo nʉ Balinaba ɨkishiɨ kʉng'wanso kitungo ɨlɨpu, aze akamatɨku kʉtanantya nkani yang'wi Isekʉlʉ. Isekʉlʉ nʉyo wɨkakamɨnkɨɨlya ʉlʉkani lakwe kʉ ʉkende wakwe, waze ʉahumilye kʉtenda ilɨngasɨɨlyo nɨ mɨʉkʉɨlwa. 4Ingɨ antʉ nɨa kɨsalɨ nɨkanso ɨkahutana, nɨang'wɨ ɨkigombya nɨ Ayahudi nɨ shanga ahʉɨɨli, nɨang'wɨ ɨkigombya nɨ itʉmi.
5Antʉ nɨ shanga Ayahudi nɨ Ayahudi ɨkihanja nɨ akʉlʉao, ɨkalomeela kʉatendeela ʉbɨɨ itʉmi nʉ kʉakʉa magwe. 6Itʉmi naɨ ija ikani ɨlɨ ɨkamankɨɨla isalɨ niya kʉ Lisitila nʉ kʉ Delibe, isalɨ niyikolɨ kʉ Likaonia nɨ mahɨɨ nakolɨ pakupɨ, 7kʉng'wanso ɨkalongoleka kʉtanantya Nkani Ninza niyang'wi Itunda.
Paʉlo nʉ Balinaba akolɨ kʉ Lisitila nʉ kʉ Delibe
8Kʉ kɨsalɨ nɨkanso nɨka Lisitila aɨʉkolɨ mitʉnja kitele, shanga aɨwigendaa mʉʉtugwa wakwe. 9Mʉntʉ ʉyʉ wɨkija ʉ Paʉlo nʉkʉtanantya. Paʉlo nʉyo wɨkamʉkendegela nʉ kʉona kɨna ʉkete ʉhʉɨɨli nʉwa kʉkomya, 10Paʉlo wɨkamitʉntɨɨla, “Imɨke kʉ mɨgʉlʉ ako.” Kɨtele ʉyʉ wɨkimɨka nʉkandya kʉgenda. 11Milʉndo nʉwa antʉ naɨ aona nʉwitʉmile ʉ Paʉlo, ɨkazogolya, azetambʉla kʉ ntambʉ a Kilikaonia, “Alʉngʉ aina anga antʉ nawo akʉhanga.” 12Ɨkamʉta ʉ Balinaba Zeu lina nɨla mʉlʉngʉ nʉmʉkʉlʉ nʉ Paʉlo ɨkamʉta Helime lina nɨla mʉlʉngʉ mʉya, kʉnsoko Paʉlo aɨmʉtambʉli nʉ mʉkʉlʉ. 13Mʉpolyi wang'wa Zeu naɨɨza nyʉmba akwe naɨ akipoelya ɨkolɨ kʉnzi a kɨsalɨ, wɨkaleta amʉzagamba a ng'ombe nɨ ngala niya mpʉmbʉʉlʉ pa mʉmpita nʉwa kɨsalɨ. Kʉnsoko nʉwanso palʉng'wɨ nʉ milʉndo nʉwa antʉ aɨakʉhiya kʉapa ipolyo ɨ itʉmi.
14Ingɨ a Balinaba nʉ Paʉlo, naɨ ija impola niyanso, ɨkatamʉla ɨngʉoao kʉhita kipoligwa, ɨkamanka ɨkingɨla mʉ milʉndo nʉwa antʉ, ɨkaitʉntɨɨla, 15“Ʉnyenye antʉ, nɨkɨ mʉkʉtenda itɨ? Ʉsese kɨ antʉ anga ʉnyenye, kʉʉmʉtanantɨlya Nkani Nza, mʉhume kʉpɨʉlwa nʉ kʉleka kipoelya ɨadʉdʉ nʉkʉmʉtyata Itunda nɨ mʉpanga, naɨ ʉtundile igʉlʉ nihɨɨ nʉlʉzɨ nɨ maintʉ ɨhi namolɨ. 16Pa kalɨ Itunda aɨʉalekile antʉ ɨhi nɨshanga Ayahudi itʉme mʉaloewe. 17Nɨ itɨ ga, Itunda shanga aɨʉlekile kʉatendeela ʉkende nʉwakwe, wɨapa mbula kʉpumɨɨla kilunde, wɨapeza maogola kʉ matungo akwe, wɨapeza indya nʉʉlowa.” 18Palʉng'wɨ nʉkʉtambʉla nkani izi yɨhi Paʉlo nʉ Balinaba ɨkahuma kʉagilya kʉntandatʉ ɨ antʉ nɨanso kʉapa ipolyo.
19Naɨlakɨla itungo Ayahudi ang'wɨ nɨakʉpuma kʉ Antiokia nʉ kʉ Ikonio, ɨkaapema ɨantʉ, ɨkamʉkʉa magwe ʉ Paʉlo, ɨkamʉkweha kʉnzi a kɨsalɨ, azeasɨgile kɨna wakuzaa. 20Ingɨ amanyisigwa ang'wɨ naɨ amʉpilima mpande yɨhi, wɨkimɨka, wɨkasʉka mʉ kɨsalɨ. Mʉdaʉao Paʉlo nʉ Balinaba ɨkalongola kʉ Delibe.
Paʉlo nʉ Balinaba akʉtulya kʉ Antiokia akʉ Silia
21Sʉnga a Paʉlo nʉ Balinaba naɨakondya kʉtanantya Nkani Nza mʉ kɨsalɨ ka Delibe antʉ ɨdʉ ɨkamʉhʉɨɨla ʉ Yesʉ. Sʉnga ɨkatulya kʉkɨɨla isalɨ niya Lisitila nʉ kʉ Ikonio nʉ kʉ Antiokia namʉ Pisidia. 22Ingɨ aze akomya nkolo ɨamanyisigwa aisalɨ niyanso asage mʉhʉɨɨli ang'wa Yesʉ azeahʉgʉla kɨna, “Antʉ akʉaja nɨze kʉkɨlɨ kingɨla mʉ ʉtemi wang'wi Itunda.” 23Naɨ akondya kʉhola atongeeli mʉ ahʉɨɨli ang'wa Yesʉ ɨhi, ɨkagwalya nʉ kʉ lompa Itunda waasʉnje.
24Naɨ akondya kʉtanantya ɨkakɨɨla kʉ kɨsalɨ ka Pisidia ɨkapika kʉ Pampilia. 25Naɨ akondya kʉtanantya lʉkani lang'wi Itunda kʉ Pelige ɨkahulumʉka kʉ Atalia. 26Kʉpumɨɨla kʉng'wanso ɨkanankɨla meli ɨkatulya kʉ Antiokia akʉ Silia, kʉng'wanso kʉko pa kwadya ahʉɨɨli ang'wa Yesʉ naɨ alompeewe ʉkende wang'wi Itunda kʉnsoko a mʉlɨmo naɨ akondanɨɨlya.
27Naɨapika kʉ Atiokia ɨkaitanga ɨahʉɨɨli ang'wa Yesʉ, ɨkaaganʉɨla makani ɨhi Itunda nʉatendee antʉ nɨshanga Ayahudi amʉhʉɨɨli Yesʉ Kilisito. 28Paʉlo nʉ Balinaba ɨkishiɨ kʉng'wanso palʉng'wɨ nɨ ahʉɨɨli ang'wa Yesʉ mahikʉ ɨdʉ.
The New Testament in Isanzu @The Word for The World International and Isanzu Language translation. All rights reserved