ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 1
1
ᔨᕉᓴᓕᐅᑉ ᕿᒃᓵᖕᓇᖅᑐᒦᑎᑕᐅᓂᖓ
1ᐃᒡᓗᒐᓴᒡᔪᐊᑦ ᐃᓄᒋᐊᒃᑑᕙᓚᐅᖅᑐᑦ ᐃᓄᖃᓚᐅᖅᓯᒪᖏᑦᑐᑎᑐᑦ ᑍᒤᓕᖅᐳᑦ!
ᐃᓅᖃᑎᒌᒡᔪᐊᓪᓗ ᐅᐱᒋᔭᐅᑦᓯᐊᓚᐅᖅᑐᑦ, ᒫᓐᓇ ᐅᐃᒡᒐᕐᖕᓂᖅᑎᑐᑦ ᑍᒤᓕᖅᐳᑦ;
ᓄᓇᓖᑦ ᐊᕕᒃᑐᖅᓯᒪᓂᖏᓐᓄᑦ ᐊᖓᔪᖅᑳᕆᔭᐅᓚᐅᖅᑐᑦ, ᒫᓐᓇ ᓯᐊᓛᕆᔭᐅᓕᖅᐳᑦ.
2ᐅᓐᓄᐊᒃᑯᑦ ᕿᐊᖓᔭᖕᓂᕐᖕᒧᑦ ᖁᕝᕕᖏᑦ ᑰᒐᖅᐳᑦ ᑮᓇᖓᓂ.
ᐃᓚᓐᓇᕆᔭᖃᖏᑦᑐᑎᑐᑦ ᓮᒻᒪᖅᓮᔨᒃᓴᖃᓐᖏᓚᖅ,
ᐃᓚᓐᓇᕆᓚᐅᖅᑕᖏᑕ ᐊᑭᕋᖅᑐᓕᕐᖕᒪᑦᔪᒃ.
3ᐅᖁᒤᑦᑐᒦᑎᑕᐅᓪᓗᑎᒃ ᐊᒃᓱᕈᕐᖕᓇᖅᑐᒦᑎᑕᐅᕗᑦ,
ᔫᑕᒥᐅᓪᓗ ᓄᓇᒋᓐᖏᑕᒥᖕᓄᑦ ᐊᐅᓪᓚᕈᑦᔭᐅᕗᑦ,
ᐃᓅᖃᑎᒌᒡᔪᐊᓂᑦ ᓄᓇᖃᖃᑕᐅᓕᖅᐳᑦ,
ᒥᕐᖑᐃᖅᓯᕕᒃᓴᒥᒡᓗ ᓇᒡᕚᕈᓐᓇᕋᑎᒃ,
ᐊᑭᕋᖅᑐᖅᑎᖏᑕ ᓵᓚᒋᖕᒪᔪᒃ ᓇᒧᓐᖓᕐᕕᒃᓴᖃᕈᓐᓁᖅᐳᑦ.
4ᓮᐅᓂᒧᑦ ᑐᒃᓯᐊᕆᐊᖅᑐᖃᕈᓐᓁᖅᐳᖅ
ᐅᓪᓗᐃᑦ ᐃᑦᔪᕐᖕᓁᑦᑐᑦ ᓇᓪᓕᐅᑎᕕᖏᓐᓂ,
ᐃᑎᖅᑕᕐᕕᖏᑦ ᐃᓄᖃᕈᓐᓁᖅᐳᑦ,
ᐊᔪᕆᖅᑐᐃᔨᖁᑎᖏᓪᓗ ᐅᖁᒤᒃᓴᕐᖕᓇᖅᑐᒦᓕᕐᖕᒪᑕ ᕿᒃᓵᖕᓇᖅᑐᒦᑎᑕᐅᕗᑦ,
ᐊᕐᖕᓁᑦ ᐃᓅᓱᒃᑐᑦ ᕿᒃᓵᒃᐳᑦ ᐋᓐᓂᐊᓇᖅᑐᒦᒻᒪᑕ.
5ᐊᑭᕋᖅᑐᖅᑎᒋᓚᐅᖅᑕᖏᑦ ᐊᐅᓚᑦᓯᔨᐅᓕᕋᒥᒃ ᓯᕘᕋᒋᔭᖃᕈᓐᓁᖅᐳᑦ
ᐊᑕᓂᐅᑉ ᕿᒃᓵᖕᓇᖅᑐᕐᔪᐊᕐᖕᒧᑦ ᑎᑭᑎᓚᐅᖅᐰᑦ
ᐊᔪᖅᑐᓕᓯᒪᓂᖏᑦ ᐱᑦᔪᑎᒋᓪᓗᒋᑦ ᕿᑐᕐᖓᖏᑦ ᐊᐅᓪᓚᕈᑦᔭᐅᕗᑦ
ᑎᒍᔭᐅᓪᓗᑎᒃ ᐊᑭᕋᖏᓐᓄᑦ.
6ᔨᕉᓴᓕᐅᑉ ᐃᓂᖁᓇᕐᖕᓂᕆᕙᓚᐅᖅᑕᖓ ᐅᓂᒃᑳᑐᐃᓐᓇᐅᓕᖅᐳᖅ,
ᐊᖓᔪᖅᑳᕐᔪᐊᖏᑕ ᐃᕐᖕᓂᖏᑦ ᑐᒃᑑᔭᖅᑎᑐᑦ ᑍᒤᑉᐳᑦ ᓂᕿᒃᓴᖅᓯᔪᓐᓇᓐᖏᑦᑐᑎᑐᑦ.
ᕿᒫᓚᐅᖅᐳᑦ ᓄᑭᑭᓪᓗᑎᒃ ᐊᑭᕋᒥᖕᓄᑦ ᒪᓕᒃᑕᐅᓪᓗᑎᒃ.
7ᔨᕉᓴᓕᒻ ᓄᓇᓕᕕᓂᑐᐃᓐᓇᐅᓕᖅᓗᓂ ᐃᓂᖁᓇᕐᖕᓂᕆᓚᐅᖅᑕᖓ
ᑕᐅᑐᓐᖑᐊᕐᖕᓇᑐᐃᓐᓇᓕᖅᐳᖅ ᐊᑭᕋᒥᓄᑦ ᐱᔭᐅᑎᓪᓗᒍ
ᐃᑲᔪᖅᑎᒃᓴᖃᓚᐅᓐᖏᓚᖅ, ᓵᓚᖃᖅᑐᓪᓗ ᒥᑕᐅᑎᖃᖅᐳᑦ ᑲᑕᖕᓂᖓᓂᒃ.
8ᔨᕉᓴᓕᒥᐅᑦ ᐊᔪᖅᑐᓕᓚᐅᕐᖕᒪᑕ ᕿᒃᓵᖕᓇᖅᑐᒥᒃ ᒥᑕᐅᑎᒃᓴᑐᐃᓐᓇᐅᓕᖅᐳᑦ,
ᐅᐱᒍᓲᑎᖃᓚᐅᖅᑐᓕᒫᑦ ᒫᓐᓇ ᓇᕐᕈᓕᖅᐳᑦ,
ᓱᓇᖃᖏᓐᓂᖓ ᑕᑯᓕᕋᒥᑦᔪᒃ,
ᓇᖕᒥᓂᕐᓗ ᐋᓐᓂᐊᑎᑉᐳᑦ ᑲᓐᖑᓱᒃᓗᑎᒡᓗ.
9ᓴᓗᒪᖏᓐᓂᖏᑦ ᐃᔨᖅᓯᒪᔭᒃᓴᐅᓐᖏᓚᑦ, ᓯᕗᓂᒃᓴᒥᖕᓂ ᐃᓱᒪᓚᐅᖏᓐᓇᒥᒃ
ᐊᓯᕈᖅᑕᐅᓂᖓ ᑲᒪᓇᖅᐳᖅ, ᓮᒻᒪᖅᓴᖅᑎᒃᓴᖃᓚᐅᓐᖏᓚᕐᓗ,
ᐊᑕᓃᖅ ᐅᖁᒤᒃᓴᕐᖕᓂᕆᔭᒃᑲ ᑕᑯᓐᓈᓚᐅᒃᑭᑦ, ᐊᑭᕋᖅᑐᖅᑎᑦᑎᓐᓄᑦ ᓵᓚᐅᒐᑦᑕ!
10ᐊᑭᕋᖅᑐᑎᖏᑕᓗ ᐱᒃᑯᒥᓇᖅᑐᖁᑎᖏᑦ ᐱᐅᕋᖅᐰᑦ,
ᑕᑯᓐᓇᖅᐳᑦ ᑐᒃᓯᐊᕐᕕᒡᔪᐊᖓ ᐃᓅᖃᑎᒌᒡᔪᐊᓄᑦ ᐃᑎᖅᑕᐅᑎᓪᓗᒍ,
ᒎᑎᐅᑉ ᐅᒃᐱᕆᔨᒋᓐᖏᑕᒥᓄᑦ ᐃᑎᖅᑕᐅᖁᓚᐅᖅᓯᒪᓐᖏᑎᓪᓗᓂᐅᒃ.
11ᔨᕉᓴᓕᐅᑉ ᐃᓄᖏᑦ ᐊᒃᓱᕈᖅᓗᑎᒃ ᓂᕿᒃᓴᖅᓯᐅᖅᐳᑦ,
ᐱᖁᑎᑎᒡᓗ ᑕᐅᖅᓯᐅᑎᖃᑦᑕᖅᓗᒋᑦ ᓂᕿᒧᑦ ᐆᒪᑦᔪᑎᒋᓇᓱᐊᖅᓗᒋᑦ,
“ᑕᑯᒋᑦ ᐊᑕᓃᖅ ᓱᓇᐅᔪᓐᓃᖅᑐᖓ ᐃᓱᒪᒋᑦᓯᐊᓚᐅᓐᖓ.”
12ᐊᖅᑯᓵᖅᑐᓄᑦ ᐅᑦᔨᕆᔭᐅᔪᓐᓇᓐᖏᓚᖓ,
ᑕᑯᓚᐅᕆᑦᓯ ᐋᓐᓂᐊᓂᒃᑲ, ᐋᓐᓂᐊᔪᓄᑦ ᐊᑦᔨᐅᓇᓱᒋᒐᑦᓯᐅᒃ?
ᐊᑕᓂᐅᑉ ᓂᓐᖓᖕᓂᕐᖕᒥᓄᑦ ᓱᒋᐊᖅᓯᓂᕆᔭᖓ ᐅᕙᓐᓂᒃ.
13ᖁᑦᓯᒃᑐᒥᑦ ᐃᑯᒪᒥᒃ ᑎᑭᑎᑦᓯᕗᖅ ᐃᑯᐊᓚᔪᒥᒃ, ᓴᐅᓂᒃᑲ ᑎᑭᓪᓗᒋᑦ,
ᒎᑎ ᓂᒐᕐᕕᒃᓴᓂᒃ ᐋᖅᑭᒃᓯᕗᖅ,
ᓂᒐᕋᒪᓗ ᐅᑎᕆᐊᖅᑎᑉᐹᖓ, ᓱᓁᕈᑎᓪᓗᓂᖓ
ᓄᑭᖃᕈᓐᓁᖅᑎᑉᐹᖓ ᐅᓪᓗᓕᒫᖅ.
14ᐊᔪᖅᑐᓕᓂᒃᑲ ᑲᑎᑎᓪᓗᓂᒋᑦ ᓇᖕᒪᐅᑎᓐᖑᖅᑎᑉᐰᑦ,
ᐊᒡᒐᖕᒥᓄᑦ ᓄᕕᖅᓴᖅᓗᓂᒋᑦ ᖁᖓᓯᓐᓄᑦ ᑲᐅᑎᑉᐰᑦ.
ᐊᑕᓂᐅᑉ ᓄᑭᖏᕈᑎᑎᒻᒪᖓ ᐊᑭᕋᖅᑐᖅᑎᓐᓄᑦ ᐱᔭᐅᕗᖓ.
15ᐅᓇᑕᖅᑎᖁᑎᒃᑲ ᓴᓐᖏᓂᖅᐹᖑᔪᑦ ᐊᑕᓂᐅᑉ ᓇᕐᕈᒋᕔᑦ;
ᐅᓇᑕᖅᑎᓂᒃ ᑎᓕᓯᕗᖅ ᐃᓅᓱᒃᑐᖁᑎᒃᑲ ᐊᓯᕈᖅᑕᐅᖁᓪᓗᒋᑦ,
ᔫᑕᒥᐅᓪᓗ ᐅᐃᒡᒐᓱᖁᑎᖏᑦ ᐸᐅᕐᖓᖅᑎᑐᑦ
ᐃᑦᑏᔭᖅᑕᐅᓯᒪᔪᑎᑐᑦ ᑐᓪᓕᕋᖅᑕᐅᑎᑉᐰᑦ.
16ᑕᒪᓐᓇᓗ ᐱᓪᓗᒍ ᕿᐊᒧᑦ ᐃᔩᒃᑲ ᓴᓗᐊᔪᐃᑦᑑᓕᖅᐴᒃ ᖁᕝᕕᓐᓄᑦ,
ᓮᒻᒪᖅᑎᑦᓯᔪᒃᓴᖅ ᒪᑭᑎᑦᓯᔪᒃᓴᕐᓗ ᐅᕙᓐᓂᑦ ᐅᖓᓯᖕᒪᑦ
ᕿᑐᕐᖓᒃᑲᓗ ᐆᒪᑦᔪᑎᒃᓴᖃᕈᓐᓁᖅᐳᑦ, ᐊᑭᕋᕗᑦ ᓵᓚᖃᕐᖕᒪᑕ ᐅᕙᑦᑎᓐᓂᒃ.
17ᓮᐅᓂ ᐃᓵᖓᒐᓗᐊᕐᖕᒪᑦ ᐃᑲᔪᖅᑕᐅᔪᒪᓪᓗᓂ,
ᐃᑲᔪᖅᑎᒃᓴᖅᑕᖃᓐᖏᓚᕐᓕ, ᐊᑕᓂᐅᑉ ᔧᑯᒃᑯᑦ ᐅᓇᑕᕐᕕᐅᔭᖅᑐᖁᕔᑦ,
ᐃᓅᖃᑎᒋᓇᓱᒋᓚᐅᖅᑕᖏᑦ ᐊᑭᕋᖅᑐᓕᖁᓪᓗᒋᑦ,
ᔨᕉᓴᓕᒻᓗ ᓇᕐᕈᒋᔭᐅᓕᖅᐳᖅ ᐃᓄᖕᓄᑦ.
18ᐊᑕᓂᖅ ᓈᒻᒪᑦᓯᐊᖅᑐᒥᒃ ᐃᓕᖅᑯᓯᖃᖅᐳᖅ,
ᐊᑭᕋᖅᑐᓕᓚᐅᕋᒃᑭᑦ ᐱᖁᔭᖏᑦ ᑐᓴᖅᑕᐅᔪᒪᓕᖅᐳᖓ ᐃᓄᖕᓄᑦ
ᐋᓐᓂᐊᓂᒃᑲ ᑕᑯᔭᐅᖁᓪᓗᒋᑦ.
ᐃᓅᓱᒃᑐᖁᑎᒃᑲ ᐅᐃᒡᒐᓱᖁᑎᒃᑲᓗ ᑎᒍᔭᐅᓪᓗᑎᒃ ᐊᐅᓪᓚᕈᑦᔭᐅᓯᒪᖕᒪᑕ.
19ᑕᐱᕆᖃᑦᑕᓚᐅᖅᑕᒃᑲ ᐃᑲᔪᖅᑎᒋᔪᒪᒐᓗᐊᕋᒃᑭᑦ, ᐊᕕᑉᐹᖓ,
ᑐᓂᕐᕈᓯᖅᑎᑦᓯᔨᖁᑎᒃᑲ ᐊᖓᔪᖅᑳᖁᑎᒃᑲᓗ ᐱᖅᓕᕋᖅᐳᑦ,
ᐃᒡᓗᒐᓴᒡᔪᐊᓂ ᕿᓂᕋᓗᐊᖅᓗᑎᒃ ᓂᕿᒃᓴᒥᖕᓂᒃ ᐃᓅᑦᔪᑎᒋᓂᐊᖅᑕᒥᖕᓂᒃ.
20ᐊᑕᓃᖅ, ᑕᑯᓚᐅᓐᖓ ᐋᓐᓂᐊᖅᑐᖓ,
ᐃᓗᒃᑯᑦ ᐋᓐᓂᐊᓕᖅᐳᖓ, ᐆᒻᒪᑎᒐ ᓯᖁᒥᑉᐳᖅ,
ᐊᔪᖅᑐᓕᓯᒪᓂᕋ ᐱᑦᔪᑎᒋᓪᓗᒍ, ᓯᓚᒥ ᑐᖁᕋᐅᑎᔪᑦ ᐅᓄᖅᐳᑦ,
ᐃᒡᓗᒥᓗ ᑐᖁᖓᔪᖅᑕᖃᐅᓕᖅᐳᖅ.
21ᐃᓄᐃᑦ ᑐᓵᒐᓗᐊᕋᒥᒃ ᐅᖁᒤᒃᓴᕐᖕᓂᕆᔭᓐᓂᒃ ᓮᒻᒪᖅᓮᔪᒃᓴᖅᑕᖃᓐᖏᓚᖅ,
ᐊᑭᕋᖅᑐᖅᑎᒃᑲ ᑐᓴᕋᒥᒃ ᐊᒃᓱᕈᕐᖕᓂᕆᔭᓐᓂᒃ
ᖁᕕᐊᓲᑎᖃᖅᐳᑦ ᖃᐅᔨᒐᒥᒃ ᓱᒋᐊᖅᑕᐅᓂᓐᓂᒃ ᐃᓕᖕᓄᑦ
ᐃᖅᑲᖅᑐᐃᓂᕆᔪᒫᕐᖕᓂᕋᖅᑍᑦ ᓇᓪᓕᐅᑎᑎᑦᔪᒃ,
ᐅᕙᑦᑐᑦᑕᐅᖅ ᐅᖁᒤᓐᓇᖅᑐᒦᑎᒋᓕᖁᓪᓗᒋᑦ.
22ᐊᔪᖅᑐᓕᓂᖏᑦ ᓵᖕᓄᑦ ᓴᖅᑭᑎᒃᑭᑦ ᐱᓇᓱᐊᕈᑎᒋᓗᒋᓪᓗ,
ᑍᒫᒃᑕᐅᖅ ᐊᔪᖅᑐᓕᓂᒃᑲ ᐱᓪᓗᒋᑦ ᐱᓂᐊᕐᕕᒋᓚᐊᕋᕕᖓ,
ᐅᖁᒤᒃᓴᕈᑎᒋᔭᒃᑲ ᐅᓄᕐᖕᒪᑕ ᐆᒻᒪᑎᒐᓗ ᓄᑭᖏᕈᑎᓕᖅᐳᖅ.
Currently Selected:
ᔨᕆᒤᐊᐅᑉ ᐅᒡᒍᐊᕐᖕᓂᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.